TBP Balochi

بلوچستان ءِ زرباری شھر گوادر ءَ فیفا ورلڈ کپ ءِ درگت ءَ مھلوکاں وتی لوگ ءُ کوچگ سمبھینتگ اَنت۔

بلوچستان ءِ زرباری شھر گوادر ءَ فٹبال دوست داروکانی گامگیج برجاہ اَنت، بازیں فٹبال دوست داروکاں وتی دل دوستیں ٹیمانی بیرک دیوالانی سرءَ اڈ کنگ ءُ لِک کنگ بندات کُتگ اَنت۔ شھر ءِ دیوالانی سرءَ ھم جتاھیں ٹیمانی نام ءُ عکساں گوں سمبھینگ بئیگ ءَ اِنت۔

فٹبال بلوچستان ءِ دگہ دمگانی پئیم ءَ گوادر ءَ ھم دوست دارگ بیت اِنت، پمیشکہ جھانءِ مستریں فٹبال ءِ میڑ ءَ چہ پیسر گوادر ءِ مھلوک پہ ٹورنامنٹ ءَ ساڑی اَنت۔

فیفا ءِ جھانی کپ فٹ بال ٹورنا منٹ 2022 ءِ بندات بئیگ ءَ لھتیں ساھت پشت کپتگ اَنت۔ اے ٹورنامنٹ تہءَ ھوار بئیوکیں جھانی ٹیم وتی لئیبیانی ناماں سرجم کنگ ءَ اَنت۔ فٹبال ءِ اے مستریں ٹورنامنٹ 20 نومبر ءَ چہ 18دسمبر ءَ برجاہ بنت۔ قطر اے ٹورنامنٹ ءِ گروپ لئیبانی تہءَ 22 روچانی نیام ءَ جھانءِ 32 ڈیھانی راجی ٹیمانی مھمانجلی ءَ کنت ءُ اَے لئیبانی چارگ ءَ سرجمیں جھان ءَ چہ ھزارانی کچ ءَ مھلوک لئیبانی چارگ ءَ اتکگ اَنت۔

قطر ءِ ھاسیں پئیم ءَ اڈ کُتگیں ھشت پِڑانی تہءَ اے لئیب برجاہ مان اَنت۔ لئیب لوسیل اسٹیڈیم،974، الثمامہ اسٹیڈیم، البیت اسٹیڈیم، خلیفہ انٹرنیشنل اسٹیڈیم، احمد بن علی اسٹیڈیم، ایجوکیشن سٹی اسٹیڈیم ءُ الجنوب اسٹیڈیم ءَ برجاہ مان اَنت۔

بلوچستان ءِ بنجاھی شھر شال سریاب ءَ بلوچ اسٹوڈنٹس ایکشن کمیٹی سریاب بُنزہ ءِ نیمگ ءَ چہ یک زانشتی مراگشے برجم دارگ بُوتگ- مراگش ءِ گچینی مھمان بساک ءِ بُنجاھی کماش ءُ شال ھنکین ءِ سنگت اُزیر بلوچ ءُ عامر بلوچ بُوتگ اَنت- ‎اے مراگش سریاب ءِ بلوچ نودربرانی زانشتی سرپدی دیگ ءِ ھاتر ءَ برجاہ دارگ بوتگ، کہ اود ءَ نودربراں مزنیں کساسے ءَ بھر زُرتگ –

مراگش ءِ بِندات ءَ کئیریئر کونسلنگ وانگ ءِ ارزشت ءِ سر ءَ تران بُوتگ ءُ نودربراناں سرپدی دیگ بُوتگ ءُ سریاب ءِ وانگی جاورانی ھوالہ ءَ گپ بُوتگ۔

نودربراں وانگ ءُ زانگ ءِ ارزشت ءِ سر ءَ وتی ٹیبلوئے پیش کُتگ ءُ بلوچستان کتاب کاروان ءِ نام ءَ کتاب اسٹالے ھم جنگ بُوتگ کہ پہ زھگاں تاکبند ایر کنگ بیتگ ءُ بلوچ لیٹریسی کیمپئین ءِ درگت ءَ ھم سرپدی دئیگ بُوتگ-

بلوچستان فزیوتھراپی ایسوسی ایشن ءِ جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ ڈاکٹر جاوید بلوچ ءَ مروچی دوازدہ روچ انت کہ وتی بنکی ھکانی ھاتر ءَ شال ءَ سارتی ءِ سر ءَ شدکشیں ھڑتال ءَ نشتگ، لیب رپورٹ ءِرِد ءَ بلڈ گلوکوز لیول سک باز جھل انت بلے سرکار ھنگت زاھری نہ دنت، سرکار ءِ نادلگوشی ءَ مارا پدردیگ کتگ ما درسیں انسانی ھکانی گل، سوشل ایکٹویسٹاں ھوار ھر تک ءُ پھناتاں سیادی داروکیں مردماں لوٹ کن ایں کہ سرکار ءِ اے نادلگوشی ءِ بگیری ءَ توار چست بہ کن انت –

آئی ءَ گوشتگ کہ یاد بہ بیت بلوچستان ءِ سر وزیر ءَ اکتوبرءَ فزیو تھراپسٹ ڈاکٹرانی ھاتر ءَ دو سد آسراتیانی درگت ءَ ڈائریکشن داتگ بوتگ بلے جانسلامتی ءِ واکدار ءُ گوستگیں پرنسپل سیکرٹری ءَ وتی زاتی انایے سوب ءَ بس ھشتاد ءُ شش آسراتیانی سمری جوڈ کتگ کہ اشی ما ھمے پھمیں کہ گند ءُ نند ءِ نام ءَ گوم ءَ پراڈی بوتگ، گند ءُ نند ءِ نیام ءَ بلوچستان سر وزیر ءَ ڈی پی ٹی ءِ کارگس آفیسرانی ھمک ماھی اسٹیفنڈ درگت کمیٹی ءِ جوڈ کنگے سپارش بوتگ بلے ماھے پرگوستگ ھنگت ھچ پہ ھچ –

جارکش ءَ گوشتگ کہ ما سروزیر ءَ گوں دزبندی کن ایں کہ مئے سنگتانی شدکشیں ھرتال ءَ آھانی جاور نگیگ بوان انت چدوگیشتر نادلگوشی مئے سنگتانی زند ءَ پہ بلاھیں ھترھے تہ ءَ دور دنت –

گوریچانی کوریا ءِ سروک کم جونگ اُن ءَ اولی رند ءَ وتی جنک دنیا ءِ دیم ءَ آورتگ-

ھال سرکنوکیں ادارہ روئٹرز ءِ رد ءَ آدینگ ءِ روچ ءَ انٹرکانٹیننٹل بیلسٹک میزائل ءِ چکاس ءِ وھد ءَ کم جونگ اُن وتی جنک ءِ ھمراھی ءَ یک اکسے دیم ءَ اتکگ کہ اود ءَ گندگ بیت اِنت آئی ءَ وتی جنک ءِ دست ءَ گپتگ-

گوریچانی کوریا ءِ سرکاری ھال سرکنوکیں ایجنسی ءِ سی این اے ءَ گوشتگ کہ آدینگ ءِ روچ ءَ ھواسانگ ءَ انٹرکانٹیننٹل بیلسٹک میزائل ءِ چکاس ءِ وھد ءَ کم جونگ اُن وتی کھول ءِ ھمراھی ءَ جاڑیگ اِنت-

درستاں ابکہ کنوکیں گپ ایش اِنت اے وھد ءَ آئی ءِ جنکے بیتگ مھلوک ءَ آئی ءِ جنک ءِ بارو ءَ ھچ سرپدی نہ بیتگ سی این اے ءَ گوریچانی کوریا ءِ سروک ءِ جنک ءِ نام پدر نہ کرتگ-

امریکہ ءِ اسٹمسن سینٹر ءَ گوریچانی کوریا ءِ زانتکار مائیکل میڈن ءِ گوشگ اِنت اے اولی رند اِنت ما کم جونگ اُن ءِ جنک ءَ یک سرکاری مراگشے ءَ گندگ ءَ ایں اے باز جوان اِنت کہ آئی ءَ وتی جنک دیم ءَ آورتگ-

زانتکارانی گمان ءِ گوشگ اِنت کہ کم جونگ اُن ءِ دو جنک اَنت ءُ یک بچکے –

لھتے چاروکانی گوشگ اِنت ستمبر ءِ ماہ ءَ راجی آجوئی ءِ روچ ءَ لھتے اکس آئی ءِ چُکانی دیم ءَ اتکگ بیتگ اَنت-

زانگ بہ بیت امریکہ ءَ سیادی داروکیں باسکٹ بال ءِ کلاڑی ڈینس روڈمین ءَ سال دوھزار ءُ سیزدہ ءَ گشتگ ات کہ کم جون اُن ءِ یک کستریں جنکے ءِ ناک جو ای اِنت-

ھما سال ءَ گوریچانی کوریا ءَ تر ءُ تاب ءَ پد ڈینس روڈمین ءَ برطانیہ ءِ ھالتاک دی گارڈن ءَ گوں گپ کنان ءَ گوشتگ ات آئی ءَ کم جونگ اُن ءُ آئی ءِ کھول ءِ گون ءَ لھتے وھد گوازینتگ ءُ آئی ءِ جنک بڈا ھم کرتگ-

مائیکل میڈن ءِ رد ءَ جو ای ءِ اُمر دوازدہ ءُ سیزدہ سال ءِ میان ءَ بیت اِنت اشی ءِ گمان ھمے وڑ اِنت گڑا آیوکیں چار یا پنچ سالاں آ یونیورسٹی یا پوج ءَ روت اِنت-

گوریچانی کوریا ءَ ھچ بر اے ھال شنگ نہ کتگ کم جونگ اُن ءَ پد آئی ءِ جاہ ءَ کے زور ایت –

پاکستانی کسمانکاری ءِ نامی ئیں وشکندی ازمکار طارق ٹیڈی بازیں نادراھیاں پد مروچی ماں لاھور ءَ بیران بیتگ-

اردو نیوز ءِ رد ءَ لھتے روچ ءَ پیسر سروزیر پنجاب چوھدری پرویز الھی ءَ ازمکات طارق ٹیڈی ءِ مپت ءَ جاندراھی کنگ ءِ جار جتگ ات-

آ بازیں وھداں ساہ کشگ ءُ جگرانی نادراھی ءِ آماچ بیتگ-

طارق ٹیڈی ءِ برات ءَ آئی ءِ بیرانی ءِ ھال راست کتگ ءُ گوشتگ کہ جاورانی ناگیگی ءِ سبب ءَ وشکندی ازمکار طارق ٹیڈی وینٹیلیٹر ءَ برتگ-

پاکستان ءِ کڈنی اینڈ لیور ٹرانسپلانٹ ھسپتال ءِ رد ءَ جگر ءِ کمی ءِ سبب ءَ طارق ٹیڈی نادراہ بیتگ-

ھسپتال ءِ رد ءَ آئی جگراں ھپتاد درسد کار کنگ یل داتگ-

پاکستانی وزیر اطلاعات ءُ نشریات مریم اورنگزیب ءَ آئی ءِ بیرانی ءِ سر ءَ پدردری درشان کتگ ءُ گوشتگ کہ تلو ءِ سر ءَ وشکندی ءُ پنجابی تامراں آئی ءَ جوانیں کرد پیلو کرتگ-

آئی ءَ گوشتگ کہ مارا طارق ٹیڈی ءِ وشکندی ازمکاری ءِ کندینوکیں چھرگ مدام یاتگیری بنت-

بلوچستان نیشنل پاٹی ءِ سروک ءُ پاکستان اسمبلی ءِ باسک سردار اختر مینگل ءَ مستونگ ءِ ھند کھڈکوچہ ءَ مُچی ءَ تران کنان ءَ گوشتگ واک ءِ آیگ ءَ ھچ مول نیست اِنت راستیں منزل بلوچ راج ءِ ھک ءُ ھک ءِ وت واجھی اِنت این پی 1970 ءَ نیشنل عوامی پاٹی ءِ پدریچ اِنت مروچی یک ٹوھیں درچکے جوڑ بیتگ آئی ءِ سیاھگ ءَ ھمک بلوچ وتی دم ءَ سارت کنگ ءَ اِنت ما واک ءُ کرسی ءِ رکینگ ءَ نہ اِنت ما ازت ءِ رکینگ ءَ ایں مارا ازت دیگ بیت اِنت ما آیانی نسلانی ازت ءَ کن ایں –

اختر مینگل ءَ گوشتگ واک ءُ کرسی ءِ واستا مردم وتی سنچ ءَ بھا کن اَنت سرکار ءِ ھلاس بیگ ءَ لانگ مارچ کن اَنت وزارت ءِ ھلاس ءَ بیگ ءَ پد شد ھرتال کن اَنت 1998 ءَ اسٹیبلشمنٹ ءَ مئے پاٹی بھر ءُ بانگ کتگ ما ھچ زھرشانی نہ کتگ بلے بلوچستان ءَ بلوچانی نسل کُشی، آپریشن، نواب اکبر خان بگٹی ءِ شھید کنگ ءُ دگ ءُ جنگل ءُ گیاباناں ورنایانی کپتگیں جونانی ھلاپ ءَ الم زھرشانی کتگ –

آئی ءَ گوشتگ کہ بی این پی ءَ بلوچ راج ءِ ننگ ءُ ناموس ءُ زر ءُ مڈیانی ھچ بر سودا نہ جتگ مروچی واک ءِ گرگ ءَ مردم یک دومی ءَ اسٹیج ءُ ٹی وی چینلاں زاہ ءُ بد کنگ ءَ اَنت-

آئی ءَ گوشتگ کہ مسنگ پرسن کمیشن ءِ ٹیم ءَ ھواریں اسلام آباد ءَ اتکگیں ٹیم ءِ باسکاں مارا گشتگ کہ مسنگ پرسن کمیشن ءِ دیم ءَ پیش بیوکیں زالبول، زھگ ءُ ماتانی پریاتاں مئے دل ترک ایت بلے آیانی واستا اے یک روچے بیتگ ما سالانی سال ھمے زُلمانی دیم ءَ گوزگ ءَ اِنت بیگواھیں ورنایانی مات ءُ گوھار ءُ زھگانی پریات اشکتگ مئے دل ترک اتگ بلے ھاکماں ھچبر مئے توار گوش نہ داشتگ –

سردار اختر مینگل ءَ گوشتگ کہ ھدا ءِ کسم اِنت اگاں من ءَ سروزیر بہ کن اَنت بلے من ءَ کبول نہ اِنت بلے من ءَ اے پیرمات ءِ چماں دراتکگیں ھرس گیش دوست اَنت وتی زھگ ءِ ودار ءَ نیشتگ مارا واکداری ءَ بھر بوگی نہ اِنت اشی ءِ مٹ ءَ مارا وتی بیگواھیں ورنا لوٹ اَنت-

آئی ءَ گوشتگ کہ ھاکمانی ٹولی وتی واک ءِ واستا یک سالے ءَ یا پنچ سال ءَ ودار کت نہ کن اَنت بلے اے مات، گوھار ءُ زھگاں جست کن کہ اے پانزدہ سال دہ سال ءَ داں ودار کنگ ءَ اَنت آیاں اے ھم سرپدی نیست اِنت اشانی مردم مرتگ اَنت یا زندگ اَنت اگاں نیست اَنت گڑا اشاں سرپدی بہ بیت آ جنوزام اَنت یا آیانی مردم زندگ ءُ سلامت اَنت-

آئی ءَ گوشتگ مارا انگت گوشگ بیت اِنت اشانی زُلم ءُ زوراکیانی ھلاپ ما وتی زبان بند کتگ بلے ما بے زمیر ءُ مرتگیں مردم نہ اِنت داں انگت ءَ مئے زمیر زندگ اِنت مشرف ءِ زوراکی ءِ وھد ءَ مئے ھپت سد ءَ گیش رھشون ءُ باسک زندانی کنگ بیتگ اَنت سدانی کچ ءَ سیاسی رھشون ءُ باسک کشگ بیتگ اَنت بلے من آیان جست کن آں ھرچی راجدوستی ءِ ٹاہ ءَ دنت آیانی پونز ءَ ھون ءِ تشے ھم نیست اِنت نا کہ آیانی یک کُکڑے کسے ءَ گپتگ-

آئی ءَ گوشتگ کہ بی این پی اے وڑیں بے زمیرانی دیم ءَ پسو کار ھم نہ اِنت بلے الم بلوچ راج ءِ دیم ءَ پسو دے ایں راجدپتر پدر کنت بی این پی ءَ بلوچستان ءَ ننگ ءُ ناموس ءِ سودا نہ جتگ –

آئی ءَ گوشتگ کہ ھمک آیوکیں الیکشن ءِ وھد ءَ لھتے مردم گوش اَنت الیکشن آیوک اِنت مارا وتی گپ ءُ ترانانی توک ءَ نرمی آرگی اِنت بلے من آیاں گوشگ لوٹ آں مارا بلوچ راج ءِ ننگ ءُ ناموس دوست اِنت مارا واکداری ءُ کرسی ءُ دگہ وتی نام ءَ ھچ چیز کنگ ءِ ھوار کنگ ءِ زلوری نہ اِنت – آئی ءَ گوشتگ ما مزن مزنیں ٹاہ دات نہ کن ایں کہ اد ءَ ما بینگ ءُ شیر ءِ جوہ ءَ تاچین اِنت بلے مئے باسک وتی سر ءَ چست کن اَنت راہ ءَ رو اَنت مارا واک ءَ ھرچی کنگی اِنت گڑا ادے مردماں بجلی گیس ورگی آپ ءُ زند ءِ ھمک روچی آسراتی زلورت اَنت-

بلوچستان ءِ دمگ کیچ ءَ پاکستانی پوج ءَ لشکر کشی ءِ میان ءَ دو مردمانی جنگ ءِ ٹاہ جتگ-

پاکستانی پوج ءِ بنشون ( آئی ایس پی آر) رِد ءَ چیریں ھالانی رسگ ءِ سرءَ بلوچستان ءِ دمگ ھوشاپ ءِ بلور ھند ءَ بیڑبرتگ-

جارکش رِد ءَ سلاہ بندیں مردمانی اوتاک ءِ نزیک ءَ پوجی کارندھانی ایر گیجگ ءِ ھاتر ءَ بالگرد کارمرز کتگ- ھمے میان ءَ پوج ءُ سلاہ بندانی میان ءَ تیرگواری ءِ تُرندیں رِد برجاہ بیتگ-

آئی ایس پی آر رِدءَ جنگ بیتگیں مردم پوج ءِ سرءَ اُرشاں اَبید سکھر، لاڑکانہ ءُ گوادر موٹر وے ایم ایٹ ءِ سرءَ تراکناکیں شورو کل کنگ ءَ ھم ھوار بیتگ اَنت-

آئی ایس پی آر ءَ دیمتر ءَ ٹاہ جتگ کہ اے مردمانی اوتاک ءَ چہ تراکناکیں شورواں ھوار سلاہ ءُ گولہ دزکپتگ اَنت-

لیویز فورس رِد ءَ جنگ بیتگیں مردمانی داں انگت پجّار بوگ ءَ نہ اِنت، ءُ لاش ٹیچنگ نادُراھجاہ تربت سردجاہ ءَ پجّار ءِ ھاتر ءَ ایر کتگ اَنت-

امریکہ ءِ مھکمہ ءِ انساپ ءَ گوستگیں سروک ڈونلڈٹرمپ ءِ ھلاپ ءَ پٹ ءُ پول کنگ ءِ واستا جنگی جرماں اسیکیوٹر ءِ زانگ بیتگ –

برطانیہ ءِ ھال سر کنوکین ادارہ روئٹرز ءِ رد ءَ امریکہ ءِ اٹاتنی جنرل میریک گارلینڈ ءَ جیک سمتھ ءَ را اسپیشل کاؤنسل نامینتگ کہ آ جنگی جرمانی پٹ ءُ پولانی درگت ءَ بازیں سرپدی دار ایت –

جیک سمتھ ءَ گوستگیں سروی ڈونلڈ ٹرمپ ءِ جیڑھانی سر ءَ چمشانک دیگ ءَ پد مھکمہ انساپ رپورٹ ءَ پیش کنت کہ دوھزاف ءُ بیست ءَ گچینکاری ءِ چپ کنگ ءِ جھد ءُ ھنر دابیں چیز کارمرد بیتگ اَنت-

امریکہ ءِ مھکمہ ءِ انساپ ءِ نیمگ ءَ چہ جیک سمتھ ءِ نام ءِ جار ءَ گوستگیں سروک ڈونلڈ ٹرمپ ءِ اے جار ءَ سَے روچ ءَ پد دیم ءَ اتکگ چریشی ءَ سال دوھزار ءُ بیست ءُ چار ءَ بیوکیں صدراتی گچینکاری ءَ بھر زورگ ءِ جارے جتگ –

چیریں ھالانی پٹ ءُ پول کنگ ءِ واستا دارگ بیت اِنت آیاں ٹپاسکاری کنت اشانی توک ءَ مھکمہ ءِ انساپ ءِ چیردستی ءَ پابندی نہ بیت بلکیں لس رنگ ءَ کار کنگ بیت اِنت –

نامینگ ءَ پد جیک سمتھ ءَ یک درشانے ءَ گشتگ کہ منی چیردستی ءَ پٹ ءُ پول کنگ ءِ درچ دارگ بیت اِنت ناکہ اشی ءِ گام سست بنت-

آئی ءِ رد ءَ من ھرتچاری ءَ پیسلہ کن آں ءُ پٹ ءُ پول ءَ دیم ءَ براں دانکہ آئی ءِ پلگاریں رنگ دیم ءَ پدر بہ بنت-

جیک سمتھ دراھیں چیزانی سر ءَ ٹپاس کاری کنت سرکاری ءُ چیریں ھالانی بارو ءَ اَنت اے گپ ءِ پدراھی ءَ کنت کہ گوستگیں سال ءَ ڈونلڈ ٹرمپ ءِ نیمگ ءَ وائٹ ھاؤس ءِ یل کنگ ءَ پد کجام رنگ ءَ کارمرد کنگ بیتگ ءُ سال دوھزار ءُ بیست ءِ گچینکاری ءَ پد پرامنیں راہ ءِ سر ءَ چون ڈنگر جنگ بیتگ اَنت-

اٹھارنی جنرل میریک گارلینڈ ءَ گوشتگ کہ اے وھد ءَ اسپیشل کاؤنسل ءِ دارگ جوانیں گامے-

دومی نیمگ ءَ گوستگیں سرول ڈونلڈٹرمپ ءَ اے گپ شکی گشتگ-

آئی ءَ فلوریڈا ءَ وتی پاٹی ءِ باسکاں گوں تران کنان ءَ گوشتگ کہ ردیں رنگاں کارمرد کنگ اے یک ترسناکیں جاورے اشی ءِ درچ بازیں وھداں چہ پیسر بندات بیتگ-

اسپیشل کاؤنسل ءِ دارگ ءَ پد سروک جوبائیڈن ءَ اھوالکاراں گوں تران کنان ءَ گوشتگ کہ آیانی چیریں گپاں ھچ سرپدی ءِ پسو نیست اِنت-

ھمے رنگ ءَ وائٹ ھاؤس ءِ یک جارکشے ءَ نام پدر نہ کرتگ ءُ گشتگ کہ اے وائٹ ھاؤس ءِ بارو ءَ دارگ ءِ ھچ سرپدی نیست اِنت-

بلوچستان فزیوتھراپی ایسوسیشن ءِ جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ مارا گوستگیں شش ماہ بیت اِنت وتی بنکی ھکانی ھاتر ءَ شال پریس کلب ءِ دیم ءَ زھرشانی کنگ ءَ ایں ءُ گوستگیں یانزدہ روچ انت کہ شُدکُشیں زھرشانی ءَ نِشتگ ایں- روچ پہ روچ مئے سنگتانی جاور نگیگ بوان انت بلے بلوچستان ءِ سرکار ءُ بلوچستان ءِ وتگڑیں نمائندگ وتی کاراں گوں دلگوش انت – مدامی ایں وڑءَ وتی نالائقئ ءَ گوں زانت ءُ جانسلامتی ءِ بگیرءَ دژمنیں پالیسی برجاہ داشتگ انت اِش ءُ بلوچستان ءِ جیڑھاں گوں سیادی نہ دارگ پدردی گپ اِنت-

آئی ءَگوشتگ کہ فزیوتھراپی جاندراھی تک ءَ المی انت کہ چریشی ءَ مردمانی جانی، ماژگی، جزباتی ءُ چاگردے تہ ءَ شری آرگ ءَ وتی کرد ءَ پیلو کنت ءُ پدا بلوچستان ءِ وڑیں پشت کپتگیں دمگے ءَ کہ اودا مردم ھمک روچ وڑ وڑیں وئیلانی آماچ بنت بلے پہ الاج ءُ جاندرائی ءَ اودا ھچ وڑیں ریہبلیٹیشن ءُ فزیو تھراپی نادراھجاہ نیست اِنت کہ اودا مردم وتی الاج ءَ بہ کن انت ءُ وتی زند ءَ چو پیشی وڑءَ گوازینگے امیت ءَ بہ دار انت –

جارکش ءَ گوشتگ ھمے ھاترءَ ما چہ بلوچستان ءِ سرکار ءَ لوٹ کن ایں کہ زوتاں زوت مئے لوٹاں بہ منّیت تانکہ مئے سنگتانی زند ھراب مہ بیت – اگاں اے میان ءَ مئے سنگتاں چیزے بہ بیت گڈا اشی ءِ زمہ وار بلوچستان ءِ سرکار ءُ بلوچستان ءِ وتگڑیں نمائندگ بنت –