TBP Balochi

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں بلوچستان ءِ دمگ آواران جھاؤ ءَ پاکستانی پوج ءِ سر ءَ اُرش کُتگ –

اُرش جھاؤ ھند ڈولیجئی ءَ برجاھیں پاکستانی پوج ءِ پانگِس ءِ سر ءَ کنگ بوتگ ، اُرش ءَ پاکستانی پوج ءَ جانی تاوان بوتگ اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بی ایل ایف ءِ جارکش میجر گوھرام بلوچ ءِ رِد ءَ سرمچاراں چار شمبے ءِ شپ ءِ ادار ھپت ءَ آواران ءِ ھند جاؤ ڈولیجی ءَ برجاھیں پاکستانی پوج ءِ پانگس ءِ سر ءَ گوں دور جنگیں توپک ءُ مزنیں سلاھاں گوں اُرش کرتگ، دُژمنیں پوج جانی ءُ مالی تاوان داتگ –

جارکش ءَ گوشتگ کہ زورگریں پوج ءِ سر ءَ مئے اُرش داں زورگپتیں بلوچستان ءِ آجوئی ءَ تاں برجاہ مان انت –

بلوچ نودربر گل آزاد ءِ بنجاھی جارکش ءَ وتی شنگ کرتگیں درشان ءِ تہ ءَ نمیرانیں الیاس نزر ءُ نمیرانیں کمبر چاکر ءِ دوازدھمی نمیرانی ءِ سالروچ ءِ درگت ءَ آ دروت ندر کُتگ ءُ گوشتگ کہ آھانی جھد ءِ برورد دھکے ءَ پد ھم برجاہ انت – آھاں راجی آجوئی ءُ وتواکی ءِ ھاتر ءَ وتی جانانی دیمھونی داتگ ءُ بلوچستان ءِ آجوئی ءِ آھانی ھونانی گواھی ءَ دنت –

جارکش ءَ گوشتگ کہ کمبر چاکر ءُ الیاس نزر راجداریں بامرد بوتگ انت ءُ بلوچستان ءِ آجوئی زرمبشت ءِ تہ ءَ نودربر گل ءِ بھر بوتگ انت – آھاں راجکاریں باسک ءِ دروشم جوانیں کرد ءِ پیلو کتگ ءُ نودربراں زانت ءُ زانشت دیگ ءَ وتی کرد پیلو کرتگ – سیاسی ءُ پُرایمنیں باسک ءِ بوگ ءَ ابید ھم ریاستی ادارھاں اولسر ءَ آ آوار جتگ انت ءُ پدا پنچ جنوری سال دوھزار یانزدہ ءَ آھانی ژانگولیں جون چگل داتگ انت –

جارکش ءَ گوشتگ کہ راجی آجوئی جھد ءِ راہ ءَ رتکگیں ھون ھچبر پہ مپت نہ رو انت پرچاکہ آجوئی ءُ وتواکی آھانی رتکگیں ھونانی گواھی ءَ دنت – نمیرانیں الیاس نزر ءُ کمبر چاکر ءِ جھد ھچبر شمشکار کنگ نہ بنت آھانی جھد ءِ برورد سرجمیں بلوچستان ءَ ساڑی ءُ برجاہ انت –

روکپتی بلوچستان ءِ بنجاھی شھر زاھدان “دزاپ ” ءِ مکی مسیت ءِ پیش امام مولانا عبدالحمید ءَ مروچی فجر ءِ نماز ءِ وھد ءَ وتی لیکہ بیگواھیں مردمانی درگت ءَ درشان کرتگ اَنت-

مولانا عبدالحمید بلوچ ءَ ایران ءِ واکدارانی سر ءَ ایراد گران ءَ گوشتگ کہ شما وت ءَ “حزب اللہ ءُ انصار اللہ ” گوش ات بلے راستی ءَ شما حزب اللہ انصار اللہ نہ ات-

مولانا عبدالحمید بلوچ ءَ گوشت زاھدان ءِ مھلوک ءِ سر ءَ زُلمانی کوہ پروشگ بوگ ءَ اَنت کہ اے بلوچانی سر ءَ مزنیں زُلم اَنت ءُ اشاناں دگہ دگہ گلاں گوں بندوک کنگ ءُ برگ ءَ اَنت-

آئی ءَ گوشتگ کہ ھر ھما کس کہ دنیا ءِ تلب گار اِنت ءُ پد ءَ دومی مردمانی ھکاناں لُٹ ءُ پُل کن اَنت ءُ جرمانی سیاھگ ءَ ساھیل کن اَنت گڑا آ حزب اللہ نہ اَنت بلکیں حزب الشیطان اَنت انصار اللہ ءِ مانا ھدا ءِ کمک ءِ کار چوشکہ ھدا ءِ دین ءُ تاھت ءَ کنت ءُ نیکی ءُ بدی ءَ زانت نانکہ تھنا وتی جند ءِ زات ءِ تلبگار بیت اِنت-

آئی ءَ گوشت کہ حزب اللہ ءُ حزب الشیطنان نوع ءِ انسانانی زمان ءَ پد جاڑیگ اِنت ءُ اے ھردوکانی میان ءَ داں گڈی دیم پہ دیمی بیت اِنت مارا لوٹ ایت ما راستی حزب اللہ ءِ بھر جوڑ بہ ایں راستی ءُ انساپ ءَ شوھاز بہ کن ایں ءُ دنیا ءَ وت ءَ سنچ دار بہ کن ایں-

مولانا عبدالحمید بلوچ ءَ گوشت کہ گوستگیں روچاں زاھدان ءَ بازیں کچے ءَ ورنا گرگ ءُ بیگواہ کنگ بیتگ اَنت کہ اے ورنا زاھدان ءِ کُچگ ءُ دمک ءُ دراں گرگ ءُ بیگواہ کنگ بیتگ اَنت ءُ ما دوا کن ایں ات مردمانی سلامتی ءَ یلو بہ کن اَنت-

روکپتی بلوچستان ءِ جتا جتائیں جاھاں ایرانی لشکر ءَ بیست ءُ پنچ مردم آوار جنگ ءَ پد بیگواہ کرتگ اَنت-

گیشیں ھالانی رد ءَ روکپتی بلوچستان ءِ بنجاھی شھر زاھدان ءَ ھواریں دمگ شیر آباد، کریم آباد ءُ دگہ دگہ جاھاں بیست ءُ پنچ مردم آوار جتگ ءُ بیگواہ کرتگ اَنت-

ھالانی تہ ءَ گوشگ بیتگ کہ آوار جنگ بیتگیں مردمانی کچ بیست ءُ پنچ سال ءَ چہ جھل اِنت ءُ پانزدہ سال ءَ چہ برز اِنت –

آوار جنگ بیتگیں مردمانی پجار علی اکبر کبدانی، مھمد براھوئی، الیاس ریگی، نعمت اللہ سرگلزائی، علی براھوئی، یاسین ارباب، بلال توتازئی، احسان ایدون، بنیامین کوھکن، الیاس کوھکن، مھمد گورگیج، اسحاق ریگی، کریم کشانی، سعید، احسان سرگلزئی، منصور سارانی، احسان رخشانی، مھدی ناروئی، عارف، عزیز شاہ بخش، عبدالخالق، کامبیز ریگی، شھریار حسن زئی، عادل مھمد زئی، علی دھمردہ، شکور ریگی ءِ ناماں زانگ بیتگ اَنت-

ھالانی تہ ءَ گوشگ بیتگ کہ اے مردم گیشتر نودر اَنت کہ اے وھد ءَ وانگ ءَ بیتگ اَنت ءُ ایرانی لشکر ءَ جتا جتائیں جاھاں گپتگ ءُ برتگ اَنت-

ھالانی تہ ءَ گوشگ بیتگ کہ اے مردمانی گیشتر گرگ ءِ وھد ءَ ایرانی لشکر ءَ تیرگواری کرتگ ءُ پد ءَ مردم گپتگ اَنت- اے گوشگ بیتگ کہ تیرگواری ءِ وھد ءَ یک مردمے زدگ بیتگ-

دومی نیمگ ءَ ایرانی پولیس ءَ اے مردمانی گرگ ءَ پد وتی درشان ءَ گوشتگ کہ اے مردم دگہ ڈیھانی مردم اَنت گپتگ اَنت بلے دمگی مردماں اے گپ رد کرتگ ءُ گوشتگ اے زاھدان ءُ کش ءُ گوری دمگانی نندوک اَنت گڑا پد ءَ اے مردمانی پجار دیم ءَ پاشک بیتگ اَنت-

دمگی مردمانی گوشگ اِنت گوستگیں دمگدار مھمد کرمی ءَ زاھدان ءِ سپاہ ءِ اگدو زرتگ چریشی ءَ پد اود ءَ مردمانی گرگ ءُ بند کنگ ءِ توکاں گیشی اتکگ اَنت-

نامرد

آزمانکار: بی،کے بلوچ

دی بلوچستان پوسٹ

سھب ءِ سباہ ءَ نوکی روچ ءِ زردی مانشنیتگ اَت، جمبر چوش مُرگانی رَم ءَ آزمان ءِ دِیم ءَ بال ءَ ات انت، کروس گُٹ ءِ پورّ ءَ بانگ دَیگ ءَ ات انت، مانش (کبر) شپ ءِ نمب ءَ جتگ ءُ ترّ ات انت، پورا کبر یکّے ءَ اَنّوُں شُشتگ ءُ تاپ ءَ داتگ انت.

آئی ءَ چہ لھتیں گام ءَ دُور یک سْیاھیں کُچِکّے دیست کہ آ کبر ئِے مِسّ جنگ ءَ ات۔ میتگے ءِ جنینانی رزانانی مُشگ ءِ تَوار چِہ دُور ءَ ساپ پیداک ات۔ آ نوکی چہ واب ءَ پاد اتکگ ات ءُ ھُدا ءِ شگر گراگ ءِ بدل ءَ آئی ءَ ھمئے گُشت مات وَ مات انت ،داں شوکین مَرگیا ءَ زندگ بیگ اَلمی انت ۔

آئی ءَ کبر ءِ سَر ءِ نبشتانک ونت انت کبر ءِ سر ءَ نبشتہ ات “مرحوم ھاجی دلمُراد ” ئی ءَ گُشت پرندوشی من “مرحوم جان بی بی” ءِ بَگل ءَ بوتگ آں مرچی “مرحوم دل مُراد” ءِ کھکھکھ !-

گِند ئے اے بلوچ ءَ وتارا زبانے ھست باید وَ ھمیش انت اِد ءَ “مرحوم” ءِ جاگہ ءَ “ھُدا مُرزی” نبشتہ بکن انت بلے ھِیرّ اے کوم ءَ کَے سرپد بکنت اَگاں کسے وتی ماتیں زبان ءَ نبشتہ مَہ زانت آ چوناھا محروم انت۔

باید وَ ھمیش انت کہ اے کوم سرپد بِہ بیت کہ شمئے زبان بھشت ءِ زبان نہ انت کہ کیامت ءِ روچے شمئے زبان ءَ ھدا گپ جنت شما وتی زبان ءَ ھمد ءَ دگنیا ءَ کارمرز بکن ات بلے اے کوم پہ گپ ءَ سرپد کنگ نہ بیت! بچار بلوچ ءِ مسال ھما شکاری ئیگ اِنت کہ آ یکیں وھد ءَ دو کرگُشک ءِ رَند ءَ کپتگ لازمی انت کہ بے شکار بیت ۔
“The man who chases two rabbits, catches neither.”
— Confucius
تو وتار ءَ بلاھیں شھزانتے سرپد بہ ئے اِد ءَ بچار اے دْرست وتی وھد ءِ شھزانت بیتگ انت بلے مرچی زمین ءِ چیر ءَ انت ھُدامُرزیاں تئی ھال ھم ھمیشانی وڑ ءَ بیت داں زندگ ءِ گُڑا انچیں کارے بکن کہ کُلیں انساناں پائدگ بدنت۔ ھو ھُدامُرزی وَ ھر ھال ءَ تو بہ ئے! آ وتارا گُشگ ءَ ات وتی گون ءَ گپ ءَ ات۔

نی روچ ءَ ٹِک داتگ ات آئی ءَ گشاد ، گشاد ءَ وتی بلوچی چادِر چنڈ ات ءُ بَڈّ ءَ کُت دیم پہ ءَ وتی لوگ ءَ سُران بوت ۔ لوگ ءِ پُتیرگ ءِ شرت ءَ ٹوئیل ءِ بڈا کُت پد ءَ تھت ءِ سر ءَ تچک بوت تار ءِ سر ءَ نشتگیں کپودرھانی گون ءَ گپ ءَ لگ ات شما سرپدے نامردی چی ءَ گُش انت؟ وتی کش ءُ گورئے چار ات اَنت گپ ءَ لگ ات انچش گمان بیگ ءَ ات کہ آ کپودر ھانی ءِ گون ءَ راز داری ءِ گپ ءِ کنگ لوٹگ ءَ اَنت اے ترا گُشگ ءَ آں آئی ءَ سْیاھیں کپودرے ءِ نیمگ ءَ راستین دْست ٹال کُت زانگ بوت کہ آ راست اِنت چپ نہ انت بچار تو نامرد ءِ نہ ئے آ سْیاھیں کپودار ءَ گون ھبر کنگ ات ! تو وتی جوڑھی ءِ گون ءَ دپ میڈینگ ءَ ات پورّ اِش دیگ ءَ ات موسمے مزا ءَ زیرگ ءَ ات !بلئے بْیا منی ھال ءَ بچار چنچوک وھد بیت کہ من بَرے پَسانی واڑ ءَ گون پَساں وپساں ، بَرے شپاں گاڑی ءِ پشت ءِ سیٹ ءَ برے کاپر ءِ سَر ءَ دانکہ من ءَ منی بدواہ مہ جن انت باز وھد گوستگ کہ من وتی جنین نہ دیستگ آ شش سال ءَ سارگیں گپے! کہ آ ھیالانی تہ ءَ گار بوت پد ءَ گپ ءَ لگ ات۔ جَْنَوری ءِ ماہ ءَ ھور بیتگ ات شِیر ات بَھار گاہ ءِ موسم اَف “امان “ءِ مات گون من بند مِڈیتگ ات آ منی زندے وشین روچ ات اَنت ھمئے گپ ءَ گون آ یک ھیالے ءِ تہ ءَ گار بوُت ، ساھتے ءَ پد ، پد ءَ گپ ءَ لگ ات نامردی اے نہ انت کہ تو تھنا سکس کُت نہ کن ئے بلکیں نامردی ءِ باز رنگ ھست من ءَ تو ھر رنگ ءَ بچارے من نامردے آں نیکہ من وتی لوگ ءَ شُت کن آں نیکہ سُور ءُ پُرس ءَ شُت کن آں نیکہ زکرھان ءُ مسیت ءَ ! شش سال بیت کہ من اَئید ءَ لوگ ءَ نہ شُتگ آں شش سال بیت کہ من وتی بَچ امان جان ءُ آئی ءِ مات دُر بی بی نہ دیستگ چنچوں وھد انت کہ من شپ آں کبر ھستان ءَ وپس آں ، ھو ڈے وھد، وھد دار ءَ مہ گرات! آئی ءَ سگریٹے روک کُت افضل راشد ءِ اردو شئیرانی تہ ءَ شَیرے ءِ وانگے بندات کت –
“روشنی کے شہروں میں”
“رونقوں کے میلے میں”
“اک اجڑتی بستی کی”
” فکر کون کرتا یے!”
“دوستوں کے جھرمٹ میں”
“چاہتوں کی بارش میں”
“ہم اداس لوگوں کا”
“ذکر کون کرتا ہے!”

پد ءَ گپ ءَ لگ ات اے بری آئی ءِ سَر جھل اَت انچُش گُمان بوُت آ چیزے جیڑگ ءَ انت آئی ءَ ھموشی پْرشُت منی نامردی ءِ پُشپد ءَ یک مزنیں کِسّہ ھست آ وتی نامردی ءِ کِسّہ ءَ بِندات کنگ اَت کہ کپودراں بال کُت شُت انت “بُرو ات اللّہ شمئے شُوانگ بات۔

آئی ءَ ٹوئیل وتی بردست ءِ سربر ءَ ایر کُت اردو دستونکے ءِ دوبند ءِ وانگ ءَ رند پسیل ءَ پُترت ۔”اس قدر غم ہے کہ اظہار نہیں کر سکتے یہ وہ دریا ہے جسے پار نہیں کر سکتے” اے شَیرانی وانگ ءَ چہ زانگ بوُت کہ آ چہ گماں بار انت” ” دُرو تئی میار اَنت “اگاں اے گھہ اِتگ انت ھم تئی میار انت” بلئے زانگ بئیگ ءَ ات آ یک چیرین زبانے ءَ چے گپ کنگ ءَ اَت ۔

گرمیں اُپّارے کشّگ ءَ اَت ، پد ءَ شَیرے وانگے بندات – “زادِ سفر کے طور پر اس کائنات میں “اک اعتمادِ ذات ہو کچھ اور ہو نہ ہو” آئی ءَ جان شُشتگ ات پُریں چَرس ءِ کشگ ءِ ودار ءَ اَت کہ آ کجا ءَ بُروت ، چوناں ودار ءُ مرگ ءَ ھاسیں ھچ پَرک نیست ! باز جیڑگ ءَ پد یکبرے پد ءَ آئی ءَ سگریٹے بُن دات ءُ مزن مزنیں سُوٹ کشّان بوت چے کمپان ءَ دَراتک اے وھدی آئی ءِ چم گون دریا اَت انت آئی ءِ ھیال گون دریا ءَ بُک واران اَت سُبک سُبک ءَ سگریٹے دوتاں اے دیم ءُ آ دیم ءَ پر چکّرینگ ءَ ات گُشئے آ وتی ھسار ءِ چنگُل ءَ ڈن دراتکگ سُبک سُبک ءَ ساہ کشّان ءَ گُش ئے آ نیلّگیں تیاب آئی ءِ رازاں نبشتہ کنگ ءُ یلہ دایگ ءَ اَت۔ آئی اَرس ریچگ ءَ اَت انت آ زور ، زور ءَ گْریوگ ءَ ات وت ءَ را وت سھڑینگ ءَ ات تو گریوگ ءَ مہ دار بلے تئی دل ءِ گُبار دَرکیانت، پرچاکہ اَرس درستاں شرتریں “درمان” انت منومنو کنگ ءَ ات منی ھُدا ھمَے توار ءِ ھمراھی ءَ آئی ءِ رنگ ءُ پوست ءِ دْروشم ھم بدل بوت اَنت آئی ءِ دیم سُھر گَشت آئی ءِ ابیتکی درابووَگ ءَ ات۔ چیزے بکن پہ ھُدائیگی چیزے بکن گوں اے گپّ ءَ پہ دامانے آ بے ترک ءُ توار بوت من کجا روگ ءَ آں مَہ پُرس بس منی ھمراہ بوُ من سک تھنا آں آئی ءِ دیم گوں دریا اَت انچُش گمان بوت آ دریا ءَ گُشگ ءَ انت کہ منی ھمراہ بوُ آ بے ھیال ات کہ موٹرسئیکل سوار آن پُشت ءَ چِہ آئی ءِ سر ءَ تیرگوری کنگ بیت آ تیر آں گیپتگ اَت دریا لمب ءَ کپتگ ءَ کُچک تیرھانی توار آں چے تَچگ ءَ اَت انت دریا ءِ لمب ءِ نشتگیں مُرگاں بل کُت دریا ءِ سوریں آپ چُش تَرّیں لِلّک ءَ آئی ءِ ھوناں چَٹگ ءَ ات ءُ ساپ اِش کنگ ءَ ات مکلوک تچان ات آں پیدک اَت کہ باریں مرچی کَے جَنَگ بیتگ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

امریکہ ءَ گوشتگ کہ پاکستان ءُ امریکہ ھمگرنچیں لوٹانی تہ ءَ طالبان ءِ لوٹاں سرجم بہ کنت ءُ داعش، تحریک طالبان پاکستان ءُ القاعدہ وڑیں ناشر دمگ ءَ سیکورٹی ءُ سلامتی ءَ تاوان مہ دے اَنت-

چار شمبے ءِ روچ ءَ واشنگٹن ءَ ھپتگی نیاد ءَ مھکمہ ھارجہ ءِ جارکش نیڈپرائس ءَ گوشتگ امریکہ ءُ پاکستان ھمگرنچین لوٹانی توک ءَ اَنت اشی ءَ سدکی بہ کنت طالبان وتی کول ءُ مساماں سرجم بہ کنت اے آئی ایس ائی ایس ٹی ٹی پی ءُ القاعدہ ءِ وڑیں ناشر دمگ ءَ سیکورٹی ءَ تاوان نہ دے اَنت-

ھمے وھد ءَ جارکش نیڈرپرائس ءَ وتی تران ءَ گوشتگ کہ پاکستان ءِ گور ءَ وتی دفاع کنگ ءِ ھک ھست آئی ءَ گوشتگ پاکستان سیکورٹی ءِ واستا امریکہ ءِ نزیکیں ھمگرنچاں چہ یکے ءُ ناشرکاری ءِ ھلاس کنگ ءِ واستا ھردوکیں ڈیھ ھواری ءَ کار کنگ ءَ اَنت-

سروک بائیڈن ایشی ءِ سر ءَ ستک اِنت کہ وھدیکہ اد ءَ اژدری بیت گڑا ما ھردوکیں نیمگاں کاروائی کت کن ایں ھما رنگ ءَ ما کاروائی لھتے ماہ ءَ پیش ایمن الظواھری ءِ ھلاپ ءُ کتگ ات ھمے رنگ ءَ کا اوگانستان ءَ ھم کت کن ایں امریکہ مئے ھمسنت، مئے لوٹکار ءُ پاکستان ءِ سرکار ءِ واستا بیت اِنت-

تران ءَ نیڈ پرائس ءَ گوشتگ ات کہ طالبان وت اے بہ من اتگ آ وتی کرتگیں مساماں لرزگ ءَ اِنت یا تیار نہ اِنت اے راستی یے طالبان ءُ امریکہ ءِ مسام ڈیھ ءِ مساماں چہ یکے-

نیڈ پرائس ءَ دیمتر ءَ گوشتگ کہ پاکستان ءُ امریکہ ءِ یک درد اِنت اے درد ءِ دیمپان پاکستان ءَ ھوار اوگانستان ءِ سر ءَ ھم دردیگی اِنت-

آئی ءَ گوشتگ کہ پاکستان ءُ اوگانستان ءَ ناشرکارانی ترس ءُ ناشریانی سبب ءَ بازیں بے گناھیں مردمانی سر شتگ اَنت-

اوگانستان ءَ زالبول ءُ جنکانی سر ءَ طالبان ءِ نیمگ ءَ یکشلیں بندشانی سر ءَ یک جستے ءِ پسہ ءَ امریکہ ءِ مھکمہ ءِ ھارجہ ءَ گوشتگ کہ امریکہ ءِ وتی ھمسنتانی گون ءَ یکجاھیں جیڑگانی بارو ءَ طالبان ءِ ھلاپ ءَ دیم ءِ گامگیج چی بہ بیت اِنت-

آئی ءَ گوشتگ کہ طالبان میان اُستمانی برادری ءَ وتی منیگ ءِ گپ ءَ کنگ ءَ اِنت اشی ءِ ھواری ءَ وتی مساماں چہ پشتکنز بوگ ءَ اِنت ءُ اے ھردوکیں کار یک وھد ءَ نہ بنت-

آئی ءَ گوشتگ کہ اے بیت نہ کنت طالبان زالبولانی ھلاپ ءَ ناوشیں تامگیج بہ زیر ایت آیانی جیڑگاں ھلاس بہ کنت ءُ اوگان ءِ مھلوک ءِ واستا جوانیں کار بہ کنت دنیا ءِ راہ وت پرایاں پچ بنت-

زانگ بہ بیت سَے شمبے ءِ روچ ءَ اوگان طالبان ءِ نائب وزیر ءَ میان اُستمانی برادری ءَ چہ لوٹ کتگ کہ اوگان ءَ زرکاری بہ کنت-

امریکہ ءِ جارکش ءَ گوشتگ کہ اوگان ءِ مھلوک ءَ اے وھد ءَ یکدم کمکانی درکاری اِنت بلے امریکہ درستاں کمک کنوکیں ڈیھ اِنت ءُ بلے طالبان ءَ وتی پالیسی مٹ نہ کتگ اَنت چریشی ءَ اے امل بوگ ءَ نہ اِنت اشانی سبب ءَ اوگان ءِ شھریانی زند ءِ مشکل گیش جیڑہ بوگ ءَ اَنت-

بلوچستان ءِ جتاجتائیں دمگ کیچ ءُ آواران ءَ سے مردم پاکستانی پوج ءَ زورانسری آوار جتگ ءُ بیگواہ کتگ اَنت-

سربوتگیں ھالانی رِد ءَ گوستگیں شپ ءِ ساھت دوازدہ نیم ءَ کیچ ءِ بُنجاھی شھر تربت ءَ پاکستانی پوج ءَ یک لوگے ءِ سر ءَ بیڑبرتگ ءُ یک ورنایے آوار جنگ ءَ پد بیگواہ کتگ-

آوار جنگ بیتگیں ورنائے پجّار حامد ء بجّار نام ءَ چہ بیتگ مردمانی رِد ءَ حامد یک گُشندھے-

ھمے وڑ کیچ ءِ دمگ کولواہ ءِ ھند مالار ءَ پاکستانی پوج ءَ یک مردمے آوار جتگ ءُ بیتگیں مردم ءِ پجّار عبدالغفور ء عبداللہ نام ءَ چہ بیتگ-

ھمے آواران ءِ دمگ مشکے ءَ پاکستانی پوج ءَ یک مردمے زورانسری آوار جنی ءِ نشانگ کتگ- آوار جنگ بیتگیں مردم ءِ پجّار عبدالحق ء جنگی خان نام ءَ چہ بیتگ-

عبدالحق ھما وھد ءَ زورانسری آوار جنی ءِ نشانگ کنگ بیتگ وھدے کہ آ پاکستانی پوج ءَ مشکے نلی بُنجل ءَ لوٹائینتگ ءُ پد ءَ بیگواہ کتگ-

زانگ بہ بیت اشی ءَ ساری ھم پاکستانی پوج ءَ مردم وتی بُنجل ءَ لوٹائینتگ اَنت ءُ پد ءَ بیگواہ کتگ اَنت ءُ لھتے ءِ تیرسُپتگیں لاش دور داتگ اَنت اشی ءَ ساری آواران ءَ پاکستانی پوج ءَ عمران بابو نامیں ورنایے تیرسپُتگیں لاش دور داتگ اَت-

حیدر آباد ءَ زورانسری آوار جنگ بوتگیں نودربر سھیل بلوچ ءُ وندر ءَ آوار جنگ بوتگیں نودربر سعود ناز ءُ تمپ ءِ دمگ گومازی ءَ آوار جنگ بوتگیں واجو شیران ءُ نبیل لیاقت یل بوتگ ءُ وتی گِس ءَ سر بوتگ انت –

گیشیں ھالانی رِد ءَ سندھ ءِ دمگ حیدر آباد ءَ زورانسری آوار جنگ بوتگیں بلوچ نودربر سھیل بلوچ یل بوتگ – آ گوستگیں سال ءِ یک فروری ءَ سندھ ءِ دمگ حیدرآباد ءَ پاکستانی پوج ءَ آوار جتگ ءُ بیگواہ کتگ بوتگ –

سھیل بلوچ ءِ وارس ءَ چاگردی ترامجاھاں آئی ءِ یل بوگ ءِ ھبر راست کُتگ ءُ گوشتگ کہ سھیل بلوچ سالے ءَ پد یل بوتگ –

ھمے وڈ بلوچستان ءِ دمگ وندر ءَ گوستگیں سال ءِ بیست ءُ پنچ اکتوبر ءَ پوج ءِ دست ءَ زورانسری آوار جنگ بوتگیں نودربر سعود ناز ء رحیم بخش ناز مروچی یل بوتگ ءُ وتی گِس ءَ سر بوتگ –

دومی نیمگ ءَ تمپ ءِ دمگ گومازی ءَگوستگیں سال ءِ نوزدہ فروری ءَ پوج ءِ دست ءَ زورانسری آوار جنگ بوتگیں نبیل ء لیاقت ءُ واجو شیران ء واحد ھم یل بوتگ ءُ وتی گِس ءَ سر بوتگ انت –

زانگ بہ بیت بلوچستان ءَ زورانسری آوار جنیانی درچ ءَ بازیں وھدے بیت کہ برجاہ انت کہ اودا لھتے مردم یل بوتگ ءُ وتی گِساں سر بوتگ انت بلے پدا ھم بیگواھیں مردمانی ھاتر ءَ توار چست کنوکیں گل وائس فار بلوچ مسنگ پرسنز ءِ رِد دگہ دو ھمینچو آوار جنگ ءُ بیگواہ کنگ بوتگ –

گل ءِ رد ءَ بلوچستان ءِ ھر تک ءُ پھناتاں سیادی داروکیں بیست ھزار ءَ گیش مردم درکانودی آوار جنگ بوتگ انت کہ آھانی تہ ءَ گیشیں کچ سیاسی باسک رھشون انت –

دومی نیمگ ءَ شال ءِ پریس کلب ءِ دیم ءَ بیگواھیں مردمانی کھولانی گل وائس فار بلوچ مسنگ پرسنز زھرشانی برجاہ انت –

سربوتگیں ھالانی رِد ءَ مروچی سھب ءَ تمپ ءُ مند ءِ میانی دمگ برت ءَ پاکستانی پوج ءِ سر ءَ بمب تراک ءِ کنگ بوتگ –

بمب تراک برت ءُ دوکوپ ءِ میانی ھند ءَ پاکستانی پوج ءِ سر ءَ کنگ بوتگ کہ پاکستانی پوج ءِ ویگو گاڑی ءِ تراکناکیں شوروانی زد ءَ اتکگ، چریشی ءَ پاکستانی پوج ءَ جانی ءُ مالی تاوان ءِ دیمپانی کنگ کپتگ –

دومی نیمگ ءَ گوستگیں روچ ءَ بزاں دو جنوری ءَ ناشناسیں سلاہ بندیں مردماں کراچی ءِ دمگ سعید آباد ءَ آر آر ایف مزن کارگس نزیک ءَ پولیس کارمندانی سر ءَ تیرگواری کُتگ چریشی ءَ کانسٹیبل حنیف زدگ بوتگ – ھردو اُرشانی زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ انت –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ھردو اُرشانی زمّہ واری منّ اِتگ گوشتگ کہ اُرشانی آسر ءَ پاکستانی پوج ءِ سَے کارمند مُرتگ ءُ سَے زدگ بوتگ انت –

جارکش میجر گوھرام بلوچ ءَ گوشتگ کہ چار جنوری ءَ چارشمبے ءِ روچ ءَ کیچ ءِ دمگ تمپ ءِ بنجاھی بنجل ءَ در اتکگیں دیم پہ مند ءَ رؤکیں پوجی کاروان ءِ یک ویگو گاڑی ءِ مئے سرمچاراں برت ءُ دوکوپ ءِ میان ءَ تراکناکیں شوروانی نشانگ کُتگ – چریشی ءَ گاڑی ءَ سواریں سَے کارمند مُرتگ ءُ دو زدگ بوتگ انت –

جارکش ءَ دیمتر ءَ گوشتگ کہ مئے سرمچاراں دو جنوری ءَ کراچی ءِ دمگ سعید آباد ءَ آر آر ایف ءِ مزن کارگس نزیک ءَ پرپٹ ءِ سر ءَ تر ءُ گرد کنوکیں دو کارمندانی سر ءَ تیرگواری کتگ، چریشی ءَ سعید آباد ءِ تانہ ءِ کانسٹیبل حنیف زدگ بوتگ –

جارکش ءَ گوشتگ کہ زورگیریں پوج ءِ سر ءَ مئے اُرش زورگپتیں بلوچستان ءِ آجوئی ءَ تاں برجاہ مان انت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ نُھ سد ءُ یانزدہ روچ سرجم بوتگ انت، مروچی نیشنل پاٹی ءِ رھشون عبدالغفار قمبرانی، ظہیر احمد ءُ دگہ سیاسی ءُ چاگردی باسکاں بنجل ءَ اتکگ ءُ بیگواھیں مردمانی کھول گوم ءَ دلپدردی درشان اِتگ –

بنجل ءَ اتکگیں مردمانی میان ءَ گل ءِ کمک سرکماش ماما قدیر بلوچ ءَ تران کنان ءَ گوشتگ کہ مئے دراجکشیں پُرایمنین جھد ءِ ھلاس کنگ ءَ ریاست وڈ وڈیں پندل کنگ ءَ انت، استان وتی زورگیری ءِ برجاہ دارگ ءِ ھاتر ءَ زوراکی کنگ ءَ اِنت –

آئی ءَ گوشتگ کہ یک نیمگے ریاستی ادارہ مردماں درکانودی آوار جنگ ءُ بیگواہ کنگ ءَ اَنت ءُ دومی نیمگ ءَ وتی ناشریں کارپدانی چیردیگ ءَ کمیٹی ءُ کمیشن اڈ دیگ ءِ ڈرامہ کنگ ءَ انت کہ اے زورانسری آوار جنگ بوتگیں مردمانی کھول ءِ گوم ءَ مزاک یے – بلوچستان ءَ برجاھیں زلم زوراکیانی بگیری ءَ ما اقوام متحدہ ءُ میان استمانی انسانی ھکانی ادارہ مدامی دلگوش گور کنائین اِتگ بلے یکرندے پدا لوٹ کن ایں کہ وتی کرد ءَ پیلو بہ کن انت –

ماما قدیر ءِ گوشگ ات کہ بلوچستان ءَ برجاھیں زوراکی ژانگولیں جونانی چگل دیگ ءُ زورانسری آوار جنیانی تہ ءَ گیشی اتکگ – اے درسیں انسانی ھکانی لگتمالی ءِ گر ءُدار ءُ بلوچ راج ءِ سر ءَ بؤوکیں زوراکیانی گر ءُ دار ءَ وتی کرد پیلو کنگی انت –

آئی ءَ گوشتگ کہ بلوچستان ءِ تہ ءَ یکرندے پدا زورانسری آوار جنیانی تہ ءَ گیشی اتکگ کہ نودربر گیشتر آوار جنگ بوگ ءَ انت – اے درسیں انسانی ھکانی لگتمالی انسانی ھکانی چارٹر ءِ بگیری انت بلے یو این او ءِ نیمگ ءَ یک لپز ءِ گوشگ بوگ ءَ نہ انت –