TBP Balochi

بلوچستان فزیوتھراپی ایسوسیشن ءِ جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ مارا گوستگیں شش ماہ بیت اِنت وتی بنکی ھکانی ھاتر ءَ شال پریس کلب ءِ دیم ءَ زھرشانی کنگ ءَ ایں ءُ گوستگیں یانزدہ روچ انت کہ شُدکُشیں زھرشانی ءَ نِشتگ ایں- روچ پہ روچ مئے سنگتانی جاور نگیگ بوان انت بلے بلوچستان ءِ سرکار ءُ بلوچستان ءِ وتگڑیں نمائندگ وتی کاراں گوں دلگوش انت – مدامی ایں وڑءَ وتی نالائقئ ءَ گوں زانت ءُ جانسلامتی ءِ بگیرءَ دژمنیں پالیسی برجاہ داشتگ انت اِش ءُ بلوچستان ءِ جیڑھاں گوں سیادی نہ دارگ پدردی گپ اِنت-

آئی ءَگوشتگ کہ فزیوتھراپی جاندراھی تک ءَ المی انت کہ چریشی ءَ مردمانی جانی، ماژگی، جزباتی ءُ چاگردے تہ ءَ شری آرگ ءَ وتی کرد ءَ پیلو کنت ءُ پدا بلوچستان ءِ وڑیں پشت کپتگیں دمگے ءَ کہ اودا مردم ھمک روچ وڑ وڑیں وئیلانی آماچ بنت بلے پہ الاج ءُ جاندرائی ءَ اودا ھچ وڑیں ریہبلیٹیشن ءُ فزیو تھراپی نادراھجاہ نیست اِنت کہ اودا مردم وتی الاج ءَ بہ کن انت ءُ وتی زند ءَ چو پیشی وڑءَ گوازینگے امیت ءَ بہ دار انت –

جارکش ءَ گوشتگ ھمے ھاترءَ ما چہ بلوچستان ءِ سرکار ءَ لوٹ کن ایں کہ زوتاں زوت مئے لوٹاں بہ منّیت تانکہ مئے سنگتانی زند ھراب مہ بیت – اگاں اے میان ءَ مئے سنگتاں چیزے بہ بیت گڈا اشی ءِ زمہ وار بلوچستان ءِ سرکار ءُ بلوچستان ءِ وتگڑیں نمائندگ بنت –

سربوتگیں ھالانی ءِ رِد ء گوستگیں روچاں ناشناسیں سلاہ بندیں مردماں بلوچستان تیاب دپی دمگ پسنی ءَ پاکستانی پوج کوسٹ گارڈ ءِ سر ءَ اُرش کُتگ –

اُرش پانزدہ نومبر ءِ شپ ءَ پسنی ءَ ماکول پانگس ءِ سر ءَ کنگ بوتگ چریشی ءَ پاکستانی پوج کوسٹ گارڈ ءَ جانی تاوان ءِ دیمپانی کنگ کپتگ – اُرش ءِ زمّہ واری بلوچ آجوئی لوٹوکین سلاہ بندیں گل بلوچ لبریشن آرمی ءَ منّ اِتگ –

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ بی ایل اے ءِ سرمچاراں پانزدہ نومبر دوھزار بیست ءُ دو ءِ شپ ءَ گوادر ءِ دمگ پسنی ءَ زورگیریں پاکستانی ءِ پوج ءِ جھلی فورس کوسٹ گارڈ ءِ ماکول پوسٹ سر ءَ اُرش کُتگ –

جارکش ءَ گوشتگ سرمچاراں راکٹ ءُ دگہ مزنیں سلاھانی گوم ءَ دژمن ءِ سر ءَ اُرش کتگ، بیست منٹاں برجاھیں اے اُرش ءَ زورگیریں پوج ءَ جانی ءُ مالی تاوان ءِ دیمپانی کنگ کپتگ –

جارکش جیئند بلوچ ءَ گوشتگ کہ اے اُرش ءِ زمّہ واری ءَ بلوچ لبریشن آرمی منّیت ءُ کول کنت کہ بلوچ سرڈگار ءِ آجوئی ءَ تاں زورگیریں پوج ءِ سر ءَ اُرش برجاہ مان انت –

اپسار تلمب ءِ چیردستی ءَ شھید کپٹن ادھم بلوچ ءِ یات ءَ برجاھیں ناک آؤٹ کرکٹ ٹورنمنٹ ءِ مروچی گُڈی ( فائنل ) گوازی کنگ بوتگ کہ یادگار لبنان ءَ جوانی ءَ گوازی کنان ءَ ھپت وکٹاں گوازی کٹ اِتگ ءُ وِنر کپ دست گپتگ –

ونر ٹیم ءِ کپٹن اسد گلام ءَ چہ گچینی مھماناں ونر کپ دست گپتگ –

مروچی فائنل ءِ گوازی ساچان بُلو ءُ یادگار لبنان ءِ میان ءَ کنگ بوتگ کہ ساچان بُلو ءَ پانزدہ اوورانی تہ ءَ دو سد ءُ شانزدہ رن ءِ ٹارگٹ ایر کُتگ کہ یادگار لبنان ءَ سینزدھمی اوور ءَ ٹارگٹ پروشتگ ءُ باج بُرتگ –

گڈی گوازی ءَ (فائنل) ءَ ساچان بُلو ءَ اولسر ءَ بیٹنگ کُتگ ءُ پانزدہ اوورانی تہ ءَ دوسد ءُ شانزدہ رن جوڑ کتگ انت – کہ آھانی تہ ءَ درساں گیش وحید ڈونی ءَ سِی ءُ یک بالاں ھشتاد ءُ شش ظھور ءَ بیست بالاں چِل ءُ چار ءُ ساکم ءَ چِل ءُ شش رن جوڑ کتگ انت وھدیکہ بالرانی تہ ءَ ارشِد ءَ دو ءُ شھاب ءَ یک وکٹ ءِ گپتگ – پہ ٹارگٹ ءِ پروشگ ءِ ھاتر ءَ یادگار لبنان ءَ جوانی ءَ گوازی کنان ءَ سینزدہ اوور ءُ دو بالانی تہ ٹارگٹ پروشتگ ءُ گوازی کٹ اِتگ –

یادگار لبنان ءِ نیمگ ءَ درساں گیش اسد ءَ چِل ءُ ھشت بالاں یکسد ءُ پنجاہ ءُ یک ءُ آئی ءَ ھژدہ چکا ھم جتگ ءُ نسیر ءَ دہ بالانی تہ ءَ سِی ءُ دو رن جوڑ کتگ انت ءُ وسیم ءَ سَے ءُ احسان ءَ دو وکٹ گپتگ انت –

مروچیگیں گوازی ءِ شرتریں لیبی اسد گلام بوتگ ءُ ٹورنمنٹ شرتریں لیبی وحید ڈونی بوت کہ آھاں چہ گچینی مھمان ءَ داد گپتگ –

زانگ بہ بیت شھید کپٹن ادھم ءِ یات ءَ برجاھیں اے ٹورنمنٹ ءَ سرجمیں مند ءَ شانزدہ ٹیماں بھر زرتگ کہ آھانی تہ ءَ ساچان بُلو ءُ یادگار لبنان ءَ جوانی ءَ گوازی کنان ءَ وت ءَ پائنل ءَ سر کتگ – مروچی پائنل گوازی ءَ ساچان ءَ باج برتگ نہ کُتگ ءُ رنر ٹیم جوڑ بوتگ –

فٹبال ءِ میان اُستمانی گل فیفا ءَ آدینگ ءِ روچ ءَ یک جارے پرینتگ کہ قطر ءَ بیوکیں فٹ بال ورلڈکپ ءِ وھد ءَ اسٹیڈیم ءِ تہ ءَ شراب ءِ بھا کنگ ءَ بندش اِنت-

برطانیہ ءِ ھال سرکنوکیں ادارہ روئٹرز ءِ رد ءَ فیفا ءِ نیمگ ءَ بندش ءِ جار فٹبال ورلڈ کپ ءِ بندات بیگ ءَ دو روچ پیسر دیم ءَ اتکگ-

قطر ءَ بیوکیں فٹبال ورلڈکپ ءِ اولی ٹورنامنٹ ءَ یک اسلام دوستیں ڈیھے ءَ بیگ ءَ اِنت اود ءَ شراب ءِ سر ءَ بندش ءُ سر ء بازار ورگ ءَ ھم بندش جنگ بیتگ-

ھمے درگت ءَ فیفا ءِ جارکش ءَ یک درشانے ءَ گوشتگ کہ ڈیھ ءِ یک سروکے ءَ واکدار ءُ فیفا ءِ میان ءَ بیوکیں گپ ءُ تران ءَ پد اے پیسلہ کنگ بیتگ کہ الکوھلک ءِ دروشمیں چیز فیفا فین فیسٹول، فین ڈسٹینیشن ءُ لائسنس بیتگیں دکاناں بیت اِنت ءُ فیفا ورلڈکپ دوھزار ءُ بیست ءُ دو ءَ اسٹیڈیم ءِ تہ ءَ شراب ءِ سیل پوائنٹ دور کنگ بہ بیت اِنت-

ورلڈکپ ءِ جوانیں اسپانسر “بڈوائزر ” چوشکہ الکوھل ءِ جوڑ کنگ ءَ “اے بی ان بیو ” ءِ واھند اِنت -وڑلڈکپ ءَ ھشت اسٹیڈیماں ھوار ءُ آئی ءِ کش ءُ گوراں میچ ءِ بندات بیگ ءَ سَے ادار پیسر ءُ میچ ءَ یک ادارے رند شراب ءِ بھا کنگی بیتگ اَنت-

درشان ءِ رد ءَ ٹورنامنٹ ءِ واکداراں “اے بی ان بیو ” ءِ نیمگ ءَ ورلڈکپ ءِ وھد ءَ مئے دراھیں مردمانی اژدریانی سرجم کنگ ءِ کمٹمنٹ ءِ سرپد بوگ ءُ اشی ءَ گیش پلامرزی کنگ ءِ منت گپتگ-

روئٹرز ءَ دمگی مردمانی درور دیان ءَ گوشتگ کہ ورلڈکپ ءَ اسٹیڈیم ءِ تہ ءَ شراب ءِ بھا کنگ ءِ پالیسی ءِ واتر کنگ ءِ پیسلہ فیفا ءِ سروک گیانی انفنٹینو، بڈوائزر ءُ قطر ءِ سپریم کمیٹی فار ڈیلیوری اینڈ لیگیسی ءِ واکدارانی میان ءَ دیر نندیں گپ ءُ تران ءَ پد بیتگ-

روکپتی بلوچستان ءِ جتا جتائیں شھراں آدینگ ءِ نماز ءَ پد زھرشانی ءُ روانک کشگ بیتگ – زھرشانی روانک جتا جتائیں شھراں کشگ بیتگ اَنت کہ اود ءَ مھلوک ءَ سرکار ءِ ھلاپ ءَ اوگام ءُ بینر چست کتگ ءُ شھر ءِ دمک ءُ دراں تران بیتگ اَنت –

زھرشانی روانک روکپتی بلوچستان ءِ بنجاھی شھر دزاپ ءَ آدینگ ءِ نماز ءَ بندات بیتگ اَنت کہ اود ءَ مردماں نماز ءَ پد روانک ءِ دروشم ءَ اوگام جنان کتگ “مرگ بر خامنہ ای ” ءُ اشی ءَ ھوار ھوار روکپتی بلوچستان ءِ راجدوستیں رھشون مولانا فضل الرحمان کوھی ءِ یل کنگ ءِ لوٹ کتگ-

ھمے وڑ ءَ دگہ شھراں ھم بیتگ اَنت پھرہ، راسک، خاش، سراوان، چھبار، سرباز، جاشک ءَ ھوار ھوار دگہ دگہ شھراں ھم کسان ءُ مزنیں روانک ءُ زھرشانی بیتگ اَنت-

ھمے وڑ ءَ پھرہ ءَ زھرشانی کنوکانی سر ءَ ایرانی لشکر ءَ تیرگواری ھم کرتگ اَت بلے اود ءَ ناوشیں وئیل پیش نیتکگ اَت-

زانگ بہ بیت ھمے سال ءِ سی ستمبر ءَ دزاپ ءَ چھبار ءَ کسان سالیں جنکو ءِ گون ءَ پولیس ءِ زوراکی ءِ ھلاپ ءَ بیتگیں زھرشانی روانک ءِ سر ءَ ایرانی لشکر ءَ تیرگواری کرتگ ات کہ چریشی ءَ سد ءِ نزیک ءَ مردم بیران بیتگ اِت اَنت ءُ سَے سد ءِ کچ ءَ زدگ بیتگ ات اَنت-

چرے وئیل ءَ پد روکپتی بلوچستان ءَ ھمک آدینگ زاھدان ھونی ءِ نام ءَ یات کنگ ءُ چریشی ءِ ھلاپ ءَ روانک کشگ بیگ ءَ اَنت-

چرے زھرشانیاں بازیں کچے ءَ مردم گرگ ءُ بیگواہ کنگ بیتگ اَت اَنت بلے گوستگیں روچاں چل ءِ نزیک ءَ مردم واتر یل کنگ بیتگ اَنت ءُ خامنہ ای ءِ نمائندگاں مردم سدکی داتگ اَنت کہ بندیگیں مردم یل کنگ بنت زھرشانی روانک ایمن بیگ لوٹ اَنت-

سر بیتگیں ھالانی رد ءَ روکپتی بلوچستان ءِ بنجاھی شھر دزاپ ءَ ایرانی آمیدگس ءِ پرمان ءَ یک مردمے پاھو دیگ بیتگ –

پاھو دیگ بیتگیں مردم ءِ پجار بیست ءُ ھپت سالی ئینن اسماعیل فقیردادزئی پنام مھر اللہ شیبک ءِ نام ءَ زانگ بیتگ کہ زاھدان ءِ ھند کریم آباد ءِ جھمنند گوشگ بوگ ءَ اِنت-

ھالانی تہ ءَ گوشگ بیتگ کہ مھر اللہ سال دوھزار ءُ پانزدہ ءَ ایرانی لشکر ءَ جنگ ءُ چوپ ءِ پژدر ءَ دزگیر کتگ ءُ زاھدان ءِ زندان ءَ بندیگ کتگ-

ھمے وڑ ءَ تربت جام زاندان ءَ اُستان خراسان ءَ دو بندیگیں مردم ھم پاھو دیگ بیتگ اَنت-

ھالانی تہ ءَ گوشگ بیتگ کہ اے ھردوک لشکر ءِ سر ءَ اُرش ءَ پد پاھو دیگ بیتگ اَنت-

ھردوکانی پجار سی ءُ یک سالی ئیں مھمد نبی سلیمانی ء غلام مصطفی ءُ عبداللہ صوفی ء عبدالاحد ءِ ناماں زانگ بیتگ اَنت ھردوک صالح آباد اُستان خراسان رضوی ءِ جھمنند گوشگ بوگ ءَ اَنت-

ھالانی تہ ءَ گوشگ بیتگ کہ ھردوکانی سر ءَ نشہ باپاری ءِ بھتام جنگ بیتگ ءُ پاھود دیگ بیتگ اَنت-

ھالانی تہ ءَ گوشگ بیتگ کہ اے ھردوک ھما وھد ءَ سیمسری لشکر ءَ ھژدہ جون سال دوھزار ءُ نوزدہ ءَ ھما وھد ءَ دزگیر کتگ اَنت کہ وتی لوگ ءَ روگ ءَ بیتگ اَنت-

ھالانی تہ ءَ گوشگ بیتگ کہ ایرانی لشکر ءَ دروگیں بھتام ءَ گپتگ ءَ برتگ اَنت پد ءَ آیانی سر ءَ دروگیں بھتام جتگ کہ اشاں نشہ گون بیتگ-

ھالانی تہ ءَ گوشگ بیتگ کہ اے ھردوکیں مردماں آمیدگس ءَ جج ءِ دیم ءَ وتی مُزگیرانی واستا گپ رد کتگ اَنت بلے ھردوکانی گپ گوشدارگ نہ بیتگ ءُ آیانی سر ءَ پاھو ءِ سزا جنگ بیتگ-

غزہ ءَ پشمبے ءِ روچ ءَ یک ماڑی ءَ آس کپگ ءِ سبب ءَ بیران بیتگیں مردمانی کچ بیست ءُ یک ءَ سر بیتگ اَنت-

برطانیہ ءِ ھال رسانیں ادارہ روئٹرز ءِ رد ءَ جانسلامتی ءُ ایمرجنسی ءِ واکداراں گوشتگ کہ آس کپگ ءِ سبب ءَ کم چہ کم بیست ءُ یک مردم بیران بیتگ اَنت ءُ بازیں کچے ءَ ٹپی بیتگ اَنت –

واکداراں پشمبے ءِ روچ ءَ گوریچانی غزہ ءِ پٹی ءِ ھند گنجان آباد جبالیہ میاربندانی بنجل ءَ چار تبکی جھمنندی ماڑی ءِ برزی تبک آس ءَ گپتگ ءُ چریشی ءَ آس کشوکیں گاڑی ءَ آس ءِ توسگ ءَ یک ادارے ءَ گیش لگ اتگ –

غزہ ءِ وزارت داکلہ ءَ گشتگ کہ بنداتی پٹ ءُ پولاں سرپدی بیتگ اے جاہ ءَ پٹرول ایر کنگ بیتگ اَنت چریشی ءَ چہ آس چست بیتگ –

ایمبولینسزاں بازیں ٹپی نادراہ جاہ ءَ سر کرتگ اَنت ھمے وڑ ءَ اسرائیل مصر ءِ گون ءَ ھوار بیتگ ءُ غزہ راہ ءُ در بستگ اَنت آ اے مردماں درمان کنگ ءَ کِل ایت کہ آیاں درمانی ءِ درکاری اِنت-

چم دیستگیں مردمانی رد ءَ آ پریاتانی توار ءَ اِشکت کن اَنت بلے آس ءِ ترندیں برانزی ءِ سبب ءَ ماڑی ءِ تہ ءَ جاڑیگیں مردمانی کُمک ءَ کُت نہ کن اَنت-

فلسطینی سروک عباس ءَ اے وئیل راجی دردمانی گشتگ ءُ پرس دارگ ءِ جار جتگ-

فلسطین لبریشن آرگنائریشن (پی ایل او) ءِ ایگزیکٹو کمیٹی ءِ سیکریٹری جنرل حسین الشیخ ءَ یک درشانے ءَ گوشتگ کہ فلسطینی اتھارٹی ءَ اسرائیل ءَ را کڈن کتگ کہ غزہ ءِ گون ءَ ھواریں سیمسر ءَ پچ بہ کنت دانکہ ٹپی ءِ مردماں اژدری ءِ واستا برت بہ کنت-

آئی ءَ وتی ٹوئٹر اکاؤنٹ ءَ نبشتہ کرتگ آئی ءَ سروک ءَ ھرچ تکاں جانسلامتی ءِ کمکاری ءِ کڈنی کرتگ-

میان اُستمان ءِ رودراتکی پھنات ءِ امن مندوب ءَ وتی ٹوئٹر ءَ پوسٹے ءَ گشتگ کہ اے وئیل ءَ بیران بیتگیں مردمانی کھولاں گوں دلپدردی اِنت-

جبالیہ غزہ ءَ ھشت میار بندیں بنجلاں چہ یکے کہ اشی ءَ بیست ءُ سَے لک مردم جھمنند اَنت ءُ اے دنیا ءِ توک ءَ درستاں مستریں گنجان آباداں چہ یکے زانگ بیت اِنت-

بلوچستان فزیوتھراپی ایسوسی ایشن ءِ شُد ھڑتال داں انگت برجاہ اِنت۔ جارکش ءَ رسانکدراں شنگ کُتگیں درشانے تہءَ گُشتگ کہ ورناھیں فزیوتھراپسٹ گوستگیں 9 روچاں چہ وتی لوٹانی ھق ءَ شال پریس کلب ءِ دیما شُد مرگ ھڑتال ءَ نشتگ اَنت۔ گوستگیں 9 روچاں چہ ھچ نہ ورگءِ سوب ءَ مئے سنگتانی جاورھال نگیگ بئیگ ءَ اَنت بلے سروزیر ھمک روچی پریس کانفرنس، نیاد ءُ چاگردی رسانکدر ءِ تہءَ وتی بے سوبیں کارانی راست ءُ شر پیش دارگ ءِ جھد ءَ گلائش اِنت کہ آئی ءَ ھوار مئے پرگینگی وزیر وتی مردمانی جیڑھانی جوانیں دروشم ئے گیش گیوار کنگ ءُ جوانیں رھبند ٹھینگ ءَ ابید دروگ، پندل ءُ کرپشن ءِ چاگرد ءَ گیش ءَ گیش تر کنان اَنت۔ وتی جند ءِ واھشت ءُ مُزانی گرگ ءِ ھاترءَ لس مھلوک گیشتر گشنگی ءُ دردناکیں زندمان ئے ءِ نیمگءَ دور دیگ بئیگ ءَ اَنت۔مدامی پئیم ءَ نالائقی، جانسلامتی ءُ زانت ءِ بگیری وتی دژمنیں پالیسیانی سرءَ کاربند اَنت۔

جارکش ءَ گُشتگ گوستگیں 9 روچاں چہ ڈاکٹر نثار ءُ ڈاکٹر جاوید ءَ ھچ نہ ورگ ءِ سوب ءَ نادراھجاہ ءَ برگ بیتگ۔ کہ آودہ ڈاکٹراں گُشتگ اگں اِشاں شُد ھڑتال ھلاس نہ کُت گُڑاں آھانی (گردہ) ناکارہ بئیگ ءَ ھوار ھوار ھائپو گلاسیمیا ءِ تُرس ودی بیتگ اَنت۔

آئی ءَ گُشتگ کہ ما بلوچستان سرکار ءِ نمائندگانی دلگوش گور ءَ اَے نیمگ ءَ کنیں کہ پہ ھدائے نام ءَ ورناھانی باندات ءُ جزبگ ءَ گوں لئیب بند کنگ بہ بیت۔ اگں آھاں تاوان رستگ گُڑءَ زمہ وار بلوچستان سرکار ءِ نمائندگاں ھوار ھما نمائندگ بنت کہ آ ھمک روچی رد ءَ اے ورناھانی زندءَ گوں گوازی کنان ءُ وتی سلیں سیاست ءَ برجاہ دارگ ءِ جھد کنگ ءَ اِنت۔

بلوچ اسٹوڈنٹس ایکشن کمیٹی ءِ بنجاھی جارکش ءَ وتی شنگ کرتگیں درشان ءِ تہ ءَ گوشتگ کہ گل ءِ نیمگ ءَ ایر کنگ بوتگیں مستونگ زانشتی مراگش سوبمندی ءِ گوم ءَ آسر بوتگ مراگش ءَ گام تاک ءِ دیمدراھی ھوار بلوچ لٹریسی کمپین ءُ ماتی زبان ءِ تہ ءَ زانت ءِ دربرگ ءِ نپانی سر ءَ تران کنگ بوتگ وھدیکہ زھگانی لبزانکی ءُ ماتی زبان ءِ تہ ءَ وانگ ءُ زانگ ءَ ھوار بلوچستان ءِ زانشتی جیڑھانی سر ءَ ھم تران کنگ بوتگ –

آئی ءَ گوشتگ کہ مستونگ بلوچ راجکاری ءُ لبزانک ءِ درگت ءَ جوانین جاھے زانگ بیت کہ اود ءَ نامداریں راجداریں رھشون ءُ لبزانکی زانتکاراں بلوچ چاگرد ءِ تہ ءَ شریں جاھے پہ وت جوڑ کتگ – بازیں وھدے بیت کہ مستونگ ءِ تہ ءَ در چاگردی مردماں جاہ کتگ ءُ مستونگ ءَ راجکاری ءُ لبزانک ءِ سر ءَ بندش جتگ – بازیں وھدے بیت کہ گل ءِ واھشت بوتگ کہ مستونگ ءَ لبزانکی مراگشے برجم بہ دار ایت گڑا گل ءِ باسکانی جھد ءُ ایمانداری ءَ ما سوبمند بوتگ ءُ مستونگ ایجوکیشنل فیسٹول برجم داشتگ –

آئی ءَ گوشتگ کہ بلوچ اسٹوڈنٹس ایکشن کمیٹی ءَ بلوچ نودربرانی زانت زانشت ءِ سر ءَ وتی جھد ءِ برجاہ داران ءَ اے دابیں لبزانکی ءُ زانشتی مراگش ھم برجم داشتگ انت- نوشت تاک ءَ ھوار گام تاک ءِ شنگ کنگ ءِ ھم پیسلہ کتگ تاکہ بلوچ نودربرانی تہ ءَ بلوچی ءُ براھوئی وانگ ءُ زانگ ھُب بہ بیت ءُ آھانی نبشتگیں شنگ کنگ بہ بنت – مستونگ مراگش ءَ گام تاک پیشدراھی بوتگ آئی ءِ مول وانگجاہ ءُ زانشجاھاں پہ نودربراں وانگ ءُ نبشتہ کنگ ءِ لٹریچر دیگ انت – گل نودبرانی راجداری ءُ چاگردی درونت دیگ ءَ بلوچ نیشنلزم ءِ بن ھشت پھمیت ءُ دیمتر ءَ ھم نوشت ءَ گام تاک ءِ چاپ ءُ شنگ کنگ ءَ برجاہ دار ایت –

آئی ءَ دیمتر ءَ گوشتگ کہ مراگش ءِ دومی بھر ءَ بلوچ لٹریسی کمپئن ءِ سر ءَ تران کنگ بوتگ کہ بنجاہ ءِ ڈپٹی سیکرٹری جنرل ءُ شال ھنکین ءِ کمک سرکماش فوزیہ بلوچ ءَ لٹریسی کمپئین ءِ شریانی درگت ءَ تران کتگ – اشی ءَ ابید ماتی زبانانی تہ ءَ زانت ءِ سر ءَ پروفیسر حامد بلوچ ءُ لکچرار آصف بلوچ ءَ تران کتگ –

جارکش ءَ گوشتگ کہ مراگش ءِ گڈی بھر ءَ زھگانی لبزانک ءُ آئی ءِ شری ءِ سر ءَ پروفیسر زیب النساء بلوچ ءَ تران کتگ وھدیکہ ماتی ءِ زبان ءِ تہ ءَ زانت ءِ دربرگ سر ءَ پروفیسر منیر بلوچ ءَ تران کتگ –

بلوچستان ءَ زانشتی جیڑھانی سر ءَ گڈسر ءَ نرگس سلطانہ بلوچ ءَ تران کتگ کہ آئی ءَ بلوچستان ءِ زانشجاھانی تر ءُ تاب کتگ بوتگ –

آئی ءَ گوشتگ کہ زانت بید ء ادارھاں سرجم نہ انت بلے بژن کہ لھتے مزنیں بازاراں لھتے زانشجاھانی تہ ءَ آسراتی ھست انت بلے ایندگہ جاھاں بنکی آسراتیانی جند نیست مئے وانگجاھی سسٹم سرجم ءَ بے سوب انت – زانت نیستی گپ کنوک بس نشتگ ءُ سیاسی درشان بازی کن انت ـ زانت ءِ ھاتر ءَ نوکیں پالیسی ءِ جوڑ کنگی انت –

جارکش ءَ گڈسر ءَ وتی درشان ءِ تہ ءَ گوشتگ کہ گل بلوچ نودبرانی درونتی امل ءَ ھمے وڑ برجاہ دار ایت – بلوچ راج گل ءِ لٹریسی کمپئن ءَ بھر بہ زور انت ءُ آئی ءِ سوبمندی ءَ مئے ھمراہ بہ بنت تانکہ بلوچستان ءَ ھما وانگجاہ کہ بند انت ءُ آھانی پچ کنگ ءُ نوکیں وانگجاھاں زانت ءِ دیمروئی کنگ بہ بیت –