TBP Balochi

بلوچستان ءِ دمگ پنجگور ءَ پاکستانی لشکر ءَ دو مردم آوار جنگ ءَ پد ناشناسیں جاھے ءَ برتگ اَنت-

گیشیں ھالانی رِد ءَ پنجگور ءِ ھنکین گچک ءَ چہ پاکستانی لشکر ءَ دو مردم آوار جنگ ءَ پد بیگواہ کتگ اَنت کہ آیانی پجّار گلاب ء واحد ءُ سلیم ء ملنگ ءِ ناماں چہ بیتگ اَنت-

اِھوالکارانی رِد ءَ اے مردم دہ روچ ءَ ساری پاکستان لشکر ءَ آوار جتگ ءُ بیگواہ کتگ اَنت- دمگ ءَ ھال اھوالی آسراتی نہ بوگ ءِ سوب ءَ آوار جنی ءِ گپ دیم ءَ نیتکگ-

زانگ بہ بیت مروچی پنجگور ءِ دمگ خدابادان ءَ مواچ چار راہ ءِ سر ءَ سرف گاڑی ءَ سواریں سلاہ بندیں مردماں نیوگ دکانے ءَ بیڑبرتگ ءُ شعیب ء ایوب نامیں ورنایے آوار جنگ ءَ پد بیگواہ کتگ-

دمگی مردمانی رِد ءَ اے ھما دکان ایں کہ داد جان نامیں ورنایے پاکستانی پوج ءِ چیردستی ءَ کارکنوکیں ڈیتھ اسکواڈ ءِ کارندھانی تیرگواری ءَ چہ بیران بیتگ اَنت-

زانگ بہ بیت بلوچستان ءَ ھمکروچ زورانسری آوار جنی ءِ ھال نکش بنت یک نیمگے پاکستانی پوج ءُ دومی نیمگ ءَ آئی ءِ داشتگیں ڈیتھ اسکواڈ ءِ کارندہ ورناھاں آوار جنگ ءُ بیگواہ کنگ ءَ اَنت-

بلوچستان ءِ پنجگور دمگ ءَ ناشناسیں سلاہ بندیں اولاک سواراں یک مردمے آواز جنگ ءَ پد ناشناسیں جاھاں بُرتگ۔

اھوالانی ردءَ پنجگور ءِ ھنکین خدابادان مواچ چارراہ ءِ سرءَ سرف گاڑی ءَ سورایں پجار نہ بیتگیں سلاہ بندیں مردماں یک مردمے بیگواہ کنگ ءَ پد ناشناسیں ھنداں بُرتگ۔

بیگواہ بیتگیں مردمے پجار شعیب ء ایوب جھمنند خدابادان ءِ نامءَ چہ بیتگ۔

پولیس ءَ وئیل ءِ ھال راست کُتگ، البت گیشتر اھوال پولیس ءَ نہ داتگ اَنت ءُ نانکہ بیگواہ کنوکانی پجار داں انگت پولیس ءَ کُتگ۔

یات بہ بیت بلوچ راجدوستیں گل چُشیں وئیلانی بھتام ءَ پرست پاکستانی چیریں ادارگ ءُ آیانی داشتگیں کشندہ ٹولیانی (ڈیتھ اسکواڈ) ءِ سرءَ دئینت، آیانی گُشتن ءَ چُشیں وئیلانی تہءَ ڈیھی مشینری ھوار اِنت۔

نیشنل ڈیموکریٹک پارٹی ءِ بنجاھی جارکش ءَ وتی درشانے تہءَ گُشتگ کہ سئے فروری ءَ شال ءِ ھنکین گشکوری ٹاون ءَ چہ محمد رحیم زھری ء چاکر خان زھری، آئی یک سالیگیں جِنک دعا زھری، چار سالی بچ یحیٰ زھری، لوگ بانک رشیدہ زھری ءُ مات بس خاتون ابید قانودی رھبند دزگیر کنگ بیتگ اَت اَنت وھدیکہ گوستگیں روچاں محمد رحیم زھری ءِ مات ءُ کسان سالیں گونڈو یل کنگ بیتگ اِت اَنت البت رحیم زھری ءُ آئی لوگیگ رشید زھری داں انگت زورانسری بیگواہ اَنت۔

جارکش ءَ گُشتگ کہ جھان ءَ زورانسری بیگواھی ءِ پالیسی ءَ نے ھواریں سزا ءِ پئیم ءَ زانگ بیت کہ اے یک سنگینیں جُرم اِنت بلے اے جرم ءِ سرءَ سرجمی ءَ گوں کاربند بیگ ءَ گوں اِشی ءَ بلوچ چاگرد ءِ کارمرز کنان ءَ رھبندی جوڑ کنگ بئیگ ءَ اِنت اِشی ءَ ھوار بلوچ زالبول رشیدہ زھری ءِ بیگواھی ءَ گوں بلوچ دود، ننگ ءُ شرپ لگتمال کنگ بیتگ اَنت ءُ اے اولی بر نہ اِنت بلکینہ چدوپیسر ھم ڈیھی ادارگانی نیمگ چُشیں گامگیج گوستگیں بازیں سالاں چہ کنگ بئیگ ءَ اَنت کہ اِشی پسہ ءَ بلوچ گھگیری ءِ تہءَ ترندی ھم گندگ ءَ اتکگ کہ اے یک فطری عمل اِنت۔ ما ڈیھی ادارگاں چُشیں گیر انسانی گامگیجانی تہءَ ھوار بیگ ءَ چہ مکن کنیں کہ آ میان اُستمانی انسانی اگبالانی سرجمی ءَ ھلاپ ورزی ءَ ھوار ھوار بلوچ راج ءِ ننگ ءُ دودانی ھلاپ اَنت۔

جارکش ءَ وتی درشان ءِ گُڈ سرءَ گُشتگ کہ رشیدہ زھری ءُ آئی لوگ واجہ زیت ءَ زیت دیما آرگ بہ بیت ءُ اگں آیانی سرءَ کجام ھم بھتام اَنت گُڑءَ رھبند ءِ ردءَ گامگیج زیرگ بہ بیت اگں نہ

نیشنل ڈیموکریٹک پارٹی بلوچ ءِ رکینگ، راجی دودمان، ننگ ءُ شرپ ءِ رکینگ ءِ ھاترءَ کجام ھم دیمھونی ءَ چہ چک ءُ پد نہ بیت۔

نبشتانک: بلوچ راجدپتر ءُ جنرل مُشرپ

نبشتہ کار: پاتما بلوچ

دی بلوچستان پوسٹ

اگاں ما انیگیں بلوچ راجی آجوئی ءِ جُھد ءَ چمشانکے بدے ایں گُڑا ما سرپد بہ ایں کہ بلوچ راج ءِ سر ءَ اِے جنرل پرویز مُشْرَپ ءِ بُنگیج کُتگیں جنگ، یکشل ءَ برجاہ داشتگیں دُژمن ءِ زُلم ءُ زوراکیانی آسر اِنت کہ ٹَک ءُ دمگانی میان ءَ بھر ءُ بانگیں بلوچ راج ءِ دلیریں ورناہ پہ وتی راجی آجوئی ءِ راہ روان کُتگ اَنت۔ اگاں ما راجدپتر ءَ وان ایں گُڑا ما سرپد بہ ایں کہ مرچی مئے بلوچ راجی آجوئی ءِ جُھد ءَ سک باز دیمروی کُتگ پرچا کہ بلوچ راج مُدام وتی دمگاں وتگڑیں میر، سردار ءُ نوابانی گُلام بیتگ ءُ انگت ھم ھست، چہ ایشی ءَ بلوچ راج مُدام ناتپاکی، وتواہ ءُ بھر ءُ بانگ اِنت۔ گِند ئے ھمے میر، نواب ءُ سردار دُژمن ءِ کاسگ چٹ ءُ دلار اَنت پرچا کہ اِے نہ لوٹ اَنت کہ لس بلوچ راج یکمُشت ءُ ھمسنت بہ بیت ءُ پد ءَ اے بلاھیں راج آزات ءُ وتواجھیں بلوچستان، آزات ھیال ءُ راجمستری ئیں مُلکے ءِ واھُند بہ بیت پرچا کہ یک آزات ھیال ءُ راجمستری ئیں بلوچستان ءَ سرداری، میر ءُ نوابی روا نہ بیت۔ اگاں ما راجدپتر ءَ وان ایں گُڑا دْراھیں چیز بلور ءِ وڑ ءَ پدرا اَنت کہ اے کاسگ چٹیں میر ءُ سرداراں مُدام بلوچ راج ءِ دژمن ءَ پائدگ داتگ۔

وھدیکہ بلوچ راج ءِ دُژمن ءَ 28 مارچ 1948 ءَ بلوچستان ءِ سر ءَ اُرش کنت گُڑا چہ دُرستاں پیسر ھمے دمگی سردار، میر ءُ نواباں لب ءُ لالچ دیان ءَ بھا زُرت اَنت ئِے پمیشکا ما گِند ایں کہ 1948 ءَ شھزادگ ابدلکریم بلوچ ءِ سرکماشی ءَ اولی بلوچ راجی آجوئی ءِ سِلاھبندیں جُھد ءَ ھمے دمگی میر ءُ سرداراں بلوچ راجی گھگیری ءَ ناں وت بھر زورت ناں کہ وتی دمگی بلوچاں گْوشت اش کہ پہ وتی آجوئی ءَ پاد بیا اَنت ، پہ راجی آجوئی ءَ شھزادگ ابدلکریم ءِ کاروان ءَ ھوار بہ اِت۔ گِند ئے پہ دُژمن ءِ پائدگاں ھمے دمگی میر ءُ نواباں بلاھیں بلوچ راج بھر ءُ بانگ کنان ءَ چہ سرجمیں راجے ماں کسانیں ٹَکاں ونڈ ءُ چُنڈ کُتگ اَنت۔ نی بچار کہ کسے وت ءَ مینگل ءُ کسے وت ءَ رئیسانی ءُ بُلیدی گْوش ایت، کسے وت ءَ کھوسہ، لیگاری، کھتران، بُزدار، مری ءُ گیشکوری گُڑا کسے وت ءَ بُگٹی، لانگو ءُ رِند گْوش ایت کسے جمالی اِنت ءُ کسے مگسی۔

گِندئے اے سرجمیں راج پہ دُژمن ءِ سیت ءُ پائدگاں ماں دمگی راجدْروہ ءُ کاسگ چٹّانی دست ءَ بھر ءُ بانگ اَنت چمیشکا اے وت ءَ اول بلوچ نہ لیکھ اَنت اگاں ایشاں وت ءَ بلوچ منّ اتیں گُڑا اے دْراہ بلوچاں بابو نوروز ھان زھری ءِ سرکماشی ءَ 1958-59 ءِ بلوچ راجی جنگ ءَ ھوار بوتگ اِت اَنت! اگاں ھمے دمگی وتگڑیں سردار، میر ءُ نواباں کمیں گیرت، بلوچیت ءُ راجدوستی ءِ مارشتے بوتیں گُڑا ایشاں 1973-78 ءِ بلوچ راجی آجوئی ءِ سِلاھبندیں جُھد ءَ بابا ھیربکش ءُ اتا اُلہ مینگل بے کُمک ءُ بے ھمراہ نہ کُتگ اَت اَنت کہ ساھیوال ءُ چکوال ءِ پنجابی پوج بلوچ راج ءِ مری ءُ مینگل ٹک ءِ بلوچانی گِساں ماندارگ ءُ بلوچ راج ءِ ورناہ ءُ کماشاں کُشگ ءَ ات اَنت، اگاں ھمے نزیکیں لگوریں سردار ءُ میر وت جنگ ءِ بھر بُوگ ءَ تُرسگ ءَ اِت اَنت گُڑا باید اِنت وتی ٹَک ءِ بلوچاں بہ گْوشتین اش کہ برو اَنت ءُ بابا ھیر بکش مری ءِ سرکماشی ءَ بلوچ راجی آجوئی ءِ سِلاھبندیں جنگ ءَ ھوار بہ بنت۔ بلے اِنّاں پرچا کہ اے دْراہ پنجابی ءِ کاسگ چٹّ اِت اَنت، ایشاں پنجابی ءِ لب ءُ لالچ رسگ ءَ اَت گُڑا ایشاں چون بلوچ راجی آجوئی ءِ بھر بہ زُرتیں یا کہ وتی ٹَک ءِ بلوچاں بہ گْوشتین اش کہ راجی جنگ ءَ ھوار بَہ اِت۔ چوناھا 1971 ءَ پاکستان وت ھِندوستان ءُ بنگلادیش ءِ دست ءَ پْروشتگ اَت پمیشکا پہ راجی آجوئی ءَ بلوچ راج ءِ تپاکی ءُ یکمشتی لازمی اَت باید اِنت نزیکیں سلیمانی بلوچاں ھوار مکران ءُ رکشان ءِ بلوچاں نمیرانیں بابا ھیربکش مری 1973 ءِ جنگ ءَ بے کُمک مہ کُتیں بلے چے کن ئے او بات بلوچ تئی کِسمت ءَ-

ھمے وڑ ءَ داں روچ ءِ مرچیگ ءَ وتگڑیں دمگی میر ءُ سردار ءِ وڑیں کاسگ چٹّاں بلوچ راج بھر ءُ بانگ داشتگ اَنت بچار کہ یک پنجابی ءِ وڑیں درآمدگیں زورانسرے کہ آئی ءَ گوں بلوچ راج ءَ ھچ سْیادی ھم نیست۔ آئی ءِ زُبان، آئی ءِ دود ءُ ربیدگ گوں بلوچ ءَ جتا اَنت چون راج ءِ دمگ، میتگ، کوہ ءُ کوچگاں بلوچ راج ءِ تْرُندیں چیرجنگ ءَ داشت کنت وھدے کہ ھمے زورانسر بلوچ کوہ، دمگ ءُ میتگاں وت ناشناس اِنت؟ گِند ئے پہ وتی بْراتانی کُشائینگ ءَ ما بلوچ راج ءِ ھمے راجدْروہ وت پنجابی پوج ءِ رھشُونی ءَ کنان ءَ کوہ ءُ کوچگاں سر کنگ ءَ ایں، بلوچ میتگانی ماندارگ، راجی سرمچار ءُ رھشُونانی شھیدی، زالبولانی کم شرپی ءُ ورنایانی گار ءُ بیگواھی ءَ مئے راجدْروھانی دست مان چے ءَ کہ اے چکوال ءُ ساھیوال ءِ تینّو مینّواں مجال اِنت کہ سربازیں بلوچ سرمچارانی دیم ءَ اوشت اَنت اگاں روس، امریکہ ءُ نیٹو چیرجنگ ءِ ھرچگاں برداش کُت نہ کن اَنت گُڑا اے پنڈوکیں پنجابی چہ کُجا یک گْوریلہ جنگے برداش کنت۔

بژن اِنت کہ ما بلوچ ناتپاک ایں، وتگڑیں دمگی میر ءُ سردار پنجابی ءِ ٹوھیں آسراتی اَنت۔ البت ما وتی راج ءِ مستریں دُژمن جنرل مُشْرَپ ءِ منّتوار ایں کہ ھمے جھندمی ءِ زُلم ءُ ناھودگیں کَشت ءُ کوش ءِ آسر ءَ راجی جنگ بلوچ وانِندھانی دست ءَ شُت چریشی ءَ راجی آشوب چہ کوھلو ءُ ڈیرہ بُگٹی ءَ درکپتگ ءُ سرجمیں بلوچستان ءِ ھمُک کُنڈ ءَ سر بیتگ۔ مرچاں ڈیرہ گازی ھان، جیکب آباد ءَ بہ گِر تاں نمروز، زاھدان ءُ بندرآباس ءَ بلوچ راج آجوئی لوٹ ایت۔ کسے منّ ایت یا مہ منّ ایت بلے راستی وَ ایش اِنت کہ اے بلوچ راجی آجوئی جنگ ءِ آسر اِنت کہ مرچاں پاکستان یک ایکونومک اندوھے ءِ آماچ اِنت۔

نی باید انت بلوچ راجی لشکر ھمے داب ءَ مُدام راج ءِ لس وانِندگیں ورنایاں وتی سِلاھبندیں گلاں ھوار کنائینگ ءِ جُھد ءَ بہ کن اَنت کہ دمگی میر ءُ سرداراں ھوار راجدْروھاں پْروش دیگ بِہ بیت وھدے کہ ھمے دمگی میر ءُ سرداراں پْروش بیتگ گُڑا دُژمن ءَ ھم الم پْروش بیت، راج وتی ڈیھ ءِ وتواجہ بیت ءُ آزات ءُ راجمستریں آجوئی بلوچستان ھم دیمروی کنت۔

بلوچ شالا یکمُشت ءُ وت ماں وت ھمکوپگ بات، بلوچستان شالا آجوئی بہ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پاکستانی پوج ءِ جارکش (آئی ایس پی آر) ءِ رد ءَ پھازگی لشکریانی نیمگ ءَ لکی مروت ءَ چیریں اھوالانی سر ءَ بیڑ بُرتگ ءُ ناشرکارانی تچگ ءِ کوشست بے سوب کُتگ۔

آئی ایس پی آر ءِ گُشت اِنت کہ پھازگی لشکریاں دو نیمگی تیرگواری  ءِ نیام ءَ 12 ناشرکار کُشتگ اَنت، پھازگی لشکریاں بیڑ 7 ءُ 8 فروری ءِ نیامی شپ ءَ بُرتگ، شوربندی ءَ گوں ناشرکاراں تچگ ءِ ھاتر ءَ یک گاڑی یے دیگ بیتگ۔ 

پاکستانی پوج ءِ جارکش ءَ گُشتگ کہ بیڑءِ نیام ءَ ناشرکارانی گورءَ سلاہ، گولہ تراکناکیں شورہ ءُ اوگانستان ءِ زر ھم دزکپتگ اَنت، پھازگی لشکریانی نیمگ دمگ ءِ پھک کنگ ءِ ھاترءَ انگت بیڑ برجاہ اِنت۔

آئی ایس پی آر ءَ گُشتگ کہ ناشرکارانی گوستگیں یک ھپتگے ءَ داں چاریگی کنگ بیتگ، ھندی مردماں ناشرکارانی بگیر ءَ پوج ءِ کوشست ساڑاتگ اَنت۔

بلوچستان ءِ دمگ مستونگ ءَ چہ ڈھاڈر ءِ جھمنندیں دو مردم زورانسری آوار جنگ ءَ پد بیگواہ کنگ بیتگ اَنت-

ھالانی رِد ءَ ھمے سال ءِ یک فروری ءَ پاکستانی پوج ءَ دو مردم رؤف ء عبداللہ ءُ امیر ء محمد امین جھمنند ڈھاڈر یک ھوٹلے ءَ چہ آوار جتگ ءُ ناشناسیں جاھے ءَ برتگ اَنت، چریشی ءَ پد اشانی درگت ءَ ھچ وڑیں ھال دز نہ کپتگ-

کھول ءَ گوشتگ کہ آ کجام جرم ءَ چہ بیگواہ کتگ اَنت مارا بگش اَنت ءُ آیاں آمیدگس ءَ بیار اَنت-

زانگ بہ بیت چہ مستونگ ءَ گوستگیں ھپتگ ءَ دگہ یک ورنایے نصیب اللہ شاھوانی ھم بیگواہ کنگ بیتگ-

انسانی ھکانی گل ءُ بلوچ راجدوست پارٹی بلوچستان ءَ سیاسی باسکانی زورانسری آوار جنی ءُ تیرسُپتگیں لاشانی زمہ وار پاکستانی پوج ءَ گُشگ ءَ اَنت-

وھدے کہ چہ شال ءَ آواز جتگیں محمد رحیم زھری ءُ آئی ءِ لوگ بانُک رشیدہ انگت بیگواہ اَنت-

پوج ءَ بیگواھیں ورنایے گِس ءِ سر ءَ بیڑ برتگ ءُ زوراکی کنان ءَ کھول ءِ مردم جتگ انت ءُ موبائیل پچ گپتگ انت –

ھالانی رِد ءَ گوستگیں روچ ءَ لیاری ءِ دمگ گل محمدی لین ءَ رینجرز ءُ چیریں ادارھانی کارمنداں زورانسری آوار جنگ بوتگیں بلوچستان بالیچہ ءِ جھمنند سلطان سعید ءِ گِس ءَ بیڑ برتگ زوراکی کنان ءَ زالبول جتگ انت ءُ چہ آھاں موبائیل پچ گپتگ انت –

اے درگت ءَ گیشیں سرپدی دیان ءَ بیگواھیں سلطان سعید بلوچ ءِ گھار عدلہ سعید ءَ گوشتگ کہ رینجرز ءُ چیریں ادارھاں بید پٹ پولی وارنٹ ءَ کراچی ءَ مئے گِس ءَ بیڑ برتگ ءُ گِس ءِ تہ ءَ درسیں مردمانی موبائیل پچ گپتگ انت، گِس ءِ الماری پُروشتگ انت ءُ کھول ءِ مردم جتگ انت –

آئی گوشتگ کہ پاکستانی پوج ءَ اے میان ءَ پُروشت پروش کتگ مارا جتگ ءُ جست کتگ کہ سلاہ کجا چیر داتگ انت –

عدلہ سعید ءِ رِد ءَ دو سال ساری پاکستانی پوج ءَ منی برات سلطان سعید وتگڑیں آپریشن ءَ آوار جتگ ءُ بیگواہ کتگ کہ ھنگت بیگواہ انت –

آئی ءَ گوشتگ کہ دگہ دابیں مھلوک ءِ چادر ءُ چاردیوالی لگتمال کن انت ءُ مئے دوستگیں مردماں آوار جن انت ءُ بیگواہ کن انت وھدیکہ ما وتی دوستیگیں مردمانی ھاتر ءَ توار چست کن ایں گڈا اے مارا گناھگار گُش انت ءُ مئے سر ءَ زوراکی کن انت –

بیگواھیں سلطان سعید ءِ گھار ءَ لوٹ کتگ گوشتگ کہ اگاں اے ملک ءَ انساپ ءِ ادارہ ھست انت گڈا مارا انساپ دیگ بہ بیت ءُ اے ریاستی گنڈی دارگ بہ بنت –

زانگ بہ بیت بیگواھیں مردمانی کھول ءِ سر ءَ کراچی رینجرز ءِ اے اولی رند نہ انت اشی ءَ چیزے روچ ساری چیریں ادارھانی کارمندان کراچی سنٹرل جیل ءِ دیم ءَ ھزدار ءِ جھمنند عبدالحفیظ آوار جنگ ءِ کوشست کتگ ءُ آئی کھول لٹ شاپ کتگ زدگ کتگ انت –

اشی ءَ ساری ءَ گوستگیں سال دوھزار بیست ءُ دو ءَ رینجرز ءُ پاکستان ءِ چیریں ادارھان کراچی نیول کالونی ءَ بلوچ سیاسی باسک راشد حسین بلوچ ءِ گِس ءَ بیڑ برتگ مات ءُ گھار لٹ شاپ کتگ انت ءُ کھول ءِ ایندگہ مردم آوار جتگ انت –

گوستگیں روچاں چہ کراچی ءَ حفیظ بلوچ ءِ دوبر زورانسری آوار جنی ءِ تامر ھم شنگ بوتگ ات کہ چریشی ءَ پد راجکاریں گل ءُ انسانی ھکانی ادارھاں سندھ ءِ سرکار ءَ لوٹ کتگ کہ گامگیج بہ زور انت –

عبدالحفیظ زھری ءَ گوں چی بیتگ؟

ٹی بی پی گچینی

نبشتہ کار۔ فتح بلوچ

جنزوکیں سال ءِ 3 فروری ءَ ناشرکاری ءِ بگیر ءَ کارکنوکیں آمید گِس ءِ کراچی ءِ جج محمد یاسین قادری ءَ عبدالحفیظ ء محمد رمضان ءِ سر ءَ بستگیں بھتام پدر نہ بیگ ءِ سوب ءَ آ یل کُتگ ات۔

عبدالحفیظ کراچی سنڑل جیل ءَ بندیگ بُرتگ، وھدے آئی ءِ کھول ءِ مردم آمید گسِ ءِ پرمان نامگ ءَ گوں زندان ءَ چہ وتی برات ءِ زیرگ ءُ ڈَن ءَ درکپگ ءَ بیتگ اَنت کہ یک اسپیتیں ویگو گاڑی ءَ آیانی راہ بستگ ءُ عبدالحفیظ ءَ گوں وت برگ ءِ جھد کُتگ۔

کہ چریشی ءَ پد آئی ءِ گوھار ءُ کھول ءَ دگہ ترندیں گھگیری کُتگ ات۔ سلاہ بندیں مردماں آیانی سر ءَ تیر گواری کُتگ، جنین آدماں لگت جنگ بیتگ، زاہ ءُ بد کنگ بیتگ ءُ آیانی مُد چِکگ بیتگ ات اَنت بلے بی بی فاطمہ ءَ وتی بیگواھیں، دزگیریں برات دوبر بیگواہ بیگ ءَ نئیشتگ۔

سلاہ بنداں گھگیری گندگ ءَ پد تچگ ءَ پیسر عبدالحفیظ ءِ کُشگ ءِ کوشست کنان ءَ سک باز ٹپی کُتگ۔

چاگردی رسانکدرانی تہ ءَ یک ءَ چہ گیشتر وائرل بیتگیں تامرانی تہ ءَ اے ندارگ گندگ بیت کن اَنت۔

عبدالحفیظ دبئی ءَ چہ کراچی چون سربیتگ؟

عبدالحفیظ گوستگیں سال ءِ 27 جنوری ءِ شپ ءَ ھماوھد ءَ چہ آئی لوگ ءِ دپ ءَ پارکنگ ءَ چہ متحدہ عرب امارات ءِ چیریں ادارگاں بیگواہ کُتگ، وھدے آ کار ءَ چہ واتر لوگ ءَ آیگ ءَ بیتگ۔

رند ءَ ھال رس اتگ کہ آ امارتی چیریں پولیس ءَ پاکستانی واکدارانی دست ءَ داتگ بلے کجام جرم ءِ سوب ءَ اے گُشگ نہ بیتگ اَت۔

یک مزنیں مدتے ءَ داں پاکستان ءَ آئی ءِ ھچ اھوال نہ رس اتگ اَت۔ حفیظ ءِ کھول ءَ آئی ءِ درگیجگ ءِ جھد ءَ پاکستان ءِ تہ ءَ ھمک ھما دروازگ ءِ دپ ءَ شتگ اَنت کہ آیانی واک بیتگ، سئے ماھانی جھد ءَ پد گُڑ ءَ آ درگیجگ بیتگ اَت۔

رندتر ءَ آئی ءِ کھول ءَ سندھ ہائیکورٹ ءِ تہ ءَ ارزی ءِ داتگ اَت کہ آ 29 مارچ 2022 ءَ دلجمی ءَ گُوشدارگ ءِ ھاتر ءَ منگ بیتگ اَت۔

گوستگیں سال ءِ اپریل ءَ وھدے آئی ءِ بیگواھی ءِ ارزی ءَ گُوشدارگ بیت گُڑ ءَ مزن آمید گِس ءَ گُشگ بیت کہ آ سی ٹی ڈی ءَ چہ کراچی ءَ دزگیر کُتگ ءُ آ سینٹرل جیل کراچی ءَ دیم دیگ بیتگ۔

عبدالحفیظ ءِ ھلاپ ءَ سی ٹی ڈی تھانہ زرباری دمگ کراچی ءَ سندھ سلاہ قانود ءِ رد ءَ ارزی نبشتہ کنگ بیتگ اَت۔

آئی ءِ بگیر ءَ نبشتگیں ارزی ءِ رد ءَ آ 31مار چ 2022 ءَ شاہ مبارک شھید دگ ءَ دزگیر کنگ بیتگ ءُ آئی ءِ گور ءَ یک 30 بور ءِ پسٹلے ءُ تیر دراتکگ اَنت۔

وھدیکہ سی ٹی ڈی ءِ نیمگ ءَ سندھ ہائیکورٹ ءَ اے بابت ءَ 14 اپریل ءَ کہ ھما پسہ دیگ بیتگ، آئی ءِ رد ءَ بیگواھیں عبدالحفیظ دزگیر کنگ بیتگ ءُ آئی ءِ ھلاپ ءَ دو قانودانی رد ءَ ارزی نبشتہ کنگ بیتگ اَنت۔

البت آئی ءِ گوھار ءَ گُشتگ کہ آئی برات بے میار اِنت ءُ مارءَ امیت اِنت کہ چہ آمید گِساں مارءَ انساپ رس اِیت ءُ برات یل کنگ بیت اِنت ءُ ھمے وڑ بیت حفیظ دروگیں بھتاماں چہ یل کنگ بیتگ۔

گوست ءَ حفیظ زھری ءِ کھول ءِ سرءَ چی گوستگ؟

عبدالحفیظ زھری ءِ زورانسری بیگواھی ءُ لَٹ شاپی ءِ وئیل پہ اے کھول ءَ اولی وئیل نہ اِنت بلکینہ اے یک دھکءِ پیسرءَ چہ آ زورانسری بیگواھی، ژانگولیں جونانی رسگ ءُ نشانگ کنگ ءُ کُشگ ءِ وئیل آماچ بیتگ اَنت۔

حفیظ زھری ءِ زورانسری بیگواھی ءَ پیسر آئی سیاد، مردمی اگبالانی باسک راشد حسین بلوچ 26 دسمبر 2018 ءَ چہ متحدہ عرب امارات ءَ زورانسری بیگواہ کنگ بیتگ اَت۔ راشد حسین ءِ کھول ءِ گُشگ اِنت کہ آئی ءَ شش ماہ ءَ زورانسری بیگواھی ءِ آماچ کنگ ءَ پد متحدہ عرب امارات ءُ پاکستان ءِ واکداراں قانودی ردءَ آ پاکستان ءَ دیم داتگ اَت، کہ اِشی ءَ پد آ داں انگت بیگواہ اِنت۔

چریشی ءَ پد آئی ءِ زامات عبدالحمید زھری 10 اپریل 2021 ءَ چہ کراچی ءَ زورانسری بیگواہ کنگ بیتگ اَت کہ آ داں انگت دیما آرگ نہ بیتگ۔

وھدیکہ یک دھک ءِ پیسر چہ خضدار ءَ حفیظ زھری ءِ 14 سالیگیں برات مجید زھری 2010 ءَ زورانسری بیگواھی ءَ پد کُشگ بیتگ اَت ءُ آئی ءِ ژانگولیں جون دزکپتگ اَت۔ اے وئیل ءِ دو سال ءَ پد 2012 ءَ حفیظ زھری کے کماش (پِت)، نامداریں باپاری مردم حاجی رمضان زھری خضدار بازار ءَ تیرگواری کنگ ءُ کُشگ بیتگ اَت۔

ھمے دویں مردمانی کوش ءِ وئیلانی تہ ءَ سیاسی ءُ چاگردی گلانی رد ءَ پاکستانی پوج ءُ آئی ءِ اڈ داتگیں سلاہ بندیں ٹولی ھوار اَنت۔

عبدالحفیظ انی کجا اِنت ؟

عبدالحفیظ زھری کراچی ءَ ٹپیگیں جاوارانی تہ ءَ وتی گوھار ءِ لوگ ءَ بند اِنت، آئی ءِ گوھار فاطمہ بلوچ گُش ایت کہ چیریں ادارگ آئی ءِ برات ءَ پد ءَ بیگواہ کنگ ءِ کوشست کن اَنت۔

فاطمہ حمید ءِ رد ءَ گوستگیں روچاں سینٹرل جیل کراچی ءَ چہ یل بیگ ءَ پد اسپیتیں ویگو گاڑی ءَ سواریں چیریں ادارگانی سلاہ بندیں کارندھاں عبدالحفیظ ءَ زورانسری بیگواہ کنگ ءِ نیام ءَ گھگیری کنگ ءِ پد ءَ سک باز لٹ شاپی ءِ نشانگ کُتگ اے وھدءَ حفیظ زھری ءُ آئی کستریں برات سک باز ٹپیگ اَنت ءُ لاچاری ءِ سوب ءَ آیاں پہ اِلاج ءَ نادراھجاہ ءَ ھم برگ بیت نہ کنت۔

فاطمہ حمید ءِ رد ءَ گوستگیں روچاں وھدے کھول ءَ چہ چیریں ادارگانی کارندھاں چہ وتی براتاں رکینگ ءَ پد ٹپیگیں جاورانی تہ ءَ نادراھجاہ ءَ برگ ءِ جھد کُتگ گُڑ ءَ ھما وھدءَ ھم ھمے ویگو گاڑی ءُ سلاہ بندیں کارندہ آیانی رندگیری کنگ ءَ بیتگ اَنت، انی ھم عبدالحفیظ ءُ آئی ایندگہ سیاد لَٹ شاپی ءِ سوب ءَ سک ٹپیگ اَنت بلے تُرس ءُ بیم ءِ سوب ءَ کو آیاں پہ اِلاج ءَ ھچ کجا بُرت نہ کنیں۔

عبدالحفیظ زھری ءِ گوھار ءَ بلوچ سیاسی گل انسانی اگبالانی ادارگ ءُ وکلاء برادری ءَ چہ دزبندی کُتگ کہ آ اے جیڑہ ءِ سر ءَ آیانی توار جوڑ بہ بنت دانکہ آ آمید گِس ءَ بے میار نامینگ بیتگیں وتی برات ءِ زند ءَ رکینت کُت بہ کنت۔

فاطمہ ھمے واھگ دارگ ءَ اِنت کہ آمید گِس آئی ءَ پھازگی ءُ انساپ دئینت۔