TBP Balochi

یورپی یونیں ءِ نیمگ ءَ گمانی بندش ءُ دگہ گمانانی پژدر ءَ تاجراں روسی ڈیزل ءِ مُچ کنگ بندات کتگ –

ھال سرکنوکیں ادار روئٹرز ءِ رد ءَ یورپی یونین پنچ فروری ءَ داض روس ءَ بھا بیوکیں تیل ءِ سر ءَ بندش جنت چریشاں درستاں گیشتر ڈیزل بندش ءِ دیمپان بیت اِنت-

ھمے وڑ روسی دگہ تیلانی بندش ءِ سر ءَ ھمے سال ءِ دسمبر ءَ داں بندش جنگ بیت اِنت –

برطانوی کمپنی وورٹیکسا ءِ کلانیں منیجر پامیلا منگر ءَ گوشتگ کہ اکتوبر ءِ میان ءَ داں دوازدہ نبر ءِ میان ءَ یورپ ءَ مچ کنگ بیتگیں روسی ڈیزل ءِ کساس ءَ یک سد ءُ بیست ءُ شش درسد گیش بیتگ-

نومبر ءَ کچ ءُ کساساں چارگ بہ بیت گڑا اشی ءَ چہ پدر بیت اِنت یورپ ءَ ھلوکیں گاڑیاں کارمرد بیتگیں تیل چل ءُ چار درسد روسی ڈیزل بیتگ ءُ اکتوبر ءَ سی ءُ نُھ بیتگ-

ھمے سال ءِ فروری ءَ یوکرین ءِ سر ءَ بیتگیں اُرش ءُ یورپ ءَ روسی تیل ءِ کساس ءَ پنجاہ درسد کم بیتگ بلے داں انگت ءَ یورپ ءَ ڈیزل پُجارینوکیں ڈیھاں درستاں مستریں ڈیھ رود اِنت-

زرکاری زانتکار یوجین لنڈل ءِ گوشگ اِنت روس ءِ بندش ءَ ہد یورپی یونین ءَ کساس پنج سد یا شش سد بیرل ڈیزل ھمک روچ مچ کنگ لوٹ ایت اے امریکہ، روبرکت ءُ انڈیا ءَ کشگ بنت-

سی نومبر ءَ داں یورپی تاجراں واکدراں اے پیش کنگی اِنت ایمسٹرڈیم روٹرڈیم ءُ اینٹورپ (اے آر اے) ءِ زری دمگاں کجام ھم رنگیں روسی تیل مچ نہ کن اَنت –

روکپتی بلوچستان ءِ نامی ئیں عالم دین ءُ راجدوست مولانا کوھی شش روچ ءِ واستا چہ زندان ءَ کشگ بیتگ ءُ لوگ ءَ رھادگ کنگ بیتگ-

گیشیں ھالانی رد ءَ ایران ءِ اُستان مشھد وکیل آباد ءِ زندان ءَ بندیگیں مولانا فضل الرحمان کوھی شش روچ ءِ واستا یل ہنگ بیتگ ءُ لوگ ءَ رھادگ کنگ بیتگ-

زانگ بہ بیت مولانا کوھی ءَ گوستگیں روچاں یک شنگ کتگیں توار بندے ءَ گشتگ ات کہ منی اجازت دیگ ءِ وھد اتکگ بلے من ءَ اجازت دیگ ءَ نہ اَنت چریشی ءِ سر ءَ آئی ءَ شد داں مرگ ءِ ھرتال کنگ ءِ جار جتگ اَت –

آئی ءَ وتی توار بند ءَ گوشتگ ات کہ من ءَ اجازت دیگ ءَ نہ اَنت ءُ چریشی ءِ سر ءَ من مشھد وکیل آباد ءِ زندان ءَ شد داں مرگ ءِ ھرتال ءِ جار ءَ جن آں –

مولانا کوھی ایرانی سال نود ءُ ھشت ءَ ما ایران ءِ ھلاپ ءَ ترندیں درشانانی پژدر ءَ زندانی کنگ بیتگ ءُ چریشی ءَ چہ پد آ زاندانی سزا ءَ شتگ –

مولانا کوھی ءَ زندان ءَ وھد وھد ءِ سر ءَ لوگ ءَ آیگ ءِ موکل ءَ دیگ ءَ اَنت چریشی ءَ پیسر ھم دو رند ءَ آئی ءَ را موکل دیگ بیتگ ءُ پد ءَ نزربند کنگ بیتگ-

فیفا فٹبال ورلڈ کپ گوازی مروچی بندات کنگ بوتگ ءُ ورلڈ کپ ءِ اولی گوازی گتر ءُ ایکواڈور ءِ میان ءَ کنگ بوتگ کہ ایکواڈور ءَ جوانی ءَ گوازی کنان ءَ دو گول ءَ گوازی کٹ اِتگ –

گتر ءُ ایکوڈور ءِ میان ءَ بوتگیں مروچیگیں گوازی ءَ ایکوڈور ءَ جوانی ءَ گوازی کنان ءَ اولی ھاپ ءَ دو گول اسکور کتگ انت کہ اولی ھاپ ءِ ھردو گول ایکوڈور ءِ لیبی اِنر ویلنسیا ءَ داتگ انت – کہ آئی ءَ یک گول ءِ پیلانٹی شوٹ ءَ اسکور کتگ دومی گول سِی ءُ یکمی ملٹ ءَ اسکور کتگ – دومی ھاپ ءَ گتر ءِ لیبیاں آھانی دیم جوانی داشتگ ءُ گول اسکوری ءَ نہ اشتگ انت –

وھدیکہ گتر ءِ نیمگ ءَ ھچ گول اسکور کنگ نہ بوتگ ءُ گتر وتی ھوم گراؤنڈ ءَ فیفا ورلڈ کپ ءِ اولی گوازی ءِ کٹگ ءَ بے سوب بوتگ –

زانگ بہ بیت مروچی ورلڈ کپ ءِ اولی گوازی بوتگ ءُ اے ورلڈ کپ تاں سرجمیں ماھے برجاہ بیت اِنت ءُ اشی ءِ گڈی (فائنل) گوازی ھژدہ دسمبر ءَ بیت اِنت –

فٹبال ورلڈ کپ اے رندی دنیائے کستریں ڈیھے ءَ بزاں گتر ءَ کنگ بوگ انت ءُ ورلڈ کپ ءِشست ءُ چار گوازی ءَ ماں گتر ءِ جتا جتائیں بازاراں ھشت فٹبال پٹاں کنگ بنت –

گتر ءَ برجاھیں ورلڈ کپ چارگ ءَ جھان ءِ کُنڈ کُنڈ ءِ مردماں وت ءَ سرکتگ کہ آھانی تہ ءَ جھان ءِ نامی ایں ازمکار ھم اتکگ انت ءُ وتی ازم درانگاز انت – زانگ بہ بیت اے ھم اولی رند انت کہ فیفا ورلڈکپ ھلیج ءِ ڈیھے انت ءُ اے ورلڈکپ زمستان ءَ بوگ ءَ انت –

فیفا ورلڈ کپ ءِ باج برگ ءِ ھاتر ءَ سِی ءُ دو ٹیماں وت ءَ گتر ءَ سر کُتگ ءُ درسیں ٹیم چار چار انت ءُ ھشت ٹولی ءِ تہ ءَ بھر انت – اولی ٹولی ءِ تہ ءَ گتر ءُایکواڈور، سینیگال ءُ ہالینڈ دومی ءَ انگلینڈ، ایران، امریکا ءُ ویلز، سیمی ءَ ارجنٹائن، سعودی عرب، میکسیکو ءُ پولینڈ، چارمی ءَ فرانس، آسٹریلیا، ڈنمارک ءُ تیونس، پنچمی ءَ اسپین، کوسٹا ریکا،جرمنی جاپان،ششمی ءَ بلجیم، کینیڈا، مراکش ءُ کروشیا ھپتمی ءَ برازیل، سربیا، سوئٹزرلینڈ ءُ کیمرون، ھشتمی ءَ پرتگال، گھانا، یوراگوئے ءُ جنوبی کوریا ھوار انت – ھمک روچ چار گوازی کنگ بیت اِنت ءُ اے گوازی دوازدہ روچاں تاں برجاہ بنت ءُ ھر ٹولی ءِ تہ ءَ دو ٹیم دومی راؤنڈ ءَ کوالفائی کنت –

فیفا ورلڈ کپ ءِ دیمتری گوازی باند ءَ انگلینڈ ءُ ایران، سینگال ءُ نیدر لینڈ، یو ایس اے ءُ ویلز ءِ میان ءَ گتر ءِ جتا جتائیں پٹاں بنت –

بلوچستان ءِ تیاب دپی دمگ گوادر ءَ ھک دو تھریک ءِ نندانک برجاہ، مروچی ھزارانی کچ ءَ درنگاز کنوکاں سی پیک شھدگ ءِ سر ءَ نندانک جتگ ءُ گوادر پورٹ بند کتگ ءُ آئی بگیری ءَ اوگام جتگ –

بلوچ ءِ زر ءَ در کانودی ٹرالنگ، بلوچستان ءِ زورانسری آوار جتگیں مردمانی یل نہ کنگ، سیمسر ءِ پچ کنگ ءَ ھوار دگہ لوٹانی بگیری ءَ مروچی بیست ءُ چارمی روچ ءَ شھید لالا حمید چار راہ ءِ سر ءَ ھک دو تھریک بلوچستان ءِ نندانک برجاہ بوتگ –

ھمے میان ءَ نندانک ءَ درنگاز کنوکاں مزنیں کچے ءَ سراں کپن بستگ ءُ گوادر پورٹ ءِ بگیر ءَ اوگام جتگ گڈا ھمے وھد ءَ زالبولانی ھم مزنیں کچے ءَ اتکگ ءُ نندانک جاہ ءَ نشتگ انت –

گڈی ھالانی رِد ءَ تنی وھدی مزنیں کچے ءَ مردم گوادر پورٹ ءَ ھمگرنچیں دیمی زر ءِ ایکسپریس وے ءَ نندانک ءَ نشتگ انت –

ھمے وھد ءَ مولانا ہدایت الرحمن ءُ دگہ مردماں تران کنان ءَ گوشتگ کہ گوادر ءَ در کانودی ٹرالنگ ھلاس کنگ بہ بیت، بازارانی نزیک ءِ پانگس ھلاس کنگ بہ بنت، سیمسر ءَ ھمگرنچیں باپاری کنوکیں مردمانی جیڑہ گیشگیوار کنگ بہ بنت –

آھاں زورانسری آوار جنگ بوتگیں مردمانی یل کنگ ءِ لوٹ ھم کتگ ءُ گوشتگ کہ درسیں مردم وش ءُ سلامتی ءَ یل کنگ بہ بنت ءُ اے دیریگیں جیڑہ گیشگیوار کنگ بہ بیت ءُ نشہ ءِ باپاری ءِ بگیری ءَ جوانیں گامگیج زورگ بہ بیت –

آھانی گوشگ ات کہ اے پورٹ پہ مئے ھاتر ءَ نہ انت اشی ءِ برورد پنجاپ ءَ رسگ انت مئے بھر ءَ بس پوجی پانگس انت –

آھانی گوشگ ات کہ پرگینگی ءُ بنجاھی سرکار یک پاٹی ءِ دست ءَ بلیک میل بوتگ انت – اگاں آ گوں ما گند ءُ نند نہ کن انت گڈا گوادر پورٹ ءِ دیم ءَ نندانک برجاہ بیت اِنت –

درنگاز کنوکانی گوشگ ات کہ اے پورٹ پہ دیمروئی ءِ نہ اِنت لٹ پُل ءِ پورٹ اِنت ءُ ایشی ءَ ما نہ منّ ایں – مئے گور ءَ پہ ورگ ءَ آپ نیست ءُ آ اشی ءَ دیمروئی گش انت –

یک ھپتگے ءَ پیسر استنبول ءَ تراک ءَ پد شمبے ءِ روچ ءَ ترکی ءَ گوریچانی شام ءِ جتا جتائیں جاھاں برزی اُرش کتگ اَنت-

امریکہ ءِ ھال سرکنوکیں ادارہ اے پی ءِ رد ءَ ترکی ءِ واکداراں استنبول ءَ بیتگیں تراک ءِ زمہ واری کردستان ءِ سلاہ بندیں گل کردستاب ورکرز پاٹی ءُ آئی ءَ ھواریں شام ءِ گلانی سر ءَ لڈ اتگ-

گوستگیں ھپتگ ءَ استنبول ءِ یک دزبندتریں بازارے ءَ تراکے بیتگ اَت چریشی ءَ ھشت مردم بیران ءُ ھشتاد ءَ گیش زدگ بیتگ ات اَنت-

کردستان ءِ سلاہ بندیں گل ءَ ترکی ءِ اے بھتام رد کتگ اَت –

انقرہ ءُ واشنگٹن ءَ ھردوکاں سلاہ بندیں کردستان ورکرز پاٹی یک ناشریں گلے گشتگ ءُ ھردوک گوریچانی کرد گلانی اسٹیٹسانی بارو ءَ تپاک نہ کن اَنت-

گوریچانی کرد گل داعش ءِ ھلاپ ءَ بیڑاں امریکہ ءِ منّوک بیتگ اَنت اُرش ءَ پد ترکی ءِ وزارت دفاع ءَ یک جنگی بالیگے ءِ اکس پوسٹ کرتگ ءُ نبشتہ کرتگ کہ ناشریں بیڑ کنوکیں اُرشکاراں چہ ھساب گرگ بیت اِنت-

ترکی ءِ سیمسراں اسٹریٹجک ءِ شھر کوبانی ءَ برزی اُرش کرتگ اَنت کہ اشی ءِ سر ءَ پیسر ءَ ترکی ءَ زوگری ءِ جھد کتگ ات دانکہ گوریچانی شام ءِ نزیک ءَ یک مھکمیں بنجلے پہ وت ءَ جوڑ کت بہ کن آں-

ایس ڈی ایف ءِ جارکش فرھاد شامی ءَ ٹویٹ کرتگ ءُ گوشتگ کہ دو میتگانی مردم چہ پیسر ءَ بے لوگ بیتگ اَنت ھمے میتگ نشانگ کنگ بیتگ اَنت-

آئی ءَ دیمتر ءَ گیش نبشتہ کرتگ ءُ گوشتگ کہ اے اُرشاں بازیں مردمے بیران ءُ زدگ بیتگ اَنت-

شام ءَ رسانکدراں ھال شنگ کتگ کہ ترکی ءَ کردستان ءِ سیریئن ڈیموکریٹک لشکر نشانگ کتگ-

ھمے وڑ ءَ برطانیہ ءِ یک گلے سیریئن آبزرویٹری فار ھیومن رائٹس ءَ گوشتگ کہ برزی اُرشاں چہ شامی لشکر ءِ بنجل ھم نشانگ کنگ بیتگ اَنت کہ چریشی ءَ ایس ڈی ایف ءُ شامی لشکر ءِ کارندھاں ھوار کم چہ کم دوازدہ مردم بیران بیتگ اَنت-

آبزورویٹر ءِ گوشگ اِنت ترکی ءِ جنگی بالیگاں الیپو، رقہ ءُ ھسکاوی ءَ کساس بیست ءُ پنچ اُرش کرتگ اَنت-

بلوچستان ءِ دمگ خضدار ءَ ناشناسیں مردماں تپراں گوں اُرش کُتگ ءُ زالبولے ءَ ھوار سئے مردم کُشتگ اَنت۔

وئیل خضدار ءِ ھنکین کرخ اکرو ءِ ھند ءَ یک شمبے ءِ سھب ءَ دیما اتکگ کہ اود ءَ جنینے ءَ ھوار سئے مردم کُشتگ بیتگ اَنت وھدیکہ اُرشکار چہ وئیل جاہ ءَ تچگ ءَ سوبمند بیتگ اَنت۔

لیویز اھوالانی گُشگ اِنت کہ ھنکین انگیر کنگ بیتگ ءُ اُرشکارانی پَٹ ءُ پول بندات کنگ بیتگ وھدیکہ وئیل ءِ پُشدر ءِ سوب داں انگت زانگ نہ بیتگ اَنت وھدیکہ جون گورنمنٹ ٹیچنگ نادراھجاہ ءَ سر کنگ بیتگ اَنت۔

نگدی چمشانک (پتھرکا زمانہ، کانسی کا زمانہ، لوہے کا زمانہ)

نبشتہ کار : ڈاکٹر مبارک علی

چمشانک دئیوک : گل ھسن بلوچ

دی بلوچستان پوسٹ

اِے سئیں بھر بزاں (جلد) ( پھتر کا زمانہ، کانسی کا زمانہ، لوہے کا زمانہ)  سئیں بھر (جلد) بنی آدم ءِ تھذیب ءِ سر ءَ نبشتہ کُتگ اَنت بنی آدمی تھذیب ءِ سَے بھر ءَ بھر کُتگ ۔ اولی زمانگ سَنگ ءِ زمانگ (پتھر کا زمانہ) بیت بنی آدم جنگلاں بیت وتی وردن ءُ ورگ ءِ ھاتر ءَ ساھدارانی شکار ءَ کنت وتی گُژن ءَ ھلاس کنت اِے وھداں بنی آدم باز نزور بیت آئی ءِ کرا چوشیں ساز ءُ سامانے نہ بیت کہ ساھداراں شکار بہ کنت،  ھمے وجہ بیت بازیں وھداں ھما زوراکیں ساھداراں بنی آدم وتی ارجان کُتگ اَنت بنی آدم ءَ جُھد کُتگ کہ آ جاھے نہ جاھے وتی لاپ ءِ شوھاز ءَ بہ کنت ۔ اِے گْوشگ بیت بنی آدماں ساھدارانی تُرس ءَ باز باز یک جاہ ءَ تر ءُ گرد کُتگ تانکہ یکے دومی ءَ بِہ بَہ چارین ایت ۔ گُڑا بنی آدم ءَ ساھدار ءِ شکار سَنگانی سر ءَ کُتگ ۔ سَنگ جتگ آوان ءَ ٹپی کُتگ پد ءَ پہ آسانی شکار کُتگ ۔
 
چوشکہ بنی آدم ھما ساھدار اِنت کہ آئی ءِ مّجگ ءِ تہ ءَ جیڑیگ ءِ ھاٹیگ ھست آ جیڑ اِت کنت ءُ دیمروئی کنت ۔ چوناھا گْوش اَنت (ضرورت ماں کی ایجاد ہے)  بزاں ترا ھما وھداں چیزے درکار بیت گُڑا تو آئی ءِ شوھاز ءَ درکپ ئے، پمیشکا بنی آدم ءَ را پہ شکار ءَ انچیں ساز ءُ سامان درکار بُوتگ کہ آ پہ آسانی ساھداراں شکار کُت وتی گُژن ءَ ھلاس کُت بہ کنت ۔

دومی (کانسی کا زمانہ) اِے ھما دور بیت کہ انسان چہ اولی زمانگ ءَ گیش دیمروئی کنت ، پہ شکار ءُ زمینانی کار ءِ واست ءَ ساز ءُ سامان جوڑ کنگ بندات کنت انچو کہ پیش ءَ سَنگ ءِ بُوتگ اَت اَنت۔ کانسی ءَ بنی آدم چہ سَنگ ءِ زمانگ ءَ کَش اِیت یک نوکیں دیمروئی یے ءَ نیمگ ءَ آرت، نوں بنی آدم ءِ تہ ءَ گیش دیمروئی اتکگ اَت ، جنگلاں درکپتگ اَت اَنت کور ءُ آپانی کرا ننداں بوت اَنت تانکہ گیش کشت ءُ کشاری بہ کن اَنت۔

سیمی دور  (لوہے کار زمانہ)  اِے چہ کانسی ءِ زمانگ ءَ گیش دیمروئی کُتگیں زمانگے زانگ بیت ایش ءَ بنی آدم گیش آسراتی داتگ زَر ءِ جوڑ کنگ ءِ بندات ھمے زمانگ ءَ بیت ریاست ءِ بندات ھم بیت ھمے وھداں ءُ چاگرد ءِ بھر ءُ بانگ ھم ھمے وھداں گیش بیت ۔ پُچ ءُ پوشاک ءِ رواج گِیش بواں بیت ۔ نوک نوکیں پُچ ءِ درشم کیت دیم ءَ ۔ سائنس ،فلسفہ، ھم ھمے زمانگ ءَ دیمروئی کنگ بندات کن اَنت یونان ءِ شھر ایتھنز ءَ سقراط، افلاطون، ارسطو ءِ وڑیں فلسفی دیم ءَ کیت چاگرد ءِ تہ ءَ دیوی ءُ دیوتایانی بگیر ءَ گپ کنگ ءُ مھلونک ءَ سرپدی دئیگ ءُ آوانی تہ ءَ جُست ءِ ھاٹیگ ودی کنگ بندات کن اَنت ھمے وجہ بیت کہ سقراط ءَ زھر دیگ بیت اِنت ۔

مبارک علی جلد اولی (پتھر کا زمانہ ) ءِ تاک دیم 98 ءَ “زمین اور عورتیں ” سرھال ءِ سر ءَ تراں کنت کہ زمین ءَ را مات ءِ بستار پمیشکا دیگ بوتگ ، زمین ءَ ورگ داتگ بلے آ یک جاھے ءَ ھم (مادرسری نظام ) ءِ گپ ءَ نہ کنت در اسل ءَ اولی زمانگ ءَ درستیں کار زالبول ءِ کوپگاں بُوتگ اَنت، زالبول ءَ کشت ءُ کشاری کُتگ آ وھداں زالبول ءِ مستری بوتگ، بلے مبارک ھر وھداں زالبول ءَ کمتر لیک اِیت –

دگہ یکے جیڑھے مبارک علی ءِ ایش اِنت کہ آ وتی اِے سئیں بھر (جلد) کتابانی ءَ ھچ وڑیں سرشونی نہ دنت کہ آئی ءَ چہ کُجا کُجا اِے چیز ونتگ ءُ پٹ ءُ پول کُتگ اَنت ۔ پرچیا کہ کتاب ءِ نبشتہ کنگ ءَ بازیں پٹ ءُ پول درکار بیت ۔ ھاں ھما مردم  چوشیں چیز ءِ دیم ءَ کار ایت کہ اولی رند بیت ھما کوھنیں جاھاں روت پٹ ءُ پول کنت گُڑا شریں چیزے دیم ءَ کار اِیت ، بلے مبارک وت آرکیالوجیسٹے نہ اِنت بلکن یک راج دپتر زانتے (تاریخ دانے) گُڑا آرا المی اِنت ھما آرکیالوجیسٹانی پٹ ءُ پول کُتگیں چیزاں دیم ءَ بیار اِیت کہ آوان پٹ ءُ پول کُتگ ، ھماوانی سرشونی ءَ بہ دنت گُڑا آئی چیز منّگ بنت ۔ پد ءَ آئی ءِ کتابانی وانگ ءَ تو انچو مارئے کہ تو کسانیں نبشتانکے وانگ ءَ ئے –

ھاں من منّاں کہ مبارک وتی ، وت نبشتہ زندال ( آپ بیتی)  ءِ تہ ءَ گْوش اِیت من جُھد کُتگ وتی کتاباں گوں آسانیں لبزاں نبشتہ بہ کن آں تانکہ مردم آسانی ءَ ونت اِش بہ کن اَنت ۔  بلے چوش نہ اِنت ھچ سرشونی مہ بیت ءُ پد ءَ انچو گْوش ئے  کسانیں نبشتہ کارے نبشتانک نبشتہ کنگ ءَ اِنت ۔

باکی کتاب جْوان اَنت آوانی تہ ءَ سرشونی ھم دنت بلے اِے سئیں بھرانی تہ ءَ ھچ وڑیں دلیّل ءُ منتک نہ دنت ۔ مردم انچو مار اِیت وت ساچیں نبشتانک اَنت ۔ پد ءَ اِے ھم گْوش اِیت کہ نبشتکار ءُ دانشورانی گْوشگ اِنت بس دگہ آوانی ھچ وڑیں چیز دیم نہ یار ایت ۔ آ دومی بھر بزاں ( کانسی کا زمانہ)  ءِ تاک دیم 56 ءَ “تعلیم” ءِ سر ھال ءِ سر ءَ تراں کنت ءُ گْوش اِیت میسوپوٹامیہ ءِ بابلی تھذیب ءِ تہ ءَ اِے بوتگ کہ اسکول ءَ زھگاں ونتگ آواں گوں مزنیں توار ءَ سک ءَ ونتگ بلے ایش ءَ سر ءَ ھچ منتک نہ دنت ۔ من تنی وھدی ھچ جاہ ءَ نہ دیستگ کہ ھما آرکیالوجیسٹاں آواز ءِ گپ جتگ، آوانی پٹ ءُ پول ءَ چی ھما کوھنیں چیز دست کپتگ اَنت کہ آوانی ھساب ءَ اندازگ جتگ اِش کہ اِے چونیں مردم بُوتگ اَنت بلے کس ءَ توار ءِ گپ نہ کُتگ ۔ مبارک وتی کتاب ءِ تہ ءَ دنت اِے نہ گْوش اِیت کہ کُجام آرکیالوجیسٹ ءَ پٹ ءُ پول کُتگ یا کُجام کتاب ءَ بُوتگ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

مولمانی مٹ ءُ بدلی ءِ آسرمندی ءِ رکگ ءِ واستا کوپ 27 ءِ کانفرنس ءَ یک ھنچیں گچینی فنڈے ءِ منگ نامہ داتگ کہ چریشی ءَ گلوبل وارمنگ ءَ آسرمند بیتگیں ڈیھانی کمک ءَ کنت-

فرانسیسی ھال سر کنوکیں ادارہ اے ایف پی ءِ رد ءَ میان اُستمان ءِ چیردستی ءَ مصر ءِ شھر شرم الشیخ ءَ کوپ 27 ءَ نیاد ءَ بیتگ-

کانفرنس ءَ ھواریں مردماں تاوانانی پُر کنگ کنوکیں فنڈ ءِ دارگ ءِ ساڑا اتگ ءُ اے شریں گامگیجے گشتگ-

اے میان اُستمان ءِ دو ھپتگاں برجاھیں گپ ءُ تراناں پد آسری دیم ءَ اتکگ چریشی ءَ ھما سیرلاپیں ڈیھاں دزبندی کنت کہ آ دنز ءُ گبارانی مستریں سبب اَنت چریشی ءَ چہ کمک بہ کن اَنت ءُ موسمیاتی ءِ مٹ ءُ بدلیانی تہ ءُ دیمروئی کنوکیں ڈیھاں ھچ نیست اِنت-

کوپ 27 ءَ مولمانء مٹ ءُ بدلی ءِ گپ ءُ تران ءِ بندات میان اُستمان ءُ کتگ ءُ اے تران ءَ تاوانانی پُر کنگ ءَ گیش دلگوشی نہ بیتگ-

بلے دیمروئی کرتگیں ڈیھاں ترندیں جھداں پد اے پیسلہ کتگ سیر ءُ شادابیں ڈیھ گھگیری کنت چریشی ءَ چہ آسمان ءِ گباراں گپتگیں دنز کمتر بہ بنت-

اے درگت ءَ گپ ءُ تران ءِ دیم ءَ برگ ءِ ھاتر ءَ دیمروئی کنوکیں ڈیھانی منگ المی اِنت-

ھمے وڑ ءَ پاور شفٹ افریقہ ءِ ایگزیکٹیو ڈائریکٹر مھمد عداؤ ءَ گشتگ کہ نیاد ءَ تاوانانی بنگپ ءَ ھچ دلگوشی نہ بیتگ مروچی ما یک راجدپتری پیسلھے کنگ ءَ ایں –

آئی ءَ گوشتگ کہ اشی ءَ راستی پدر بیت اِنت میان اُستمان ءِ چیردستی ءَ گپ ءُ تران بے آسری بیت اِنت دیمروئی کرتگیں ڈیھ نیزوریں ڈیھاں سیاسی فٹبال ءِ جاہ ءَ آیانی درد ءُ گماں سرپد بہ بنتٹ

تاوانانی پر کنگ ءَ برجم کرتگیں فنڈ توپان آماچی ءِ سبب ءَ پُھل ءُ لوگانی ڈروھگ ءُ دگہ تاوانانی کمک ءَ کنت-

ھمے وڑ ءَ کوہ ءُ زر ءُ دگہ چاگردی پیش اتکگیں آسرات ھوار اَنت-

روکپتی بلوچستان ءُ رودراتکی بلوچستان ءِ سیمسری ھند پشین ءَ گوستگیں روچ ءَ ایرانی لشکر ءَ بیڑ برتگ ءُ اود ءُ مردم جتگ ءُ بازیں مردم آوار جنگ ءَ پد بیگواہ کرتگ اَنت –

ھالانی تہ ءَ گوشگ بیتگ کہ ایرانی لشکر ءَ لوگانی سر ءَ بیڑ برتگ ءُ اود ءَ مردم جتگ اَنت ءُ باز مردم آوار جتگ ءُ برتگ اَنت اشانی توک ءَ دو مردمانی پجار تنی وھدی بیتگ اَنت-

آوار جنگ بیتگیں مردمانی تہ ءَ دو کسانی پجار ایمان برشان ے شفیع مھمد ءُ مجیب الرحمان پادیاب ء رحیم بخش ءِ ناماں زانگ بیتگ اَنت-

ھالانی تہ ءَ گوشگ بیتگ کہ مجیب ایرانی لشکر ءَ لَٹ ءُ کُٹ کنگ ءَ پد ٹپی ئیں جاوراں گوں گاڑی ءَ سوار کرتگ ءُ برتگ –

چریشی ءَ پد دمگی مردماں زھرشانی کنان ءَ دگ بند کتگ ءُ زھرشانی کرتگ ءُ گپتگیں مردمانی یک کنگ ءِ لوٹ کتگ-

زانگ بہ بیت روکپتی بلوچستان ءَ اے وھد ءَ مردمانی آوار جنی ءُ بیگواہ کنگ ءِ یک نوکیں درچے بندات بیتگ کہ اود ءَ ورناہ گرگ ءُ زنداناں کنگ بیگ ءَ اَنت-