TBP Balochi

تربت سول سوسائٹی ءِ بنجاھی جار کش ءِ نیمگ ءَ جار جنگ بوتگ کہ بیست جنوری ءَ بلوچانی دومی مستریں زبان براھوئی ءِ دربرگ ءِ کلاس ماں تربت ءَ ھمے سال ءِ بیست جنوری ءَ بندات کنگ بوگ ءَ انت ءُ پانزدہ جنوری ءَ کلاسانی ڈس ءِ جار جنگ بیت انت –

جار ءِ تہ ءَ گوشگ بوتگ کہ زبان ءِ دربرگ ءِ ھاتر ءَ ھچ کس ءَ رجسٹریشن ءُ فیس گرگ نہ بیت مپت ءَ وانینگ بنت – ھر ھما کس براھوئی دربرگ واھگ داریت جھل ءِ داتگیں نمبراں گوں نزیکی بہ کنت –

ٹی بی پی ءِ اھوالکار ءِ گوم ءَ تران کنان ءَ گلزار دوست ءِ گوشگ ات کہ بازیں مردمے براھوئی دربرگ ءِ ھب واھگ ءَ داریت بلے چوش کہ پیش ءَ چُشیں سنٹر ءِ نہ بوتگ کہ آ براھوئی در بُرت بہ کناں بلے ما اے جُھد بندات بازیں واھگ داروکی ءَ گوم ءَ ھال اھوال کتگ ھنو کساس ھپتاد براھوئی دربروکاں گیش گوما ھال اھوال کُتگ ـ مئے ارادہ انت سد کچ ءَ وانوک بنت گڈا ما بیست رمس ءَ کلاساں بندات کنیں –

براھوئی وانینگ ءِ ماسٹرانی درگت ءَ آئی ءِ گوشگ ات کہ ھنو سول سوسائٹی ءِ نیمگ ءَ ما لھتے ٹیچر ہائیر کُتگ بلے دیمتر ءَ اے درچ برجاہ بیت ھمے وانوک کہ در برانت گڈا ھمے وت پدا کلاس گر اِنت ءُ ایندگراں وانین انت –

سرکاری یا این جی اوزانی کمک ءِ درگت ءَ آئی ءِ گوشگ ات کہ ھچ وڑیں سرکاری این جی اوز ءِ نیمگ ءَ پچ کنگ بوگ ءَ نہ انت ءُ ناکہ تنی وھدی کمک دیگ بوتگ ـ اشی ءَ ما وت کمک ءِ وت سول سوسائٹی کنگ انت –

اے درگت ءَ سول سوسائٹی ءَ ھم وتی ڈس ءُ نشانانی ھاتر ءَ وتی نمبر شنگ ءُ تالان کنان ءَ کتگ اَنت اگاں کسے ءَ براھوئی زبان ءِ ھب ءُ واھگ ھست گڑا اے نمبراں اھوال کت کنت-
اسداللہ بلوچ۔ 03212599687
گلزار دوست بلوچ۔ 03002862363-

زانگ بہ بیت بلوچ لبزانکار ءُ دگہ پھناتاں بندوکیں مردمانی گلگ اِنت کہ سرکاری تکاں بلوچی ءُ براھوئی ماں وانگجاھاں وانینگ بوگ ءَ نہ اِنت چریشی ءَ چہ بلوچستان ءَ جھمنندیں مردم یکے دومی ءِ زباناں آشناہ نہ اِنت ءُ آیانی زبان ءَ تاوانباری ءِ دیمپانی کنگ کپگ اِنت-

بلوچستان ءِ جتائیں دمگاں بوتگیں وئیلاں یک زالبولے ءُ دو چکاں ھوار چار مردم بیران بیتگ اَنت، چہ ھب ءَ یک لاشے دزکپتگ-

سربوتگیں ھالانی رِد ءَ ڈیرہ بگٹی بلوچستان سیمسری دمگ شاھی بٹ ءَ ناشناسیں مردماں تیرگواری کتگ سے مردم کشتگ-

پولیس رِد ءَ ڈیرہ بگٹی ءَ تیرگواری وئیل ءَ بیران بیتگینانی تہ ءَ زالبول ءُ چک ھم ھوار اَنت، وئیل ھال رسگ ءَ انتزامیہ ھما دمان ءَ سر بیتگ، بیران بیتگیں مردمانی لاش نادُراھجاہ ءَ برتگ اَنت-

پولیس رِد ءَ تیرگواری وئیل کوھنیں دُژمنی ءَ چہ کنگ بیتگ، پولیس نیمگ چہ پٹ ءُ پول برجاہ ءَ اِنت-

دومی نیمگ ءَ ھب وندر ءَ توپان ءَ بے لوگ بیتگیں عبدالقیوم نامیں مردمے ءِ سیزدہ سالی ئیں چُک سارتی ءِ سبب ءَ بیران بیتگ-

وندر ءَ اَسرکپتگیں مردمانی گْوشگ اِنت کہ ھکومت نیمگ ءَ چہ بازیں ٹولیاں ھورانی وھد ءَ بے لوگ بیتگیں مردمانی لسٹ ءَ جوڑ کنگ ءِ کڑن کتگ اَنت اود ءَ ٹولیاں بے لوگ بیتگیں مردمانی پروشتگیں لوگانی کر ءَ اوشتاتگ ءَ اکسکاری وَ کتگ اِت بلے ھکومتی کمک اسرکپتگیں مردماں تاں سر بیگ ءَ نزاناں زمین ءَ وارتگ یا آزمان ءَ ایر برتگ-

اسرکپتگیں مردمانی گْوشگ اِنت کہ ھکومتی کمک ءِ ودار ءَ توپان آماچیں ھر روچ بے وسی ءَ بیران بوگ ءَ اَنت تنی وھدے راجی نمائندگ واب اَنت اگاں ھکومت کمک نیا اَنت گُڑا دگہ گیش مردم جانی تاوان رس اِیت-

ھمے وڑ بلوچستان ءِ باپاری شھر ھب پُھل ءَ چہ یک مردمے ءِ لاش دزکپتگ چریشی ءِ پجّار نہ بیتگ ایدھی کاردارانی پجّار ءِ ھاتر ءَ سول نادُراھجاہ ھب ءَ برتگ-

تربت ءُ شھرگ ءَ پاکستانی پوج ءُ ایگل پولیس ءِ سر ءَ اُرش، اُرشاں پاکستانی پوج ءُ پولیس ءَ جانی ءُ مالی تاوان ءِ دیمپانی کنگ کپتگ –

گیشیں ھالانی رِد ءَ گوستگیں روچ ءَ تربت ءِ بازار ءَ ناشناسیں مردماں ماھیگ مارکیٹ ءِ نزیک ءَ ایگل فورس ءِ کارمندانی سر ءَ دز بمب اُرش ءِ کُتگ چریشی ءَ یک کارمند ءِ زدگ بوتگ – اُرش ءِ زمّہ واری بلوچ آجوئی لوٹوکین سلاہ بندیں گل بی ایل ایف ءَ منّ اِتگ –

دومی نیمگ ءَ مروچی ھرنائی ءِ دمگ شھرگ ءَ ھم پاکستانی پوج تراک ناکیں شوروانی نشانگ کنگ بوتگ –

اُرش شھرگ ءِ دمگ گیلانی ءَ کنگ بوتگ ءُ اُرش ءِ آسر ءَ پاکستانی پوج ءَ جانی تاوان ءِ دیمپانی کنگ کپتگ – پاکستانی پوج ءِ کارمندانی سر ءَ بوتگیں اُرش ءِ زمّہ واری بلوچ آجوئی لوٹوکین سلاہ بندیں گل بی ایل اے ءَ منّ اِتگ –

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ شھرگ ءَ پاکستانی پوج ءِ سر ءَ بوتگیں اُرش ءَ سَے کارمند زدگ بوتگ انت –

جارکش ءِ رِد ءَ سرمچاراں شاھرگ دمگ گیلانی ءَ دژمن پوج ءِ بمب ڈسپوزل ٹولی ءِ کارمند ھما وھد ءَ تراک ناکیں شوروانی نشانگ کتگ انت وھدیکہ کم چہ کم پنچ دژمن کارمند دگ ءِ سر ءَ گوزگ ءَ بوتگ انت – تراک ناکیں شوروانی زد ءَ اتکگیں سَے کارمند زدگ بوتگ انت –

جارکش ءَ گوشتگ کہ بلوچ لبریشن آرمی اے اُرش ءِ زمّہ واری ءَ منّیت ءُ مئے جھد سرڈگار ءِ آجوئی ءَ تاں برجاہ مان انت –

بلوچستان لبریشن فرنٹ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گوشتگ کہ شش جنوری ءَ مئے سرمچاراں کیچ ءِ بنجاھی شھر تربت ءَ ماھیگ مارکیٹ ءِ نزیکءَ پولیس ایگل فورس سرا دزبمب اُرش ءِ کُتگ، چریشی ءَ یک کارمندے زدگ بوتگ –

جارکش ءِ رِد ءَ اے جاہ ءَ پیش ءَ پاکستانی پوج ایف سی ءِ پانگس ءِ بوتگ کہ آئی ءِ سر ءَ بوتگیں پد مہ پدی اُرشاں پد دژمن ریاست ءَ وتی پوج ءِ بدل ءَ پولیس آرتگ – ما پولیس پیش ءَ ھم مکن کتگ کہ آ پاکستانی پوج ءِ دومی ٹولی بوگ ءَ پھریز بہ کنت بلے چیزے وھدے گندگ بیت کہ پولیس تچکی ءَ پاکستانی پوج ءِ ھاتر ءَ کار کنگ ءَ انت – اگاں اے درچ برجاہ بیت گڈا سرمچار لاچار بنت کہ آھانی سر ءَ مزنیں اُرش بہ کن انت –

جارکش ءَ گوشتگ کہ دژمن ریاست ءِ کمکار ھر کس بہ بیت بکشگ نہ بیت اِنت –

نعیم پیرجان ءِ ماں بلوچی تہ ءَ رجانک کتگیں فارسی گدار “سنگ صبور ” زوت چہ ساچ در لبزانکی گل مکران ءِ نیمگ ءَ چاپ ءُ شنگ بیت –

ساچ در لبزانکی گل مکران ءِ نیمگ ءَ جار جنگ بوتگ کہ بلوچی لبزانک وانوکیں دوستاں پہ نوکیں ٹیکی یے کہ فارسی زبان ءِ نمیرانیں ساچشتکار صادق چوبک ءِ نامداریں گِدار “سنگ صبور” کہ اولی رند ءَ نوزدہ سد ءُ ھشتاد ءُ نُھ ءَ چاپ ءُ شنگ بیتگ ءُ جھان ءِ بازیں زباناں رجانک بوتگ، ماں بلوچی ءَ اولی رند ءَ چہ تچک ءَ فارسی ءَ نعیم پیر جان ءَ رجانک کتگ، ھمے زیتّاں چہ ساچ در لبزانکی گل مکران ءِ نیمگ ءَ چاپ ءُ شنگ کنگ بیت –

کتاب ءِ سرتاک ءَ نبشتہ کنگ بوتگ کہ چوبک گواچن نبیسیں آزمانکارے گوشگ بیت کہ آئی ءَ چاگرد ءِ راستی کم ءُ گیش ابید وتی کسھاں بیان کتگ انت ۔ چوبک ءَ ناسرپدیں ءُ شرک پالانی سرا اوست داروکیں مردمانی کسہ آورتگ انت –

دیمتر ءَ نبشتگ کہ سنگ صبور ءِ گالبند پہ ھر ھما مردم ءَ یا چیز ءَ کارمرز بیت کہ مردمانی گلگ ءُ ماسیتانی گوش داروک انت ۔ سنگ صبور مردمانی گلھاں گوشداریت پر آیاں مونجا بیت –

اے گدار جیڑگانی تکنیک ءَ نبیسگ بیتگ درائیں کارست جتا جتائیں بھراں گپ آر ( اول شخص ) ءِ دروشم گپتاری زبان ءَ ھبر کن انت ۔ چوبک ءَ پہ سنگ صبور ءِ نبیسگ ءَ زھن ءِ مانگشگی ازم کار بستگ کہ اولی رند ءَ جیمز جوئس ءَ پہ وتی نامداریں کتاب اولیس ءَ کارمرز کتگ-

زانگ بہ بیت چہ ساچ مکران ءِ نیمگ ءَ ھمے زوتاں بلوچی زبان ءِ دو شائرانی کتاب چاپ بوگ ءَ جریدگ بیتگ اَنت ایانی توک ءَ منیر مومن ءِ کتاب ءُ خالق ارمان ءِ کتاب ھوار اَنت-

پہ بلوچی زبان ءَ کتابی چھاپ بوگ ءَ چاگردی رسانکجاھاں کرد ساڑایگ بوگ ءَ اَنت کہ آ پہ لبزانک ءَ گچینی سوگات گوشگ بوگ ءَ اَنت-

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ نُھ سد ءُ چاردہ روچ سرجم بوتگ انت – مروچی چہ جیکب آباد ءَ جئے سندھ متحدہ محاز ءِ اللہ بخش سومرو سچل سانگی ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

بنجل ءَ اتکگیں مردمانی میان ءَ تران کنان ءَ گل ءِ کمک سرکماش ماما قدیر بلوچ ءَ گوشتگ کہ استان ءِ سروکی ءَ ٹکی نپ دیم ءَ آرگ بوگ انت، استان ءِ چیریں ادارھانی نیمگ ءَ بازاراں سندھی، پشتون ءُ بلوچ راج ناشرکار انت ءُ کوچگ دُز ڈنگانی رھم کرم ءَ یل دیگ بوتگ انت – ایردستیں سندھی، بلوچ پشتون راج ءِ لٹ ءُ پُل کنگ ءِ ھاتر ءَ ایردستیں راج گلام جوڈ کتگ انت –

ماما قدیر بلوچ ءَ گوشتگ کہ پاکستان مزھبی ناشرکاری، کشت کوش، مزھب ءِ نام ءَ بیگناھیں مردمانی ھون ریچگے ھاتر ءَ جھان ءِ بازین ڈیھانی تہ ءَ وتی مزھبی نیٹورک پچ کتگ انت کی اے ھنراں کنگ ءَ انت –

آئی ءَ گوشتگ کہ بلوچ، سندھی ءُ پشتون راج استان زوراکیانی آماچ انت ، ھمک روچ آھانی ژانگولیں جون دست کپگ ءَ انت، زورانسری آورجنیانی تہ ءَ گیشی اتکگ – بلوچستان ءُ سندھ ءِ زمینی جاور انکلابی نارہ ءَ کم نہ انت کہ اودا ءَ زوراکیانی گرمی چہ روچ ءَ گنتر انت – سرڈگار ءِ پرزندانی ھون ھاک ءَ ھوار کنگ بوگ ءَ انت – ھر سَئیں ایردستیں راج دلیری ءُ تمردی ءَ گوں استان ءِ دیمپانی ءَ کنگ ءَ انت –

ماما قدیر بلوچ ءَ گوشتگ کہ اے گپ ءِ گوشگ رد نہ باں کہ نون استان ءِ زلم زوراکی بلوچ، پشتو، سندھی راج ءِ زند ءِ بھر جوڈ بوتگ انت – دومی نیمگ ءَ پرایمنیں جھد کنوکیں سیاسی گلانی رھشوناں ھر جاہ پاکستان ءِ زوراکی ءُ پوجی زلمانی بگیری ءَ توار چست کتگ – بلوچ سندھی ءُ پشتون راج ءَ یکجاھی ءِ گوم ءَ کمے کساس ءَ تاکتور وریں ادارھاں گوشگے جھد کتگ کہ ھر سئیں راجانی سر ءَ تباھی کنگے زوراکی انسانیت ءِ ھاتر ءَ ھترھے ءَ چہ کم نہ انت –

نوکیں سال ءِ بندات ءَ بیگواھیانی تہ ءَ گیشی

ٹی بی پی شونگال

بلوچستان ءَ گوستگیں سال ءِ آسری چہ گریشہ ءَ دو نودربر، سرگودھا شھدربرجاہ ءَ کانون ءِ چیراگ ءَ دربروکیں نودربر سراج نور ءُ عارف گاجیان ءِ زورانسری بیگواھی ءَ گوں بیتگ ءُ نوکیں سال ءِ بندات ءَ پد بلوچستان ءِ بنجاھی شھر شال ءُ کیچ دمگ ءِ جتاجتائیں ھنداں چہ داں انگت ھشت ورناہ زورانسری بیگواھی ءِ آماچ بیتگ اَنت۔

بلوچستان ءَ زورانسری بیگواھی ءَ بلوچ راجی جُنز ءِ کاونٹر کنگ ءِ ھاتر ءَ یک سَلاھی ءِ رد ءَ کارمرز کنگ بیگ ءَ اِنت۔ بیست ءُ یکمی کرن ءِ اولی دھک ءَ بندات بیتگیں جھد ءَ دارگ ءِ ھاتر ءَ جھد ءَ بندوکیں سیاسی باسکانی ءُ جھدکارانی زورانسری بیگواھی بندات کنگ بیتگ اَت ءُ ھزارانی کچ ءَ زورانسری بیگواھیں مردمانی تیر سُبتگیں جون دگانی سر ءَ ءُ چہ گیاباناں دزکپگ بندات بیت اَنت ءُ نی گمانی پئیم ءَ پولیس ءِ کاؤنٹر ٹیریرزم ڈیپارٹمنٹ دروگیں میڑانی تہ ءَ زورانسری بیگواھیں مردمانی کُشگ ءَ ھوار اِنت۔

زورانسری بیگواھیں مردمانی کھولانی گل وائس فار بلوچ مِسنگ پرسنز ءِ رد ءَ چہ بلوچستان ءَ ھزارانی کچ ءَ مردم زورانسری بیگواہ اَنت ءُ زورانسری بیگواھی ءِ یکشلی برجاہ اِنت۔ ماما قدیر ءُ بیگواھیں مردمانی کھول چہ سیزدہ سالاں زورانسری بیگواھیں مردمانی یل کنائنگ ءِ ھاتر ءَ کراچی ءُ شال پریس کلبانی دیم ءَ زھرشانی بنجلاں نشتگ اَنت۔ زورانسری بیگواھیں مردمانی کھول وتی بیگواھیں دوستیگانی یل کنائنگ ءِ ھاتر ءَ یک مزنیں وھدے ءَ چہ جھد کنگ ءَ اَنت، بیگواھیں مردمانی یل کنائنگ ءّ ھاتر ءَ یکشلی ءَ گوں زھرشانی، روانک ءُ نندانک برجاہ دارگ بئیگ ءَ اَنت۔

زورانسری بیگواھیاں چہ ھزاراں کھول روزیگی ءُ زھنی پئیم ءَ سانمند اَنت بلے پاکستان ءِ واکدار ءُ ھاکم تھنا کمیشن اڈ کنگ ءَ دزگٹ اَنت، بلوچستان مزن آمید گِس ءِ پرمان ءِ سر ءَ اڈ بیتگیں مزن واکداریں کمیشن پرگینگی تھ ئِے کارانی وزیر ضیاء لانگو ءِ مستری ءَ اڈ کنگ بیتگ کہ آ بلوچستان ءِ تہ ءَ مردمانی زورانسری بیگواھیاں چہ انکاری اِنت۔ اے پئیمیں کمیشناں گوں زورانسری بیگواھیانی دارگ ءِ درگت ءَ آیانی بے سنگینی پدر بیت ءُ دومی نیمگ ءَ جھانی مردمی اگبالانی ادارگانی ھاموشی ءَ چہ بلوچستان ءِ تہ ءَ بنی آدمانی ھلاسی ترسے ودی بیتگ۔

نہ گُشتگیں مارشت

نبشتہ کار: مریم عبداللہ

دی بلوچستان پوسٹ

شیھک ءِ لوگ ءَ مدام آئی ءِ سنگت شُت ءُ اتک اَنت بیٹک ءَ نِشت اَنت داں دیر ءَ گپ ءُ تران اش کت۔ دودا آئی ءِ دوستیگیں سنگت اَت ءُ آ پارٹی والا مردمے اَت اے وھد ءَ ھلک ءِ جاور شر اِت اَنت گڑا دودا ھر روچ شیھک ءِ کرّا شُت نند ءُ نیاد ئِے کت شیھک ءِ گوھار شلی چہ کسانی ءَ دودا ءَ گندگ ءَ اَت ھردیں آئی ءِ لوگ ءَ آئی ءِ برات ءِ نیاد ءَ اتک شلی ءَ چیروکائی چار اِت، آئی ءَ وتی اندر ءَ واھگے داشت کہ دودا ھر روچ بئیت ءُ آئی ءَ بگند ایت، آئی ءِ آیاھگ آئی ءِ چارگ آئی ءِ گپ ءُ تران شلی ءَ سک دوست اِت اَنت دودا ءِ دپ ءَ در اتکگیں درْاھیں دانک شپانی پاساں شلی ءِ گوشاں چو وش تواریں سوت ءَ چکرّ اِت اَنت آئی ءِ توار ءَ چے شلی ءَ ساکمی رس ات ءُ وتی اندوھاں چے پراموش بوت۔ بلے آئی ءِ اے واھگ زوت پُروش ایت وھدے ھلک ءِ جاور نگیگ بنت ءُ دودا اے ھلک ءَ یل دنت روت، وھد ھمے وڑ ءَ گوْزان بیت ءُ شلی دودا ءِ یاتانی گوما وتی روچاں چو تھار شپیں کوٹی ءِ تہ ءَ دیم ءَ دِکّہ دیان ءُ گوْازینان بیت۔

مگرب ءِ وھد اَت چُل ءَ چے دوتّانی بوہ گوں سارتیں کوش ءَ ھوار اَت ءُ شلی ءَ تاھیر بکشگ ءَ اَت، شلی بے سبری ءِ گوما وتی برات ءِ ودار ءَ نشتگ اَت کہ کدی آ بئیت ءُ دودا ءِ اکس ءَ گوں وت بیار اِیت، شلی ءَ زِدّ کتگ اَت کہ شیھک وتی سنگت ءِ اکس ءَ پہ یک چمے ءِ چارگ ءَ بیار اِیت اے گپ ءِ سر ءَ شیھک ابکّا بوت کہ “منی سنگت ءِ اکس ءَ تو چے کن ئے؟” بلے شلی ھمے گپ ءِ سر ءَ رازی ئِے کنت کہ آ کسانی ءَ یک جاہ بوتگ اَنت ءُ دیر اِنت نہ دیستگ ئِے۔ تھاری چاریں آتراپاں مان شانگ ءَ اَت، شلی ھیالانی کور چات ءَ کپتگ اَت کہ شیھک ءَ دروازگ پچ کت دروازگ ءِ توار ءَ گوں شلی ھیالاں چے در اَتک۔ شیھک ءَ سالے ءَ پد وتی دوستیگیں سنگت دیستگ اَت ءُ سک گل اَت، آ وتی گوھار ءِ کش ءَ نشت ءُ دودا ءِ کسہ کنگ ءَ لگّ ات؛ “دودا ءَ اے سالے تھا باز اڑ ءُ جنجالانی دیمپانی کتگ ات آئی ءَ درْاھیں راج ءِ زمہ واری وتی نازرکیں کوپگانی سر ءَ کتگ، اے راہ ءَ کہ دودا در کپتگ اِد ءَ آ وتی وشیاں وتی مارشتاں وتی ھمبلاں درْاھیناں بائد اِنت پُشت ءَ یلہ بدنت بس پہ وتی گلزمین ءِ ڈل ءُ ڈوکانی پھّازگ ءِ ھاتر‌ ءَ وتی نوکیں پدریچ ءِ دیم ءَ برگ ءُ مئے وڑیں ھمبل ءُ ھمراھاں آزاتیں زند ءِ بکشگ ءِ ھاتر ءَ وت ءَ زندگ بکنت۔

ما اے چیز ءَ نماریں نجیڑیں بلے اے مئے وشبھتی اِنت مارا چوشیں سنگت رس اتگ کہ وتی شُد، تُن ءُ واباں ءَ چے سر گوستگ اَنت تاکہ ما سِیریں لاپ ءَ وتی شپاں روچ بکنیں، آ وتی ھون ءِ وشبو ءِ گوما کُلیں راج ءَ زندگ دار اَنت بلے ما نہ زانت کاریں کوم وتی سنگتانی کربانی ءَ مان نیاریں، اشانی اے سسّہ ءُ لیکہ مارا دیم ءَ برگ لوٹ اِیت مارا اے دلبڈی دیگ لوٹ اَنت- شیھک ءَ دیمتر ءَ گپ جت نکت بس آئی ءَ وتی دست ءِ موبائل شلی ءِ نیمگ ءَ شھار دات ءُ دودا ءِ اکس ئِے پیش داشت، دمانے ءَ پد آ پاد اتک دومی کوٹی ءَ شُت شلی پدا چُل ءَ شُت نشت، شلی ءَ میزاں میزاں وتی موبائل در کت دودا ءِ اکس ءَ چارگ ءَ لگّت آئی ءَ شیھک ءِ موبائل ءَ چے اکس چیروکائی وتی موبائل ءَ سِنڈ کتگ اَت، دودا ءِ اکس ءَ سمارگ ءَ لگّت انچو سماہ ئِے کت کہ دودا آئی ءِ دیم ءَ نشتگ ءُ آئی ءِ پیشانیگ ءَ دست پر کنگ ءَ اِنت۔ چُلّ ءِ تہ ءَ روکیں آس ءَ چارگ ءَ لگّت ءُ جیڑ اِت ئِے؛ ” زمانگے ءَ پد کہ ترا چہ گستا بوتگاں نوں من ترا چاراں گمان کناں منی لنٹ پہ بچکندے ءَ انچوش تلوستگ اَنت چوشکہ تونّیکیں گلابے پہ آپ ءَ زر ایت، من نزاناں اے چونیں مارشتے منی تہ ءَ چست بوتگ چہ کسانی ءَ تو منی دیم ءَ بوتگ ئے باز وھد ءَ من چیروکائی ھم ترا چار اِتگ بلے انگت دل ءَ گُشتگ گیشتر بچار ئِے تئی توک ءَ گش ئے انچیں جادو ئے بوتگ کہ ھر وھد من ءَ وتی نیمگ ءَ کَشّتگ ئِے-

شلی ھمے شش پنچ ءِ تہ ءَ کپتگ اَت کہ دودا ءَ ھال بدنت یا ناں، وتی نہ گُشتگیں مارشتاں آئی ءِ دیم ءَ درشان بکنت یا ناں بلے آئی ءِ توک ءَ اینچو ھمت ھم نیست اَت بس آئی ءِ اکس ئِے چارت ءُ وت ءَ تاھیرے بکشات، آئی ءِ ھیال ئِے وتی زرد ءِ تھ ءَ کُبل کت اَنت ءُ ھیر کت اَنت۔

ھمے وڑ ءَ روچ گوْزان بوت اَنت شلی ءِ سور بوت ءُ اے ھلک ءَ چے در اتک شُت، سور ءَ پد ھم چہ دودا ءَ پراموش نہ بوت وس کت ئِے آئی ءِ ھیال چہ شلی ءِ سر ءَ در نیتک اَنت، مدتے ءَ پد اناگت ءَ یک روچے دودا ءِ سنگتے ءِ گون ءَ آئی ءِ ھال ءُ اھوال بوت گپ گپ ءِ تہ ءَ آئی ءَ دودا ءِ جست پرس کت گڑا ھال ئِے رس ات “دودا سور کتگ ءُ چکے ھستے”، آئی ءِ ءُ چکانی اکس ءَ ھم پہ شلی ءَ دیم دنت، شلی ءِ سر ءَ گش ئے آزمان کپ ایت آ نہ زانت کجام مارشت ءِ بُنیاد ءَ گمیگ بہ بیت دودا ءَ ھچبر چُشیں کول ءُ کرارے آئی ءِ گون نہ کتگ اَت کہ چہ آئی ءَ گلگدار بہ بیت بلے شلی چہ دل ءَ مجبور اَت، ساھتے رند شلی ءَ وتی ھوش سر ءَ کت بلے دل ئِے داشت نکت ءُ آئی ءَ چے دودا ءِ نمبر ءِ لوٹے زاھر کت۔

شلی ءَ وتی کوٹی ءِ دپ پچ کت شت تھت ءِ سر ءَ نشت وتی موبائل ئِے دست ءَ کت چیٹ ءَ پُترت پہ دودا ءَ میسجے نبشتہ ئِے کت پدا آئی ءِ نمبر ءَ روک روک ءَ چارگ ءَ لگّت ءُ میسج ئِے ڈیلیٹ کت چیٹ ءَ چے در اتک، آئی ءَ موبائل تھت ءِ سر ءَ ھیر کت ءُ شت آندینک ءِ دیم ءَ اوشتات وت ءَ چارگ ءَ لگ ات ءُ گوں وت ءَ جیڑ اِت ئِے؛ “شلی تو چے کنگے؟ تو یک سور کتگیں زالے یے ءُ چکے لاپ ءَ اِنت، دودا ھم سور کتگ گوں وتی جن چکاں وش ءُ وش ھالیں زندے گوْازینگ ءَ اِنت، تو کجام آپ ءُ دپ ءَ اے گپاں گش ئے آئی ءَ؟ اگاں میسج بکن ئے ھم گڑا دودا ترا چے جواب دنت؟ تئی ھیال ءَ دودا تئی مھر ءَ وتی دیدگانی تھا سمبھین اِیت ءُ ترا وتی دل ءَ جاگہ دنت؟ اناں شلی، اے بے سریں گپاں چہ وتی سر ءَ در کن گنوک مبو۔

دو سے روچ ءَ پد ماں پد ھمے وڑ ءَ چیٹ ءَ پُترت بلے دست ئِے دیما نہ کِنز اِت اَنت میسج ئِے نبشتہ کت بلے پدا ڈیلیٹ ئِے کت، جیڑگ ءَ لگّت کہ “وتی مارشتانی جزبگانی زاھر کنگ ءَ ھچ متلب نیست چے نبشتہ بکناں چے بگوشاں کہ من تئی ھودوکاں؟ منی چم ھر وھد تئی دیدار ءِ تلبگار بوتگ اَنت تو منی دل ءَ نشتگ ئے؟” آئی ءَ لوٹ ات نمبر ءِ ڈیلیٹ بکنت بلے دست ءُ دل ئِے نہ شُت اَنت۔ ھمے وڑ ءَ لھتے روچ گوْست شلی وتی دل ءِ توکے چست بوتگیں جیڑہ ءِ گوما جنگ ءَ اَت بلے ھچ جاگہ ءَ سر نہ بوتگ اَت۔ یک روچے بام ءَ ٹک کتگ اَت دریگ ءَ چے روچ ءِ رژن شلی ءِ چماں ناوار کنگ ءَ اَت شلی ءَ بُست کت موبائل ءَ چے نوٹیفکیشن ءِ توار چست بوت شلی ءَ موبائل چست کت چاران بوت اناگت ءَ پوسٹے آئی ءِ دیم ءَ گوْست آئی ءَ وتی چمانی سر ءَ بیسہ نبوت پدا شری ءَ چارگ ءَ لگّت ءُ ونت ئِے ‘دودا گوں سنگتے ءَ شھید کنگ بوتگ’، اے گپ چو سوچّن ءَ آئی ءِ سر ءَ ٹُنگ کنگ ءَ لگّ اِت انچیں دردے آئی ءِ سر ءَ چست بوت گش ئے کوھے آئی ءِ سر ءَ کپت ءُ ٹُکّر ٹُکّر بوت آ وتی اوشتاتگیں جاگہ ءَ ھُشک ءُ ھیران بوت اے دمان ءَ آئی ءَ وتی کش ءُ کِرّ ءِ درْاھیں مردم وتی جند ھم شموشت بس یکیں دودا آئی ءظ دیم ءَ اَت ءُ پدا ھمے جیڑ اِت ئِے “دْریگتیں دودا ءَ وتی دیوانگ ءِ دل ءِ اندر ءِ گپتار ءُ گال بہ پھمتین اَنت گڑا اے مھر ءَ من ءَ چو گنھگارے ئے پیم ءَ ھر دمان اذیت ءِ توکا دؤر نہ داتگ اَت” ھمدا چے شلی ءَ دودا ءِ نمبر ڈیلیٹ کت ءُ وتی نہ گُشتگیں مارشت ئِے گُٹ گیر کت اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

زاناں وانگ پہ جنّکاں ایبے؟

نبشتہ کار: شازیہ بلوچ

دی بلوچستان پوسٹ

جِنک: زاناں وانگ پہ بلوچ زالبولانی واست ءَ ایب اِنت؟ مَن وَ جنکے آں، من وَانگ ءَ آں ءُ دیم ءَ ھم وان آں۔

چاگِرد: تو زاناں انگت وان ئے؟ جنک ھو مَن انگت دیم ءَ وان آں چاگرد: نوں بس اِنت تو وتی میتگ ءِ اسکول ونتگ ءُ ھلاس کُتگ نوں گِس ءَ بِہ نِند کہ تو وَ بلوچیں زالبولے ئے انی تئی سور ءِ اُمر اِنت۔

جنک: چی واست ءَ مہ وان آں؟ زاناں بلوچ زالبوال ءَ دیم ءَ وانگی نہ اِنت؟ چَاگرد: جنک ءِ واست ءَ اِینچو وانگ وَ ایبے جنک: اِنّا اِد ءَ تو رد ئے جنک واست ءَ وانگ وَ سک شر اِنت۔ جنک شُمارا یک وشیں نامے دنت، شمارا چہ مجگی گلامی کَش ایت ءُ ایردستیں چاگِرد پہ راجی وتواجھی ءَ آگاہ کنت۔

چاگرد: تو سرپد نہ بہ ئے پرچا کہ جنک وَ جنکے، جنک ءَ را اِینچو بُود وَ نیست کہ مئے رھشُونی بہ کنت۔
جنک: اِینچو اِزت کہ ھُدا ءَ زالبولاں بکشاتَگ مردین آدم ءَ اِنّا، شما وت بلوچی رواج ءُ دوداں بے سما اِت۔

چاگرد: تو وتارا مردین آدم ءِ مَٹ مہ کن، تو مردین آدم ءِ گپ ءَ کن ئے مردین وَ ھرچ وڑ ءَ وتی واست ءَ راہ ءُ درے درگیج ایت ءُ ھرچ کُجا شُت کنت۔

جنک: گُڑا جَنک ھم وتی وانگ ءُ وتی دیمروی ءِ واست ءَ ھچ وڑیں کُربانی ءِ دیگ ءَ چَک ءُ پد نہ بیت، جنک ھم پہ وت ءَ راھے شُوھاز ایت۔

چاگرد: جنک ءَ سوچ نوں جنک دِگہ جاھگاں وانگ ءِ واست ءَ روت ءُ گوں بَچّکاں ھوار بیت اِنت ءُ وَت مستر بہ بیت؟ لانت بات چُوشیں جنکاں کہ مارا بدنام بکنت-

جنک: شُما پَرچا ناسرپد اِت کہ جنک ءِ دل ھم لُوٹ ایت کہ بوان ایت ءُ یک شریں کِردے ءِ واھُند بہ بیت ءُ چیزے وتی جِند ءِ واست ءَ ، وتی کھول ءُ وتی راج ءِ واست ءَ کُت بہ کنت۔

چاگِرد: من نہ منّ آں چوشیں جنکّاں اگاں باندا چہ گِس ءَ درکپ اِیت ءُ ھرکس پد ءَ جُست کنت کہ باریں پلانی ءِ جِنک کُجا شُت؟ گِند ئے پہ وانگ ءَ شَال ءَ، آواران ءَ یا بولان ءَ اڑے ایشی ءَ چی ءَ چُوش کُتگ پہ وانگ ءِ واست ءَ پرچا در پہ در اِنت۔ اے بے گیرت ءِ سر بات پِلانی ءِ جنک در پہ در اِنت، اود ءَ بچکّانی توک ءَ ھوار اِنت ءُ اِد ءَ مات ءُ پِت اش نشتگ اَنت کہ مئے جنگ پہ وانگ ءَ شُتگ اَنت۔

جنک: شُما بِچار اِت من وان آن ءُ یک روچے ءَ شریں ڈاکٹرے جوڑ باں، گُڑا منی نام دُگنیا ءَ جکس اِیت ءُ پد ءَ شُما ھمے گوش اِت کہ اڑے اے وَ پِلانی جنک اِنت مرچی اِیش اِنت کارگِس(Office) نشتگ یا نادْراھجاہ ءَ ءُ پد ءَ شُما ھمے گُوش اِت کہ اِے مئے وتی تُروزاتک اِنت، اے مئے سیاد اِنت۔ ھَو اے ھما اِنت کہ شُما ایشی ءِ سر ءَ وڑ وڑیں ھُنر پندل ساز اِتگ-

چاگِرد: ھو واکی تو راست گُشگ ءَ ئے پہ جنک ءَ وانگ ایب نہ انت نوں ما زان ایں کہ بلوچ زالبول ھم پہ وت ءَ راہ پَچ کُت کنت ءُ دیمروی کنت-

ھو جنک ءَ پہ وانگ ایب نہ انت۔ اُمیت کن آں کہ شُما منی اے کسانیں کلوہ ءَ سرپد بُوتگ اِت۔ من گوں ھَما مات ءُ پتاں دزبندی کن آں کہ وتی جنکاں بوانین اَنت زالبول واست ءَ وانگ ھچ ایب نہ انت۔ چاگرد ءَ ویل کن اِت کہ چاگرد ھرکس ءَ وڑ وڑیں گپ گوش ایت، پرچا کہ مئے چاگِرد ءِ مردم سرپد نہ اَنت ، چاگرد ءَ وَ بانُک شاری ءَ ھم گُشتگ ھما شارُل کہ وتی وشّیں زِند پہ مئے ءُ شُمئے ءُ مئے آیوکیں پدریچ ءِ واست ءَ ندر ئِے کُت۔ بلے ھیر شُما چاگرد ءِ گپاں دلگوش مہ کن اِت وتی جنکاں الّم بوانین اِت۔ گِند ئے ھُدا ءَ جنک ودی کُتگ گُڑا تھنا پہ گِس ءِ کارانی واست ءَ وَ ناں بلکیں اسلام ءِ رھبدانی ھساب ءَ مردین ءُ زالبول ءَ برابری ءِ ھَک ھست۔ چوناھا بلوچ یک آزات ھیالیں راجے کہ اے راج ءِ توک ءَ زرینہ مری، شھید کریما بلوچ، شھید سرباز بانک شاری بلوچ، کامریڈ ماھرنگ ءُ کامریڈ ھوران بلوچ ءِ وڑ ءَ دِگہ بازیں بلوچ زالبول دوی کُتگ اَنت۔ بلوچ راج سلامت بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

برطانیہ ءِ ھال سرکنوکیں ادارہ روئٹرز ءِ رد ءَ آدینگ ءِ روچ ءَ امریکہ ءِ مھکمہ ءِ ھزانہ ءَ یک درشانے ءِ توک ءَ گوشتگ کہ آئی ءَ قدس ایوی ایشن انڈسٹریز ءِ شش ایگزیکٹیوز ءُ بورڈ باسکانی سر ءَ بندش جتگ-

زانگ بہ بیت گوستگیں روچاں وانشنگٹن ءِ گوشگ ات کہ ایرانی ڈرونز روس ءَ یوکرین ءِ جنگ ءَ گوں یوکرینی شھرانی سر ءَ اُرش کنگ ءَ روس ءَ کارمرد کرتگ اَنت –

امریکہ ءِ مھکمہ ءِ ھزانہ ءِ رد ءَ قدس ایوی ایشن انڈسٹریز کہ سال دوھزار ءُ سیزدہ ءَ امریکہ ءِ بندشانی زد ءَ اِنت آئی ءِ گوشگ اِنت اے کمپنی یک گچینی ایرانی پھریزی ءِ دروشم ءَ ڈرونزانی ڈیزائن ءُ پیداکی ءِ زمہ وار اِنت-

امریکہ ءِ وزیر ھزانہ جینٹ پیلین ءَ گوشتگ ما پوتن ءِ اے سلاہ، کہ یوکرین ءِ ھلاپ ءَ وتی مستی ءُ ملنڈی ءَ جنگ ءِ آس ءَ جمبور کنگ ءَ اِنت ءُ گڑا اشی ءِ دارگ ءِ ھاتر ءَ وتی ھرچ واک ھست اِنت ءُ ھرچ چیز ءَ کارمرد کرت کن ایں-

ایران ءِ ایرو اسپیس انڈسٹریز آرگنائزیشن ءِ ڈائریکٹر ءِ سر ءَ بندش جنگ بیتگ اَنت، اے درگت ءَ وزیر ھزانہ ءِ گوشگ اَت اے یک گچینی ادارھے کہ اشی ءَ ایران ءِ بیلسٹک میزائلانی نیادانی زمہ واری پہ وت ءَ زرتگ ءُ اے چیزانی جوڑ کنگ ءَ ھوار اِنت –

اے بندش ءَ پد اے کمپنی ماٹو کنگ بیت ءُ امریکہ ءَ جاڑیگیں کجام ھم دروشم اود ءَ نہ مان اَنت ءُ آئی ءِ دروستیں چیز ھلاس کنگ ءُ امریکہ ءِ ھچ شھری اے کمپنی ءِ گون ءَ باپاری نہ کنت ءُ اگاں کسے ءَ اے رھبند لگ ات کت گڑا آ ھم بندشانی دیمپان کنگ بیت اِنت-

زانگ بہ بیت ایشی ءَ پیش امریکہ ءَ اے کمپنیانی سر ءَ بندش جتگ کہ آیانی سر ءَ ایرانی ڈرونز کہ آ روس ءَ زرتگ ءُ یوکرین ءِ سر ءَ جتگ اَنت کہ اے کمپنیاں بھتام بیتگ ایشاں جوڑ کرتگ ءَ سر کرتگ اَنت-

ایران ءَ اے گپ من اتگ کہ آئی ءُ روس ءَ را ڈرونز داتگ بلے اے گپ آئی ءَ تچک کتگ آئی ءَ گوستگیں سال ءِ فروری ءَ یوکرین ءِ اُرش ءَ پیسر بھا کتگ اَنت، دومی نیمگ ءَ ماسکو ءَ اے گپ رد کتگ کہ ایاں ایرانی ڈرونز یوکرین ءِ سر ءَ کامرد کتگ اَنت-