TBP Balochi

ایرانی اٹارنی جنرل ءَ گوشتگ پارلیمنٹ ءُ آمیدگس ءِ نیمگ ءَ ھجاب ءِ کانون ءِ درگت ٹپاسکاری بوگ ءَ اَنت-

ایران ءَ دو ماھاں چہ اے کانون ءِ ھلاپ ءَ زھرشانی بوگ ءَ اَنت، زھرشانی کنوک وتی ھجاباں ماندارگ ءُ سرکار ءِ ھلاپ ءَ اوگام جنگ ءَ اَنت-

فرانسیسی نیوز ایجنسی اے ایف پی ءِ رد ءَ ایران ءَ کرد زالبول مھسا امینی کہ پولیس ءِ دزگیری ءَ پد بیران بیتگ ات ءُ چریشی ءَ پد زالبولاں ھجاب ءِ سر ءَ کنگ یک داتگ –

مھمد جعفری منتظری ءَ گوشتگ کہ پارلیمنٹ ءُ آمیدگس ھردوک اے جیڑہ ءِ سر ءَ کار کنگ ءَ اَنت اشی ءِ سر ءَ ٹپاس کاری کنگ ءَ اَنت-

آئی ءَ اے راست نہ کتگ کہ کانون مٹ کنگ بیت یا ناں بلے اے گُشتگ چار شمبے ءِ روچ ءَ کمیٹی ءَ پارلیمانی دودمان کمیشن ءَ گوں گند ءُ نند کتگ ءُ یک یا دو ھپتگانی توک ءَ آسری دیم ءَ کاینت-

وھدیکہ ھجاب ءِ کانون ایر کنگ بیتگ گڑا زالبول تنکیں جینز ءُ پراھیں رنگ ءُ برنگی گدانی توک ءَ گندگ اتکگ اَنت – بلے ھمے سال ءِ جولائی ءَ ایرانی سروک ابراھیم ریئسی ءَ اے کانون ءِ ترند کنگ ءِ ھکم داتگ ات-

بلے بازیں زالبولاں اے کانون نہ من اتگ، ایران ءَ امریکہ، برطانیہ، اسرائیل ءُ کرد ٹولی ءَ را بھتام جتگ کہ آیان ڈیھ ءِ زھرشانی برانز داتگ اَنت-

ایران ءِ پاسداران انکلاب ءِ یک جنرلے ءَ گوستگیں ھپتگ ءَ اولی رند ءَ گشتگ ات کہ مھسا امینی ءِ بیرانی ءَ پد بیتگیں زھرشانیاں داں انگت ءَ سَے سد ءَ گیش مردم بیران بیتگ اَنت-

ھمے وڑ ناروے ءِ شھر اوسلو ءَ ھستیں ایرانی ھیومن رائٹس ءَ گوستگیں شپ ءَ گوشتگ اے زھرشانیاں پھزداراں کساس چار سد ءُ ھشتاد ءُ چار مردم کشتگ اَنت-

گوستگیں روچ ءَ سعودی عرب ءِ ھند جدہ ءَ تامرکاری ءِ یک فیسٹولے برجم دارگ بیتگ چریشی ءِ رنگ ءُ دروشماں سعودی عرب ءِ راجدپتر جلوانکی ءُ مھر ءُ دوستی ءِ نیمگ ءَ چِک اتگ-

سعودی عرب ءَ برجم دارگ بیتگیں فیسٹول ءَ ھمے زانگ گندگ ءَ کیت اِنت اود ءَ ھر ھما بندیگیں دود سُبک سبک ءَ آجو بیان اَنت-

سعودی عرب ءَ برجم دارگ بیتگیں فیسٹول ءَ تھنا ایوک ءَ سعودی ءِ تامر دوستاں نا بلکیں جھان ءِ جتا جتائیں تامرکاراں بھر زرتگ ءُ وتی وتی لیکہ درشان کتگ اَنت-

عرب نیوز ءِ رد ءَ امریکہ ءِ نامی ئیں سوجکات اولیور سٹون ءَ ھم اے فیسٹول ءَ بھر زرتگ ءُ وتی لیکہ درشان کتگ اَنت-

عرب نیوز ءِ رد ءَ امریکہ ءِ سوجکار ءَ جست گرگ بیت کہ آ سعودی عرب ءَ تامر جوڑ کنگ ءَ جیڑگ ءَ اِنت؟ آئی ءَ گوشتگ منی وھد ھپتاد ءُ شش سال ءَ سر اِنت نی من ءَ چی کنگی اِنت من اد ءَ اتکگ اَنت جتا جتائیں دودماناں در بہ براں یا ناں بلے اے سرجمی نہ اِنت-

آئی ءَ گوشتگ کہ منی زھن ءَ یک پراجیکٹے ھست کہ من آئی ءَ ترا گشت نہ کناں پرچا اے درگت ءَ کس نہ زانت اِنت من اگاں اشی ءَ سرجم بہ کناں گڑا سک ءَ وشی بیت اِنت من ءَ –

اولیور سٹی ءَ گوشتگ کہ رودراتکی ھندانی مردماں بازیں بودشتی ھست اَنت اد ءَ مھلوک زَر دیگ ءَ اَنت –

آئی ءَ تامرکاری ءِ دودمانی ءِ درگت ءَ گشتگ کہ من اشی ءَ مناں سنیما باز جوانیں کردے پیلو کنگ اِنت دومی نیمگ ءَ سنیما ھم باز لٹ ءُ پُلانی دیمپان اِنت ھما کسہ بیگ ءَ اَنت آ جھان ءِ واستا جوان نہ اَنت، اے دو دیمی آدینکی یے کہ تامرکاری ءِ واستا جوان نہ اِنت-

امریکہ ءِ سوجکار یکشمبے ءِ روچ ءَ ڈاکومینٹری “نیوکلیئر ” ءَ پیش کنت اِنت-

ایشی ءَ پیش “اسکارفیس ” ءِ ڈائریکٹر ءُ آر ایس آئی ایف ایف جیوری ءِ سروک ءَ پشمبے ءِ روچ ءُ فیسٹول ءِ بنداتی مراگش ءَ سعودی عرب ءِ بارو ءَ وتی لیکہ درشان کتگ اَنت-

اولیور سٹون ءَ گوشتگ کہ سعودی عرب ءِ بارو ءَ دری دنیا ءَ مردمانی بھتام اِنت کہ اد ءِ مردم باز ترند ءُ نا تبیں مردم اَنت بلے آ مردماں اد ءَ وت آیگ لوٹ ایت-

ھمے وڑ ءَ سعودی عرب ءَ برجم داشتگیں فیسٹول ءَ ویمن سنیما ءَ ھم نامی ئیں تامرکار گندگ بیتگ اَنت اشانی توک ءَ یک نامے چوپڑا سنھری گندگ بیتگ –

آئی ءَ وش رنگ داریں زردیں گد گورا کرتگ ءُ تامرکاری ءِ فیسٹول ءِ مھلوک وتی نیمگ ءَ دلگوش کتگ اَنت-

اشی ءَ ھوار ھوار دگہ تامرکاری ءَ گوں بندوکیں جیسکاایلبا، فریڈا پنٹو،تارا ایماد، لوسی ھیل، شرین سٹون، سلمیٰ ابو ضیف، سونم کپور ءُ دگہ دگہ ھوار بیتگ اَنت –

دوشی شپ دوحہ گتر ءَ فیفا ورلڈ کپ ءِ شانزدھمی راؤنڈ ءَ سربوتگیں چار ٹیمانی میان ءَ گوازی کنگ بوتگ ، کہ آھانی تہ ءَ نیدر لینڈ ءَ یو ایس اے ءِ دیم ءَ سَے پہ یک، ارجنٹینا ءَ آسٹریلیا ءِ دیم ءَ دو پہ یک گولے ءَ گوازی کٹ اِتگ ءُ وت ءَ کوارٹر فائینل ءَ سرکتگ –

دوشی شپ خلیفہ انٹر نیشنل فٹبال پٹ ءَ بوتگیں اولی گوازی نیدر لینڈ ءُ یو ایس اے ءِ میان ءَ بوتگ کہ نیدر لینڈ ءِ نیمگ ءَ سَے ءُ یوی ایس اے ءِ نیمگ ءَ یک گولے دیگ بوتگ –

نیدر لینڈ ءِ نیمگ ءَ گوازی ءِ اولی ھاپ ءَ ایم- دیفے ءَ دھمی ملٹ ءَ اولی گول داتگ ءُ دومی گول اولی ھاپ ءِ گیشیں ملٹانی تہ ءَ ڈیلے بیلنڈ ءَ داتگ وھدیکہ اولی ھاپ ءَ امریکہ ءِ نیمگ ءَ ھچ گول دیگ نہ بوتگ دومی ھاپ ءِ ھپتاد ءُ ششمی ملٹ ءَ یو ایس اے ءِ لیبی حاجی یک گولے ءِ دیگ ءَ سوبمند بوتگ ءُ نیدرلینڈ ءِ نیمگ ءَ سیمی گول لیبی ڈینزل ءَ گوازی ءِ ھشتاد ءُ یکمی ملٹ داتگ ءُ گوازی وتی ٹیم ءِ نام ءَ کتگ –

احمد بن علی فٹبال پٹ ءَ دوشی شپ بوتگیں دومی گوازی ارجنٹینا ءُ آسٹریلیا ءِ میان ءَ بوتگ کہ ارجنٹیا ءِ نیمگ ءَ دو ءُ آسٹریلیا ءِ نیمگ ءَ یک گولے دیگ بوتگ آ ھم ارجنٹینا ءِ لیبی اینزو ءِ سوب ءَ اناگتی گول بوتگ –

ارجنٹینا ءِ نیمگ ءَ اولی گول گوازی ءِ سی ءُ پنچمی ملٹ ءَ دیگ بوتگ کہ ارجنٹینا ءِ لیبی لیونل میسی ءَ داتگ ءُ دومی گول جولئین ءَ دومی ھاپ ءَ گوازی ءِ پنجاہ ءُ ھپتمی ملٹ ءَ داتگ گوازی کٹ اِتگ –

کوارٹر فائنل ءَ ارجنٹینا ءُ نیدر لینڈ دیم پہ دیم انت ءُ آھانی گوازی نُھ دسمبر ءَ لوسیل فٹبال پٹ ءَ کنگ بیت اِنت –

بلوچ اسٹوڈنٹس ایکشن کمیٹی ءِ نیمگ ءَ ماں شال ءِ پریس کلب ءَ The Importance of Literacy Awareness to advance the nation بنگپ ءِ سر ءَ مراگش ءِ برجم دارگ بوتگ – مراگش ءَ نودربر ءُ دگہ مردماں بھر زرتگ –

مراگش دو دمان ءِ بے تواری ءَ پد بندات کنگ بوتگ ءُ مراگش ءَ بساک ءِ بنجاھی سنٹرل کمیٹی ءِ باسک ازر بلوچ، بی بی زلیخہ بلوچ ، جنید جمالی ءُ کسان سالیں نودربر بانک ایمن بلوچ ءَ تران کُتگ ءُ پینل ڈسکیشن ءَ بساک ءِ سنٹرل ڈپٹی جنرل سیکٹری رفیق بلوچ ءُ بساک ءِ بنجاھی سنٹرل کمیٹی ءِ ڈاکٹر سمیہ بلوچ بوتگ انت ءُ مھماندار علی بلوچ بوتگ ءُ اشی ءَ ھوار کسان سالیں نودربراں بلوچی سوت “راج وانندہ منی “ءِ سر ءَ ٹیبلو ءِ ھم پیش داشتگ مراگش ءِ گڈسر ءَ بساک ءِ نیمگ ءَ جوڑ کنگ بوتگیں ڈاکومنٹری ءِ ھم مراگش ءَ پیش دارگ بوتگ –

مراگش ءَ ترانکاراں بلوچ لٹریسی کمپئین درگت ءَ سرپدی داتگ گُشت سال دوھزار ءُ بیست ءَ کہ بساک ءِ بنجاھی کونسل کہ بوتگ ھما وھد ءَ پیسلہ زورگ بوتگ لٹریسی ءِ ریٹ ءَ برز آرگ ءِ واستا کسانیں جھدے کن ایں گڑا ھما ٹیم ءَ بلوچ لٹریسی کمپئین ءِ نام ءَ کار بندات کنگ بیت اَنت-

آھانی گوشگ ات کہ اشی ءِ مول ءُ مراد ھما جاہ ءَ کہ وانگ جاہ نیست انت یا وانگ جاہ ھست ءُ آسراتی نیست گڑا ھما واکدارانی سر ءَ پریشر دات کت کنیں کہ آسراتی بہ دے اَنت اگاں ما لٹریسی ءِ گوستانک ءَ بہ چاریں گڑا مارا گندگ کئیت کہ نبشتکار فالو فرائیرے برازیل والھانی واستا کمپئین جندے لٹریسی کمپئین نام ءَ بندات کتگ – اشی ءَ رند کیوبا ءِ تہ ءَ ریولیوشن کئیت گڈا کیوبا ءِ سرکار کیوبن لٹریسی ءِ نام ءَ کمپئین جوڑ کتگ ات کہ آئی ءِ مول ءُ مراد پشت کپتگیں ھما دمگ کہ ھستاں اود ءِ مھلوک ءَ زانت ءِ نیمگ ءَ آرگ ءُ آسراتی دیگ بیت اِنت –

آھانی گوشگ ات کہ جھان ءَ کہ لٹریسی زانگ بیت چہ چاگرد ءِ نیمگ ءَ ھما چاگرد کہ مردم ھست انت آیاں اے چیزے جیڑ ات کنان، چیزے پھمیت کن انت یا آھانی تہ ءَ بدلی آرت کناں یا ناں – وھدیکہ چاگرد ءِ تہ ءِ مردم بدلی آرت کناں جوڑ کرت کن اَنت گڑا زانگ بیت کہ اے لٹریسی چاگردے ، ھما چاگردے تہ ءَ مردم جیڑ ات مہ کن اَنت یا بدلی آرت مہ کن اَنت گڑا زانگ بیت کہ اے چاگرد ایل لٹریسی یے – لٹریسی ھر چاگردے ءِ بنکی ھک انت –

آھانی گوشگ ات کہ وانگ ءُ زانگ ھر گونڈوے ءِ بنکی ھک انت ھر ڈیھے ءِ زمہ واری انت کہ ھما گونڈو مپت ءَ بوان ایت بلے مئے گور ءَ ھچ چشیں ادارہ نہ بوتگ ءُ ادارھاں وانگ ءِ درگت ءَ ھچ پٹ ءُ پول نہ کتگ کہ بلوچ ءِ ھر زھگ وانینگ بوگ ءَ انت یا ناں اگاں وانینگ بوگ ءَ انت تاں کجام ھد ءَ اگاں نبوگ ءَ انت اشی سوب چی انت – تنی وھدی یک ءُ دو ءَ ابید مئے دیم ءَ ھچ چشیں چیزے گندگ نہ بوتگ کہ وانگ ءِ سر ءَ کار کتگ –

آھانی گوشگ ات کہ ما بلوچستان ءَ دوازدہ سد اسکول ءَ شُتگ اِنت کہ آھانی تہ ءَ ھپسد اسکول بند بوتگ انت – بلوچستان ءَ سرجمیں دوازدہ ھزار سکول بنت گڑا ما بہ چاریں اے ھچ نہ انت ءُ بازیں اسکول پُرشت ءُ پروش ءِ آماچ انت ءُ گونڈو درچکانی ساھگ ءَ نشتگ انت – بلوچستان ءِ کساس بیست ءُ سَے لک زھگ انت کہ آ وانگ ءَ ڈن انت کسے کہ وانگ ءَ رؤت ھم آھانی گور ءَ آسراتی نیست – ھمے ھاتر ءَ بلوچ لٹریسی کمپئین اڈ دیگ بوتگ مارا لوٹ ایت ھمے کمپئین گیش ءَ چہ گیش ھوار بہ بہ ایں ءُ اشی ءَ مھکم بہ کنیں ـ مارا درسیں گلاں یکجاہ بوگ ءُ اشی ءِ سر ءَ کار کنگی انت –

ماتی زبان ءِ تہ ءِ وانگ ءِ درگت ءَ بی بی زلیخہ بلوچ ءَ ماں بلوچی ءَ گُشتانک دات ءُ علم تابت ءِ دارگت ءَ ایمن بلوچ ءَ ماں براھوئی ءَ وتی گشتانک دات-

پشین ءِ سیمسراں ایرانی لشکر ءَ تیرگواری کنان ءَ یک مردمے کُشتگ-

سر بیتگیں ھالانی رد ءَ پشین ءِ دمگ کستگ ءِ سیمسری ھند ءَ ایرانی لشکر ءَ یک مردمے ءِ سر ءَ تیرگواری کرتگ ءُ کُشتگ-

وئیل راسک ءُ پیشین ءَ ھواریں دمگ کستگ ءَ پیش اتکگ کہ روکپتی ءُ رو دراتکی بلوچستان ءَ ھوار کنوکیں سیمسری دمگ کستگ ءَ پیش اتکگ-

بیران بیتگیں مردم ءِ گور ءَ پجار کاڈ ءُ دگہ چیز دز نہ کپتگ اَنت چریشی ءِ سبب ءَ آئی ءِ پجار نہ بیتگ-

ھالانی تہ ءَ گوشگ بیتگ کہ کشگ بیتگیں مردم ءِ سر ءَ ھما وھد ءَ ایرانی لشکر ءَ تیرگواری کرتگ کہ آ روگ ءَ بیتگ ءُ ابید ءِ دارگ ءَ تچک ءَ آئی ءِ سر ءَ تیرگواری کنگ بیتگ ءُ چریشی ءَ آ بیران بیتگ-

بیران بیتگیں مردم ءِ لاش ھسپتال ءَ آرگ بیتگ ءُ آئی ءِ پجار تنی وھدی نہ بیتگ-

یورپ ءِ بازیں ڈیھاں یوکرین ءِ سپارت جاھاں “ھونریچی ” پارسل سر کنگ بیتگ اَنت ڈبوکانی توک ءَ رسترانی چم مان بیتگ اَنت-

برطانو ءِ روتاک گارڈین ءِ رد ءَ میڈرڈ یوکرین ءِ سپارت جاھاں آدینگ ءِ روچ ءَ لھتے ھنچیں پارسل سر بیتگ اَنت آیانی توک ءَ رسترانی چم بیتگ اَنت ءُ یک ڈبوکے ءَ ھون مان بیتگ اَنت-

یوکرین ءُ اسپین ءِ واکدارانی گوشگ اِنت پارسلزانی درچ بس یکیں ڈیھ ءَ نہ اَنت بلکیں بازیں ڈیھاں یوکرین ءِ سپارت جاھاں ھمے وڑ بیتگ اَنت-

روتاک ءِ رد ءَ آدینگ ءِ روچ ءَ پارسل ءِ آیگ ءَ پد اسپین ءِ بنجاھی شھر میڈرڈ ءَ یوکرین ءِ ایمبیسی ءِ ماڑی انگیر کتگ ءُ کش ءُ گوری جاہ پٹ ءُ پول کتگ اَنت شیواری کُچکانی کمک گون بیتگ اَنت-

رپورٹ ءَ گوشگ بیتگ داں انگت ءَ ھبدہ سپارت جاھاں بمب ءَ گوں تراکینگ ءِ بیھاراں ھوار گوک ءُ کُچکانی چم مان بیتگ اَنت-

زانگ بہ بیت لھتے روچ ءَ پیش میڈرڈ یوکرین ءِ سپارت جاھاں ھنچیں لھتے لپاپہ راہ دیگ بیتگ اَنت آیانی پچ کنگ ءَ تراک بیتگ اَنت سپارت جاھانی یک کارندھے کمے زدگ بیتگ-

یوکرین ءِ وزارت ھارجہ ءِ جارکش اولیگ نیکولنکو ءِ گوشگ اِنت ھنگری، نیدر لینڈز، پولینڈ، کروشیا ءُ اٹلی ءِ سپارت ھانہ ءُ نیپلز، کراکو ءُ برنو قونصلیٹس دیم دیگ بیتگیں پیکٹس لھتے ماڑیانی توک ءَ ایر کنگ بیتگ اَنت پد ءَ آیانی بدیں بوہ اتکگ –

آئی ءَ گوشتگ کہ مارا چہ چیر بیتگیں کلوھانی سرپد بیگ ءِ جھد ءَ اِنت – آئی ءَ گوشتگ اے ھم گوشگ بیتگ وزیر ھارجہ دمترو ءَ کولیبا ءَ دراھیں سپارت جاھ ءُ قونسلیٹس پھزداری ترند کنگ ءِ کڈنی کتگ اَنت-

یوکرین ءِ واکدار ءِ گوشگ اِنت ویٹیکن سٹی ءَ یوکرین ءِ سفیر ءِ مندی جاہ ءَ دروازگ پروشگ بیتگ ءُ کازکستان ءِ سپارت جاہ ءَ بمب ایر کنگ ءِ دروگیں گپ گوشگ بیتگ اَنت-

اے پارسلز شش بیھاری نمدیانج آیگ ءَ پد اتکگ اَنت ھنچش میڈرڈ ءَ امریکہ ءِ ایمبیسی ءَ راہ دیگ بیتگ اَنت-

پارسلز ءُ نمدیانی رسگ ءَ پد اسپین ءِ واکداراں پھزداری ترند کتگ اَنت- زانگ بہ بیت ھمے ساک ءِ بیست ءُ چار فروری ءَ روس ءَ ھمساھگیں ڈیھ یوکرین ءِ سر ءَ بیڑ برتگ ات ءُ داں انگت ءَ برجاہ اِنت-

روس یوکرین ءَ وتی ملکت سرپد بیت اِنت ءُ دومی نیمگ ءَ یوکرین وت ءَ یک آجوئیں ڈیھے گوش ایت –

بلوچستان ءِ دمگ چہ خضدار ءَ دگہ دو ورناہ زورانسری آوار جنگ بیتگ اَنت، گوستگیں بیست ءُ چار ساھتانی تہ ءَ چہ بلوچستان ءَ زورانسری آوار جنیانی پنچ وئیل دیم ءَ اتکگ اَنت۔

خضدار ءِ ھنکین گریشہ ءِ جھمنندیں ورناہ افضل ء عباس ءُ نور خان ء علی زورانسری بیگواہ کنگ بیتگ اَنت۔

ھندی اھوالکاراں ٹی بی پی ءَ گُشتگ کہ بیگواہ بیتگیں دویں ورناہ سرکار ءِ مستری ءَ کارکنوکیں سلاہ بندیں ٹولی ءِ مردماں شپ ءِ وھد ءَ آیانی لوگاں چہ آ دزگیر کُتگ ءُ وتی ھمراہ بُرتگ اَنت کہ چرایشی ءَ پد آیانی درگت ءَ ھچ پئیمیں اھوال نیست اَنت۔

زانگ بہ بیت کہ بلوچستان ءَ پاکستانی پوج ءُ چیریں ادارگانی سرءَ بازیں سلاہ بندیں ٹولیانی اڈ دئیگ ءِ بھتام اِنت کہ لس زبان ءِ تہءَ کشندہ ٹولی (ڈیتھ اسکواڈ) گُشگ بیت اِنت۔ اے ٹولیانی سرءَ مردمانی سرءَ سلاہ بندیں اُرش، زورانسری بیگواہ کنگ، پہ تاوان بیگواہ کنگ ءُ منشیات ءِ باپاری ءَ ھوار ھمے پئیمیں دگہ ھم بھتام جنگ بنت۔

بلوچستان ءَ گوستگیں بیست چار ساھتانی تہءَ پنچ مردم زورانسری آوار کنگ بیتگ اَنت، کہ اِشانی تہءَ یکے چہ کلات ءَ، دو چہ پنجگور ءَ ءُ دو مردم چہ خضدار ءَ بیگواہ کنگ بیتگ اَنت۔

نبشتانک: بلوچ سیاست ءِ سدسال ءِ پَند

نبشتہ کار: کمبر بلوچ

دی بلوچستان پوسٹ

بیستمی کرن ءِ دومی دھک ءَ وھدے بلوچ راجکاری ءِ بنھشت عبدالعزیز کرد ءَ ایر کرت، اے زمانگ ءَ انگریز ءِ ھلاپ ءَ گڈی سرکشی ءِ جنز (مری کھتران) وتی آسر ءَ سر بوتگ اَت۔

بلوچ راج ھر زمانگ ءَ ڈَنّی اُرشکارانی ھلاپ ءَ چو کوہ ءَ مک بوتگ ءُ وتی بیرک ءَ را بُرز کرتگ، مہر گھڑ ءَ بگر داں پرنگیاں بیا ءُ داں انوگیں باریگ ءَ انگریز ءُ ایدگہ زورگراں گوں یکشل ءَ وتی جنگ برجم داشتگ ءُ داں روچ ءِ مرچی ھم بلوچ وتی سرزمین ءِ مہر ءَ گوں بندوک، دژمن ءَ گوں گر ءُ چیل بوّان ءَ وتی ھاک ءِ ھک ءَ پیلو کنگ ءَ اِنت۔

بیستمی کرن ءِ اولی دھک ءَ داں زورگیرانی ھلاپ ءَ سیاسی جنگ ءِ زبھری ءُ سیاسی سنچ ءِ نہ بوگ ءِ سوب ءَ چہ ڈَنّی زورگیری مدام دراج کشّ بوّان بوتگ اَنت۔ بگندئے ھمے سیاسی نہ پھتگی ءِ برورد ات کہ ایشی ءِ سوب ءَ چہ بلوچ راج داں روچ ءِ مرچی ھم زورگیر ءِ پادانی چیر ءَ لگتمال اِنت۔

بیستمی کرن ءِ دومی دہمھک ءِ گڈی سال(1920)ءَ عبدالعزیز کرد ءُ آئی ءِ نودربریں ھمبراھاں “ینگ بلوچ”ءِ نام ءَ یک نودربر گلے ءِ بنھشت ایر کت کہ آ بلوچ سیاسی بندپتر ءِ رُست ءُ ردوم ءِ بنھشت جوڑ بوت، نُھ سال ءِ اندیمی ءَ پد 1929ءَ یوسف عزیزمگسی ءِ سروکی ءَ “انجمن اتحاد بلوچاں” ءِ دروشم ءَ یک مہمگکمیں پارٹی ءِ سانچہ جوڑ بوگ ءَ سوبمند بوت انت۔
انجمن اتحاد بلوچان ءِ نیمگ ءَ ماں جیکب آباد ءِ اولی آل انڈیا بلوچ کانفرنس ایر کنگ بوت کہ ایشی ءِ پاگواجھی خیرپور ءِ میر علی نواز خان تالپور ءَ کت کہ27دسمبر1932 ءَ بندات بوت داں 29دسمبر 1932 ءَ آسر بوت۔ انجمن ءِ مول ءُ مراد ایش ات کہ بلوچ راج ءَ را یکجاہ بہ کن اِیں ءُ راج ءِ نیام ءَ ھم سسائی ودیگ بکن ایں، ھم پکری ءِ ودیگ کنگ ءِ ھاترا جھل ءَ داتگیں نکتوانی لوٹ کنگ بوت۔

1۔ ایف سی آر ءِ ھلاسی
2۔بلوچستان ءِ تھ ءَ یک عبوری ءُ رھبندی ھکومتے ءِ جوڑشت
3۔بلوچستان ءِ تھ ءَ کارجاھانی جوڑشت
4۔بلوچستان ءِ مزنیں زانشتجاھانی ھاترا کارگل جوڑ کنگ
5۔ بلوچانی یکمشت بوگ ءِ ھاترا بلوچستان ءِ بازیں بھراں ھوار کنگ

دسمبر 1933ءَ اڑ داتگیں دومی آل انڈیا بلوچ کانفرنس ءِ تھ ءَ گوستگیں لوٹانی منّگ ءِ ھمراھی ءَ اے گپ ءِ سرا زور دیگ بوت کہ بلوچستان ءِ تھ ءَ یک کانودی ءُ رھبندی ھکومتے ھمے زوتاں اڑ دیگ بہ بیت۔

جنوری 1934ءَ انجمن اتحاد بلوچاں ءِ کارگشاد (جنرل سیکرٹری) عبدالعزیز کرد ءَ را زورگریں استان ءِ کارندھاں گپت ءُ بندیگ کت ءُ نگیگیں جاورانی سوب ءَ یوسف عزیز مگسی یک سالے ءَ داں انگلستان ءَ درانڈیھ بوت ءُ وتن ءِ واتری ءَ رند یوسف عزیز مگسی ءَ آجوئی ءِ ھاترا جنگی جنز ءِ جھد ءَ را دوستدارگ بندات کت ءُ ھمے درچ ءَ را برجم داشت۔

1935ءَ کوئٹہ ءِ بوتگیں زمین چنڈ ءِ ناگتیں مرگ ءَ چہ پیسر یوسف عزیز مگسی انجمن ءَ را آشوبی رنگ ءَ مھکم کنگ ءِ جھدانی تہ ءَ دزگٹ ات۔

یوسف عزیز مگسیءِ مرگ ءُ عبدالعزیز کرد ءِ بندیگ بوگ ءِ سوب ءَ چہ انجمن ءَ وتی مھکمیں سانچہ ءَ را چکپروش کت ءُ گل پرشت ءُ پروش ءِ آماچ بوت۔ عبدالعزیز کرد ءِ یلہ دیگ ءَ رند انجمن ءَ را دوار ءَ نز آرگ ءِ چن ءُ لانچ بندات بوت ءُ 5 فروری 1937ءَ گل ءِ بنجاھی دیوان ءَ را برجم داران ءَ انجمن اتحاد بلوچاں ءِ پروشت ءُ کلات سٹیٹ نیشنل پارٹی ءِ بنھشت ءَ را ایر کت۔

کلات سٹیٹ نیشنل پارٹی ءَ بلوچستان ءِ سر ءَ برطانوی راج ءِ زورگیری ءِ ھواری ءَ سرداری رہبند ءِ ھلاپ ءَ وتی جہد بنگیج کت انت ءُ شرکاری ءِ ھاترا وتی کُنشتی گامگیج چست کت انت۔ پارٹی ءِ گلی سانچہ ءِ مھکم کنگ ءُ پروگرام ءَ را بلوچستان ءِ کنڈ کنڈ ءَ داں رسینگ ءِ ھاترا جد ءُ جھد بندات بوت ءُ بلوچ راجی لیکہ ءِ رُست ءُ ردوم ءِ سر ءَ نیشنل پارٹی ءَ را بلوچ لس مھلوک ءِ تہ ءَ نامداری رس ات۔

برطانوی سرکار ءِ دست مرزی ءُ وتی ٹکی زند ءَ را برجاہ دارگ ءِ ھاترا سردار ءُ خان کلات مچانکی رنگ ءَ کلات سٹیٹ نیشنل پارٹی ءِ ھلاپ بوت انت ءُ 6جولائی 1939 ءَ مستونگ ءِ پارٹی ءَ سالی دیوان ءِ سرا سرداراں بیڑ برت ءُ دیوان ءَ را درنگ ءُ درانگ کت۔ خان آف کلات میراحمد یار خان ءِ ھاترا 20جولائی 1939ءَ کلات سٹیٹ نیشنل پارٹی ءِ سرا بندش جنگ بوت۔ پارٹی ءِ پاگواجہ ملک عبدالرحیم خواجہ خیل، غوث بخش بزنجو، گل خان نصیر، عبدالکریم شورش ءُ درزنانی ھساب ءَ باسکاناں درانڈیھ کنگ بوت۔ کلات ءِ تھ ءَ پارٹی ءُ آئی ءِ چست ءُ ایرانی سر ءَ بندش ءِ سوب ءَ پارٹی ءَ وتی بنزہ شال(کوئٹہ) گچین کت ءُ کہ شال ءَ چہ وتی چست ءُ ایراں برجم بہ دار انت۔

دومی جھانی جنگ(1939-1845) ءِ وھد ءَ انڈین ڈیفنس ایکٹ ءِ جھت ءَ سیاسی چست ءُ ایرانی سر ءَ بندش جنگ بوت، ھمے میان ءَ کلات سٹیٹ نیشنل پارٹی ءَ زیرزمینی سیاسی چست ءُ ایر جاری ءُ ساری داشت انت ءُ پارٹی ءِ اگدہ داراناں جواہر لال نہرو ءَ گوں کلات سرکار ءِ نیمگ ءَ چہ پارٹی ءِ سر ءَ بندش ءِ ھلاپ ءَ زھرشانی کنگ ءِ سکین دات۔نہرو ءِ پارٹی ءَ را کانگریس ءِ تھ ءَ ھوار گیجگ ءِ شرت ءِ سر ءَ پارٹی ءِ اگدھداراناں ارزشت دیگ ءِ بیسہ درشانت، پارٹی ءَ 1944ءَ گڈسر ءَ “آل انڈیا سٹیٹ پیپل کانگریس”ءِ تہ ءَ ھوار بوت کہ ایشی ءَ رند الس ھلاپ ءِ بندر ءَ چہ پد کنز بوت انت ءُ دوبارہ پد ءَ پارٹی ءِ گوستگیں بستار برجم داشت کہ ایش نوں بلوچستان ءِ آجوئی ءَ داں برجم بوت۔

برطانوی راج ءَ وتی زورگیری ءِ اھد ءِ آسر ءَ بلوچستان یک آجوئیں استانے من اِت کہ آ یک ملکے ءِ ھساب ءَ دنیا ءِ ملبت ءِ تہ ءَ سھرا بوت۔ ءُ اود ءَ دو رھبندی اسمبلی برزی ایوان ءُ جھلی ایوان سازگ بوت انت۔ بلوچستان ءِ تھ ءَ جھلی ایوان ءِ ھاترا لس گچینکاری ءِ تہ ءَ کلات سٹیٹ نیشنل پارٹی ءِ مچانکی رنگ ءَ 52 ءِ تھ ءَ چہ39 نشست باج برت ءُ گیشیں مھلوک پہ وتی دسترس ءَ کت انت ءُ غوث بخش بزنجو ایوان ءِ سروک گچین کنگ بوت۔ اے آجوئی ءَ سک دیر نہ جت ءُ مارچ 1948ءَ پاکستان ءَ بلوچستان ءِ سر ءَ بیڑ برت۔

آغاعبدالکریم ءِ سروکی ءَ کلات نیشنل پارٹی ءِ سیکرٹری ملک سعید دہوار، کمیونسٹ پارٹی سندھ بلوچستان ءِ سیکرٹری قادر بخش نظامانی، بلوچ لیگ ءِ سیکرٹری محمد حسین عنقا ءُ دگہ برھلاپیں ھمبراھاں گوں اولی گوریلا جنگ ءِ بنھشت ءَ ایر کنگ ءَ اوگانستان ءَ شت انت۔ اوگانستان، سویت یونین ءُ بلوچ تمنانی نیمگ ءَ چہ کمک نہ رسگ ءِ سوب ءَ بلوچ ءِ سروکاں جنگ ءِ درچ ءَ داشت کت نہ کت ءُ اکرار نامگ ءُ تپاکی کاگداناں دزرند جنان ءَ اوگانستان ءَ چہ واتر اتک انت۔

آغا عبدالکریم ءُ آئی ءِ ھمبراھانی مسام پروشی ءُ بدھلاپی ءِ سر ءَ کلات ءِ نزیک ءَ آھاں گپت ءُ گیر کت چوش کہ پد ءَ بازیں سالے ءَ داں کید ءُ بند بوت انت ءُ یلہ دیگ ءَ رند 14جولائی1955ءَ آغا عبدالکریم، غوث بخش بزنجو، محمد حسین، قادر بخش نظامانی ءُ کلات سٹیٹ نیشنل پارٹی ءِ ھمبراھاں “استمان گل”ءِ نام ءَ یک سیاسی پارٹی ءِ بنھشت ایر کت، آغا پاگواجہ ءُ عنقا کارگشاد گچین بوت اَنت ءُ پارٹی ءَ ون۔یونٹ پالیسی ءِ برھلاپی درشان کت ءُ یکجاھی وتواجھیں صوبہ بلوچستان ءِ لوٹ کنگ بوت۔

استمان گل زورگیری ءَ پد اولی مجکمیں سیاسی تاکت ءِ رنگ ءَ دیم ءَ اتک ءُ بلوچ راج ءِ تہ ءَ سیاسی سنچ ءِ ودی کنگ ءُ راجی ھکانی پھازگ ءِ ھاترا وتی جد ءُ جھد ساری ءُ جاری کت انت۔

2دسمبر 1956ءَ استمان گل پاکستان نیشنل پارٹی ءِ تھ ءَ ھوار کنگ بوت کہ ایشی ءِ تھ ءَ جی ایم سید ءَ سندھ متحدہ محاذ، حیدر بخش جتوئی ءَ سندھ ہاری کمیٹی، خان غفار خان ءَ خدائی خدمتگار تحریک ءُ عبدالصمد اچکزئی ءَ ورور پشتون یکجاہ ءُ ھوار بوت انت۔ 1957ءَ رودراتکی پاکستان (مروچیگیں بنگلہ دیش) ءَ چہ مولانا باشانی ءَ عوامی لیگ ءَ ھوار بوگ ءَ پد پاکستان نیشنل پارٹی ءِ نام ءَ را مٹ کت ءُ ایشی ءِ جاگہ ءَ نیشنل عوامی پارٹی ءِ نام ایر کنگ بوت۔

نیشنل عوامی پارٹی پاکستان ءِ تھ ءَ زیردستیں مھلوک ءِ ھکانی پھازگ ءِ ھاترا یکجاھیں جد ءُ جھد ءُ ون یونٹ ءِ پروشکاری ءِ ھلاپ ءَ سان دور دیوکیں جد ءُ جھد ءِ بنپد ایر کت ءُ راجانی ھکانانی ھاترا سان دور دیوکیں توارے جوڑ بوت۔

ہپتمی دھک ءَ بلوچ نودربراں بلوچ اسٹوڈنٹس آرگنازیشن ءِ بنھشت ایر کت کہ ایشی ءَ بلوچ راجکاری ءَ را نوکیں راھے ءَ برت ءُ بلوچ راجمان ءِ تھ ءَ بلوچ راجکاری ءَ را ہر زمانگ ءِ توک ءَ وتی جوانیں کرد پیلو کت۔

ھپتمی دھک ءَ بلوچ رھشون پاکستان ءِ پارلیمان ءِ تھ ءَ گچین بوت انت، چہ مکران ءَ باقی بلوچ، چہ کلات ءَ عطاللہ مینگل ءُ چہ شال ءَ خیر بخش مری ءَ پارلیمنٹ ءِ تھ ءَ بلوچانی ھکانی پھازگ ءِ جد ءُ جھد برجاہ داشت انت ءُ نیب ءِ ون یونٹ ءُ راجانی ھکانی پھازگ ءَ پہ جد ءُ جھد ءِ درچ ءَ را برجمینت چوشکہ پد ءَ ون یونٹ ءِ چکپروشی ءَ داں آسر بوت ءُ بلوچستان ءَ را یک صوبہ یے ءِ بستار رس ات۔

بلوچ رھشونانی تھ ءَ نواب خیر بخش مری، عطاللہ مینگل ءُ غوث بخش بزنجو ءَ نیپ ءِ بینر ءِ ساھگ ءَ وتی سیاسی جد ءُ جھد برجمینت انت، نیپ بلوچستان ءَ یکیں راجدوستیں پارٹی ءِ رنگ ءَ سھرا بوت ءُ 1972ءَ صوبہءِ تھ ءَ اولی راجدوستیں ھکومت ءِ بنپد ایر کنگ ءَ سوبمند بوت۔ خیر بخش مری ءَ پارٹی ءِ دروشم ءَ صوبائی سرکماشی وتی زمہ واریاں برجاہ داشت، عطاللہ مینگل صوبائی مزن وزیر ءُ غوث بخش بزنجو گورنر بلوچستان گچین کنگ بوت۔ نیپ ءَ اے ھکومت نُھ ماہ ءَ داں برجاہ دارگ ءَ پد بھٹو ءَ 1973ءَ نیپ ھکومت پرشت ءُ نیپ ءِ رھشوناناں کید ءُ بند کت۔

1973ءَ نیب ءِ رھشونانی بندیگی ءَ چہ پد بلوچ انسرجنسی میر ہزار خان بجرانی ءِ سروکی ءَ بندات بوت کہ ایشی ءِ توک ءَ فورتھ انٹرنیشنلءَ چہ لندن گروپ، سندھ ءَ چہ میر علی احمد تالپر ءِ پرزند میر محمد علی تالپر ءُ بی ایس او ءِ سروکاں بھر زرت کہ1978ءَ داں ساری ءُ جاری بوت ءُ نگیگیں جاورانی سوب ءَ چہ یاگی ءُ بلوچ راج ءِ ہزارانی کساس ءَ اوگانستان ءَ درانڈیھ بوت انت۔

جولائی 1977ء جنرل ضیا الحق ءِ ھکومت ءِ سر ءَ زورگیر بوت ءُ نیپ ءِ رھشونانی ھواری ءَ سرجمیں بلوچ سیاسی بندیگاناں ھم یلہ کت۔نیپ ءِ رھشونانی یلہ بوگ ءَ پد سردار عطاللہ مینگل ءُ نواب خیر بخش مری پارلیمانی راجکاری ءَ چہ دزکش بوت انت ءُ ڈنی ملکاں جی شاہ ولایت بوت انت ءُ ھمودا چہ بلوچستان ءِ آجوئی ءِ ھاترا وتی سیاسی جد ءُ ججد جاری ءُ ساری کت، وھدے کہ غوث بخش بزنجو ءَ پاکستانی کنفیڈرشن ءِ تہ ءَ ھوار بوگ ءَ گوں ھکانی ھاترا جد ءُ جھد ءِ پیسلہ کت۔

1980ءِ بندات ءَ غوث بخش بزنجو ءَ پاکستان نیشنل پارٹی ءِ بنپد ایر کت ءُ تحریک ءِ استقلال ءَ گوں ھوار بوان ءَ وتواجھی ءِ ھاترا جنرل ضیا الحق ءَ را یک یاتگیری یے پیش کت وھدے کہ جنرل ضیاءِ سیاسی چست ءُ ایرانی سرا بندش ءِ سوب ءَ پاکستان نیشنل پارٹی شش ماہ ءَ داں زیات وتی چست ءُ ایر برجاہ داشت نہ کت انت۔

1981ءَ عطاللہ مینگل ءَ لندن ءِ توک ءَ ورلڈ بلوچ آرگنائزیشن ءِ بنپد ایر کت کہ ایشی ءِ مول ءُ مراد بلوچ ڈائسپورا ءَ را یکجاہ کنگ ءُ بلوچ دود ءُ ربیدگ ءِ پھازگ ءِ ھاترا جد ءُ جھد کنگی ات۔ بلوچ رھشوناں یک آجوئی ءُ شاھیگانیں بلوچستانے ءِ ھاترا جد ءُ جھد بندات کت ءُ لندن ءَ چہ یک روتاکے شنگ کت کہ اود ءَ چہ آجوئی ءِ ڈنڈاھوڑ کت۔

نواب خیر بخش مری دو سال ءَ انگلستان ءُ فرانس ءِ تہ ءَ درانڈیھی بوگ ءَ پد اوگانستان ءَ درانڈیھیں بلوچ راج ءُ یاگیانی کرا سر بوت۔

1987ءَ شھید فدا احمد بلوچ ءُ آئی ءِ ھمبراھاں بلوچستان نیشنل یوتھ موومنٹ ءِ بنپد ایر کت، ایشی ءِ بنگیجی ءَ گوں پارلیمانی سیاست ءِ برھلاپی درشانت بلے 1988ءِ گچینکاری ءَ چہ پیسر بلوچستان نیشنل موومنٹ ءِ نام ءَ چہ یک سیاسی پارٹی یے جوڑ کنگ بوت، اے گچینکاری ءِ توک ءَ بھر زورگ ءَ گوں اکبر خان بگٹی ءِ گوما ھوار بوان ءَ بلوچستان نیشنل الائنس جوڑ کنگ بوت۔

1988ءِ گچینکاری ءَ غوث بخش بزنجو ءَ پاکستان نیشنل پارٹی ءَ را شکست دات ءُ بلوچستان نیشنل الائنس ءِ صوبائی ھکومت ٹہ اِت۔ نواب اکبر بگٹی صوبہ ءِ مزن وزیر نامینگ بوت ءُ دو سال ءَ رند پاکستان ءِ سرکماش غلام اسحاق خان ءَ بنجاھی ھکومت ءِ تھت چپی کت ءُ صوبائی ھکومت ھم یک یک کت۔

1990ءَ بلوچستان موومنٹ یک زورآوریں سیاسی پارٹی ءِ بستار ءَ دیم ءَ اتک بلے زوتاں زوت دو کپ ءَ بجر بوت یکے مینگل دومی حئی۔1990ءَ نواب اکبر بگٹی ءَ جمھوری وطن پارٹی جوڑ کت۔ بی این ایم مینگل ءَ بلوچستان نیشنل پارٹی ٹھینت پد ءَ بلوچستانءِ تھ ءَ وتی سیاسی جد ءُ جھد برجاہ داشت ءُ بی این ایم ءَ ڈاکٹر حئی ءِ سروکی ءَ راجکاری برجاہ داشت۔

اوگانستان ءَ مجاھدینانی زورگیری ءَ پد بلوچ راج نواب خیر بخش ءِ سروکی ءَ 1993ءَ واتر بلوچستان ءَ اتک انت ءُ شال ءِ کوہ چلتن ءِ دامن ءَ نیو کاہان ءَ آباد بوت۔ نواب خیر بخش مری ءَ ھک توار سرکل بندات کت کہ انوگیں بلوچ راجی جنز ءِ چیدگانی بنپد انت۔

سردار عطا اللہ مینگل 1996ءَ وتی درانڈیھی سپر کٹ اینت ءُ پد ءَ بلوچستان ءِ تھ ءَ دوبارہ پارلیمانی راجکاری ءِ توک ءَ سر ءُ پر کنان بوت۔1997ءِ گچینکاری ءَ بی این پی ءِ گچینکاری ءَ بھر زرت ءُ پد ءَ صوبائی اسمبلی ءَ گیشیں مھلوکاں گوں باج برت ءُ جمھوری وطن پارٹی ءَ چہ الائنس کت، پد ءَ ھکومت ءِ ٹھینگ ءَ سوبین بوت۔ بی این پی ءِ صوبائی ھکومت ءَ وفاق ءِ دزمانجی کنان ءَ زنگزاری کت ءُ ھمے میان ءَ جمھوری وطن پارٹی ءَ چہ سیالداری ءِ شیر ءِ توک ءَ پٹے کپت۔

28مئی 1998ءَ بلوچستان ءِ ضلع چاغیءِ دمگ راسکوہ ءَ ایٹمی تراک کنائینت ءُ بلوچ راج ءَ چریشی ءِ ھلاپ ءَ ترندیں زھرشانی درشان کت۔ ھمے میان ءَ اسٹبلشمنٹ ءَ بلوچستان نیشنل پارٹی ءِ تھی پندلاں سر کش اِت ءُ اختر مینگل ءِ رنگ ءَ صوبائی مزن وزیر ءَ چہ دزکش بوت ءُ بلوچستان پارٹی سئے بھراں بھر بوت، یکے بی این پی مینگل دومی بی این ڈی پی سیمی بی این پی(عوامی)۔

2002 ءَ بلوچستان موومنٹ ءِ کونسل سیشن ءِ سروکی ءَ لیکھی گر ءُ چیل پرریچان ءَ دیم ءَ اتک انت ءُ ڈاکٹر حئی ءُ ڈاکٹر مالک ٹولی ءَ پاکستانی فیڈریشن ءِ راہ گچین بوت ءُ بلوچ ھک باروا جد ءُ جھد ءِ سر ءَ زور دات ءُ چیئرمین غلام محمد ءَ بلوچ راجی آجوئی ءِ جد ءُ جھد ءَ پہ مسامیگ بوت انت۔ ھمے درگت ءَ بی این ایم ءَ ڈاکٹر حئی ءُ ڈاکٹر مالک ٹولی ءَ بی این ڈی پیءَ گوں ھوار نیشنل پارٹی جوڑ کت کہ آھاں غوث بخش بزنجو ءِ کار رھبند ءِ بنپداں فیڈریشن ءَ راجکاری بندات کت۔

چیئرمین غلام محمد بلوچ ءِ آجو دوستیں راجکاری ءِ آس ءَ را جمبور کنگ ءِ ھاترا 29اپریل۔ 1 مئی 2003 ءَ شال ءَ پارٹی ءِ کونسل سیشن ایر کت، غلام محمد چیئرمین ءُ رحیم ایڈوکیٹ پارٹی سیکرٹری جنرل گچین بوت۔ کونسل سیشن ءَ پارٹی ءِ نام بلوچستان نیشنل موومنٹ ءَ چہ مٹ کت ءُ بلوچ نیشنل موومنٹ ایر کت ءُ پارٹی بلوچ راجی آجوئی، بے پارلیمانی راجکاری ءُ گوریلا جد ءُ جھد ءِ کمک ءَ باھند بوت انت۔اگست 2006ءَ بلوچ راجکاری ءِ برزشانیں کوہ نواب اکبر خان بگٹی ءِ شھیدی ءِ وئیل دیم ءَ اتک ءُ اے کوہ ءِ کپگ ءَ گوں پارلیمانی راجکاری ءِ سر ءَ چو جُگ ءِ پیم ءَ گران بوت ءُ اے وئیل ءَ آجوئی ءِ جد ءُ جھد ءَ را ساھے مان کت۔ 2008ءِ گچینکاری ءَ را بلوچ ٹولیاں پشت جت ءُ بلوچستان ءَ پیپلز پارٹی ءِ ھکومتی دیم ءَ اتک۔ پیپلز پارٹی ءِ ھکانی پھازکاری ءِ بنگیج ءِ ھمراھی ءَ گوں بلوچستان ءِ راجکاری باسکاناں آوار جنگ ءِ درچ بندات بوت کہ ایشی ءَ چہ رند آیانی جون ویرندان ءُ گیاباناں دست کپان بوت انت۔

اپریل 2009ءَ بی این ایم ءِ چیئرمین غلام محمد ءَ را آئی ءِ ھمراہ لالا منیر ءُ شیر محمد ءَ گوں ھوار آوار جنگ ءَ رند شجید کت انت ءُ بلوچستان ءِ سیاسی سروکاناں کُشت ءُ کوش ءِ یک درچے بندات کت کہ روچ ء مرچی ھم برجاہ انت۔ ھزاراں سیاسی رھشون ءُ باسکاناں جت ءُ گار کت بلئے بلوچ راجدوستیں پارٹیاں بلوچ راجی آجوئیءِ جد ءُ جھد ءَ چہ دزکش نہ بوت انت۔

2013 ءِ گچینکاریاں بلوچ راج ءَ شاھیگانیں رنگے ءَ پشت جنان (بائیکاٹ) ءَ پارلیمانی راجکاری ءَ را نہ منّ ات ءُ بلوچ آجوئی ءِ جد ءُ جھد ءِ راہ ءَ را ساھے بکشات بلے بلوچ جد ءُ جھد ءَ گوں بندوکیں پارٹی ءُ گلانی تھی گر ءُ چیلاں اے جد ءُ جھد ءَ را بازیں تکاں جنجالانی آماچ کت۔ جنگ ءُ پروشگ، تیرسُپتگیں جون، چیریں ادارھانی بادشاھی ءُ نامی ایں آمیدگس ءِ راجکاری داں روچ ء مرچی ھم برجاہ انت ءُ آجوئی ءِ جد ءُ جھد ءِ چراگ ھم بلان انت۔

بلوچ راجکاری جد ءُ جھد ءِ سدسال ءِ سپر سرجم بوت ءُ اے سپر انگت ھم برجاہ انت، ھما سپر عبدالعزیز کرد ءَ ینگ بلوچ ءَ چہ بنا کت ءُ انجمن اتحاد بلوچاں ءُ کلات اسٹیٹ نیشنل پارٹی ءَ را ھاٹیگ مان کنگ ءِ مانزمان بوت ءُ نیب ءِ سروکاں اے سپر ءَ را یک نوکیں کشکے ءَ برت، مرچی بلوچ جھدکاراں اے کاروان ءِ بار ماں وتی کوپگاں زرتگ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

تامر کاری ءِ ازمکار رنویر سنگھ ءِ نوکیں تامر “سرکس ” ءِ ٹریلر شنگ بیتگ –

آدینگ ءِ روچ ءَ ٹوئٹر ءَ رنویر سنگھ ءَ ٹریلر شنگ کنان ءَ گوشتگ کہ ’ روھت شیٹھی ءِ وشکندی دنیا ءَ وش اتکے ‘-

تامر سرکس وشکندی ءَ چہ چکار اِنت تامر ءِ کسہ ءُ سرکس ءَ بجلی ءِ تاراں پیشداروکیں یک ازمکارے ءِ گور ءَ ترگ ءَ بیت اِنت کہ آئی ءِ جسم ءَ کرنٹ مان بیت اِنت-

تامر ءِ گچینی جلوانکی ھما جاہ ءَ روھت شیٹھی ءِ سوجکاری ئیگ اِنت گڑا یک چہ یک ءَ گیشتر ازمکاری ءَ گندگ بنت گیشتر آیانی وشکندی ازمکاری دنیا ءَ وشیں رنگے ءَ گندگ بیت اِنت-

تامر ءَ رنویر سنگھ ءَ ابید پوجا ھیگڑے، جیکوپہن فرنینڈس، جونی لیور، ورون شرما، سنجے مشرا ءُ سدھارتھ جادھو ءِ ازمکاری ءَ پیش دار اَنت – اشی ءَ ھوار ھوار سرکس تامر ءَ یک ھنچیں چیزے پیشدارگ بیتگ کہ آ دیپکا پاڈوکون ءِ کیمیو اِنت-

اشی ءَ ابید روھت شرما ءِ نامی ئیں تامر گول مال ھم یک رندے کردارانی جلوانکی ءَ گندگ بیتگ-

سرکس تامر بیست ءُ سَے دسمبر ءَ سینما جاھاں شنگ بیگ اِنت چریشی ءَ چہ ندارہ چاروکاں مزنیں ودارے ءَ نشتگ اَنت-