TBP Balochi

یوکرین ءِ سروک ولاد دیمیر زیلنسکی ءَ پوج ءُ مھلوک شیوار کرتگ ءُ گوشتگ کہ آ روس ءِ گیشین اُرشانی دیمپانی کنگ ءَ ساجو بہ بنت-

ھال سرکنوکیں ادارہ روئٹرز ءِ رد ءَ سروک زیلنسکی ءِ درشان یک ھنچیں وھدے ءَ دیم ءَ اتکگ کہ آ پیسر ءَ روس ءِ نیمگ ءَ گچینی جاھانی سر ءَ اُرش ءَ لکانی ھساب ءَ شھری بجلی، آپ ءُ ھیٹنگ ءِ آسراتیاں زبھر اَنت ءُ برپگواری ءِ درچ ھم بندات بیتگ اَنت-

یوکرین ءِ سروک ءَ تامر بندیں کلوہ ءَ گوشتگ کہ ’ ناشرکار ءِ نوکیں اُرشانی چن ءُ لانچ ءَ کنگ ءَ اِنت اے راستی یے آ ھما وڑ کنگ ءَ اِنت کہ آئی ءِ گور ءَ میزائل ھست اِنت بدبھتی ءَ آ ایمنی ءَ نیشت نہ کنت آیوکیں ھپتگ ھم گوستگیں ھپتگ ءَ گیش مشکل بیت اِنت ‘-

بنجاھی شھر کیئف ءِ انتزامیہ ءِ گوشگ اِنت بجلی، آپ ءُ ھیٹنگ ءِ کار سرجم بیگ ءِ نزیک ءَ اِنت بلے گیش پجارینگ ءِ سبب ءَ لوڈ شیڈنگ بنت اِنت-

زانگ بہ بیت فروری ءَ یوکرین ءِ سر ءَ اُرشاں پد گوستگیں ھپتگ ءَ گچینی جاھانی نشانگ کنگ ءَ روس ءَ یوکرین ءِ شھراں گیش تاوان داتگ-

روس ءِ گوشگ اِنت یوکرین ءَ گپ ءُ تران رد کرتگ چریشی ءَ چہ آئی ءِ گچینی جاہ نشانگ کتگ اَنت-

یوکرین ءِ سلاہ بندیں کماندار ءِ گوشگ اِنت روس ءَ دنیپرو ءِ ھند ءَ چار میزائل آس داتگ ءُ چریشی ءَ شھری نشانگ کنگ بیتگ اَنت-

سروک ولادیمیر زیلنسکی ءِ رد ءَ یوکرین ءِ گیشترجاھاں فرنٹ لائنزاں ترندین اُرش بوگ ءَ اَنت اشانی توک ءَ گیشتر رودراتکی ڈونیٹسک ءِ دمگ اُرشانی آماچ اَنت-

یوکرین ءِ سلاہ بندیں لشکر ءِ جنرل اسٹاپ ءِ گوشگ اِنت روس ءَ رودراتکی ڈونیٹسک ءِ دمگانی بازیں میتگ نشانگ کتگ اَنت –

دومی نیمگ ءَ گوریچانی رودراتکی خیرسن ءِ دمگاں ھم ترندءں جنگ ءُ چوپ برجاہ اَنت کہ ستمبر ءُ اکتوبر ءَ یوکرین ءِ لشکر ءَ روس ءَ زوگری ءَ واتر گپتگ اَت-

زانگ بہ بیت ھمے ماہ نومبر ءِ بندات ءَ روس ءَ یوکرین ءِ دمگ خیرسن ءَ وتی لشکر واتر کتگ ات پد ءَ یوکرین ءَ وتی سوبمندی ءِ کسانوکیں درشانے داتگ ات- خیرسن ھما یکیں شھراں چہ یکے آئی ءِ سر ءَ روس ءِ زورگری ءَ پد اے یوکرین ءِ پسھانی بنجل جوڑ بیتگ –

انشپی مات واب اِنت

نبشتہ کار: سیپ بلوچ

دی بلوچستان پوسٹ

سک دیر اَت کہ منی کستریں گوهارک سونیہ نادراه اَت ڈاکٹراں مات ءَ گْوشتگ اَت برے مزنیں شهر ءَ اِد ءَ ایشی ءِ الاج نہ بیت اِنت بلے بے زری ءِ سوب ءَ مات ءِ وس هچ ءَ روْگ ءَ نہ اَت همے کہ میتگ ءِ جنین هال پرسی ءَ اتک اَنت مات ءَ را جتا جتائیں سوج اش دات کہ لوجڑ کن ئے گرمیں تپ اِنت بلکیں لوجڑ ءَ تپ ءِ اسر روت ءُ وشتر بیت ، من چہ وانگ ءَ اتک آں مات ءَ دراهْینت ابا برو مزنیں میتگ ءَ روبینہ ءِ مرد دبئی ءَ اِنت بلکیں چرپی ءِ چیزے دنت بیارے سیونیہ ءَ لوجڑ کن آں، من کسان اِت آں بلے مات ءِ گپ ءِ ایش کنگ ءَ گوں نان نہ وارت تچان ءَ پہ مزنیں میتگ ءَ روان بیت آں ، روبینہ چار هلک ءِ آدیم ءَ اَت من پہ تچان شت آں کہ سونیہ وش بیت من روبینہ ءِ لوگ ءَ اتک آں روبینہ ءَ را گْوشت کہ مات ءَ دیم داتگ کریم ءِ یا چرپی ءِ بہ دے سونیہ ءَ لوجڑ کن آں ، تپ ءِ وش بیت ، روبینہ ءَ سبز ڈبی ئیں کریمے کش ات ءُ دات من ءَ من پہ تچان هلک ءَ اتک آں روچ دیگر اَت ، موسم زمستان اَت گْوریچ کشگ ءَ اَت کہ گُْوش سنٹر اتگ ات انت بلے من هچ کمار نہ کت پرچا کہ سونیہ سک دوست اَت من ءَ ، من ءَ جُپتے کپودر یک مرگے هستگ اَت من سونیہ ئِے نام ءَ کتگ اَت انت-

مات ءَ مگرب ءَ رند سونیہ ءَ را هلگدار ءُ کریم چرپ کت بلے مرچی سونیہ سک گریوگ ءَ ات دستا نہجُڑ اِت جان ءِ پوست ءِ آزردگ اَت یکْوی مات ءِ دلبند ءَ ات گریوگ ءَ ات نہ شپ ءَ وپت نہ روچ ءَ مات ءِ چم سهر سهر اَت اَنت بلے مات ءَ منی دیم ءَ هچبر نہ گریت ، من گریت وانگجاه دورات بلے من همے راه ءَ روان کت یکْوی گریوان اِت آں ، مرچی شپ سک سرد اَت مات ءَ سونیہ لوجڑ کتگ اَت کٹ ءَ اَت ئِے مئے نان هشک اَت اِنت ایر ات اَنت بلے هچ دل ءَ ورگ نہ لوٹ ات ، آچ مرزگ ءَ ات بلے مرچی گْوهارکے گریوگ کم اِت اَنت ، مات نشتگ ءُ جیڑگ ءَ ات دیوال ءَ تکہ ات واب کپت پرچا کہ مات چنچو شپ ات کہ بے واب اَت من نپادانی چک ءَ واب شت آں شپ ءِ ساهت یازده ءَ بستر نہ لیٹ اینت گْوش داشت مرچی سونیہ گریوگ ءَ نہ ات من گلا بال بوتاں کہ مرچی مات وپس ایت لوجڑاں سونیہ وش کتگ باز دوا کت پہ روبینہ ءَ چمانی ارس پٹ پٹ ءَ ریچگ ءَ ات اَنت داں واب شتاں شپ ءِ ساهت سئے ءَ پد ءَ بُست کت داں مات ءُ سونیہ هردو اِد ءَ نہ اَنت ، من زوت کت کہ در کایاں مات گس ءَ پُترت داں سونیہ ءَ مات ءِ دستانی گرنچان اَت من مات جست کت اما کجا ءَ شتگ ئے مات ءَ درائینت سونیہ ڈن ءَ برتگ گریوگ ءَ ات من گوشت تئی واب هراب بیت ، بلے واب شتگ نوں برو کرباناں وپس من وپس آں ، من اتک ءُ نپادانی سر ءَ وپتاں سهب ءِ سرا بُست کت سونیہ وتی گوانزگ ءَ نہ ات لوگ ءِ کنٹ ءَ جولوے بستگ ات من تچان ءَ شُت ءُ جولو چار ات سونیہ ءِ دست بستگ اِت اَنت ءُ جولو ءَ واب ات بلے مات ءَ گْوشت کَنداں داں من ءَ ٹلیناں وانگجاه ءَ راه دیاں بلے من ءَ امباز اِت ئِے گوشت ئِے سونیہ دوشی گریوگ ءَ گوں من ڈن ءَ زرت ءُ شت آں هما ساهت ءَ سونیہ واب شت ، هڈیسگے جت ئِے زار ئِے کت داں سرجمیں بازار مچ ات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گوستگیں روچاں بلوچستان ءِ دمگ کوہلو ءَ پوجی بیڑ ءَ بیران بیتگیں مردمانی جون کوہلو ڈی ایچ کیو ءَ برگ بیتگ اَنت وھدیکہ نادراھجاہ پوج ءَ انگیراں کُتگ۔

ڈی ایچ کیو ءَ ایر کُتگیں جونانی پجار داں انگت نہ بیتگ وھدیکہ لشکریانی نیمگ ءَ ھچ کس ءَ اے جونانی چارگ ءِ موہ دئیگ بئیگ ءَ نہ اَنت۔

ھندی اھولانی ردءَ ڈی ایچ کیو ءِ مردگ خانہ ءُ دگہ آسراتی نیست اَنت، چریشی سوب ءَ جونانی بوہ سرجمیں ھندءَ شنگ بئیگ ءَ اُنت وھدیکہ لشکری جنگ بیتگیں مردمانی پجار درگت ءَ گامگیج زیرگ ءَ نئیلگ ءَ اَنت۔

ڈی ایچ کیو ءِ یک ڈاکٹر ئے ءَ پجار پدر نہ کنگ ءِ شرط ءَ دی بلوچستان پوسٹ ءَ گُشتگ کہ نادراھجاہ ءَ نھ مردمانی جون آرگ بیتگ اَنت کہ اِشانی تہءَ گیشترینانی دیم ھراب کنگ بیتگ اَنت۔

آئی ءَ جونانی پجارءِ درگت ءَ گُشتگ کہ لشکری واکداراں داں انگت جونانی چارگ ءِ پرمان نہ داتگ کہ اِشی سوب ءَ داں انگت جون پجارگ نہ بیتگ اَنت۔

وھدیکہ ھندی اھوالانی ردءَ بیڑءَ پد دو ھندی شپانک ھم بیگواہ اَنت کہ داں انگت آیانی درگت ءَ ھچ ھال نیست اِنت کہ آ لشکریانی دزگیری ءَ اَنت اگں بیران کنگ بیتگ اَنت۔

کاہان ءَ شمبے ءِ سھب ءَ پاکستانی پوج ءَ سیاہ کوہ ءُ کش ءُ کری دمگانی تہءَ پوجی بیڑ بندات کُتگ اَت۔ بیڑءِ بندات ڈرون ارشاں گوں کنگ بیتگ اَت کہ اِشی ءَ پد داں دو روچاں بالگردانی روگ آیگ برجاہ بیتگ۔

پاکستان پوج ءِ جارکش آئی ایس پی آر ءَ بیڑ راست کنان ءَ گُشتگ کہ بلوچ لبریشن آرمی ءِ نھ باسک جنگ ءُ سئے ٹپی ئیں جاوراں دزگیر کنگ ٹاہ داتگ اَت۔

بلوچ لبریشن آرمی ءَ داں انگت اے درگت ءَ ھچ پئیمیں درشاں شنگ نہ کُتگ۔

انسانی ھکانی باسک ءُ ایران ءِ سپریم لیڈر آیت اللہ علی خامنہ ای ءِ گوھارزتک فریدہ مراد خانی ایرانی واکداراں ایران ءِ سرکار ءَ’ کُشندہ گُشگ ءُ زھگانی جنوک ‘ ءِ پژدر ءَ یک تامرے ءِ شنگ کنگ ءَ دزگیر کرتگ-

ھال سرکنوکیں ادارہ اے ایف پی ءِ رد ءَ فریدہ مراد خانی ءِ برات مھمود مراد خانی ءَ اے گپ راست کرتگ ءُ ٹویٹ کتگ ءُ گوشتگ کہ آئی ءِ گوھار چار شمبے ءَ ھما وھد ءَ دزگیر کنگ بیتگ کہ آ گوشگ ءِ توار پرجنگ ءَ اسکیوٹر ءِ کارگس ءَ شتگ بیتگ-

فریدہ مراد خانی ءں سیادی خامنہ ای ءِ ٹک ءَ اِنت کہ ایران ءِ نیکراھی ءِ چیردستی ءِ بگیر داری ءَ کنگ ءَ اِنت-

فریدہ ءِ براف ءَ شمبے ءِ روچ ءَ یوٹیوب چینل ءَ یک تامربندے شنگ کتگ کہ چریشی ءَ ایران ءِ شھراں زراکیاں ایر جنگ ءُ کسے ءِ گام ءِ چست نہ کنگ ءِ پژدر ءَ میان اُستمانی برادری ءِ سر ءَ ایراد گرگ اِنت-

آئی ءِ گوشگ ات ’آجو دلیں مردم مئے ھمراھداری ءَ بہ کن ات‘ وتی سرکاراں بہ گوش اِت اے کشندہ ءُ زھگانی کشوکیں انتزامیہ ءِ پلامرزی ءَ بند بہ کن ات- اے رجیم وتی ھچ دودمانی رھبندانی پابند نہ اِنت تاکت ءَ ابید اشی ءِ گور ءَ ھچ نیست اِنت ءُ ھرچ ھساب ءَ وتی تاکت ءَ برجم دارگ لوٹ ایت-

دومی نیمگ ءَ ایران ءِ آمیدگس ءِ واکداراں یکشمبے ءِ روچ ءَ اے گپ راست کتگ کہ ایرانی ریپر توماج صالحی ءَ سرکار ءِ بگیر داروکیں زھرشانیانی پلامرزی ءِ سر ءَ “فساد فی الارض ” ءِ بھتام جتگ ءُ آئی ءِ سر ءَ مرگ ءِ سزا بیت اِنت-

زانگ بہ بیت آدینگ ءِ روچ ءَ ایرانی لشکر ءَ سیستان ءُ بلوچستان ءَ نمازءَ پد بیوکیں زھرشانی ءِ سر ءَ تیرگواری کتگ ات چریشی ءَ بازیں کچے ءَ مردم بیعان ءُ زدگ بیتگ ات اَنت-

ھال سرکنوکیں ادارہ روئٹرز ءِ رد ءَ ایران ءَ مھسا امینی ءِ بیرانی ءَ پد بیوکیں زھرشانیانی ھلاپ ءَ جاور ترند کتگ اَنت-

زھرشانی کنوکاں کردستان ءِ ھمگرنچی ءَ سرمیں ڈیھ ءَ زھرشانیانی جار جتگ ات ءُ ھمے وڑ ءَ سیستان ءُ بلوچستان ءِ سنی ٹولی ءَ زاھدان ءَ یک تامر بندے ءَ آدینگ ءِ روچ ءَ کردستان کردستان ءِ پلامرزی ءَ اوگام ءِ توار اشکنگ بنت-

تامرکاری ءِ سوجکار ابھیشک شرما گوش ایت بالی وڈ انڈسٹری راستین بوت نہ کنت-

ھندوستان ٹائمز ءِ رد ءَ سوجکار ابھیشک شرما ءَ بالی وڈ ءِ اسلی ءِ سر ءَ ایراد گران ءَ گوشتگ کہ ’بالی وڈ انڈسٹری ءَ راستین بوگ ءِ امیت ءَ چون داشت کن ئے وھدیکہ اشی ءِ نام (ھالی وڈ) ءَ چہ زیرگ بیتگ ‘-

ابھیشک شرما ءَ دیمتر ءَ گوشتگ کہ بالی وڈ یک اھوالکارے ءِ وشکندے بیت کنت چوشکہ آئی ءِ نام دراتکگ ءُ پد ءَ زبان ءَ چتگ ءُ نامان بوتگ شما چون اشی ءِ سر ءَ ستک داشت کن ئے اے اسلی یے؟ ھا چوش ما راستی ءَ یک شریں انڈسٹری ءَ ایں؟ مارا وت ءَ گچین ءُ پلگار کنگی اِنت وتی نپ ءُ ست یل کنگ ءُ یکجاہ بیگ ءُ شرین اندسٹری ءِ واستا جیڑگ لوٹ ایت-

آئی ءَ گوشتگ کہ بالی وڈ ءِ تامر گیشتر زرباری انڈیا ءِ تامرانی ساھگ ءَ دراتکگ ءُ اتکگ اَنت چریشی ءَ ھندی تامر انڈسٹری ءَ مھلوک ءِ نیمگ ءَ باز تژن ءُ شگانانی دیمپانی کنگ کپتگ-

بالی وڈ ءَ ھمود ءَ ریمیک تامرانی وھد ھلگ اِنت ھمود ءَ بازین وھداں ریمیک سوتانی رواج اِنت-

بالی وڈ تامراں کوھنین سوتانی سر ءَ پنجاپی سوت ریمیک دیگ بنت بلکیں انٹرنیشنل سوتاں ابید اجازت ءَ ریمیک دیگ بنت چریشی ءَ بالی وڈ چارٹ بسٹر ءَ باز آسر کپتگ-

ابھیشک شرما ءَ سال دوھزار ءُ دَہ ءَ سوجکار تامری ’تیرے بند لادن ‘ ءَ تامر میکنگے بنداتے کتگ ءُ آئی ءِ گڈی تامر ’رامو سیتو ‘ اِنت کہ آئی ءِ تہ ءَ اکشے کمار ءَ مزنین کردے پیلو کرتگ –

بلوچستان ءِ دوجتاجتائیں دمگ ھُزدار ءُ مستونگ ءِ دگ ءِ وئیلانی آسر ءَ سے مردم بیران ءُ سے ٹپی بیتگ اَنت-

کراچی شال ءِ بُنجاھی شھدگ ءِ سر ءَ دو جتائیں زمباد گاڑی وئیل آماچ بیتگ اَنت-

سربوتگیں ھالانی رِد ءَ بلوچستان ءِ ضلع پنجگور ءَ آؤکیں چہ تیل ءَ پُریں زمباد گاڑی ھُزدار ءِ دمگ وڈھ ءِ نزیک ءَ راہ درتکگ ءُ پُھل چیر ءَ کپتگ چریشی ءِ آسر ءَ سے مردم بیران بیتگ اَنت-

وڈھ وئیل ءَ بیران بیتگینانی تہ ءَ دو مردم ءِ پجّار نیاز احمد ء محمد اسلام ءُ محمد خان ساسولی نام ءَ چہ بیتگ اَنت-

دگہ یک وئیلے مستونگ ءِ دمگ جنگل کراس ءِ نزیک ءَ تُرند رؤکیں زمباد گاڑی ءُ کنٹینر ءِ میان ءَ ڈک وڑگ ءَ چہ سے مردم ٹپی بیتگ اَنت-

مستونگ انتزامیہ ءَ ٹپی نزیکیں نادُراھجاہ ءَ برتگ اَنت بلے تنی وھدے ٹپیانی پجّار نہ بیتگ –

زانگ بہ بیت کہ بلوچستان ءَ دگ وئیلانی سبب ءَ ھمکروچ مردم بیران ٹپی بنت اود ءَ گیشتر دگ وئیل شال کراچی نشینل ھائی وے سر ءَ بنت، دمگی سیاسی ءُ چاگردی پارٹیانی نیمگ ءَ چہ گیشتر وھداں شال کراچی بُنجاھی شھدگ ءَ ھوار دگہ شھدگاں دو کنگ ءِ لوٹ کتگ-

تامرکاری ءِ نامی ئیں کیاراویڈوانی ءُ سدھارتھ ملھوترا ءِ آروس ءِ ھال دامگی ءُ چاگردی ترامجاھاں گوستگیں بازیں ماھاں گندگ بوگ ءَ اِنت –

کیارا ایڈوانی ءُ سدھارتھ ملھوترا سال دوھزار ءُ بیست ءُ یک ءَ یکے دومی ءِ گون ءَ گندگ ءَ آیگ ءَ اَنت بلے اے ھردوکاں داں انگت ءَ وتی آروس ءِ بارو ءَ گڈی پیسلہ نا وتی کھولاں کتگ ءُ ناکہ چاگردی ترامجاھاں کرتگ –

یک شمبے ءِ روچ ءَ اکس ءُ تامر کاری ءِ شنگ جاہ انسٹاگرام ءَ کیارا ایڈوانی ءِ نیمگ ءَ یک تامرے پوسٹ کنگ بیتگ کہ اشی ءَ کیارا لج کنگ ءُ کندگ ءَ گندگ آیگ ءَ اِنت-

کیارا وتی پوسٹ ءَ نبشتہ کرتگ کہ نی اے گپ چیر دیگ نہ بیت اِنت باز زوت پیداک اِنت دو دسمبر ءَ –

https://www.instagram.com/reel/CldTbygg8F1/?igshid=MDJmNzVkMjY=

کیارا ایڈوانی ءِ اے پوسٹ ءَ پد چاگردی ترامجاھاں اے گپ ءِ سر ءَ باوست بوگ ءَ اِنت کہ کیارا ءُ سدھارتھ ملھوترا دو دسمبر ءَ آروس کنگ ءَ اَنت-

ٹائمز آف انڈیا ءِ رد ءَ کیارا ایڈوانی ءُ سدھارتھ ملھوترا ءِ تامر “شیرشاہ ” ءَ پد یکے دومی ءَ دوست دار ایت اِنت-

دومی نیمگ ءَ کیارا ایڈوانی ءِ اے پوسٹ ءِ سر ءَ انسٹاگرام ءَ کارمرد کنوکانی نیمگ ءَ گمانی گپ ھم جنگ ءَ اَنت –

زانگ بہ بیت کیارا ایڈوانی دسمبر ءَ وِکی کوشل ءِ گون ءَ نوکیں تامر “میرا نام گوندا “گندگ بیت اِنت ءُ ھمے وڑ سدھارتھ ملھوترا سال دوھزار ءُ بیست ءُ سَے ءَ آیوکیں “یودھا ءُ مِشن مجنون ” نامی ئیں تامرانی بنجاھی کرد ءَ پیلو کنگ ءَ اَنت-

دوحہ گتر ءَ برجاھیں فیفا ورلڈ کپ ءَ گوستگیں روچ ءَ ھشت ٹیمانی میان ءَ گوازی کنگ بوتگ کہ جاپان ، بلجئیم، کنیڈا ءَ گوازی نہ کٹ اِتگ وھدیکہ کوسٹا ریکا یکے، موراکو ءَ دو کروتیا ءَ چار گولاں گوازی کٹ انت ، دوشی شپ بوتگیں گوازی ءَ اسپین ءُ جرمنی دیمیگ بوتگ انت –

زیکیں بیگاہ ءَ احمد بن علی فٹبال پٹ بوتگیں اولی گوازی جاپان ءُ کوسٹا ریکا ءِ میان ءَ بوتگ کہ کوسٹا ریکا ءَ یک گولے ءَ گوازی کٹ اِتگ وھدیکہ جاپان ءِ نیمگ ءَ ھچ گول دیگ نہ بوتگ – کوسٹا ریکا ءِ نیمگ ءَ گول لیبی کے پلر ءَ گوازی ءِ ھشتاد ءُ یکمی ملٹ ءَ داتگ –

بیلجئیم ءُ موراکو ءِ میان ءَ بوتگیں دومی گوازی ءَ موراکو ءَ دو گولاں گوازی کٹ اِتگ وھدیکہ بیلجئیم ءِ نیمگ ءَ ھچ گول دیگ نہ بوتگ-

موراکو ءِ نیمگ ءَ ھردو گول دومی ھاپ ءَ دیگ بوتگ انت کہ آھانی تہ ءَ یک گول ءِ آر سیاس ءَ داتگ ءُ دومی گول زکریا ءَ گوازی ءِ گیشی ملٹانی تہ ءَ داتگ ءُ گوازی وتی ٹیم ءِ نام ءَ کُتگ –

خلیفہ فٹبال پٹ ءَ بوتگیں سیمی گوازی کروتیا ءُ کنیڈا ءِ میان ءَ بوتگ کہ کروتیا ءَ چار پہ یک گولے ءَ گوازی کٹ اِتگ –

گوازی ءِ اولی ھاپ ءِ دومی ملٹ ءَ کنیڈا ءِ لیبی الفونسو ءَ یک گول ءِ داتگ کہ پدا رند ءَ تاں گوازی ءَ گڈ سر ءَ چہ کنیڈا ءِ نیمگ ءَ ھچ گول دیگ نہ بوتگ وھدیکہ کروتیا ءِ نیمگ ءَ اولی گول اندریج ءَ سِی ءُ ششمی ملٹ ءَ داتگ ءُ پدا گوازی ءِ چِل ءُ چارمی ملٹ ءَ لیبی مارکو ءَ دومی گول داتگ ءُ گوازی ءِ دومی ھپتادمی ملٹ اندریج ءَ وتی دومی گول داتگ گوازی ءِ گیشی ملٹاں لیبی لورو میجر ءَ چارمی گول داتگ ءُ گوازی وتی ٹیم ءِ نام ءَ کتگ –

جرمنی ءُ اسپین ءِ میان ءَ بوتگیں چارمی گوازی دوشی چپ ال بیت فٹبال پٹ ءَ کنگ بوتگ کہ ھردو ٹیم یک یک گولے ءَ دیمیگ بوتگ انت –

جرمنی ءُ اسپین ءِ میان ءَ ھردو ٹیماں جوانیں گوازی پیش داشتگ – گوازی ءِ دومی ھاپ ءِ شست ءُ دومی ملٹ ءَ اسپین ءِ نیمگ ءَ اولی گول اسکور کنگ بوتگ ءُ جرمنی ءِ نیمگ ءَ ھشتاد ءُ سیمی ملٹ ءَ گول اسکور کنگ بوتگ ءُ پدا تاں گوازی ءِ گڈسر ءَ ھچ گول دیگ نہ بوتگ ءُ ھردو ٹیم دیمیگ بوتگ انت –

سر بیتگیں ھالانی رد ءَ روکپتی بلوچستان ءِ بنجاھی شھر دزاپ ءَ ایرانی آمیدگس ءِ ھکم ءَ دو مردم پاھو دیگ بیتگ اَنت-

گیشیں ھالانی رد ءَ دزاپ ءِ زندان ءَ بندیگیں یک مردمے پاھو دیگ بیتگ کہ آئی ءِ پجار بیست ءُ سَے سالی ئین زبیر زیرکاری براھوئی ء سراج الدین ءِ نام ءَ زانگ بیتگ-

زبیر نشہ ءِ بھتام ءَ ماں ایرانی چیریں ادارھاں گپتگ ءُ پد ءَ آئی ءِ سر ءِ پاھو اتکگ ءُ مروچی آئی ءِ سر ءَ پاھو اتکگ ءُ دیگ بیتگ –

زانگ بہ بیت گوستگیں روچ ءَ مھمد عیسیٰ زئی زاھدان ءِ زندان ءَ پاھو دیگ بیتگ ات-

اشی ءَ ھوار ھوار گوستگیں روچاں عارف کبدانی ھم زاھدان ءِ زندان ءَ پہ پاھو دیگ ءَ جتا کنگ بیتگ بلے تنی وھدی آئی ءِ پاھو ءِ ھال دیم ءَ نیتکگ –

30 ستمبر ءِ روچ تابیں روچ ءُ دزاپ ءِ مسیت ءِ سرپانی رِداں مردمانی جزبگ ءُ مولانا عبدالحمید اسماعیل زئی ءِ واز ءُ گپاں اندر ءِ ایرشتگیں جزبگ ودینت-

دومی نیمگ ءَ ڈن ءَ اوشتاتگیں ایرانی انکلاب ءِ سپاہ ءِ پاسداران ءِ کارمندانی پُرسلاھیں سینگ ءَ بستگیں تیر ءُ ما کمان ءَ زھیں توپک پہ نمازیاں سرپ ات اَنت ناگتی اود ءَ ھون ءِ ھار ءَ یکشلونکیں رچگے بندات کت-

اے ھما روچ اَت کہ اود ءَ ھشتاد ءَ گیش بلوچ نمازی ءُ لس مردم ایرانی سپاہ پاسداران انکلاب ءِ توپکانی دپاں اتک ءُ بیران بیت اَنت ھمے درچ ءَ سدانی کچ ءَ مردم زدگ ءُ زامبیل بیت اَنت نادراہ جاھانی روگ ءَ اود ءَ بہ گندے نادراہ کشیں گاڑی نیست اَت بلے اود ءَ دمگی مردماں وتی کمک ءَ وت ماں ٹپ ءُ ٹوریں مردمانی درمان کنگ ءَ وتی گاڑیاں سوار کرت ءُ نادراہ جاہ ءَ رسینت اَنت-

خدا نور لجئی ھما سدانی زدگ بیتگیں مردمانی تہ ءَ یک ورنایے اَت کہ آ سی ستمبر ءَ ایرانی انکلاب ءِ پاسداران ءِ سپاہ ءِ تیرانی آماچ بیتگ ات ءُ زدگ بیتگ اَت-

دو روچ گوزگ ءَ پد خدا نور لجئی ءَ ماں زاھدان ءِ نادراہ جاہ ءَ وتی ٹپ نہ سک اتگ ءُ بیران بیتگ اَت چہ وتی کھول ءَ سستگ اَت ءُ ابدمانی جاہ ءَ شتگ اَت-

اجکہ کنوکیں گپ اے جاہ ءَ کیت کہ خدا نور لجئی مرگ ءَ پیش بزانکہ جولائی ءِ ماہ ءَ ما یک ورنایے ءِ گون ءَ اڑ ءُ گُڑ ءَ دزگیر کنگ بیت انت ءُ پد ءَ ما زاھدان ءِ زندان ءَ کساس یک ماھے ءَ بندیگ بیت اِنت-

ھمے جاہ ءَ آ گرگ بیت گڑا پد ءَ آئی ءِ یک اجکہ کنوکیں اکسے ماں چاگردی رسانکجاھاں شنگ بیت اِنت آ ایرانی بیرک ءِ دار ءَ بستگ ءُ آئی ءِ دیم ءَ یک گلاسے آپ ایر اِنت-

ٹی بی پی ءَ یک سر بیتگیں ھالے ءِ رد ءَ خدا نور لجئی ءِ ھمے ساھت ءَ گرگ ءُ برگ بیتگ گڑا آئی ءَ ھمے زندانی وھد ءَ پہ تنگ ءِ پروشگ ءَ وتی تن ءِ پروش ءَ گلاسے آپ لوٹ اتگ گڑا آئی ءِ نگاھداری کنوکاں آ ھمے کساس ءَ زندانی کتگ کہ آئی ءِ دست بستگ ءُ گلاس ءِ آپ آئی ءِ دیم ءَ ایر کرتگ-

اے اکس ءِ شنگ بیگ ءُ آئی ءِ جھلانکی ءِ روگ ءَ ترا امام حسین ءِ کسہ الم یاتگری ءَ کاینت کہ خدا نور لجئی ھم ھمے کساس ءَ درد دیگ بیتگ کہ آپاں بہ گند ایت بلے وتی تن ءَ پروشت مہ کنت-

خدا نور ءِ سر ءَ ایرانی پاسداران ءِ انکلاب بھتام جن اَنت کہ آئی ءَ بازیں ٹولی جوڑ کرتگ ءُ ڈیھ ءِ ھلاپ ءَ پرکار اِنت بلے ایران ءِ جتگیں بھتام اد ءَ نیزور گندگ ءَ کیت ماھے ءَ پد خدا نور یل کنگ بیت اِنت ءُ پد ءَ آ چہ زندان ءَ آجو بیت اِنت-

کساس ھشتاد روچ ءِ گوزگ ءَ پد خدا نور دوبر ماں زاھدان ءَ بیتگیں زھرشانی ءَ ٹپی بیت ءُ پد ءَ دو روچانی تہ ءَ ما نادراہ جاہ ءَ بیران بیت اِنت-

خدا نور ءِ اے کس ءَ تھنا روکپتی بلوچستان ءِ مردماں سان نہ زرت بلکیں ھر ھما بلوچ کہ ما روکپتی بلوچستان ءَ بندوک اَنت ماں درانڈیھی اَنت ھم وتی نیمگ ءَ کش ات ءُ خدا نور لجئی ءِ دروشم آیانی دل ءُ چماں دوبر زندگ کت-

بزانکہ آئی ءِ سانمندی ءَ ڈنمارک ءُ دگہ دگہ ڈیھاں خدانور لجئی ءِ دروشم پیش کنگ بیت اَنت اشانی ھواری ءَ کردستان ءَ بندوکیں مردماں ھم خدا نور لجئی ءِ دروشم ءَ چہ سان زرت ءُ آئی ءِ دروشم ماں اکسی دروشم ءَ زھرشانیانی میان ءَ پیش کت اَنت-

خدا نور لجئی کَے اِنت؟

خدانور لجئی وتی کھول ءِ توک ءَ پت ءُ ماتانی یکیں بچکیں زھگ اِنت ءُ آ ما زاھدان ءِ نندوک اِنت آئی ءِ کھول ءَ پشکپتگیں مردمانی تہ ءَ یک گوھار ءُ ماتے ھست ات آئی ءِ پت ما گوست ءَ ناگتی بیران بیتگ اَت-

خدا نور لجئی ءِ پت نام عیسیٰ اِنت آ سال نوزدہ سد ءُ نود ءُ پنچ دو اکتوبر ءَ ماں زاھدان ءَ ودی بیتگ اَت ءُ سال دو ھزار ءُ بیست ءُ دو ءُ دو اکتوبر ءَ ماں زاھدان ءَ کشگ بیتگ ات-

خدا نور لجئی ءِ بیران بیگ ءَ پد آئی ءِ کھول ما دردمانیں زند ءِ آماچ بیت اَنت آئی ءِ ماس ءُ گوھار ھردوک دلپٹی ءِ نادراھی ءُ گور جت اَنت-

ھالانی تہ ءَ اے گوشگ بیتگ کہ گوستگیں روچ ءَ آئی ءِ گوھار ءَ خدا نور لجئی ءِ بیرانی ءِ درد نہ سگ اتگ ءُ بیران بیتگ ءُ آئی ءِ مات انگت ءَ نادراہ جاہ ءَ اِنت-

خدا نور لجئی ءَ وتی ازم ماں شائری ءُ دیواناں گشندھی دروشم ءَ ھم پیش کتگ آئی ءِ شَئیر ءُ گپاں ھما مردم سانمند کتگ اَنت کہ چریشی ءَ مردماں خدا نور لجئی تھنا یک مردمے نہ زاننتگ بلکیں آ یک سرجمیں سنچ داریں مردمے لیک اتگ-

نی اے اکس ءُ آئی ءِ دروشم خدا نور لجئی ءَ ھر ھما مردم ءَ یک سکینے ءِ دروشم ءَ پیش کنگ ءَ اَنت کہ چریشی ءَ چہ بازیں زھرشانیاں خدا نور ءِ کسہ لیکگ بنت-