TBP Balochi

بلوچستان ءِ دوجتاجتائیں دمگ کیچ ءُ مند ءَ ناشناسیں سلاہ بندیں مردماں پاکستانی پوج سرءَ اُرش کتگ ءُ دومی نیمگ ءَ اے دوئیں اُرشانی زمہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ زرتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ پاکستانی ءِ پوج سرءَ بیتگیں اُرش زمہ واری منّ اِتگ گْوشتگ کہ مئے سرمچاراں شش فروری ءَ کیچ ءِ دمگ مند ءِ ھند گوک ءَ واٹرسپلائی سر ءَ برجاھیں پاکستانی پوج ءِ پانگس سرءَ گوں راکٹ ءُ مزنیں سلاھاں اُرش کتگ چریشی ءِ آسر ءَ آیاں جانی ءُ مالی تاوان چست کنگ کپتگ-

میجر گْوھرام بلوچ ءَ دیمترءَ گْوشتگ کہ دگہ یک اُرشے کیچ ءِ بُنجاھی شھر تربت ءَ تعلیم چوک سرءَ برجاھیں پاکستانی پوج ءِ پانگس سر ءَ دستی بمب اُرشے کتگ-

 دستی بمب پانگس ءِ تہ ءَ کپتگ چریشی ءَ چہ پانگس ءَ ساڑی ایں یک کارندھے مرتگ ءُ یکے ٹپی بیتگ-

جارکش میجر گْوھرام بلوچ ءَ گُڈسرءَ گوشتگ کہ اے اُرش تاں بلوچستان ءِ وتواجھی ءَ برجاہ بنت-

نبشتہ کار: اے جنک وَ گنوک اِنت 

نبشتہ کار: سیپ بلوچ

دی بلوچستان پوسٹ

اے بری میتگ ءَ جتائیں تورشتے ءِ نیمگ ءَ بُرت ءُ جیڑگ ءَ پرمات ،گوستگیں سئے سال سرجم اَت کہ اے میتگ ءَ سر نہ کپتگ اَت بلے اے بری پاداں بُرت کہ پیر زال ءَ سک باز کلوه دیم داتگ ات کہ بیا گڑا پہ سر کپتی پیر زال ءِ گس ءَ شُت ءُ سر بیت آں۔

چوناها اے گس ءَ گیشتر جنکیں زهگ اِت اَنت ءُ پد ءَ مزهبی ئیں مردم من ءَ پمیشکا اے کهول ءِ نیمگ ءَ پاداں نہ بُرتگ کہ ایشانی مرد نہ اَنت رستر اَنت پد ءَ جنکیں زهگانی سر ءَ کش اتگیں کارچ اَنت۔

من ءَ اے پیمیں چاگرد دوست نہ بیت، پہ زور پاداں بُرت داں گس ءِ دریگ ءَ پُترت آں پیرزال منی دیم ءَ اوشتاتگ اَت من امبازاں زرت ءُ آدگہ لهتیں چاگرد ءِ جنکیں زهگ نشتگ اِت انت کس پاد نہ اتک هیر من وت دست ملاریناں کت انت پہ ترسیں دل ءِ دست اش دات ءُ پیر زال اوں اجکہ ات اے دست ملارینگ ءِ وهد ءَ چاگرد ءِ مردین ءِ بہ گند ایت ٹوهین جنگے ود ایت بلے من اے چیز کمار نہ کت ءُ بیگ دور دات لوگ ءِ برانڈه ءَ سر جاه ایر اَنت ءُ زهگ نشتگ اِت اَنت من نشت آں گوں همے کہ چمانی دیم ءَ جنکیں چکے نشتگ اَت ایشی ءِ سر ءِ دیم ءِ مید من ءَ گندگ نہ بوت آں من هیران بوت آں اے چوں ؟

  یکبرے من گْوشت جست ئِے کن آں پد ءَ جیڑ اِت دم ءِ سارت کن آں آپ چاه ءِ وراں شپ وتیگ اِنت پہ جست ءُ پست ءَ داں پیر زال اتک ءُ آپ ءِ آؤرت پمن داں من آپ وارت پیر زال ءَ درائینت تو برو گس ءَ ڈن ءَ نندگ شر نہ اِنت ایشانی هال وَ تو سهی ءِ بیا آں کچک جوڑ بنت۔

من پیر زال ءِ گپ ءِ اشکنگ ءَ کمو دلگران بوت آں کہ من اے گس ءَ رُستگ آں همے زهگاں گوں هوار اے چون منی دیم ءَ ستر بوت کن اَنت اے گپ هست کہ منی هنکین ءُ جاه جتائین اَنت بلے من کسانی گیشتر همے میتگ ءَ گوازینتگ من همے جنکو ءَ را گوشت تو منی بیگ ءَ بر کمره ءَ من کایاں همود ءَ جنک ءَ بزگی پہ انگو آنگور چار ات ءُ زوت بیگ کمره ءَ دور دات ءُ در اهت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ بلوچستان ءِ بنجاھی شھر شال ءَ زھگ ءُ زالبولاں ھوار پنچ مردم زورانسری آوار جنگ ءُ بیگواہ کنگ بوتگ انت –

دی بلوچستان پوسٹ ءِ پتر ءَ رستگیں ھالانی رِد ءَ بلوچستان ءِ بنجاھی شھر شال ءَ پاکستانی پوج ءَ گِس ءِ سر ءَ بیڑ برتگ زوراکی کنان ءَ زھگ ءُ زالبولاں ھوار پنچ مردم زورانسری آوار جتگ ءُ گوں وت برتگ انت –

آوار جنگ بوتگیں مردمانی پجار محمد رحیم زھری ء چاکر خان زھری ءُ آئی ءِ کسانسالیں جنکو دعا زھری، چار سالیگیں بچک یحییٰ زھری لوکبانک رشیدہ زھری ءُ مات بس حاتون ناماں چہ بوتگ انت –

اھوالکار ءِ رِد ءَ اے مردم سَے فروری ءَ چہ شال ءَ گشکوری ٹاؤن ناشناس کالونی ءَ پٹ پولی آپریشن ءِ میان ءَ آوار جتگ ءُ بیگواہ کتگ انت کہ پدا رند ءَ آھانی ھچ ھال اھوال نیست –

زانگ بہ بیت چدوپیش ھم بلوچستان ءَ چُش بوتگ کہ پاکستانی پوج ءَ زھگ ءُ زالبول آوار جتگ ءُ بیگواہ کتگ انت –

لھتے روچ ساری کراچی سنٹرل جیل ءِ دیم ءَ یل بوتگیں عبدالحفیظ زھری دوبر آوار جنگ ءِ کوشست کنگ بوتگ ءُ اے میان ءَ آئی ءِ کھول زھگ زالبولانی سر ءَ ھم لٹ شاپی کتگ –

زالبول ءِ ارزِشت

نبشتہ کار: ھانی بلوچ

دی بلوچستان پوسٹ

راجانی آبادی ءِ نیم زالبول اَنت، زالبول ءَ اَبید ھَمک راج ناسرجم اِنت۔ باید اِنت ھما آجوئی کہ مردین ءَ دیگ بُوگ ءَ اِنت زالبول ءَ ھم دیگ بہ بیت بلے مئے چاگرد ءَ زالبول لوگ ءِ کارانی کَنگ ءُ چُک ءِ پیداک کَنگ ءِ مشینے لیکھگ بیت ، یک نیمگے ءَ آ لوگ ءِ کاراں کَنت ءُ دومی نیمگ ءَ چُک ءَ رودین ایت ءُ دگہ کار کنت بلے مئے چاگرد ءِ مردم انگت ھم گوں زالبول ءَ رازی نہ بنت آ ھمے گوش اَنت “زالبول اللہ پاک ءَ لوگ ءِ کارانی ءُ چُک ءِ پیداک کَنگ ءِ ھاتر ءَ سازِ اتگ”-

گِندئے مئے چاگرد ءَ زالبول ءَ ھچ ارزِشت دیگ بوگ ءَ نہ اِنت ءُ زالبول ءِ مَستری ءَ ھم تھنا یکے نہ کَنت۔ پِت تا مَستری کَنت برات جُتا ءُ لوگ واجہ جُتا ، زالبول وتی جِند ءِ مَستری ءَ ھم وت کُت نہ کَنت۔ گوستگیں زمانگ ءَ زالبول ءَ ھچ ارزِشت نہ بوتگ آ وھد ءِ مردم ءَ گُشتگ زالبول تھنا لوگی چیزے بلے آ وھد دگہ وھدے بوتگ آ وھد ءَ مئے چاگرد ءَ الم ءُ زانت اینچو نہ بوتگ بلے مرچی باندا اِلم ءُ زانت گیشتر اِنت ھرکس ءَ ونتگ ءُ اِلم ءُ زانت گیش بوُان اِنت بلے انگت ھم زالبول ءَ آجوئی رَسگ ءَ نہ اِنت ءُ باز مردم ھمے گپ ءَ ھم کنت کہ زالبول وان ایت گُڑا مئے واست ءَ چی کنت آ باندا آروس کنت دگہ لوگے ءَ روت ، اگاں آروس کنت ھم بلے وانگ زالبول ءِ بُنکی ھک اِنت آئی ءَ کہ تو اِلم ءُ زانت دئے آ آروس کَنت وتی چُکاں اِے گپ ءَ کُت نہ کَنت کہ شما زالبول اِت پمیشکا شما ھم مہ وان اِت۔ وھدیکہ تو زالبول ءَ اِلم ءُ زانت دئے آئی ءِ باندات شَر بیت ءُ آ مئے آیوکیں پدریچ ءَ جوانیں وڑے ءَ اِلم ءُ آگاھی دات کَنت گوش اَنت اگاں یک بچکے بوان ایت گُڑا آئی ءِ زانت داں ھمائی ءَ سر بیت بلے یک جنکے بوان ایت آئی ءِ زانت آئی ءِ کئولِ مردماں سر بیت۔ ھر ھمک کار کہ مردین آدم کنت زالبول ھم کُت کنت بلے زالبول ءَ آجوئی دیگ بوُگ ءَ نہ انت۔ بدبھتی ما چہ زالبول ءِ وانگ ءَ گیشتر لوگ ءِ کار ءَ ارزِشت دئے ایں۔

گُڑا باید اِنت مرچیگیں دیمروی کُتگیں زمانگ ءَ زالبول ءَ آئی ءِ بُندری ھک دیگ بہ بنت۔ چوناھا آزات ھیالیں بلوچ راج ءِ دود ءُ ربیدگانی رِد ءَ بلوچ زالبوالاں آزاتی ءُ ھَک ھم ھست بلے اے دْراہ گپانی تہ ءَ اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ترکی ءُ شام ءَ ھوار سرجمیں دمگ ءَ ترندیں زمین چنڈ ءِ اَتکگ کہ اِشی سوب ءَ داں انگت پانزدہ سد مردمانی بیران بیگ ءِ ھال اِنت وھدیکہ مزنیں کساس ءَ مردم انگت ڈراتگیں لوگ ءُ ماڑیانی چیر ءَ گَٹ اِتگ اَنت۔

امریکی جیولوجیکل سروے ءِ ردءَ ترندیں زمین چنڈ  قبرص، یونان، اردن، لبنان ءُ اسرائیل ءَ ھم بیتگ اَنت۔ 

زمین چنڈ ءِ آسرءَ بیرانیانی کساس ءِ گیش بوّگ ءِ گمان کنگ بئیگ ءَ اِنت۔

جرمن پٹءُ پول بنجاہ ءِ ردءَ  ترکی ءَ اتکگیں اے زمین چنڈ ءِ ترندی 7.9 ریکارڈ کنگ بیتگ،زمین چنڈ ءِ بنجاہ ترکی ءِ زربار ءَ Nurdadi/Gaziantep ءِ دمگ بیتگ، اے زمین چنڈ ءِ جھلی 10 کلو میٹر زمین ءِ چیر ءَ بیتگ۔

ترکی ءَ ترندیں زمین چنڈ ءَ اسر مند بیتگیں دمگانی تہءَ کمکی کار برجاہ اَنت، کمکی ادارگانی ٹولیاں ابید ھندی مردم ھم مانشتانی تہءَ پس اِتگیں مردماں درگیجگ ءَ اَنت۔

ترک ڈیزاسٹر اینڈ ایمرجنسی مینجمنٹ اتھارٹی ءِ ردءَ ترکی ءِ زرباری شھر کھرا منمار ءُ آئی کَش ءُ گوراں زمین چنڈ ءِ ترندی 7.4 ریکارڈ کنگ بیتگ۔

زمین چنڈ ھندی وھدءِ ردءَ شپ ءِ 4:15 ءَ اتکگ، ھما وھدءَ گیشتریں مردم واب بیتگ اَنت۔

زمین چنڈ ءِ سوب ءَ ماڑیاں باز تاوان رستگ،  مردم تُرس ءَ چہ دگانی سرءَ درکپتگ اَنت،  زمین چنڈ داں یک 1 مِلٹءَ مارگ بیتگ۔

زمین چنڈ ءِ آفٹر شاکس ترکی ءِ نیامی دمگانی تہءَ ھم مارگ بیتگ اَنت، کہ اِشانی ترندی 6.7 ریکارڈ کنگ بیتگ، آفٹر شاکس کساس 11 دمان ءَ پد مارگ بیتگ اَنت۔

ترک سرکاری ٹی وی ءِ ردءَ ترکی ءِ زربار ءَ اتکگیں زمین چنڈ ءَ بازیں مردم ٹپی بیتگ اَنت، وھدیکہ مزنیں زمین چنڈ ءَ پد کساس  32 آفٹر شاکس اتکگ اَنت۔

بلوچستان ءِ دو جتائیں دمگ ھُزدار ءُ دالبندین ءَ وتکشی ءُ دگ وئیل آسر ءَ پنچ مردم بیران وھدے کہ چار ٹپی بیتگ اَنت-

سربوتگیں ھالانی رِد ءَ ھُزدار ءَ زیرو پوائنٹ ءَ یک مزدا گاڑی یے ءَ ھُزدار ءِ جھمنندیں دو مردم لگت داتگ اَنت چریشی ءِ آسر ءَ دوئیں ورناہ ھما دمان ءَ بیران بیتگ اَنت-

بیران بیتگیں مردمانی پجّار عبدالحفیظ ءُ نصیر احمد ناماں چہ بیتگ اَنت بلے مزدا ٹرک گاڑی ءِ ڈرائیور تچگ ءَ سوبمند بیتگ-

انتزامیہ رِد ءَ آیانی پٹ ءُ پول برجاہ ءَ اِنت-

ھمے وڑ دومی وئیل ھُزدار وھیر ھند ءَ بیتگ کہ اود ءَ گاڑی تُرند روگ ءِ سبب ءَ چپی بیتگ چریشی ءِ آسر ءَ دو مردم یک مردینے ءُ یک زالبولے بیران بیتگ اَنت کہ آیانی پجّار حاجی احمد ءُ اسما ناماں چہ بیتگ اَنت وھدے کہ اے وئیل چار مردم ٹپی بیتگ اَنت آ ایم ای آر سی 1122 والواں الاج کتگ ءُ ھُزدار نادُراھجاہ ءَ برتگ اَنت-

بلوچستان ءَ دگ وئیل ءَ بُنکی سبب تنک ءُ پروشت پروش ءَ اَبید ڈرائیورانی بے پرواھی ءَ گوشگ بیگ ءَ اِنت-

ھمے وڑ بلوچستان ءِ دمگ دالبندین ءَ یک ورنایے ءَ وت ءَ تیر جتگ ءَ وتی زندمان کُٹینتگ-

سربوتگیں ھالانی رِد ءَ دالبندین ءَ موسیٰ نامیں ورنایے ءَ پت ءِ نیمگ ءَ ھبر دیگ ءَ اوپار نہ کتگ ءُ وت ءَ تیرجتگ وتکشی کتگ-

وتکشی کنوکیں ورنائے ءِ لاش پہ گیشیں چار ءُ ٹپاس ھاتر ءَ کھول ءَ داتگ-

زانگ بہ بیت کہ سرجمیں بلوچستان ءَ وتکشی ءِ وئیل یکشلہ نکش بیگ ءَ اَنت، گوستگیں روچاں بلوچستان ءِ دمگ سوئی ءَ وشحال کالونی ءَ سیزدہ سالی ئیں بچک راجو ڈومب بگٹی ءَ پہ گُژنگی ءُ لوگ جاوراں چہ بیزار بیتگ ءُ وتی گُٹ ءَ سادے مان کتگ وتکشی کتگ-

سرجمیں بلوچستان ءَ دو سالانی تہ ءَ وتکشی وئیل یک ترسناکیں وڑے ءَ گیشی اَتکگ، دی بلوچستان پوسٹ نیمگ ءَ یکجاہ کنگ بیتگیں کچ ءُ کساس رِد ءَ 2022 ءِ گُڈی ءَ تاں وتکشی ءِ کیس پنجاہ ءَ سر بیتگ اَنت-

ھمے سال ءَ جنوری ءَ بلوچستان ءِ دمگ کیچ ءَ ( ز) نامیں زالبولے ءَ نازانگی سوباں وتکشی کتگ-

دومی بلوچستان ءَ وتکشی وئیل لوگ یا دمگاں بنت، اشانی چیر دیگ جھد ءَ کن اَنت پرچا مردم اشی ءَ وتی واستا بدنامی سرپد بنت –

بلوچستان ءِ دمگ بولان ءَ ناشناسیں مردماں موبائیل ٹاور ءِ سر ءَ اُرش کُتگ –

سلاہ بندیں مردماں بولان دربی ءِ ھند ءَ موبائیل ٹاور ءِ سر ءَ اُرش کتگ ءُ آئی ءِ مشینری مانداشتگ انت چریشی موبائیل ٹاور تباہ بوتگ ءُ سرجمیں ازباب سُتکگ انت – دومی نیمگ ءَ.ناشناسیں سلاہ بندیں مردماں گوستگیں شپ ءَ مشکے ءِ دمگ نلی ءَ پاکستانی پوج ءِ بنجلے ءِ سر ءَ اُرش کُتگ اُرش ءَ پوج ءَ جانی ءُ مالی تاوان دیمپانی بوتگ – بولان ءُ مشکے ءَ بوتگیں ھردو اُرشانی زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ انت –

بی ایل ایف ءِ جارکش میجر گوھرام بلوچ ءَ وتی ٹیلی گرام ءِ آفیشل چینل آشوب ءَ شنگ کرتگیں درشان ءِ تہ ءَ گوشتگ کہ سرمچاراں بولان ءِ دمگ دربی ءَ تیر گواری کتگ ءُ موبائیل ٹاور تباہ کتگ –

جارکش ءِ رِد ءَ موبائیل ٹاور ءِ تباہ کنگ ءَ پد سرمچاراں ٹاور ءَ ھمگرنچیں درسیں ازباب مانداشتگ انت –

میجر ءَ گوشتگ کہ ریاستی پوج بلوچ آجوئی لوٹوکانی ٹریس کنگ ءِ ھاتر ءَ مھلوک ءِ بازاراں چہ باز دور کوھی دمگاں ٹاور مک کنگ انت ءُ ھمے نشانگ کنگ بوگ ءَ انت –

بی ایل ایف ءِ جارکش میجر گوھرام بلوچ ءَ دیمتر ءَ گوشتگ کہ گوستگیں شپ ءَ سرمچاراں مشکے ءِ دمگ نلی ءَ پاکستانی پوج ءِ بنجلے سر ءَ راکٹ گولہ آس داتگ کہ آ بنجلے تہ ءَ کپتگ انت – پوج ءَ جانی ءُ مالی تاوان رستگ –

جارکش ءَ گوشتگ کہ بلوچستان ءِ آجوئی تاں دژمن پوج ءُ آئی شوربندیانی ھلاس کنگ ءَ تاں مئے اُرش برجاہ مان انت –