TBP Balochi

بلوچستان ءِ دمگ کوھلو ءَ پاکستانی لشکر ءِ نیمگ ءَ دومی روچ ءَ ھم لشکر کشی برجاہ ءَ اِنت-

لشکر کشی ءِ بندات گوستگیں روچ ءَ سُھب ءِ وھدءَ کنگ بیتگ اود ءَ ڈرون اُرش ءَ پد کم چہ کم ھشت بالگرد دمگ ءَ سر بیتگ اَنت- آئی ایس پی آر ءَ گوستگیں روچ ءَ لشکر کشی پدر کتگ ءُ گْوشتگ کہ بلوچ لبریشن آرمی ءِ نُھ مردم ءِ جنگ ءُ سے ٹپی ئیں جاوراں دزگیر کنگ ءِ ٹاہ جتگ-

جانی تاوانانی ءُ دزگیری ءِ سرجمیں ھال تنی وھدے دمگی اِھوالکاراں چہ پدر نہ بیتگ وھدے کہ پوج ءَ ھم سرجمیں ھال نداتگ اَنت-

ٹی بی پی ءَ اِھوالکاراں گُوشتگ کہ مروچی دومی روچ ءَ ھم پوج ءِ کارندہ دمگ ءَ ساڑی اَنت- پوج نیمگ ءَ دمگی مردمانی لوگاں ماندارگ ءِ ھال آھگ ءَ اِنت بلے تنی وھدے دمگ ءَ روگ ءُ آھگ بند بوگ ءِ سبب ءَ تنی وھدے دلجمیں ھال سر نہ بیتگ-

زانگ بہ بیت ھمے ماہ ءِ بندات ءَ بولان ءَ مزنیں کچے ءَ پوج ءَ لشکر کشی کتگ چریشی ءَ بمب گواریں بالگرد ءُ چاریگی بالیگاں بھر زرتگ وھدے کہ جنگی بالیگ ھم ھمے وھد ءَ گندگ بیتگ اَنت-

بولان لشکر کشی ءَ پاکستان پوج ءَ چار بلوچ آجوئی لوٹوکانی جنگ ءِ ٹاہ جتگ ءُ بلے پد ءَ بلوچ لبریشن آرمی ءِ جارکش جیئند بلوچ ءَ وتی شنگ کتگیں درشان ءِ تہ ءَ گْوشتگ کہ “بی ایل اے ءِ سرمچاراں بولان ءَ یک ھپتگے ءَ دراجیں میڑ ءَ پد پاکستانی پوج ءِ اُرش سوبمندی ءِ گوم ءَ پُشت کنزکتگ-

آئی ءَ گْوشتگ کہ ھمے میان ءَ دُژمن پوج ءِ پانزدہ کارندہ کُشتگ ءُ یک درزنے ءَ گیش ٹپی کتگ اَنت – وھدے کہ ماتیں ڈیھ ءِ پھازگ ءِ ھاتر ءَ جنگ کنان ءَ بی ایل اے سے سرمچنڈیں سنگتاں گُڈی تیرءِ فلسفہ ءِ پیلو کتگ ءُ شھید بیتگ اَنت-

کاھان لشکر کشی ءَ آئی ایس پی آر ءِ درشان ءَ پد تنی وھدے جیئند بلوچ ءِ درشان دیم ءَ نیتکگ-

روکپتی بلوچستان ءِ دمگ ایرانشھر ءَ ایرانی لشکر ءِ تیرگواری ءَ دو کس بیران بیتگ اَنت-

گیشیں ھالانی رد ءَ ایرانشھر ءَ ایرانی لشکر ءَ تیرگواری کنان ءَ مجید رحمد آبادی ءُ حسن حسینی کشتگ اَنت-

ھالانی تہ ءَ گوشگ بیتگ کہ اے ھردوک ساھت چار ءَ ایرانشھر ءِ ھند بھشتی ءَ چارہ گمرک ءَ کُشگ بیتگ اَنت-

ھالانی تہ ءَ گوشگ بیتگ کہ اے گاڑی ءِ سر ءَ ایرانی لشکر ءَ تیرگواری کرتگ چریشی ءَ گاڑی ڈرائیور ءِ دست ءَ گاڑی لگوشتگ ءُ گاڑی کلٹی بیتگ ءُ چریشی ءَ گاڑی ءَ آس کپتگ ءُ مردم بیران بیتگ اَنت-

روکپتی بلوچستان ءَ چوشین وئیل یکشل ءَ برجاہ ءَ اَنت گوستگیں سال ءَ بگر داں انیگ ءَ ھشتاد ءُ ھپت ھمے وئیلانی آماچ بیتگ ءُ بیران بیتگ اَنت-

روس ءِ نیمگ ءَ گوستگیں اُرشاں کیئف ءِ بجلی ءِ ودی کنوکیں جاہ نشانگ کنگ بیتگ اَنت چریشی ءَ لکانی ھساب ءَ مھلوک بجلی، آپ ءُ ھیٹنگ ءِ اسراتیاں چہ زبھر اَنت ءُ ھمے وڑ مروچی ترندیں برپگواری ءِ گمان اِنت-

ھال سرکنوکین ادارہ روئٹرز ءِ رد ءَ گرڈ اسٹیشن ءِ انتزامیہ ءِ رد ءَ بجلی ءِ پجگ کم اِنت چریشی ءَ چہ باز کم جاھاں بجلی پجینگ بیت اِنت-

انتزامیہ ءِ رد ءَ بنجاھی شھر کیئف ءَ روچ ءَ بس چار اداران بجلی سر کنگ بیت اِنت-

آدینگ ءِ روچ ءَ سروک ولاددیمیر زیلنسکی ءَ گوشتگ ات کہ گوستگیں ھپتگ ءَ روس ءِ اُرشاں شست لک ءَ گیش مردم بجلی ءِ آسراتیاں زبھر بیتگ اَنت بلے انتزامیہ ءَ شمبے ءِ روچ ءَ لھتے جاھاں بجلی سر کرتگ-

سروک زیلنسکی ءِ رد ءَ روس ءِ گوستگیں اُرشاں یوکرین ءَ باز تاوان بیتگ چریشی ءِ سبب ءَ لکانی ھساب ءَ مردم بجلی، آپ ءُ ھیٹنگ ءِ آسراتیاں زبھر بیتگ اَنت-

روس ءِ گوشگ اِنت یوکرین ءِ گپ ءُ تران ءِ نہ منگ ءِ پژدر ءَ آئی ءِ بجلی جاھانی سر ءُ اُرش کرتگ-

زانگ بہ بیت ھمے ماہ نومبر ءِ بندات ءَ روس ءَ یوکرین ءِ دمگ خیرسن ءَ وتی لشکر واتر لوٹائینتگ ات چریشی ءَ یوکرین ءَ وتی سوبمندی ءِ یک کسانوکیں شاتمانی یے کتگ ات خیرسن ھما یکیں شھر اِنت بنجاھی شھر ءَ روس ءِ اُرش ءَ پد روس ءَ گپتگ ات ءُ اے یوکرین ءِ پسھی اُرشانی بنجل بیتگ-

شمبے ءِ روچ ءَ یوکرین ءَ ڈکال ءِ جاور پیش کنان ءَ بھتام جتگ کہ روس ءِ سوویت رھشون جوزف سٹالن ءِ نسل کشی ءِ وھد ءَ پیش کنگ اِنت چریشی ءِ آسر ءَ سال نوزدہ سد ءُ سی ءُ دو ءَ سارتکشین مولم ءَ لکانی ھساب ءَ یوکرینی بیران بیتگ اَنت-

قطر ءَ برجاھیں فیفا ورلڈ کپ ءِ گوستگیں روچ ءَ تونسیا ءُ آسٹریلیا، پولینڈ ءُ سعودی عرب، پرانس ءُ ڈینمارک ،ارجنٹینا ءُ میکسیکو ءِ میان ءَ گوازی کنگ بوتگ اَنت کہ آھانی تہ ءَ آسٹریلیا ءَ یکے، پولینڈ ءَ دو ءُ پرانس ءَ دو پہ یکے ءُ ارجنٹینا ءَ دو گولاں وتی گوازی کٹ اِتگ انت –

گوستگیں بیگاہ ءَ الجنوب فٹ بال پٹ ءَ بوتگیں اولی گوازی آسٹریلیا ءُ تونسیا ءِ میان ءَ بوتگ کہ آسٹریلیا ءَ یک گولے ءَ گوازی کٹ اِتگ وھدیکہ تونسیا ءِ نیمگ ءَ ھچ گول دیگ نہ بوتگ –

آسٹریلیا ءِ نیمگ ءَ میٹ چیل تومس ءَ اولی ھاپ ءِ بیست ءُ چارمی ملٹ ءَ گول داتگ ءُ گوازی وتی ٹیم ءِ نام ءَ کُتگ –

ایجوکیشن سٹی فٹبال پٹ ءَ سعودی عرب ءُ پولینڈ ءِ میان ءَ بوتگیں گوازی ءَ پولینڈ ءَ دو گولاں گوازی کٹ اِتگ وھدیکہ سعودی نیمگ ءَ ھچ گول دیگ نہ بوتگ – پولینڈ ءِ نیمگ ءَ اولی گول پیوٹر زیلنسکی ءَ گوازی ءِ سِی ءُ نھمی ملٹ ءَ داتگ ءُ دومی گول لیبی روبرٹ ءَ دومی ھاپ ءِ ھشتاد ءُ دومی ملٹ داتگ ءُ گوازی وتی ٹیم ءِ نام ءَ کتگ –

دوشی شپ پرانس ءُ ڈینمارک ءِ میان ءَ بوتگیں سیمی گوازی راس ابو عبود فٹبال پٹ ءَ گوازی پٹ ءَ کنگ بوتگ کہ پرانس ءَ ڈینمارک ءِ دیم ءَ دو پہ یک گولے ءَ گوازی کٹ اِتگ –

پرانس ءِ نیمگ ءَ ھر دو گول کےلئین ءَ داتگ انت آئی ءَ وتی اولی گول دومی ھاپ ءِ شست ءُ یکمی ملٹ ءَ داتگ کہ پدا گوازی ءِ شست ءُ ھشتمی ملٹ ءَ ڈینمارک ءِ لیبی ایندریس ءَ گول ءِ اسکور کتگ – گوازی ءِ ھشتاد ءُ ششمی ملٹ کےلئین ءَ وتی دومی گول داتگ ءُ پدا تاں گوازی ءِ گڈسر ءَ ھچ گول دیگ نہ بوتگ ءُ پرانس ءَ گوازی کٹ اِتگ –

دوحہ لوسیل پٹ ءَ بوتگیں چارمی گوازی ارجنٹینا ءُ میکسیکو ءِ میان ءَ بوتگ کہ ارجنٹینا ءَ دو گول ءَ گوازی کٹ اِتگ –

گوازی ءِ اولی ھاپ ءَ ھردو ٹیمانی لیبیاں جوانیں گوازی پیش داشتگ ھچ نیمگ ءَ گول دیگ نہ بوتگ ءُ دومی ھاپ ءِ شست ءُ چارمی ملٹ ءَ ارجنٹینا ءِ لیبی لیونل میسی ءَ یک گول ءِ داتگ ءُ پدا گوازی ءِ ھشتاد ءُ ھپتمی ملٹ ءَ انزو ءَ چہ ارجنٹینا ءِ نیمگ ءَ دومی گول داتگ ءُ گوازی وتی ٹیم ءِ نام ءَ کُتگ –

بلوچستان ءِ دمگ شال ءُ لسبیلہ ءَ سے جتاجتائیں وئیلاں یک مردمے بیران ءُ نُھ ٹپی بیتگ اَنت-

سربوتگیں ھالانی رِد ءَ کوسٹل ھائی وے سر ءَ کراچی ءِ جھمنندیں سے مردم کہ نانی مندر ھنگلاج یاترا ھاتر ءَ روگ ءَ بیتگ اَنت کہ لسبیلہ ءِ تھسیل لیاری ءِ دمگ ناکھٹی ءَ تُرند روگ ءِ سبب ءَ آیانی گاڑی چپی بیتگ ءُ چریشی ءِ آسر ءَ پت ءُ چک شترگن ء رام چند ءُ دیوھش ء شترگن سک ٹپی بیتگ اَنت کہ آ پہ الاج ھاتر ءَ ڈسٹرکٹ ھیڈ کوارٹر نادُراھجاہ برتگ اَنت-

اود ءَ ٹپ ءُ ٹورانی درمان کنگ ءَ پد ٹپی کراچی ءَ برگ بیتگ اَنت-

دومی نیمگ ءَ ھب رودتکی بائی پاس نزیک ءَ ناشناسیں مردمانی تیرگواری ءَ چہ بیست ءُ پنچ سالی ئیں ورناہ بیران بیتگ کہ آ جام قادر ٹیچنگ نادُراھجاہ ءَ برتگ ءُ تنی وھدے کُشکارانی پجّار نہ بیتگ-

ھمے وڑ بلوچستان ءِ بُنجاھی شھر شال ائیرپورٹ دگ کلی گلی محمد بڑیچ آباد ءَ برجاھیں مدرسہ ءِ چت کپگ ءِ آسر ءَ ھپت نودربر ٹپی بیتگ اَنت کہ آ زوت الاج کنگ ءِ ھاتر ءَ نادُراھجاہ ءَ برتگ اَنت ءُ ٹپی تکانسر نہ اَنت-

بلوچستان ءِ دمگ کوھلو کاھان ءَ مرچی سھب ءَ ادار شش ءِ نزیک ءَ بندات بوتگیں لشکر کشی ءَ پاکستانی پوج ءَ نُھ مردمانی جنگ ءُ سَے مردمانی دزگیر کنگ ءِ ٹاہ داتگ –

پاکستانی پوج آئی ایس پی آر ءَ وتی شنگ کرتگیں درشان ءِ تہ ءَ گوشتگ کہ پھازگی لشکر ءَ بلوچستان ءِ دمگ کوھلو سیاہ کوہ ءَ انٹیلیجنس ءِ رِد ءَ آپریشن ءِ کُتگ –

آئی ءِ گوشگ انت کہ ھمے سال ءِ سِی ستمبر ءَ کوھلو بازار ءَ بوتگیں اُرش ءَ پد انٹیلیجنس آھانی شوھاز ءَ بوتگ کہ اے اُرش ءَ دو رھگیر مُرتگ ءُ نوزدہ زدگ بوتگ انت –

آئی ایس پی آر ءِ رِد ءَ اے آپریشن مروچی سھب ءِ ادار شش ءَ بندات کنگ بوتگ کہ سلاہ بندیں مردم انگر ءَ اتکگ انت ءُ ھردو نیمگاں تیرگواری کنگ بوتگ کہ چریشی ءَ نُھ مردم جنگ بوتگ ءُ سَے زدگیں جاوراں دزگیر کنگ بوتگ انت –

آئی ءَ گوشتگ کہ پھازگی لشکر ءِ تنی وھدی دمگ ءِ تہ ءَ پٹ پولی آپریشن برجاہ انت –

آئی ایس پی آر ءَ لشکر کشی ءَ جنگ بوتگیں مردمانی پجار تنی وھدی زاھر نہ کتگ ءُ ھمے گوشتگ کہ اشانی سیادی سلاہ بندیں گلان انت –

بلوچ وومن فارم ءَ وتی تندجاھان شنگ کتگیں یک اکسے ءِ ھواری ءَ گوشتگ کہ مئے جوڑ کرتگیں بلوچی لُکیں تامر “بلوچستان ءِ بانک” زوت شنگ کنگ بیت اِنت –

شانتل پلم ءِ کمک ءُ ھمراہ داری ءَ بلوچ وومن فورم نیمگ ءَ جوڑ کنگ بوتگیں بلوچی تامُر بلوچستان ءِ بانک زوت شنگ بیت اِنت ـ تامر ءِ کسہ ءِ نبشتکار ءُ سرسوج کنوک شاکر شاد انت ءُ اے تامر ءِ تہ ءَ سرفراز محمد ، عومر کیا، اللہ بکش حلیف ، ماتی نسیمہ، ارمان اکبر ءُ فرھال سخیداد ازمکاری کُتگ – تامُر ءِ اسکرین پلے ثناء بلوچ انت –

اے اولی رند اِنت کہ یک بلوچ زالبول گلے ءِ نیمگ ءَ بلوچستان ءِ نام ءَ یک تامرے شنگ کنگ گندگ آیگ ءَ اِنت-

اے تامر ءِ ٹائٹل اکس ءَ بلوچستان ءِ دود ءُ بزگیانی یک کسانؤکیں چھرگے ءِ پیش کنگ ءِ جھد بیتگ –

اے تامر کدی شنگ بیت اِنت اے گپ آیاں پدر نہ کرتگ بلے ھمے زوتانی نام دیگ بیتگ –

جاھلی ءُ سادہ لوحی

نبشتہ کار: میار دَشتی

دی بلوچستان پوسٹ

چوناھا جاھلی ءُ سادہ لوحی بلوچ ءِ اَزلی بھرے “قولِ انسائیکلو” کہ جاھلیں راج ھجبر سوبمَنْد بیت کُت نہ کنت اِے وَ زاھریں گپّے کہ جاھلی ءُ سادہ لوحے ءَ بلوچ چنچو ریپینگ بیتگ ءُ اَنگت ءَ ریپینگ بیگ ءَ اِنت چیا دژمن کہ ھست اِنت پہ وتی سوبمَنْدے ءَ ہمُک راہ چُن اِت کنت ، دژمن پہ وتی نپ ءَ وتا تاوانے بھرے ھم جوڑ کُت کنت وھدیکہ یک دژمنے تئی زیر بیگ ءَ اِنچو کوشِست کنت ترا ھم وتی رکّینگ ءَ ھمُک سھت آگاھی اَلّمی بیتّیں۔

دژمن پہ تئی زیر بیگ ءَ ھمک پڑا چکّاسیت چائے تُپنگ بمب ءُ ٹوپ بہ بیت یا سْیاسی میدان آ وتی زَور ءَ کہ ھست انت جَنت بلے مارا ھمے سرپدی رَس اتگ کہ بلوچ ھجبر گوں زَور ءَ گوں طاقت ءَ شِکست دَیگ نہ بیتگ ھاں بلوچ وتی سادہ لوحی ءُ بے اِنانے ءَ ریپینگ ءُ زیر کنگ بیتگ تاریخ ءِ اسپیتیں تاکاں نکش اِنت کہ مھمود گزنوی ءِ ھاکمیت ءِ دَور ءَ کہ ھست اِنت بلوچ آئی ءِ ھاکمی ءَ نہ منّیت ءُ وتی منشا ءُ دلیگ ءَ کنت مھمود گزنوی ءِ ریاست گوں طاقت ءَ بلوچ ءِ زیر کنگ ءَ ناکام بیتّیں گڑا آئی ءِ سپہ سالار بلوچاں گوں زھرجتیں سروپاں ریپینیت چیا کہ بلوچاں ھاکمانی ساز سامان ءُ مال پہ وژدلی سپر ءَ نیشتگ اَنت آ لُٹّ اتگ ءُ وتی دستیگ کُتگ اَنت اِد ءَ چے مھمود گزنوی ءِ سپہ سالار سروپاں زہر جنت بلوچ آ زہرجتیں سروپاں دستیگ کن اَنت ءُ ور اَنت اِش آ مرگ ءِ آماچ بنت اِد ءَ چے بلوچ شِکست ءِ دُچار بنت۔

ھمے وڑ پارس ءِ ہاکم عادالدولہ بلوچاں ریپینیت ءُ زیر کنت اَنچوش پاکستانی ریاست ھدا ءِ پاکیں کلام ءِ سر ءَ بلوچاں ریپینیت ءُ پاھو دنت کہ ھست اِنت پاکستانی ریاست گوں زَور ءَ بلوچ ءِ دیم پہ دیمے ءَ نا سوب اِنت آ بلوچ ءِ زیر کنگ ءَ ہمُک دروشمیں پندل سازگ ءَ اِنت اِے وہد ءَ دہشتگردیں گل جماعت اسلامی پنام ءِ ہک دو تحریک بلوچ ءِ سر ءَ مُشتگ بلوچ ءَ اَچ مادنیں راہ ءِ رَوگ ءِ دارگ جھد ءَ اِنت نی تاریک مارا ہمے سرپد کنت کہ داں بلوچ سادہ لوحے ءُ جاہلے ءَ چے وتا گِستا مہ داریت آ ھجبر پہ وتا سِیت شوہاز اِت نہ کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءَ وت ما وتی جنگ ءُ یک مردمے ءَ تپر ءَ گوں سراپ کرتگ ءُ یک مردمے ٹپی کتگ-

کیچ ءِ دمگ مند بلوچ آباد ءَ زمین ءِ جیڑہ ءِ سر ءَ جنگ ءُ چوپ ءَ یک مردمے ٹپی بیتگ –

گیشیں ھالانی رد ءَ مند بلوچ آباد ءَ زمین ءِ جیڑہ ءِ سر ءَ امین ءُ یاسین نامیں مردمے ءَ تیرگواری کرتگ ءُ فدا نامیں مردمے زدگ کتگ –

دمگی مردمانی رد ءَ زدگ بیتگیں مردم ناگیگیں جاوراں کیچ ءَ برگ بیتگ ءُ پد آ گیشیں جاندراھی ءِ ھاتر ءَ کراچی ءَ برگ بیتگ ءُ آئی ءِ جاور ناگیگ گوشگ بیتگ اَنت-

ھمے وڑ ءَ تمپ ءَ سھیم ء غلام نامیں مردمے ءَ تپر ءَ گوں سراپ کتگ ءُ شھیک جھمنند جھمنند کورجو تمپ زدگ بیتگ –

پولیس ءِ رد ءَ جرمکار دزگیر کرتگ ءُ گیشیں پٹ ءُ پول کنگ ءَ آں –