TBP Balochi

انسانی ھکانی یک گلے ءَ گوشتگ کہ ایرانی واکداراں یک ھنچیں تامربندے ءِ شنگ بوگ ءَ دو ازمکار دزگیر کرتگ اَنت اشی ءِ توک ءَ گندگ بیت اِنت ایرانی تامر ءُ تامر ساچیں یک ٹولی یے ایران ءَ چست بیتگیں زھرشانی زرمبشت ءِ پلامرزی ءِ ھمگرنچی کنگ ءَ بے تواری ءَ سر اش ڈن ءَ کتگ ءُ اوشتاتگ اَنت-

امریکہ ءَ ھستیں ھیومن رائٹس ایکٹوسٹ نیوز ایجنسی ءَ چارشمبے ءِ روچ ءَ گوشتگ کہ ازمکار ءُ سوچکار سھیلہ گلستانی کہ تامربندے ءَ ابید بُرکہ ءَ گندگ بیتگ ءُ اشی ءِ ھواری ءَ سوجکار حامد پورزاری ھم گندگ بیت اِنت ھردوک دزگیر کنگ بیتگ اَنت بلے اے سرپدی نہ بیتگ آ کجام جاہ ءَ برگ بیتگ اَنت-

تامربند ءَ گندگ بیت اِنت سھیلہ گلستانی ءَ سیاھیں گُد گور ءَ اِنت ءُ ابید سرے مودے ڈن ءَ کتگ اَنت لُکیں تامر ءَ کیت اِنت ءُ وتی چھرگ ءَ سرجم ءَ پدر کنت ءُ کیمرہ ءِ دیم ءَ کیت اِنت-

اشی ءَ پد نُھ دگہ زالبول ءُ پنچ مردین کاینت ءُ گلستانی ءِ گور ءَ ھوار بنت-

ایران ءِ وائر ویب سائٹ ءِ رد ءَ تامر ءَ گندگ بیوکیں درستیں مردم ایرانی ازمکار اَنت بلے اے سرپدی نہ بیتگ درست دزگیر بیتگ اَنت یا ناں-

ایران ءِ نامی ئیں ڈرامہ نگار نغمہ سیمنی ءَ وتی انسٹاگرام ءَ اے گپ راست کرتگ ءُ گوشتگ کہ گلستانی ءُ پورزاری ھردوک دزگیر کنگ بیتگ اَنت ءُ آئی ءَ دزگیری فارمنس ءُ دگہ درور داتگ اَنت-

زانگ بہ بیت ایران ءَ بیست ءُ دو سالی ئیں مھسا امینی کہ ستمبر ءَ اخلاقی پولیس گپتگ ات ءُ پد ءَ آئی ءِ مرگ ءِ ھال دیم ءَ اتکگ ات چِد ءُ پد دو ماہ ءِ گوزگ ءَ ابید ھم اے زھرشانی ترندی ءَ گون برجاہ بیتگ اَنت سال نوزدہ سد ءُ ھپتاد ءُ نُھ ءَ پد اسلامی انکلاب ءِ علمائی سرکار ءِ واستا مزنیں ایلینگے بیتگ ات-

زھرشانی زرمبشت ءِ وھد ءَ بازیں ازمکاراں وتی سر ڈن ءَ کتگ ءُ زھرشانیانی پلامرزی کتگ بلے ایرانی سرکار ءَ زالبولاناں گشان سر ءَ کنگ ءِ کڈنی کتگ-

ھمے ماہ ءِ بندات ءَ ڈیھ ءِ پشکپتگیں ایران ءِ درستاں نامان تریں ازمکار ترانی علیدوستی ءَ چاگردی رسانکجاھاں ابید گشان ءَ وتی یک اکسے شنگ کتگ-

اشاں ھوار ھوار ایران ءِ دو دگہ نامی ئیں ازمکار غازیانی ءُ کتایون ریاحی ھم دزگیر کنگ بیتگ ات اَنت کہ آیان زھرشانی زرمبشت ءِ پلامرزی ءَ وتی گشان سر جتگ ءُ مھلوک ءِ گون ءَ ھمگرنچی کتگ- پد ءَ ھالانی تہ ءَ گوشگ بیتگ کہ ھردوک زمانت ءِ سر ءَ یل کنگ بیتگ اَنت-

امینی ءِ بیرانی ءَ پد بندات بیتگیں زھرشانی زرمبشت ءَ پیسر ایرانی سینما ءَ دھشتانی زور بیتگ-

اشاں ھوار ھوار داد گروکیں ڈائریکٹرز مھمد رسولوف ءُ جعفر پناھی اے سال ءِ بندات ءَ گرگ بیتگ اَنت داں انگت ءَ دزگیری ءِ توک ءَ اَنت-

دوحہ گتر ءَ برجاھیں فیفا ورلڈ کپ ءَ دوشی شپ ھشت ٹیمانی میان گتر ءِ جتا جتائیں پٹاں گوازی کنگ بوتگ کہ ساؤتھ کوریا ءَ پرتگال ءِ دیم ءَ دو پہ یکے ءَ، یوروگوائے گھانا ءِ دیم ءَ دو، سویزر لینڈ ءَ سربیا ءِ دیم ءَ سَے پہ دو ءُ کیمرون ءَ برازیل ءِ دیم ءَ دو گولاں وتی گوازی کٹ اِتگ انت –

گتر ایجوکیشن سٹی فٹبال پٹ ءَ بوتگیں اولی گوازی ساؤتھ کوریا ءُ پرتگال ءِ میان ءَ بوتگ کہ ساؤتھ کوریا ءَ دو گولاں گوازی کٹ اِتگ، پرتگال ءِ نیمگ ءَ یک گولے دیگ بوتگ کہ پرتگال ءِ لیبی ریکارڈو ءَ اولی ھاپ ءِ پنچمی ملٹ ءَ داتگ – وھدیکہ ساؤتھ کوریا ءِ نیمگ ءَ اولی گول کم یونگ ءَ بیست ءُ ھپتمی ملٹ ءَ داتگ ءُ دومی گول ھونگ ای چنگ ءَ گوازی ءِ گیشیں ملٹانی تہ ءَ داتگ – وھدیکہ گروپ ایچ ءِ تہ ءَ ھردو ٹیم شانزدھمی راؤنڈ ءَ سربوگ ءَ سوبمند بوتگ انت –

گوستگیں بیگاہ ءَ الجنوب فٹبال پٹ ءَ بوتگیں دومی گوازی گھانا ءُ یوروگوائے ءِ میان ءَ بوتگ کہ یورو ءَ دو گولاں گوازی کٹ اِتگ – یوروگوائے نیمگ ءَ ھردو گول گوازی ءِ اولی ھاپ ءَ دیگ بوتگ انت –

راس ابو عبود فٹبال پٹ ءَ دوشی شپ بوتگیں سیمی گوازی سریبیا ءُ سویزرلینڈ ءِ میان ءَ بوتگ کہ سویزر لینڈ ءَ سَے گولاں گوازی کٹ اِتگ – وھدیکہ سریبیا ءِ نیمگ ءَ دو گول دیگ بوتگ –

گوازی ءِ اولی ھاپ ءِ بیستمی ملٹ ءَ سویزرلینڈ ءِ لیبی ایکس-شاکری ءَ یک گولے داتگ پدا گوازی ءِ بیست ءُ ششمی ملٹ ءَ سریبیا ءِ لیبی اے-میٹرویک ءَ گول موک اِتگ – اولی ھاپ ءِ سی ءُ پنچمی ملٹ ءَ سریبیا ءِ نیمگ ءَ دومی گول دیگ بوتگ – دومی ھاپ ءَ سویزرلینڈ ءِ نیمگ ءَ دوگول دیگ بوتگ وھدیکہ سریبیا ءِ نیمگ ءَ ھچ گول دیگ نہ بوتگ –

لوسیل فٹبال پٹ ءَ بوتگیں چارمی گوازی برازیل ءُ کیمرون ءِ میان ءَ بوتگ کہ کیمرون ءَ یک گولے ءَ گوازی کٹ اِتگ بلے پدا ھم کیمرون شانزدھمی راؤنڈ ءَ سر بوگ ءَ بے سوب بوتگ – چہ گروپ جی ءَ برازیل شانزدھمی راؤنڈ سربوگ ءَ سوبمند بوتگ –

کیمرون ءُ برازیل ءِ میان ءَ بوتگیں گوازی ءَ ھردو نیمگاں گول کنگے سک باز جھد بوتگ بلے گوازی ءِ نود ایں ملٹانی تہ ءَ ھچ گول دیگ نہ بوتگ ءُ گڈسر ءَ گوازی ءِ گیشیں ملٹانی تہ ءَ کیمرون ءِ لیبی ابوبکر یک گولے ءِ دیگ ءَ سوبمند بوتگ ءُ گوازی وتی ٹیم ءِ نام ءَ کتگ –

بلوچستان ءِ دمگ چہ کلات ءُ پنجگور ءَ پاکستانی پوج ءَ نودربراں ھوار سے مردم ءِ آوار جنگ ءَ پد بیگواہ کتگ اَنت-

ھالانی رِد ءَ پاکستانی پوج ءَ سی نومبر ءَ کلات ءِ دمگ چہ منگچر ءَ عبدالرشید ء میر احمد چہ آئی ءِ دکان ءَ آوار جتگ ءُ ناشناسیں جاھے ءَ برتگ-

ورنائے زورانسری آوار جنی ءِ درگت ءَ دمگی واکداراں درشان دیم ءَ نیتکگ-

ھمے وڑ پنجگور ءِ دمگ چہ پروم ءَ گوستگیں شپ ءَ پاکستانی پوج ءَ ایف ایس سی ءِ نودربر عبداللہ ءُ آئی ءِ ناکو محبوب بلوچ ءِ ھمراھی ءَ زورانسری آوار جتگ ءُ بیگواہ کتگ-

اشی ءَ چہ اَبید دگہ یک مردمے ءِ چہ پنجگور ءَ آوار جنگ ءِ ھال اِنت بلے انگت اے درگت ءَ سرجمیں ھال نیست-

اے وئیل ھما وھد ءَ دیم ءَ اَتکگ اَنت وھدے چاگردی رسانکدر ءَ 25 اکتوبر زورانسری آوار جنگ بیتگیں نودربر سعود ناز درگت ءَ کمپئین برجم دارگ ءَ بیتگ اَنت-

کتابءِ نام: Weep Not Child

نبشتہ کار : Ngugi Wa Thiong’o

چمشانکار : سگار بلوچ

دی بلوچستان پوسٹ

گوگی 5 جنوری 1938ءَ کینیا ءَ ودی بوتگ آ وهد ءَ کینیا برطانیہ ءِ سرکار ءِ ایردست اَت-گوگی ءَ بازهورتی ءَ گوں انگریزانی زُلم ءُ زوراکی تَپاس اِت ءُ آهانی هلاپ ءَ نبشتہ کَنگ ءَ اراده کُت- Weep Not Child گوگی ءِ اولی کتاب اِنت کہ آ 1964ءَ چاپ ءُ شنگ بیت- هما وهداں گوگی نودربرے اَت آئی ءَ سئے کتاب نبشتہ کُت کہ آ ایش اَنت-

‏ 1. Weep Not Child
‏ 2. The River Between
‏ 3. The Grain Of Wheat

گوگی یک مزنیں نبشتہ کارے کہ آئی ءَ را آئی ءِ کتابانی نبشتہ کَنگ ءَ گولڈ مڈل هم رس اتگ گوگی ءَ مزنیں کتابے نبشتہ کُتگ کہ آ زورگیر ءُ آئی کارپد ءُ گُلامانی تَب ءُ جھد ءِ بارو ءَ اَنت- آیانی تہ ءَ یکے Weep Not Childاِنت کہ آ کینیا(Kenya)ءِ 1950تا 1960ءِ وهدے برٹش کولونی ءِ سر ءَ اِنت کہ وهدے برٹش کیتءُ کینیا ءَ وتی کولونی جوڑ کنت وهدے اودے مردم ھمے سَما کن اَنت کہ مئے بُنکی هَک مارا دیگ بوئگ ءَ نہ اَنت- گُڑا آ یک گلے K.A.U(Kenyan Afciran Union) ءِ نام ءِ سر ءَ جوڑ کن اَنت کہ آ گَل ءِ مول ءُ مراد کینیا ءِ توک ءَ اسپیت ءُ سیاه ءِ میان ءَ تپاوت هلاس کنگ بیت – برطانیہ K.A.U ءِ مزنین باسکے چِست کن اَنت ءُ زندان ءَ بند کن اَنت ھمے وهد ءَ کینیا ءِ مھلوک جیڑ ایت کہ مئے مسئلہ چو گیش ءُ گیوار نہ بنت ،گُڑا آ دگہ یک گَلے (Kenyan Land And freedom Army)/(Mau Mau)ءِ نامیں جوڑ کن اَنت ءُ دومی جھانی جنگ ءَ برطانیہ ءِ هلاپ ءَ جنگ کن اَنت اے گِدار ءَ بازیں کرداراَنت کہ چو اے وڑ اَنت ،Ngotho : کہ افریکن ءِ کِرا کار ءَ بیت-Ngotho ءَ دو لوگی بیت- اولی لوگی ءِ نام Njeri بیت کہ آئی ءَ چہ سئے چُکے بیت،Boro (کہ دومی جھانی جنگ ءِ یک سپاهی ءِ بوتگ) ، Kmau (یک دارتراشیں بیت) ءُ سیمی چُک Kori بیت- دومی لوگی(Nyokabi) ءَ چہ آئی ءَ یک چُکے بیت (Njoroge): کہ آ اے گِدارے بنجاھی کردار اِنت، Jocobo(یک افریکن مردے)،Mr Howland(یک اسپیت پوشیں )ءُ Mwihaki( ھمے افریکن Jocobo ءِ چُک بیت) –

اے گِدارے بندات چو اے وڑ ءَ بیت کہ یک کسانیں زھگے Njorogeکہ آ وانگ لوٹ ایت ءُ وتی مات ءَ گوش ایت من ءَ پہ وانگ ءَ اسکول ءَ را بدے- Njoroge ءِ پت Jocobo(یک افریکن مردے) ءِ کِرا کار ءَ بیت ءُ آ مائی ءَ زمین ءِ سر ءَ وتی زندگی ءَ گوازینگ ءَ بیت- Njoroge اسکول ءَ Mwihaki ءَ وتی سنگت کنت ءُ دوئیں یکجاہ اسکول ءَ راونت ءُ کائینت – یک روچے سیاه پوستیں مردمے پہ وتی زرانی گیش کنگ ءِ واستا یک زھرشانی ءِ اراده ءَ کن اَنت-Ngotho هم اراده کنت کہ من هم رواں ھمے زھرشانی ءَ بهر زوراں، بلے آئی ءَ تریست کہ اگاں من زھرشانی ءَ بهربہ زوراں منی کار چہ منی دست ءَ روت،چیا کہ Jocobo زھرشانی ءِ هلاپ بیت -گُڑا آ اراده کنت ءُ روت آئی ءِ دوئیں لوگی آئی ءَ مکن کن اَنت بلے آ ایشانی گپاں نہ زور ایت- زھرشانی ءِ سر ءَ پولیس کائینت ءُ Jocobo ءَ گوش انت کہ تو زھرشانی ءَ بند کنائیں-گُڑا Jocobo ءُ Ngotho ءَ میان ءَ جنگ ءُ چوپ بیت ھمے جنگ ءُ چوپ ءَ دو مردم مر ایت ءُ Ngotho چہ کار ءَ کَشگ بیت-

لھتے روچ ءَ پد Jocobo(کہ آئی ءِ کرا نوگوتو کار ءَ بیت)،آئی ءِ کُنٹ چہ آئی ءِ کار گِس ءَ دست کپیت-گُڑا مسٹرہاہولینڈ (Mr.Howland) نوگوتو ءَ گوں وتی چُکاں گپیت ءُ بند کنت ءُ لٹ ءُ کُٹ کنت -مسٹرہاہولیند ھمے گوش ایت کہ Boro(نوگوتو ءِ چُک) ءَ Jocobo کُشتگ ءُآMau Mau آشوب ءِ مستر اِنت- نوگوتو گوں وتی چُکاں، Kamu ءُ Boro ءَ گوں زند ءَ زندان ءَ کنگ بنت- Njorge گوں وتی دوئیں مات ءَ گوں پشت کپ ایت- اے گِدارے گُڈسر ءَ نوجرگے(Njorge)سک پریشان بیت ءُ ہج آسراتی نہ گندیت ءُ وت کُشی کنگ ءِ جھد ءَ کنت بلے آئی ءِ دوئیں مات آئی ءَ مکن کن اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں بلوچستان ءِ دمگ بالگتر ءُ شاپک ءَ پاکستانی پوج ءِ سر ءَ اُرش کُتگ –

ناشناسیں مردماں اولی اُرش گوستگیں روچ ءَ بالگتر ساقی ءَ پاکستانی پوج ءِ بنجل ءِ سر ءَ کُتگ ءُ دومی اُرش شاپک بارگ کوہ ءَ برجاھیں پوجی پانگسے ءِ سر ءَ کُتگ – اُرش ءِ آسر ءَ پاکستانی پوج ءَ جانی ءُ مالی تاوان ءِ دیمپانی کنگ کپتگ –

ھمے وڈ گوستگیں روچ ءَ پنجگور ءَ ھم پاکستانی پوج ءِ پانگسے ءِ سر ءَ دزبمب اُرش ءِ کنگ بوتگ –

اھوالکار ءِ رِد ءَ اُرش پنجگور ءَ اسپتال ءِ چار راہ ءِ سر ءَ برجاھیں پوجی پانگسے ءِ سر ءَ کنگ بوتگ کہ ناشناسیں مردماں اتکگ ءُ پانگس ءِ سر ءَ دزبمب ءِ چگل داتگ ءُ در شُتگ انت چریشی ءَ پاکستانی پوج ءَ جانی تاوان ءِ دیمپانی کنگ کپتگ-

دومی نیمگ ءَ تمپ ءِ دمگ ھمزئی ءَ ھم سِی نومبر ءَ پاکستانی پوج ءِ سر ءَ اُرش کنگ بوتگ – اُرش ءَ پوج ءَ جانی تاوان بوتگ –

گوستگیں روچاں بوتگیں ھر چاریں اُرشانی زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءُ بلوچستان لبریشن فرنٹ ءَ منّ اِتگ انت –

رسانکدراں وتی شنگ کرتگیں درشان ءِ تہ ءَ بالگتر ءُ شاپک ءَ پاکستانی پوج ءِ سر ءَ بوتگیں اُرشانی زمّہ واری بی ایل ایف ءَ منّ اِتگ انت ءُ گوشتگ کہ مئے سرمچاراں دسمبر ءِ اولی روچ ءَ پنچ شمبے ءِ شپ ءِ ادار نھ ءُ نیم ءَ پنجگور ءِ دمگ بالگتر ساقی ءَ پاکستانی پوج ءِ بنجلے ءِ سر ءَاے ون گولہ آس داتگ کہ وتی نشانگ ءَ کپتگ انت –

جارکش ءَ وتی درشان ءِ تہ ءَ گوشتگ یک دسمبر ءَ پنچ شمبے ءِ شپ ءَ ادار دھ ءَ کیچ ءِ دمگ شاپک ءَ بارگ کوہ ءِ رودرآتکی ءِ نیمگ ءَ برجاھیں پاکستانی پوج ءِ پانگسے سر ءَ ھم مئے سرمچاراں راکٹ ءُ دگہ مزنیں سلاھاں گوں اُرش کُتگ – ھردو اُرشاں دژمنیں پوج ءَ جانی ءُ مالی تاوان بوتگ –

بی ایل ایف ءِ جارکش ءَ وتی دگہ درشان ءِ تہ ءَ گوشتگ کہ مئے سرمچاراں تمپ ءُ مند ءِ میانی دمگ ھمزئی ءَ کاسگانی کور ءَ برجاھیں پوجی پانگِس ءِ سر ءَ دور جنگیں توپک ءَ گوں اُرش کُتگ ءُ یک کارمندے کُشتگ –

پنجگور ءَ بوتگیں دزبمب اُرش ءِ زمہ واری بی ایل اے ءَ منّ اِتگ –

بی ایل اے ءِ جارکش ءَ وتی درشان ءِ تہ ءَ گوشتگ کہ گوستگیں روچ ءَ مئے سرمچاراں پنجگور ءَ اسپتال چار راہ ءِ سر ءَ برجاھیں پاکستانی پوج ءِ پانگسے ءِ سر ءَ دزبمب اُرش ءِ کُتگ ، اُرش ءِ آسر ءَ دو دژمن کارمند زدگ بوتگ انت – بلوچ لبریشن آرمی اے اُرش ءِ زمّہ واری ءَ منیت –

روکپتی بلوچستان ءِ سنی کمیونیٹی ءِ رھشون ءُ زاھدان ءَ مکی مسیت ءِ پیش امام مولانا عبدالحمید بلوچ ءَ ماں آدینگ ءِ نماز ءَ وتی تران ءَ گوشتگ کہ ایرانی سرکار سیستان و بلوچستان ءَ بیوکیں برجاھیں زوراکیاں بند بہ کنت ءُ مھلوک ءِ لوٹاں سرجم بہ کنت-

آئی ءَ گوشتگ کہ آمیدگسی پرمان زھرشانی کنوکانی سر ءَ جتا جتائیں بھتام جنگ اِنت بلے زھرشانی کنوک وتی لوٹاں کنگ ءَ اَنت-

آئی ءَ گوشتگ کہ زھرشانی کنوکانی بگیردار داروکانی گون ءَ سرکار بہ نند ایت ءُ گپ بہ کنت آیانی ایراداں گٹگیر مہ کنت آیانی راہ ءَ ڈنگر مہ جنت اگاں کسے ایراد گروکانی راہ ءَ ڈنگر جنت گڑا اے تچک ءَ یک مزنیں زلُمے ھرچ راج ایراد گر ایت-

آئی ءَ گوشتگ کہ اپوزیشن ءِ چو کوہ ءَ مِک مہ بیت،آیانی گون بہ نند ایت اگاں آ رد اَنت گڑا آیانی رھشونی ءَ بہ کنت، اگاں اپوزیشن راست اِنت گڑا باید سرکار آیانی رندگیری ءَ بہ کنت- امریکہ ءُ اسرائیل اگاں راست گش اَنر گڑا آیانی راستی ءِ رندگیری کنگ بہ بیت بلے دروگ دروگ اِنت گڑا دروگ بند کجام ھم کس بہ بیت گڑا آئی ءِ رندگیر کس نہ بیت اگاں پت ءِ کشندہ راست بہ گوش ایت ھم آئی ءِ رندگیر کنگ المی اِنت-

آئی ءَ گوشتگ کہ اگاں اسلام ءِ گپ دیم ءَ کیت گڑا راج ءُ مھلوک ءِ دیم ءَ سرکار ءِ دست جھل بہ بیت مھلوک ءِ گپ گوشدارگ بہ بیت اگاں مھلوک رد اِنت گڑا آیانی سرپد کنگ ھم سرکار ءِ سر ءَ اِنت-

آئی ءَ گوشتگ کہ کانون رد اِنت گڑا کانون مٹ کنگ بہ بیت ریفرنڈم بہ کنت مارا مہ جنت وتی ردیں کانون ءَ مئے سر ءَ مہ مُش ایت ءُ کُشگ ءِ جار ءَ مہ جنت-

آئی ءَ اسلام ءُ صحابہ کرامانی درور دیان ءَ گوشتگ کہ آیاں درستیں مردمانی گون ءَ سِلاہ ءُ تران کتگ یک ٹولی ءَ گون سِلاہ ءُ تران نہ بیت باید سرجمیں راج ءِ گون ءَ گپ ءُ تران بہ بیت-

آئی ءَ گوشتگ کہ آمیدگسی نزام ءَ بازیں زھرشانی کنوکانی سر ءَ لھتے پیسلہ کتگ اَنت اے قرآن ءُ اسلام ءِ کانون ءِ ھلاپ اَنت آئی ءَ گوشتگ کہ اے گپ راست اِنت کیامت ءِ روچ ءَ اے رد پیسلہ کنوکیں جج ھدا ءِ دربار ءَ آرگ بنت ءُ آیاں جست کنگ بیت اِنت-

آئی ءَ گوشتگ کہ ھما جج کہ مارشل ءُ پاھو دیگ ءِ پیسلہ ءَ کنگ ءَ گڑا آ ھم یک روچے ءَ دوزہ ءِ آس ءِ دیم ءَ اوشت اَنت آئی ءَ گوشتگ کہ ھما جج کہ چوشین پیسلہ کن اَنت گڑا آیاں یک روچے ھم ھدا ءِ آمیدگس ءِ دیم ءَ وسریں پیسلھانی پژدر ءَ اوشتگ لوٹ ایت-

آئی ءَ گوشتگ کہ اگاں جج یک مِدے ءِ کچ ءَ وتی پیسلہ ءَ رد بہ کنت گڑا کیامت ءِ روچ ءَ آئی ءَ را ھساب گرگ بیت اِنت پاھو دیگ وَ دورے گپے اے باز مشکلے کہ آ بکشگ بہ بیت- آئی ءَ گوشتگ کہ اسلام ءِ بندات ءَ پاھو نیست اِنت ءُ کسے ءَ را اے ھک نیست اِنت آ کسے ءَ یک کسانیں جرمے ءَ پاھو ءِ ساد ءَ گُٹ ءَ بہ دنت ءُ بہ درنج ایت-

آئی ءَ گوشتگ ما وتی سینگ امریکہ ءِ دیم ءَ اسپر کتگ اَنت وھدیکہ آئی ءَ شام ءُ عراق ءَ ناوشی پیداگ کتگ گڑا چوش مہ بیت کہ بلوچستان ءَ چوشیں جاور بہ بیاینت ءُ جاور یکدم ناگیگ بہ بنت-

آئی ءَ گوشتگ ما چِل ءُ سَے سالاں چہ زوراکی ءُ پریشانیانی دیمپان اِنت ءُ اشاں اوپار کنگ ءَ اِنت دراھیں ایرانی راج ءَ چل ءُ سَے سالاں درست چیز اوپار کتگ اَنت ءُ گچینکاریاں بھر زرتگ بلے نی ما دمبرتگ، ما بھر ءُ بانگی ءُ ھم دمبرتگ، شدکشی ءَ دمبرتگ مھلوک ءَ چوش بندیگ مہ کنت ءُ مھلوک ءَ بہ نند ءُ مھلوک ءِ جیڑھاں ھلاس بہ کنت-

آئی ءَ گوشتگ کہ ما زاھدان ءِ ھونیریچی آدینگ ءَ ھواریں ھونریچ کنوکانی سزا دیگ لوٹ اتگ ما چہ ترا زر ءُ مال نہ لوٹ اتگ –

آئی ءَ گوشتگ ازت دیوک ھدا اِنت ءُ ازت ءِ بروک ھدا اِنت، رھشون دیوک ھدا ءَ اِنت ءُ رھشون ءِ بروک ھدا اِنت ھرچی ھما لوٹ ایت ھما بیت اِنت-

روکپتی بلوچستان ءِ جتا جتائیں جاھاں چہ سِی ستمبر ءَ بندات بیتگیں زھرشانی ھمک آدینگاں یکشل ءَ بیگ ءَ اَنت –

مروچی ھم آدینگ ءِ نماز ءَ پد روکپتی بلوچستان ءِ جتا جتائیں جاھاں زھرشانی کنگ بیتگ، مروچیگین زھرشانی ءَ بلوچ مردینانی ھواری ءَ زھگ ءُ زالبولاں ھم بھر زرتگ-

زھرشانی روکپتی بلوچستان ءِ بنجاھی شھر دزاپ، ھاش، تفتان نوک آباد، چھبار، ایرانشھر ءَ بیتگ اَنت-

زھرشانی کنوکاں ایرانی سرکار خامنہ ای ءِ ھلاپ ءَ اوگام جتگ ءُ سی ستمبر ءَ ایرانی لشکر ءِ دست ءَ جنگ بیتگیں مردمانی انساپ ءُ گرگ بیتگیں مردمانی یل کنگ ءِ لوٹ بیتگ اَنت-

زھرشانی کنوکانی دارگ ءِ ھاتر ءَ ایرانی لشکر ءَ جتاجتائیں جاھاں تیرگواری ءُ آنسو گیس جتگ چریشی ءَ چہ بنداتی اھوالاں دو کس زدگ بیتگ اَنت-

جتا جتائیں شھراں شنگ بیتگیں تامربنداں گندگ بیت اِنت اود ءَ مردماں بینر ءُ پلے کارڈ دست ءَ اَنت کہ آیانی سر ءَ ’ مرگ بر خامنہ ای ‘ ءِ سرکار نبشتہ بیتگ –

زھرشانی کنوکاں اے اوگام ھم جتگ کہ کرد ءُ بلوچ یک اَنت ھردوکانی درد یک اَنت-

زانگ بہ بیت گوستگیں روچ ءَ دزاپ “زاھدان ” بلوچ عالم دین ءُ زاھدان مکی مسیت ءِ پیش امام مولانا عبدالحمید اسماعیل زئی ءِ اکس ماں مزنیں بینرے ءَ دگانی سر ءَ گندگ بیتگ اے بینر ءَ گوستگیں شپ ءَ مردماں ھمگرنچی ءِ واستا اوگام جتگ ءُ پھری شان کتگ-

زانگ بہ بیت روکپتی بلوچستان ءَ سی ستمبر ءَ یک زھرشانی ءَ کساس سد ءِ کچ ءَ مردم ایرانی لشکر ءِ تیرگواری ءَ بیران بیتگ اَنت ءُ سَے سد ءَ گیش زدگ بیتگ اَنت-

ھمے درچ ءَ انسانی ھکانی گلاں ھم ایران ءَ بیتگیں زھرشانیاں بیران بیتگیں مردمانی کچ درستاں گیش روکپتی بلوچستان ءِ گوشتگ اَنت –

اے زھرشانی شانزدہ ستمبر ءَ روکپتی بلوچستان ءِ تیابدپی شھر چھبار ءَ بلوچ جنک ماھو ءِ گون ءَ پولیس ءِ آپیسر ابراھیم کوچگزئی ءِ دست ءَ گیرت ءِ سر ءَ اُرش ءِ پژدر ءَ بندات بیتگ کہ تنی وھدی ھمک آدینگ ءَ “زاھدان خونین ” ءِ نام دیگ بیتگ –

تھریک انساپ ءِ رھشونانی رد ءَ سینیٹر اعظم خان سواتی چہ اسلام آباد ءَ بلوچستان ءِ پولیس ءَ دزگیر کرتگ ءُ برتگ-

آدینگ ءِ روچ ءَ تھریک انساپ ءِ رھشون فواد چوھدری ءَ ٹوئٹر ءَ نبشتہ کرتگ ءُ گوشتگ ’ اعظم سواتی ءِ شال ءَ برگ پاکستان ءِ آمیدگسانی واستا ءَ انسانی ھکانی درگت ءَ یک شگانے –

آئی ءَ دیمتر ءَ نبشتہ کرتگ ءُ گوشتگ کہ ھپتاد ءُ پنچ سالی کماشیں سینیٹر ءُ وکیل بے ازت کنگ بوگ ءَ اَنت-

چریشی ءَ پیش اعظم سواتی ءِ جنک فرح سواتی ءَ وتی ٹویٹ ءَ نبشتہ کرتگ کہ شال ءِ پولیس ءَ مروچی سھب ءِ ساھت ھپت ءُ نیم ءَ اتکگ ےُ منی پت لیبارٹری رپورٹس ءِ آیگ ےَ پیش ھسپتال ءَ چہ کش اتگ ءُ برتگ – آئی ءَ گوشتگ مارا گوشگ بیتگ کہ آئی ءَ شال ءَ بر اَنت-

آئی ءَ سرجمیں دنیا ءَ جاڑیگیں پاکستانی، جمھوریت ءُ انسانی ھکانی سر ءَ ستک کنوکیں مردماں گوں دزبندی کتگ کہ آ منی پت ءِ واستا توار چست بہ کن اَنت-

دومی نیمگ ءَ مروچی آدینگ ءِ روچ ءَ اسلام آباد ھائیکورٹ ءَ اعظم سواتی ءِ ھلاپ ءَ سرجمیں ڈیھ ءَ نبشتہ بیتگیں ارزیانی بارو ءَ دزبندی کیس ءِ گوشدارینگی بیتگ-

اعظم سواتی ءِ نیمگ ءَ بابر اعوان ءُ وفاق ءِ نیمگ ءَ ایڈیشنل اٹارنی جنرل پیش بیتگ ءَ پد ءَ دزبندی گپ ڈبگ بیتگ اَنت-

زانگ بہ بیت اعظم سواتی بیست ءُ ھپت نومبر ءَ انویسٹی گیشن ایجنسی (ایف آئی اے) آئی ءِ بے رھبندیں ٹویٹسامی بنیاد ءَ دزگیر کتگ-

بیست ءُ ھپت نومبر ءَ اسلام آباد ءِ دمگی آمیدگس ءَ اعظم سواتی دو روچ ءِ ریمانڈ ءَ داتگ ات ءُ پد سرجم بیگ ءَ دگہ چار ریمانڈ ءَ برتگ-

’جھانی ناشریں گل ‘ جار ءَ آئی ءَ یک سالے ءَ کمتر وھد ءَ وتی گچینی دو رھشوناں چہ زبھر بیتگ – امریکہ ءِ واستا اے مزنیں گپے نہ بیتگ کہ آئی ءِ واکداراں یک ماھے ءَ پیش آئی ءِ مرگ ءِ سرپدی بیتگ-

اسلامی اسٹیٹ کہ آ گیشتر داعش ءِ نام ءَ زانگ بیت اِنت چار شمبے ءِ روچ ءَ یک توار بندیں کلوھے ءَ ابو الحسن الھاشمی القریشی ءِ مرگ ءِ ھال شنگ بیتگ ات-

امریکہ ءِ سینٹرل کمان ءَ پد ءَ یک درشانے ءَ راست کتگ ءُ گوشتگ کہ ابوالحسن اکتوبر ءِ ماہ ءَ شام ءِ زرباری اُستان درعا ءَ فری سیرین آرمی ( ایف ایس اے) ءِ دست ءَ کُشگ بیتگ – اے یک ھنچیں ٹولی ءِ امریکہ ءِ گون ءَ ھمگرنچ نہ اِنت-

لندن ءَ ھستیں یک مانیٹرنگ ٹولی یے ’ سیریئن آبزوریٹر فار ھیومین رائٹس ‘ کہ آئی ایس ءِ رھشون ءِ مرگ ءِ آماچ بیگ ءَ ایف ایس اے ءِ بیڑاں یک سیریزے ءِ بارو ءَ رپورٹ کنوکاں بنداتی مردماں گوں ھوار بیتگ، چارشمبے ءِ روچ ءَ گُشگ بیتگ کہ آئی ءِ راستیں نام عبدالرھمان العراقی بیتگ-

بلے امریکہ ءِ واکداراں داعش ءِ رھشون ءِ مرگ ءَ وشی درشسن کتگ –

وائٹ ھاؤس ءِ پریس سیکریٹری کیرین جین پیئر ءَ گوستگیں فروری ءَ اے ٹولی ءِ گوستگیں سروک ءِ مرگ یاداشت کنان ءَ گوشتگ ’ مارا داعش ءِ مزنیں رھشونانی مرگ ءِ ھال ءَ ترندی ءَ اشکنگ وشی یے‘-

آئی ءَ گوشتگ کہ ما اے ناشرانی ھلاپ ءَ ترند تر بہ ایں ءُ گیش آیانی ھلاپ ءَ گامگیج زوریں-

ناشریں ٹولی ءِ سروکی کنوکانی شنگ بیتگیں تاواناں اے یک نوکیں وئیلے – فروری ءَ ابولحسن ءِ پیشرو ءِ مرگ ےُ مئی ءَ السمیداعی ءِ دزگیری ءَ ابید داعش گوستگیں ھشت ماھانی توک ءَ کم چہ کم وتی پنچ دگہ گچینی رھشوناں زبھر بیتگ-

ھانی اھمدی الکردی کہ یک ٹولی یے شامی بیڑانی یک مزنیں رھشونے ٹ جون ءِ ماہ ءَ امریکہ ءِ ھیلی کاپٹر اُرشاں گرگ بیتگ ات-

اشی ءَ ابید اکتوبر ءَ گوریچانی رودراتکی شام ءِ میتگ قمشلی ءَ امریکہ ءِ یک بیڑے ءَ رکان واحد الشمری کشگ بیتگ ات کہ بازین وھداں آئی ایس ءِ کارندہ جانپروشے بیتگ-

دوحہ گتر ءَ برجاھیں فیفا ورلڈ کپ ءِ دوشی شپ ھشت ٹیمانی میان ءَ گوازی کنگ بوتگ – کہ آھانی تہ ءَ موراکو ءَ کنیڈائے دیم ءَ دو ، جاپان ءَ اسپین دیم ءَ دو ءُ جرمنی ءَ کوسٹا ریکا ءِ دیم ءَ چار گولاں گوازی کٹ اِتگ انت – گروپ اِی ءِ تہ ءَ جرمنیءَ چار گولاں ابید ھم وت ءَ شانزدھمی راؤنڈ سرکُت نہ کُتگ وھدیکہ کروتیا، موراکو، اسپین ءُ جاپان شانزدھمی راؤنڈ ءِ سر بوگ ءَ سوبمند بوتگ انت –

دوشی شپ بوتگیں اولی گوازی کروتیا ءُ بلجئیم ءِ میان ءَ کنگ بوتگ کہ ھردو ٹیم دیمیگ بوتگ، ھچ نیمگ ءَ گول دئیگ نہ بوتگ – وھدیکہ گوستگیں لیباں کروتیا ءَ جوانیں گوازی پیش داشتگ ءُ گروپ ایف ءِ تہ ءَ آ شانزدھمی راؤنڈ ءَ سر بوگ ءَ سوبمند بوتگ –

ال تمیمہ فٹبال پٹ بوتگیں دومی گوازی کنیڈا ءُ موراکو ءِ میان ءَ بوتگ کہ موراکو ءَ دو پہ یک گولے ءَ گوازی کٹ اِتگ ءُ شانزدھمی راؤنڈ سربوگ ءَ سوبمند بوتگ –
موراکو ءِ نیمگ ءَ ھردو گول گوازی ءِ اولی ھاپ ءَ دیگ بوتگ انت کہ آھانی تہ ءَ یک گول ءِ لیبی ھاکم ءَ گوازی ءِ چارمی ملٹ ءَ داتگ ءُ دومی یوسف ءَ داتگ –

دوشی شپ بوتگیں سیمی گوازی جاپان ءُ اسپین ءِ میان ءَ بوتگ کہ جاپان ءَ دو پہ یک گولے ءَ گوازی کٹ اِتگ – گروپ اِی ءِ تہ ءَ ھردو ٹیم شانزدھمی راؤنڈ ءَ سربوگ ءَ سوبمند بوتگ انت –

اسپین ءِ نیمگ ءَ گول لیبی اے-موراتا ءَ یانزدھمی ملٹ ءَ داتگ وھدیکہ جاپان ءِ نیمگ ءَ اولی ھاپ ءَ ھچ گوک دیگ نہ بوتگ – دومی ھاپ ءَ جاپان ءِ نیمگ ءَ دو گول دیگ بوتگ ءُ چاپان ءَ گوازی کٹ اِتگ –

دوشی شپ بوتگیں چارمی گوازی کوسٹا ریکا ءُ جرمنی ءِ میان ءَ البیت فٹبال پٹ ءَ کنگ بوتگ کہ جرمنی ءَ کوسٹا ریکا ءِ دیم ءَ دو پہ چار گولاں گوازی کٹ اِتگ بلے گروپ اِی ءِ تہ ءَ ھردو ٹیم چہ فیفا ورلڈ کپ ءَ در اتکگ انت –

جرمنی ءِ نیمگ ءَ اولی گول لیبی سیربے ءَ گوازی ءِ دھمی ملٹ داتگ کہ پدا اولی ھاپ ءَ ھچ نیمگ ءَ گول دیگ نہ بوتگ – دومی ھاپ ءِ پنجاہ ءُ ھشتمی ملٹ ءَ کوسٹا ریکا ءِ نیمگ ءَ یک گول ءِ دیگ بوتگ – کوسٹا ریکا ءِ دومی گول جرمنی ءِ وتی لیبی ءِ مانیول ءِ پاداں گول بوتگ –