TBP Balochi

بلوچستان ءِ جتاجتائیں دمگ شال ءُ سبی ءَ جتاجتائیں وئیلانی آسر ءَ چار مردم بیران بیتگ اَنت-

گیشیں ھالانی رِد ءَ سبی ءِ تھسیل لھڑی ءِ ھند بختیار آباد ڈومکی ءِ بازار ءَ سلاہ بندیں مردمانی تیرگواری ءَ چہ یک مردمے بیران بیتگ ءُ پسّی ءِ تیرگواری ءَ چہ اُرشکار ھم بیران بیتگ اَنت-

سلاہ بندیں تیرگواری ءِ آسر ءَ بیران بیتگیں مردم ءِ پجّار لکھمیر خان بنلگزئی نام ءَ چہ بیتگ وھدے کہ پسّی ءِ تیرگواری ءَ بیران بیتگیں اُرشکارانی پجّار بلوچ خان ءُ برکت علی بنلگزئی نام ءَ چہ بیتگ اَنت-

دمگی مردمانی رِد ءَ وئیل سوب کوھنیں دُژمنی ءِ بیتگ ءُ اشی ءَ پد لیویز فورس ھما دمان ءَ سر بیتگ ءُ سئیں لاش دستیگ کتگ ءُ پٹ ءُ پول بنداتگ کتگ-

ھمے وڑ شال ءِ دمگ بادیزئی ءَ یک مردمے ڈیم ءَ بُک اِتگ ءُ بیران بیتگ ءُ بیران بیتگیں مردم ءِ پجّار افضل خان ء اختر محمد نام ءَ چہ بیتگ-

بیران بیتگیں ورنائے جون در کنگ ءَ پد نادُراھجاہ ءَ گیشیں چار ءُ ٹپاس ءَ پد کھول ءَ داتگ-

سربوتگیں ھالانی رِد ءَ بلوچستان ءِ دمگ ھزدار ءَ ناشناسیں مردماں پوجی پانگس ءِ سر ءَ دزبمب اُرش ءِ کتگ ءُ در شتگ انت –

اُرش ءِ آسر ءَ پاکستانی پوج ءَ جانی تاوان ءِ دیمپانی کنگ کپتگ ، اُرش ءِ زمّہ واری بلوچ آجوئی لوٹوکیں سلاہ بندیں گل بی ایل اے ءَ منّ اِتگ-

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ بی ایل اے ءِ سرمچاراں ھزدار ءِ شھر کٹھان پُل ءَ برجاھیں زورگیریں پاکستانی پوج ءِ پانگسے ءِ سر ءَ دزبمب اُرش ءِ کُتگ – اُرش ھما وھد ءَ کتگ وھدیکہ پوجی کارمند پانگس ءَ ڈن یکجاہ بوتگ انت –

جیئند بلوچ ءَ گوشتگ کہ اُرش ءِ آسر ءَ دژمن پوج ءِ چار کارمند زدگ بوتگ انت – اُرش ءِ زمہ واری ءَ بی ایل اے منیت –

کیچ ءِ بنجاھی شھر تربت ءَ یک دسمبر ءَ ھیڈز ءِ نادراھی ءِ میان استمانی روچ ءِ درگت ءَ بلوچستان ایڈز پروگرام ءِ نیمگ ءَ ماں سرکٹ کارگس تربت ءَ ڈاکٹر روبینہ امجد ءِ چیردستی ءَ مراگش ءِ برجم دارگ بوتگ –

مراگش ءَ نودربر، ڈاکٹر ءُ ماسٹراں ھوار ھر تک ءُ پھناتاں سیادی داروکیں مردماں بھر زرتگ ءُ ترانکارانی تہ ءَ ڈاکٹر ظفر بلوچ، ڈاکٹر ربینہ امجد، ڈاکٹر تاج بلوچ، ڈاکٹر سلیمان، ڈاکٹر عبدالطیف ءَ ھرز نادراھی ءَ رکگ ءُ آئی ءِ گر ءُ دار ءِ ھاتر ءَ سرپدی داتگ –

رپورٹ ءِ رِد ءَ سرجمیں جھان ءَ ھیڈز ءِ نادراھانی کچ کم ءُ گیش سَے کروڑ ءُ ھشتاد لک انت –

مراگش ءَ ھیڈز ءِ نادراھی ءِ درگت ءَ ترانکارانی گوشگ ات کہ مئے جھد ھمیش انت کہ ما اے نادراھی ءِ گر ءُ دار ءِ ھاتر ءَ مھلوک ءَ سرپدی بہ دئین – اے وھدی بلوچستان ءِ تہ ءَ پانزدہ سد ءِ کچ ءَ مردم ھیڈز ءِ آماچ انت ءُ تربت ءِ تہ ءَ سَے سد ءُ بیست ءُ ھشت ھرز نادراہ ھست انت کہ آ رجسٹرڈ بوتگ انت آ کہ تنی وھدی ٹیسٹ نہ بوتگ انت ھنگت زانگ نہ بنت – آھانی گوشگ ات کہ سرجمیں جھان ءَ کہ سَے کروڈ ءَ گیش ھیڈز ءِ آماچیں مردمانی تہ ءَ اولی ڈیھ افریقہ انت کہ آئی ءَ ھپتاد درسد مردم ھیڈز ءِ آماچ انت –

ترانکاراں سرپدی دیان ءَ گُشت کہ باز مردم ھمے پھمیت کہ ایچ آئی وی ءُ ھیڈز یک انت بلے اے ھردو جتا جتائیں نادراھی انت – ایچ آئی وی جراثیم یے ءُ ھیڈز ایچ آئی وی ءِ وائرس یے کہ دیراں کئیت – وھدیکہ مردم ایچ آئی وی ءِ آماچ بیت گڑا آئی ءِ تہ ءَ بازیں انفکشن بیت ءُ پد ءَ دہ یا پانزدہ سال ءَ پد ھیڈز ءِ آماچ بیت اے نہ انت کہ مرچی آئی ءَ ایچ آئی وی بیت ءُ دومی روچ ءَ آئی ءَ ھیڈز بہ گپت –

ھیڈز ءِ الاج ءِ درگت ءَ آھانی گوشگ ات کہ ھیڈز ءِ وائرس کہ جان ءِ تہ ءَ پُتریت پد ءَ در نہ ایت، تنی وھدی آئی ءِ کُشگ ءِ درمان جوڑ نہ بوتگ بلے آئی ءِ گر ءُدار ءِ ھاتر ءَ تانکہ گیش مہ بیت اشی ءِ درمان ھست انت – پیسر ءَ ھمے گوشگ بوتگ کہ ھیڈز ءِ نادراھی ھما دمان کُشت بلے ھنو ھیڈز ءِ بازیں نادراہ ھست انت بیست سال، سی سال ءَ زندگ انت –

ھیڈز ءِ شنگ بوگے درگت ءَ ترانکارانی گوشگ ات کہ ھیڈز گیشتر چہ ھون ءِ تہ ءَ شنگ بیت، اگاں مات لاپ انت ءُ آئی ءَ ھیڈز انت چُک ھم اشی ءِ آماچ بیت کت کنت ءُ سیمی ھمبستری ءَ چہ ھم بوت کنت – پمے ھاتر ءَ ھر وھد ءَ کہ ھون ءِ زلورت کسی ءَ بیت اسکرینگ شری ءَ بہ کنت، ھردے کہ تپ گپت گڑا نوکیں سرنجن کارمرز کنگ بہ بیت، ھرکسی ءِ گوم ءَ ھمبستری ءَ پھریز بہ کنت، کسے کہ ھجام ءَ رؤت کارمرز بوتگیں بلیڈ کارمرز مہ کنت، جھد بہ بیت کہ وتی ریشاں لوگ ءَ بہ سائیت – مات ءَ چہ چک ءَ بیت بلے مرچاں درمان ھست کہ نود ءُ ھشت درسد پھریز ھست کہ چُک ءَ مہ بیت اِنت – اگاں مات لاپ پُری ءِ وھدی ءَ ھمے درماناں کارمرز بہ کنت – اشی ءِ گر ءُ دار ءِ ھاتر ءَ پنچ کسمے درمان ھست انت ـ پہ اشی ءِ کُشگ ءُ ھلاس کنگے تنی وھدی ویکسین در نہ اتکگ – بلے درمان آئی ءَ مدامی ورگی انت – ھردے کسے ءَ اے نادراھی ءَ گپت بازینے وتار ءَ چیر دنت وتی نادراھی ءَ زاھر نہ کنت تانکہ چاگرد آئی ءَ مہ زانت پرچاکہ چاگرد پد ءَ آئی ءَ دگہ نگاہے ءَ چاریت پمیشکا بائدیں ما چشیں نادراھانی کمک ءُ الاج ءَ بہ کنیں تانکہ دیمتر ءَ پہ چاگرد ترس ءَ نادراھ وت ءَ چیر مہ دئینت –

ترانکارانی گوشگ ات کہ مردماں وتی رویش مٹینگی انت ھیڈز، آیچ آئی وی یا ھر وڑیں وڑیں نادراھ بہ بنت کونسلیٹ المی انت – ما پیش ءَ وتکشی ءِ درگت ءَ دو سَے سیشن کتگ تانکہ مردم کونسلیٹ کنگ بہ بنت ءُ آ اسٹیج سر مہ بنت کہ وتکشی بہ کن انت –

آھانی گوشگ ات کہ اے کمک کنگے پروسسز یے ھما مردم ءَ کہ ھیڈز انت آئی ءِ سائیکلو جیکل کمک دیگی انت پرچاکہ ھما کہ اشی ءِ آماچ انت آ ڈپریشن ءِ تہ ءَ رؤت وتی زند ءَ بازار بیت – ھرکسی ءِ تہ ءَ کہ اے نادراھی بنت لج مہ کنت آ تچک ءَ بگوشیت –

ترانکارانی گوشگ ات کہ ھنچوش کہ ما پیش ءَ اے وڑیں مراگش داشتگ انت امیت داراں دیمتر ءَ ھم مکران ڈیپارٹمنٹ ءَ ھوار ایندگہ ادارہ اے وڈیں مراگش برجم دار انت ءُ مردماں سرپدی دئینت – ھمے وڑ ءَ مراگش ءَ بھر زوروکیں مردم ھرز ھوار ھر نادراھی ءِ درگت ءَ سرپدی داریت آ دیما مردماں سرپد کنت ءُ ھمے وڑ اے سرپدی دیما روان کنت مردم سرپد بوان کن انت –

بلوچستان ءِ ضلع کیچ ءَ پاکستانی پوج ءَ یک مردمے آوار جتگ ءُ ناشناسیں جاھے ءَ برتگ -کھول ءَ زھرشانی کنان ءَ سی پیک دگ بند کتگ-

بیگواہ کنگ بیتگیں مردم ءِ کھول ءَ زھرشانی کنان ءَ سی پیک شھدگ تجابان ھند ءَ بند کتگ- شھدگ بند بوگ ءِ سبب ءَ چہ گاڑیانی دْراجیں لین لگ اِتگ-

کھول ءِ گْوشگ اِنت کہ پاکستان پوج ءَ گْوستگیں شپ ءَ لوگانی سر ءَ بیڑبرتگ ءُ زالبول ءُ چُک سک لَٹ ءُ کُٹ کتگ اَنت یک مردمے آوار جتگ ءُ ناشناسیں ھندے ءَ برتگ-

بیگواہ کنگ بیتگیں ورنائے پجّار حکیم ء داد بخش نام چہ بیتگ-

کھول ءِ لوٹ کتگ کہ ورنائے ءَ زوت ءَ چہ زوت یل بکن اِت اگاں ناں ھمے وڑ برجاہ بیت- اے درگت ءَ تنی وھدے انتزامیہ درشان دیم نیتکگ-

روکپتی بلوچستان ءِ دمگ کنارک ءَ یک مردمے ایرانی چیریں ادارھاں آوار جنگ ءَ پد بیگواہ کرتگ –

روکپتی بلوچستان ءَ نہ کُٹوکیں آوار جنی ءِ درچ ھمک روچ گیشی ءِ رنگ ءَ گندگ ءَ آیگ ءَ اِنت سیاسی گلانی گمان اِنت کہ اود ءَ آوار جنگ بیتگیں مردم کمتر ھساب ءَ یل کنگ بیگ ءَ اَنت دومی نیمگ ءَ گیشتری کساس ءَ گرگ ءُ گار کنگ بیگ ءَ اَنت-

ایرانی لشکر ءِ ’ پالیسی اِنت اود ءَ مردم لس مردمانی برانز دیگ ءُ ڈیھ ءِ ھلاپ ءَ بیوکیں زھرشانی پرکاری کنگ ءَ اَنت ‘-

گوستگیں شپ ءَ کنارک ءِ ھند ءَ لس پوشاکی ایرانی کارندھاں سی ءُ دو سالی ئیں یار مھمد جابریان ء خداداد جھمنند مومان کنارک آوار جتگ ءُ بیگواہ کرتگ –

ھالانی تہ ءَ گوشگ بیتگ کہ یار مھمد دمگ ءِ کونسل باسکے ءُ آ یک مارکیٹے ءَ کار ءَ اِنت ھمود ءَ چہ لس پوشاکی مردماں آوار جتگ ءُ برتگ-

آئی ءِ کھول ءَ یار مھمد ءِ بیگواھی ءَ پد یل کنائینگ ءِ کوشش کتگ بلے آئی ءِ درگت ءَ ھچ ھال دیم ءَ نیتکگ اَنت ءُ نانکہ آئی ءِ بارو ءَ چیریں ادارھاں دگہ گپ دیم ءَ آورتگ اَنت-

امریکہ ءِ وزیر دفاع لائیڈآسٹن ءَ ترک ءِ ھم منسپ ءِ گون ءَ رھوتی ھال ءُ اھوال ءَ شام ءَ ترکی ءِ نوکیں بیڑانی سر ءَ ترندی ءَ ایر جتگ ءُ ڈیھ ءُ گیش ودیتگ ءِ ناوشین جاورھالانی درشانی کتگ-

برطانیہ ءِ ھال سرکنوکیں ادارہ روئٹرز ءِ رد ءَ پینٹاگون ءَ رھوتی ھال ءَ گُشتگ کپ لائیڈ آسٹن ءَ سیزدہ نومبر ءَ استنبول ءَ بیوکیں اُرش ءِ پدردی کرتگ-

پینٹاگون ءِ نیمگ ءَ شنگ بیتگیں درشان ءَ گوشگ بیتگ آئہ ءَ گورریچانی شام ءُ ترکی ءِ گیش کپتگیں کاروائیانی سر ءَ پدردی درشان کتگ کہ اشانی تہ ءَ ھمے زوتاں بیوکیں اُرش ھوار اَنت-

اے اُرشاں لھتے امریکہ ءِ سیکورٹی کارمندانی واستا تچک ءَ ناوشی اَنت کہ آ شام ءَ دمگی ھمگرنچی ءَ داعش ءِ پروش دیگ ءَ کار کنگ ءَ اَنت-

درشان ءَ گوشگ بیتگ کہ وزیر دفاع لائیڈآسٹن ءَ بیڑ ءِ کم کنگ ءِ کڈنی کتگ ءُ شام ءَ ترکی ءِ نوکیں اُرشاں پوجیانی ھلاپ ءَ ترندیں ایراف گپتگ-

گوستگیں ماہ نومبر ءَ استنبول ءِ یک نامی ئیں تر ءُ تابی جاھے ءَ بیتگیں تراک ءَ شش مردم بیران ءُ ھشتاد ءُ یک زدگ بیتگ اَنت-

ترکی ءِ وزیر داکلہ سلیمان سویلو ءَ سرکاری نیوز ایجنسی انادولو ءَ یک شنگ بیتگیں درشانے ءَ گشتگ کہ مئے پٹ ءُ پول ءِ رد ءَ پی کے کے ناشریں گل تراک ءِ زمہ وار اِنت-

جھان ءِ ناشریں گل داعش ءَ چار شمبے ءِ روچ ءَ وتی رھشون ابو حسن الھاشمی القریشی ءِ جنگ ءِ وھد ءَ مرگ ءُ آئی ءِ جاہ ءَ دگہ یکے دارگ ءِ ھال شنگ کتگ –

فرانسیسی ھال سرکنوکیں ادارہ ءِ رد ءَ ناشریں گل داعش ءِ یک جارکشے ءَ ھاشمی ءِ مرگ ءِ ھال رمس ءُ جاورانی سرپد کنگ ءَ ابید گوشتگ کہ ھاشمی یک عراقی اللہ ءِ دشمنے ءِ گون ءَ جنگ ءَ کُشگ بیتگ-

یک توار بندی کلوھے ءَ گپ کنان ءَ جارکش ءَ ٹولی ءِ نوکیں رھشون ءِ نام ابوالحسن الحسینی القریشی ءِ نام ءَ پدر کرتگ-

جارکش ءَ وتی رھشون ءِ گیشیں گپ نہ گشتگ اَنت بلے اے گُشتگ کہ آ “ھیلکاریں جھادی یے “جارکش ءَ داعش ءِ دراھین ٹولیاں چہ آئی ءِ گون ءَ وپاداری ءِ اھد کنگ ءِ لوٹ کتگ-

زانگ بہ بیت داعش ءَ سال دوھزار ءُ چاردہ ءَ عراق ءُ شام ءَ باز ترندی ءِنامان بیگ بنگیج کتگ ات اے اود ءَ ترندین گامان آئی ءَ بازیں جاہ گپتگ ات اَنت ءُ وتی کانون “ھلاپت ” ءِ اُرشانی یک تَکے بڈگ ءَ گندگ اتک-

بلے پہ داعش ءَ کھر آماچیں سال دوھزار ءُ ھبدہ ءَ عراق ءُ شام ءَ داعش ءَ مزنیں پروشے ءِ دیمپانی بیت بلے اے سنی ٹولیاں جتائیں ٹولی انگت ءَ ھردوکیں ڈیھاں اُرش کنگ اِنت-

داعش یا اسلامک اسٹیٹ یا آئی ایس ءِ نام ءَ زانگ بیت اِنت آئی ءِ گوستگیں سروک ابو ابراھیم القریشی ھمے سال فروری ءَ گوریچانی شام ءِ اُستان ادلب ءَ امریکہ ءِ یک اُرشے ءَ کُشگ بیتگ ات-

آیانی پیشرو ابوبکر البغدادی ھم اکتوبر سال دوھزار ءُ نوزدہ ءَ ادلب ءَ کُشگ بیتگ اَت-

آئی ایس ءِ نام ءَ یک کتابی واھندے ءَ کہ آئی ءِ نام حسن حسن اِنت آئی ءَ گوشتگ کہ ’ے مسال ‘ اِنت بلے اے پدر نہ بیتگ ھاشمی ’ ناگتی بیران بیتگ یا بیڑے ءِ وھد ءَ جنگ بیتگ ءُ آئی ءِ بارو ءَ ھچ سرپدی نہ بیتگ چون ءُ کے ءَ جتگ-

امریکہ ءِ فوج ءِ کمان ءَ ھمے سال ءِ اکتوبر ءَ گوشتگ اَت امریکہ ءِ پوج ءَ گوریچان ءُ رودراتکی شام ءَ سھب ءِ سر ءَ بیڑے ءِ وھد ءَ آئی ایس ءِ یک کلانیں باسکے کُشتگ-

اے درشان ءَ گوشگ بیتگ ات کہ برزی اُرشاں آئی ایس ءِ دگہ دو کلانیں باسک ھم جنگ بیتگ اَنت – زانگ بہ بیت امریکہ شام ءَ آئی ایس ءِ ھلاپ ءَ جنگ کنوکیں پوجیانی سروکی ءَ کنگ ءَ اِنت-

دوحہ گتر ءَ برجاھیں فیفا ورلڈ کپ ءَ پرانس، آسٹریلیا ءُ ارجنٹینا ءَ وت ءَ شانزدھمی راؤنڈ ءَ سرکتگ – زیکیں بیگاہ ءَ گتر ءِ جتا جتائیں پٹاں ھشت ٹیمانی میان ءَ گوازی کنگ بوتگ کہ آھانی تہ ءَ تونیسیا ءَ پرانس ءِ دیم ءَ یک، آسٹریلیا ءَ ڈینمارک ءِ دیم ءَ یک، ارجنٹینا ءَ پولینڈ ءِ دیم ءَ دو، میکسکو ءَ سعودی دیم ءَ دو پہ یک گولے ءَ گوازی کٹ اِتگ انت –

زیکیں بیگاہ ءَ ایجوکیشن سٹی فٹبال پٹ ءَ بوتگیں اولی گوازی تونیسیا ءُ پرانس ءِ میان ءَ کنگ بوتگ کہ تونیسیا ءَ یک گولے ءَ گوازی کٹ اِتگ – تونیسیا ءِ نیمگ ءَ گول واحبی ءَ دومی ھاپ ءِ پنجاہ ءُ ھشتمی ملٹ ءَ داتگ – وھدیکہ پرانس پیسر ءَ چہ ٹاپ ریکنگ ءِ تہ ءَ بوتگ گوازی ءَ نہ کٹگ پد ھم آ شانزدھمی راؤنڈ ءَ سر بوگ ءَ سوبمند بوتگ –

الجنوب فٹبال پٹ ءَ بوتگیں دومی گوازی آسٹریلیا ءُ ڈینمارک ءِ میان ءَ بوتگ کہ آسٹریلیا ءَ یک گولے ءَ گوازی کٹ اِتگ ءُ وت ءَ شانزدھمی راؤنڈ ءَ سرکتگ – آسٹریلیا ءِ نیمگ ءَ گول متیو ءَ دومی ھاپ ءِ شستمی ملٹ ءَ داتگ ءُ گوازی وتی ٹیم ءِ نام ءَ کتگ –

دوشی شپ راس ابو عبود فٹبال پٹ ءَ بوتگیں سیمی گوازی ارجنٹینا ءُ پولینڈ ءِ میان ءَ بوتگ کہ ارجنٹینا ءَ دو گولاں گوازی کٹ ءِ اتگ ءُ وت ءَ شانزدھمی راؤنڈ ءَ سر کتگ وھدیکہ پولینڈ ءِ نیمگ ءَ ھچ گول دیگ نہ بوتگ –

گوازی ءِ اولی ھاپ ءَ پولینڈ ءَ ارجنٹینا ءِ دیم جوانی ءَ داشتگ بلے دومی ھاپ ءَ ارجنٹینا ءِ لیبی پہ گول دیگ ءَ داشت نہ کُتگ انت – دومی ھاپ ءِ اولی ملٹ ءَ ایلکس ءَ ارجنٹینا ءِ نیمگ ءَ اولی گول داتگ ءُ پدا گوازی ءِ شست ءُ ھپتمی ملٹ ءَ جولئین ءَ دومی گول داتگ ءُ گوازی وتی ٹیم ءِ نام ءَ کتگ –

لوسیل فٹبال پٹ ءَ دوشی شپ بوتگیں چارمی گوازی سعودی ءُ میکسیکو ءِ میان ءَ بوتگ کہ میکسیکو ءَ سعودی ءِ دیم ءَ دو پہ یک گولے ءَ گوازی کٹ اِتگ –

گوازی ءِ اولی ھاپ ءَ ھردو ٹیمانی لیبیاں جوانیں گوازی پیش داشتگ ءُ دومی ھاپ ءَ چِل ءُ ھپتمی ملٹ ءَ میکسیکو ءِ نیمگ ءَ اولی گول اسکور کنگ بوتگ کہ مارٹن ءَ داتگ دومی گول پنجاہ ءُ دومی ملٹ ءَ لوئس ءَ داتگ گوازی ءِ گیشی ملٹانی تہ ءَ سعودی ءِ نیمگ ءَ یک گولے دیگ بوتگ کہ لیبی سالم ءَ داتگ –

بلوچستان ءِ جتاجتائیں دمگاں ءُ جتاجتائیں وئیلانی آسر ءَ شش مردم بیران یکے ٹپی بیتگ-

سربوتگیں ھالانی رِد ءَ چہ پنجگور ءَ واشک ءَ رؤکیں پک اپ ءُ مالی بروکیں گاڑی ءِ میان ءَ ڈک ورگ ءِ آسر ءَ پک اپ گاڑی ءَ سوار سے مردم بیران بیتگ اَنت-

واشک وئیل ءَ بیران بیتگیں مردمانی تہ ءَ نھمی تبک ءِ نودربر شاہ فیصل ء خدا رحیم، حمید اللہ ء رحمت، عبدالحمید ء عظیم خان ناماں چہ بیتگ اَنت کہ بسیمہ ءِ جھمنند اَنت-

دومی نیمگ ءَ ھُزدار ءِ دمگ نوغے تھسیل باغبانہ شھدگ سر ءَ تُرند رؤکیں گاڑی ءِ ڈک ورگ ءَ چہ یک مردمے رضا محمد ء در محمد عمرانی بیران بیتگ-

دکی ناصر آباد کلی سیف اللہ ناصر ءَ زمین جیڑہ ءِ سر ءَ دو ٹولیانی میان ءَ میڑ ءُ تیرگواری ءِ آسر ءَ عابد خان ء سیف اللہ نامیں مردمے بیران ءُ عطااللہ ء سیف اللہ اوشخیل سک ٹپی بیتگ-

دکی ءَ ٹپی ءُ بیران بیتگیں مردم سول نادُراھجاہ دکی ءَ برتگ اَنت گیشیں چار ءُ ٹپاس ءَ پد لاش کھول ءَ داتگ-

ھمے وڑ تربت ءِ دمگ گوگدان ءَ بُنجاھی دگ ءِ سر ءَ وئیل ءَ یک مردمے بیران بیتگ-

دگ وئیل ءِ آسر ءَ بیران بیتگیں مردم ءِ پجّار عبدالواحد ء عبدالرشید نامیں مردمے بیران بیتگ-

کلات ءِ دمگ کلی ڈوڈکی گیاوان ءَ لوگ ءِ تہ ءَ گیس پُر بوگ ءَ چہ زالبولاں چک ءَ ھوار ھشت مردم ءِ جاور نگیگ بوتگ اَنت کہ آ ڈسٹرکٹ ھیڈ کوارٹر نادُراھجاہ برتگ اَنت کہ آ نو ھترہ ءَ چہ ڈن اَنت-