TBP Balochi

سر بیتگیں ھالانی رد ءَ بلوچستان ءِ دمگ لسبیلہ ءَ گوستگیں شش روچاں چہ یونیورسٹی انتزامیہ ءِ ھلاپ ءَ بلوچ اسٹوڈنٹس فرنٹ ءِ نیمگ ءَ ھرتال برجاہ-

ھرتال ءَ ھواریں نودربرانی جاورناگیگی ءِ دیمپان اَنت چریشی ءَ چہ نودربر نادراہ جاہ ءَ برگ بیتگ اَنت-

اے ھرتال گوستگیں شش روچاں بلوچ اسٹوڈنٹس فرنٹ ءِ اوتھل ھنکین ءِ نیمگ ءَ یونیورسٹی ءِ انتزامیہ ءِ ترسینگ ءُ دگہ دگہ رویشانی ھلاپ ءَ برجم دارگ بیتگ –

ھالانی تہ ءَ گوشگ بیتگ کہ اے چرے زھرشانی ھرتال ءَ ھواریں بی ایس ایف ءِ بنجاھی پتر ءِ باسک آسیہ بلوچ ءِ جاور ناگیگ بیتگ اَنت ءُ آ نادراہ جاہ ءَ برگ بیتگ-

بلوچستان ءَ یک نیمگے ءَ وانگ ءِ آسراتی نہ بوگ ءُ دومی نیمگ ءَ مزن مزن شھدربرجاھاں انتزامیہ ءِ رویش پہ نودربراں یکشل ءَ ترند گندگ ءَ آیگ ءَ اَنت-

اوتھل ءَ ھوار ھوار دگہ جاھاں نودربر ھمے وڑیں وئیلانی دیمپان کہ چریشی ءَ چہ آیانی وانگی تکاں آسر کپگ اِنت-

روکپتی بلوچستان ءِ نامدار ءُ راجداریں مولوی مولانا فضل الرحمان کوھی ءَ ما مشھد ءِ زندان ءَ یک شنگ کرتگیں کلوہ بندے ءَ گوشتگ کہ داں دو شمبے ءَ منی گپ گوشدارگ نہ بیت اَنت من شد داں مرگ ءِ ھرتال ءَ ننداں –

آئی ءُ کلوہ بند گوستگیں روچ ءَ یک آڈیو کلپے ءِ دروشم ءَ شنگ کرتگ ءُ گوشتگ کہ منی زندان ءَ سالے بیت کہ من وتی زندانی ھلاس کتگ اَنت بلے داں انگت ءَ من چہ بندیگ جاہ ءَ آجو کنگ نہ بیتگ اَنت-

کلوہ بند ءَ گوشدارگ بیت اِنت کہ آ گوشگ اِنت من وتی توار ھرچ تک ءُ پھناتاں برتگ ءُ وتی انساپ ءِ واستا کانودی راہ زرتگ اَنت بلے کس ءَ منی گپ ءِ گوشدارگ ءِ زھمت نہ کتگ-

آئی ءَ اے توار بند امام جمعہ پشامگ راسک ءَ دیم داتگ ءُ اود ءَ آ گوں ساپیں گپاں گوشگ اِنت کہ من رائیس جمھوری ءُ دگہ دگہ واکانی گور ءَ وتی دزبندی برتگ اَنت بلے ھچ کس ءَ منی توار گوش نہ داشتگ نی لاچاری ءَ اے گام ءَ چست کنگ ءَ آں-

مولانا کوھی ءَ گوشتگ کہ اے منی انسانی ءُ کانونی ھک اِنت کہ وتی آجوئی ءِ واستا ھرچ گام ءَ چست بہ کن آں ءُ آئی ءَ گڈی روچ دوشمبے گشتگ کہ من اے دوشمبے ءَ چہ شد داں مرگ ءِ ھرتال ءَ ننداں –

مولانا کوھی ءَ توار بند ءَ وتی زھگ ءُ برات ءُ سنگتاں دزبندی کتگ کہ آ منی توار ءَ انسانی ھکانی گل ءُ دگہ پھناتاں برگ ءَ کمک بہ کن اَنت-

آئی ءِ توار بند ءَ اشکنگ بیت اِنت کہ آ گوشگ اِنت کہ من اے شد داں مرگ ءِ ھرتال ءَ ھما وھد ءَ ننداں منی گپ گوشدار نہ بیت یا منی لاش چرے زندان ءَ چہ درکیت –

آئی ءُ توار بند ءَ وتی نیکراھی رھبندانی منگ ءُ چہ زندان ءُ آجوئی ءُ سزایانی ھلاس کنگ ءِ شرت درشان کتگ اَنت-

زانگ بہ بیت مولانا کوھی ایرانی سال نود ءُ ھشت ءَ ما کوش ءِ بھتام ءَ گرگ بیتگ ءُ شش سال ءِ زندان آئی ءِ سر ءُ اتکگ بیتگ ءُ چریشی ءَ چہ مشھد وکیل آباد ءِ زندان ءَ برگ بیتگ –

بللوچستان ءِ دمگ کیچ ءَ گوستگیں دوروچاں چہ پاکستانی پوج ءِ نیمگ بیڑ برگ بئیگ ءَ اِنت۔ گن شپ بالگردانی جتاھیں ھندانی سرءَ شیلنگ کنگ ءِ ھم ھال اِنت۔

پوجی بیڑ کولواہ ءِ بازار شاپکول ءُ پارگ ءَ ھوار دگہ کوھی ھندانی تہءَ گوستگیں دو روچاں چہ برجاہ اِنت۔ اے ھندانی تہءَ دو شمبے ءُ سئے شمبے ءِ روچ ڈروناں ھوار گن شپ بالگرد ھم بھر زرتگ ءُ کوھی دمگ ءُ کشاری زمینانی سرءَ شیلنگ کُتگ اِش۔

داں انگت ھچ پئیمیں جانی ءُ مالی تاوانانی درگت ءَ دلجمیں اھوال سر نہ بیتگ اَنت۔

زانگ بہ بیت جنزوکیں ماہ ءِ بندات ءَ بولان ءُ کَش ءُ کری دمگانی تہءَ پوج ءَ مزنیں کساس ئے ءَ بیڑ بُرتگ اَت۔ آپریشن داں نھ روچ ءَ برجاہ بیتگ اَت کہ اِشی تہءَ پاکستانی پوج ءُ بلوچ لبریشن آرمی ءَ میڑانی تہءَ جانی تاوانانی دیمپانی کنگ کپتگ اَت، وھدیکہ ھمے نیام ءَ پاکستانی پوج ءَ یک درژن ءَ گیشتر زالبول بازیں روچاں دزگیر کُتگ بیتگ اَنت۔

بلوچستان ءِ جتاھیں دمگانی تہءَ یکشلی ءَ گوں پوجی بیڑانی اھوال دیما کائینت ءُ گیشتریں بیڑانی تہءَ زالبول ءُ زھگاں ھوار دگہ مردم لٹ کُٹ ءِ نشانگ کنگ بنت وھدیکہ بازیں بیڑانی تہءَ پوج ءِ نیمگ ءَ مھلوکانی لوگ ءُ کشارانی ماندارگ ءِ ھم ھال دیما اتکگ اَنت۔

پولینڈ ءَ گمانی پئیم ءَ روسی میزائلانی اُرش ءِ سوبءَ 2 مردم بیران ءُ بازیں ٹپی بیتگ اَنت، وھدیکہ روس ءَ اے اھوال رد کُتگ اَنت۔

درملکی ھال سرکنوکیں ایجنسی رد ءَ روسی میزائلانی کپگ ءِ ھال ءِ سرءَ پولینڈ ءِ تہ ءَ سلامتی کونسل ءِ دیوان لوٹارینگ بیتگ۔ درملکی رسانکدرانی رد ءَ پینٹاگون ءَ گُشتگ کہ یوکرین ءَ چہ نزیکیں پولینڈ ءِ سیمسری دمگ ءَ روسی میزائلانی کپگ ءِ اھوالانی درگت ءَ پَٹ پول کنگ ءَ اِنت۔

پینٹاگون ءِ جارکش پیٹ رائڈر ءَ گُشتگ کہ ما اے رسانکدری اھوالانی درگت ءَ سرپد اِنت کہ اِشانی تہ ءَ بھتام جنگ بیتگ کہ 2 روسی میزائل پولینڈ اگاں یوکرین ءِ سیمسرانی تہ ءَ یک جاہ ءِ کپتگ اَنت۔ پیٹ رائڈر ءَ گُشتگ کہ داں انگت اے گپ ءِ راستی ءِ درگت ءَ منانک نیست اِنت کہ میزائل اُرش بیتگ۔

دومی نیمگ ءَ روس ءِ پھازگی ءِ وزارت ءِ نیمگ ءَ پولینڈ ءَ روسی میزائلانی کپگ ءِ گپ رد کُتگ ءُ گُشتگ اے اھوال زور جاورانی نگیگ کنگ ءِ پندل اِنت۔

ھندوستان ءَ جھمنندیں نامداریں پاکستانی گشندہ عدنان سمی ءَ گُشتگ کہ بازیں مردم من ءَ جُست کن اَنت کہ من ءَ چہ پاکستان ءَ پرچہ انچو نپرت اِنت۔ آئی ءَ گُشتگ تھلیں راستی اِش اِنت کہ من ءَ پاکستانی مھلوکاں گوں پئیمیں گلگ ءُ زھری نیست اِنت کہ آ منی گوم ءَ شر بیتگ اَنت۔ من ھما درستیں مردماں دوست داراں کہ من ءَ دوست دار اَنت۔

آئی ءَ دیمتر ءَ گُشتگ کہ اے گپ راست کہ منءَ پاکستانی اسٹیبلشمنٹ ءَ گوں جیڑہ ھست اَنت۔ ھما مردم کہ من ءَ زان اَنت آ اے ھم زان اَنت کہ اسٹیبلشمنٹ ءَ گوں من بازیں سالاں داں چی چی نہ کُتگ، ءُ ھمے پدءَ منی پاکستان ءِ یل کنگ ءِ مستریں سوب جوڑ بیتگ۔

عدنان سمی ءَ دیمترءَ گُشتگ کہ من یک روچے کئیت کہ من اے راستی ءَ پدر کناں کہ آیانی منی گوم ءَ چونیں روش بیتگ، بازیں مردم اے راستی ءَ سرپد نہ اِنت ءُ درستاں گیشتر لس مھلوک، ءُ اَے راستی بازیں مردماں ابکہ کنت۔ نامداریں گشندہ ءَ گُشتگ من بازیں سالاں ھاموش بیتگ اَنت، بلے من یک گچینی وھدے ءَ درستیں مھلوکاں چہ اے راستی ءَ سرپد کناں۔

فٹبال ءِ جھانی میڑ بزاں فیفا ورلڈ کپ بیست نومبر دوھزار ءُ بیست ءُ دو ماں قطر ءَ بندات بئیگ ءَ اِنت۔

جھانءِ جتا جتاھیں ملکاں چہ سیادی داروکیں سی ءُ دو ٹیم بیست نومبر ءَ بگر داں ھشدہ دسمبر دو ھزار بیست ءُ دو ءَ مزن ھور ءِ ملک قطر ءَ فٹبال ءِ جھانی کپ ءَ وتی نام ءَ کنگ ءِ ھاترءَ دیم پہ دیم بنت۔

قطر ءَ بندات بیوکیں جھانی کپ فیفا ءِ بیست ءُ دومی ورلڈ کپ اِنت، اولی فیفا ورلڈ کپ نوزدہ سد ءُ سی ءَ یوروگوائے ءَ برجاہ دارگ بیتگ۔

بیست ءُ دومی فیفا ورلڈ کپ ءِ تہءَ بھرزیروکیں ملکانی تہءَ لھتیں ملک چہ دگراں گیشتر نامدار اَنت کہ اِشانی تہءَ ارجنٹائن، برازیل ءُ جرمنی درستاں گیشتر مھلوکانی دل دوستیں ٹیم اَنت ءُ مھلوک پہ ھمے ٹیمانی سوبمند بئیگ ءَ واھگ دار اَنت۔

ھندوستانی تامرانی مزن نامیں ازمکار عامر خان ءَ گوشتگ کہ آ اے دمان ءَ چہ تامراں مھتل زیرگ ءُ وتی کھول ءُ زھگانی گوم ءَ وھد گوازینگ لوٹیت۔

اھوالانی ردءَ عامر خان ءَ اے گپ گوں ھندوستانی رسانکدراں گوں گپ کنان ءَ گُشتگ آئی ءَ گُشتگ آ گوستگیں سی ءُ پنچ سالاں چہ یکشل ءَ تامرانی سرءَ کار کنگ ءَ بیتگ ءُ انی ھم چہ آئی گوستگیں تامر لعل سنگھ چڈھا ءَ پد آئی ارادگ بیتگ نوکتریں تامر ئے ءِ سرءَ کار بہ کنت۔ بلے عامر خان ءَ گُشتگ کہ اے ساھت ءَ من چہ تامراں مھتل زیرگ ءُ وتی مات ءُ وتی زھگانی گوم ءَ وھد گوازینگ لوٹ آں۔

زانگ بہ بیت عامر خان ءِ گوستگیں تامر لعل سنگھ چڈھا ترندیں وڑیے ءَ بے سوبی ءِ آماچ بیتگ اَنت، بازیں مردمانی ھیال اِنت کہ عامر خان ءَ لعل سنگھ چڈھا ءِ بے سوبی ءَ پد چہ تامراں مھتل زُرتگ۔

عامر خان ءِ تامر سینیما ءَ بے سوبی ءَ پد آنلائن پلیٹ فارم نیٹ فلیکس ءَ شنگ کنگ بیتگ اَت کہ اود ءَ تامر ءَ مھلوکانی نیمگ ءَ دلبڈی رس اتگ ءُ مردماں تامر ءِ توسیپ ھم کُتگ۔

روکپتی بلوچستان ءِ سیمسرانی دمگ ءَ تیل کشیں لھتے مردم ایرانی واکداراں گپتگ ءُ ناشناسیں بندیگ جاھاں برتگ اَنت –

گوستگیں شپ ءَ سراوان ءِ ھند کلگان ءِ سیمسراں ایرانی سپاہ ءَ تیل کشیں مردم گپتگ ءُ لَٹ ءُ کرتگ ءُ گون وت برتگ اَنت-

ھالانی تہ ءَ گوشگ بیتگ کہ ایرانی سپاہ سجاد بنجل ءَ ایرانی سپاہ ءَ تیل کشیں گاڑی والا گپتگ ءُ لٹ ءُ کٹ کتگ اَنت ءُ ناشناسیں جاھاں برتگ اَنت-

ھالانی تہ ءَ گوشگ بیتگ کہ اشانی توک ءَ لھتے جستگ ءُ رودراتکی بلوچستان ءَ شتگ اَنت –

زانگ بہ بیت روکپتی بلوچستان ءُ رودراتکی بلوچستان ءِ بھر کنوکیں لین ءَ ھردوکیں نیمگانی مردم بھر ءُ بانگ کتگ اَنت-

ھمے وڑ ءَ گوستگیں سال ءِ بیست ءُ دو فروری ءَ سیمسرانی ھند حق آباد ءَ یک تیرگواری ءَ کساس یک دو درزن ءَ گیش مردم بیران بیتگ ات اَنت بلے لس مھلوک ءِ ھالانی تہ ءَ بیرانی تہ ءَ باز گیش کساس گوشگ بیتگ اِت اَنت –

چرے وئیل ءَ پد روکپتی بلوچستان ءَ مھلوک برانز ءَ سرکاری جاہ ءُ دگہ چیزانی سر ءَ بازیں پولیس کارگس ءُ دگہ دگہ جاہ سوچگ بیتگ اِت اَنت –

بلوچ اسٹوڈنٹس ایکشن کمیٹی ملیر ھنکین ءِ نیمگ ءَ چہ کیرئیر کونسلنگ، سائنیفیکنس اینڈ سکالرشپ ایوارنس ءِ (“Career Counseling it’s significance and Scholarships Awareness “) ءِ سرھال ءِ سرا مراگشے اڈ دیگ بوتگ –

مراگش ءِ گچینی مھمان ھنکینی کارمستر بوتگ ءُ تْران کار کندیل بلوچ، سگیر بلوچ ءُ زیاد بلوچ بوتگ اَنت-

مراگش ءِ سرھال سر ءَ ترانکارانی گوشگ ات کہ مروچی ما وتی چاگرد ءَ چمشانک بدے آں تا ھمے گندگ ءَ کیت کہ ھرچ نودربر ءِ راہ پیسرا گیشینگ بوتگ- یک گپے تچک ءَ آوانی دماگ ءِ تہ ءَ ایر کنگ بوتگ کہ اے اژدری ایں چیزے کہ پلاں نودربر ءَ ڈاکٹر جوڈ بوگی اِنت، پلاں نودربر ءَ انجینئیر ءُ پلاں نودربر ءَ ملایے – بلے چاگرد اے چیز ءَ نہ جیڑیت کہ انسان چہ نیچر ءَ یک خدادانا سلاھیت ئے بیت ءُ ایش ھما ادارہ ءِ ذمہ واری اِنت کہ ھمک نودربر ءِ سلاھیت ءَ بزانت ،آئی بہ تراشیت ءُ شیپ ئے بہ دنت ءُ ھمے داب ءَ نودربر ءِ کیرئیر کونسلنگ بہ کنت – ایش ھمک نودربر ءِ کھول، ادارہ ءُ استادانی ذمہ واری اِنت کہ نودربر ءِ سلاھیت ءَ پوہ بہ بیت ءُ نودربر ءَ شوک ءِ ھواری ءَ وھد ءِ لوٹانی ھساب ءَ نودربر ءِ کیرئیر ءِ جوڈ کنگ ءَ آئی ءِ کُمک بہ کن اَنت تا ھما وھد ءَ کہ نودربر اے قابل بیت کہ وتی پیسلہ وت زُرت بہ کنت کہ منی منزل کجام اِنت تا ھما نودربر ءِ وتی زاتی پیسلہ ءِ پلہ مرزی ءَ بہ کن انت، ایش نہ انت کہ کھول یا ادارہ وتی ھساب ءَ نودربر ءِ واھشتاں رَد بہ کن اَنت ءُ آئی ءَ ھما راہ ءَ شون بہ دے اَنت کہ آ رنگ ءَ نودربر بوگ نہ لوٹ اِیت –

اسکالر شپ ءِ درگت ءَ ترانکاراں گُشت کہ چوشکہ مئے دمگ ءِ مھلوک گیش تنگ دست اَنت ءُ ھمے سوب ءَ بازیں نودربرانی وانگ پہ مالی تنگ دستی آنی سوب ءَ نا سرجم بنت ءُ آوانی کئیریر زوال بیت – انچش کہ وانگجاھانی تہ ءَ ھمک سال جتا جتا ایں اسکالرشپ کاینت ءُ اے پہ ھما نودربراں موکلے کہ آ وتی ونگ ءَ دو گام دیم ءَ بُرت کن اَنت- ھمے درگت ءَ سنگتاں اسکالرشپانی باروا ءَ ھم نودربر سرپدی دات ءُ ھمے جُھد کُت کہ نودربر اے باروا ءَ پوہ بہ بنت ءُ اے چیزاں چہ نَپ بہ زور اَنت ءُ وتی وانگ ءَ دیم ءَ برگ ءِ جھد بہ کن اَنت-

مراگش ءِ گُڈ سر ءَ کُل سنگتاں وتی جُست ایر کُت اَنت ءُ آوانی پسّہ دئیگ بوت اَنت ءُ دیوان آسر کنگ بوت-