TBP Balochi

مروچی چار دسمبر ءَ کیچ ءِ بنجاھی شھر تربت ءَ ما‍ں بلوچستان اکیڈمی آف لٹیریچر اینڈ رسرچ تربت، تعلیمی چوک ءَ لبزانکی ھمک ماھی نیاد برجم دارگ بوتگ –

دیوان ءِ گچینی مھمان واجہ غنی پرواز ءُ یوسف عزیز گچکی بوتگ انت ءُ دیوان ءِ جارچین بلوچستان اکیڈمی ءِ جنرل سکریٹری شگراللہ یوسف بوتگ ءُ دیوان ءِ سر کماش واجہ غفور شاد بوتگ – اے دیوان ءَ جمال منظور، شیرجان مرزا،عابد علیم ءُ جمال پیر محمد ھم ساڈی بوتگ انت-

دیوان دوبھر ءَ بوتگ کہ آئی ءِ یک بھرے نبشتانک ءُ دومی بھر شائری بوتگ کہ نوک باھند ءُ کماشاں وتی شئر ءُ نبشتانک ونتگ انت –

نبشتانکی بھر ءَ واجہ غنی پرواز ءَ وتی آزمانک میرو ونتگ ءُ احمد عمر ءَ وتی آزمانک اندریں پیکار ونتگ شاعری ءِ بھر ءَ واجہ غفور شاد، عارف عزیز، منور علی رٹہ، یوسف عزیز گچکی، عباس حسن، اللہ بخش تمل، سعد طارق، نورخان، میر عالی، تابش امیر، نوہت، نزرمومن،قمبر غفور ،عمران حاصل ءُ دگے نوک باھندیں شائراں وتی شئر ونتگ انت ءُ دیوان وش نود کتگ –

نامداریں زانشتی جھد کار ءُ دی او ایس ایس وانگجاہ گوادر ءِ سروک نمیرانیں سر زاھد آسکانی نمیرانی ءِ سالروچ ءِ درگت ءَ مروچی گوادر ءَ دی او ایس ایس وانگجاہ ءَ مراگشے برجم دارگ بوتگ – مراگش ءَ نودربر ءُ ماسٹراں ھوار دگہ مردماں بھر زرتگ –

مراگش ءِ بندات ءَ وانگ جاہ ءِ نودربراں ” بیا پدا بیا سر زاھد بیا ” ءِ بلوچی سوت ءِ سر ءَ ٹیبلو ءِ پیش داشتگ ءُ وہاب مجید ءُ سمیر رحیم ءَ ھوار دگہ مردماں تران کُتگ ءُ وش گُٹی ءَ نمیرانیں زاھد آسکانی ءِ نام ءَ شئر ونتگ اَنت –

مراگش ءَ ترانکارانی گوشگ ات کہ زاھد آسکانی ءِ گوم ءَ کہ بندات ءَ پجاروکی بوتگ آئی ءَ واھشت بوتگ کہ من گوادر ءَ لینگویج سنٹرے پچ بہ کناں مارا وشی بوت کہ ما زانتگ ات کہ زبان ءِ ارزشت چی انت پرچاکہ انگریزی ہائر ایجوکیشن ءِ زبان انت میڈیکل ءُ انٹرنیشنل زبان انت سائنس ءُ ریسرچ ءِ زبان انت پمشکا مارا وشی بوت ءُ ما نودربر آئی ءِ لینگویج سنٹر ءَ دیم دات انت – اگاں ما بگوش ایں کہ گوادر ءِ تہ ءَ سر زاھد آسکانی انگریزی وانینگے فاؤنڈر ءِ ما رد نہ بہ ایں – آئی ءَ چہ ساری گوادر ءِ تہ ءَ انگلش ءِ لینگویج سنٹر نہ بوتگ ءُ ناکہ ادارھاں یا اسکولاں وانینگ بوتگ – پد ءَ سال دوھزار ءُ چاردہ ءَ انسان دژمن ، زانت دژمن کہ آھاں چہ رژن ءَ ترسیت آھاں اے وڑیں وئیلے کُت بلے دوھزار ءُ چاردہ ءَ بگر تاں مرچی ھشت سالاں پد اے ادارہ دی او ایس ایس روچ پہ روچ مھکم تر بوان انت ، ھما چراگ کہ نمیرانیں سر زاھد آسکانی ءَ گون بوتگ آ مروچی ایندگراں گون انت زانت ءُ زانشت ءِ رژن ءَ دیم ءَ برگ انت – سال نود ءُ ھشت ءَ سر زاھد ءَ ھما توم کہ کشتگ مروچی آ برورد دئیں درچک یے کہ آئی ءِ چیر ءَ مئے بازار ءِ درسیں گونڈو نشتگ انت ءُ اشی ءِ برورداں ورگ انت –

آھانی گوشگ ات کہ مردمانی گوستانک مارا ھمے گوشیت کہ مردم وھدیکہ پیداک بیت کہ آ کسانیں فیرڈ آف ٹائم ءِ تہ ءَ جھدے کنت ءُ پدا رؤت بلے ادارہ دیمروئی کن انت ھمے ادارہ دی او ایس ایس وانگجاہ کہ شھید ءَ جوڑ کتگ اے روچ پہ روچ دیمروئی کنان انت ءُ سر حنیف ایندگہ مردم مارا امیت انت آ اے ادارہ ءَ شھید ءِ وژن نیمگ ءَ بر انت –

ترانکارانی گوشگ ات کہ آئی ءَ لبزانک ءِ پڑ ءَ ھم کار کتگ کساس نوزدہ سد ءُ نود ءُ ھپت ءَ کہ بلوچی ماھتاک شنگ بوتگ سرشھید زاھد آسکانی آئی ءِ کسان کمک شونکار ھم بوتگ آ وھد ءَ کمپوزنگ ءِ چوشیں ھاسیں کمپیوٹر دگہ آسراتی نہ بوتگ گڑا آئی ءَ وتی دستانی گوم ءَ نبشتگ انت بلے بلوچی لبزانک ءِ تہ ءَ شھید زاہد آسکانی گیشتر رجانکاری ءِ نام ءَ زانگ بیت – فرانز کافکا ءِ تاک ءِ ھم آئی ءَ بلوچی ءَ رجانک کتگ ءُ بلوچی لبزانک ءِ تہ ءَ شھید ءِ رجانک کتگیں اولی تاک انت – آ بلوچی لبزانک ءِ تہ ءَ یک سرپدیں ءُ زانتکاریں شائر ءُ نبشتکار ءُ رجانکار ات بلے بدواھاں اے چیز ھزم نہ بوت کہ آ مکران ءَ گوادر ءِ وڑیں شھرے ءَ زانت ءِ چراگ رژن بہ کنت –

آھانی گوشگ ات کہ مروچی سر زاہد مئے میان ءَ ساڑی نہ انت بلے آئی زانت، سوچ ھیالات ھمدا انت مرچی ھزارانی کچ ءَ شھید زاہد ساڑی انت – آئی ءِ جھد گون وانگ ءُ زانگ ءَ ات – دوھزار شش ءَ پد کہ جاور نگیگ بوت انت گڑا اے چیزانی کنٹرول کنگ ءُ چاگرد ءِ سمبالگ مزنیں جیڑہ ات بلکنہ مرچی ھم ھست کہ مئے بازیں سنگت ھست انت ھمے بہ سمج آھاں وتی مرگ دست انت –

منصور دھمردہ پیش ءَ چہ ابرمی دست ءُ پاداں لنگیں مردمے آئی ءِ جسم ءُ جان پیش ءَ چہ نیزور بیتگ اَنت زھرشانی ءِ وھد ءَ گرگ بیتگ ءَ پد ءَ آئی ءِ سر ءَ گیشیں لٹ ءُ کٹ بیتگ اَنت چریشی ءَ چہ آئی ءِ جاور گیش ناگیگ بیتگ ءُ نادراہ جاہ ءَ برگ بیتگ-

سر بیتگیں ھالانی رد ءَ منصور دھمردہ ء امان اللہ گوستگیں دوازدہ روچاں چہ زاھدان ءِ زندان ءَ بندیگ جاہ ءَ بندیگ بیتگ ءُ اود ءَ آئی ءِ جاور ناگیگ بیتگ ءُ نادراہ جاہ ءَ برگ بیتگ-

ھالانی تہ ءَ گوشگ بیتگ کہ آ بندیگ جاہ ءَ سک لٹ ءُ کُٹ کنگ بیتگ ءُ چریشی ءَ چہ آئی ءِ جاور ناگیگ بیتگ اَنت-

منصور دھمردہ ماں زاھدان ءِ دمگ شمس آباد ءَ گرگ بیتگ ءُ پد ءَ آئی ءِ سر ءَ زمین ءِ جیڑہ ءِ بھتام جنگ بیتگ ءُ زندانی کنگ بیتگ-

ھالانی تہ ءَ گوشگ بیتگ کہ آئی ءِ سر ءَ دومی نیمگ ءِ دومی نیمگ ءِ مردماں پاھو دیگ ءِ ھکم دیگ ءِ لوٹ کرتگ –

ایرانی لشکر ءَ بھتام جنان ءَ گوشتگ کہ آئی ءَ ڈیھ ءِ ھلاپ ءُ زمینانی سر ءَ جیڑاہ کنگ ءِ پژدر ءَ ما منصور دھمردہ گپتگ ءُ برتگ بلے دومی نیمگ ءَ آئی ءِ وکیلاں دزبندی کتگ چریشی ءَ پد آئی ءِ وکیل ءِ گپ رد کنگ بیتگ اَنت-

زانگ بہ بیت گوستگیں روچاں ھم زاھدان ءَ یک چمانی نادراھیں یک مردمے ءَ تامر بندے ءَ گشگ ءَ اِنت من نماز ءَ واتر بیتگ اَنت پد ءَ ھمے میان ءَ ایرانی لشکر ءَ من ءَ لٹ شاپ کرتگ ءُ زدگ کرتگ-

شنگ بیتگیں تامر بند ءَ گندگ بیت اِنت کہ آئی ءِ جان ءَ ٹپ ءُ ٹوریں نشان گندگ ءَ آیگ ءَ اَنت-

روکپتی بلوچستان ءِ تیابدپی شھر چھبار ءَ گوستگین زھرشانیاں بازیں کچے ءَ مردم گرگ ءُ بندیگ کنگ بیتگ اَنت کہ اشانی توک ءَ کساسے ءَ مردم یل کنگ بیتگ اَنت-

اشانی توک ءَ ھواریں گرگ بیتگیں ورنایانی توک ءَ یکے علی رضا رائیسی اِنت کہ آئی ءِ اُمر کساس بیست ءُ سَے سال اِنت چھبار شھدربرجاہ ءِ برسٹ ایئر ءِ نودربرے –

علی رضا رائیسی بیست ءُ شش نومبر ءَ ماں چھبار ءَ گرگ بیتگ ءُ نُھ روچانی دارگ ءَ پد آئی ءِ سر ءَ زھرشانیاں پروشت ءُ پروشانی بھتام جنگ بیتگ –

علی رضا ریئسی ءِ کھول اِنت گوشگ اِنت اے بھتامانی جنگ ءَ پد مارا ترس اِنت کہ علی رضا رئیسی چو آ دگراں پاھو ءِ دار ءَ درنجگ مہ بیت –

ھمے وڑ ءَ ھژدرہ سالی ءِ یک ورنایے ءِ یک کنگ ءَ ھشت ملین تومن زمانت ءَ بندگ بیتگ-

ھالانی تہ ءَ گوشگ بیتگ کہ عبدالمالک ھملی گوستگیں ماہ ءِ بیست رمس ءَ گرگ بیتگ ءُ آئی ءِ یل کنگ ءَ ھشت ملین تومن پہ زمانت ءَ بندگ بیتگ-

ھالانی تہ ءَ گوشگ بیتگ کہ آئی ءِ کھول سک ءَ نیزگارین مردم اَنت چریشی ءَ چہ کجا آ ھشت ملین تومن پہ زمانت ءَ دات کُت بہ کنت-

روکپتی بلوچستان ءَ زھرشانیانی وھد ءَ بازیں کچے ءَ مردم گرگ ءُ بیگواہ کنگ بیتگ اَنت کہ اے نوکیں درچ ءَ کساس کساس بیست ءِ کچ ءَ ھمے زوتاں گرگ ءُ برگ بیتگ اَنت کہ آیانی گیشتری بھر ورناہ ءُ کسان سالیں زھگان ئیگ اِنت-

بلوچ راج ءِ نادْراھیں پدریچ

نبشتہ کار: بانڑی بلوچ

دی بلوچستان پوسٹ

وھدے کہ زُورگِریں مُلکے یک نزوریں راجے ءِ سر ءَ اُرش کنان ءَ آئی ءِ سرڈگار ءَ دزگیر کنت گُڑا چہ دُرستاں پیسر زورگِر ھمے راج ءِ دُز ءُ ڈُنگاں پول ایت ءُ وتی کیمپ ءَ کار ایت پرچا کہ اے وڑیں بے زمیریں مردم مُدام چہ ڈیھ دوستی ءُ راجدوستی ءِ مارشتاں بےسما بنت، تھنا زر ءِ لالچ ءَ وتی زمیر ءِ سودا جنان ءَ وتی راج ءِ ھلاپ ءَ دُژمن ءِ ھمکار بنت۔ البت دومی نیمگ ءَ ایردستیں راج ءِ بامردیں رھشُون گوں وتی ڈیھ دوستیں سرمچاراں پہ راجی آجوئی ءُ مُلک ءِ وتواجھی ءَ راجی گھگیری ءِ جُنز ءَ بندات کن انت۔ گُڑا پہ راجدوستی ءِ ھلاپ ءَ زورگِر دو کار ءِ سر ءَ باز جُھد کنت۔ یکے پہ راجی جُنز ءِ بے سوب ءُ ھلاس کنگ ءَ راج ءِ تہ ءَ دلّار ءُ راجدْروھاں ودی کنت، دومی آئی ءِ زُبان ءَ چہ راج ءَ پُل ایت ءُ راجی دوداں کم کم ءَ انچیں دابے ءَ تباہ کنت کہ زورگِریں راج ءَ سما ھم نہ بیت۔

اے تیوگیں کار انچو بے سمائی ءَ جُنزان بنت کہ لس مھلوک ایشاں مار اِت نہ کنت۔ انچوشکہ آپریشن تھیٹر ءَ سرجن نادْراہ ءَ پیسر نشہ ءُ بے ھوشی دنت ءُ پد آپریشن ئِے کنت کہ نادْراھیں مردم ھچ درد ءُ تورشت مہ مار ایت۔ گُڑا زورگِریں دُژمن ھم سد در سد ھمے وڑ ءَ ایردستیں راج ءِ پدریچ ءَ ماں وانگجاھاں وتی دْروگیں راجدپتر، زورگیر ءِ دْروگیں وزبت ءُ ستا، زورگیر ءِ وتگڑیں ھستی ءُ کوڑائیں نمیرانانی بابت ءَ دْروگیں دَرونتاں ماں زورگیر ءِ زُبان وانین ایت۔ وتی پْروش وارتگیں جنگانی دْروگیں کِسھاں ورناھیں نودربراں رَد دنت۔

ایردستیں راج ءِ جِند ءِ راجی ھستی ءُ نمیرانانی بابت ھچ دَرونت ءُ دانکے وانینگ نہ بیت اگاں چیزے بیت گُڑا آ ھم دْروگ ءُ وتگڑ بنت کہ راج ئِے گیشتر بَکڑ ءِ آماچ بہ بیت۔ چہ ایشی ءَ آ راج ءِ پدریچ چہ وتی راجدپتر ءَ بے سما ءُ بے سُدّ بِیان بیت، پد کم کم ءَ راج ءِ مھلوک مجگی گُلام بیت ءُ راج وتی جِند ءِ زُبان ، راجی دود ءُ پجّاراں(بزانکہ راجی زُبان ءُ پوشاک ءِ وڑیں دوُداں) بے ھال ءُ شموشان کنت۔

اگاں ما ھورت چاری بکن ایں گُڑا ما مار ایں ما بلوچ راج ھم آپریشن تھیٹر ءِ تہ ءَ آزار ایں۔ مرچاں بلوچ راج وتی راجی زُبان ءَ بے کساس ڈالچار کنان ءَ ھِندی، پارسی ءُ سندھی ءِ وڑیں دری زُباناں وانگ ءَ انت کہ آیانی وانگ ءَ ھچ پائدگ ھم نیست۔ اگاں ما چیزے زانگ ءِ جُھد بہ کن ایں گُڑا ما سرپد بَہ ایں کہ مرچاں توری کراچی، لاھور ءُ اسلام آباد بہ بیت یا توری ایران تھران، اسپان ءُ شیراز بہ بنت مئے دُژمن ءِ زھگ وت انگریزی وان اَنت بلے مارا پارسی، سندھی ءُ ھِندی ءِ وڑیں بے مُرادیں زُباناں وانین اَنت۔ اگاں گِند ئے مرچیگیں دیمروی کُتگیں ڈیجیٹل زمانگ ءَ ھمے زُباناں ھچ بستار نیست۔ میڈیکل ءُ انجینئرنگ ءِ کتاب دْراہ انگریزی ءَ اَنت۔ انگریزی یک میان اُستمانی زُبانے پمیشکا تھنا ھما راج دیمروی کن اَنت وھدیکہ آ انگریزی ءَ گیشترّ بوان اَنت پمیشکا ما ھم گوں بلوچ راج ءَ دزبندی کن ایں کہ انگریزی ءِ سر ءَ زور بہ دے اِت ءُ مُدام انگریزی بوان اِت۔ دومی پہ راجدوستی ءِ ھاتر ءِ وتی دزھُورکی ءِ وھد ءَ وتی راجی زُبان براھوئی ءُ بلوچی بوان اِت پرچا کہ زِندگیں راج چہ وتی زُبان ءَ گِستا نہ بنت۔ راجی زُبان ءِ وانگ ءُ نبشتہ کنگ راجاں یکجاہ کنت، زُبان ءِ لبزانکی دیمروی راج ءِ تہ ءِ زُبان دوستی ءُ راجدوستی ودی کنت۔ وھدیکہ یک ایردستیں راجے ءِ ورناھیں وانندہ زُبان دوست ءُ راجدوست بوتگ گُڑا آ راج گُلامی نہ منّ ایت بلکیں وتی راجی آجوئی ءِ ھاتر ءَ گھگیری کنت۔

گُڑا باید اِنت بلوچ راج ءِ نودربر مرچیگیں دامگ(انٹرنٹ) ءِ آسراتی ءَ کارمرز کنان ءَ اول بلوچی دَرونتاں وانان ءَ وتی زُبان ءِ وانگ ءَ بکن اَنت ءُ پد ءَ نبشتہ دربر اَنت۔ وھدے کہ ما بلوچی نبشتہ دربُرتگ گُڑا ھرکس وتی کھول، سْیاد ءُ میتگ ءِ بلوچاں بلوچی بوانین ایت۔ باید اِنت مُدام بلوچی ءَ گوں بلوچی زگریں لبزاں نبیسّ اَنت ءُ بلوچی ءِ زگریں گالاں ھبر بہ کن اَنت۔ ما باید اِنت مُدام ھمے جُھد بکن ایں کہ بلوچی نبیسّگ ءِ وھد ءَ ھاس ھِندی ءِ لبزاں ھچبر کارمرز مہ کن ایں کہ ھمے زورگِریں زُبان ءَ مئے شھدیں زُبان ءَ تاوان داتگ۔ اگاں گالواری ءُ نبشتاری ءَ انگریزی ءِ لبزے کارمرز بیت ھچ جیڑھے نیست کہ انگریزی یک جھانی زُبانے، آئی ءِ وتی یک ارزِشتے ھست بلے بے مُرادیں سندھی ءُ ھِندی ءَ گوں ما ھچ وڑیں سْیادی ءُ نزیکی نیست۔

بلوچ شالا یکمُشت، زُبان دوست ءُ راجدوست بہ بات اَنت ءُ بلوچی شالا دیمروی بکنات۔ شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

زاھدان ءُ پیرجند ءِ زنداناں بندیگیں سَے بلوچ ایرانی آمیدگس ءِ پرمان ءَ پاھو دیگ بیتگ اَنت-

گیشین ھالانی رد ءَ روکپتی بلوچستان ءِ بنجاھی شھر زاھدان ءَ دو کس پاھو دیگ بیتگ اَنت-

پاھو دیگ بیتگیں مردمانی پجار غلام رسول مزارزئی ء شھدوست جھمنند گورناگان سرباز ءُ انو شیروان عمر زئی ء جانداد جھمنند زاھدان ءِ نام ءَ زانگ بیتگ اَنت-

ھالانی تہ ءَ گوشگ بیتگ کہ غلام رسول ایرانی سال نود ءُ یک ءَ روکپتی بلوچستان ءِ دمگ ایرانشھر ءَ نشہ باپاری ءِ بھتام ءَ گرگ بیتگ –

انوشیروان گوستگیں ھپتگ ءَ ناصر ءُ امین ءِ ھمراھی ءَ جتائیں زندان ءَ برگ بیتگ ءُ اود ءَ امین پاھو دیگ بیتگ ءُ انوشیروان ءُ ناصر واتر زندان ءَ راہ دیگ بیتگ اَنت کہ مروچی انو شیروان پاھو دیگ بیتگ-

ھمے وڑ ءَ بیرجند ءِ زندان ءَ ھم یک مردمے پاھو دیگ بیتگ-

پاھو دیگ بیتگیں مردم ءِ پجار نور اھمد توتازئی ءِ نام ءَ زانگ بیتگ کہ زھک ءِ جھمنند گوشگ بیگ ءَ اِنت-

روکپتی بلوچستان ءَ پاھو دیگانی درچ چیزے روچانی توک ءَ گیشی ءَ گندگ آیگ ءَ اَنت کہ آ گیشتر نشہ باپاری ءِ بھتام ءَ گرگ ءُ پد ءَ آ پاھو دیگ بیگ ءَ اَنت-

نمیرانیں شھید سر زاھد آسکانی

نبشتہ کار: حیمنہ بلوچ

دی بلوچستان پوسٹ

اے گپ ءَ ھرکس کنت کہ من ءَ وتی زبان ءُ راج دوست بیت اِنت بلے باز کم مردُم وتی کرد ءَ پیلو کنت۔ چہ وت ءَ گیش وتی راج ءَ دوست دار ایت اے دابیں مردُم پہ وت ءَ گیش پہ راج ءَ زندگی کن اَنت ءُ مرگ ءَ پد ھم نمیران بنت۔ ‎بلوچ راج ءِ تھا ھم لھتے ھمے دابیں راج دوستیں مردم ھست کہ آیاں وتی سرجمیں زند پہ وتی راج ءَ ندر کُتگ۔ ھمے نامانی تہ ءَ یک نامے شھید سر زاھد آسکانی اِنت کہ بلوچ راجدپتر ءِ تہ ءَ آئی نام ءِ یک جتائیں کدّ ءُ بستارے ھست۔

اے ساھت ءَ کہ من نبشتہ کنگ ءَ آں گْوشے سر منی دیم ءَ نشتگ ءُ بچکندگ ءَ اِنت ءُ من ءَ گوشگ ءَ اِنت کہ آ واب کہ من دیستگ اِت اَنت آیانی پیلو کنگ شُمئے زمّہ واری اِنت ءُ من ءَ یکّین اِنت کہ شُما وتی منزل ءَ اّلم سوبین بہ اِت ءُ دُژمن شُمئے سوبینی ءَ گند ایت وتی سر ءَ وت ھاک مانریچ ایت۔ ‎شھید سر زاھد ءِ اسلی نام زاھر آسکانی بیتگ،بلے وانگجاہ ءَ بدل کنگ ءُ زاھد ایر کنگ بیت اِنت ‎سر زاھد 2 جنوری 1979 ءَ پروم پنجگور ءَ ودی بیتگ آئی ءَ چہ گورنمنٹ ھائی اسکول پنجگور ءَ وتی میٹرک کُتگ ءُ چہ پنجگور ڈگری کالج ءَ ایپ ایس سی ءُ پہ گیشیں وانگ ءَ شال ءَ شُتگ۔ ‎سر ءَ وتی بی اے ءُ ایم اے ءِ ڈگری چہ بلوچستان یونیورسٹی ءَ گپتگ اَنت من رد نباں اگاں بہ گوش آں کہ سر زاھد آسکانی بلوچ راج ءِ تہ ءَ چہ ھما ناماں یکّے کہ آئی ءَ وتی زند بس پہ بلوچ راج ءِ زانت ءُ سرپدی دیگ ءَ ندر کُتگ۔

آئی ءِ زانشتی کَد ءُ کِرد ھم سنگ اَنت یک توانگریں پگرے ءِ واھُند بوگ ءِ ھمراھی ءَ آ یک جوانیں مردم ءُ شرّیں استادے ھم بیتگ ‎سر یک راج دوستیں مردمے بیتگ ءُ آئی ءِ جھد ھمیش بیتگ کہ آ پہ وتی راج ءَ چیزے بہ کنت ءُ مارا ھم مُدام ھمے سکینے داتگ۔ سر 1997 ءَ چہ پنجگور ءَ دیم پہ گوادر ءَ شُت ءُ اود ءَ یک آگاھان ءِ نام درسرکاری وانگجاھے ءَ انگریزی سوجکاری داں یک سالے وانینتگ ئے پد ءَ لھتے جیڑھانی سْوب ءَ آگاھان وانگجاہ 2007 ءَ بند کنگ بیت گڑا سر وتی انگلش لینگویج سینٹرے پچ کنت آئی ءِ اے چیز پیسر ءَ مار اِتگ اَت کہ اگاں بلوچ ءَ گوں دگنیا ءَ ھم گام بوگی اِنت گُڑا انگریزی زبان ءِ سکّگ ھم اّلّمی اِنت داں کہ وت واجہ نہ بہ ئے واجہ ءِ گیگان آں بگر بلے پہ وتی منزل ءِ سر بوگ ءَ ناں پہ گلامی ءِ سانکلانی چُکّگ ءُ آیانی مھکم کنگ ءَ ‎بازیں جھد کنگ ءَ پد اے لینگویج سینٹر ءُ زاھد آسکانی دوئیناں مردُمانی دل ءَ جاگہ کُت تیاب دپ ءِ اے زمین ءُ مردُماں آئی ءَ را ھمینچو مھر دات کہ سر ءَ گوادر وتی ھنکین کُت ءُ داں وتی گُڈّی ساہ ءَ ھمے شھر ءَ زندگی کُت ئِے لینگویج سینٹر ءَ رند آئی وتی اسکول ءِ دی اوئیس پَچ کُت اد ءَ یکبرے پد ءَ لھتے ناشریں مردمانی پندل سازی بناہ بیت وتسریں کچوچینی، کردارکشی، زاہ ءُ بد،ایر جنگ بیت داں آ وتی منزل ءَ مول ءَ پراموش بہ کنت ءُ پُشتا بہ کنز ایت بلے بدواھاں اے نہ زانت کہ اے مرد پہ پد کنزگ ءَ اِد ءَ نہ یتکگ اے دُرستیں سکّی ءُ جنجالاں پد ھم آئی ءِ ایمان ھمینچو مھکم اَت کہ آئی ءِ پیشانی ءَ پریشانی ءِ کرچکے گندگ نہ بوت نہ کہ آ وتی مول ءُ منزل ءَ پراموش بوت بلکیں اے چیزّاں آ گیشتر سکین دات کہ آئی ءَ گیشتر کار کنگی اِنت آ گوں وتی ھمے جزبگ ءَ دیم ءَ جُنزان کنت ءُ وتی اسکول ءِ سب کیمپس ءَ پچ کنت ‎سر ءَ وتی دومی کیمپس ءَ 2007 ءَ پچ کنت, سیمی کیمپس ءَ بکشی کالونی گوادر ءَ پچ کنت ءُ 2008چارمی کیمپس ءَ سربندر ءَ پچ کنت ‎ھمے جُھد ءِ برکت ءَ نہ ایوک ءَ گوادر ءَ بلکیں سرجمیں مکران ءَ دی اوئیس اسکول یک جوانیں نامے جوڑ کنت ءُ جوانتریں پرائیوٹ اسکول زانگ بیت ‎سر ءِ یک شوکیں ھادتے اے بوتگ کہ آئی مدام وتی نودربرانی گوماں ھر وڑیں سرھال ءِ سر ءَ گپ ءُ تران کرتگ ءُ ھر نودربر موہ داتگ کہ آ وتی ھیال درشان بہ کنت ‎من ءَ یات اِنت سر ءَ یک رندے بورڈ ءِ سر ءَ اتا شاد ءِ شئرے نبشتہ کت “‎تو پہ سرانی گُڈگ ءَ زندے ھیالان ءَ کُش ئے ‎پہ سِندگ ءَ داشت کنے پُلاں چہ بُو تالانی ءَ “؟ ءُ مارا جُستے کت کہ شمئے تہ ءَ کئے ایشی ءَ ونت کنت ءُ بزانت ءِ گشّین ایت,مئے تہ ءَ کس ءَ پسّو نہ دات چیا کہ آ وھد ءَ مئے تہ ءَ کس ءَ بلوچی وانگ ءُ نبشتہ کنگ نہ زانتگ۔ ‎گڑا سر ءَ مارا اے شئر ءِ مانا گُشت ءُ پد ءَ گشت ئِے کہ اے سک بژن ءِ گپ انت کہ ما بلوچ ایں ءُ وتی زبان ءِ وانگ ءُ نبشتہ کنگ ءَ نزانیں۔ زبان مہ بیت راج گار بیت ءُ آئی ءَ دگہ راجانی دیم ءَ ھچ ارزشت نہ بیت۔اے گپءَ من ءَ چہ تہ ءَ کُدینت کہ ما وتی جند ءِ زُبان ءَ کہ ونت نہ کن ایں گُڑا ما چہ تور دیمروی کُت کن ایں چہ ھما روچ ءَ من وتی بلوچی سر ءَ کار بندات کُت ءُ انگت ھم ھمے جُھد آں کہ بلوچی وانگ ءُ نویسگ ءَ روچ پہ روچ گھتر کُت بکن آں ‎سر ءَ چوناھی ءَ اسکول ءِ زمانگ ءَ بلوچی وانگ ءُ نبشتہ کنگ ءِ ھُب بیتگ ءُ مدام بلوچی لبزانک ءَ گوں ھمگرنچ بوتگ گوں زُبان ءَ چُشیں مھر من پیسرا کسّی تہ ءَ نہ دیستگ۔ ‎سر ءَ اسکول ءَ مدام انگریزی گپ کتگ بلے وھدے بلوچی ءَ گپے کتگ گڑا ھچ دری لبزے کار مرز نہ کتگ۔

بگندئے آئی ءَ وتی زبان شات نہ بوتگ کہ دری لبزے منی زبان ءِ زیبائی ءَ پولنگ مہ کنت آئی ءِ ‎بلوچی لبزانک ءِ تہ ءَ ھم وتی یک پجّار ءُ جوانیں کردے بوتگ سر ءَ آزمانک, شئر ءُ رجانکاری ھم کتگ. 2010 ءَ پرانزکاپکا ءِ یک آزمانکی کتابے میٹا مور پوسز بلوچی ءَ رجانک کتگ۔ ‎وھد ءِ لوٹ گْوش ئے یا ھجبر ھلاس نہ بوکیں زانشت ءِ ھوشام انت کہ پہ اے ھوشام ءِ پروشگ ءَ سر وتی دیار ءَ ڈنّ امریکہ ءَ روت چہ ‏(Yes program) ءِ نیمگ ءَ، وھدے کہ واتر کیت داں بازیں نوکیں (ideas) وتی پاداں کار ایت گوں ءُ جُھد کنت کہ ھما زانشتی چاگردے کہ امریکہ ءِ نودربراں رسگ ءَ اِنت آ اے بزّگیں ءُ لگتمالیں بلوچ راج ءِ چُکّاں ھم بہ رس ایت بلے اِد ءِ جاور ءُ واجکارانی نیّت اے گپّ ءَ چوں اوپار کُت کنت کہ بلوچءَ رُژنائیں بانداتے بہ رس ایت۔ بلے آ نزاناں کہ سر کتاباں گیش وتی نودربرانی پگری درَنگازی ءِ سر ءَ کار ءَ اِنت آیاں یک با سمائیں پدریچے جوڑ کنگ لوٹگ ءَ اِنت کہ وتی نیک ءُ بد ءَ پجارت بہ کنت یک انچیں بانداتے ءَ کار ءَ اِنت کہ آ باندات ءِ واھُند تھنا بلوچ اِنت آ باندات ءَ بس ایمنی اِنت ،وت واجھی اِنت، کسی وازمندگی نہ اِنت کہ واجہ مارا بل ما وانیں واجہ مارا گار ءُ بیگواہ مکن ، واجہ مئے سر ءَ پہ ھُدائی کمّے رھم بہ کن، آ باندات ءِ واجہ ما وت بہ ایں۔ 04 دسمبر 2014 اے ھما روچ اِنت کہ اے روچ ءَ لھتیں ناشُناسیں مردماں سر اسکول ءِ گیٹ ءِ دپ ءَ نُھ تیر جت ءُ شھید کُت۔ مرچی سر مئے اندر ءَ نہ انت بلۓ آٸی ءِ داتگیں سوج ءُ پنت ھجبر چہ دل ءَ شموشگ نہ بنت ءُ سر ءِ سوج ءُ پگر آٸی ءِ نودربرانی شکل ءَ گندگ بیت ءُ سر زاھد آسکانی مئے دلانی تہ ءَ نمیران اِنت۔ سر تو ھر کُجا ءِ من ترا ھال دیگ لوٹاں کہ تئی کِشتگیں توم نی درچکے جوڑ بیتگ ءُ آ روچ ھم دور نہ اِنت کہ اے درچک بر کار ایت ءُ ما دائمی شادمان بہ ایں ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ایران ءِ سرکاری ھال سرکنوکیں ادارہ ءَ گوشتگ کہ واکداراں چار ھنچیں مردم پاھو داتگ اَنت کہ آیانی سر ءَ اسرائیل ءِ واستا چاریگری ءِ کار کنگ ءِ بھتام بیتگ-

ھمے درچ ءَ عرب نیوز ءَ ایرانی سرکار ءِ نیوز ایجنستی “ارنا ” ءِ درور دیان ءَ گوشتگ کہ اے مردمانی سر ءَ بھتام بیتگ کہ آیاں اسرائیل ءِ چیرین ادارہ موساد ءِ واستا کار کرتگ-

پاھو ءِ ھکم یکشمبے ءِ روچ ءَ بیتگ ایرانی سرکاری نیوز ایجنسی ارنا ءِ رد ءَ ایران ءِ پاسداران ءِ انکلاب ءَ اسرائیل ءِ چیریں ادارھانی گون ءَ ھمگرنچی ءِ یک ٹولی ءِ گرگ ءِ ٹاہ داتگ-

پاسداران انکلاب ءِ گوشگ اِنت اے مردماں سرکاری جاہ ءُ لس جاھانی تاوان دیگ ءُ شھریانی آوار جنگ ءِ پٹ ءُ پول کتگ-

رپورٹ ءَ گوشگ بیتگ کہ اے مردم چیریں سلاہ بند بیتگ اَنت ءُ اسرائیل ءِ زر کرپٹو ءِ پوڑی اش گپتگ-

ارنا نیوز ءِ رد ءَ پاھو دیگ بیتگیں مردمانی پجار حسین ءُ دو ھانزداہ، شاھین امامی محمود آبادی، میلاد اشرفی ءُ منو شھر شسہ بندی ھوار اَنت-

پاکستانی پوج ءَ چہ پنجگور ءَ یک مردمے آوار جنگ ءَ پد بیگواہ کتگ-

ھالانی رِد ءَ چہ پنجگور تسپ ءَ قاسم ء خلیل احمد پشمبے ءِ نیم روچ وھد ءَ فرنٹیئر کور ایف سی ءُ چیریں ادارھانی کارندھاں لوگ سر ءَ بیڑبرتگ ءُ آوار جنگ ءَ پد ناشناسیں جاھے ءَ برتگ-

پوج نیمگ ءَ مروچی آواران ءِ دمگ پیراندر زیلگ ءَ یک لوگے ءِ سر ءَ بیڑبرتگ ءُ لوگ ءَ ساڑی ئیں دلمراد ءُ لکو نامیں مردمے لٹ ءُ کُٹانی نشانگ کتگ اَنت-

پوج ءِ لَٹ ءُ کُٹ ءَ چہ دوئیں مردم سک ٹپی بیتگ اَنت کہ میتگ مردماں نادُراھجاہ ءَ برتگ اَنت-

زانگ بہ بیت ھمے ھپتگ ءَ بلوچستان ءِ جتاجتائیں دمگاں چہ پوج ءِ دست ءَ نودربراں ھوار ھپت مردم زورانسری آوار جنی ءِ نشانگ کنگ بیتگ اَنت ، آیانی تہ ءَ چہ پنجگور ءَ سے ءُ چہ ھُزدار ءَ دو ءُ کلات ءَ یکے مردمے ھوار اَنت وھدے کہ مروچی بلوچستان ءِ دمگ چہ کیچ ءَ حبیب ء گْوھرام نامیں مردمے آوار جتگ ءُ بیگواہ کتگ-

زورانسری آوار جنی ءِ بگیری ءَ زھرشانی ءِ دْرچ گوستگیں بازیں سالاں چہ بلوچستان ءَ برجاہ ءَ اِنت بلوچستان ءِ سیاسی گل زورانسری آوار جنی ءِ دْرچ ءَ گر ءُ دار بیگواھیں مردماں دیم آرگ ءِ لوٹ ءَ کنگ ءَ اَنت-

بیست ءُ نُھ نومبر ءَ کیچ ءِ دمگ ھوشاپ ءَ پوج ءِ میان ءَ جنگ ءُ چوپ ءَ دگہ یک لاشے ءِ پجار بیتگ-

سر بیتگیں ھالانی رد ءَ کیچ ءِ دمگ ھوشاپ کولواہ ءَ پوج ءِ میان ءَ جنگ ءُ چوپ ءَ کُشگ بیتگیں دگہ مردمے ءِ پجار داد شاہ حاصل خان جھمنند دل ء سر ڈانڈال ءِ نام ءَ زانگ بیتگ-

آئی ءِ کھول ءَ لاش دزگپتگ ءُ دو دسمبر ءَ ما دل ء سر ڈانڈال ءِ ادیرہ جاہ ءَ کل ءُ کسارات کتگ-

زانگ بہ بیت پاکستانی پوج ءِ جارکش ءَ بیست ءُ نُھ نومبر ءَ کولواہ ءَ یک بیڑے ءَ دَہ مردمانی کُشگ ءِ ٹاہ داتگ اَت –

پوج ءِ جارکش ءَ گشتگ ات کہ چیریں ھالے ءِ رد ءَ بیڑ برتگ ءُ سلاہ بندانی ھلاپ ءَ دمگ انگیر کرتگ ءُ چریشی ءَ ھردوکیں نیمگ ءَ تیرگواری بیتگ ءُ ھمے میان ءَ دَہ مردم کُشگ بیتگ اَنت – پوجی جارکش ءَ گشتگ اَت سلاہ بندانی یک ھمراھے تچگ ءَ سوبمند بیتگ ءُ آئی ءِ ھلاپ ءَ بیڑ برجاہ اِنت-

زانگ بہ بیت اشانی توک ءَ ھپت لاشانی پجار عبدالصمد ء محمد حسین جھمنند کولواہ، جاوید جلال ء محمد عثمان جھمنند بالگتر، رحم دل ء عبدالوھاب جھمنند ھوشاپ، نواز ء سبزل جھمنند بلیدہ، ھارس ء غلام علی جھمنند بالگتر، شعیب ء میاہ جھمنند کولواہ ءُ جلیل شیر ء شیر مھمد جھمنند سند بازاد ھوشاپ ءِ ناماں زانگ بیتگ اَنت-