TBP Balochi

قلات ءَ چہ ورناہ یے دزگیر کنگ ءَ پد ناشناسیں ھنداں برگ بیتگ۔

اھوالانی ردءَ بلوچستان ءِ دمگ کلات ءِ ھنکین منگچر ءِ ھند جوھان دگ ءَ چہ گوستگیں روچاں سادگیں پوشاک گوریں سلاہ بندیں مردماں علی نواز ء محمد عمر نامی ورناہ دزگیر کُتگ ءُ گوں وت بُرتگ۔

آوارجنی ءِ آماچ بیتگیں ورناہ منگچر ءِ جھممند اِنت وھدیکہ ھندی مردمانی گُشگ اِنت کہ آ پاکستانی چیریں ادارگ ءُ آیانی اڈ داتگیں سلاہ بندیں ٹولیانی کارندھاں بیگواہ کُتگ۔

زانگ بہ بیت کہ بلوچستان ءِ تہءَ زورانسری بیگواھیانی تہءَ یکبرے پدءَ تیزی اتکگ جنزوکیں ماھے بنداتی پنچ روچانی تہءَ جتاھیں دمگاں چہ سئے مردم ورناہ زورانسری بیگواھی ءِ آماچ بیتگ اَنت چریشی ءَ پیسر سئے فروری ءَ پاکستانی لشکریاں دو ورناہ دزگیر کنگ ءَ پد بیگوا کُتگ اَت اَنت۔

بلوچستان ءِ تہءَ زورانسری بیگواھیانی یکشلی مزنیں مدتے ءَ چہ برجاہ اِنت کہ آودہ لھتے بیگواھیں مردم واتر لوگءَ ھم اتکگ اَنت البت انگت ھم بیگواھیں مردمانی یل کنائنگ ءِ ھاترءَ توار چِست کنوکیں گلانی ردءَ مزنیں کچے ءَ مردم زورانسری بیگواھی ءِ آماچ کنگ بیتگ اَنت۔

بلوچستان ءَ زورانسری بیگواھیں مردمانی یل کنائنگ ءِ ھاترءَ جدوجھد کنوکیں گل ءِ رد ءَ بلوچستان ءَ جتاھیں تک ءَ سیادی داروکیں 20 ھزاراں گیش مردم ابید چہ آمید گِس ءِ پرمان زورانسری بیگواھی ءِ آماچ کنگ بیتگ اَنت کہ اِشی تہءَ مستریں کساس سیاسی نودربر ءُ رھشونانی اِنت۔

شبیر جان ءِ نمدی بے پہ وتی پیرُک لکّی ءَ

نبشتہ کار :شھزاد شاد

دی بلوچستان پوسٹ

ابّا جان من ترا دروت ءُ دراہ باتی کُت نہ کن آں پرچاکہ تو یک انچیں جاھے ءَ شُتگ ئے اود ءَ دروت ءُ دُْراھی نہ بیت اِنت۔ شُما چہ جُدا بُوگ ءَ من ءَ شَش سال ءَ چہ گیش اِنت۔ اچ شُما دور اَں انچیں جاھے ءَ آں کہ اِد ءَ چہ رسترانی ٹارچر ءُ بندیگانی پِریات ءُ زاریاں دگہ ھِچ نیست اِنت۔

اے وھد ءَ من انچُشیں کوٹی ءِ تہ ءَ آں اِد ءَ ھِچ نیست اِنت یک رسترے منی کوٹی ءِ دروازگ ءِ دپ ءَ اوشتاتگ ءُ ھمک ساھت ءُ دمان ٹیّن ءِ دروازگ ءَ کُنداک جَنت تانکہ من پچ بہ لرز آں ، واب مہ کپ آں یا وتی درنجگ ءِ واستا دگہ ھُنرے مہ ساز آں ۔

دیم بِہ دیوال ءَ اِنت چمّ سک تکانسُر اَنت کہ کِساس شست روچ بیت کہ منی چم یک پارگی سْیاھیں پٹی ءِ تہ ءَ کید اَنت ۔ چم کسانیں کَڈک ءِ ترْندیں روچ ءِ برْانزاں سگگ ءَ نہ اَنت ۔ بلے مرچی کمو آزات اِش کُرتگ ۔ابا ! من ءَ ٹارچر سیل ءَ بر اَنت پہ ٹارچر کنگ ءَ من سک باز بزگ باں ناھُناں پکڑ ءِ سر ءَ چیکگ ، یکیں ٹانگ ءِ سر ءَ اوشتارینگ بلے ابا جان دست بندی اِنت کہ ماس ءَ سبیگ مکن کہ منی جاور اِد ءَ چون اِنت ۔

ابّا جان ! منی ھیال ھزار جاگہ ءَ روت ءُ کیت شُمئے یات کاینت من ءَ مُدام ماس ءِ یات کاینت کہ آئی ءِ داتگیں مھر آئی ءَ بہ منی ئیگ ءَ نان نہ وارتگ۔ بلے من نہ زاناں بِہ منی ءَ نوں وتی زند ءَ چون گوازینگ ءَ اِنت ۔ آدگہ مردم باریں چون اَنت گُوھار سیماہ چون اِنت۔ منی روگ ءَ رند زان آں پریشان بنت۔ ھمے وھد ءَ تو یات کائے من وت ءَ تسلہ دیاں من زاناں کہ تو مردماں تسلہ دے ئے تو منی مات ءُ آدگہ مردماناں ھم تسلہ دے شبیر زوت کئیت آھان ءَ پہ تکانسُر بُوگ ءَ نئیل ایت گُڑا من وت ءَ دلبڈی دیاں من آ وھد ءَ کسان اَت آں تو مدام مارا تسلہ داتگ من پَمیشکا گُش آں تو یک دلے پہ منی مات ءُ گُوھار ءُ بِراتاں ۔

بلے تو پہ منی آیگ ءَ باز ودار کُتگ بلے چے کناں پہ بلوچ ءَ کس نیست نا ھُدا ھست نا کہ زمین مئے مات اِنت ھمے ھُدا کہ بلاھیں بادشاھے دُْرستیں جھان ءِ مستر اِنت بلے پہ ما نہ اِنت کہ مئے بزگی ءَ بہ گِند ایت ۔

ھمے مردم کہ وت ءَ انسان دوست ءُ انسانیات ءِ گپ ءَ جن اَنت ۔ بلے پہ بلوچاں اِنّاں ابّا جان من زاناں تو منی گون ءَ گِلہ داشتگ کہ من دیر کُت واتر نہ بوت آں بلے مروچی من ءَ اوں باز گِلہ ھست گون تو پرچہ کہ تو زوت شُت ئے ۔ پہ من گیش ودار کُت نہ کُت ۔

ابا جان !تو پرچا چو جلدی شُت ئے تو اِشاپی کُت نوں منی مکھیں مات ءَ کَے تسلہ دنت کہ ورگ بہ ور شبیر زوت کئیت کَے نوں سیماہ ءِ سر ءَ دست ءَ ایر کنت پہ تسلہ دیگ ءَ کہ شبیر جان زوت کئیت ابّا جان !نوں من باز گپ کُت نہ کناں پرچہ کہ من انچوشیں جاگے ءَ آں نا کہ گپ بیت نہ واب بیت۔ من ھِچ کُت نہ کناں نوں ھمے رستر منی رند ءَ اَتکگ کہ ترا صاحب لوٹگ ءَ اِنت من زاناں کہ منی ٹرچر ءِ وھد اتگ من پہ ٹرچر ءَ برانت من ترا نوں ھُدا ھاپِز کناں اللّہ ءِ میار ئے-

تئی چُک شبیر جان

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پنچ سال ساری پاکستانی پوج ءِ دست ءَ زورانسری آوار جنی ءَ پد بیگواھیں انور بلوچ ءِ کھول ءَ مروچی زھرشانی کنان ءَ شال تان کراچی ءَ رؤکیں مزنین شھدگ بند کرتگ –

کھول ءِ رِد ءَ انور بلوچ وتی بنکی ھنکین وڈھ ناشناسیں سلاہ بندیں مردماں دوھزار ھبدہ ءِ سال ءَ بیست ءُ دو جولائی ءَ آوار جتگ کہ تنی وھدی یل کنگ نہ بوتگ –

کھول ءِ رِد ءَ آئی ءِ یل کنائینگے ھاتر ءَ ما درسیں در ٹُک اِتگ انت بلے تنی وھدی آ یل کنگ نہ بوتگ –

زانگ بہ بیت چدوپیش ھم بیگواھیں انور بلوچ ءِ کھول ءَ بازین جاھاں زھرشانی کتگ ءُ گوستگیں سال ءَ شال ءَ بوتگیں زھرشانی نندانک ءَ ھم بھر زرتگ بوتگ – آ وھدی وفاقی وزیر ڈاخلہ رانا ثناء اللہ ءِ سروکی ءَ جوڈ بوتگیں ٹولی ءَ باور کنائین اِتگ درسیں بیگواھیں مردمانی یل کنگ بنت –

سندھ ءِ مزن شھر کراچی ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، کراچی پریس کلب ءِ دیم ءَ برجاھیں زھرشانی ءَ چار ھزار ءُ نُھ سد ءُ چِل ءُ سَے روچ سرجم بوتگ انت – مروچی وائس فار مسنگ پرسنز سندھ ءِ کنونئر سورٹھ، سندھ سجاگی ءِ کنوینئر سارنگ جویو ءُ دگہ مردماں بنجل ءَ اتکگ ءُ کھولانی گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچ، سندھی ءُ پشتونانی بے کپن کُتگیں جونانی ھم کم شرپی کنگ بوگ ءَ انت، درکانودی کوشاں پد مئے پرزندانی جون ویرانگاں چگل دیگ بوگ ءَ انت، زندانانی تہ ءَ بازیں لٹ کُٹ ءُ جنگ ءَ پد ھم آھانی دل یکیم نہ بیت ھمے واست ءَ جوناں ویرانگاں چگل دئینت – چیریں ادارھانی کارمند مئے ورنایاں آوار جن انت ءُ وتی زنداناں بندیگ کن انت پدا ھیال کن انت ءُ مئے پرزنداں ناشرکار گُش انت دیما کار انت آھانی سر ءَ دروگیں بھتام بند انت میڈیا ءِ دیم ءَ پیش کن انت –

ماما قدیر بلوچ ءَ گوشتگ کہ چاگرد ءِ تہ ءَ ھر یک مردمے ءَ ھر یک راجے ءَ وتی راجکاری ، مزھبی ءُ چاگردی کارانی برجاہ دارگے بنکی ھک ھست انت –

آئی ءَ گوشتگ کہ مئے راجداریں باسک زورانسری آوار جنگ بنت کہ چریشی سرجمیں کھول ماژگی ازیت آماچ بنت، شدکشیں زھرشانی بنجل جنگ بنت، بلوچ راجکار زھرشانی کن انت بلے آھانی گوش ءَ مورے نہ وارت –

آئی ءَ گوشتگ کہ راجی جھدے پژدر ءَمروچی سندھی، بلوچ ءُ پشتون ریاستی زوراکیانی آماچ انت –

بلوچستان ءِ مزن شھر شال ءَ پاکستانی لشکریانی بنجل ءِ نزیک ءَ ترندیں تراکے بیتگ۔ تراک ءِ زمہ واری تھریک تالبان پاکستان ءَ زُرتگ۔

سربیتگیں ھالانی ردءَ شال ءَ لشکری کینٹ ءِ نزیک ءَ موسی چیک بنجل ءِ سرءَ بیتگ، تراکے ءِ توار داں دیر دیر ءَ اِش کَنگ بیتگ، بنداتی اھوالانی ردءَ تراکے تہءَ پنچ مردم ٹپی بیتگ اَنت۔ 

تراکءَ پد پاکستانی لشکریانی مزنیں کچے ءَ دمگ انگر کُتگ، اُرشکارانی پَٹ ءُ پول برجاہ اِنت۔ 

زانگ بہ بیت مروچی شال ءَ پاکستان سُپر لیگ “پی ایس ایل” ھشتمی بھر ءِ یک دیم دراھی لئیب ءِ ھم بئیگ ءَ اِنت کہ چریشی سوب ءَ شھر ءِ پھازگی ءِ ترندی ءِ تہءَ گیش آرگ بیتگ۔

دومی نیمگ ءَ تھریک تالبان پاکستان ءَ وتی یک شنگ کُتگیں درشانے تہءَ شال ءَ بیتگیں اُرش ءِ زمہ واری زیران ءَ ٹی ٹی پی جارکش مھمد خراسانی ءَ گُشتگ کہ مروچی بلوچستان ءَ ٹی ٹی پی ءَ شال ایرپورٹ چارراہ ءَ موسی بنجل ءِ نزیک ءَ مئے استشہادی مجاھد منصور بلال ءَ فوج ءُ ایف سی کاروان ءِ سرءَ استشہادی اُرش ءِ کُتگ کہ اِشی تہءَ سئے گاڑی نشانگ بیتگ اَنت ءُ اشاں سواریں یک پوجی اپسر ءَ ھوار دہ پوجی ءُ بیست ایف سی کارندہ مُرتگ ءُ ٹپی بیتگ اَنت۔

پاکستان ءِ پیسرگیں پوجی مھتر جنرل (ریٹائرڈ) پرویز مشرف یک شمبے ءَ نادراھی ءِ سوب ءَ دبئی ءِ یک نادراھجاہ ءَ مُرتگ۔ 

پرویز مشرف ءِ سیاسی گَل آل پاکستان مسلم لیگ ءِ پیسرگیں پاگواجہ  امجد ءَ آئی مرگ ءِ ھال راست کُتگ، پرویز مشرف داں نھ سالاں پاکستان ءِ مھتر بیتگ آ یک زور شاھیں پوجی جنرل ءُ مھتر ءِ ردءَ یات کنگ بیت اِنت۔

مشرف ءِ ھاکمی ءِ اھد زورشاھیں وھد ءِ گُشگ بیت اِنت کہ اِشی تہءَ سیاسی بگیر کارانی کوش ءُ بلوچستان ءُ پشتون دمگانی تہءَ پوجی بیڑ ھوار اَنت، 2008 ءَ وھدے پاکستان پیپلز پارٹی ءُ پاکستان مسلم لیگ ن ءِ ھواریں سرکارءِ جوڑ بیگ ءَ پد آ دزکش بوتگ اَت۔

پرویز مشرف پاکستان ءِ سیاسی گوستانک ءِ اولی پوجی ھاکم اِنت کہ آئی ءَ تاگت ءِ یل کنگ ءَ پد بازیں ارزیانی دیمپانی کُتگ۔ اِشانی تہءِ 2013 ءَ داں بینظیر بھٹو ءِ کوش ءِ ارزی درستاں بُرز بیتگ بلے پاکستان ءِ رھبند ءِ ٹِک شش ءِ ردءَ سنگینیں گداری ءِ ھم ارزی جوڑ بیتگ اَت۔ 2019 ءَ یک ھاسیں آمید گِس ئے ءَ آئی سرءَ رھبند پروشگ ءِ جرمکار نامینتگ اَت ءُ مرگ ءِ سِزا داتگ اَت۔

ھاسیں آمید گِس ءِ اے سِزا رندترءَ مزن آمید گساں رد کُتگ اَت۔ 

پرویز مشرف 7 اکتوبر 1998ء ءَ چیف آف آرمی اسٹاف ءِ اگدہ ءِ سرءَ اتکگ اَت۔  وھدیکہ 12 اکتوبر 1999ء ءَ نواز شریف ءِ سرکار ھلاس کنگ ءَ پد آئی ءَ چیف ایگزیکٹیو ءِ اگدہ دزگپتگ اَت۔

بلوچستان ءِ دمگ بولان ءَ پاکستانی پوج ءِ کاروان ءِ کَڈ کُتگیں تراکناکیں شورواں گوں نشانگ کنگ بیتگ کہ اِشی تہءَ شش پوجی کارمند کُشگ بیتگ اَنت ءُ بازیں ٹپی بیتگ اَنت۔ دومی نیمگ ءَ بلوچستان ءِ دمگ خضدار ءَ پاکستانی پوجءِ کلات اسکاوٹس ءِ کارگس ءِ دیما جاڑیگیں سپاھیگانی سرءَ دزبمب ءِ چگل دیگ بیتگ کہ اِشی آسر ءَ سئے سپاھیگ ٹپی بیتگ اَنت۔ بولان اُرش ءِ زمہ واری بلوچستان لبریشن فرنٹ وھدیکہ خضدار اُرش ءِ زمہ واری بلوچ لبریشن آرمی ءَ زُرتگ۔

بی ایل ایف ءِ جارکش میجر گھرام بلوچ ءَ رسانکدر ءَ شنگ کُتگیں درشانے تہءَ گُشتگ کہ مئے سرمچاراں  چار فروری ءِ بیگاہ ءِ ادار شش ءُ نیم ءِ نزیک ءَ بریگیڈیئر شاھد ندیم لاشاری ءِ کاروان ءِ یک گاڑی ایں بولان ءِ سراج آباد دمگ ءَ کَڈ کُتگیں تراکناکیں شورواں گوں نشانگ کُتگ کہ چریشی ءَ گاڑی سرجم ءَ تباہ بوتگ ءُ گاڑءَ سواریں شش پوجی کارمند مُرتگ ءُ دگہ ٹپی بیتگ اَنت۔ اے کاروان چہ سوئی ءَ دیم پہ شال ءَ روگ ءَ بیتگ۔ 

آئی ءَ گُشتگ کہ زیردستیں بلوچستان تہءَ قوضہ گیریں پاکستان وتی پوج ءِ کپتگیں اَزم ءَ ودینگ ایِ ھاترءَ پوجی دریشاب ءِ تہءَ تیزی آرگ ءَ اِنت ءُ ھوار پوجی اپسر جتاھیں بنجلاں تَر ءُ گرد کنان ءَ پوجی کارمنداں دروگیں دلبڈی دیگ ءِ کوشست کنگ ءَ گندگ پیداک اَنت بلے بلوچ سرمچار ھم دژمن ءِ ھمک سُرپُر ءُ کارشونانی سرءَ دَک جنگ ءَ اَنت۔

گھرام بلوچ ءَ گُڈسرءَ گُشتگ کہ بلوچستان ءِ آجوئی ءَ داں قوضہ گیریں پوج ءِ سرءَ اُرش برجاہ مان اَنت۔

دومی نیمگ ءَ خضدار ءَ بیتگیں پاکستانی فوج ءِ سرءَ بمب اُرش ءِ زمہ واری ءَ زیران ءَ بلوچ لبریشن آرمی ءِ جارکش  جیئند بلوچ ءَ رسانکدرءَ شنگ کُتگیں وتی درشانے تہءَ گُشتگ کہ بی ایل اے ءِ سرمچاراں گوستگیں شپ ءَ خضدار ءِ بنجاھی شھدگ ءِ سرءَ بستگیں  قوضہ گیریں پاکستانی پوج ءِ قلات اسکاؤٹس ءِ میس کارگس ءِ بنجاھی دروازگ ءِ دپ ءَ پھازگ ءِ ھاترءَ جریدگیں کارمند دزبمب اُرش ءِ تہءَ نشانگ کُتگ اَنت۔

جئیند بلوچ ءَ دیمترءَ گُشتگ کہ تراکے آسرءَ سئے دژمنیں کارمند ٹپی بیتگ اَنت۔ گُڈسرءَ آئی ءَ گُشتگ کہ وتن ءِ آجوئی ءَ داں مئے کاروائی برجاہ مان اَنت۔ 

کراچی ءَ گوستگیں روچ ءَ کراچی سنٹر جیل ءِ ڈن یل بوتگیں حفیظ بلوچ دوبر زورانسری آوار جنگے کوشست کنگ بوتگ ءُ آئی ءِ ھمراھی ءَ آئی کھول زدگ کنگ بوتگ کہ ھمے وھد ءِ تامر چاگردی ترامجاھاں شنگ بوتگ انت کہ چریشی ءَ پد انسانی ھکانی گلاں ھوار راجداریں رھشوناں اے وئیل ترندی ءَ گوں ایر جتگ-

اے درگت ءَ ہیومن رائٹس کونسل آف پاکستان ءَ وئیل ترندی ءَ گوں ایرجتگ ءُ گوشتگ کہ وئیل ءَ ھواریں مردمانی بگیری ءَ گامگیج زورگ بہ بیت-  آئی ءَ گوشتگ کہ عبدالحفیظ زھری کہ زورانسری آوار جنگ ءُ بیگواہ کنگ بوتگ ءُ سال دوھزار بیست ءُ دو ءَ چہ دبی ءَ دزگیر کنگ بوتگ کہ پدا رند ءَ دبی ءَ چہ در کتگ ءُ پاکستان ءَ آؤرتگ کہ پدا رند ءَ آمیدگس ءَ آئی ءِ سرءَ جنگ بوتگیں درسیں کیس ھلاس کنگ بوتگ انت ءُ آ بے گناہ نامینگ بوتگ-

آئی ءَ دیمتر ءَ گوشتگ کہ ایچ آر سی پی اے ھال اشکُنگ ءَ سک باز پدرد بوتگ کہ گوستگیں روچ ءَ سنٹرل جیل ءَ یل بوگ ءَ پد دوبر آئی ءِ زورانسری آوار جنی ءِ جھد کنگ بوتگ- اے اُرش ءَ آئی ءِ کھول ءِ مردم زدگ بوتگ انت- اُرش ءَ ھواریں مردم گرگ ءُ جست کنگ بہ بنت-

اے وئیل ءِ درگت ءَ پاکستان پیپلز پارٹی ءِ رھشون فرحت اللہ بابر ءَ وتی ٹویٹ ءِ تہءَ گوشتگ کہ انسانی ھکانی باسک حفیظ بلوچ آمیدگس ءَ یل داتگ جیل ءِ درآیگ ءَ پد آوار جنوکاں دوبر آئی ءِ آوار جنی ءِ کوشست کتگ، آئی ءِ گھار لٹ شاپ کتگ- نوں ھمے بٹاک جنگ بوگ ءَ انت کہ ناشناسیں مردمانی پٹ پول کنگ بوگ ءَ انت چوش کہ ماں ناشناساں پجاہ کاریں-

دومی نیمگ ءَ فرحت اللہ بابر ءِ سرءَ ھم نگد کنگ بوگ ءَ انت کہ آئی ءِ ٹویٹ ءِ سر ءَ اھوال کار وینگس ءَ نبشتگ کہ سندھ سرکار ءِ زمّہ واری انت کہ اشانی جستانی جواب بہ گپت- آیا آ  گامگیج زور انت؟  

ایڈوکیٹ شفیع احمد نامی ءَ فرحت اللہ ٹویٹ ءِ چیر ءَ نبشتگ منی واجہ شمے پاٹی ءِ سندھ ءَ سرکار انت،  تو بنجاھی سرکار ءِ تہءَ پوج ءِ سروکی ءَ جوڑ بوتگیں ھم سنتی ءِ بھر ءِ،  یک رندے ھماھانی نام ءَ بگر ات ءُ چہ ھماھاں جست بکنے کہ اے چی بوگ ءَ انت-

وائس فار بلوچ مسنگ پرسنز ءِ رھشون سمی دین بلوچ نبشتہ کنت کہ ما ایمنی لوٹ ایں بلے ریاست ایمنی نہ لوٹیت- وھدیکہ بساک ءِ سرکماش صبیحہ بلوچ ءَ حفیظ زھری ءِ ھون ءَ مِس اتگیں پشک ءِ اکس شنگ کتگ ءُ گوشتگ کہ پہ بلوچ ءِ واست ءَ پاکستان ءِ کانود اے پشک ءِ داب ءَ انت کہ بس پہ سبوت ءَ پھریز کنگ بیت- یکیں کھول ءِ بازیں مردمے شھید، در ملک ءَ آوار جنگ ءُ دروگیں کیس جنگ ءُ بند کنگ ءُ پدا آمیدگس ءَ یل بوگ ءَ پد دوبر آوار جنگ ءُ آئی ءِ جنگے کوشست کنگ، ھمے بلوچستان ءِ کسہ انت- 

ھمے درگت ءَ بلوچ ایکٹوسٹ ءُ بلوچ یکجھتی کمیٹی ءِ رھشون ڈاکٹر ماھرنگ بلوچ ءَ نبشتگ کہ استان وتی مردمانی پھازگ ءَ بے سوب بوتگ، رب ءَ بچارے اے ناشرکاریانی بگیری ءَ گپ بہ جن یے،  بلوچ ءِ ھکانء ناں وتی واست ءَ گپ بہ جن ات – پرچاکہ زوراکی ءُ ناھکیانی سر ءَ جوڈ بوتگیں استان ھچ راج ءِ شری ءَ پہ نہ انت- ادا نزورانی مڈی پُلگ بنت ءُ آھانی سر ءَ زلم زوراکی کنگ بیت – 

راجی بلوچ وومن ءَ وتی درشان ءِ تہ ءَ گوشتگ کہ راجی بلوچ وومن فورم حفیظ زھری بلوچ ءُ آئی ءِ کھول ءِ سر ءَ بوتگیں زوراکی ءَ.ترندی ءَ گوں ایر جنت- ھمک روچ ھلاس نہ بؤکیں زوراکی ءِ چاگرد کہ پاکستان ءِ پھازگی لشکر ءَ وتی ملک ءِ بلوچ سندھی پشتون راج ءِ سر ءَ برجاہ داشتگ چریشی تُرس ءِ ھلاس نہ بیوکیں 

زانگ بہ بیت متحدہ عرب امارات ءَ زورانسری آوار جنگ بوتگیں ءُ پدا رند ءَ پاکستان ءِ دست ءَ دیگ بوتگیں حفیظ بلوچ یل بوگ ءَ پد دوبر آوار جنگ جھد کنگ بوتگ-

کھول ءِ گوشگ انت یل بوگے ھما دمان ءَ پد اسپت رنگ ءِ گاڑی ءِ سلاہ بند سوار بوتگ انت اتکگ انت سنٹرل جیل ءِ دیم ءَ حفیظ ءِ آوار جنگ ءِ کوشست کتگ- آھاں حفیظ ءُ کھول تپنگ ءِ کنداک جتگ ءُ تیرگواری کتگ ءُ زدگ کتگ انت بلے کھول ءَ گوں آھاں گھگیری کتگ ءُ آھانی آوار جنی بے سوب کتگ- 

چاگردی ترامجاھاں شنگ بوتگیں تامر ءَ گندگ بیت گاڑی ءَ سواریں پوج ءِ کارمند کہ لس مردمی پوشاک ءِ گور ءَ زھگ ءُ زالبولانی سر ءَ زوراکی کنگ ءَ انت وھدیکہ آیانی سر ءَ تیر گواری کن انت کہ چریشی ءَ حفیظ بلوچ ءُ آئی کھول ءِ مردم زدگ بنت-

کیچ ءِ دمگ ھوشاب ءَ سرکاری مزن وانگجاہ ءِ نودربرانی ھمک سالی مراگش ءِ برجم دارگ بوتگ،  مراگش ءَ ماسٹر ،جنک ءُ بچکیں نودربراں ھوار مزنیں کچے ءَ چاگردی زانتکاریں مردماں بھر زرتگ –

مراگش ءِ بندات گوں بلوچی دوچاپی ءَ بوتگ کہ نودربراں جوانیں وڈی ءَ دو چاپی پیش داشتگ ءُ چریشی ءَ پدا نودربراں وانگ ءُ زانگ ءِ درگت ءَ اسٹیج ڈرامہ ءِ کُتگ -مراگش ءَ اسٹیج ڈرامہ ءَ پد جنک ءُ بچکیں نودربراں ماں اردو ءُ انگریزی ءِ تہ ءَ تران کُتگ وشگٹی ءَ شئیر گوشتگ –

مراگش ءِ سیمی بھر ءَ وانگجاہ ءِ ماسٹر چاگردی مردماں گوں نودربراں تران کتگ – تران کنان ءَ آھانی گوشگ ات کہ مئے لوٹ انت کہ وانگ ءُ زانگ پڑ ءَ بائدیں اے وڈیں مراگش برجاہ دارگ بہ بنت ءُ نودربرانی ٹیلنٹ دیما برگ بہ بیت – ھنو بیست ءُ یکمی کرن انت ، اے کرن ءَ دنیا گلوبلائز ایں ، ھما راج دنیایے تہ ءَ زندگ بوت کناں کہ آ گوں  الم ءَ دوستی کن انت – راج ایٹم بم ءِ اُرشے ءَ ھلاس نہ بنت ھما وھد ءَ ھلاس بنت کہ اے بیست ءُ یکمی کرن ءَ گلوبل ورلڈ ءِ تہ ءَ وتی کنٹریبیوشن ءَ کت نہ کن انت – 

آھاں گُشت کہ نودربراں اردو ءُ انگریزی ءَ تران کتگ ڈرامہ اسٹیج کتگ کہ آھانی تہ ءَ ھچ کمی گندگ نہ اتکگ پرچا  کہ آ ترانانی تہ ءَ درسیں چیز مان اِتاں،  تئی ڈرامہ ءَ کلچر پیشدارگ بوتگ ات بلے یک نزوری ءِ ما دیست کہ بلوچی ءَ تران کنگ نہ بوت بائدیں بلوچی ءِ تہ ءَ ھم تران کنگ بہ بوتیں – 

آھانی گوشگ ات  کہ مارا زندگ کُتگ شما ما ھوشاپ ءِ تہ ءَ زندگاں آئی ءِ بنیاد ھمے وانگجاہ انت – ما ھمے وانگجاہ ءَ ونتگ ءُ در اتکگ انت – مئے اے وانگجاہ ءَ چی جوڈ نہ کتگ،  دانشور،  فلاسفر ڈاکٹر ءُ انجینئیر ـ ما پھر بندیں مکران تہ ءَ  ھوشاپ ءِ بازیں وانندھے مزنیں اگدھانی سر ءَانت –  

آھانی گوشگ ات کہ تالیم ءِ مکسد اے نہ انت کہ مئے گور ءَ ڈگری بہ بیت ڈگری دھمی تبک ءَ بگر تاں پی ایچ ڈی کنے ترا ڈگری رسیت تو ڈاکٹر ھم جوڈ بہ یے – بلے گپ ایش انت کہ الم ترا چی جوڈ کنت مردمانی دیما تو چی یے جوڈ بہ یے مردم ترا چی سرپد بیاں – بازیں مردماں پی ایچ ڈی کتگ،  سی ایس ایس ھم کتگ بلاہ بلاھیں پوزیشنانی سر ءَ انت بلے آ تعلیم یافتہ نہ انت زر کمائینگے مشین جوڈ بوتگ انت – پھلی لوٹاں بازیں ھست کہ آ مات ءُ پتاں بلاہ بلاھیں ادارھاں راہ داتگ انت وانگے ھاتر ءَ بلے اودا آ شریں انسان جوڈ نہ بوتگ انت – تالیم انسانی رویش ءَ بدل کنت آھانی رویش مٹ نہ بوتگ – وانندہ ءُ ناوانندہ  میان تالیم ءَ.گشین ایت – بلے ادا ریس لگ اِتگ کہ کئے باریں چینچو زر کمائینیت – 

آھانی گوشگ ات کہ ما چکاں ھمے سوج ءَ.دیاں کہ شریں انسان جوڈ بہ بئے وتی آؤکیں پدریچ ءَ وتی آؤکیں زند ءَ  سازگار بہ کنے گوں شریں نسلے ءِ ھمراھی ءَ وھدیکہ مئے شریں نسل ءِ جوڈ نہ بیت ما بس کاروباری جوڈ بہ ایں ھرکس پہ وت بیست گڈا شریں سوسائٹی ءُ سماج جوڈ نبیت اے تباہ ءُ برباد بیت گڈا ما ھم زندگ نہ بئیں ما ھم نہ مان انت – 

آھانی گوشگ ات کہ.مرچی مئے ھالا بہ چارے بلوچستان دنیائے تہ ءَ.کرپشن ءَ اولی نمبر ءَ انت دومی لمبر ءَ ویزمیلائے ءِ شھر انت پاکستان ھمے زراں مئے شمے نام ءَ پنڈ ایت بلے پہ وتی عیش ایاشی ءَ – اسسٹٹ کمشنر ھشاد لک ءِ گاڈی ءَ.سواریں 19 گریڈ ءِ پرنسپل ءَ پرپٹ ءِ پہ سواری ءَ.نیست – 

آھانی گوشگ ات کہ گڈسر ءَ ما ھمے چکاں گوشگ لوٹاں کہ اے وانگجاہ ءَ چہ درآیگ انت ءُ دیم پہ وتی منزلے نیمگ ءَ من ھمے گشاں بوانے جھد بہ کنے یک شریں انسانے جوڈ بہ بئے اے واست ءَ ناں کہ ڈاکٹر بہ ایں کساب ءِ جوڈ بئین – اے نیت ءَ ناں کہ زر کمائیناں ءُ درملک ءَ رواں  ـ 

مراگش ءِ گڈسر ءَ چہ گچینی مھمانانی نیمگ ءَ نودربر دلبڈی دیگ ءُ داد دیگ بوتگ انت ءُ مراگش آسر کنگ بوتگ –

بلوچستان ءِ دمگ تمپ ءَ پاکستانی پوج ءُ جھاؤ ءَ نورا ءُ محب اللہ ءِ سر ءَ بوتگیں اُرشانی زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ انت-

بی ایل ایف ءِ جارکش میجر گوھرام بلوچ ءَ وتی آفیشل ٹیلی گرام چینل “آشوب” ءَ شنگ کرتگیں درشان ءِ تہءَ گْوشتگ کہ سرمچاراں گْوستگیں روچ ءَ سَے فروری ءَ جھاؤ ءِ دمگ پیلارءَ دُژمنیں ریاست ءِ چاریگانی راہ ءِ سرءَ تراکناکیں شورہ کل کُرتگ ءُ تراکین اِتگ انت چریشی ءَ دو چاریگ نورا ءُ محب سَک باز زدگ بوتگ اَنت-

میجر ءَ گْوشتگ کہ اے کُشندہ ٹولی ءِ کارمندانی سروکی ءَ سبزل نامیں مردمے کنگ ءَ اِنت- جھاؤ ءَ دُرسیں میارباریں مردماں یکجاہ کنت ءُ چہ گْوستگیں بازیں سالاں بلوچ راجی آجوئی جُھد ءِ بگیری ءَ کارمرد کنگ ءَ اِنت- اے مردم پہ دُژمنیں پوج ءَ دیم ءَ اَنت۔ آ بازیں بلوچ بچانی شھید ءُ آوار جنگ ءَ ھوار اَنت- پاکستانی پوج اشانی سروک سبزل گوں مزن ءُ نوکیں سلاھاں سلاہ بند کُرتگ اَنت، داں آیاں پہ بلوچ راجی جُھد ءِ بگیری ءَ کارمرد بہ کنت ءُ وتی مول ءُ مُراد ءَ سرجم بہ کنت-

جارکش ءَ گْوشتگ کہ بلوچ راج اے گپ ءَ سرپد بہ بیت کہ پہ کمے آسراتیاں مرچی دُژمن آیاں پہ وتی مول ءُ مُراداں کارمرد کنگ ءَ اِنت- اے مردمانی بستار پاکستانی پوج ءِ کِرءَ یک ایردستے ءَ ابید ھچ نہ اِنت- اے وڈیں دُرسیں مردم کہ بلوچ آجوئی جُھد ءِ بگیری ءَ کار کنگ ءَ اَنت آ دُرس سرمچارانی نشانگ ءَ اَنت-

میجر ءَ گْوشتگ کہ بیست ءُ سَے جنوری ءَ جھاؤ ءِ واجہ باگ ءِ بُنجل ءَ ٹیکیدار ءِ بندساچی شرکت ءِ مشین ءُ سامان مانداشتگ اَنت-  اے ٹیکیدار پہ زورگریں پاکستانی پوج ءَ دگاں ھوار ایپ ڈبلیو اوءِ ٹیکہ زُرتگ ءُ کار کنگ ءَ اِنت- چوشیں مردماں ما کڈن کنیں کہ وتی دست ءَ بہ کَش اَنت اگاں ناں گڑا وتی تاوان ءِ زمہ وار وت اَنت-

جارکش میجر گوھرام ءَ وتی دگہ درشانے ءَ گوشتگ کہ کیچ ءِ ھند تمپ ءَ سرمچاراں دو فروری ءِ بیگاہ ءِ ادار پنچ ءَ اَبدوئی نھنگ کور ءَ پاکستانی پوج ءِ پانگس ءِ سرءَ گوں دور جنگیں توپک ءَ اُرش کرتگ یک کارمندے کشتگ ءُ پانگس ءِ نزیک ءَ اوشتاتگیں بلڈوزر ھم نشانگ کرتگ-

 میجر گوھرام ءَ گڈی ءَ گوشتگ کہ زورگریں پوج ءِ سرءَ اُرش ایردستیں بلوچستان ءِ آجوئی ءَ تاں برجاہ مان انت-