TBP Balochi

بلوچ نیشنلسٹ آرمی (بی این اے) ءِ جارکش مرید بلوچ ءَ رسانکدراں شنگ کُتگیں درشانے ءِ تہءَ گُشتگ کہ لھتیں وھد پیسر گلزار امام شمبے بیگواہ بیتگ اَت کہ اِشی درگت ءَ گل ءَ پَٹ ءُ پول کُتگ ءُ دلجمیں منانکاں چہ سرپدی رستگ کہ گلزار امام پنام شمبے بیگواہ بئیگ ءَ پد پاکستانی چیریں ادارگانی دزگیری ءَ اِنت۔

آئی ءَ گُشتگ کہ گل گیشتر پَٹ ءُ پول کنگ ءَ اِنت ءُ اے وئیل ءَ ھواریں مردماں داں رسگ ءِ جھد کنگ ءَ اِنت۔

انسانی ھکانی یورپی گل ءَ ایرانی سرکار ءِ سر ءَ بھتام جتگ ءَ گوشتگ کہ کرد آبادی دمگاں برجاھیں زھرشانیانی دم گٹ کنگ ءِ نیمون ءَ مزنی سلاہ کارمرد کنگ بیتگ اَنت ءُ گوستگیں بیست ءُ چار ساھاتانی توک ءَ زھرشانی کنوکانی ھلاپ ءَ کریک ڈاؤن ءَ بازیں مردمے بیران بیتگ اَنت-

عرب نیوز ءِ نیمگ ءَ شنگ بیتگیں ھالے ءِ رد ءَ مھسا امینی ءِ بیرانی ءِ پژدر ءَ بیوکیں زھرشانی ءَ ایرانی سرکار ءَ کرد آبادی دمگ روکپت ءُ گوریچان ءِ اُستاناں کرد پیلو کرتگ –

گوستگیں لھتے روچانی توک ءَ گیشتر بنجاھی شھر ءَ ھوار ھوار دگہ اُستاناں سرکار ءِ ھلاپ ءَ برانزی بیتگ اَنت-

ناورے ءِ انسانی ھکانی گل ھینگو ءَ گوشتگ کہ ایرانی لشکر ءَ پیرانشھر، مریوان ءُ جوانرود ءَ زھرشانی کنوکانی سر ءَ تیرگواری ءِ تامر آن لائن ءَ پوسٹ کنگ بیتگ-

گل ءِ رد ءَ گوستگیں بیست ءُ چار ساھاتانی توک ءَ روکپت ءُ گوریچانی اُستاناں سیکورٹی پورسز ءِ تیرگواری ءَ سیزدہ مردم بیران بیتگ اَنت کہ اشانی توک ءَ ھپت ءِ سیادی جوانرود، چار ءِ سیادی پیرانشھر ءُ دگہ دو کسانی سیادی دگہ شھر ءَ این –

بیران بیتگیں مردمانی توک ءَ شانزدہ سالی ئیں ورنا کاروان غدر شوکری ھم ھوار اِنت سیکورٹی لشکر ءَ ھما وھد ءَ تیرگواری کرتگ کہ مھلوک مُچ بیتگ ءُ ورنا ءِ میت ءَ مسیت ءَ برگ ءَ بیتگ اَنت چریشی ءَ یک مردمے بیران بیتگ –

میان اُستانی انسانی ھکانی گپ ایمنسٹی انٹرنیشنل ءَ گوشتگ کہ ایرانی سرکار مرگ ءِ ترسینگ ءَ زھرشانی کنوکاں ھلاس کنگ ءِ یک سسب کنگ اِنت آ زھرشانی زرمبشتاں ھوار مہ بنت-

گل ءَ کوشانی ایرجنی کتگ ءُ گوشتگ کہ اے وڑیں جاورانی ودینگ ءَ مھلوک ءِ تہ ءَ ترس ودینگ اِنت ءُ اشی ءَ سیاسی زوراکی ءِ رنگ ءَ کارمرد کنگ اِنت شمبے ءِ روچ ءَ ایرانی انسانی ھکانی گل ءَ مھسا امینی ءِ کوش ءِ ھلاپ ءَ بیوکیں زھرشانیاں سیکورٹی پورسز ءَ چل ءُ ھپت زھگاں ھوار سَے سد ءُ ھپتاد ءُ ھشت مردم کشتگ اَنت –

زانگ بہ بیت ایران ءِ سرکار ءِ ھلاپ ءَ سرجمیں ڈیھ ءَ برانز گپتگیں زھرشانیانی بھتام ءَ گوریچانی عراق ءَ جاڑیگیں ایرانی اپوزیشن ٹولی ءِ سر ءَ جنگ ءَ اِنت-

دو شمبے ءِ روچ ءَ عراق ےَ حزب اختلاف کرد ٹولی ءِ سر ءَ نوکتریں اُرش کتگ اَنت چریشی ءَ کرد سیکورٹی پورس ءِ پیش مرگا ءِ یک کارندھے کشگ بیتگ ءُ امریکہ ءَ اے اُرش ایر جتگ ءُ گیر کانونی گوشتگ –

روکپتی بلوچستان ءَ بیوکیں آوار جنیانی درچ یکشل ءَ برجاہ اَنت گوستگیں سَے روچانی تہ ءَ تنی وھدی ھپت مردم آوار جنگ ءُ بیگواہ کنگ بیتگ اَنت-

سر بیتگیں ھالانی رد ءَ روکپتی بلوچستان ءِ دمگ نیکشھر ءَ ایرانی لشکر ءَ شھدربرجاہ ءِ پروفیسرے آوار جنگ ءَ پد بیگواہ کرتگ-

آوار جنگ بیتگیں پروفیسر ءِ پجار عبدالعزیز اربابی ءِ نام ءَ زانگ بیتگ-

ھالانی تہ ءَ گوشگ بیتگ کہ آ پروفیسرے ءَ ھوار ھوار نیکشھر ءَ امام جمعہ ءِ مسیت ءِ پیشو اِنت-

ھالانی تہ ءَ گوشگ بیتگ کہ مولوی عبدالعزیز آوار جنگ ءَ پد بیگواہ کنگ بیتگ ءُ چریشی ءَ پد آئی ءِ درگت ءَ دگہ ھال نہ بیتگ اَنت ءُ نانکہ ایرانی چیریں ادارھاں آئی ءِ درگت ءُ گرگ ءِ سبب پدر کرتگ اَنت-

فیفا ورلڈ کپ گوازی برجاہ، مروچی گتر ءِ جتا جتائیں پٹاں شش ٹیمانی میان ءَ گوازی کنگ بوتگ کہ آھانی تہ ءَ انگلینڈ ءَ بنداتی میچ ءَ پُرسنچیں گوازی پیش داشتگ چہ ایران ءَ شش گولاں گوازی کٹ اِتگ ، دومی گوازی ءَ نیدرلینڈ ءَ سینگال ءِ دیم ءَ دو گولاں گوازی کٹ اِتگ وھدیکہ امریکہ ءُ ویلز ءِ یک یک گولے ءَ دیمیگ بوتگ انت –

گتر ءَ برجاھیں فیفا ورلڈ کپ ءِ مروچی اولی گوازی ءَ انگلینڈ ءُ ایران ءِ دیم پہ دیم بوتگ انت کہ انگلینڈ ءَ اولی ھاپ ءَ سَے گول اسکور کتگ وھدیکہ ایران نیمگ ءَ ھچ گول اسکور کنگ نہ بوتگ – انگلینڈ ءِ نیمگ ءَ اولی ھاپ ءَ لیبی بیلنگھم ءَ سِی ءُ پنچمی ملٹ ءَ، بوکایو ساکا ءَ چِل ءُ سیمی ملٹ ءُ رحیم اسٹرلنگ ءَ اولی ھاپ ءِ زیادھی ملٹانی تہ ءَ وتی گول اسکور کتگ انت –

دومی ھاپ ءَ ایران ءَ گوازی کنان ءَ دو گول اسکور کتگ بلے ھنگت انگلینڈ لیبیانی دیم پہ گول اسکور کنگ ءَ داشت نہ کتگ ءُ دومی ھاپ ءَ انگلینڈ ءِ نیمگ ءَ اولی گول شست ءُ دومی ملٹ ءَ اسکور کنگ بوتگ کہ بوکایو ساکا ءَ داتگ – اے گول ءَ پد چہ ایران نیمگ ءَ مہدی تریمی ءَ یک گول ءِ اسکور کتگ –

گوازی ءَ ھپتاد ءُ یکمی ملٹ ءَ انگلینڈ ءِ لیبی مارکس رشفورڈ ءَ گول ءِ اسکور کتگ ءُ پدا نودمی ملٹ ءِ تہ ءَ جیک ءَ یک دگہ گولے اسکور کتگ – گوازی ءَ گڈی ءَ ایران ءَ پیلانٹی شوٹ ءِ رستگ گڈا مہدی تریمی ءَ پیلانٹی شوٹ ءَ وتی دومی گول اسکور کتگ – ھمے وڈ انگلینڈ ءَ دو پہ شش گولاں گوازی وتی نام ءَ کتگ –

فیفا ورلڈ کپ ءِ دومی گوازی نیدر لینڈ ءُ سینگال ءِ میان ءَ بوتگ کہ سینگال ءِ نیمگ ءَ ھچ گول اسکور کنگ نہ بوتگ وھدیکہ نیدر لینڈ ءَ دو گولاں گوازی کٹ اِتگ –

سینگال ءَ اولی ھاپ ءَ نیدر لینڈ ءِ دیم جوانی ءَ داشتگ بلے دومی ھاپ ءَ نیدر لینڈ دیم ءِ داشت نہ کُتگ ءُ نیدر لینڈ ءِ لیبی کوڑی گاکفو ھشتاد ءُ چارمی ملٹ ءَ یک گول ءِ اسکور کتگ آئی ءَ چہ پد ڈی-کلاسِن ءَ وتی دومی گول اسکور کتگ ءُ گوازی وتی ٹیم ءِ نام ءَ کتگ –

دوشی شپ بوتگیں سیمی گوازی یو ایس اے ءُ ویلز ءِ میان ءَ بوتگ کہ ھردو ٹیماں جوانیں گوازی پیش داشتگ ءُ ھردو یک یک گولے ءَ دیمیگ بوتگ انت –

امریکہ ءُ ویلز ءِ میان ءَ بوتگیں گوازی ءَ اولی ھاپ ءَ امریکہ ءِ نیمگ ءَ یک گولے اسکور کنگ بوتگ کہ امریکہ ءِ لیبی تیموتی ءَ سی ءُ ششمی ملٹ ءِ تہ ءَ داتگ کہ پدا رند ءَ ھردو ٹیمانی نیمگ ءَ ھچ گول اسکور کنگ نہ بوتگ – دومی ھاپ ءِ ھشتاد ءُ دومی ملٹ ءِ تہ ءَ ویلز ءِ لیبی گریت بلے ءَ یک گول ءِ اسکور کتگ – کہ پدا رند ءَ لیبی گڈسر ءَ تاں ھچ گول اسکور کنگ نہ بوتگ ءُ ھردو ٹیم یک یک گولے ءَ دیمیگ بوتگ انت –

سندھ ءِ مزن شھر کراچی ءَ چیریں ادارھانی کارمندانی دست ءَ زورانسری آوار جنگ بوتگیں علم ءُ ادب پبلشر ءِ منیجر لالا فہیم بلوچ یل بوتگ ءُ وتی گِس ءَ سربوتگ –

لالا فہیم بلوچ بیست ءُ شش اگست ءَ کراچی ءِ دمگ اردو بازار ءَ چہ وتی جند ءِ دکان “علم ءُ ادب پبلشر” ءَ چیریں ادارھانی کارمنداں آوار جتگ ءُ گوں وت برتگ کہ مروچی یل بوتگ ءُ وتی گِس ءَ سر بوتگ –

زانگ بہ بیت تنی وھدی ھزارانی کچ ءَ بلوچ پاکستانی پوج ءِ چیریں جاھاں بندیگ انت کہ آھانی تہ ءَ کمے کساس ءَ لھتے یل کنگ بیت اِنت ءُ پدا دوسری دگہ بازینے زورانسری آوار جنگ بیگواہ کنگ بنت –

بیگواھیں مردمانی پانکجنیں گل وائس فار بلوچ مسنگ پرسنز ءِ رھشون ماما قدیر بلوچ ءِ رِد ءَ بیگواھیں مردمانی کچ ھزارانی ھساب انت – ما لھتے مردمانی نامانی لڑ کمیشن ءَ دیم داتگ وھدیکہ درسیں مردمانی کھول مئے گور ءَ اتک نہ کن انت ءُ بازینے ترسینگ بیت بلے آ ھر وڑ ءَ دیما بیا انت ءُ گل ءِ گور ءَ وتی کیس ءَ نبشتہ بہ کنائین انت-

سربوتگیں ھالانی رِد ءَ گوستگیں روچاں بلوچستان ءِ دمگ ھاران ءَ ناشناسیں سلاہ بندیں مردماں پاکستان ءِ پوج ءِ سر ءَ اُرش کُتگ – اُرش ھژدہ نومبر ءَ ھاران ءِ دمگ لجے ءَ پوجی پانگس ءِ سر ءَ کنگ بوتگ کہ چریشی ءَ پاکستانی پوج ءَ جانی تاوان ءِ دیمپانی کنگ کپتگ –

ھمے وڈ مند ءَ ھم پاکستانی پوج ءِ سر ءَ اُرش کنگ بوتگ – اُرش گوستگیں روچ ءَ مند ءِ دمگ شیراز کوہ ءَ پاکستانی پوج ءِ کارمندانی سر ءَ کنگ بوتگ –

اھوالکار ءِ رِد ءَ اے اُرش ھما وھد ءَ کنگ بوتگ کہ پاکستانی پوج ءِ دو کارمند پرپٹ ءَ سوار بوتگ کور ءَ رؤگ ءَ بوتگ کہ سلاہ بندیں مردماں آھانی سر ءَ اُرش کتگ ءُ آھانی سلاہ گوں وت برتگ انت-

مروچی سھب ءَ بلوچستان ءِ دمگ کیچ دشت ءَ ھم پاکستانی پوج ءِ سر ءَ اُرش کنگ بوتگ –

اھوالکارانی رِد ءَ مروچی سھب ءَ دشت ءِ دمگ کُڈان بازار ءَ ناشناسیں سلاہ بندیں مردماں اتکگ ءُ پوجی کارمندانی سر ءَ اُرش کتگ – چریشی ءَ پوجی کارمنداں جانی تاوان رستگ ءُ سلاہ بندیں مردم در آیگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ ھرسَے اُرشانی زمّہ واری منّ اِتگ ءُ گوشتگ کہ مئے سرمچاراں ھاران ءَ پوجی پانگس ءِ سر ءَ اُرش کتگ ءُ سَے کارمند کُشتگ انت ءُ دشت کُڈان بازار ءَ دو پوجی کارمندانی سر ءَ اُرش کتگ ءُ زدگ کُتگ انت ءُ مند ءَ دو پوجی کارمند کُشتگ ءُ آھانی سلاہ دستیگ کتگ انت –

جارکش میجر گوھرام بلوچ ءَ گوشتگ کہ مئے سرمچاراں ھژدہ نومبر ءِ بیگاھے پنچ ءُ نیم ءَ ھاران ءِ دمگ لجے ءَ برجاھیں پاکستانی پوج ءِ پانگِس ءِ سر ءَ مزنیں ءُ وتکاریں سلاھاں گوں اُرش کُتگ – اُرش ءِ آسر ءَ ایف سی ءِ سَے کارمند مُرتگ انت ءُ چار زدگ بوتگ انت –

جارکش میجر گوھرام بلوچ ءَ گوشتگ کہ بیست نومبر ءَ سھب ءِ ادار نُھ ءَ ھم مئے سرمچاراں مند ءِ دمگ شیراز کوہ ءِ سلات کور ءَ پاکستانی پوج ءِ پرپٹ سواریں دو کارمندانی سر ءَ اُرش کُتگ ءُ ھردو کُشتگ انت ءُ پرپٹ مانداشتگ – سرمچاراں دشمن پوج ءِ توپک دو توپک ھم گوں وت برتگ انت –

آئی ءَ گوشتگ کہ اے اُرش ءَ پد پوج ءَ ھرچاریں نیمگاں ماٹر گولہ ھم آس داتگ –

جارکش ءَ دیمتر ءَ گوشتگ کہ بیست یک نومبر ءِ سھب ءَ مئے سرمچاراں دشت ءِ دمگ کڈان بازار ءَ پاکستانی پوج ءِ دو کارمندانی دزگیر کنگے جھد کُتگ – آئی ءَ گوشتگ کہ مئے سرمچار پہ آھانی دزگیر کنگے ھاتر ءَ ھما وھد ءَ شتگ انت کہ آ کڈان بازار ءَ سامان زورگ ءَ بوتگ انت – ھمے میان ءَ آھاں تیر گواری کُتگ ءُ تتکگ انت گڈا سرمچارانی تیر گواری ءَ ھردو زدگ بوتگ انت –

جارکش ءَ گوشتگ کہ مھلوک ءِ رش ءُ کش ءُ پانگسانی نزیکی ءِ سوب ءَ سرمچاراں بازیں تیرگواری نہ کُتگ رانکہ لس مردماں تاوان مہ بیت اِنت –

جارکش میجر گوھرام بلوچ ءَ وتی درشان ءِ گڈسر ءَ گوشتگ کہ پاکستانی پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ ھشت سد ءُ شست ءُ ھپت روچ سرجم بوتگ انت – مروچی ھر تک ءُ پھناتاں سیادی داروکیں مردماں بنجل ءَ اتکگ ءُ دلپدردی درشان اتگ –

ھمے وھد ءَ گل ءِ سرکماش ءَ گوشتگ کہ ما سَے سد ءُ بیست ءُ شش زورانسری آوار جنگ بوتگیں مردمانی نامانی لڑ گوں سرجمین اھوالاں سردار اکتر جان مینگل ءِ سروکی ءَ جوڑ بوتگیں پٹ ءُ پولی کمیشن ءَ داتگ انت کہ آھانی کھول پانزدہ نومبر ءِ گل ءِ زھرشانی بنجل ءَ ساڈی بوتگ انت کہ ھما روچ ءَ کمیشن ءَ زھرشانی بنجل ءِ تر ءُ تاب کتگ –

ماما قدیر بلوچ ءَ گوشتگ کہ بیگواھیں مردمانی کچ ھزارانی ھساب انت درسیں کھول ادا اتک نہ کن انت وھدیکہ بازینے ترسینگ بیت بلے آ ھر وڑ ءَ دیما بیا انت ءُ گل ءِ گور ءَ وتی کیس ءَ نبشتہ بہ کنائین انت –

آئی ءَ گوشتگ کہ سدانی کچ ءَ مردم زندانانی تہ ءَ شھید کنگ بوتگ انت ریاست ءَ اشانی پسو دیگ کپیت –