بلوچ لبریشن آرمی ءِ جارکش جینئد بلوچ ءَ رسانکدر ءَ وتی داتگیں درشانے ءَ گُشتگ کہ 13نومبر بلوچستان ءِ شھیدانی روچ ،گھگیری راجدپتر ءِ ھما درپشوک ءُ اَھد سازیں روچ انت کہ مار ءَ اے بے بھائیں سَرانی بے مُلیں دیمونیانی یات ءَ دنت کہ آیاں ماتیں وتن ءِ آجوئی ،راجی پجار ءُ آیوکیں پدریچانی رُژنائیں باندات ءِ ھاتر ءَ وتی ھیشی ایں سرانی دیمونی داتگ۔مرچگیں روچ مُسام ءُ سوگند ءِ روچ انت کہ ما وتی شھیدانی ھوناں گوں ھچ وڑ دَگاں نکنیں ءُ آیانی شون داتگیں راہ ءَ روان ءَ وتی منزل ءَ سر بئیں۔
جارکش ءَ گشتگ کہ بلوچ لبریشن آرمی مرچی بلوچستان ءِ شھیدانی روچ ءَ راجدپتری چَھر ءَ جتاھیں ملپد ءُ ھاسیں جنگی بیڑ ءُ اُرش دژمن ءِ بمب گُواری ءُ ناگھانی وئیلاں شھید بیتگیں 31 ساہ بکشیں سرمچارانی اھوالاں دیم ءَ آرگ ءَ انت۔اے شھیدانی تہ ءَ لھتے انچیں مزن کردیں سرمچار ھوار انت کہ گل ءِ سک ءَ ھاسیں ءُ چیریں کارانی سرجم ءَ کنگ ءَ جاڑیگ بیتگ انت ءُ وتی نشانگ ءَ گوں سوبمندی ءَ سر بیتگ انت ۔گل ءِ راہ ءُ رھبند ءُ جنگی رِپک ءُ ھنرانی بُنگیجی لوٹانی پد ءَ اے کارانی سرجمی ءُ نشانگ ءَ سد درسد سوبینی ءِ ھاتر ءَ آیانی شھیدی ءِ ھال کسانیں مدتے ءِ واستہ ڈکینتگ انت،تانکہ مئے ھاسیں کار ءُ مشنزاں ھچ وڑیں تاوانے مہ رسیت ، مرچی وھدے آ سرجمیں کار ءُ مشنز گوں سوبینی ءَ سرجم کنگ بیتگ گڑا اے تمردیں سرمچار راجدپترے بھر کنگ بوھگ ءَ انت۔
جارکش ءِ رد ءَ اے دارھیں شھید بلوچ راجی آجوئی جنگ ءِ ھما مھکم ءُ بے مٹ ءُ تواریں مِنُک بیتگ کہ آیاں ھچ وڑیں زاتی نام ءُ نامداری ءِ واھش ءَ ابید بے مٹیں پھک دلی ءُ پولاتیں جوزگ ءُ سرجمیں رازداری ءَ گوں دژمن بُنپدانی لرزینوکیں شَوربندی سرجم ءُ پیلو کتگ انت۔
درشان ءَ گشگ بیتگ کہ پنجگور ءَ(جنوری 2026): اے ملپداں دژمن ءِ دیم ءَ مھکمی ءِ اھدے سازینان ءَ ریاز پنام ریھان،اسلام مراد پنام شُھیب، اُمر بلوچ۔ پنام جینئد، انور پنام سوبین،نورھان پنام میرین ءُ اجمل پنام پازل شھید بیتگ انت،
جارکش ءِ رد ءَ کلات ءُ شورپارود ءِ جنگ جاھاں (جنوری تاں جون) جنوری 2026 :کلات ءِ جنگ جنگ جاھاں دژمن ءِ ڈرون اُرش ءَ سنگت ابدالرشید شاھوانی پنام ھامد ءُ سنگت پھد شاھوانی پنام کازی شھید بیتگ انت وھدے کلات شور پارود ءِ جنگ جاھاں دژمن ءِ دگہ یک ڈرون اُرشے ءَ سنگت شاہ داد پنام سھداللہ شھید بیتگ۔
درشان ءِ رد ءَ مستونگ ءُ نوشکی ءِ جنگ جاھاں (جون تاں جولائی 2026): مستونگ ءِ جنگ جاھاں جون 2026 ءَ یک ھاسیں کار ءُ مشنے ءِ تیاری ءِ میان ءَ ناگھانی تراکے ءَ سنگت اَبدُاللہ کبیر لھڑی پنام جاوید،مھمد نواز شاھوانی پنام منان، ھسن زیا شاھوانی پنام نودان ءُ ندیم بنگلزھی پنام ساچان شھید بیتگ انت ۔ جولائی 2026 ءَ ناگھانی تراکے ءِ آسر ءَ نوشکی ءَ سنگت آمر ساسولی پنام دودا ءُ شُھیب ساسولی پنام سرتاج شھید بیتگ انت، ءُ جون 2026 ءَ شھزاد پنام زاکر نوشکی ءِ ملپد ءَ شھید بیتگ۔
وھدے ستمبر (2026)ءَ مستونگ گَل ءِ کارانی ھاتر ءَ سَپر ءِ میان ءَ دگ وئیلے ءَ سنگت دین مھمد پنام شاہ پھد شھید بیتگ۔
جارکش ءِ رد ءَ (اگست 2026) ءَ دالبندن ءَ گوں زورگیریں دژمن ءَ دیم پہ دیمی تُرندیں میڑے ءِ میان ءَ سنگت ریاز اھمد زھری پنام کازی باسد ءُ سنگت گل ھسن پنام سالار جوانمردی ءِ نکش جوڑینان ءَ شھید بیتگ انت۔
درشان ءِ رد ءَ (مئی2025 ) ءَ گوادر ءَ یک ھاسیں کارے ءِ میان ءَ سنگت شھجان بلوچ پنام دلمراد پنام نوروز ءُ سنگت شھزاد بلوچ پنام ھمل شھید بیتگ انت۔
جارکش ءِ شنگ کتگیں درشان ءِ رد ءَ (ھمے سال) ءَ دژمن ءِ جنگی بالیگانی بمب گواری ءُ برزی زوراکیانی دیم داران ءَ سنگت ھُزور بکش مھمد ھسنی پنام ائید مھمد،ھاپِز نعمت اللہ پنام میرین، ھاپِز بہاول ندیم پنام اُسامہ،پاروک مینگل پنام آسپ،مھمد اُمر پنام مشمار ءُ نسیر جتک پنام پرویز شھید بیتگ انت۔
جارکش ءَ گشتگ کہ (جون 2026 ) ءَ یک ھاسیں مشنے ءِ پیلو کنگ ءِ میان ءَ ناگھانی تراکے ءَ چہ سنگت راجا پنام شھداد شھید بیتگ۔
وھدے گوستگیں سال (مئی 2025)ءَ دژمن ءِ ھلاپ ءِ جنگ دیان ءَ سنگت عباس کرد پنام کاشپ ءُ سنگت لھل جان مری پنام یاسین شھید بیتگ انت۔
جارکش ءَ درشان ءِ گُڈسر ءَ گشتگ کہ بلوچ لبریشن آرمی شھیدانی راجدپتری پاکیں روچ ءِ ساھت ءَ تیوگیں شھیداں ستک شانی ءُ سُھریں دروت ندر کنت، ءُ ھمے مُسام ءَ بندیت کہ مئے شھیدانی رتکگیں ھون ھچبر بے مُز نہ بنت ۔آیانی اے بے بھائیں پگر کہ یک آجو ،وتواک ءُ وشھالیں بلوچستان ءِ جُوڑینگ ءَ گوں بندوک انت۔آیانی مزل ءَ برگ ءُ سر کنگ بیت۔ زورگیریں ریاست ھر وڑیں زوراکی ،لشکرکشی ءُ زورآوری شوربندیانی پسو ءَ گوں آھنیں توکل ءُ مھکمیں سلاہ بندیں گھگیری ءَ گوں دیگ بیت،ءُ شھیدانی ھون ءِ ھمک ترمپ اے دیاراں دژمن ءِ سرجمی ءَ ولگوج کنگ ءُ آجوئی ءِ ڈیوا بنت۔