نوکیں سال ءِ بندات ءَ بیگواھیانی تہ ءَ گیشی
ٹی بی پی شونگال
بلوچستان ءَ گوستگیں سال ءِ آسری چہ گریشہ ءَ دو نودربر، سرگودھا شھدربرجاہ ءَ کانون ءِ چیراگ ءَ دربروکیں نودربر سراج نور ءُ عارف گاجیان ءِ زورانسری بیگواھی ءَ گوں بیتگ ءُ نوکیں سال ءِ بندات ءَ پد بلوچستان ءِ بنجاھی شھر شال ءُ کیچ دمگ ءِ جتاجتائیں ھنداں چہ داں انگت ھشت ورناہ زورانسری بیگواھی ءِ آماچ بیتگ اَنت۔
بلوچستان ءَ زورانسری بیگواھی ءَ بلوچ راجی جُنز ءِ کاونٹر کنگ ءِ ھاتر ءَ یک سَلاھی ءِ رد ءَ کارمرز کنگ بیگ ءَ اِنت۔ بیست ءُ یکمی کرن ءِ اولی دھک ءَ بندات بیتگیں جھد ءَ دارگ ءِ ھاتر ءَ جھد ءَ بندوکیں سیاسی باسکانی ءُ جھدکارانی زورانسری بیگواھی بندات کنگ بیتگ اَت ءُ ھزارانی کچ ءَ زورانسری بیگواھیں مردمانی تیر سُبتگیں جون دگانی سر ءَ ءُ چہ گیاباناں دزکپگ بندات بیت اَنت ءُ نی گمانی پئیم ءَ پولیس ءِ کاؤنٹر ٹیریرزم ڈیپارٹمنٹ دروگیں میڑانی تہ ءَ زورانسری بیگواھیں مردمانی کُشگ ءَ ھوار اِنت۔
زورانسری بیگواھیں مردمانی کھولانی گل وائس فار بلوچ مِسنگ پرسنز ءِ رد ءَ چہ بلوچستان ءَ ھزارانی کچ ءَ مردم زورانسری بیگواہ اَنت ءُ زورانسری بیگواھی ءِ یکشلی برجاہ اِنت۔ ماما قدیر ءُ بیگواھیں مردمانی کھول چہ سیزدہ سالاں زورانسری بیگواھیں مردمانی یل کنائنگ ءِ ھاتر ءَ کراچی ءُ شال پریس کلبانی دیم ءَ زھرشانی بنجلاں نشتگ اَنت۔ زورانسری بیگواھیں مردمانی کھول وتی بیگواھیں دوستیگانی یل کنائنگ ءِ ھاتر ءَ یک مزنیں وھدے ءَ چہ جھد کنگ ءَ اَنت، بیگواھیں مردمانی یل کنائنگ ءّ ھاتر ءَ یکشلی ءَ گوں زھرشانی، روانک ءُ نندانک برجاہ دارگ بئیگ ءَ اَنت۔
زورانسری بیگواھیاں چہ ھزاراں کھول روزیگی ءُ زھنی پئیم ءَ سانمند اَنت بلے پاکستان ءِ واکدار ءُ ھاکم تھنا کمیشن اڈ کنگ ءَ دزگٹ اَنت، بلوچستان مزن آمید گِس ءِ پرمان ءِ سر ءَ اڈ بیتگیں مزن واکداریں کمیشن پرگینگی تھ ئِے کارانی وزیر ضیاء لانگو ءِ مستری ءَ اڈ کنگ بیتگ کہ آ بلوچستان ءِ تہ ءَ مردمانی زورانسری بیگواھیاں چہ انکاری اِنت۔ اے پئیمیں کمیشناں گوں زورانسری بیگواھیانی دارگ ءِ درگت ءَ آیانی بے سنگینی پدر بیت ءُ دومی نیمگ ءَ جھانی مردمی اگبالانی ادارگانی ھاموشی ءَ چہ بلوچستان ءِ تہ ءَ بنی آدمانی ھلاسی ترسے ودی بیتگ۔