TBP Balochi

انسانی ھکانی باسک ءُ وکیل ایمان زینب مزاری ءَ چاگردی ترامجاہ ٹویٹر ءَ گوستگیں روچ ءَ چہ کراچی ءَ عبدالحفیظ زھری ءِ دوبر زورانسری آوارجنی ءِ کوشست ءُ آئی کھول ءِ سر ءَ زوراکی ءُ آھانی زدگ کنگ ءِ درگت گوشتگ کہ آمیدگس ءِ نیمگ ءَ یل بوگ ءِ ھکم پد ھم پاکستان تہ ءَ یک بلوچے رکیتگ نہ انت – 

آئی ءَ نبشتگ کہ جیل ءِ درآیگ ءَ پد ھما دمان ءَ حفیظ بلوچ ءُ آئی ءِ کھول ءِ سر ءَ زوراکی کنگ بوتگ اشی ءَ چی زانگ بیت کہ بلوچ راج ءِ بگیری ءَ نہ اوشتوکیں زلمانی جست ءُ پد کنوک نیست – 

آئی ءَ گوشتگ وھدیکہ بلوچ راج آمیدگسانی نیمگ ءَ رؤانت گڈا آھانی آوار جنگ ءُ کُشگ ءِ کوشست بیت – وھدیکہ آ زانت ءِ نیمگ ءَ رؤانت گڈا شما ھمک روچ نودربراں آوار جن ات – 

آئی ءَ دیمتر ءَ گوشتگ کہ ناشرکاریں پوجی ادارہ ءُ چیریں ادارہ ھمے لوٹ انت کہ ھر بلوچ آھانی بگیری ءَ توپک ءِ چست کنگ ءَ لاچار بہ بیت پرچا کہ آھاں وت درسیں پُرایمنیں جھدے در بند کتگ انت – 

ایمان مزاری ءَ پوجی ادارہ دلگوش گور کُتگ ءُ گوشتگ کہ وھدیکہ پُرایمنیں گھگیری ءِ سرءَ اے وڈ تاکت کارمرز کنگ بیت گڈا شما مردماں کجام نیمگ ءَ دیم دیگ ءَ یے؟  تاں ھما وھد ءَ جیڑہ برجاہ بنت شما ارب پتی جوڈ بوان بئے ھمے ھاتر ءَ شما لوٹ ایت کہ جیڑہ برجاہ بہ بنت –

لسبیلہ ءَ بس ءِ ترسناکیں وئیل

ٹی بی پی شونگال

لسبیلہ ءِ ترسناکیں دگ ءِ وئیل ءَ چل ءُ یک مردم بیران بیتگ اَنت ءُ سئے ٹپیگانی اِلاج کراچی ءِ نادراھجاہ ءَ برجاہ اِنت۔ لسبیلہ ءِ تباھکاریں بس ءِ وئیل اولی وئیل نہ اِنت بلکیں شال -کراچی ، پنجگور – شال ، تربت – کراچی ءُ پنجگور -کراچی شھدگانی سر ءَ یکشلی ءَ گوں رنج ءُ درد دیوکیں وئیل بیان اَنت، کہ ایشانی تہ ءَ ھزارانی کچ ءَ مردم بیران بیتگ اَنت۔ یک اندازگے ءِ رد ءَ اے شھدگانی سر ءَ وئیلانی تہ ءَ سالے ءِ تہ ءَ ھپت ءَ چہ ھشت ھزار مردم بیران بنت اِنت۔

لسبیلہ ءِ وئیل ٹپی بیتگیں مساپرے ئِے گُشگ اِنت کہ بس ءِ تہ ءَ ھرابی ءَ ابید ءُ مساپرانی گُشگ ءَ پد ھم سپر برجاہ دارگ بیتگ ءُ وھدیکہ سپر ءِ نیام ءَ یک مساپرے ءَ وتی کھول ءَ پیغام کُتگ ءُ ھال داتگ بیتگ کہ ڈرائیور تیزی ءَ گوں بس ءَ تاچگ ءَ اِنت ءُ ٹرالراں گوازینگ ءَ اِنت۔ بسانی واھند ءُ ڈرائیورانی بے پروائی ءَ چہ بازیں وئیل دیم ءَ اتکگ اَنت بلے سرکار وئیلانی دارگ ءِ ھاتر ءَ کارریچیں پالیسی اڈ کنگ ءِ جاہ ءَ تھنا ترانکاری ءِ ھد ءَ داں پادبند اِنت۔

سرکار ءِ سر ءَ اَے بھتام جنگ بیت اِنت کہ بلوچستان ءَ ھمینچو شھدگ کہ اڈ کنگ بیتگ اَنت آ درست نوک آبادکاری ءِ شوربندیانی پد ءَ اڈ کنگ بیتگ اَنت دانکہ بلوچستان ءِ آسراتیانی “لُٹ ءُ پُل” ءَ پد پاکستان ءِ دگہ بھراں داں ارزانی ءَ روان دیگ بہ بنت۔ شال آ کراچی شھدگ شست ءِ دھک ءَ اڈ کنگ بیتگ اَت دانکہ نوکنڈی ءُ جھلاوان ءِ سنگِ مرمر ءُ دگہ آسریاتی ءَ ارزانی ءَ گوں کراچی ءَ روان دیگ بہ بیت۔

اہشی ءَ ابید اَے وئیلانی دیم ءَ آیگ ءِ دگہ یک مستریں سوبے وھد ءِ پجیگ ءَ بلوچستان ءِ دگانی سر ءَ ودوکیں ٹریپک اِنت بلے ایشی ءَ ابید ھم بلوچستان ءَ یک ھم چار کِشکی دگے گندگ نہ بیت، بازیں لس لوٹاں پد ھم آر سی ڈی شھدگ ٹاھاں ابید ھم چار کِشکی دگ ءِ اڈ کنگ نہ بیت، کہ ایشی ءِ سوب ءَ وئیلانی کساس ءَ ھمروچیگیں رد ءَ گیشی پیداک اِنت۔

اے وئیلانی تہ ءَ مرگانی یک مستریں سوبے، ایمبولنس ءُ ایمرجنسی ھزمتانی نہ بیگ اِنت۔ اگاں بلوچستان ءِ شھدگاں چار کِشکی کنگ، ایمرجنسی ھزمتی جاوراں گھتر کنگ بہ بیت ءُ مساپر بساں ریگولیٹ کنگ بہ بیت گُڑا بازیں نگرھیں ساہ رکینگ بیت کن اَنت۔

سربوتگیں ھالانی رِد ءَ گوستگیں روچاں ناشناسیں سلاہ بندین مردماں بلوچستان ءِ جتا جتائیں ھند ءُ دمگاں پاکستانی پوج ءُ بلوچستان ءِ مال مڈیانی بروکیں ٹرک ءُ موبائیل ٹاوریے سر ءَ اُرش کُتگ ـ 

پاکستانی پوج ءِ سر ءَ اُرش یک فروری ءَ کیچ ءِ دمگ زامران ءَ زامری ھند ءَ برجاھیں پوجی پانگس ءِ سر ءَ کنگ بوتگ چریشی ءَ پوج ءَ جانی تاوان ءِ دیمپانی کنگ کپتگ – اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –  وھدیکہ دومی نیمگ ءَ گوستگیں شپ ءَ منگچر ءَ سلاہ بندیں مردماں مڈی بروکیں ٹرکے ءُ کلات ءِ دمگ پارود ءَ موبائیل ٹاور ءِ مانداشتگ – 

بلوچستان ءِ مال مڈیاں بروکیں ٹرک ءُ موبائیل ٹاور ءِ ماندارگ ءِ زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ انت – 

بی ایل اے ءِ جارکش جیئند بلوچ ءَ وتی شنگ کرتگیں درشان ءِ تہ ءَ گوشتگ کہ مئے سرمچاراں کلات ءَ مڈی بروکیں ٹرک ءُ موبائیل ٹاور سر ءَ اُرش کُتگ – 

جارکش ءِ رِد ءَ گوستگیں شپ ءَ منگچر بازار ءِ نزیک ءَ مڈیانی بروکیں یک ٹرک ءِ مئے سرمچاراں مانداشتگ وھدیکہ ٹرک ءِ ڈرائیور مکن کُتگ ءُ یل داتگ – 

جارکش ءَ دیمتر ءَ گوشتگ کہ مئے سرمچاراں مروچی کلات ءِ دمگ پارود ءَ یوفون کمپنی ءِ موبائیل ٹاور چیر ءَ تراکناکیں شورہ کل کتگ ءُ تراکین اِتگ انت چریشی ءَ ٹاور کپتگ ءُ تباہ بوتگ ءُ ٹاور ءِ ایندگہ ازباب مانداشتگ انت – 

جارکش ءَ گوشتگ کہ اے ٹاور زورگیریں پوج ءِ گوشگ ءِ پد ءَ کل کتگیں ٹاور ءِ بوتگ – بلوچ لبریشن آرمی ھردو اُرشانی زمّہ واری منّ ایت  ءُ زورگیریں پوج ءُ آئی ءِ کمکارانی سر ءَ مئے اُرش برجاہ مان انت –

زامران ءَ پوج ءِ سر ءَ بوتگیں اُرش ءِ زمّہ بلوچستان لبریشن فرنٹ ءَ منّ اِتگ – بی ایل ایپ ءِ جارکش ءَ میجر گوھرام ءَ گوشتگ کہ مئے سرمچاراں یک فروری ءَ کیچ ءِ دمگ زامران ءَ  زامُری کور ءَ برجاھیں پاکستانی پوج ءِ پانگس ءِ سر ءَ گوں دورجنگیں توپک ءَ دُژمن پوج ءِ یک کارمندے نشانگ کُتگ ءُ کُشتگ –

میجر ءَ گوشتگ کہ پاکستانی پوج ءِ سر ءَ مئے اُرش داں زوگِپتیں بلوچستان ءِ آجوئی ءَ برجاہ مان انت –

آزمانک: چڑکہ

آزمانکار: مھر بلوچ

دی بلوچستان پوسٹ

زند چے یے؟ اے سوال ھر بنی آدم ءِ دل ءِ توک ءَ الم ودی بیت ءُ ھر یکے وتی وڑ ءَ زند ءَ را یک رنگ ءُ دروشم ءُ مانایے دنت ھمے رنگ ءَ واجہ چگرد ھم وتی زند ءِ روچاں گْوازینگ ءَ ات۔ آ مُدام زند ءِ مانا ءُ دْروشماں شوھاز ءُ پد جنان ات۔ چوناھا چگرد یک کوھی شوانگے ات ءُ وتی ھلک ءِ تہ ءَ یک ابدالے ءَ زانگ بوت۔ مردماں مدام آئی ءَ را گنوکے پھم اِت ءُ چہ کندان ءَ آئی دیم ءَ گوست شت اَنت۔

ھمے میتگ ءَ کہ چگرد نندوک ات اود ءَ نیزگاری ات، ورد ءُ وراک بس کوھی کوش ءُ پسانی شیر ات اَنت۔ چگرد مُدام سُھب ءَ مھلہ پاد اتک ءُ پسانی چارینگ ءَ شت ءُ بیگاہ ءَ میتگ ءَ واتر اتک ۔

اناگہ یک روچے کہ آ پہ وتی پسانی چارینگ ءَ درکپت پہ کوہ ءُ کوچگاں ءُ سک دور سر بوت تاں بیگاہ ءَ میتگ ءِ روگ ءَ پیسر شپ کپت گڑا آئی ھمے دیاراں کہ سر بوتگ اَت ءُ شپ ءِ گوازینگ ءِ نیت کرت ۔

آئی ءَ پس آؤرت ءُ کوہ بُن ءَ داشت اَنت ءُ وت ھمے کوہ ءِ سر ءَ تچک بوت ، داں دیر نہ گْوست آ واب کپت۔ اناگہ ءَ آئی واب ءَ دیست یک میتگے ءُ سک باز مردماں اوشتاتگ ءُ آئی ءَ آواز دیگ ءَ اَنت ءُ گوشگ ءَ اَنت۔ چگرد جان ماں ھما مردماں کہ وتی زند ببا داتگ ءُ مرتگ اَنت ما ھمے ھلک ءَ کہ تو نشتگ ئے ما ھمے ھند ءِ نندوک بوتگ اَنت ءُ ھچ کار ءُ شری پہ وتی میتگ ءَ نہ کرتگ۔ مارا پھل بکں ءُ اے پنتاں بزور الم بہ جیڑ پہ ھمے میتگ ءَ کہ کجا جیڑہ ءُ جنجالاں چو لاچار ءُ لگت مال کرتگ ۔

دیر نہ بوت چگرد پچلرز اِت داں سماہ ئِے کت، ھید ءُ ھمپان اِنت ءُ آئی دستانی نیام ءَ زندگی وتی گڈی ساھتاں گوازینگ ءَ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ نوشکی ءَ دو مردم زورانسری آوار جنگ ءَ پد بیگواہ کنگ بیتگ اَنت- دوئیں مردم گوستگیں روچ ءَ چہ نوشکی بازار ءَ پوج ءَ آوار جنگ ءَ پد ناشناسیں جاھے ءَ برتگ اَنت-

بیگواہ کنگ بیتگینانی بچّار خرم ء عبدالصمد بادینی ءُ سعود ء عبدالباقی بادینی جھمنند کلی بادینی نوشکی ناماں چہ بیتگ اَنت-

بیگواھیں سعود ھما وھد ءَ آوار جنگ بیتگ وھدے آئی ءَ چہ وانگجاہ چوٹی کتگ ءُ لوگ ءَ روگ ءَ بیتگ وھدے کہ خرم کلی سردار بادینیءِ جھمنند اِنت ءُ یک پوریاگر اِنت کہ آ گوستگیں روچ ءَ آوار جنگ ءَ پد بیگواہ کنگ بیتگ-

زانگ بہ بیت اے بیگواہ بیتگینانی تہ ءَ سعود ءِ برات سلال احمد پوج ءَ اکتوبر 2022 ءَ آوار جنگ ءَ پد خاران ءَ دگہ سے مردمانی ھمراھی ءَ دروگیں میڑے ءَ کُشتگ اَنت-

زانگ بہ بیت کہ اکتوبر ءَ سی ٹی ڈی ءَ چار مردم میڑ ءَ جنگ ءِ ٹاہ جتگ اَت وھدے کہ اے میڑ ءَ جنگ بیتگیانی پجّار پیسر ءَ چہ بیگواھیں مردمانی ردءَ بیتگ اَنت-

اشانی تہ ءَ سلال احمد ھم ھوار اَنت- سلال ء حاجی عبدالباقی بادینی جھمنند نوشکی 6 اکتوبر 2022 ءَ شال ءِ دمگ چہ بروری دگ ریلوے کالونی ءَ لوگ ءَ بیڑبرگ وھد ءَ آوار جنگ ءَ پد بیگواہ کنگ بیتگ اَت-

سلال بادینی اشی ءَ ساری پنچ مارچ 2022 ءَ چہ لاھور ءَ بیگواہ کنگ بیتگ کہ آ اگست ءَ یل کنگ بیتگ اَت وھدے کہ دومی رند ءَ زورانسری آوار جنی ءَ پد سلال دروگیں میڑے ءَ کُشگ بیتگ اَت-

مُلا عبدالحمید اسماعیل زہی بلوچ ءَ مروچی زاھدان مسیت ءَ آدینگ ءِ واھز ءِ میان ءَ گوشتگ کہ بندیگ ترسینگ ءُ کم شرپ کنگ مہ بنت، ھر انسان ءِ شرپ کنگ بہ بیت، درسیں انساناں شرپ ءُ ازت ءِ ھست، مزھب ھچ انسان ءِ کم شرپی ءِ موکل ءَ نہ دنت – 

مُلا عبدالحمید ءَ وتی واھز ءِ وھد ءَ گوشتگ کہ بندیگانی ءِ سر ءَ زور دیگ مکن کنگ بوتگ، بندیگ کم شرپ کنگ مہ بنت پہ زور گپ دپ ءَ دیگ ءُ منارینگ بندیگانی ھکانی بگیری انت، اے اسلام ءُ دین کاری ءِ درونتانی تہ ءَ نیست انت –

آئی ءَ سرکاری کارمند گوشتگ انت کہ نگد کنوکاں بندیگ مہ کن اِت، ملک ءِ الاج شرگداری انت – درساں چہ مستریں جیڑہ ھمیش انت کہ شرگداری ءِ در بند کنگ بوتگ انت – زانتکار ءُ اھوالکاراں جیڑھانی درنگاز کنگے موکل دیگ بہ بیت –

مُلا اسمائیل زہی ءَ گوشتگ کہ سرکار ءِ کدر ءُ کیمت ھما وھد ءَ بیت کہ آ مردمانی کمک ءَ بہ کنت ءُ ایردستں مھلوک ءِ ھکانی دیگ ءَ وتی پرز بہ پھمیت – آئی ءَ گوشتگ کہ اے سرکار کدر ھما وھد ءَ بیت وھدیکہ مھلوک آئی ءَ بلوٹیت بلے اگاں مھلوک اے سرکار ءَ نہ لوٹ انت گڈا آئی ءِ کدر کنگ نہ بیت –

آئی ءَ زاہدان ءِ ھونیگیں آدینگ ءِ آماچیں مردمانی درگت ءَ گوشتگ کہ من گوں آھانی کھول ءَ دچار کپتگ انت گوں آھاں گند ءُ نند کتگ بازیں زدگ بوتگیں مردمانی چم کور انت،  بازینے ءِ پاد بُرگ بوتگ انت ءُ بازیں مردمانی سرین ھڈ پرشتگ – اے وڈیں زوراکی کنوکیں مردمانی بگیری ءَ گامگیج زورگ بہ بیت – 

زانگ بہ بیت زاھدان ءِ ھونیگیں آدینگ ءَ پد کہ اودا ءَ مزنیں کچے ءَ درنگاز کنوک شھید کنگ بوتگ انت،  زاھدان ءُ دگہ دمگاں درنگاز کنوکانی تہ ءَ گیشی اتکگ ءُ تنی اے درچ برجاہ انت ءُ ھمک آدینگے نماز ءَ پد زھرشانی کنگ بیت –

بلوچستان ءَ چہ شومک ءِ نادراھی ءَ یک دگہ زھگے بیران بوتگ – 

ھاران ءِ جھمنندیں زھگ کہ بازیں روچاں چہ شومک ءِ نادراھیءِ آماچ بوتگ کہ گڈسر ءَ کراچی ءِ آغاخان نادراھجاہ ءَ آئی ءَ وتی ساہ داتگ، زھگ ءِ جون وتی بنکی ھنکین ھاران ءَ برگ بوتگ کہ ھمودا آئی ءِ کل ءُ کسارت کنگ بیت –

زانگ بہ بیت کہ بلوچستان ءَ شومک ءِ نادراھانی تہ ءَ گیشی آیان انت،  گوستگیں سال دوھزار بیست ءُ دو ءِ گڈی ماہ ءَ تھنا ڈیرہ بگٹی ءَ زھگے ءَ ھوار سَے مردم مرگ ءِ دیمپان بوتگ – 

انچش گوشگ بیت کہ بی ایم سی نادراھجاہ ءَ ھمک روچ کساس بیست ءَ گیش نادراھانی کیموتھراپی کنگ بیت انت – 

سرجمیں بلوچستان ءَ شومک ءِ نادراھی ءِ الاج ءَ پہ آسراتی نیست – بلوچستان ءِ چاگردی ءُ راجداریں باسک ءُ گلانی نیمگ ءَ مدامی لوٹ کنگ بیت کہ شومک ءِ نادراھی ءِ گر ءُ دار کنگ بہ بیت ءُ بلوچستان ءَ شومک ءِ نادراھجاہ پچ کنگ بہ بیت –

بلوچستان ءِ بازیں دمگاں ھاسکر ھزدار ءُ نوشکی ءَ بازیں شومک ءِ نادراھانی کیس دیم ءَ اتکگ انت ءُ تنی وھدی بازیں مردمے چہ وتی زند ءَ زبھر بوتگ کہ آھانی تہ گیشتریں کچ زھگ ءُ ورنایانی انت –

آواران ءِ دمگ  پیر اندر کچ، مسکان بازار ءَ پاکستانی پوج ءِ لس مھلوک ءِ سر ءَ زوراکیانی بگیری ءَ زھرشانی کُتگ، مزنیں کچے ءَ زالبول ءُ مردین دگانی سرءَ در اتکگ انت ءُ پوج ءِ زوراکیانی بگیری ءَ اوگام جتگ –

دمگی مردمانی رِد ءَ دو روچ ساری ناشناسیں مردماں پوج ءِ بنجل ءِ سر ءَ اُرش کُتگ،  اُرش ءِ دومی روچ ءَ سھب ءِ ادار ھپت ءَ پوج ءَ سرجمیں دمگ انگر ءَ کُتگ گِسانی تہ ءَ مانریتکگ،  زھگ، زالبول ءُ کماش لٹ شاپ کتگ انت ءُ بازیں مردمے آوار جتگ ءُ گوں وت برتگ انت کہ پدا ھمودا لٹ شاپ کتگ انت – 

پوج ءِ لٹ شاپی ءَ زدگ بوتگیں وزیر بلوچ ء محمد ءِ جاور نگیگ بوتگ کہ آ بیھوشی جاوراں سول نادراھجاہ ءَ برگ بوتگ –

مردمانی گوشگ اِنت کہ اے اولی رند نہ انت بلکہ چدو پیش ھم آرمی ءِ نیمگ ءَ لس مھلوک دلسیاہ کنگ ءُ لٹ شاپ کنگ بوتگ انت – 

مسکان بازار ءِ مردم مپت ءَ زورانسری کار گرگ بوگ ءَ انت، زرانکولیءِ جنگل ءِ درسیں درچک پوج ءَ بُرائینتگ انت بلے مردم یک کلدار ءِ نہ داتگ انت ءُ زورانسری کار گپتگ انت –

زھرشانی کنوکانی گوشگ ات کہ بازیں سالے بیت کہ پوج ءَ مردم دلسیاہ کتگ انت،  شپ ءِ ادار ھپت ءَ پد مردمانی گِس ءِ درآیگ بند کنگ بوتگ ءُ گِسانی لیٹ روک کنگے ھم موکل نیست- نادراھانی ءُ ایمرجنسی ءِ جاوراں ما سک باز دلسیاہ انت – 

آھانی گوشگ ءَ انت کہ شپ ءِ تھاری ءَ مردم چوں زان انت کہ چہ کجا تیرگواری کنگ بوگ ءَ انت ءُ کئے کنگ ءَ انت، اُرش ءَ پد اُرشکارانی رندگیری ءِ بدل ءَ آرمی وتی زھراں لس مھلوک ءِسر ءَ کش ایت –

درنگاز کنوکاں چہ بلوچستان سروزیر عبدالقدوس بزنجو،  کورکمانڈر آصف غفور ءُ دمگی واکداراں گوں لوٹ کتگ کہ لس مردمانی سر ءَ آرمی کارمندانی زوراکی ءِ بگیری ءَ گامگیج زورگ بہ بیت –

بلوچستان ءِ دو جتاجتائیں دمگ آواران ءُ گوادر ءَ پاکستانی پوج ءُ بند بوجیں شرکت ءِ سر ءَ سلاہ بندیں مردماں اُرش کتگ ءُ آ تاوان داتگ اَنت دومی نیمگ ءَ اے دوئیں اُرشانی زمہ واری بلوچ آجوئی لوٹوکیں گل بلوچستان لبریشن فرنٹ ءَ منّ اِتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ وتی شنگ کتگیں یک درشانے ءِ تہ ءَ گْوشتگ کہ گوستگیں شپ ءَ دو فروری ءَ ساھت نُھ ءُ بیست ملٹ ءَ سرمچاراں پوجی بند بوجیں شرکت فرنٹیئرورکس آرگنائزیشن ( ایف ڈبلیو او ) ءِ بُنجل سر ءَ اُرش کتگ اود ءَ ساڑی ئیں سرجمیں مشینری مانداشتگ اَنت-

ماندارگ بیتگیں مشینری ءِ ھپت گاڑیانی تہ ءَ سے ڈمپر، یک لوڈرے،  یک آپ ٹینکرے، یک رولر ءُ گریڈرے ھوار بیتگ اَنت-

میجر گْوھرام بلوچ ءَ گْوشتگ کہ بُنجل ءَ ساڑی ئیں گاڑیاں ھوار دگہ سرجمیں مشینری مانداشتگ اَنت کہ آ سرجم ءَ سُتکگ ءُ پُر بیتگ اَنت-

وھدے کہ دگہ اُرشے ءَ آواران ءَ پاکستانی پوج ءِ بُنجل سر ءَ راکٹ آس داتگ-

گوستگیں شپ ءِ ساھت یازدہ ءُ پنجاہ پنچ ملٹ ءَ سرمچاراں پاکستانی پوج ءِ بُنجل سر ءَ گوں راکٹاں اُرش کتگ-

راکٹ جتائیں نیمگاں چہ آس داتگ اَنت کہ آ بُنجل تہ ءَ کپتگ ءُ تُرندیں تراکے ءَ گوں ترکّ اِتگ اَنت- چریشی ءَ پوج ءَ جانی ءُ مالی تاوان چست کنگ کپتگ-

اے دوئیں اُرشانی زمہ واری ءَ بی ایل ایف منّ اِیت ءُ چہ بلوچستان ءَ دراھگ ءَ تاں دُژمن ءِ بگیری ءَ اے وڑ اُرش برجاہ بنت-

بلوچستان ءِ تیاب دپی شھر گوادر ءِ ھنکین کلگ کُلانچ ءَ ناشناسیں سلاہ بندیں مردماں دگ جوڑکنوکیں شرکت ءِ سرءَ اُرش کُتگ ءُ سرجمیں مشینری مان داشتگ۔

 دومی نیمگ ءَ بلوچستان ءِ دمگ کلاتءَ  ناشناسیں سلاہ بندیں مردماں سِنگ مرمر ءَ چکاریں ٹرک مان داشتگ۔

سر بیتگیں اھوالانی ردءَ بلوچستان ءِ دمگ گوادر ءِ ھنکین کلگ کلانچ ءَ ناشناسیں سلاہ بنداں ڈمپر ءُ لوڈر ءِ پجیگ ءَ درستگیں مشینری مان داشتگ اَنت کہ آ سُتکگ ءُ تباہ بیتگ اَنت۔

گوادر ءُ کَش ءُ گوری دمگانی تہءَ چدو پیسر ھم دگ جوڑ کنوکیں شرکت تاوان دیگ بیتگ اَنت دمگ ءَ سرپُرکنوکیں سلاہ بندیں آجوئی لوٹوکیں گل اے شوربندیاں سی پیک ءَ گوں بندوک گشنت۔

دومی نیمگ ءَ کلات ءِ ھنکین منگوچر بازار ءِ ھند ءَ ناشناسیں سلاہ بندیں مردماں سنگ مرمر ءَ چکاریں ٹرک مان داشتگ ءُ تتکگ اَنت۔

زانگ بہ بیت گوست ءَ چُشیں کاروائیانی زمہ واری بلوچ آجوئی لوٹوکیں سلاہ بندیں گلاں من اِتگ اَنت۔

بلے مروچی بیتگیں اُرشانی زمہ واری داں انگت ھچ گل ءَ نہ من اِتگ اَنت۔