TBP Balochi

بلوچستان ءِ دمگ کیچ کولواہ ءَ مروچی بوتگیں آپریشن ءَ بلوچ سلاہ ءُ دگہ مردمانی جانی تاوان ھال انت –
آپریشن کولواہ ءِ دمگ شاپکول ءُ پارگ ءِ نزیکیں کوھی دمگاں کنگ بوتگ کہ اودا ڈرون اُرش ءَ پد جنگی بالگرداں ھم لشکر کشی ءَ بھر زرتگ –

اھوالکار ءِ رِد ءَ لشکر کشی ءَ جنگی بالگرداں ھوار بازیں ڈرون بالگرداں ھم گون بوتگ انت ءُ بازیں جاھاں شیلنگ ءُ بمبگواری کنگ بوتگ وھدیکہ لشکر کشی ھنگت برجاہ انت –

پاکستانی پوج آئ ایس پی آر ءَ رسانکدراں وتی شنگ کرتگیں درشانے ءَ کیچ ءِ دمگ ھوشاپ ءَ لشکر کشی ءِ میان ءَ دہ مردمانی کوش ءِ ٹاہ داتگ –

آئی ایس پی آر ءَ وتی درشان ءِ تہ ءَ ٹاہ داتگ گوشتگ کہ بلوچستان ءِ دمگ ھوشاپ ءَ سلاہ بندیں مردمانی ھال آھاں سر بوتگ ءُ لشکر کشی کُتگ گڈا سلاہ بندیں مردماں تیرگواری بندات کُتگ پسوئی تیرگواری ءَ دھ سلاہ بندیں مردم جنگ بوتگ انت دو سلاہ بندیں مردم تتکگ انت – پاکستانی پوج ءَ جنگ بوتگیں مردمانی گور ءَ سلاھانی دستیگ کنگ ءِ ٹاہ ھم داتگ –

جارکش ءِ رِد ءَ جنگ بوتگیں مردمانی پھازگی لشکر، m8 دگ ءُ کوسٹل شھدگ ءِ سر ءَ بوتگیں اُرشاں دست مان بوتگ –

تنی وھدی سلاہ بندیں گلانی نیمگ ءَ ھچ وڈیں درشان دیگ نہ بوتگ ءُ ناکہ دمگی اھوالکاراں اے ھبر راست کُتگ کہ اے اُرش ھماھانی اوتاک ءِ سر ءَ کنگ بوتگ یاکہ ناں اے لس مردم انت کہ دروگیں میڑ ءَ جنگ بوتگ انت –

سر بیتگیں ھالانی رد ءَ روکپتی بلوچستان ءِ دو جتا جتائیں جاھاں زھگے ءَ آوار دو مردم بیران بیتگ اَنت-

گیشیں ھالانی رد ءَ روکپتی بلوچستان ءِ دمگ چھبار ءَ ھوٹک ءَ یک سَے سالی زھگے کپتگ ءُ بیران بیتگ –

بیران بیتگیں زھگ ءِ پجار سُھیب مھین کہ آئی ءِ اُمر سَے سال گوشگ بوگ ءَ اِنت کہ آ ھوٹگ ءَ کپتگ ءُ بیران بیتگ-

وئیل چھبار ءِ دمگ سیدبار میتگ بخش پلان ءَ پیش اتکگ – اے وڑیں وئیل گوست ءَ ھم پیش اتکگ اَنت کہ اود ءَ کسان سالیں زھگ آپ ءَ کپتگ ءُ بیران بیتگ اَنت-

اے ھوٹگ گیشتر مردمانی واستا سرکار ءَ جتگ اَنت کہ اود ءَ سالانی سر ءَ ھور ءِ گوارگ ءُ پد ءَ آپانی مُچ کنگ ءَ کارمرد کنگ بنت بلے ھوٹگانی سر ءَ ھاسین گامگیج ءِ نہ بوگ ءَ بازین زھگے مرگ ءِ آماچ بیان اَنت-

گوستگیں سال ءَ چہ انیگ ءَ سِی ءُ ھپت زھگ ماں روکپتی بلوچستان ءَ آپاں کپتگ ءُ بیران بیتگ اَنت کہ اشانی توک ءَ بیست ءُ یک زھگ تھنا ھوٹگانی ھرجان بیتگ ءُ بیران بیتگ اَنت-

ھمے وڑ ءَ دگہ یک تیرگواری وئیلے ءَ عالم دینے بیران بیتگ-

بیران بیتگین مردم ءِ پجار حافظ کریم بخش سپاھی ءِ نام ءَ زانگ بیتگ کہ مھرستان ءِ ھند کوران ءَ تیرباران کنگ ءُ کشگ بیتگ-

کوش ءِ سبب زانگ نہ بیتگ ءُ کوشکار وئیل ءَ پد تتکگ ءُ شتگ اَنت، تیرگواری ھما وھد ءَ کنگ بیتگ کہ گوستگیں شپ ءَ عشاء نماز ءَ پد مسیت واتر دراتکگ ءُ روگ ءَ بیتگ-

تفتان ءُ زاھدان ءَ ایرانی لشکر ءَ سَے کس آوار جنگ ءَ پد بیگواہ کنگ بیتگ اَنت-

سر بیتگیں ھالانی رد ءَ روکپتی بلوچستان ءِ دمگ تفتان ءَ ایرانی لشکر ءَ یک لوگے ءِ سر ءَ بیڑ برتگ ءُ اود ءَ دو کس آوار جنگ ءَ پد بیگواہ کنگ بیتگ اَنت-

آوار جنگ بیتگیں مردمانی پجار ادریس عالیزئی ءُ فرامرز عالیزئی ءِ ناماں زانگ بیتگ اَنت-

ھالانی رد ءَ گوشگ بیتگ کہ اود ءَ بازیں آوار جنگ بیتگ اَنت بلے تنی وھدی آیانی پجار زانگ نہ بیتگ اَنت-

ھمے وڑ ءَ زاھدان ءَ ھم یک مردمے آوار جنگ ءَ پد بیگواہ کنگ بیتگ اَنت-

آوار جنگ بیتگیں مردم ءِ پجار اسماعیل نورزئی ء ابراھیم نام ءَ زانگ بیتگ اَنت –

ھالانی تہ ءَ گوشگ بیتگ اسماعیل دو روچ پیش آوار جنگ بیتگ ءُ چریشی ءَ پد آئی ءِ درگت ءَ ھچ ھال نہ بیتگ –

زانگ بہ بیت روکپتی بلوچستان ءَ مردمانی آوار جنیانی درچ یکشل ءَ برجاہ اَنت- اے بیگواھیانی نوکیں درچ گوستگیں سِی ستمبر ءَ زھرشانی ءَ پد اود ءَ مردمانی آوار جنیانی تہ ءَ گیشی گندگ ءَ آیگ ءَ اَنت-

بلوچی زبان ءُ لبزانک ءِ نامداریں ندکار ءُ لچّہ کار عابد آسکانی ءِ تَژن ءُ گوشکندانی کُلیات چہ ربیدان شنگکار ءِ نیمگ ءَ چاپ ءُ شنگ بوتگ-

تژن ءُ گوشکندانی کلیات یک ھزار ءُ یکسد تاکدیم ءَ چہ گیش اِنت ءُ ایشی ءِ تہ ءَ عابد آسکانی ءِ شش تژن ءُ گوشکندی دپتر کہ پیسر ءَ جتا جتائیں وھدانی تہ ءَ چاپ ءُ شنگ بوتگ اَنت، یکجا آوار اَنت-

وتی نوکتریں کتاب تژن ءُ گوشکندانی کلیات ءِ درگت ءَ عابد آسکانی گوں دی بلوچستان پوسٹ ءِ اھوالکار ءِ گوم ءَ تران کنان ءَ کہ من ءَ چِل سال ءَ گیش اِنت کہ من وتی بستار ءَ وتی ماتی زبان ءِ ھزمت ءَ گلائیشاں اے درگت ءَ منی کم ءُ گیش بیست کتاب ءُ بازیں نبشتانکے لبزانکی دنیا ءَ چاپ ءُ شنگ بوتگ –

آئی ءَ گوشت کہ البتہ منی درستیں کتاب رودراتکی بلوچستان ءَ شنگ بوتگ انت، رند ءَ چاگردی جاور نگیگ بوتگ انت پمشکا آ دست ءَ کتابانی چاپ شنگ ءُ پد ءَ اے دست ءَ آرگ ءَ پہ من ءَ سک گران بوت گڑا منی دوزواھیں ھمبلاں من ءَ ھمے شور دات کہ من وتی کتاباں روایرشتی بلوچستان ءَ چاپ ءُ شنگ بہ کناں کہ چہ سیمرانی دلسیاھی ءَ گر ءُ چِل ءَ رکّ آں – گڑا من ءَ آھانی اے سوج دوست بوت انت گڑا تاں انوگ ءَ بزاں دوھزار ءُ بیست ءُ دو ءَ چہ تھران ءَ منی پنچ کتاب چاپ ءُ شنگ بیتگ انت –

عابد آسکانی ءَ دیمتر ءَ گُشت کہ چہ اے کتاباں یکے میر جنگی ءُ میر زنگی کہ آ فارسی زبان ءَ ترینگ بوتگ دومی بلوچ ،بلوچی ءُ بلوچستان ، سیمی بے لٹکیں براک (تنزی) کتاب یے، چارمی دل گریت ءُ دپ کند ایت ءُ منی پنچمی کتاب تژن ءُ گوشکندانی کلیات انت کہ اے ھزار تاکدیم ءَ گیش انت – اے رد ءَ وشیں گپ اش انت کہ منی اے کتاب گوں مجوز بزاں ڈکلئریشن ءَ شنگ ءُ تالان بوتگ –

آئی ءَ گوں اھوالکار ءَ گشت کہ اے کتاباں ابید منی دگہ سَے کلیات انگت پہ چاپ ءَ جریدگ انت – آئی ءَ گشت کہ منی مستریں کلیات دستونک ءُ گزلانی انت کہ آ ھزار ءُ پنچ سد تاکدیم بیت انت انشاء اللہ اشی ءَ ھم ھدا یک درے پچ کنت –

آئی ءَ گشت کہ منی اے ھر پنچیں کتاب چہ شمے ھمبلانی مدت ءُ کمک ءَ چاپ ءُ شنگ بوتگ انت منی ھچ گمان ءَ نہ بوتگ کہ منی اے کتاب اے پیم ءَ چاپ بنت –

عابد آسکانی ءَ گڈسر ءَ کلیں وانوکانی منت گپت ءُ گُشت کہ ھاسکر من چہ ادا بزاں روکپتی بلوچستان ءِ حاجی گلام حیدر خضوری، واجہ محمد پھرئی، واجہ پروفیسر عبدالحمید ءُ واجہ میرین آسکانی ءَ ھوار کلیں برات ءُ گھارانی ھمکوپگی ءُ جھدانی باز منت واراں –

برطانیہ ءِ سروزیر رشی سوناک ءَ گوشتگ کہ چین ءِ گون ءَ سیادیانی نام گپتیں “سنھرا دور ” وھد ھلاس بیتگ-

برطانیہ ءِ ھال سرکنوکیں ادارہ روئٹرز ءِ رد ءَ بنداتی ڈنی پالیسی ءِ بارو ءَ رشی سوناک ءَ گوشتگ ’ چین ءِ درگت ءَ برطانیہ ءَ وتی گامگیج مٹ کنگ لوٹ اَنت ءُ بیجنگ پہ زانت ریاستی تاکت ءَ کارمرد کنگ ءَ میان اُستمانی پھناتانی کساس ءَ وت ءَ کنگ اِنت-

آئی ءَ گوشتگ کہ ما اے گپ ءَ پدر کنگ لوٹ ایں کہ نام گپتگیں سیادی کہ آئی ءِ توک ءَ زرکاری ءُ چاگردی ءُ سیاسی پھنات سستگ اَنت نی ھلاس اِنت-

رشی سوناک ءَ کنزرویٹو پاٹی ءِ لھتے باسکانی سر ءَ ایراد گپتگ – گوستگیں سال ءَ بستار وزیر ھزانہ آئی ءَ بند ساچیانی گیش کنگ ءِ ھواری ءَ انسانی ھکانی ناوشیں جاورانی چین ءَ را یک گامگیج زورگ کڈن کرتگ ات- بلے سوناک ءُ چین ءِ سروک شی جن پنگ ءِ میان ءَ ھمے ماہ ءَ بالی ءَ بیوکیں بیست ڈیھی سروگانی نیاد ءِ وھد ءَ بیوکیں گند ءُ نند نہ بیتگ ات –

گوستگیں ھپتگ ءَ لندن ءَ سرکار ءِ گچینی ماڑیاں چینی سکیورٹی کیمراھانی سر ءَ بندش جنگ بیتگ ات-

رشی سوناک ءَ برطانیہ ءِ نامی ئیں ھال شنگ کنوکیں ادارہ بی بی سی ءِ یک درشانے ءِ درور دیان ءَ گوشتگ ات کہ یک اھوالکارے ءِ سر ءَ چینی پولیس ءَ اُرش کرتگ –

آئی ءَ گوشتگ کہ ما اشی ءَ منیں چین مئے مٹ نہ اِنت ءُ چین ءِ لوٹ مئے بگیر ءَ اَنت-

برطانیہ ءِ سر وزیر ءَ گشتگ کہ اے راستی یے میان اُستمانی جیڑہ میان اُستمانی رھبند یا مولمانی مٹ ءَ بدل ءِ وڑیں جیڑھاں چین ءِ بستار ڈالچار کنگ نہ بیت، امریکہ، کینیڈا، آسٹریلیا، جاپان ءُ بازیں دگہ مردم آئی ءَ سرپد بنت-

برطانیہ ءِ سروزیر ءَ یوکرین ءِ درگت ءَ گوشتگ کہ سرکار ءِ گوستگیں سروزیر بورس جانسن ءُ لزٹرس ءِ پلامرزی ءَ سرجم کنت ءُ نوکیں سال ءَ کیئف ءِ لشکری کمک ءَ برجاہ دار ایت-

آئی ءَ گوشتگ کہ اشی ءَ ھچ شک نیست ھمینکس وھد لگ ایت ما یوکرین ءِ گون ءَ ھمراہدار اِنت ما آیوکیں سال ءَ ھم وتی کمک ءَ برجاہ داریں ءُ اگاں گیش کنگ کپت گیش کنگ بیت اِنت-

رشی سوناک ءَ گوشتگ کہ برطانیہ ءَ ھما کوھنیں گامگیج زرتگ اَنت آیاں دار ایت ءُ اگاں گیش اژدری بیت کنت ءُ ما روس ءُ چین ءِ بگیری ءَ برجاہ داریں –

گوستگیں روچاں اے گپ چَر چَر بیگ ءَ اِنت کساس پنجاہ کروڑ واٹس ایپ کارمرد کنوکانی موبائل نمبر ھیک کنگ بیتگ ءُ بھا کنگ ءَ پیش کنگ بیتگ اَنت بلے واٹس ایپ ءَ اے گپ رد کرتگ –

انڈین روتاک ھندوستان ٹائمز ءِ رد ءَ میسیجنگ ایپ واٹس ایپ ءَ یک درشانے شنگ کتگ ءُ گوشتگ کہ ’ سائبر نیوز ءِ نیمگ ءَ داتگیں ٹاہ ردیں اسکرین شاٹ اَنت – چہ واٹس ایپ ڈیٹا ءِ شنگ کنگ ءِ ھچ راستی نیست اِنت ‘-

کارمرد کنوکانی موبائل پون نمبرانی ڈیٹا بیس ءِ شنگ بیگ ءِ ھال درستاں پیش سائبر نیوز ءَ شنگ کرتگ- رپورٹ ءِ رد ءَ ڈیٹا بیس ءَ ھشتاد ءُ چار ڈیھانی واٹس ایپ کارمرد کنوکانی موبائل نمبر ھوار اَنت کہ اشانی توک ءَ اٹلی، برطانیہ، امریکہ، روس، فرانس ءُ سعودی عرب ھوار اَنت-

امریکہ ءِ سَے کروڑ بیست لَک، اٹلی ءِ سَے کروڑ، برطانیہ یک کروڑ ءُ دَہ لک ءُ یک کروڑے روسی کارمرد کنوکانی ڈیٹا ءِ شنگ بیگ ھوار اَنت-

رپورٹ ءِ رد ءَ اے گوشگ نہ بیتگ واٹس ایپ ءَ کروڑانی کارمرد کنوکانی پون نمبر کجا چہ شنگ بیتگ اَنت-

رپورٹ ءَ گوشگ بیتگ ھیکرز ءَ گمانی ءَ اسکریپنگ نامیں کارمردیں رنگے ءَ کامرد کرتگ ءُ چریشی ءَ ویب سائٹس ءِ ڈیٹا یکجاہ کتگ اَنت-

واٹس ایپ ءِ گوشگ اِنت کہ’ اے ردیں یکجا کتگیں پون نمبر اَنت نانکہ اے واٹس ایپ ءِ کارمرد کنوکانی سرپدی اَنت‘-

سائبر نیوز ءَ اے ردی پد ءَ شنگ کرتگ کہ واٹس ایپ ءَ ڈیٹا ھیک یا شنگ بیگ ءِ ھچ راستی نیست اِنت-

چوشکہ اے ڈیٹا تچک ءَ واٹس ایپ ءَ چہ شنگ نہ بیتگ اَنت بلکیں ھیکرز ءَ ویب پیجز ءَ کساس پنجاہ کروڑ پون نمبر اَنت یکجاہ کنگ بیتگ اَنت اے وٹس ایپ ءَ کارمرد بوگ ءَ اَنت پد ءَ اے ڈیٹا بیس ءَ بھا کنگ ءَ پیش کنگ بیتگ اَنت-

پبلیکیشن ءِ چیف ایڈیٹر ءَ ٹویٹ ءَ نبشتہ کرتگ اے گپ ءِ ھچ منانک نیست اِنت واٹس ایپ ھیک کنگ بیتگ –

دوحہ قطر ءَ فیفا ورلڈ کپ ءِ گوازی برجاہ ، گوستگیں روچ ءَ قطر ءِ جتا جتائیں پٹاں ھشت ٹیمانی میان ءَ گوازی کنگ بوتگ کہ آھانی تہ ءَ گھانا ءَ ساؤتھ کوریا ءِ دیم ءَ سَے پہ دو، برازیل ءَ سویزلینڈ ءِ دیم ءَ یکے، پرتگال ءَ یوراگوائے دیم ءَ دو گولاں گوازی کٹ اِتگ انت وھدیکہ سربیا ءُ کیمرون سَے سَے گول ءَ دیمگ بوتگ انت –

الجنوب فٹبال پٹ ءَ بوتگیں اولی گوازی سربیا ءُ کیمرون ءِ میان ءَ بوتگ کہ ھردو ٹیم سَے سَے گول ءَ دیمیگ بوتگ انت –

گوازی ءِ اولی ھاپ ءِ بیست ءُ نھمی ملٹ ءَ کیمرون ءِ نیمگ ءَ اولی گول دیگ بوتگ کہ لیبی جے – کیسٹیلیٹو ءَ داتگ ءُ سربیا ءِ نیمگ ءَ اولی گول اولی ھاپ ءِ گیشیں ملٹانی تہ ءَ دیگ بوتگ – دومی ھاپ ءَ ھردو ٹیمانی نیمگ ءَ جوانیں گوازی پیش دارگ بوتگ ءُ ھردو ٹیما دومی ھاپ ءَ دو دو گول داتگ ءُ دیمیگ بوتگ انت –

ایجوکیشن سٹی فٹبال پٹ ءَ بوتگیں دومی گوازی گھانا ءُ ساؤتھ کوریا ءِ میان ءَ بوتگ کہ گھانا ءَ ساؤتھ کوریا ءِ دیم ءَ سَے گولاں گوازی کٹ اِتگ وھدیکی ساؤتھ کوریا نیمگ ءَ دو گول دیگ بوتگ کہ ھردو گول لیبی جی-چو ءَ داتگ انت –

سیمی گوازی راس ابو عبود فٹبال پٹ ءَ برازیل ءُ سویزر لینڈ ءِ میان ءَ بوتگ کہ برازیل ءَ یک گولے ءَ گوازی کٹ اِتگ -وھدیکہ سویزر لینڈ ءِ نیمگ ءَ ھچ گول دیگ نہ بوتگ ءُ برازیل ءِ لیبی کسمیرو ءَ گوازی ءِ ھشتاد ءُ سیمی ملٹ گول داتگ ءُ گوازی وتی ٹیم نام ءَ کتگ –

دوشی شپ بوتگیں چارمی گوازی پرتگال ءُ یوراگوائے ءِ میان ءَ بوتگ کہ پرتگال ءَ دو گولاں چہ یوراگوائے ءَ گوازی کٹ اِتگ –

پرتگال ءِ نیمگ ءَ ھردو گول برونو ءَ داتگ انت کہ آئی ءَ یک گولے گوازی ءِ دومی ھاپ ءَ پنجاہ ءُ چارمی ملٹ ءَ داتگ ءُ دومی گول پیلانٹی شوٹ ءَ گوازی ءِ گیشی ملٹانی تہ داتگ انت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، وی بی ایم پی ءِ شال پریس کلب ءِ دیم ءَ برجاھیں زھرشانی بنجل ءَ مروچی چار ھزار ءُ ھشت سد ءُ ھپتاد ءُ چار روچ سرجم بوتگ انت –

مروچی بی ایس او پجار ءِ سرکماش زبیر بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ اقوام متھدہ ءُ دگہ میان استمانی ادارہ پاکستان ءَ بلوچستان ءِ تہ ءَ کتگیں زوراکیانی بگیری ءَ بلوٹائین انت ءُ چہ آئی ءَ پسو بہ لوٹاں وتی پرز ءَ پیلو بہ کن انت –

آئی ءَ گوشتگ کہ اقوام متھدہ ءِ یک باسک ءِ پاکستان ءِ دروشم ءَ زلم زوراکی کنگ ءَ لڑ ءِ تہ ءَ اولی انت –

آئی ءَ گوشتگ کہ مروچی بلوچ بازیں دوری ءُ گستایاں ابید ھم میان استمان ءَ وتی پجار ءِ کنائینتگ – اشی ءِ تہ ءَ ھچ شک نیست کہ اے بیگواھیں مردم ءُ شھیدانی دیمھونیانی برورد انت –

ماما قدیر بلوچ ءَ گوشتگ کہ مروچی بلوچ ءَ پاکستان ءِ درسیں اڈاند یکر کتگ ءُ میان استمان ءُ دگہ راج وتی نیمگ ءَ دلگوش کنائینتگ انت دومی نیمگ ءَ ھنچوش ھم سما بیت کہ گستائی ودان انت بے باوری انت –

ماما قدیر بلوچ ءَ گوشتگ کہ بلوچ راج مروچی جنگ ءِ جاوراں گوں گوزگ انت – بلوچ ورنایانی ژانگولیں جونانی چگل دیگ، کشندہ ٹولیانی دست ءَ ورنایانی کوش ءُ بیگواھیں مردمانی کھولانی گِساں بیڑ برگ – زورانسری آوار جنیانی بگیری ءَ نشتگیں مردماں بیھار دیگ ءُ ترسینگ ھمک روچی کارے جوڈ بوتگ –

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں بلوچستان ءِ دمگ تمپ گومازی ءَ پاکستانی پوج ءِ بنجل ءِ سر ءَ اُرش کُتگ –

اُرش گومازی ءِ توکی بازار ءَ نمیرانیں کپٹن جھانگیر بلوچ ءِ گِس ءِ سر ءَ برجاھیں پوجی پانگس ءِ سر ءَ کنگ بوتگ ءُ چریشی پوج ءَ جانی تاوان ءِ دیمپانی کنگ کپتگ –

دومی نیمگ ءَ مروچی بلیدہ ءِ دمگ ڈمبانی کور ءَ ایف ڈبلیو او ءِ کارمندانی سر ءَ گوں تراکناکیں شورواں اُرش کنگ بوتگ – اُرش ءَ ایف ڈبلیو او ءِ سَے کارمند زدگ بوتگ- ایف ڈبلیو او ءُ گومازی ءَ پاکستانی پوج ءِ سر ءَ بوتگیں ھردو اُرشانی زمّہ واری بلوچ آجوئی لوٹولیں سلاہ بندیں گل بی ایل ایف ءَ منّ اِتگ انت –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کُتگیں درشان ءِ تہ ءَ ھردو اُرشانی زمّہ واری منّ اِتگ ءُ گوشتگ کہ سرمچاراں کیچ ءِ دمگ گومازی ءَ بیست ءُ ھپت نومبر ءِ شپ ءَ پاکستانی پوج ءِ پانگس ءِ سر ءَ اے ون ءِ گولہ آس داتگ کہ آ وتی نشانگ ءَ کپتگ اَنت-

آئی ءَ گوشتگ کہ اے پانگس پاکستانی پوج ءَ نمیرانیں جھانگیر ءِ گِس ءُ چار دیوالی دستیگ کُتگ اَنت ءُ ھمدا وتی پانگس کتگ ءُ نشتگ، نوں اے پانگس ءِ تہ ءَ پاکستانی پوج دگہ سنگر بندگ ءَ بیتگ کہ ھمے وھد ءَ سرمچاراں اُرش کُتگ ءُ پوج ءَ جانی ءُ مالی تاوان داتگ-

جارکش میجر گوھرام بلوچ ءَ دیمتر ءَ وتی درشان ءِ تہ ءَ گوشتگ کہ سرمچاراں کیچ ءِ دمگ بُلیدہ ءَ مرچی سھب ءِ ادار ھشت ءَ دمبانی کور ءَ ایف ڈبلیو او ءِ مشین ءُ کارمند تراکناکیں شورانی نشانگ کتگ انت چریشی ءَ دژمن ریاست ءِ ھاتر ءَ کارکنوکیں سَے مردم زدگ بوتگ انت –

جارکش گوشتگ کہ گَل ءَ پیش ءَ ھم ٹیکدار مکن کتگ اَنت کہ آ زورگیریں پوج ءِ کمکاری ءُ چہ آئی ءِ شرکتاں دور بہ بنت اگاں نہ گڈا وتی جانی ءُ مالی تاوان ءِ زمہ وار وت اَنت – آئی ءَ گوشتگ کہ ما یکرندے پدا گوں دمگی مردماں لوٹ کن ایں کہ آ اے زورگیر ءُ ریاست ءِ چیردستی ءَ کارکنوکیں مردمانی ھاتر ءَ کار کنگ ءَ پھریز بہ کن انت –

سر بیتگیں ھالانی رد ءَ روکپتی بلوچستان ءِ جتا جتائیں زنداناں ایرانی آمیدگس ءِ ھکم ءَ نُھ کس پاھو دیگ بیتگ اَنت-

نُھیں مردمانی تہ ءَ شش مردمانی پجار زانگ بیتگ اَنت کہ آیانی پجار عبداللہ صلاح زئی ء آدم جھمنند کسرکند، جما عمرزئی، ناصر عمرزئی انو شیروانی، نیاز جدگال ء نور مھمد ءُ چنگیز گورگیج ء غفور ءِ ناماں زانگ بیتگ اَنت-

اشانی توک ءَ جما ءُ ناصر ھردوک برات اَنت ماں زاھدان ءِ زندان ءَ نشہ باپاری ءِ بھتام ءَ پاھو دیگ بیتگ اَنت اشانی ھواری ءَ دگہ سَے مردم زاھدان ءِ زندان ءَ پاھو دیگ بیتگ اَنت کہ آیانی پجار دیم ءَ نیتکگ اَنت-

ھالانی تہ ءَ گوشگ بیتگ کہ عبداللہ صلاح زئی ایرانشھر ءِ زندان ءَ پاھو دیگ بیتگ کہ آ کساس دوازدہ سال پیش ماں وتی لوگ ءَ گرگ ءُ برگ بیتگ-

آئی ءِ سر ءَ نشہ باپاری، ناشرین گلانی بھتاماں ھوار ھوار دگہ بھتام جنگ بیتگ اَنت –

ھالانی تہ ءَ گوشگ بیتگ کہ آئی ءَ وتی سپائی ءِ واستا باز برا آمیدگس ءَ دزبندی کتگ بلے آئی ءِ گپ گوشدارگ نہ بیتگ-

ھمے وڑ ءَ چھبار ءِ زندان ءَ نیاز جدگال پاھو دیگ بیتگ کہ آ ایرانی سال نود ءَ کوشے ءِ بھتام ءَ گرگ بیتگ یازدہ سال ءِ زندان ءَ پد آ گوستگیں روچ ءَ پاھو دیگ بیتگ-

ھمے وڑ ءَ چنگیز سَے سال ءَ پیش ماں زابل ءَ نشہ باپاری ءِ بھتام ءَ گرگ بیتگ ءُ گوستگیں روچ ءَ پاھو دیگ بیتگ-

زانگ بہ بیت تو ھپتگانی تہ ءَ سیزدہ مردم پاھو دیگ بیتگ اَنت آ جتا جتا بھتامانی نام ءَ گرگ ءُ پاھو دیگ بیتگ اَنت-