TBP Balochi

ایران ءِ زرباری دو جتا جتائیں شھراں زھرشانیانی وھد ءَ پرپٹ سوارانی تیرگواری ءَ یک زالبول ءُ دو زھگاں ھوار نُھ مردم کُشگ بیتگ اَنت-

عرب نیوز ءِ رد ءَ پشمبے ءِ روچ ءَ اُستان خوزستان ءَ مھکمہ انساپ ءِ یک کلانیں کارمندے ءَ چار شمبے ءِ روچ ءُ ایذہ شھر ءَ زھرشانی کنوک ءُ سیکورٹی لشکر ءِ سر ءَ بیوکیں اولی اُرش ءَ ھواریں سَے شکی ئیں مردم دزگیر کرتگ اَنت-

دومی نیمگ ءَ ایرانی نیوز ایجنسی فارسی ءِ رد ءَ یک دگہ وئیلے ڈیھ ءِ مستریں سیمی شھر اسپھان ءَ پیش اتکگ کہ اود ءَ پرپٹ ءَ سواریں اُرشکاراں بسیج ءِ کارندھانی سر ءَ وتکاریں سلاھانی گون ءَ تیرگواری کرتگ ءُ چریشی ءَ دو کارندہ مرتگ ءُ زدگ بیتگ اَنت-

زانگ بہ بیت اے اُرش پولیس ءِ دزگیری ءِ تہ ءَ بیران بیتگیں مھسا امینی کرد ءِ بیرانی ءَ پد ودی بیتگ اَنت-

ھمے وڑ ءَ ایران ءِ سرکاری ھبررساں ایجنسی ارنا ءَ گوشتگ کہ پشمبے ءِ سھب ءَ دو زدگ بیتگیں مردماں وتی ٹپ نہ سک اتگ ءُ بیران بیتگ اَنت ءُ بیران بیتگیں مردمانی کچ ھپت ءُ زدگ بیتگینانی ھشت بیتگ اَنت-

بیران بیتگیں مردمانی توک ءَ یک چل ءُ پنچ سالی زالبول ءُ نُھ ءُ سیزدہ سالیگیں دو زھگ ھوار اَنت-

سیکورٹی ءِ یک کارندے ءَ سرکاری ٹی وی ءَ گوں گپ کنان ءَ گوشتگ کہ زدگ بیتگیں مردمانی تہ ءَ پاسداران انکلاب بسیج ملیشیا ءِ دو ءُ پولیس ءِ سَے آپیسر ھوار اَنت-

ارنانیوزایجنسی ءَ رپورٹ ءَ گوشتگ کہ بنجاھی مارکیٹ ءِ دیم ءَ ناشرکاراں زھرشانی ءَ چہ نپ چست کتگ ءُ مردمانی سر ءَ تیرگواری بندات کتگ-

زانگ بہ بیت مھسا امینی ءِ بیرانی ءِ ھلاپ ءَ سرجمیں ڈیھ ءَ بیوکیں زھرشانی سر ءَ اُرشاں اے دومی اُرش اِنت ایرانی واکدار ناشرکارانی سر ءَ لڈگ ءَ اِنت ئِے –

اسپھان ءَ تیرگواری ءَ پد سروک ابراھیم رئیسی ءَ زمہ وارانی ھلاپ ءَ سرجمی ءَ پَٹ ءُ پوک کنگ ءِ ھکم شنگ کتگ ءُ اشی ءَ ھواریں مردماں انساپ ءِ ھوالگ کنگ ءِ ھکم داتگ-

اشی ءَ پیسر بیست ءُ شش اکتوبر ءَ شیراز ءِ شھر ءَ یک ادیرھے ءِ سر ءَ تیرگواری ءَ کم چہ کم سیزدہ مردم بیران بیتگ ات اَنت کہ آئی ءِ زمہ واری داعش ءَ من اتگ اَت-

شاری بیست ءُ یکمی کرن ءِ بانڑی

نبشتہ کار:حوا بلوچ

دی بلوچستان پوسٹ

بلوچستان ءِ آجوئی ءِ زرمبش انچو رواں انت انچو ھمک گام ءَ بلوچ پسگانی ھونانی دیمونی بوگ ءَ انت ءُ بازیں بلوچ پُسگانی ایمان ءُ جھد برجمی دیم ءَ روان انت انچوش ما چارے کہ بلوچ تھریک ءِ تہ ءَ اولی رند ءَ یک بلوچ شیرزالے پدائی کنت ءُ بلوچ تھریک ءِ تہ ءَ یک نوکیں دروشمء دنت ،یک نوکیں اھدے ءِ کسہ ءَ بندات کنت، پد ءَ بانڈی کِسہ نوک بیت ،اےنوکیں اھدے بانڈی شاری بلوچ انت کہ پہ بلوچ ءُ بلوچستان ءِ رکینگ ءِ ھاترا 26اپریل ما بارود ءُ شورواں وتی سینگ ءَ گرنچ دنت ءُ پدائی کنت پہ راج ءَ یک جوھرداریں پگرے بنُگیج کنت اپریل ءِ جلوہ داریں ءُ نوک باھندیں روچ اِنت کہ مئے بلوچ راج ءِ یک شیر زالے وت ءَ ندر کنت پہ وتی راج ءِ ھاتر ءَ وت ءَ راج دپتر ءِ تاکاں پہ دائمی نمیران کنت-

شاری بلوچ ءِ کربانی پہ بلوچ راج ءِ زالبولاں پہ یک مستاگے کہ جھد ءِ بھر بوھگ المی انت آئی ءِ پلسپہ آئی ءِ کربانی پہ راج ءَ یک راھے درکتگ کہ اے راہ پہ سرانی گڈگ ءَ ھلاس نہ بیت-

26 اپریل ءَ ما بلوچ زالبول یک وشیں روچ ءِ لیک اِنے گڑا اے روچ ءِ تہ ءَ بازیں زالبول شادان بوت اَنت کہ پہ مارا بانک شاری ءَ یک جوانے کشکے شوھاز کت نوں مارا بس ھمے راہ ءَ سفر کنگی اِنت ما ھر وہدا نشتگیں بس ھمے جیڑ اتگ ما زالبول پرچا ھچ کت نہ کن ایں دشمن وھدے کہ وتی زورکیاں بندات کنت آ نہ چار ایت کہ زالبولے، کماشے یا کسان ایں زھگے، چوشیں روچ نیست کہ اے نا پاکیں ریاست بلوچستان ءَ یکے بیگواہ مہ کنت یا کہ بیگواھیں مردمے ءِ تیر سپتگیں لاش ءَ دور مہ دنت اے زلماان بلوچستان ءِ توک ءَ ھر روچ کنگ ءَ اِنت ھمے زلم ءُ زوراکیانی پسو بلوچ بوھگ ءُ جھد کنگی اِنت مرچی اگاں ھمنچو ھاموشءُ کمرزانی بندے نندے گُڑا زلم ءُ زوراکیانی آزمان تئی سر ءَ کپان بوان کنت،جنگ المی انت جنگ بلوچے گڈی ءُ سرزمین ءِ جنگ انت اے جنگ ءِ ھوار بوگ ھر بلوچے ءِ سر ءَ اژدری انت-

انچوش کہ استاد اسلم بلوچ ءِ لیکہ ءُ پلسپہ آجوئی ءَ پہ نوجْواناں یک درسگاہ لیکگ بیت اِنت پدائی ھر ھما سنگت کہ پدائی کناں آھانی پکری سوچ،سْیاسی، مزاحمتی تربیت-

استاد اسلم بوتگ،جنگ ءِ تب مٹ داتگ دژمن ءَ را یک انچیں آسے دل ءَ مانداشتگ کہ نوں بلوچ زالبول چو شاری رنگ ءَ وتی ساہ ءُ سراں کربان کن گءَ انت ھمے وڑ ءَ پد ءَ من نشت ءُ جیڑ ات کدی بیت کہ باریں بلوچ زالبول وتی براتانی وڑ ءَ کربانی دے اَنت وتی براتانی ھمکوپگ باں-

گڑا آ روچ زوت اتک ءُ 26 اپریل ءَ پدائی شاری جان ءَ وت ءَ ندر کت پہ بلوچ زالبولاں یک تچکیں راھے پچ کت نوں بلوچ زالبولاں بس ھمے راھ ءَ سپر کنگی اِنت وتی برات ءُ سنگتانی ھمکوپگ بوگی اِنت راجدپتر ءَ اگاں ما بچاریں مئے بلوچ راجدپتر ءِ تہ ءَ بلوچ زالبولانی مزنیں کساسے جد ءُ جھد ، گھگیری ، بہادری ، شیرزالی کسہ ھزارانی ھساب ءَ انت انچوش کہ برٹش انڈین آرمی ءِ جنرل ڈائر یک زورآورے بیت اِنت ایشی ءِ زلم ءُ زوراکیانی داستان ترا ھندوستان جاہ امرتسرما 13اپریل 1919یک لس مھلوکی روانک ءُ جلوسے بوگ ءَ بیت گڑا جنرل ڈائر وتی لشکر ءَ ھکم کنت زھرشانی ءِ سر ءَ تیرگواری بہ کن ات ءُ چریشی ءَ چہ بازیں زھگ، زالبول ، پیریں ورنائیں مردم بْیران بنت بازیں ٹپی ءُ ٹوری بنت ھمے جنرل ڈائر بیت کہ ایشی ءِ نام گُشگ ءَ مردم ءَ بیم پیداک بیت بلے وھدیکہ جنرل ڈائر ما بلوچستان ءَ وتی پاداں ایر کنت آئی ءِ دیم گوں شیرزال گل بی بی گوں کپ ایت جنرل ڈائر وھدے گل بی بی ءِ بھادری ءُ شیرزالی گند ایت گڑا ھمے ھبر ءَ کنت کہ منی نام ءِ سر ءَ مردم ترس اَنت ءُ ساہ نہ کش اَنت بلے یک بلوچ زالبولے ءِ چمانی تہ ءَ جنرل ڈائر ءِ پسو دنت چوشیں شیرزالی ءُ بھادری ءِ کسہ سک باز انت بلوچ راج دپتر ءِ تہ ءَ سْیاسی ، راجی رھشونی مزاحمتی ، معاشی ، چاگردی ھر پڑا بلوچ زالبولانی راج دپتر ءِ تہ ءَ کربانی ءُ جد ءُ جھد ءِ بھر ھست اَنت انگت بوھگ ءَ انت نوں بائیدیں مارا ھمے رانگ ءَ وتی سْیاسی،چاگردی زمہ واری کُل بلوچ زالبولانی سر ءَ المی ءُ اژدری انت جد ءُ جھد بھر بوگ مئے درستانی ھر یکے ءِ وتی بستار ءِ ہساب ءَ جاھے نہ جاھے وت ءَ گوں تھریک ءَ ھمگرنچ بک انت ءُ راجی پلامرزی ءَ بکن اِنت ءُ راجی جیڑھاں گوں وت ءَ نزیکی بکن انت انچو گشاں یک وانندہ ءُ پگردارے چاگرد ءِ تہ ءَ زالبولانی ھمگرنچی ءُ کارگشادی آوار بہ بیت آ چاگرد الم وتی تہ ءَ شری کارایت ھمے وڑ ءَ بلوچ زالبول تھریک ءِ تہ ءَ آوار بہ بنت شریں وڑے ءَ کاراں گیشینت کن اَنت پہ ایمانداری ءِ رنگ ءَ چو شاری ءِ رنگ ءَ جھد ءَ گوں آوار بوگ المی انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءِ بنجاھی شھر زاھدان ءَ مزن شھدربرجاہ ءِ نودربر آوار جنگ ءَ پد بیگواہ کنگ بیتگ-

گیشیں ھالانی رد ءَ گوستگیں روچ ءَ ایرانی لشکر ءَ شھدربرجاہ ءِ یک جنکیں نودربرے آوار جنگ ءَ پد گون وت برتگ-

گیشیں ھالانی رد ءَ آوار جنی ءِ وئیل گوستگیں روچ ءَ پیش اتکگ کہ ایرانی پورسز ءَ بیڑ برتگ ءُ یک جنکیں نودربرے آوار جتگ ءُ گون وت برتگ-

آوار جنگ بیتگیں جنک ءِ پجار بیست ءُ یک سالی ئین آیدا تقی پور ءِ نام ءَ زانگ بیتگ کہ آ زاھدان یونیورسٹی ءِ انجینئرنگ ءِ اولی سیمسٹرے نودربرے –

ھالانی تہ ءَ گوشگ بیتگ کہ آیدا تقی گوستگیں شپ ءَ وتی میتگ ءَ روگ ءَ بیتگ کہ اود ءَ سیکورٹی ادارھاں داشتگ ءَ گون وت برتگ-

ھالانی تہ ءَ گوشگ بیتگ کہ آیدا ءِ موباھل پچگرگ بیتگ ءُ پد ءَ آ زورانسری گاڑی ءَ سوار کنگ ءُ برگ بیتگ-

امریکہ ءَ برجاھیں گچینکاری ءَ اپوزیشن پاٹی ریپبلکن پاٹی ءَ ایوان ءِ نمائندگی ءَ سوبمند بیتگ ءُ واک وتی دست ءَ کتگ –

ھال سرکنوکیں ادارہ روئٹرز ءِ رد ءَ برجاھیں گچینکاری ءِ آسری بیتگ ریپبلکنز ءَ ایوان ءِ نمائندگی ءَ دو سد ءُ ھژدہ سیٹ کٹ اتگ ءُ ھمے وڑ ھاکمی پاٹی ڈیموکریٹ پاٹی ءَ دوسد ءُ یازدہ کٹ اتگ-

امریکہ ءِ سروک جوبائیڈن ءَ ریپبلکنز ءِ اے سوبمندی ءَ مراد باتی داتگ ءُ گوشتگ کہ امریکہ ءِ مھلوک ءِ ھدمت کنگ ءِ واستا ریپبلکن پاٹی ءِ گون ءَ کار کنگ ءَ ساڑی اِنت-

سروک جوبائیڈن ءَ گوشتگ کہ امریکہ ءِ مھلوک لوٹ ایت ما آیانی گون ءَ کار بہ کن ایں گڑا ما ھرکسی گون ءَ کار کنگ ءَ ساڑی اِنت –

چار سد ءُ سی ءُ پنچ ءَ ھواریں باسکی نمائندگاں کٹگ ءُ کجام ھم پاٹی ءَ دو سد ءُ ھژدہ سیٹ درکار بیت اِنت – ایوان ءِ نمائندگی ءِ سوبمندی ءَ پد ریپبلکنز پاٹی ءِ رھشون کیون میککارتھی ءَ گوشتگ کہ من امریکہ ءِ مھلوک ءَ گوں زبان کتگ کہ گھتری کار اِنت امریکہ یک نوکیں گامے ءِ واستا ساڑی اِنت ءُ ریپبلکنز اے درگت ءَ کار کنگ ءَ ساڑی اِنت-

زانتکارانی رد ءَ ایوان نمائندگی ءِ بے سوبی ءَ ھاکمی پاٹی ڈیموکریٹس ءَ نی کانونی داری ءَ بازیں جیڑھانی دیمپانی کنگ کپ ایت-

یکشمبے ءَ سروک جوبائیڈن ءَ ڈیموکریٹ پاٹی ءِ گستاھی ءَ پد سینیٹ ءِ واک گپتگ –

ریاست نیواڈا ءَ ڈیموکریٹ ءِ امیدوار کیتھران کورٹزسٹو ءَ وتی ریپبلکن امیداور ایڈم لیگزالٹ ءِ پروش دیگ ءَ سوبمند بیتگ ات ءُ چریشی ءَ پد سرکاری پاٹی ءَ سینیٹ کٹ اتگ-

گوستگیں آسری ءَ ڈیمقکریٹ ءَ سینیٹ ءَ پنجاہ ءُ ریپبلکنز ءَ چل ءُ نُھ سیٹ کٹ اتگ ءُ سوبمند بیتگ-

امریکہ ءَ درو ءُ دراجیں گچینکاری ءَ صدارتی وھد ءِ سرجم بیگ ءَ پیسر دو سالاں بیوکیں ریفرنڈم زانگ بیت اِنت ءُ چریشی ءَ سرکاری پاٹیاں گیشتر پروشی ءِ دیمپانی بیت اِنت-

بلوچی زبان ءِ نامی ایں تژن ءُ بچکندی نبشتکار طارق پیشکانی ءِ سیمی نبشتانکانی تاک “بیگل منی واب ءَ اتکگ” زوت چہ کندیل کتاب جاہ مکران ءِ نیمگ ءَ ھمے ماہ ءَ چاپ ءُ شنگ بیت اِنت –

طارق پیشکانی ءِ چدوپیش ھم دو تاک چاپ ءُ شنگ بوتگ انت کہ آھانی تہ ءَ اولی تاک “تلک” بوتگ ءُ دومی “بابو کسہ کاریت” کہ آئی ءِ تہ ءَ تژن ءُ بچکندی کسہ بوتگ انت آئی ءِ سیمی تاک کہ پہ چاپ ءَ جریدگ انت بیگل منی واب ءَ اتکگ کہ اشی ءِ تہ ءَ تژن بچکندی نبشتانک انت –

طارق پیشکانی ءَ وتی شنگ بوتگیں تاکانی درگت ءَ گُشت کہ بندات ءَ من چو سوڈایے ءِ جوش ءَ اِتاں کہ زیت ءَ زیت منی تاک مارکیٹ ءَ بیا اَنت گڑا پمیشکا دوھزار ھبدہ ءِ سال ءَ من وتی اوّلی گْوشکندی تاک “تْلک” مارکیٹ ءَ آورتگ اَت – منی اے تاک کساں سالیں زھگاں سکّ باز دوست داشتگ ات – گڑا ایشی ءِ دوست دارگ ءَ من ءَ ھمے سکین دات کہ باید من زیت وتی دومی تاک ءَ ھم مارکیٹ ءَ بیاراں ءُ من انچُش کت- بزاں ھمے سال ءِ گُڈّی ءَ من وتی دومی تژن ءُ بچکندی کتاب “بابُو کسّہ کارایت” ھم مارکیٹ ءَ چگل دات – اے تاک ھم داں بازیں کساسے ءَ مھلوک ءَ دوست بوتگ اَت- بلے منی جند ءَ را باز کم دوست بوت –

آئی گُشت کہ مناں ھمے واست ءَ دوست نہ بوتگ کہ من ھمے جیڑ ات کہ من اے تاک ءِ نبیسگ ءَ باز اشتاپ کتگ- گڑا چہ اے کتاب ءَ پد من وتی دست داشتگ انت –

بلوچی زبان ءِ تژن ءُ بچکندی نبشتکار طارق پیشکانی ءَ وتی نوک آؤکیں تاک ءِ درگت ءَ گُشت کہ نوں سال دوھزار بیست ءُ دو انت ءُ پد ءَ منی اے تاک دو مزنیں مردمانی زند ءَ گوں بندوک انت- بلکیں چش بگُشاں اے تاک استاد عبدالمجيد گوادری ءُ واجہ بیگ محمد بیگل ءِ نام ءَ من یک کسانیں ٹیکی یے ندر کتگ – آئی ءَ گُشت کہ ھمے واست ءَ من لوٹ ات کہ اے کتاب باید شُمارا ھم سر بہ بیت-

آئی ءَ گُشت کہ کتاب ءِ نام من کتگ “بیگل منی واب ءَ آتکگ” ءُ اے کتاب ءَ پد یکبرے پد ءَ من وتی دستاں داراں، بزاں واناں گیش ءُ نبشتگ کم کناں- بیت کنت اے کتاب ءَ پد منی دگہ کتاب مارکیٹ ءَ مئیت اگاں اتک گڑا زیت نئیت –

برتانیہ ءِ چیریں ادارگ ایم آئی فائیو ءَ وتی شنگ کُتگیں رپورٹ ءِ تہءَ گُشتگ کہ ایران ءِ نیمگ ءَ چہ کساس دہ رندءَ برتانیہ ءَ جھمنندیں برتانیہ ءِ شھری ءُ دگہ مردمانی آوارجنگ ءُ کُشگ ءِ پندل ساز اِتگ۔

اے لڑ ایم آئی فائیو ءِ سروک کین میکلم ءَ برتانیہ ءَ دیمپانیں ترسانی درگتءَ وتی ھمک سالی رپورٹ ءِ پیش کنگ ءِ وھد ءَ دیما آورتگ اَنت۔ آئی ءَ ایران ءَ ھوار چین ءُ روس ءِ نیمگ ءَ چہ ودی بیوکیں ترسانی درگت ءَ ھم گپ کُتگ۔

ایران ءِ درگت ءَ گپ کنان ایم آئی فائیو سروک ءَ گُشتگ کہ ایران وتی ترندیں چیریں ادارگانی کمک ءَ گوں برتانیہ ءِ تہءَ ھترناکیں جاور ودی کنگ ءَ اِنت۔ اے درگت ءَ ھما مردمانی بیگواہ کنگ ءُ آیانی کوشارینگ ءِ کوشست ھوار اَنت کہ آیاں ایرانی رجیم وتی دژمن سرپد بیت۔

ایم آئی فائیو ءِ سروک ءِ گُشگ اَت کہ ما کساس چُشیں دہ دلجمیں بیھارانی درگت ءَ سرپدی داریں کہ آ ھمے سال ءِ جنوری ءَ بگر داں انی دیما اتکگ اَنت۔ گوستگیں ھپتگ ءَ برتانیہ ءَ جھمنندیں ایرانی اھوالکاراں پولیس ءِ نیمگ ءَ آیاں ھمے بیھارانی درگت سرپدی دیگ بیتگ۔ آئی ءَ گُشتگ ایم آئی فائیو ملکی ءُ درملکی ھم سنتیں ادارگاں گوں کار کنگ ءَ بیتگ دانکہ اَے بیھاراں بے سوب کُت بہ کن اَنت۔

زانگ بہ بیت کہ ایرانی رجیم ءِ نیمگ ءَ چہ ایران ءَ برجاھیں زھرشانی ءُ مھلوکانی وتی ھقانی ھاترءَ جنزوکیں زھرشانیانی زمہ وار یورپ ءُ امریکہ ءِ سرکاراں ھوار آودہ جھمنندیں ایرانی اھوالکار ءُ سیاسی باسکانی پندل گُشتگ اَت۔ آیانی ردءَ اے تھنا ایران ءِ بگیر ءَ روکپتی ڈیھانی پندل اَنت۔

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ بندیگجاہ ءَ بندیگیں بلوچ جنک فائزہ براھوئی مروچی زمانت ءِ سر ءَ یل کنگ بیتگ-

فائزہ براھوئی ءِ سر ءَ سَے سال ءُ شش ماہ ءِ سزا ایرانی آمیدگس ءَ ڈیھ ءِ بگیری داری ءَ بستگ ات اَنت-

ایرانی آمیدگس ءِ نیمگ ءَ شنگ بیتگیں یک رپورٹے ءِ رد ءَ آئی ءَ فائزہ براھوئی ءَ ڈیھ ءِ بگیری ءَ توار چست کنگ ءُ پندل سازگ ءِ بھتام ءَ سَے سال ءُ شش ماہ ءِ بندیگی سزا داتگ –

ھالانی تہ ءَ گوشگ بیتگ کہ فائزہ ءِ وکیل ءُ دگہ مردم آئی ءَ چہ نزیکی ءَ گستا کنگ بیتگ اَنت ءُ ایرانی آمیدگس ءَ وتی نیمگ ءَ آئی ءِ سر ءَ بھتام جتگ ءُ سزا بستگ اَنت-

زانگ بہ بیت فائزہ براھوئی دو اکتوبر دوھزار ءُ بیست ءُ دو ءَ ھما وھد ءَ زاھدان ءَ گرگ بیتگ کہ روکپتی بلوچستان ءَ پانزدہ سالی ئیں جنک ءِ گون ءَ پولیس آپیسر ءِ زوراکی ءُ مھسا امینی ءِ کوش ءِ بگیری ءَ مھلوک برانز گپتگ اَنت-

فائزہ براھوئی کے اِنت؟

فائزہ براھوائی ایرانی سال بیست ءُ پنچ ارد یبھشت سیزدہ سد ءُ ھشتاد ءُ ھپت ءَ ماں زاھدان ءَ ودی بیتگ ءُ آئی ءِ پت دوازدہ سال پیش ماں زاھدان ءَ ایرانی آمیدگس ءَ ما ڈیھ ءِ بگیر داری ءَ پاھو داتگ –

فائزہ لوگ ءِ سروکیں زھگاں چہ یکے آ وتی سروک ءِ سرپرست اِنت ءُ آئی ءِ مات ھم فائزہ ءِ گرگ ءَ پد زھنی نادراھی ءِ آماچ بیتگ-

فائزہ ءَ ھوار ھوار دگہ بلوچ جنک ھم ایرانی لشکر ءَ آوار جتگ ءُ برتگ اَنت بلے آیانی تہ ءَ لھتے یل بیتگ ءُ لھتے انگت بندیگ اِنت-

ھمے وڑ ءَ گوستگیں روچاں ماں زاھدان ءَ خامنہ ای ءِ نیمگ ءَ یک ٹولی ءِ ما زاھدان ءَ پترگاہ ءَ سر بیتگ ءُ آیاں مردمانی ایمن کنگ ءُ نندگ ءُ بندیگیں مردمانی سدکی داتگ ات –

اے پتر ءَ پد سِی ءُ ھشت مردم یل کنگ بیتگ اَنت ءُ چرے پتر ءَ زاھدان امام جمعہ مولانا عبدالحمید بلوچ ءُ زاھدان ءَ ایرانی لشکر ءِ تیرگواری ءَ جنگ بیتگیں مردمانی کھول ءُ بیگواھیں مردمانی کھول جاڑیگ بیتگ اَنت-

پتر ءَ سدکی دیگ بیتگ کہ گرگ بیتگیں مردم یل کنگ بنت ءُ کشگ بیتگیں مردمانی ھاتر ءَ انساپ ءِ درپچ کنگ بیت اِنت چرے سبب ءَ تنی وھدی سی ءُ ھشت بندیگیں مردمانی یل بیگ ءِ ھال بیتگ اَنت-