TBP Balochi

نبشتانک: گوریلہ جنگ

نبشتہ کار: ھُدا وشک ءُ مھمد پاروک بلوچ

دی بلوچستان پوسٹ

پنچمی بھر

بے سوبیں چیرجنگ: انچوشکہ ماں اوگانستان ءَ، چَہ نیکراھیں اوگان تالبانانی چیرجنگی جُنز ءَ چہ وتکُشی ءُ دگریں چیریں بمب تْراکائی ءَ بے کساس بزگیں اوگان کُشتگ انت، چہ ایشانی آروس، وانگجاہ، نادْرھجاہ، ھوٹل، لیب ءُ گْوازی ءِ جاہ ءُ مُچی ئیں بازارانی تہ ءَ بازیں بمب تْرکائی ءَ آسر ءَ بے کساس بے گناھیں ورنائیں نودربر ءُ کماش، پوریاگِر، چُک ءُ زالبول مُرتگ ءُ نیم جان بیتگ انت پمیشکا اوگان لس مھلوک تالبان ءِ سر ءَ پِٹ ءُ زھر کن اَنت چمیشکا اوگان تالباناں وتی راجدوست ھم نہ منّ انت بلکیں پاکستان ءِ کاسگ چٹّ ءُ راجدروہ اش منّ انت۔ گِند ئے ایشانی چیرجنگی اُرش ءُ تراکاں ھپت دریا ءِ دِیریں امریکہ ءُ ناٹو باسک روگ ءَ بے وس کُتگ اَنت بلے پہ تالبان ءَ  لس اوگان ءِ دل ءَ نپرت ھست۔ چوناھیگا تالبانانی چیرجنگ یک نیکراھی جنگے اَت پمیشکا دیمتر ءَ بے سوب بیت۔
 
انچوشکہ گیدی ءَ ایوک ءَ راجی جُنز ءِ چیرجنگاں زورانسر ءِ ھلاپ ءَ باج بِرتگ لھتیں درور وی پی اے (ویتنام پیپل آرمی) ءَ امریکہ ءِ بگیری ءَ، بنگلہ دیش ءِ مُکتیبانی، ایراک ءِ زیردستی کُرد پشمرگا، سوریا ءِ کُرد وائی پی جی ءُ دگہ بازیں راجانی راجی آجوئی ءِ ھاتر ءَ چیرجنگ گوں سوباں روان انت۔ بلے وتی جند ءِ زیردستیں راج ءِ کُشگ ءُ بیران کنگ ءَ چیرجنگ ھچبر سوبمند نہ بنت بلکیں راج ءِ تہ ءَ راجی جُھد ءَ نزور بیت۔ ھمے داب ءَ کشمیر ءِ چیرجنگ انچوشکہ کشمیر ھچبر وتواجہ ءُ جُتائیں استانے نہ بوتگ اَت بلکیں اے پاکستان، بنگلہ دیش ءُ کشمیر دْراہ ھُشکنات ھند ءِ بَھر بیتگ انت وھدیکہ دومی جھانی جنگ ءَ رند 1947 ءَ انگریزاں ھندوستان دو بَھر کت گُڑا یکیں پاکستان ءُ دومی ھندوستان ٹھینت انت ئِے ءُ آ وھدی کشمیر ءِ بادشاہ راجہ ھری سنگھ بوتگ ءُ چہ ھندوستان ءِ بھر ءُ بانگ ءِ رِد ءَ کشمیر ءَ ھندوستان ءِ بھرے بوھگی اَنت بلے مھمد جناہ ءِ پرمان ءَ پشتون راج ءِ ٹکراں کشمیر ءِ سر ءَ اُرُش کت۔ بلے کشمیری وت جنگ ءَ گون نہ بوتگ انت بلکیں دگہ راج انچوشکہ پشتون چہ ھندوستان ءَ کشمیر ءِ زورانسری ئیں آجوئی ءُ  پچگِرگ ءَ جنگ ءَ شُت انت پد ءَ ھمے کشمیر ءِ لھتیں بھرے رَدیں پشتوناں پاکستان ءِ زیردستی ءَ دات۔ 
 
اے گپ چہ راجدپتر ءَ پلگار  انت کہ پہ کشمیر ءَ ھچبر راجی چیرجنگ نہ بوتگ البت سوت یونین ءِ بگیری ءَ 1979-89 اوگانستان نیکراھی جھاد ءَ رند لھتیں پنجابی ءُ پشتون جھادیاں چہ 1989 ءَ رند کشمیر ءَ نیکراھیں چیرجنگے بُنگیج کتگ انت کہ ماں آئی ءَ پاکستانی لشکر ءِ وتی بجٹ ءُ لشکر ءِ زاتی پائدگ ءَ ھست ات انت گُڑا 9/11  ءِ وھیل ءَ رند، وھدیکہ ھندوستان امریکہ ءُ نیٹو ءِ سرکماشی ءَ اوگان تالبان ءِ ھلاسی ءَ اوگانستان جنگ ءَ امریکہ ءِ راستیں باسکے بوتگ گُڑا امریکی بیھار ءُ پاتراپ ءَ مشرپ ءَ وتگڑیں کشمیری جھاد پہ زر ءِ لب ءُ لالچ ءَ ھلاس کنائینتگ پمیشکا ما بلوچ وتی ھیال ءُ لیکھانی رِد ءَ کشمیر ءَ جیڑھے نہ پھم ایں۔
نی ما وتی سرھال ءِ گُڈسر ءَ چیرجنگاں پْروش دیگ ءِ سر ءَ درنگازی کن ایں چوناھیگا آشوب ءُ راجی مارشت ءِ سسائیں راجی چیرجنگاں ھچبر پْروش دیگ نہ بیت البت پہ کمیں وھدے ءَ نزور تر اَنت بلے پد ءَ وتی پُلامُرزی ئیں وھد ءِ سر ءَ زیردستیں راج ءِ سسائی ورنا جنگ ءَ پاد کا اَنت انچوشکہ ایراکی کُرد پشمرگا ءِ چیرجنگ دوبر نزور بیتگ ءُ سَمی بَھر ءَ سوب اش زورتگ۔۔۔۔۔
روان اِنت۔۔۔۔۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن پرنٹ ءَ وتی شنگ کتگیں درشان ءِ تہءَ مستونگ ءِ ھند اسپلنجی شیشار ءَ یوپون ٹاور ءِ ماندارگ ءِ زِمہ واری منّ اِتگ۔

بلوچستان لبریشن پرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشان ءِ تہءَ گْوشتگ کہ چاردہ ساچان ( 14 اگست ) ءِ شپ ءَ مئے سرمچاراں مستونگ ءِ ھند اسپلنجی شیشار ءَ یوپون شِرکت ءِ موبائل ٹاور ءِ مشین ءُ اے دِگہ توامیں ازباب سرجم ءَ مانداشتگ ءُ تباہ کُرتگ اَنت۔

میجر گْوھرام بلوچ ءَ وتی درشان ءِ دیمتِر ءَ گْوشتگ کہ زُورگِریں ریاست وتی آسراتی ءُ سرمچارانی ٹریک کنگ ءِ واستا ٹیلی کمیونیکیشن شِرکت ءِ کُمکّ ءَ موبائل ٹاورانی سر ءَ ٹریکنگ ءِ نوکیں ازباب، کیچر ءُ اے دِگہ ڈیوائس جتگ ءُ بلوچ جُھد کارانی تاوان دَیَگ ءِ جُھد کنگ ءَ اِنت، بلے ما چہ اے ھیلہ ءُ ھُنراں شرّی ءَ آشنا ءُ اے توامیں سامراجی شوربندی مئے سرمچارانی نِشانگ ءَ اَنت ۔

بلوچستان لبریشن پرنٹ ءِ جارکشّ میجر گْوھرام بلوچ ءَ وتی درشان ءِ گُڈّسر ءَ گْوشتگ کہ مئے اے اُرشانی دْرچ دانکہ ایردستیں بلوچستان ءِ وتواجھی ءَ گوں تْرندی ءَ برجاہ بَہ اَنت-

آزمانک: بیگواہ

نبشتہ کار: پدا بشیر

دی بلوچستان پوسٹ

گڈی بھر

سیمی روچ گوں مراد ءِ ترانگ ءَ برکت بوت ءُ مراد ھم منی واست ءَ جیڑگ ءَ اَت آ شپ ءَ من کمو واب کپتگ اِت آں کساس 30 دمان ءَ من واب اِت آں کہ یک پوجی یے منی کِر ءَ آتک ءُ من ءَ چہ واب ءَ پاد ئِے کُت آیاں من ءَ گْوشت ئِے “اُٹھو آپ کو صاحب بولا رہا ہے” من ھیران بوت آں کہ اے وھد ءَ من ءَ ساھب چون کنت گڑا من ءَ ایشاں زُرت ءُ ساھب ءِ کِر ءَ بُرت وھدے من ساھب ءِ گور ءَ سر بوت آں گڑا من چار اِت کہ دو موٹل اوشتاتگ اَت ایشاں مارا پہ زور ماں موٹل ءَ سوار کرت ءُ مئے چم اِش بست اَنت ءُ ما نہ زانت آ دیم ءَ وت کُجا شُت اَنت۔

کساس ما ھپت ساھت ءَ سپر کُت گڑا موٹل یک جاھے ءَ اُوشتات ءُ مارا چہ موٹل ءَ درّ اِش کُت یکے ءَ منی دست گپت ءُ دومی ءَ مراد ءِ دست ءُ ما 10 دمان ءَ پند شُت ایں کوٹی ءِ تہ ءَ من وتی چمّاں مُشت ءُ چار اِت داں یک مزنیں کوٹی یے ءُ کساس 15 پوجی مئے کِر ءَ اُوشتاتگ گڑا مارا کرسی ءِ سر ءَ نِندارینت ءُ جُست کنگ بندات بوت۔

میجر: اچھا سلیم اب اپنا جُرم کا اعتراف کرو ورنہ آپ کو اور آپ کے دوست کو سخت سزا دی جائے گی پھر نہ کہنا کہ آپ کو موقع نہیں دیا۔

حمل: سر جی میں سلیم نہیں حمل ہوں اور میں کس جرم کا اعتراف کرو جو کہ میں نے کیا ہی نہیں۔ میجر ءَ من ءَ چم سور دات ءُ گْوشت۔ میجر: اگر آپ نہیں مانتے ہو تو آپ کے ساتھ وہ ہوگا جو آپ نے نہ سنا ہوگا نہ دیکھا یہاں سے تم تب زندہ جاؤ گے جب تم سب کچھ مان کر ہمارا ساتھ دوگے ورانہ اِس جیل میں مر جاؤگے۔ گڑا من گوشت میں نے کچھ نہیں کیا ہے تو میں اعتراف نہیں کرسکتا ہوں۔

میجر: تمہیں پتا ہے تمہاری بہن اور چھوٹا بھائی ہمارے قبضے میں ہے ہم جو چائے تو کرسکتے ہے اب بھی اعتراف نہیں کیا تو تم کو تمہارے بہن اور بھائی کا لاش دیکھنا نصیب نہیں ہوگا-

حمل: آپ کو جو کرنا ہے آپ کرسکتے ہو لیکن جو میں نے نہیں کیا تو میں قبول نہیں کروں گا۔

گُڑا میجر سرپد بوت کہ ھمل ءَ ھچ نہ کُتگ ءُ میجر ءَ مراد زُرت ءُ دگہ کوٹی یے ءَ شُت پد ءَ من ءَ میجر ءَ ھچ ھبر نہ دات بلے آئی ءَ مراد کُجا بُرت من ھچ سرپد نہ اِت آں چہ ھما روچ ءَ پد من مراد نہ دیست ھر روچ ءَ من ءَ ایشاں وڑے نا وڑے ءَ سزا دات کساس من پنچ سال ءَ زالمانی کِر ءَ اِت آں من چہ وتی زند ءَ تنگ اِت آں منی کِر ءَ ھچ چیز نیست اَت کہ من وتکُشی بہ کن آں گڈی ءَ ایشاں من ءَ 2021 ءِ یک سردیں شپے ءَ زُرت ءُ ماں زیارت ءِ جنگل ءَ یل دات۔

من ھچ نہ زانت کہ من کُجا آں آ سُھب ءِ سر ءَ من شیپّانکے دیست ءُ من ءَ جُست ئِے کُت کہ واجہ تئی نام کے اِنت ءُ کجا نشتگ ئے منی نام ھمل اِنت بلے اے کُجام جاگہ اِنت شِیپّانک ءَ گوشت اے زیارت اِنت۔ زاناں ترا شال ءَ روگی اِنت؟ جی ھو۔

گڑا شِیپاّنک ءَ من ءَ بسے ءَ سوار بوگ ءَ کُمک کُت ءُ من دیم پہ شال ءَ شُت آں پد ءَ من تچک ءَ نادْرہ جاہ ءَ شُت ءُ وتی ٹیسٹ کنائینت اَنت پد ءَ دیم پہ گریشگ ءَ روان بوت آں۔

وھدے من گریشگ ءَ سر بوت آں داں مئے لوگ پوج ءَ آس داتگ ءُ منی کسانوکیں برات کمبر آیاں کُشتگ من وتی میتگ ءِ آپ هم نہ وارت دیم پہ کوہ رپت آں هما اِنت کہ من وتی گلزمین ءِ واست ءَ جنگ کنگ ءَ آں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن فرنٹ ءَ گْوادر ءِ ھند شِنکانی در ءَ گْوادر پورٹ ءِ ٹرالر گاڑیانی کاروان ءِ سر ءَ اُرش ءِ زِمہ واری منّ اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشان ءِ تہ ءَ گْوشتگ کہ مرچی نیمروچ ءِ ادار دو ءَ سرمچاراں گْوادر ءِ ھند شِنکانی در ءِ نزّیک شدات پل ءَ گْوادر پورٹ ءَ چہ سامان بروکیں پنچ ٹرالر گاڑیانی سر ءَ اُرش کُرتگ۔ اُرش ءِ آسر ءَ یک ڈرائیورے ٹپّی ءُ گاڑیاناں باز تاوان رس اِتگ۔

چہ ڈرائیوراں دزبندی اِنت کہ آ بلوچ ءِ گْواجنانی لُٹّ ءُ پُل ءَ گوں زُورگریں پاکستان ءُ چین ءِ ھمراھداری ءَ چِہ وت ءَ دُور بدار اَنت، چی ءَ کہ اے مُلک گْواجنانی لُٹّ ءُ پُل ءَ ھوار بلوچ چُکچینی ءِ ھم مُجرم اَنت۔

میجر گْوھرام بلوچ ءَ وتی شِنگ بوتگیں درشان ءِ دیمتِر ءَ گْوشتگ کہ گْوادر پورٹ ءِ گاڑیانی سر ءَ اُرش ءِ مکسد چین ءُ اے دِگہ واپاراناں اے کلوہ دَیَگ اِنت کہ گْوادر ءَ ھوار بلوچستان ءِ اے دِگہ ھند ءُ دمگاں چہ واپاری ءِ کنگ ءَ دزکشّ بِہ بَہ اَنت، چی ءَ کہ اے واپاریانی تہ ءَ بلوچ راج ءِ رزا گون نہ اِنت۔ یکرندے پد ءَ ما اے گْوشگ لوٹ اِیں کہ کُجام ملک یا کارپوریشن بلوچستان ءِ گْواجنانی پٹّ ءُ پول، زُورانسریں لُٹّ ءُ پُل ءَ پاکستان ءِ کُمکّ ءَ کنت، گوں آئی ءَ ھم یک میاربارے ءِ رنگ ءَ پیش کائیں۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی درشان ءِ گُڈّسر ءَ گْوشتگ کہ داں ایردستیں بلوچستان ءِ آجوئی ءَ مئے اے اُرش دُژمِن ءُ آئی لُٹّ ءُ پُل کنوکیں کُمکّارانی سر ءَ گوں تْرندی ءَ برجاہ مان اَنت۔

نبشتانک: گلام ءَ را ھچ ھبر پِر نیست

نبشتہ کار: ساجد بلوچ

دی بلوچستان پوسٹ

گِند ئے گلامی چہ شومّک ءِ نادْراھی ءَ کمتر نہ اِنت، اگاں یک مردمے گل ءُ شادان اِنت بلے آ چہ مجگ ءَ گلام اِنت گڑا آئی ءِ زند ءَ ھچ پائدگ نیست پرچاکہ آ پہ راج ءَ ھچ کُت نہ کنت بلکیں ھمے مرد دِگراں مزید سکین دنت کہ شما ھم منی ڈول ءَ بہ بہ اِت۔

گلام وتی ھکاں بھ سرپد نہ بنت ءُ آ مُدام کسانیں چیزانی سر ءَ گل بنت۔ چوناھا گلام ھر وھد ءَ گل اَنت بلے آیانی میار ھم نہ اِنت پرچاکہ آ راست ءَ وَ سرپد نہ اَنت اگاں سرپد اَنت گڑا سک تْرس اَنت۔ بلے جاھے چے گویرا گْوش ایت”من ھما مردم ھم کبرستان ءَ دیستگ اَنت آیاں گْوشتگ مارا چہ مرگ ءَ تْرس ایت”-

آ گار اَنت آ بس ھمے پوہ بنت کہ زند ءِ بزانت ھمیش اِنت آجوئیں پرزند ھر وھد ءَ یک سوچے ءَ کپتک اَنت آ مُدام ھمے لوٹ ایت کہ من چیزے ناں چیزے پہ وتی راج ءَ بہ کن آں۔ گلامیں مردمانی باز دْروشم ھست اَنت ءُ آ دْروشم مارا مئے چاگرد ءِ ھر تَک ءُ پھناتاں گِندگ ءَ کیت اولی ھمیش اِنت کہ چندیں گلام ھست اَنت کہ آ مُدامی وتی ڈولیں گلامانی سر ءَ زِدّ ءُ کینگ دار اَنت لھتیں ھمے لوٹ ایت کہ ما وتی دومی گلامیں بْرات ءَ تاوان بہ دے ایں بلے آ اے چیز ءَ سرپد نہ اَنت کہ آ وَ وت پیسر ءَ مُرتگ اَنت۔

دومی ھمیش اِنت کہ آ پیسر ءَ چہ لوگ ءَ گلام جوڑ بوتگ اَنت مئے چاگرد ءِ 50 در سد بلوچ زال ھست اَنت کہ وت گلام اَنت ءُ ھمے گلامی ءَ وتی مرد ءِ تہ ءَ برجم دارگ لوٹ اَنت ءُ اے گپ ءَ کس چیر دات کُت نہ کنت کہ آ اے ڈول نہ اَنت اے ڈولیں گلامی انسان ءَ را ممّی ڈیڈی جوڑ کنت وھدے کہ مرد ممّی ڈیڈی یے بیت گڑا آ پہ بزّگیں راج ءَ کُجام زھم ءَ جنت اے جیڑہ ءِ ھل کنگ ءِ واست ءَ لازم نہ اِنت کہ آ بِوان اَنت پرچاکہ بازیں نیم وانندگ ھست اَنت کہ آ وت پہ زور ھمے ڈول کن اَنت بلکیں اے جیڑہ ءِ مستریں ھل ایش اِنت کہ آ گْواچن ءَ بہ زان اَنت کہ مئے راج ءِ تہ ءَ چے بوھگ ءَ اِنت من گْوش آں مئے مستریں جیڑہ وَ گلامی اِنت۔

سیمی گلامی ءِ رنگ ایش اِنت کہ باز مردم وت سر ءَ وت وت ءَ مزن لیک اَنت ءُ اے گلامی ءِ مستریں سبب اِنت راستی ءَ آ گلام اَنت بلے واجی سوچ دار اَنت۔ واجی ھما وھد ءَ بیت وھدے کہ وتی زمین ءِ مالک تو وت بہ ئے واجی ھما وھد ءَ وش اِنت وھدے کہ تو نزوریں مردمانی سر ءَ زُلم نہ کن ئے بلکیں آئی ءِ کُمک ءَ کن ئے۔

چوناھا گلامی ءِ راستیں بزانت ایش اِنت کہ تو وتی چمّاں بند کن ئے دِگر ءِ گپ ءَ زیر ئے توری آ رَد بہ بیت تو زان ئے اے چیز کہ من کنگ ءَ آں رَد اِنت بلے تو انگت کنگ ءَ ئے گڑا ایشی ءَ گْوش اَنت گلامی ءِ مستریں نشانی۔

اِنچو گلامی! کہ تو گلامانی گلامی ءَ بہ کن ئے، واجہ ءِ گلامی ءَ بہ کن ئے، سردار ءِ گلامی بہ کن ئے، جن ءِ گلامی ءَ بہ کن ئے، واھشتانی گلامی ءَ بہ کن ئے گڑا گڈی ءَ تو چونیں انسانے بہ ئے تو من ءَ بہ گْوش کہ اے ڈولیں زندگی مارا یک شرّیں بانداتے دنت گڑا بلکل من ھم تیار آں، اے رنگیں زندگی ءِ گوازینگ آں۔

مئے گوانڈوھاں وانگ ءِ واست ءَ وانگجاہ نیست بلے آیانی چُک پرلیمنٹ ءَ اسپیچ دے اَنت آیانی چُک رو اَنت ڈنّی ملکاں وان اَنت بلے مئے پہ چُنڈے نانے ءَ تلوس اَنت۔ وھدے کہ آیانی چُک نادْراہ بنت آیانی واست ءَ شرّیں شرّیں نادْرھجاہ ھست بلے مئے جینوکو چہ شومک ءِ نادْراھی ءَ مِرگ ءَ اَنت۔ اڑے من بْیال آں گلام ءَ را ھچ ھبر پِر نیست۔

گڈی ءَ مارا اے چیز سرپد بوھگی اِنت کہ اگاں تو گلام ئے، گڑا تو بہ زان تو مُرتگ ئے اگاں تو گلام ئے، گڑا تو بہ زان ترا ھستی نیست اگاں تو گلام ئے، گڑا تو بہ زان تو ممّی ڈیڈی یے ئے وتی زبان ءَ بہ وان، وتی کلچر ءَ پیلو بہ کن، وتی کُمک ءَ وت بہ کن، گڑا بوت کنت تو زندگ بہ بہ ئے
منّتوار ھر کُجا اِت بلوچ بات اِت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔