TBP Balochi

آل بلوچستان میونسپل ورکرز ایسوسی ایشن بلوچستان ءَ شال ءَ ھستیں ملازمانی پکارانی نہ دیگ ءُ دگہ لوٹانی ھک ءَ میٹرو پولیٹن کارپوریشن ءِ کش ءُ گوراں گیٹ ءِ دیم ءَ زھرشانی کنان ءَ نندانک جتگ –

ملازمینانی گوشگ اِنت مئے لوٹاں منگ ءَ نہ اَنت گوستگیں سَے ماھانی توک ءَ کنٹریکٹ ملازمین وتی پکاراں چہ زبھر اَنت یک ماھے ءُ ھپت روچ اِنت زھرشانی کنگ ءَ ایں-

ملازمینانی گوشگ اَت ما گوستگیں چار سالان چہ میٹروپولیٹن کارپوریشن ءِ انتزامیہ ءِ نیمگ ءَ چہ ملازمین گریجویٹی ءِ ارگ ءِ ھلاپ ءَ زھرشانی برجاہ داشتگ بلے بُتیں سرکار ءُ انتزامیہ ملازمینانی پکاراں چہ پینشن فنڈ کٹوتی ءَ کنگ ءَ اَنت آ وتی دستاں مھنت ءِ زرانی ھاتر ءَ زھرشانی کنگ ءَ اَنت-

آیاں گوشتگ ما وتی ملازمانی جائزیں لوٹاں چہ ھچبر دست کش نہ بہ ایں سرکار ءُ انتزامیہ ءُ ملازمانی مالی جیڑہ ءِ زھرشانی ڈالچار کرتگ ءُ جیڑہ ءَ ھلاس کنگ ءَ نہ اِنت-

آیاں گوشتگ کہ چریشی ءَ باز پدردیگ اِنت ملازمانی سَے ماھاں پکار ءُ چرایاں چہ گریجویٹی سرجم کنگ ءُ مھکمہ ءِ گھتری ءِ واستا گامگیج بہ زور ایت-

زھرشانی کنوکاں وتی لوٹانی واستا اوگام جتگ ءَ پد ءَ بازیں اداراں پد پُر امنیں رنگے ءَ یک یک بیتگ اَنت-

ھمک آدینگ ءِ وڑ ءَ اے آدینگ ءَ ھم روکپتی بلوچستان ءَ مھلوک ءَ “خونین جمعہ ” ءِ یاد ءَ زھرشانی کتگ –

گیشیں ھالانی رد ءَ روکپتی بلوچستان ءِ بنجاھی شھر زاھدان ءَ آدینگ ءِ نماز ءَ پد مھلوک ءَ زھرشانی کنان ءَ شھر ءِ جتا جتائیں جاھاں تران کتگ-

زھرشانی ءَ مردیناں ھوار زالبولاں ھم بھر زرتگ کہ اود ءَ زھرشانی کنوکاں ایرانی پاسداران ءِ انکلاب خامنہ ای ءِ ھلاپ ءَ اوگان جتگ ءُ دستاں نبشتگیں تاک چست کتگ اَنت کہ ایانی سر ءَ انساپ ءُ سرکار ءِ ھلاپ ءَ لبز نبشتگ بیتگ اَنت-

آیاں گوشتگ کہ زاھدان ءَ یک ھنچیں گورنرے دارگ بیتگ کہ آ گوستگیں پوجی یے بیتگ چرے پوجی ءِ زمانگ ءَ ھم بلوچانی کُشت ءُ کوش بیتگ اَنت ءُ گر ءُ بند بیتگ اَنت-

آیاں گوشتگ کہ ایشی ءِ دارگ ءَ پد ھم زاھدان ءَ بلوچ ورنایانی گرگ ءُ بندیگ کنگاں گیشی اتکگ اَنت –

آیاں گوشتگ کہ اے سی ستمبر پہ بلوچاں ھنچیں روچے کہ اے روچ ھچ رنگ ءَ بے ھیال کنگ نہ بیت اِنت کہ اے روچ ءَ بازیں کچے ءَ بلوچ ورنایانی ھون ما زاھدان ءِ دلبند ءَ ریچگ بیتگ اَنت-

زانگ بہ بیت گوستگیں پنچ روچانی توک ءَ تنی وھدی بازیں مردمے گرگ ءُ بندیگ کنگ بیتگ اَنت-

گرگ بیتگیں مردمانی تہ ءَ بیست ءُ پنچ مردمانی پجار بیتگ اَنت ءُ انسانی ھکانی واستا روکپتی بلوچستان ءَ کار کنوکیں گل بلوچ کمپعن فعالین ءِ رد ءَ گپتگیں مردمانی کچ یک سد ءُ چاردہ اَنت بلے تنی وھدی سرجمیں مردمانی نام ءُ دزنشان دیم ءَ نیتکگ اَنت-

گوستگیں روچ ءَ چہ روکپتی بلوچستان ءَ بندوکیں ٹیلی گرام چینلاں چہ شنگ بیتگیں اھوالاں ھم اے بیگواہ بیتگیں مردمانی بارو ءَ بازیں مردمانی نام دیم ءَ اتکگ بیتگ اَنت-

دومی نیمگ ءَ زاھدان ءِ اھل سنت ءَ بندوک ءُ مکی مسیت ءِ پیش امام مولانا عبدالحمید بلوچ ءَ ھم ورنایانی بیگواھی ایر جتگ ءُ آیانی یل کنگ ءِ لوٹ کتگ-

دومی نیمگ ءَ زاھدان ءِ پولیس ءَ گوشتگ کہ اے مردم جتا جتائیں جاھاں گپتگ اَنت ءُ مردم سلاہ بند ءُ دگہ دگہ ڈیھانی مردم اَنت بلے پجار بوگ ءَ پد آیانی پجار زاھدان ءِ کش ءُ گورانی ھندانی نام ءَ زانگ بیتگ اَنت-

بلوچستان ءَ گرانھادی ءُ آرت ءِ نیستی ءِ ھساب ءَ مھلوک دلسیاہ، سرکار آرت نیستی ءِ گر ءُ دار ءَ بے سوب بوتگ، بلوچستان ءِ باپاری شھر حب ءَ یک کلو ءِ آرت یکسد ءُ شست ءَ سر بوتگ وھدیکہ مُرگ ءِ گوشت مردمانی زیرگ ءَ وس ءَ نہ انت –

بلوچستان ءِ وردنی واکدارانی نیمگ ءَ گلہ ءِ گودام نہ بوگ ءِ سوب ءَ کیچ ءَ آرت نیستی ءِ ھساب ءَ انت –

تربت ءِ باپاری کنوک آمیدگس ءَ سربوتگ انت ، گلہ ءُ مرگ زورکیں پرائس کنٹرول کمیٹی گرانھادی ءِ گرءُدار ءَ بے سوب بوتگ انت، وردنی چیزانی چیک اینڈ بیلنس ءِ نام ءُ نشان نیست –

واکدار نشتگ ءُ بس اکس کشی کنگ ءَ انت، پائدگ چست کنوکیں باپاری دمگی مردماں لٹ پُل کنگ ءَ انت ھچ وڈیں جست ءُ پرس ءِ پرنیست –

اے درگت ءَ گوشگ بوگ ءَ انت کہ بلوچستان ءِ باپاری شھر حب ءَ گلہ ءُ آرت ءِ گرانھادی ءِ سوب ءَ پائدگ چست کنوکیں باپاری کنوکاں وردنی مڈی آرت، برنج ءَ ھوار مرگ ءِ نھادانی تہ ءَ باز گیشی آرتگ –

وردنی سامان زورگ بزگر ءُ دمگی مردمانی وس ءَ در انت – اے وھد ءَ حب ءَ چل کلو والا گونی ءِ آرت شش ھزار ءُ چار سد ءُ حب فلو میل ءَ پنچ ھزار ءُ شش سد بھا بوگ انت ءُ گلہ پنجاہ کلو ھشت ھزار ءُ ھشت سد ءَ بھا بوگ ءَ انت – وھدیکی دان ءِ تہ ءَ ھم گیشی اتکگ یک کلو ءِ چِل کلدار گیش بوتگ – گرانھادی ءِ درگت ءَ دمگی مردمانی گوشگ انت ھب ءِ گرانھادی ءَ دومی جاھانی ریکارڈ پروش اِتگ – سندھ، پنجاپ ءُ کے پی کے ءَ آرت کمتر ءَ بھا بوگ ءَ انت وھدیکہ بلوچستان ءِ باپاری شھر حب ءَ آرت ءِ نھاد سک برز انت، باپاری گرانھادی ءَ پائدگ چست کنگ ءَ انت –

کراچی ءِ مارکیٹ چہ ھب ءَ بیست ءُ پنچ کلومیٹر دور انت اشی ءَ ابید ھم حب جاھمننداں کراچی ءِ نھاد ءَ آرت دیگ بوگ ءَ نہ انت –

کیچ ءِ گودام ءَ گلہ نیست، چہ کراچی آرت آیگ بند بوگ ءَ آرت ڈکالانت- گوستگیں ماھے ھاتر ءَ ھپت ھزار سَے سد ءُ پنجاہ ءُ پنچ گونی ءِ بدل ءَ بس دو ھزار گونی گلہ دیگ بوتگ – کیچ ءِ نھ لک مردمانی آبادی ھاتر ءَ بلوچستان ءِ وردنی واکدارانی نیمگ ءَ گلہ ءِ گودام ءَ نہ بوگ ءِ سوب ءَ کیچ ءَ آرت نیست انت –

فلور ملز ءِ رِدءَ بلوچستان ءِ واکداراں گوستگیں ماہ ءَ بلوچستان ءِ ھاتر ءَ یک لک گونی آرت زرتگ نھ لک آبادی ھاتر ءَ دسمبر ماہ ءَ ھپت ھزار سَے سد ءُ پنجاہ ءُ پنچ گونی دیگ ءُ اشانی تہ ءَ کیچ ءَ بس دوھزار گونی دیگ بوتگ –

وھدیکہ ایرانی سیمسر بوگ ءَ ابید چہ ایران ءَ آؤکیں آرت بندش ءِ چی کجام ھم وھد ءَ ھچ آرت بوت نہ کنت –

کیچ ءَ آرت ءِ گودام نہ رسگ ءِ سوب ءَ تربت ءِ باپاری کنوکاں بلوچستان مزن آمیدگس ءَ کانودی پٹیشن نبشتہ کنائین اِتگ –

لَچّہ : باگیں ھیال

شائر : امجد بیکس

دی بلوچستان پوسٹ

ھیال زندگ اِنت
من زندگاں
من زندگاں
کہ ھست اِنت ھیال
مارشت ءِ دُِنیا چیر ءُ سر اِنت
چہ پندل ءَ
چَمدیست ءَ چَمّ دیست ءَ نہ کنت
گند اِیت چے ؟
ھیال کہ زندگ اِنت
اشکونت گوش بلے ڈَمبیں توار
ھچ مُچی نیست
برمش ءُ چڑّکھے جسکیت جھان ءِ مانش ءَ
گوشانی آپرینیں پردگاں
ڈمب ڈَمب بیت
ھڑکیت دل
آسوکیں چِڑّک ءَ
جَھ سرایت
چہ دلبند ءِ زِہ ءَ
من زندگاں
تو زندگ ئے
اے باگیں ھیال اِنت ، زندگ اِنت
داتگ تو درس مجگ ءِ مِھ ءَ
پُر اِنت چہ کلپیں پگر ءَ گُش ئے
تو چونیں اڑے جناورے
وت نوں وت ءَ انسان گُش ئے
انگت گُنگ اِنت تئی زُبان
چَٹیت واداں ءَ گوشیت
تام ءَ کنتیں شَکلّیں
شیرکنیں سْروپاں وارت
گوشیت تھلنت بلے
نیست اِنت ترا اڑے درّسے
تو نوں بوتگ ئے ھاک ءُ جَسّے
مَجگ ءَ تئی ماں نیست مِسکیں ھیال
چہ لیکہ ءَ زِبھر بوتگ ئے !
بژن اِنت امجد بیکس ءَ
تو پرچی ءَ سائنس دربُرتگ ئے ؟
چہ وتی زُبان ءَ بیگانگ ئے
ایرجن ءِ مکھیں ڈیھ ءَ وتی
پُچوک لانتکگاں پہ امریکہ ءُ یورپ ءَ
بلے !!!
نیست ترا تئی جند ءِ سُد ءُ سَما
ھستی تئی مانیت کُج ءَ ؟
آ شکساں ءَ شھکاڑیں پگرے بوتگ اِنت
پہ وتی ڈیھ ءَ گُلیں
نمیران بوتگ اَنت
شَکساتگ اِیش وتی ساہ ءُ نَپس
ھست انسانے زندگ اِنت
گوں باگیں ھیال ءِ دُروشُم ءَ
دریھیت تیوگیں جھان ءَ کلشکان
سائنس ءُ پَلسپہ ونتگ آ کَسّاں
آ زُبان دوست بوتگ اَنت
انسان ءِ جان ءِ رکینوک بوتگ اَنت
آ آئن اسائن بہ بیت
یا کہ نیوٹن بہ بیت
یا کہ ڈیکارت
یا کہ سارتر ءُ کرکیگارڈ
نئے کہ من ءُ تو بلے !
جیڑگ کہ ھست
شھزانت زندگ اَنت
پیچ ءُ تاب ءَ وارت جیڑگے
جان ءِ بند ءُ رگاں زنزراِیت جیڑگے
لبزاں کالب کناں اِنت جیڑگے
برے جوش اِیت
برے سنگرایت جیڑگے
جواب ھست
بلے سوال جیڑگے !
من زندگاں
تو زندگ ئے
اے باگیں ھیال اِنت زندگ اِنت
مارشت تئی نوں مُرتگ اَنت
جنس ءُ جناور بوتگ ئے
بژن اِنت بیکس ءَ ھمے
نیست اِنت ترا تچکیں ھیال
نیست اِنت ترا باگیں ھیال

ھیکرز ءِ نیمگ ءَ بیست ءُ کروڑ ءَ گیش ٹوئٹر ءِ کارمز کنوکانی ای میل ایڈریسانی دُزگ ءُ آیاں یک آن لائن ھیکنگ فورم ءِ سر ءَ پوسٹ کنگ ءِ گمان کنگ بیتگ-

برطانوی ھال سرکنوکیں ایجنسی روئٹرز ءِ رد ءَ اسرائیل ءِ سائبر سکیورٹی مانیٹرنگ فورم “ھڈسن راک ” ءَ ھواریں ایلون گال ءَ لنکڈ ان ءَ نبشتہ کرتگ اے لگمتالی بدبھتی ءَ بازیں ھیکنگ، ٹارگٹ فشنگ ءُ ڈوکسنگ ءِ سبب جوڑ بیتگ اَنت-

آئی ءَ گوشتگ کہ اے درستاں چہ گچینی لیکساں چہ یکے چارگ بیتگ –

ٹوئٹر ءَ گوشتگ کہ رپورٹ ءِ درگت ءَ ھچ گپ نہ کتگ ایشی ءِ درگت ءَ ایلون گال ءَ اولی رند ءَ بیست ءُ چار دسمبر ءَ سوشل میڈیا ءَ پوسٹ کتگ ءُ نانکہ آئی ءِ بارو ءَ جست ءُ پرس ءُ دگہ پسھی کتگ –

اے گپ ءِ سرپدی ھم نہ بیتگ کہ ٹوئٹر ءَ نانکہ اشی ءِ بارو ءَ سرپدی نہ داتگ نانکہ کاروائی کتگ –

روئٹرز لس رنگ ءَ راست نہ کتگ ناکہ انیگیں فورم ڈیٹا چون بیتگ اَنت ءُ ناکہ ٹوئٹر ءَ دستیگ کتگ اَنت-

ھیکر فورم ءَ ھمود ءَ چار شمبے ءَ ڈیٹا شنگ بیتگیں اسکرین شاٹس آن لائن شنگ ءُ تالان بیگ ءَ اَنت-

کارمرز کنوکانی زاتی ڈیٹاھانی کارمرد کنگ ءِ ھال دیوکیں دائٹ “ھیو آئی بین پونڈ” کار کنوکاں ٹرائے ھنٹ بیوکیں ڈیٹا گندگ بیتگ اَنت ءُ ٹوئٹر ءَ گوشتگ کہ ھمے وڑ لگ ایت اے ھما سرپدی اِنت-

ھیکر یا ھیکرز ءِ پجار یا جاہ ءُ نشان دز نہ کپتگ اَنے اے ھیکنگ ایلون مسک ءِ گوستگیں سال ءَ کمپنی ءِ سمبالگ ءَ پیسر دوھزار ءُ بیست ءُ یک ءَ اوائل بیتگ –

آئرلینڈ ءَ ڈیٹا پروٹیکشن کمیشن ھمود ءَ ٹوئٹر ءَ پورپی ھیڈکوارٹر ءُ یو ایس فیڈرل ٹریڈ کمیشن ءَ گیش ءُ گیواری ءَ یورپی ڈیٹا پروٹیکشن ءِ رھبند ءُ امریکہ ءِ منگ نامہ ءِ آرڈر ءِ سرجمی ءَ ایلون مسک ءِ ملکت بیوکیں کمپنی ءِ چیردستی ءَ بیتگ-

ھُزدار ءِ دمگ مھران پمپ نزیک ءَ دستی بمب تراکے ءِ آسر ءَ یک مردمے ٹپی بیتگ ، دومی نیمگ ءَ اے اُرش زمہ واری بلوچ آجوئی لوٹوکیں گل بلوچ لبریشن آرمی ءَ منّ اِتگ-

بی ایل اے ءَ زورگریں پوج ءِ چیردستی ءَ کارکنوکیں ھاسیں کارندہ ءِ کوش زمہ واری منّ اِتگ-

بلوچ لبریشن آرمی ءِ جارکش جیئند بلوچ ءَ وتی شنگ کتگیں درشان ءِ تہ ءَ گْوشتگ کہ مئے سرمچاراں گوستگیں شپ ءَ ھَزدار ءَ زورگریں پاکستانی پوج ءِ چیریں ادارھانی یک ھاسیں کارندہ ،آفتاب شاہ بمب اُرش ءَ کُشتگ- اے بیڑ بلوچ لبریشن آرمی ءِ اسپیشل ٹیکٹیکل آپریشنز اسکواڈ ( ایس ڈی او ایس ) سرمچاراں کتگ-

بی ایل اے ءِ انٹیلیجنس ونگ ءَ چیزے وھد ءَ ساری ءَ پٹ ءُ پول کتگ کہ ھُزدار کالونی ءِ جھمنند آفتاب شاہ ء عبداللہ شاہ دُژمنیں پوج ءِ چیردستی ءَ یک کارکنوکیں کارندھے، آ بلوچ آجوئی لوٹوکانی لڑ ءَ ھوار بوگ ءِ جُھد کنگ ءَ اِنت، آجوئی لوٹوکانی بگیری ءَ کار کنگ ءِ جُھد ءَ اِنت – ھمے سرپدی ءِ رِد ءَ بی ایل اے ءِ سرمچاراں آئی ءِ گوم ءَ ھال ایوال بندات کتگ-

بی ایل اے ءِ اسپیشل آپریبشنز اسکواڈ ءِ سرمچاراں آفتاب شاہ ” ٹریپ ” کتگ ءُ بمب اُرش نشانگ کتگ کشتگ-

آفتاب شاہ زورگریں پاکستانی پوج ءِ چیریں ادارہ آئی ایس آئی ءِ یک ھاسیں کارندھے بیتگ، کہ ھُزدار شھر ءُ زھری ءَ چیریں ادارھانی نیٹ ورک ءِ پُرکار ءَ بیتگ، زورگریں پوج ءِ گوشگ پد ءَ بلوچ ورناھانی زورانسری آوار جنگ، کُشتکُشاری ءُ مردمانی گرگ ءُ زر لوٹگ ءَ ھوار بلوچ جُھد آجوئی ءِ بگیری ءَ کار کنگ ءِ کرداراں ھمگرنچ بیتگ- اے نیٹ ورک ءِ آ دگہ کارندھاں ھم ھمے جاہ ءَ سر کن ایں-

بلوچ لبریشن آرمی اے اُرش زمہ واری ءَ منّ اِیت- ما پدر کن ایں زورگریں پوج ءِ دراھگ ءُ اشی ءِ ھمکارانی ھلاس کنگ ءَ تاں وتی اُرشاں برجاہ دار ایں-

مروچی پنچ جنوری سال دوھزار بیست ءُ سَے ءَ شھید جلیل سنجرانی فاؤنڈیشن پنجگور ءِ گوں باڈر کمیٹی پْروم ءَ گند ءُ نند ئے بوتگ ءُ پْروم ءِ گریب ءُ بزگیں مھلونک ءِ جیڑہ ءُ جنجالانی درگت ءَ گپ ءُ تران کنگ بوتگ –

باڈر کمیٹی پْروم ءِ کماشاں گوشتگ کہ شھید جلیل سنجرانی فاؤنڈیشن ءِ جھد پہ لس مھلوک ءَ ستا کرز ایت –

آھانی گوشگ ات کہ باڈر کمیٹی پْروم ھر وھد ءَ پہ اے کار ءِ ھیرانی واست ءَ گوں شھید جلیل سنجرانی فاؤنڈیشن ءَ ھر وڑیں مدد ءُ کمک ءَ ساڑی انت-

نیاد ءَ گپ ءُ تران ءَ پد چہ باڈر کمیٹی پْروم ءِ نیمگ ءَ شھید جلیل سنجرانی فاؤنڈیشن ءَ بیست ھزار ءِ کلدار ءِ کمک کنگ بوتگ کہ چہ اے زرّانی تہ ءَ دہ ہزار کلدار محمد ولد نزیر احمدی واست ءَ دیگ بوتگ کہ کلشن جائین پْروم ءِ نندوکے ءُ شومک(ھون) نادراھی ءِ آماچ انت ءُ بچ اِتگیں دھیں ہزار پہ پْروم ءِ یک گریب ایں لوگے ءَ راشن زورگ ءُ دیگ بوتگ انت –

نیاد ءِ گڈی ءَ شھید جلیل سنجرانی فاؤنڈیشن پنجْگور ءَ باڈر کمیٹی پْروم ءِ منت گپتگ کہ باڈر کمیٹی پْروم ءَ پہ اے کار ءِ ھیرانی واست ءَ گوں شھید جلیل سنجرانی فاؤنڈیشن ءَ ھمراہ داری کتگ-