TBP Balochi

دوھزار بیست ءُ دو ءِ فیفا ورلڈ کپ ماں گتر ءَ برجاہ، گوستگیں بیگاھ ءَ دوحہ گتر ءِ جتا جتائیں فٹبال گوازی ءِ پٹاں ھشت ٹیمانی میان ءَ گوازی کنگ بوتگ کہ آھانی تہ ءَ سویزرلینڈ ءَ کیمرون ءَ دیم ءَ یک، پرتگال ءَ گانا ءِ دیم ءَ سَے پہ دو ءُ برازیل ءَ سیربیا ءِ دیم ءَ دو گولاں گوازی کٹ اِتگ انت –

گوستگیں بیگاہ ءَ فیفا ورلڈ کپ ءِ پنچمی روچ ءَ اولی گوازی سویزر لینڈ ءُ کیمرون ءِ میان ءَ الجنوب فٹبال پٹ ءَ کنگ بوتگ کہ سویزر لینڈ ءَ یک گولے ءَ گوازی کٹ اِتگ – سویزر لینڈ ءِ نیمگ ءَ گول لیبی بریل ایمبولو ءَ گوازی ءِ دومی ھاپ ءَ چِل ءُ ھشتمی ملٹ ءَ داتگ –

ایجوکیشن سٹی گوازی پٹ ءَ بوتگیں دومی گوازی یوروگائے ءُ ساؤتھ کوریا ءِ میان ءَ بوتگ کہ ھردو ٹیم دیمگ بوتگ انت – گوازی ءِ گڈسر ءَ ھردو نیمگاں گول جنگ ءِ جھد کنگ بوتگ بلے ھچ نیمگ ءَ گول اسکور کنگ نہ بوتگ –

دوشی شپ ماں گتر ءِ ابو عبود فٹبال گوازی پٹ بوتگیں سیمی گوازی پرتگال ءُ گھانا ءِ میان ءَ بوتگ کہ پُرتگال ءَ دو پہ سَے گولاں گوازی کٹ اِتگ-

پرتگال ءُ گھانا ءِ میان ءَ بوتگیں گوازی ءَ اولی ھاپ ءَ ھردو ٹیمانی نیمگ ءَ ھچ گول کنگ نہ بوتگ وھدیکہ دومی ھاپ ءِ شست ءُ پنچمی ملٹ ءَ پرتگال ءِ لیبی رونالڈو ءَ پیلانٹی شوٹ ءَ یک گولے داتگ ءُ پدا گھانا ءِ نیمگ ءَ لیبی ایندرے ءَ ھپتاد ءُ سیمی ملٹ ءَ یک گولے داتگ، ھپتاد ءُ ھشتمی ملٹ ءِ تہ ءَ پرتگال ءِ لیبی جوئو ءَ دومی گول داتگ ءُ کہ دیر نگوستگ دو ملٹ ءِ تہ ءَپرتگال ءِ نیمگ ءَ سیمی گول دیگ بوتگ کہ لیبی رپئیل ءَ داتگ – گھانا ءِ نیمگ ءَ دومی گول لیبی عثمان بخاری ءَ گوازی ءِ ھشتاد ءُ نھمی ملٹ ءَ داتگ – گھانا ءِ لیبیاں پرتگال ءِ دیم ءَ جوانی ءَ لیب کُت بلے گوازی ءِ کٹگ ءَ بے سوب بوت انت –

دوشی شپ لوسیل فٹبال پٹ ءَ بوتگیں چارمی گوازی برازیل ءُ سربیا ءِ میان ءَ بوتگ کہ برازیل ءَ جوانی ءَ گوازی کنان ءَ دو گولاں گوازی کٹ اِتگ وھدیکہ سربیا ءِ نیمگ ءَ ھچ گول دیگ نہ بوتگ –

سربیا ءُ برازیل ءِ میان ءَ بوتگیں گوازی ءَ سربیا ءَ اولی ھاپ ءَ برازیل دیم داشتگ بلے دومی ھاپ ءَ آھاں برازیل لیبی پہ گول دیگ ءَ داشت نہ کُتگ انت دومی ھاپ ءِ شست ءُ دومی ملٹ ءَ برازیل ءِ نیمگ ءَ اولی گول اسکور کنگ بوتگ ءُ ھپتاد ءُ سیمی ملٹ ءَ دومی گول اسکور کنگ بوتگ کہ ھردو گول برازیل ءِ لیبی ریچرلسن ءَ داتگ انت –

روکپتی بلوچستان ءِ بنجاھی شھر دزاپ “زاھدان ” ءَ ناشناسانی تیرگواری ءَ یک مردمے بیران بیتگ –

بیران بیتگیں مردم ءِ پجار ھاجی امان اللہ باجی زئی ءِ نام ءَ زانگ بیتگ ءُ آ ناشناساں زاھدان بعث ءَ تیرانی نشانگ کتگ ءُ کشتگ-

ھاجی امان اللہ وتی ٹک ءِ سروکیں مردماں چہ یکے آ مینگل ٹک ءَ سیادی دار ایت اِنت – کوش ءِ سبب زانگ نہ بیتگ ءُ نانکہ کوشکار زانگ بیتگ اَنت-

ھالانی تہ ءَ گوشگ بیتگ کہ ھاجی امان اللہ ءِ دو زھگ ماں زاھدان ءَ سی ستمبر ءَ زھرشانی ءَ ھواریں آئی ءِ دو زھگ ھم کشگ بیتگ اَنت-

دمگی مردمانی گمان ءِ رد ءَ ھاجی امان اللہ وتی زھگانی کوش ءِ ھلاپ ءَ توار چست کتگ ءُ چریشی ءَ چہ گمان بوگ ءَ اِنت آئی ءِ توار ءِ بے توار کنگ ءَ آ کُشگ بیتگ –

سربوتگیں ھالانی رِد ءَ ناشناسیں سلاہ بندیں مردماں بلوچستان ءِ دمگ پنجگور ءَ پاکستانی پوج ءِ سر ءَ اُرش کُتگ –

اُرش دوشی شپ پنجگور ءَ فیضوک چار راہ ءِ سر ءَ پاکستانی پوج ءِ پانگسے ءِ سر ءَ کنگ بوتگ – اُرش ءَ پاکستانی پوج ءَ جانی تاوان ءِ دیمپانی کنگ کپتگ وھدیکہ سلاہ بندیں مردم در آیگ ءُ رؤگ ءَ سوبمند بوتگ انت-

پوج ءِ پانگسءِ سر ءَ بوتگیں اُرش ءِ زمّہ واری بلوچ سلاہ بندیں گل بی ایل اے ءَ منّ اِتگ –

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ بلوچ لبریشن آرمی ءِ سرمچاراں گوستگیں شپ ءَ پنجگور ءَ فیضوک چار راہ ءِ سر ءَ زورگیریں پاکستانی پوج ءِ پانگسے ءِ سر ءَ اُرش کتگ –

جارکش ءَ گوشتگ کہ سرمچاراں دژمن کارمندانی سر ءَ گرینڈ لانچر ءِ بازیں گولہ ءِ آس داتگ چریشی ءَ دژمن ءَ جانی تاوان رستگ وھدیکہ پانگس ھم تاوان سک باز تاوان بوتگ –

جئیند بلوچ ءِ گوشگ ات کہ بلوچ لبریشن آرمی اے اُرش ءِ زمّہ واری ءَ منیت- دژمن ءِ سرجمی ءَ در آیگ ءَ تاں مئے اُرش برجاہ مان انت –

روکپتی بلوچستان ءَ ایرانی لشکر ءِ نیمگ ءَ کردستان ءَ کردانی بنجلانی سر ءَ اُرشانی ھلاپ ءُ آیانی گون ءَ ھمدردی کنگ ءِ واستا زاھرشانی بیتگ –

زھرشانی زاھدان ءَ ھواریں دمگ شیر آباد ءَ کنگ بیتگ کہ اود ءِ دگ ءِ سر ءَ ٹائر ماندارگ بیتگ ءُ ایرانی سرکار ءِ ھلاپ ءَ ’ مرگ بر خامنہ ای ‘ ءِ اوگام جنگ بیتگ –

آیاں گوشتگ کہ ما کردانی درداں یکشل ءَ ھوار بیتگ ءُ انگت ءَ ھوار اِنت چریشی ءَ آیانی سر ءَ ھرچ وڑیں زُلمے بیت اِنت ما آیانی گون ءَ ھمکوپگ اِنت-

چریشی ءَ پیش راسک ءَ ھم کردستان ءِ مھلوک ءِ گون ءَ پدردی ءِ درشان ءَ ٹائر ماندارگ بیتگ ءُ دگ بند کنگ بیتگ ات اَنت-

زانگ بہ بیت ھمے ماہ ءَ ایران ءَ رودراتکی عراق ءَ کرد بنجلانی سر ءَ اُرش کرتگ ات کہ چریشی ءَ شش مردم ءَ گیش مردم بیران ءُ لھتے زدگ بیتگ ات اَنت –

اشاں ھوار ھوار دگہ جھانی ڈیھ ءُ انسانی ھکانی گلاں ھم ایران ءِ اُرش جتگ ءُ اے زوراکی یے گشتگ اَنت-

زالبولانی سر ءَ لٹ ءُ کُٹانی ھلاسی ءِ میان اُستمانی روچ ءِ درگت ءَ اوگانستان ءِ بنجاھی شھر کابل ءَ لھتے زالبولاں وتی ھکانی ھاتر ءَ زھرشانی کتگ ءُ لوٹ کتگ کہ آیانی ھک ءُ ھساب منگ بہ بنت-

فرانسیسی ھال سرکنوکیں ادارہ اے ایف پی ءِ رد ءَ پشمبے ءِ روچ ءَ بیوکیں زھرشانی ءَ زالبولاں فارسی زبان ءَ نبشتگین پلے کارڈز چست کتگ ءُ آیانی سر ءَ نبشتگ کہ ’ ما گڈی ءَ داں تی ھکانی واستا گھگیری کن ایں کسے ءِ دیم ءَ نہ پروش اِیں‘-

گوستگیں سال ءِ اگست ءَ طالبان ءِ نیمگ ءَ کابل ءِ دستیگ کنگ ءَ پد اوگانستان ءَ زالبول مردینانی جاھاں دور کنگ بیتگ اَنت داں انگت ءَ زالبول کم لوگاں چہ در کاینت ءُ وتی ھکانی واستا توار چست کن اَنت –

طالبان ءِ واک ءِ وھد ءَ ھم زالبول دگانی سر ءَ در اتکگ ءُ زھرشانی اش کتگ بلے زوراکی ءَ چہ آ ھلاس کنگ بیتگ اَنت برے زھرشانی ءِ میان ءَ لٹ ءُ کٹی بیتگ اَنت-

مروچی پشمبے ءِ روچ ءَ بیوکیں زھرشانی ءَ زالبولانی نگاھپانی ءَ طالبان ءِ جنگول کنگ بیتگ اَنت ءُ ھمے وڑ انٹیلی جنس ءِ گاڑی ھم ھمود ءَ جاڑیگ بیتگ اَنت-

طالبان ءِ سرکار ءِ آیگ ءَ پد بازیں زالبول وتی سرکاری نوکریاں چہ زبھر بیتگ اَنت- ءُ آ لوگانی توک ءَ نندگ ءَ لاچار کنگ بیتگ اَنت ءُ آ باز کم نھاد دیگ بنت-

طالبان ءَ ھما مردم کہ آئی ءِ وتیگ اِنت ھما زالبول وتی مردم ءِ ھمراھی ءَ بزانکہ مھرم ءَ ابید آئی ءَ سپر کنگ ءِ اجازت نیست اِنت ءُ ڈن ءَ درایگ ءَ آئی ءَ چاردر ءُ برکہ کنگی اِنت –

ھمے ماہ ءَ طالبان ءَ زالبولانی سواد جاہ ءُ روگ ءُ جمزانی روگ ءَ بندش جتگ بیتگ ءُ جنک سیکنڈری اسکول ءِ روگ ءَ بندش جنگ ءِ پژدر ءَ میان اُستمانی تکاں ایراد ءَ پد داں انگت ءَ بندش ھلاس نہ کتگ –

زالبولانی سر ءَ لٹ ءُ کُٹانی ھلاسی ءِ میان اُستمانی روچ بیست ءُ پنچ نومبر ءَ دارگ بیت اِنت میان اُستمان ءِ رد ءَ زالبول ءُ جنکانی سر ءَ سرجمیں دنیا ءَ زوراکی بیت اِنت انسانی ھکانی مسترین لگتمالی یے اے لٹ ءُ کُٹاں ھر سَے جنکانی توک ءَ یکے اسرمند اِنت-

ھاش ءُ ایرانشھر ءَ ایرانی لشکر ءِ دست ءَ دو کس آوار جنگ ءَ پد بیگواہ کنگ بیتگ اَنت-

سر بیتگیں ھالانی رد ءَ روکپتی بلوچستان ءِ دمگ ھاش ءَ ایرانی لشکر ءَ یک ورنایے آوار جنگ ءَ پد بیگواہ کرتگ –

آوار جنگ بیتگیں مردم ءِ پجار عبدالباسط ریگی پنام ءِ باسط بوکسور امیر حمزہ میتگ ھاش ءِ نام ءَ زانگ بیتگ-

ھالانی تہ ءَ گوشگ بیتگ کہ عبدالباسط یک ھوٹلے ءَ نندوک بیتگ کہ ایرانی لشکر ءَ آوار جتگ ءَ برتگ پد ءَ آئی ءِ درگت ءَ دگہ ھال دیم ءَ نیتکگ اَنت-

ھالانی تہ ءَ گوشگ بیتگ کہ عبدلباسط یک بوکسرے کہ آ حسءن ثوری رئیس فدارسیون بوکسنگ ءِ ھیلکاری ءَ اِنت ءُ اود ءَ وت ھم دگہ مردماں بوکسنگ ءِ ھیلکاری دنت –

ھمے وڑ ءَ چہ ایرانشھر ءَ یک ملایے ھم ایرانی سپاہ ءَ گپتگ ءُ برتگ –

چہ ایرانشھر ءَ آوار جنگ بیتگیں مردم ءِ پجار مولانا فضل الرھمان ریگی ءِ نام ءَ زانگ بیتگ –

ھمے وڑ ءَ گوشگ بیتگ کہ مولانا فضل الرھمان ھمے گوستگیں رمزان ءِ ماہ ءَ ھم ھما وھد ءَ گرگ بیتگ کہ زاھدان ءَ دیم پہ ھاش ءَ روگ ءَ بیتگ ءُ داں سَے ماہ ءَ زندانی ءَ پد یلو بیتگ –

بلے اے دومی رند اِنت آ پد ءَ واتر گرگ بیتگ ءُ ناشناسیں زنداناں برگ بیتگ –

روکپتی بلوچستان ءِ دمگ ایرانشھر ءَ یک وانگجاھے ءَ ایرانی چیریں ادارھاں نُھ بلوچ جنکیں نودربر دزگیر کرتگ ءُ برتگ اَنت-

سر بیتگین ھالانی رد ءَ روکپتی بلوچستان ءِ دمگ ایرانشھر ءَ سجادی وانگجاہ ءَ ایرانی چیریں ادارہ “اطلاعات ” ءَ نُھ جنکیں نودربر دزگیر کرتگ ءُ برتگ اَنت-

ھالانی تہ ءَ گوشگ بیتگ کہ ھر نُھیں جنکانی سر ءَ ایرانی چیریں ادارھاں زھرشانیاں اوگان جنگ ءُ سرکار ءِ ھلاپ ءَ گپ کنگ ءِ پژدر ءَ گپتگ ءُ برتگ اَنت-

چریشی ءَ پد وانگجاہ ءِ نودربراں زھرشانی کنان ءَ پرنسپل ءِ سر ءَ بھتام جتگ ءُ گوشتگ’ کہ اے نودربر ھما وھد ءَ دزگیر کنگ ءُ برگ بیتگ اَنت کہ پرنسپل ءَ اے نُھیں نودربر یک کوٹی ءِ تہ ءَ بند کتگ ءُ چیریں ادارہ ھال داتگ اَنت ‘-

اشی ءَ ھوار ھوار راسک، نیکشھر، زاھدان ءُ پیشین ءَ ھم ھمے وڑیں پیش اتکگ اَنت-

ھمے وڑ ءَ ایرانی رمس سَے آبان ءَ وانگجاہ ءَ ایرانی لشکر اتکگ ءُ پد ءَ وانگجاہ ءِ مدیر پروین اعتصامی ءِ بیرانی ءِ ھال دیم ءَ اتکگ گمان ھمے بیت کہ آ ھم کُشگ بیتگ-

زانگ بہ بیت روکپتی بلوچستان ءَ برانزگپتگیں زھرشانی درچ ھما وھد ءَ بندات بیتگ اَنت سی ستمبر ءَ بنجاھی شھر دزاپ ءَ چھبار ءَ بلوچ جنک ماھو ءِ گون ءَ پولیس ءِ زوراکی ءِ ھلاپ ءَ زھرشانی بیتگ ات اَنت-

چرے زھرشانی ءَ بازین کچے ءَ مردم بیران ءُ زدگ بیتگ ات اَنت پد ءَ روکپتی بلوچستان ءَ یک نوکیں درچے مردمانی آوار جنگ ءُ گار کنگ ءِ بندات بیتگ کہ روچ پہ روچ گیشی ءِ نیمگ ءَ گندگ آیگ ءَ اِنت-

تامرکاری ءِ ازمکار جھانوی کپور ءَ گوشتگ کہ فلمساز کرن جوھر ءَ آ تامرکاری ءَ آورتگ چریشی ءِ سبب ءَ درست سبکی ءَ گون من نپرت کن اَنت-

ھندوستان ٹائمز ءِ رد ءَ جھانوی کپور ءَ گوشتگ کہ من کرن جوھر ءِ دھرما پروڈکشن ءِ سبب ءَ تامرکاری ءَ اتکگ اَنت چریشی ءِ سبب ءَ منی زھر اش کیت اِنت – آئی ءَ گشتگ من ءَ ھچ پشومانی نیست اِنت-

کرن جوھر ءَ پروڈیوسر جھانوی کپور ءَ سال دوھزار ءُ ھژدہ ءَ مراٹھی تامر ” سیرت ” ءِ آفیشل ریمیک “دھڑک ” ءِ کاسٹ کتگ اے جھانوی کپور ءِ تامرکاریطےِ ڈیبیو تامر بیتگ کہ چریشی ءَ پد آ سرجمیں دنیا ءَ نامان بیتگ ءُ دگہ تامراں کار کنگے بندات کتگ –

جھانوی کپور تامری کاری ءِ ھما اسٹار زھگاں ھوار اِنت آیانی سر ءَ اقربا پروری ءِ انڈسٹری ءِ آیگ ءِ بھتام جتگ بیتگ ءُ جھانوی ءِ سر ءَ ایراد گرگ بیت اِنت وتی زانت ءَ ابید سری دیوی ءِ زھگ ءِ سبب ءَ تامرکاری ءَ اتکگ –

ھمے درچ ءَ جھانوی کپور ءَ دیمتر ءَ گشتگ کہ اے یک راستی یے دھرما یک نامی ئیں پروڈکشن ھاوسے ءُ آئی نھاد ھنچ برز بیتگ دھرما ءَ ھما کساس ءَ مھلوک ءِ ھب ھست اِنت بیت کنت آئی ءِ دیم ءَ کس اوشتات نہ کنت ھمے سبب ءَ آئی ءِ سر ءَ یکیں راہ اِنت نپرت ءِ ودی کنگ-

جھانوی کپور ءِ گڈی شنگ بیوکیں تامر “مِلی ” آئی ءِ شنگکاری سینماھاں بوگ ءَ اَنت سال دوھزار ءُ بیست ءُ سَے ءَ جھانوی کپور ءِ دو تامر “بوال ءُ مسٹر اینڈ مسز ماھی ” شنگ بنت-

گتر ءَ برجاھیں فیفا ورلڈ کپ ءِ چارمی روچ ءَ بیلجئیم ءُ کنیڈا، اسپین ءُ کوسٹا ریکا ، جرمنی ءُ جاپان، موراکو ءُ کروتیا ءِ میان ءَ گوازی کنگ بوتگ کہ آھانی تہ ءَ بلجئیم ءَ کنیڈا ءِ دیم ءَ یک گولے ءَ، اسپین ءَ کوسٹاریکا ءِ دیم ءَ ھپت ءُ جاپان ءَ جرمنی ءِ دیم ءَ دو پہ یک گولے ءَ گوازی کٹ اتگ انت وھدیکہ موراکو ءُ کوروتیا دیمیگ بوتگ انت –

گوستگیں بیگاہ ءَ احمد بن علی فٹبال پٹ ءَ بیلجئیم ءُ کنیڈا ءِ میان ءَ گوازی کنگ بوتگ کہ بیلجئیم ءَ یک گولے ءَ گوازی کٹ اِتگ – بیلجئیم ءِ گول اسکورر کنوک میچی بوتگ کہ آئی ءَ گوازی ءِ چل ءُ چارمی ملٹ ءَ وتی گول اسکور کتگ –

دومی گوازی ماں گتر ءَ خلیفہ انٹرنیشنل فٹبال پٹ ءَ جرمنی ءُ جاپان ءِ میان ءَ بوتگ کہ جاپان ءَ جرمنی ءِ دیم ءَ دو پہ یک گولے ءَ گوازی کٹ اِتگ –

گوازی ءِ اولی ھاپ ءَ جاپان ءِ نیمگ ءَ ھچ گول اسکور کنگ نہ بوتگ بلے جرمنی ءَ جوانی ءَ گوازی کنان ءَ پیلانی شوٹ ءَ یک گول ءِ اسکور کتگ کہ ایلکے ءَ داتگ بلے دومی ھاپ ءَ جاپان ءَ جرمنی دیم داشتگ گوازی ءِ ھپتاد ءُ پنچمی ملٹ ءَ لیبی آر – ڈاون ءَ یک گول ءِ اسکور کتگ ءُ پدا ھشتاد ءُ سیمی ملٹ ءِ تہ ءَ جاپانی لیبی ٹی-اسانو ءَ دومی گول اسکور کتگ ءُ چہ جرمنی ءَ یک گولے ءَ باج بُرتگ –

ال تمیمیہ فٹبال پٹ ءَ بوتگیں سیمی گوازی اسپین ءُ کوسٹاریکا ءِ میان ءَ بوتگ کہ اسپین ءَ پُرسنچیں گوازی پیش داشتگ ءُ اولی ھاپ ءِ یازدھمی ملٹ ءَ بگر تاں دومی ھاپ ءِ گڈی ءَ نودمی ملٹ ءَ کوسٹا ریکا ءِ دیم ءَ ھپت گول اسکور کتگ وھدیکہ کوسٹا ریکا ءِ لیبی ھچ وڈا گول اسکور کنگ ءَ سوبمند نہ بوتگ انت –

اسپین ءِ نیمگ ءَ چہ اولی گول ڈینی ءَ یازدھمی ملٹ ءَ داتگ ءُ پدا بیست ءُ یکمی ملٹ ءَ مارکو ءَ دومی گول اسکور کُتگ ءُ اولی ھاپ ءِ سی ءُ یکمی ملٹ ءَ فیرن وتی اولی گول اسکور کتگ ءُ دومی ھاپ ءِ پنجاہ ءُ چارمی ملٹ ءَ پدا وتی دومی گول داتگ – دومی ھاپ ءِ ھپتاد ءُ چارمی ملٹ ءَ اسپین ءِ ھژدہ سالی ورنا پبلو مارٹین ءَ داتگ پبلو ءَ رند نودمی ملٹ ءَ کارلوس ءَ وتی گول داتگ ءُ گوازی ءِ گیشیں ملٹانی تہ ءَ اسپین ءِ لیبی ایلوارو موراٹا ءَ ھم پہ گول دیگ ءَ وتی بھر گپتگ ءُ یک گول ءِ اسکور کتگ –

زیکیں روچ ءَ ال بیت فٹبال بوتگیں اولی گوازی کروتیا ءُ موراکو ءِ میان ءَ بوتگ کہ ھردو ٹیم دیمیگ بوتگ انت – ھردو ٹیمانی لیبیاں جوانی گوازی پیش داشتگ کہ ھچ نیمگ ءَ گول اسکور کنگ نہ بوتگ –

گوستگیں روچ ءَ چہ شال ءَ زورانسری بیگواہ کنگ بیتگیں سے نودربر یل کنگ بیتگ ءُ وھدے کہ یکے انگت بیگواہ ءَ اِنت-

سربوتگیں ھالانی رِد ءَ گوستگیں روچ ءَ شال ءِ دمگ چہ عیسیٰ نگری ءَ پوج ءِ دست ءَ آوار جنگ ءَ پد زورانسری آوار جنگ بیتگیں چار نودربرانی تہ ءَ چہ سے قمبر لال ، رحمت اللہ ءُ مراد جان یل کنگ بیتگ اَنت-

شال عیسیٰ نگری ءَ آوار جنگ ءَ پد بیگواہ کنگ بیتگیں چارمی ھمراہ وحید سخی انگت بیگواہ ءَ اِنت-

نودربرانی زورانسری آوار جنی ءِ ھال آیانی کھولاں داتگ اَنت کھول رِد ءَ وتی وانگ ءِ ھاتر ءَ شال ءَ جھمنند بیتگ اَنت کہ لوگ ءَ بیڑبرتگ ءُ پوج کارندہ آوار جتگ ءُ بیگواہ کتگ اَنت-

زانگ بہ بیت بلوچستان ءَ زورانسری آوار جنی ءِ وئیل دْرچ یک دراجیں مدتے بیت برجاہ ءَ اِنت کہ اود ءَ لھتے بیگواھیں مردم لوگاں سر بیتگ اَنت بلے بیگواھیں مردمانی یل کنائینگ ءِ ھاتر ءَ توار چست کنوکیں گل ءِ رِد ءَ دگہ بازیں مردمے زورانسری آوار جنی ءِ نشانگ کنگ بیتگ اَنت –

گل رِد ءَ بلوچستان ءَ جتاجتائیں ھیال لیکہ سیادی داروکیں بیست ھزار ءَ گیش مردم بے کانودی زورانسری آوار جنی ءِ نشانگ کنگ بیتگ اَنت کہ آیانی تہ ءَ پدریں کچ سیاسی نودربر ءُ رھشونانی ئیگ اِنت-

چہ بلوچستان ءَ گْوستگیں چیزے روچ ءَ ءُ چیزے بیگواھیں مردم آجو بیتگ ءُ وتی لوگاں سر بیتگ اَنت – دومی نیمگ ءَ بیگواھیں مردمانی کھولاں گل وائس فار بلوچ مسنگ پرسنز ءِ نیمگ ءَ چہ شُدکُشیں ھڑتالی بُنجل شال پریس کلب دیم ءَ برجاہ ءَ اِنت-