TBP Balochi

بلوچستان ءِ بنجاھی شھر شال ءَ زورانسری آوار جنگ بوتگیں مردمانی پانکجنیں گل وائس فار بلوچ مسنگ پرسنز ءِ زھرشانی شال پریس کلب ءِ دیما برجاہ، زھرشانی بنجل ءَ مروچی چار ھزار ءُ ھشت سد ءُ ھپتاد ءُشش روچ سرجم بوتگ انت – کہ مروچی ھر تک ءُ پھناتاں سیادی داروکیں مردماں بنجل ءَ اتکگ ءُ دلپدردی درشان اِتگ –

بیست ءُ چار مارچ سال دوھزار سینزدہ ءَ دارو ہوٹل حب چوکی پاکستانی پوج ءِ دست ءَ زورانسری آوار جنگ بوتگیں عبدالوہاب ء محمد ہاشم ءِ کھول ءَمروچی بنجل ءَ اتکگ ءُ زھرشانی ءَ بھر زرتگ ءُ وتی زھرشانی نبشتہ کنائینتگ ءُ عبدالوہاب ءِ آوار جنی ءِ سرجمیں ھال گل ءِ گور ءَ نبشتہ کنائین اِتگ انت –

آئی ءَ گوشتگ کہ عبدالوہاب ءَ بازیں وھدے بیت کہ بیگواہ انت ریاست ادارہ آئی ءَ دیما بیار انت –

گل ءِ کمک سرکماش ماما قدیر بلوچ ءَ گوشتگ کہ بلوچستان ءَ زورانسری آوار جنگ بوتگیں مردمانی دراجیں لڑ یے، بیگواھیں مردمانی کھول ءَ ادے آیگ ءُ سر بوگ ءَ بازیں اڈوجنجالی دیمپانی کنگ کپگ انت وھدیکہ دلاراں بازیں کھول ءِ ترسینتگ ءُ ادے آیگ ءَ داشتگ انت –

آئی ءَ گوشتگ کہ سیاسی، چاگردی ءُ نودربر گل بیگواھیں مردمانی کھول ءِ ھمراہ داری ءَ بکن انت ءُ کھول دیم ءَ بیا انت ءُ وتی زھرشانی ءَ نبشتہ بہ کنائین انت –

اُستان فارس ءَ ایرانی لشکر ءَ تیرگواری کنان ءَ یک مردمے کُشتگ-

سر بیتگیں ھالانی رد ءَ ایرانی لشکر ءَ ایران ءِ اُستان فارس ءِ ھند لار ءَ یک بلوچے ءِ سر ءَ تیرگواری کرتگ ءُ کشتگ –

کشگ بیتگیں مردم ءِ پجار آرش شیخ علی زادہ ء ابن علی جھمنند چاہ علی توابع بخش بنجاھی شھرستان رودبار زرباری اُستان کرمان ءِ جھمنند گوشگ بوگ ءَ اِنت-

ھالانی تہ ءَ گوشگ بیتگ کہ آرش وتی گاڑی ءَ گوں راہ ءَ روگ ءَ بیتگ کہ ایرانی لشکر ءَ آئی ءِ سر ءَ تیرگواری کرتگ ءُ کُشتگ –

ھالانی تہ ءَ گوشگ بوگ ءَ اِنت کہ ایرانی لشکر ءَ ابید ءِ دست دیگ ءُ ابید ءِ دارگ ءَ آئی ءِ سر ءَ توپکانی دپ پچ کتگ ءُ گاڑی ءِ سر ءَ تیرگواری کتگ ءُ کشتگ-

اے وھد ءَ ایران ءَ ناگیگیں جاورانی دیمپانی ءَ سدانی کچ ءَ مردمانی جان ءُ ساہ گپتگ اَنت ءُ بازیں کچے ءَ مردم زدگ ءُ زامبیل کتگ اَنت ءُ دومی نیمگ ءَ اے وڑیں وئیلانی سر ءَ جھانی انسانی ھکانی گلانی نیمگ ءَ ایران ءِ سر ءَ زھر ءِ درشان یکشل ءَ بوگ ءَ گندگ آیگ ءَ اَنت-

روکپتی بلوچستان ءِ تیابدپی شھراں ھواریں شھر بندرعباس ءَ ایرانی آمیدگس ءِ ھکم ءَ یک مردمے پاھو دیگ بیتگ-

سر بیتگیں ھالانی رد ءَ روکپتی بلوچستان ءِ دمگ بندر عباس ءَ ایرانی آمیدگس ءِ پرمان ءَ یک بندیگیں مردمے پاھو دیگ بیتگ –

پاھو دیگ بیتگیں مردم ءِ پجار پرویز براھوئی ء خدا نظر ءِ نام ءَ زانگ بیتگ کہ زاھدان ءِ نندوک گوشگ بیگ ءَ اِنت-

ھالانی تہ ءَ گوشگ بیتگ کہ پرویز ءِ پاھو دیگ ءِ ھال واکداراں آئی ءِ کھول سرپد نہ کرتگ ءُ مروچی سھب ءَ ایرانی واکدارانی نیمگ ءَ رھوتی ھالے اتکگ ءُ گوشگ بیتگ کہ بیا ات وتی زھگ ءِ لاش ءَ دز گر اِت-

پرویز ایرانی سال نود ءُ شش ءَ نشہ باپاری ءِ بھتام ءَ گرگ بیتگ ءُ مروچی آئی ءِ سر ءَ پاھو اتکگ –

روکپتی بلوچستان ءَ چیزے روچانی تہ ءَ بندیگیں مردمانی پاھو دیگ ترندی ءَ گندگ آیگ ءَ اِنت ءُ بیست ءُ ھشت نومبر ءَ روکپتی بلوچستان ءِ جتا جتائیں زنداناں نُھ کس پاھو دیگ بیتگ اَنت ءُ ھمے چریشی ءَ پیش زاھدان ءَ ھم دو کس پاھو دیگ بیتگ اَنت-

چوشکہ یکیں ھپتگ ءِ تہ ءَ دوازدہ مردم پاھو دیگ بیتگ اَنت، ھمے وڑ دگہ بندیگیں مردمانی کھولاں ھم ترس ود اتگ بیت کنت آیانی مردم ھم پاھو دیگ بنت-

روکپتی بلوچستان ءَ پاھو دیگانی پژدر ءَ سیاسی ءُ نیکراھی مردمانی زھر گیش بیان اَنت ءُ آیانی گوشگ اِنت ایرانی آمیدگس مردماں وتی سپاھی دیگ ءَ موہ نہ دنت ءُ آیاں پاھو دنت-

ایرانشھر ءُ راسک ءَ ایرانی لشکر ءَ دو کس آوار جنگ ءَ پد بیگواہ کرتگ اَنت-

سر بیتگیں ھالانی رد ءَ روکپتی بلوچستان ءِ دمگ ایرانشھر ءَ ایرانی لشکر ءَ یک مردمے آوار جنگ ءَ پد بیگواہ کرتگ –

آوار جنگ بیتگیں مردم ءِ پجار سعید ارژنگ کہ آئی ءِ اُمر سِی سال گوشگ بیگ ءَ اِنت –

ھالانی تہ ءَ گوشگ بیتگ کہ سعید وتی ھمراھانی ھمراھی ءَ روگ ءَ بیتگ کہ آ ایرانشھر ءِ ھند کافہ چیریں ادارھاں آوار جتگ ءُ برتگ-

سعید ءِ آوار جنگ ءَ پد آئی ءِ درگت ءَ دگہ گیشیں ھال نہ بیتگ اَنت نانکہ چیریں ادارھانی نیمگ ءَ دگہ گپ دیم ءَ اتکگ اَنت-

ھمے وڑ ءَ روکپتی بلوچستان ءِ دمگ راسک ءَ ھم یک مردمے آوار جنگ ءَ پد بیگواہ کنگ بیتگ-

آوار جنگ بیتگیں مردم ءِ پجار سمیر دشتی ءِ نام ءَ زانگ بیتگ کہ راسک ءِ دمگ حیط کارگاہ ءِ جھمنند گوشگ بوگ ءَ اِنت-

ھالانی تہ ءَ گوشگ بیگ ءَ اَنت سمیر ءَ وتی چاگردی ترامجاہ انسٹاگرام ءَ سرکار ءِ ھلاپ ءَ پوسٹ کرتگ ءُ چریشی ءَ پد گرگ ءُ برگ بیتگ-

ھالانی تہ ءَ گوشگ بیتگ کہ سمیر ھما وھد ءَ گرگ بیتگ آ وتی گس ءَ دراتکگ ءُ راسک ءِ نیمگ ءَ روگ ءَ بیتگ کہ لس پوشاکی کارندھاں آئی ءِ رندگیری کرتگ ءُ راہ ءِ نیمگور ءَ دزگیر کرتگ ءُ برتگ-

بلوچستان ءِ بنجاھی شھر شال ءَ مروچی سھب ءَ بیوکیں وتکش تراکے ءَ پولیس کارمندے ءَ کساس سِی مردم بیران ءُ زدگ بیتگ اَنت-

تراک ءَ پولیس ءِ ٹرک نشانگ کنگ بیتگ، ڈی آئی جی ءِ گوشگ اِنت پولیس کارمند ڈیوٹی ءِ واستا روگ ءَ بیتگ اَنت کہ رکشھے ءَ پولیس ءِ ٹرک نشانگ کتگ، تراک ءَ بیست ءَ چہ بیست ءُ پنچ سیر شورو کارمرد کنگ بیتگ اَنت-

پولیس ءِ رد ءَ تراک ءِ سبب ءَ گوزوکیںن گاڑی ھم زد ءَ اتکگ اَنت چریشی ءَ گاڑی ءَ سواریں یک زالبولے زدگ بیتگ، پولیس ءِ گوشگ اِنت زدگ بیتگیں مردم سول ھسپتال ءَ سر کنگ بیتگ اَنت-

تراک ءِ ھال ءِ سر بوگ ءَ آس کُش، نادراہ کشیں گاڑی وئیل جاہ ءَ سر بیتگ اَنت، بمب ءِ بے سوب کنوکیں ٹولی ءَ ھم وت ءَ سر کرتگ-

دومی نیمگ ءَ تھریک طالبان پاکستان ءَ زمی واری من اتگ – ٹی ٹی پی ءِ آفیشل چینل ءَ کسانوکیں درشانے ءَ گشگ بیتگ کہ’ شال ءِ دمگ بلیلی ءَ تراک کرتگ ‘ سرجمیں رپورٹ دیمترا کاینت ‘-

بلوچستان ءِ دمگ کیچ ءَ مروچی سیمی روچ ءَ لشکر ءِ لشکر کشی برجاہ، گوستگیں روچ ءَ دمگ ءَ ھیلی کاپٹر ءُ ڈرون بالیگ گندگ بیتگ اَنت-

گیشیں ھالانی رد ءَ گوستگیں روچاں بندات بیتگیں پوجی بیڑ مروچی ھم برجاہ اِنت، دمگی مردمانی رد ءَ مروچی دمگ ءَ ھم ھیلی کاپٹر ءَ ڈرون بالیگ گندگ بیتگ اَنت ءُ بازیں جاھاں تیرگواری ءُ تراکانی ھال ھست اِنت-

زانگ بہ بیت گوستگیں بازیں روچاں چہ لشکر ءِ لشکر کشی برجاہ اَنت ءُ گوستگیں روچ ءَ پوج ءَ لشکر کشی ءِ وھد ءَ دَہ مردمانی کُشگ ءُ یک مردمے ءِ دزگیر کنگ ءِ ٹاہ داتگ ات-

پاکستانی پوج ءِ جارکش ءِ رد ءَ پوج ءَ گوستگیں روچ ءَ لشکر کشی ءِ بندات ءَ پوج ءُ سلاہ بندیں مردمانی میان ءَ تیرگواری بیتگ ءُ چریشی ءَ دَہ مردم کُشگ بیتگ اَنت-

پوجی جارکش ءِ رد ءَ دو مردم تچگ ءَ سوبمند بیتگ اَنت ءُ آیانی شوھاز ءَ بیڑ برجاہ اِنت-

زانگ بہ بیت گوستگیں ھپتگ ءَ پاکستانی پوج ءَ پوجی بیڑ ءِ وھد ءَ دو مردمانی کُشگ ءِ ٹاہ داتگ ات-

پاکستانی پوج ءِ جارکش ءِ رد ءَ چیریں ھال ءِ سر بوگ ءَ بلوچستان ءِ دمگ ھوشاپ ءِ ھند بلور ءَ بیڑ برتگ-

جارکش ءِ رد ءَ سلاہ بندیں مردمانی بنجل ءِ نزیک ءَ پوج ءِ کارمند ھیلی کاپٹر ءَ گون ایر گیجگ بیتگ اَنت ءُ ھمے وھد ءَ پوج ءُ سلاہ بندیں مردمانی میان ءَ جنگ ءُ چوپ بیتگ-

امریکہ ءِ یک آمیدگسے ءَ دست ءِ راست ’ اوتھ کیپر ملیشیا ٹولی ‘ ءِ سٹیورٹ رووڈز ءَ را کیپٹل ھِل ءِ سر ءَ اُرش کیس ءَ یاگی بیگ ءِ پندل ءَ جرمکارے گشتگ –

ھال سرکنوکیں ادارہ روئٹرز ءِ رد ءَ سَے شَمبے ءَ دیم ءَ اتکگیں گامگیج ءَ امریکہ ءِ مھکمہ ءِ جوانیں سوبمندی اِنت-

سیٹورٹ روڈز ییل لا اسکول ءَ وانندگیں گوستگیں آرمی ءِ پیرا ٹروپر اِنت – اشی ءِ سر ءَ ھشت ھپتگاں کیس ءِ گوشدارگ ءِ وھد ءَ بھتام جتگ آئی ءَ سروک جوبائیڈن ءِ ٹرمپ ءِ ھلاپ ءَ گچینکاری ءِ سوبمندی ءَ راست کرتگ ءُ گشتگ کہ کانگریس ءِ دارگ ءَ تاکت کامرد کنگ بیتگ اَنت-

زانگ بہ بیت سیٹورٹ روڈز شش جنوری دوھزار ءُ بیست ءُ یک ءَ امریکہ ءِ کیپیٹل ءَ بیتگیں جیڑاہ کنوکانی پنج کسانی توک ءَ یکے زانگ بیت اِنت –

اشی ءَ ابید دگہ یک مردمے کہ آئی ءِ نام کیلی میگس ءَ را ھم باگی بیگ ءِ پندل لڈگ بیتگ آ دگرانی تہ ءَ کینتھ ھیر یلسن، جیسیکا واٹنز ءُ تھس کالڈویل اے بھتام ءَ چہ بے میار لیکگ بیتگ اَنت – اے ایف پی ءِ رد ءَ پنجاہ ءُ سَے سالی ئیں کیلی میگس ملیشیا ٹولی فلوریڈا چیپٹر ءِ سروک اِنت-

اے کیس ءِ ٹپاسکاری ءِ سروکی امریکہ ءِ ڈسٹرکٹ ءِ جج مھتا ءَ کتگ سیٹورٹ روڈز یک چمے ءَ چہ زبھر اِنر آ آئی پیچ چم ءَ کنت پرچاکہ آ وتی تیر ءَ ناگتی کور بیتگ-

آئی ءِ سیادی کیپٹل ھِل ءِ اُرشاں نُھ سداں چہ درستاں گیش کرد پیلو کنوک اِنت – سٹیورٹ روڈز ءَ سال دوھزار ءُ نُھ ءَ ملیشیا ٹولی ( اوتھ کیپرز) بنھشت ایر کرتگ ءُ اے ٹولی ءِ باسک ھستیں ءَ گوستگیں امریکہ ءِ پوجی کارمند، کانوندار آپیسر ےُ فرسٹ ایڈ سرکنوکیں مردم ھوار اَنت-

اے ٹولی ءِ باسک امریکہ ءَ بیوکیں زھرشانی ءُ سیاسی چست ءُ ایراں گیشتر سلاہ بند گندگ ءَ ایگ ءَ اَنت-

ایران ءَ اولی رند ءَ اے گپ من اتگ کہ کرد زالبول مھسا امینی ءِ دزگیری ءَ آئی ءِ بیرانی ءَ پد بندات بیتگیں زھرشانیاں دو ماہ ءَ گیش گوستگ داں انگت ءَ بیران بیتگیں مردمانی کچ سَے سد بیتگ اَنت-

ایران ءَ ھستیں علما ءِ سرکار ءَ زھرشانیانی ھلاس کنگ ءَ آئی ءِ نام ناشر داتگ کہ مھتر ھندی لشکری دارگ بیتگ اَنت-

بیست ءُ دو سالی ئیں کرد زالبول گُدانی سر ءَ سرکار ءِ رھبندانی پروشگ ءَ پولیس ءَ ھما وھد ھخ دزگیر کتگ ات کہ آ وتی برات ءِ ھمراھی ءَ تھران ءَ اتکگ بیتگ ءُ پولیس ءَ اے بھتام جتگ ات کہ آئی ءَ وتی سر ءِ مُود نہ ڈپ اتگ اَنت-

مھسا پولیس ءِ دزگیر کنگ ءَ پد سَے روچ ءَ رند بیران بیتگ ات – پولیس ءِ گوشگ اِنت کہ آئی ءِ بیرانی ءِ سبب دلپٹ بوگ ءَ چہ بیتگ بلے مھسا ءِ مات ءِ گوشگ اِنت کہ آئی ءِ بیرانی لَٹ ءُ کُٹانی سبب ءَ بیتگ-

نیم پوجی پاسداراب انکلاب (آئی آر جی سی) ءِ بریگیڈیئر جنرل امیر علی ھاجی زادہ ءَ مھر نیوز ایجنسی ءَ چہ شنگ کتگیں یک تامر بندے ءَ گوشتگ کہ اے زالبول ءِ بیرانی ءَ سرجمیں ڈیھ ءِ جاور ناگیگ بیتگ اَنت-

نیم پوجی پاسداران انکلاب ءِ کور ایئرو اسپیس ڈویژن ءِ سروک ھاجی زادہ ءَ گوشتگ کہ منی گور ءَ نوکتریں کچ ءُ کساسانی اھوال نیست اَنت بلے من ءَ گمان بیت اِنت سَے سد ءَ گیش مردم کُشگ بیتگ اَنت اشانی توک ءَ بازیں کس ڈیھ ءِ شرین پُسگ بیتگ اَنت-

اے بیرانیاں زھرشانی کنوکانی دارگ ءَ برجم کرتگیں پولیس کارمند ملیشیا ءِ باسک ءُ پوجی ھوار اَنت-

ھمے وڑ انسانی ھکانی درگت ءَ اوسلو ءَ ھستیں یک گیر سرکاری ایرانی گلے ءِ نیمگ ءَ شنگ بیتگیں درشان ءَ کچ ءُ کساسانی رد ءَ بیرانی کچ کساس چار سد ءُ شانزدہ اَنت-

ایرانی گل ءِ گوشگ ات کہ بیران بیتگیں مردمانی تہ ءَ ھما مردم ھوار اَنت کہ مھسا امینی ءِ بیرانی ءِ ھلاپ ءَ زھرشانی ءِ وھد ءَ پاکستان ءُ اوگانستان ءِ سیمسراں زربار رودراتکی اُستان سیستان ءُ بلوچستان ءَ ناگیگیں جاورھالانی تہ ءَ کُشگ بیتگ اَنت-

ایران ءِ آمیدگس ءِ گوشگ اِنت کہ دزگیر کتگین زھرشانی کنوک ھزارانی کچ ءَ اَنت ءُ اشانی توک ءَ چِل کس درملکی اَنت-

آمیدگس ءِ درشان ءِ رد ءَ دوھزار ءِ کچ ءَ گپتگیں مردمانی جرم بندگ بیتگ اَنت چریشانی توک ءَ شش کسانی پاھو دیگ ءِ ھکم دیگ بیتگ چریشانی ھلاپ ءَ سپریم کورٹ ءَ دزبندی کنگ بیت اِنت-

ایران ءَ سال نوزدہ سد ءُ ھپتاد ءُ نُھ ءَ اسلامی انکلاب ءَ تھت پروشتگ ءُ رضا پھلوی درانڈیھ کنگ بیتگ چریشی ءَ پد ایران ءِ سرکار ءِ نیمگ ءَ ایر کنگ بیتگیں رھبند ءَ زالبولاں وتی گشان سر ءَ کنگ ءُ مود ڈبگ لوٹ اَنت-

سترکرتگیں گدانی واستا یک گچینی پولیس پورسے برجم کنگ بیتگ ءُ سرجمیں شھراں تر ایت ءُ رھبند پروشوکاں دزگیر کنت-

ایران ءِ سرکار ءَ روکپتی تاکت، اسرائیل ءُ عراق ءَ درانڈیھ بیتگیں کرد ٹولیانی سر ءَ مھسا امینی ءِ بیرانی ءِ ھلاپ ءَ چست برانزاں مردمانی ھوشو دیگ ءِ بھتام جتگ –

اے رپورٹ چاگردی ترامجاھاں جتا جتا ھال سرکنوکیں ادارھاں چہ زورگ بیتگ-

دوحہ گتر ءَ برجاھیں فیفا ورلڈ کپ ءَ ایران، گتر، ایکواڈور ءُ ویلز چہ ورلڈ کپ ءَ ڈن، وھدیکہ نیدرلینڈ، سینگال، یو ایس اے ءُ انگلیڈ ءَ وت ءَ شانزدھمی راؤنڈ سرکتگ –

گوستگیں بیگاہ ءَ خلیفہ انٹرنیشنل فٹبال پٹ ءَ بوتگیں اولی گوازی سینگال ءُ ایکواڈور ءِ میان ءَ بوتگ کہ سینگال ءَ دو پہ یک گولے ءَ گوازی کٹ اِتگ – ایکواڈور ءِ نیمگ ءَ یک گول ءِ دیگ بوتگ کہ لیبی مواسسز ءَ گوازی ءِ دومی ھاپ ءَ ھشتاد ءُ دومی ملٹ ءَ داتگ وھدیکہ سینگال ءِ نیمگ ءَ اولی گول اسماعیلا سار ءَ چِل ءُ چارمی ملٹ ءَ پیلانٹی شوٹ ءَ داتگ ءُ دومی گول کالیڈو ءَ ھپتادھمی ملٹ ءَ دومی گول داتگ ءُ گوازی وتی ٹیم ءِ نام ءَ کتگ –

البیت فٹبال پٹ ءَ بوتگیں دومی گوازی گتر ءُ نیدر لینڈ ءِ میان ءَ بوتگ کہ نیدر لینڈ ءَ دو گولاں گوازی کٹ اِتگ ءُ شانزدھمی راؤنڈ ءَ وت ءَ سر کُتگ وھدیکہ گتر ءِ نیمگ ءَ ھچ گول دیگ نہ بوتگ ءُ گتر چہ ورلڈ کپ ءَ در اتکگ –

نیدر لینڈ ءِ نیمگ ءَ اولی گول کوڈی گافکو ءَ اولی ھاپ ءِ بیست ءُ ششمی ملٹ ءَ داتگ ءُ دومی گول فرینکی ءَ دومی ھاپ ءِ چِل ءُ نھمی ملٹ ءَ داتگ گوازی وتی ٹیم ءِ نام ءَ کتگ –

دوشی شپ بوتگیں سیمی گوازی ایران ءُ یو ایس اے ءِ میان ءَ ماں گتر ءَ ال تمیمہ فٹبال پٹ ءَ کنگ بوتگ کہ یوایس اے ءَ یک گولے ءَ گوازی کٹ اِتگ ءُ وتی شانزدھمی راؤنڈ ءَ سر کتگ وھدیکہ ایران ءِ نیمگ ءَ ھچ گول اسکور کنگ نہ بوتگ ءُ ایران ھم چہ فیفا ورلڈ کپ ءَ در اتکگ – یو ایس اے ءِ نیمگ ءَ گول لیبی کریسٹین ءَ داتگ ءُ گوازی وتی ٹیم ءِ نام ءَ کتگ –

احمد بن علی فٹبال پٹ ءَ دوشی شپ ءَ بوتگیں چارمی گوازی ءَ انگلینڈ ءَ ویلز ءِ دیم ءَ سَے گولاں گوازی کٹ اِتگ ءُ وت ءَ شانزدھمی راؤنڈ ءَ سر کُتگ – وھدیکہ ویلز ءِ نیمگ ءَ ھچ گول دیگ نہ بوتگ ءُ ویلز چہ ورلڈ کپ ءَ در اتکگ –

انگلینڈ ءِ نیمگ ءَ ھر سئیں گول دومی ھاپ ءَ دیگ بوتگ انت اولی گول مارکس پنجاھمی ملٹ داتگ کہ یک ملٹے ءَ پد فل پوڈن ءَ دومی گول داتگ ءُ پدا گوازی ءِ شست ءُ ھشتمی ملٹ ءَ مارکس ءَ دومی گول داتگ ءُ گوازی وتی ٹیم ءِ نام ءَ کتگ –

کوارٹر فائنل ءَ سربوگ ءِ ھاتر ءَ شانزدھمی راؤنڈ ءَ انگلینڈ ءُ سینگال، یوایس اے ءُ نیدر لینڈ دیم پہ دیم انت –

بلوچستان ءِ بُنجاھی شھر شال ءَ زورانسری آوار جنی ءِ بگیری ءَ وائس فار بلوچ مسنگ پرسنز ءِ زھرشانی ئیں بُنجل ءَ مروچی 4875 روچ ءَ پریس کلب دیم ءَ برجاہ ءَ اِنت-

ھمے درگت ءَ چہ ضلع مستونگ محمد عظیم بلوچ ، نور محمد بلوچ، دستگیر بلوچ ءُ دگہ کھولاں چہ یکجھتی درشان کتگ-

مروچی بلوچستان ءِ دمگ چہ ھاران ءَ رضیہ بلوچ بُنجل ءَ اَتکگ زھرشانی نکش کتگ-

رضیہ بلوچ ءَ گْوشتگ کہ منی برات شاہ فھد ھمے سال مارچ ءَ مئے لوگ ءَ چہ پاکستانی پوج ءَ آوار جتگ ءُ زورانسری بیگواہ کتگ ءُ مارا برات درگت ءَ ھچ وڑیں سرپدی دیگ ءَ نہ اِنت چریشی ءِ آسر ءَ مئے کھول زھنی ازیت ءَ دوچار اَنت-

آئی ءَ گْوشتگ کہ پوج ءَ مئے لوگ ءَ چہ ھپتاد ھزار کلدار ، کمپیوٹر دگہ چیز گوں وت برتگ اَنت-

آئی ءَ گْوشتگ کہ اکتوبر ماہ ءَ چیف سیکٹری ءُ ایف سی زمہ داراں گْوشتگ کہ برات سی ٹی ڈی کارندھاں برتگ- منی برات دیم ءَ آرگ بہ بیت-

گل ءِ وائس چیئرمین ماما قدیر بلوچ ءَ گْوشتگ کہ سالاں چہ بلوچستان ءَ برجاھیں بلوچ چُکچینی تُرندی ءَ ریاست ھمکروچ گیش کنگ ءَ اِنت- بلوچاں زورانسری بیگواہ کنگ ءُ آیاں تُرندیں لٹ ءُ کُٹ کنگ ءَ پد شھید کنت ءُ آیانی لاشانی دور دیگ ءِ کرد ءُ بے انسانی کردار برجاہ بیتگ کہ ریاست پاکستان ءَ اے بلوچ چُکچینی پالیسیانی تہ ءَ تُرندی آرگ لَس بلوچ شھریانی لوگانی سر ءَ بمبگواری کنان ءَ بلوچ دوداں لگتمال کنان ءَ آیانی لُٹ ءُ پُل ءَ پد ماندارگ ءِ نوکیں دْرچ بندات کتگ-