TBP Balochi

سعودی عرب ءَ سَے پاکستانی جھمندانی سر بُرگ بوتگ انت کہ چریشاں پد سرجمی ءَ ھبدہ مردمانی سر بُرگ بوتگ انت –

اقوام متھدہ ءِ رِد ءَ دھ نومبر ءَ بگر تاں مروچی ھبدہ مردم نشہ ءُ دگہ کتکاریانی سوب ءَ سر بُرگ بوتگ انت وھدیکہ ھمے زوتاں دگہ سَے مردمانی سر بُرگ بوتگ انت –

اقوام متھدہ ءِ رِد ءَ سر بُرگ بوتگیں مردمانی تہ ءَ چار شامی، سَے پاکستانی سَے اردنی ءُ ھپت سعودی جھمنند انت –

آئی ءَگوشتگ کہ ھمے سال ءَ سعودی عرب ءَ سرجمی ءَ یکسد ءُ چِل ءُ چار پاھو دیگ بوتگ کہ آھانی تہ ءَ چِل ءُ ھپت راجکاری ءِ جرم ءَ ءُ پنجاہ ءُ شش کوش ءِ جرم ءَ شزا دیگ بوتگ انت –

آئی ءِ گوشگ ات کہ گیشتریں شزایے درگت ءَ ھمے گمان کنگ بیت کہ سر بُرگ بوتگ انت –

اقوام متھدہ ءِ جارکش ءِ رِد ءَ سعودی عرب ءَ نشہ باپاری کنوکانی سزا سر بُرگ دوبر بندات کنگ پدردی یے –

اے گامگیج ھما وھد ءَ دیم ءَ اتکگ کہ گیشتریں ڈیھاں اقوام متھدہ ءِ جنرل اسمبلی ءَ سرجمیں دنیا ءَ مرگ سزایے دیگ ءِ سر ءَ بندش جنگ ءِ لوٹ کنگ بوتگ –

گوستگیں روچ ءَ جھانی فٹبال ورلڈکپ فیفا ءَ ارجنٹائن ءِ دیم ءَ گوازی ءِ کٹگ ءَ مروچی سعودی عرب ءَ شاتمانی کنگ برجاہ اَنت دومی نیمگ ءَ سعودی ءِ سرکار ءَ اے راجدپتری سوبمندی ءِ وشی ءَ سرجمیں کارجاھاں موکل داتگ ءُ شاتمانی کنگ ءَ اَنت-

فیفا ورلڈکپ میچ ءَ سعودی عرب ءَ ارجنٹائن ءِ دیم ءَ سوبمندی ءِ راجدپتری شاتمانی تھنا سعودی ءَ نا بلکیں رودراتکی دگہ ڈیھ ءُ اسلامی ڈیھاں سعودی ءِ شاتمانی دارگ بیگ اِنت –

گوشگ بیت اِنت ارجنٹائن ھما ٹیم اِنت کہ سَے رند ءَ ورلڈ چیمپئن جوڑ بیتگ بلے گوستگیں روچ ءَ سعودی عرب ءِ دیم ءَ آئی ءَ مزنیں پروشی ءِ دیمپانی کنگ کپتگ –

ھمے وڑ ءَ ارجنٹائن ءِ اسٹات لیونل میسی ءَ گوشتگ کہ پروش ورگ ءَ یک مزنیں دلپروشی گون اِنت بلے مارا وت ءَ انگت اُمیت دارگی اِنت ءُ وتی تہ ءُ اُمیت ءُ اوست ودی کنگی اَنت-

آئی ءَ گوشتگ کہ گوازی ءِ پنچ منٹ مئے واستا باز گران بیتگ اَنت مارا ھمے پنچیں دماناں بھمیانگ کتگ ءُ گروپ ءِ اے اولی میچ اِنت میکسیکو ءُ پولینڈ ءِ ھلاپ ءَ سوبمندی ءَ گریں –

زانگ بہ بیت ارجنٹائن ءِ سٹارفٹبالر لیونل میسی وتی زند ءِ گڈی ورلڈ کپ ءَ گوازی کنگ اِنت ءُ سرجمیں راج ءَ چرائی ءَ یک اوستے داشتگ –

روکپتی بلوچستان ءِ دو جتا جتائیں جاھاں دو تیل کشیں گاڑی کپتگ ءُ ستکگ اَنت چریشی ءَ گاڑیاں سواریں دو مردم بیران بیتگ اَنت-

سر بیتگیں ھالانی رد ءَ روکپتی بلوچستان ءِ دمگ ایرانشھر ءَ یک تیل کشین گاڑی ءِ کپتگ ءُ چریشی ءَ گاڑی ءِ ڈرائیور بیران بیتگ –

گیشیں ھالانی رد ءَ ایرانشھر ءَ یک تیل کشیں گاڑی کلٹی بیتگ ءُ چریشی ءَ پٹرول ءَ لوڑین گاڑی ءَ آس کپتگ ءُ گاڑی ءِ ڈرائیور بیران بیتگ-

بیران بیتگیں مردم ءِ پجار ابراھیم دادگر ء نور مھمد ءِ نام ءَ زانگ بیتگ کہ نرماشیر ءِ جھمنند گوشگ بوگ ءَ اِنت-

ھالانی تہ ءَ گوشگ بیتگ کہ ابراھیم ءِ گاڑی پٹرول ءَ لوڑ بیتگ ءُ آ ایرانشھر ءَ روگ ءَ بیتگ ءُ چریشی ءَ گاڑی چپ بیتگ ءُ گاڑی ءَ آس کپتگ ءُ ابراھیم ستکگ ءُ بیران بیتگ-

ھمے وڑ ءَ دگہ یک وئیلے ما راسک ءَ پیش اتکگ کہ اود ءَ یک گاڑی ھم چپ بیتگ ءُ گاڑی ءِ ڈرائیور ستکگ –

راسک ءَ بیران بیتگیں مردم ءِ پجار میلاد دامنی ءِ نام ءَ زانگ بیتگ کہ ایرانشھر ءِ جھمنند گوشگ بیگ ءَ اِنت-

زانگ بہ بیت دو سالانی تہ ءَ روکپتی بلوچستان ءَ ھشتاد ءُ ھپت تیل کشیں مردم بیران بیتگ اَنت کہ اشانی توک ءَ آ جتا جتائیں وئیلانی آماچ بیتگ اَنت بلے گیشتر ایرانی لشکر ءِ تیرگواریاں چہ گاڑی کپتگ ءُ مردم ستکگ ءُ بیران بیتگ اَنت-

امریکہ ءُ اسرائیل ءَ رودراتکی ڈیھ ایران ءُ آئی ءِ پلامرزانی سر ءَ اُرشانی پسھی ءَ ھمگرنچیں پوجی ھیلکاریانی سوڑگ کنگ اِنت-

عرب نیوز ءَ امریکی چینل فوکس نیوز ءِ درور دیان ءَ گوشتگ کہ اسرائیل ءِ چیف آف اسٹاف ایویو کوچاوی ءُ امریکہ ءِ چیرمین جوائنٹ چیف آف اسٹاف جنرل مارک ملی ءِ میان ءَ گند ءُ نند بیتگ ءُ ھمے میان ءَ ایئرفورس ءِ ھیلکاریانی سر ءَ چار ءُ ٹپاسی بیتگ ءُ ایران ءُ آئی ءِ ھمکوپگانی سر ءَ کجام ھم وھد ءَ شیواری ءَ لشکریاں ھیلکاری دیگ بہ بیت-

ایویو کوچاوی ءَ گوشتگ کپ امریکہ چیئرمین جوائنٹ چیف آف اسٹاف جنرل ملی ءِ گون ءَ گپ ءُ تران ءِ وھد ءَ ’ اے گپ ءِ سر ءَ تپاک بیتگ اَنت ما یک گچینی وھدے ءَ اوشتوک اِنت ءُ اشی ءِ گچینی چار ءُ ٹپاساں ایران ءُ ھمے دمگ ءَ ناشرکارانی پلامرزی کنوکانی ھلاپ ءَ بیڑ برگ ءِ چن ءُ لانچ ءُ گیش کنک کنگ ءِ ترندی کنگ ءِ اژدری بیت اِنت –

آئی ءَ گوشتگ کہ چہ ایران ءَ ترس ءِ ھلاپ ءَ اسرائیل ءِ دفاھی پورسز ءِ دراھیں ھیلکاری چن ءُ لانچانی ساڑایا کن ایں-

اسرائیل ءِ چیف آف اسٹاف ءَ دیمتر ءَ گوشتگ کہ ’ ایران زرکاری ‘ لشکری ءُ تھی جیڑھانی دیمپان اِنت ءُ دومی نیمگ ءَ آ وتی جوھری نیاداں ھم گیش کنگ اِنت-

امریکہ ءِ مھکمہ دفاہ پینٹاگون ءَ بیوکیں گند ءُ نند ءَ پد درشان شنگ کتگ ءُ گوشتگ کہ ھردوکیں رھشوناں ’ دمگی پھزداری جاور ھال ‘ ءِ سر ءَ دو نیمگ ءَ کمکی ءَ گیش کنگ ءُ دمگ ءَ ایران ءِ نیمگ ءَ ترسی جاور ءُ وتی پھریزگ ءُ گچینی اسٹریٹیجک ءِ سر ءَ گچین کنگ ءُ دگہ چیزانی سر ءَ چار ءُ ٹپاسکاری بیتگ ‘-

درشان ءِ رد ءَ امریکہ ءُ اسرائیل ءَ رودراتکی دمگاں ایمنی ءُ سلامتی ءِ واستا سدک کنگ ءِ ھمگرنچی کتگ-

روکپتی بلوچستان ءِ اھل سنت ءِ علماھاں یک شنگ کرتگیں درشانے ءَ کرد بنجلانی سر ءَ ایران ءِ اُرش جتگ ءُ گوشتگ کہ ھچ ڈیھ ءَ اے ھک نیست اِنت وتی شھرانی سر ءَ اے وڑ ءَ زُلم بہ کنت-

اے درشان روکپتی بلوچستان ءِ ھواریں علمایاں داتگ ءُ چریشی ءَ آیاں گوشتگ کہ آیاں گوشتگ کہ ڈیھ اے وڑیں زُلم ءُ زوراکیاں بند بہ کنت ءُ مھلوک ءِ توار ءَ گوش بہ دار ایت ءُ مھلوک ءَ انساپ بہ دنت –

آیاں گوشتگ کہ ایران ءِ نیمگ ءَ ناوشیں وئیلانی گپ دیم ءَ اتکگ اَنت کہ اے دنیا ءِ کجا اِنت ھاکم اے وڑیں رویش کنگ ءَ اَنت-

آیاں گوشتگ کہ ما کرد راج ءِ گون ءَ ھر تک ءِ درد ءُ گماں ھوار اِنت آیانی سر ءَ بیوکیں ھرچ وڑیں زُلم ءُ زوراکیاں ایر جن ایں –

زانگ بہ بیت گوستگیں روچاں ایران ءَ گوریچانی عراق ءَ کرد بنجلانی سر ءَ ھم اُرش کرتگ ات کہ اود ءَ شش مردم کُشگ بیتگ ات اَنت-

ھمے وڑ ءَ اشی ءَ ھوار ھوار ایران ءَ ھواریں کردستان ءِ مھلوک ءِ سر ءَ ھم ایران ءِ نیمگ ءَ بیڑ ءُ ترندی برجاہ اَنت –

اے بیڑ ءُ ترندی ھما وھد ءَ بندات بیتگ اَنت کہ شانزدہ نومبر ءَ کرد جنک مھسا امینی ءِ کہ پولیس ءِ زندان ءَ لٹ ءُ کُٹانی سبب ءَ بیران بیتگ اَت ءُ چریشی ءَ پد ایران ءَ زھرشانیانی یک درچے بندات بیتگ ات کہ تنی وھدی اے زھرشانی داں انگت ءَ برجاہ اَنت-

دومی نیمگ ءَ گوستگیں روچاں انسانی ھکانی گلاں ھم ایران ءَ را بھتام جتگ ءُ گوشتگ ایران زھرشانی کنوکانی سر ءَ مزنیں سلاہ کامرد کنگ اِنت-

گوستگیں بیگاہ ءَ گتر ءِ جتا جتائیں فٹبال گوازی پٹاں فیفا ورلڈ کپ ءِ ھشت ٹیمانی میان ءَ گوازی کنگ بوتگ کہ آھانی تہ ءَ سعودی ءَ ارجنٹینا ءِ دیم ءَ دو ءُ پرانس ءَ آسٹریلیا ءِ دیم ءَ چار گولاں گوازی کٹ اِتگ انت وھدیکہ ڈینمارکءُ تونیسیا، میکسیکو ءُ پولینڈ دیمیگ بوتگ انت –

زیکیں بیگاہ ءَ بوتگیں اولی گوازی سعودی ءُ ارجنٹینا ءِ میان ءَ بوتگ کہ سعودی ءَ بے باوری چہ ارجنٹینا گوازی کٹ اِتگ –

لوسیل فٹبال پٹ ءَ سعودی ءُ ارجنٹینا ءِ میان ءَ بوتگیں گوازی ءَ ارجنٹینا ءِ کپٹن لیونل میسی ءَ نھمی ملٹ ءَ یک گول ءِ اسکور کتگ کہ آئی ءَ پد دگہ دو رند ءَ دو گول جتگ بلے ھردو گول فاؤل گوشگ بوتگ انت –

دومی ھاپ ءَ سعودی ءِ لیبیاں جوانی ءَ گوازی کنان ءَ ارجنٹینا ءِ دیم داشتگ ءُ گوازی ءِ چِل ءُ ھشتمی ملٹ ءَ صالح الشہری ءَ یک گول ءِ اسکور کتگ پنچ ملٹ ءِ گوزگ ءَ پد سعودی ءِ لیبی سلیم الدواسری ءَ دومی گول اسکور کتگ کہ پدا رند ءَ تاں گوازی ءِ گڈ سر ءَ ھچ نیمگ ءَ گول اسکور کنگ نہ بوتگ ءُ سعودی ءَ دو پہ یک گولے ءَ چہ ارجنٹینا ءَ باج برتگ –

دومی گوازی ڈینمارک ءُ تونیسیا ءِ میان ءَ بوتگ کہ ھردو ٹیماں جوانیں گوازی پیش داشتگ ءُ ھردو ٹیم دیمیگ بوتگ انت ھچ نیمگ ءَ گول اسکور کنگ نہ بوتگ –

ھمے وڈ میکسیکو ءُ پولینڈ ءِ میان ءَ بوتگیں گوازی ءَ ھم ھچ گول اسکور کنگ نہ بوتگ ءُ ھردو ٹیم دیمیگ بوتگ انت –

الجنوب فٹبال گوازی پٹ ءَ دوشی شپ بوتگیں ءِ چارمی گوازی فرانس ءُ آسٹریلیا ءِ میان ءَ بوتگ کہ فرانس ءَ چار پہ یک گول ءِ گوازی کٹ اِتگ –

فرانس ءُ آسٹریلیا ءِ میان ءَ بوتگیں گوازی ءَ آسٹریلیا ءَ گوازی ءِ بندات ءَ نھمی ملٹ ءِ تہ ءَ یک گولے اسکور کتگ کہ لیبی سی-گوڈوین ءَ داتگ بلے پدا رند ءَ فرانس ءَ آسٹریلیا ءِ دیم جوانی ءَ داشتگ آسٹریلیا ءَ اولی ھاپ ءِ بیست ءُ ھپتمی ملٹ ءَ وتی اولی گول اسکور کتگ کہ آسٹریلیا ءِ لیبی ادرین روبرٹ داتگ کہ پنچ ملٹانی گوزگ ءَ پد لیبی اولیوئیر دومی گول اسکور کتگ – دومی ھاپ ءِ شست ءُ ھشتمی ملٹ ءَ لیبی کیلئین یک گول ءِ اسکور کتگ ءُ آسٹریلیا ءِ نیمگ ءَ چارمی گول پدا لیبی اولوئیر گراؤڈ اسکور کتگ ءُ گوازی وتی ٹیم ءِ نام ءَ کتگ –

بلوچستان ءِ تیاب دپی دمگ پسنی ءَ چُک ءَ وتی مات کُشتگ-

سربوتگیں ھالانی رِد ءَ بلوچستان ءِ تیاب دپی دمگ پسنی ءِ ھبد ببرشور یک زاکر نامیں ورنایے ءَ وتی مات سادانی سر ءَ بستگ ءُ تپر جتگ کُشتگ-

دمگی مردمانی رِد ءَ زاکر یک نشہ آماچیں ورنایے اے وئیل ھما وھد ءَ دیم ءَ اَتکگ وھدے کہ چُک پہ نشہ ھاتر ءَ مات گور ءَ زر لوٹ اِتگ ءُ زر ندیگ سبب ءَ آئی ءَ وتی مات گپتگ ءُ بستگ تپر جتگ کُشتگ-

وئیل ءَ پد پولیس ءَ کُتکار گپتگ ءُ گیشیں پٹ ءُ برجاہ کتگ وھدے کہ لاش دزگپتگ ءُ نادُراھجاہ ءَ برتگ چار ٹپاس کنگ ءَ پد کھول ءَ داتگ-

زانگ بہ بیت بلوچستان ءَ گیشتریں دمگاں بازیں ورنایے نشہ آماچ اِنت ءُ نشہ باپاری کنوک سر بازار ءَ نشہ بھا کنگ ءَ اَنت بلے دمگی انتزامیہ اے درگت ءَ گامگیج نہ زرتگ-

بلوچستان ءِ دمگ کیچ ءَ جرمنی ءِ جھمندین ڈاکٹر ءِ شرپ ءَ یک زیمری مراگشے برجاہ دارگ بیتگ ءُ چرے مراگش ءَ زیمری تکاں ھوار دگہ پھناتاں بندوکیں مردمان بھر زرتگ –

جرمنی ءِ جھمنند ڈاکٹر ونفرائڈ کپفیمر ماں تربت ءِ تر ءُ تاب ءِ وھد ءَ بلوچی میوزک پروموٹر سوسائٹی ءِ نیمگ ءَ کیچ کلچر کمپلیکس ءَ ساز ءُ زیمری مراگش ءِ برجم دارگ بوتگ – مراگش ءَ ڈاکٹر ونفرائڈ کپفیمر بھر زرتگ – وھدیکہ ساز ءُ زیمری مراگش ءَ بلوچی میوزک پروموٹر سوسائٹی کمک سرکماش خلیل تگرانی، آل پاٹی کیچ ءِ ڈپٹی کنوینر ظریف زدگ، تربت سول سوسائٹی ءِ گلزار دوست ءُ دگہ مردماں ھم بھر زرتگ –

ساز ءُ زیمری مراگش ءَ عارف مزار ءُ زاھد سعدبادی ءَ ڈاکٹر ونفرائڈ کپفیمر ءِ دیم ءَ وتی ازم درانگاز اِتگ – ھمے میان ءَ جرمنی جھمنند ڈاکٹر ونفرائڈ کپفیمر ءَ بلوچی زیمر ءِ ستا کُتگ ءُ ساز ءُ زیمری مراگش ءِ تامر ھم جوڑ کتگ انت –

چریشی ءَ پد ڈائرکٹر کلچر ءُ میوزیم ءِ ایاز ہاشم بزنجو ءُ خلیل تگرانی ءَ آئی ءَ میوزیم ءُ آرٹ گیلری پیش داشتگ انت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ ھشت سد ءُ شست ءُ ھشت روچ سرجم بوتگ انت – گل ءِ سرکماش نصراللہ بلوچ، ما ما قدیر بلوچ، بیگواھیں نودربر رھشون زاکر مجید بلوچ ءِ مات ءُ سعید احمد شاہوانی ءِ مات ھم ھمے وھد ءَ گل ءِ بنجل ءَ ساڑی بوتگ انت –

مروچی بی ایس او ءِ سرکماش زبیر بلوچ ءَ ھوار دگہ بیگواھیں مردمانی کھولاں بنجل ءَ اتکگ ءُ دلپدردی درشان اِتگ –

سال دوھزار نُھ ءِ جون ماہ ءَ چہ مستونگ ءَ زورانسری آوار جنگ بوتگیں نودربر رھشون زاکر مجید بلوچ ءِ مات ءَ گوشتگ کہ منی زھگ ءَ بازیں وھدے بیت کہ پاکستان چیریں زنداناں بندیگ انت –

آئی ءَ گوشتگ کہ مناں سینزدہ سال انت کہ شال، اسلام آباد ءُ کراچی ءِ دگانی سر ءَ زھرشانی کنگ ءَ انت بلے تنی وھدی ریاست منی زھگ ءَ زاھر کنگ ءَ نہ انت –

آئی ءَ گوشتگ کہ بلوچ یکجاہ بہ بیت ءُ زورانسری آوار جنیانی بگیری ءَ توار چست بہ کنت تانکہ اے زوراکی ھلاس بہ بیت –

گل ءِ کمک سرکماش ماما قدیر بلوچ ءَ گوشتگ کہ سرجمیں بلوچستان ءِ بیگواھیں مردمانی کھول وتی دوستیگیں مردمانی کیس ءَ گل ءِ گور ءَ نبشتہ بہ کنائین انت تانکہ زوت ءَ زوت آ سرجم کنگ ءُ کمیشن ءَ دیگ بہ بنت –

آئی ءَ گوشتگ کہ میان استمانی ادارہ ھم بلوچستان ءَ ریاستی زوراکیانی بگیری ءَ گپ بہ جن انت تانکہ بلوچستان انسان نیستی ءَ چہ رکینگ بہ بیت –