TBP Balochi

چہ تربت ءَ پاکستانی پوج ءَ دست ءَ یک ورنایے آوار جنگ ءَ پد بیگواہ کنگ بیتگ-

ھالانی رِد ءَ پاکستانی پوج ءَ یک ورنایے آوار جنگ ءَ پد ناشناسیں جاھے ءَ برگ بیتگ، پوج ءِ دست ءَ آوار جنگ ءَ پد بیگواہ کنگ بیتگیں ورنائے پجّار زمان بلوچ نام ءَ چہ بیتگ-

بلوچ نیشنل موومنٹ ءِ انسانی ھکانی سیل پانک رِد ءَ ورناہ پاکستانی پوج ءُ چیریں ادارھانی کارندھاں گوستگیں روچ ءَ چہ تربت ءَ آوار جنگ ءَ پد گوں وت برتگ وھدے کہ زمان بلوچ اشی ءَ ساری نُھ جون 2020 ءَ زورانسری آوار جنی ءِ نشانگ کنگ بیتگ-

گل رِد ءَ 2020 ءَ شش ماہ ءَ زورانسری آوار جنی ءَ پد زمان بلوچ یل کنگ بیتگ وھدے کہ زمان بلوچ 2016 ءَ پاکستانی پوج ءِ دست ءَ وتی پت ءَ ھم زبھر بیتگ-

بلوچستان ءَ زورانسری آوار جنی ءِ دْرچ یکشلہ برجاہ ءَ اِنت- دی بلوچستان پوسٹ ءَ ھمے ماہ ءَ جتائیں دمگاں چہ پاکستانی پوج ءِ دست ءَ دو بلوچ زالبول چکاں ھوار چاردہ مردم زورانسری آوار جنی ءِ ھال سر بیتگ کہ آیانی تہ ءَ یک زالبولے ءُ دو چُک یل کنگ بیتگ اَنت-

زورانسری آوار جنی ءِ نشانگ بیتگیں رشیدہ زھری ءُ آئی ءِ لوگ واجہ محمد رحیم زھری انگت بیگواہ ءَ اِنت دیم ءَ آرگ نہ بیتگ اَنت کہ آیانی زورانسری آوار جنی ءِ بگیری ءَ مروچی بلوچستان ءِ شھر ھب چوکی ءَ زھرشانی کنگ بیت-

دِرَچک!

نبشتہ کار: ڈاکٹر شکیل بلوچ

دی بلوچستان پوسٹ

یک سر سَبز ءُ شادابیں دِرَچکے ءِ سر سبز بوَگ ءِ تہ ءَ مزنیں کِرد آئی ءِ روتگانی اِنت۔ اگاں یک درچکے ءِ روتگاں ولگوج بِہ کن ئے گُڑا میزان میزان ءَ آئی ءِ سَبزکیں تاک گِیمران بِہ اَنت ءُ گُڈسر ءَ دِرَچک ھم ھُشک بیت ءُ مِر اِیت۔

اگاں کسّے دِرَچک ءِ ٹالاں بِہ گُڈ اِیت بلے دِرچک ءِ روتگ کہ مُھکم اَنت گُڑا درچک الّم دوبر بَرّ ءُ بُور کنت ءُ رُدوم زُور اِیت۔

ھمے پیم ءَ یک جُنزے ءِ واست ءَ ، یاکہ یک پارٹی ءِ واست ءَ وَرنایانی وانندھیں گل (تنظیم) روتگ ءِ بستار ءَ اِنت۔

اگاں ورنایانی گل نِزور بِہ بیت گُڑا باندات ءِ روچ ءَ تئی راجی کجام ھم جُنزے بِہ بیت آ نِزور بوان بیت ءُ ھلاس بیت۔ گُڑ سر ءَ آئی ءِ سَر اَھتگیں زمہ واریں رھشون ھم دِلپروش بوان بَہ اَنت۔

اِے اھد ءِ تہ ءَ لھتیں انچیں سرشونی (پالیسی) اڑ کنگ بوتگ ءُ دِیناں داسِی لَھتیں انچیں کِرد نودربرانی نیام ءَ دیم دیگ بوتگ اَنت کہ آیانی سر ءَ گپ کنگ ھم نہ بیت۔ اِے جْوڑ کرتگیں کِرداں راج ءِ تہ ءَ وتی بْیسہ انچش مُھکم کرتگ کہ اِے کِرد ورنایاناں وت مَہ وت مْیڑینگ ءَ اَنت، آیانی تہ ءَ بْے بْیسَھی (بے یقینی ءُ غیر اعتمادی) ودّینگ ءَ اَنت۔ ھما وَرنا کہ آ پہ بزّگیں مھلوک ءَ کارے کنگ لْوٹ اَنت آیانی سر ءَ وڑ وڑیں بُھتام جنگ ءُ آیانی دامن ءَ پْولنگ کنگ ءَ اَنت، تاں کہ لس مھلوک ءِ بْیسہ ھلاس بِہ بیت، تاںکہ دیمتر ءَ آ وتی بے نپیں کاراں سرجم کرت بِہ کن اَنت ءُ بلوچ ورنایاناں دِلپروش بِہ کن اَنت۔

بَلے مَروچی وش بھتی ءِ گپ اْیش اِنت کہ اِے کردانی اِلزام ءُ بُھتام بے تاگت بوان اَنت، آ پَھک ءَ پَدّر ءُ زانگ اَنت، آ وتی بدیں واھگاں انچش پہ ارزانی ءَ سرجم کرت نہ کن اَنت۔

اِے گپ ءَ من مروچی سِتک گْوش اِیں کہ راستیں راہ ءِ دیم ءَ کجام ھم شکس پہ بدیں نیّت ءَ بیت گُڑا آ وتی گْوں بے نپیں واھگاں کدی سوبمَنْد بوت کرت نہ کنت۔ مروچی اھد سازیں سنگتانی سر ءُ الزام ءُ بُھتام کُل بے نپ ءُ بے تاگت بوان اَنت، اِے کارروان وتی ھساب ءَ دیم ءَ منزل جُنزان اِنت۔

اِِے اھد ءَ مئے سَر بُرزیں سنگتانی دیم ءِ مِکّ کرتگیں اڑ ءُ جنجالاں من گِندگ ءَ اوں، من ءَ وتی دوستیں ھمبل شائر امجد بیکس ءِ اِے شِئر یات آیگ ءَ اِنت-

“سر ءَ تاں پاد ءَ سُتکگاں من بور ءُ بَر بیتگاں”
“چے چے نہ گْوَشتگ اِش من بور ءُ بَر بیتگاں”

“تھارماھی ءَ سپر کناں پہ گلیں سباہ ءِ بامے ءَ “
“راہ ءِ تیماریں ڈنگراں اڑتگاں من بور ءُ بَر بیتگاں”

“چے چے نہ سگتگ پہ مرادانی مِنزل ءِ شوھازگ ءَ “
” تلاریں کوھاں سر کپتگاں من بور ءُ بر بیتگاں”

“چہ سرمستیں اِشک ءِ کِد ءَ سِستگاں ءُ رپتگاں”
” گوں ماہ ءُ استالاں سپر کناں من بور ءُ بر بیتگاں”

اَھد سازیں سنگتاں من کْوھیں سلام پْیش کن اِیں کہ آ کدی ھم وتی چہ مکسد ءَ پد نہ کِنز اِت اَنت وڑ وڑیں بُھتام ءُ اِلزام (سرٹیفیکٹ) اِش سَگّ اِت، مروچی آیانی کِرد آیاناں کسّے ءِ دیم ءَ سر جَھلی ءَ نیل اِیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

شال ءَ پاکستان سپُر لیگ ءِ ٹیمانی پیشدارگی گوازی

ٹی بی پی شونگال

پنچ فروری یک شمبے ءِ روچ ءَ ترندیں پھازگی ھسار ءِ تہ ءَ پاکستان سپر لیگ ءِ ٹیم کوئٹہ گلیڈیٹر ءُ پشاور زلمی ءِ نیام ءَ نواب اکبر خان بگٹی پَٹ ءَ شال ءَ پیشدارگی گوازی لیب کنگ بیتگ۔ پاکستان کرکٹ بورڈ ءِ گُشگ اِنت شال ءَ اَے پیشدارگی گوازی ءِ مول ءُ مراد بلوچستان ءِ تہ ءَ کرکٹ ءِ لئیب ءَ دوبر برجاہ کنگ اِنت۔

بلوچستان سرکار ءَ گوازی ءِ اڈ دئیگ ءِ ھاتر ءَ شال ءِ شھر ءَ ترندیں پھازگی بند ءُ بَست کُتگ بیتگ اِت اَنت ءُ پیشدارگی گوازی ءَ پہ دہ کروڑ کلدار ھرچ ھم کُتگ اَت۔ کرکٹ ءِ گوازی ءَ پانزدہ ھزار مردمانی بھر زیرگ اے گپ ءِ درشان اَت کہ مردم بلوچستان ءِ تہ ءَ لئیب ءُ گوازیانی برجاھی ءَ گندگ لوٹ اَنت۔

بلوچستان ءِ راجدوستیں تک اے سرپد بنت کہ کرکٹ ءِ پیشدارگی لئیب بلوچستان ءِ نگیگیں جاورانی سرگواز کنگ اِنت۔ گوازی ءَ چہ دو روچ پیسر سرجمیں شال ءِ شھر ترندیں پھازگی ھسار ءَ زیرگ بیتگ اَت، لوگ پہ لوگ پَٹگ بیتگ اَنت ءُ ھمے ھپتگ ءَ چہ گیشکوری ٹاون ءَ رحیم زھری آئی ءِ مات گوں چکاں زورانسری بیگواھی ءِ آماچ کنگ بیتگ اِت اَنت۔

راجدوستیں تکانی گُشگ اِنت کہ شال ءَ پیشدارگی کرکٹ گوازی جھان ءَ پیش دارگ ءِ ھاتر ءَ اِنت کہ بلوچستان ءَ ھچ پئیمیں بگاوت نیست اِنت، اود ءَ پر ایمنیں جاورانی تہ ءَ پاکستان سپر لیگ ءِ ٹیم کرکٹ ءِ گوازی اڈ دات کن اَنت بلے ھما روچ ءَ کہ گوازی برجاہ کنگ بیتگ اَت ھما روچ ءَ شال ءِ ریڈ زون ءَ تالباناں پاکستانی پوج ءِ یک بنجلے ءِ سر ءَ اُرش کُتگ اَت کہ اِشی ءِتہ ءَ بیست ءَ گیش مردم بیران ءُ ٹپی بیتگ اَت۔

بلوچستان ءِ پرگینگی ءُ پاکستان ءِ بنجاھی سرکار ءَ سنگینی ءَ گوں بلوچ جیڑہ ءِ سرپد بئیگ ءِ زلورت اِنت، پیشدارگی کرکٹ گوازیاں چہ بلوچستان ءِ جیڑہ گیوار نہ بنت، لئیبانی دیمروی دیگ ءَ کجام ھم سماداروکیں مردمے بَجِت کُت نہ کنت بلے پیشدارگی گوازیاں گوں بلوچستان جاور گھتر نہ بنت بلکیں ڈیھہ ءَ اَت جیڑہ ءَ گیوار ءِ ھاتر ءَ مھکمیں گامگیج زیر لوٹ اِیت۔ اے پیشدارگی گوازیانی سرءَ گیشتر جُست اے زمینی راستیانی سوب ءَ ھم چِست بنت کہ چُشیں پیشدارگی گوازی، چاردہ اگست ءُ بیست ءُ سئے مارچ ءِ پئیمیں روچاں پھازگی ادارگانی نیمگ ءَ مزنیں جشن اڈ دیگ ءِ مستریں سوب گوازی ءُ ساچ ءِ دیمروی دیگ ءَ گیشتر بلوچستان ءِ ھرابیں جاورانی چیر دیگ اِنت۔

گوستگیں سال ءَ زھرشانی ءِ وھد ءَ دزگیر بیتگیں شعیب میر بلوچزئی ءِ پاھو دیگ ءِ پژدرہ ءَ ایمنسٹی انٹرنیشنل ءَ وتی لیکہ درشان اتگ اَنت-

ایمنسٹی انٹرنیشنل ءِ گوشگ اِنت کہ شعیب میر بلوچزئی ایرانی واکداراں لٹ شاپ کتگ ءُ آئی ءَ را چہ ڈیھ ءِ ھلاپ ءَ ناشریانی منگی ءَ لاچاری کتگ –

آئی ءِ گوشگ اِنت شعیب سر ءَ جتگیں پاھو ءِ بھتام رد کنگ بہ بیت ءُ آئی ءِ زوراکیانی ھساب دیگ بہ بیت –

شعیب ھژدہ سالی ئیں یک ورنایے کہ زاھدان ءَ زھرشانی ءِ وھد ءَ دزگیر کنگ بیتگ ءُ چریشی ءَ پد آئی ءِ سر ءَ ایرانی واکداراں بھتام جنان ءَ آئی ءَ را پاھو ءِ دیگ ءِ ھکم منّگ نامہ شنگ کتگ –

زانگ بہ بیت روکپتی بلوچستان ءَ شعیب میر بلوچزئی ءَ ھوار منصور دھمردہ ءُ دگہ ورنایانی سر ءَ ھم ایرانی واکداراں پاھو ءِ ھکم داتگ اَنت-

بلوچستان ءِ جتائیں دمگ ھرنائی، واشک ، دکی ءُ شال ءَ دگ ءُ دگہ وئیلانی آسر ءَ شش مردم بیران ءُ یک لاشے دزکپتگ وھدے کہ شانزدہ مردم ٹپی بیتگ اَنت-

گیشیں ھالانی رِد ءَ بلوچستان ءِ دمگ واشک ءَ مساپر کوچ ءُ ٹرک میان ءَ ڈک ورگ ءِ آسر ءَ بس ءَ سوار چار مردم بیران پانزدہ ٹپی بیتگ اَنت- ٹپیانی تہ ءَ چار مردم ءِ جاور نگیگ اَنت-

دومی نیمگ ءَ ھرنائی ءِ تھسیل شاھرگ ءَ پھاٹک ءِ نزیک ءَ ٹوڈی گاڑی ءُ پرپٹ ءِ میان ءَ ڈک ورگ آسر ءَ یک پرپٹ سوارے ٹپی بیتگ-

ھمے وڑ دکی ءَ اشکر کھن ءَ کارکنوکیں ٹرالی ءِ ساد سدگ ءِ سبب ءَ چپی بوگ ءَ دو کھنجن اختر محمد شاہ ء شاہ نواز علیزئی جھمنند اوگانستان ءُ خواج محمد ء فیض محمد ٹک کاکڑ جھمنند قلعہ سیف اللہ بیران بیتگ اَنت- اشکر کھن ءَ چہ لاش درکتگ ءُ پہ گیشیں چار ءُ ٹپاس ءَ پد کھول ءِ دست ءَ داتگ-

انچش شال ءَ یک لوگے ءِ تہ ءَ ھپتاد سالی ئیں زالبولے ءِ ساداں گوں بستگیں لاشے دزکپتگ-

شال ریسکیو اِھوالکار رِد ءَ گوستگیں روچ ءَ میکانگی دگ ءَ کوچہ شیر محمد ءَ برجاھیں یک لوگے ءَ چہ یک پیرزالیں زالبولے ءِ ساداں گوں بستگیں لاشے دزکپتگ چریشی ءَ پد نادُراھجاہ ءَ برتگ کہ اود ءَ آئی ءِ پجّار ھپتاد سالی ئیں مختیار بیگم کہ یک گوستگیں ٹیچرے بیتگ-

انتزامیہ رِد ءَ اے لوگ ءَ آ وتی برات لوگ ءَ جھمنند بیتگ وئیل ءِ درگت ءَ پٹ ءُ پول پولیس کنگ ءَ اِنت-

مروچی آدینگ ءِ روچ ءَ بلوچستان ءِ بنجاھی شھر شال ءَ پریس کلب ءں دیم ءَ وائس فار بلوچ مسنگ پرسنز ءِ سرکماش نصراللہ بلوچ ءَ زورانسری آوار جنگ بوتگیں بلوچ زالبول بی بی رشیدہ ءُ آئی ءِ لوگواجہ محمد رحیم ءِ کھول ءِ ھمراھی ءَ گوں اھوالکاراں تران کنان ءَ گوشتگ کہ مروچی مئے گور ءَ آوار جنی ءِ آماچ بوتگیں ھما کھول نشتگ آھانی گوشگ انت کہ سَے فروری ءَ شال ءِ دمگ گیشکوری ٹاؤن، بشیر چار راہ ءَ پوج ءَ شپ ءِ ادار یک ءَ گِس ءِ سر ءَ بیڑ برتگ بی بی رشیدہ ءُ آئی ءِ لوگواجہ محمد رحیم ءُ دو زھگ ھمراھے تِری ءَ آوار جتگ ءُ بیگواہ کتگ انت –

آھاں گوشتگ کہ بی بی رشیدہ ءِ تری ءُ زھگ پنچ فروری ءَ چہ کمبرانی دگ ءَ یل دیگ بوتگ انت بلے بی بی رشیدہ ءُ آئی ءِ لوگواجہ محمد رحیم ھنگت گار انت –

کھول ءِ گوشگ انت کہ آھاں بی بی رشیدہ ءُ آئی ءِ لوگواجہ ءِ درگت ءَ ھچ وڈیں سرپدی دیگ بوگ ءَ نہ انت – رشیدہ ءِ یک سالی ءُ چار سالی دو چک ھست، ھردو چُک بید مات ءَ نہ بنت گریوگ ءَ انت ، ورگ ھم ورگ ءَ نہ انت چریشی ءِ سوب ءَ کھول سک باز ماژگی ازیت ءِ آماچ انت –

نصراللہ بلوچ ءَ گوشتگ کہ وھدیکہ اے کھول ءَ اتکگ ءُ مئے گور ءَ بی بی رشیدہ ءُ آئی ءِ لوگواجہ رحیم ءِ زورانسری آوار جنی ءِ رپورٹ نبشتہ کنائینتگ ءُ چہ گل ءَ دزبندی کُتگ کہ گل بی بی رشیدہ ءُ آئی ءِ لوگواجہ ءِ یل کنائینگے ھاتر ءَ وتی کرد ءَ پیلو بہ کنت، گڈا ما زورانسری آوار جنگ بوتگیں رشیدہ ءُ آئی ءِ لوگواجہ ءِ سرجمیں ھال وزیر داخلہ میر ضیاء لانگو ءَ داتگ انت ءُ ما گوں کھول ءِ ھمراھی ءَ سریاب ءِ ایس پی، ڈی ایس پی ءُ ایس ایچ او ءَ ھم گند ءُ نند کتگ، ارزی ءِ نبشتہ کنائینتگ آھاں زورانسری آوارجنی ءِ آماچیں کھول درشان ھم نبشتہ کتگ انت کہ آ رشیدہ ءُ آئی ءِ لوگواجہ ءِ یل کنگ ءَ وتی کرد ءَ پیلو کن انت – بلے تنی وھدی رشیدہ ءُ آئی ءِ لوگواجہ ءِ درگت ءَ ھچ وڈیں سرپدی دیگ بوگ ءَ نہ انت –

آئی ءَ گوشتگ کہ بلوچستان پیش ءَ زلم زوراکی، درکانودی گامگیج، انسانی ھکانی لگتمالی ءِ آماچ انت ءُ بلوچ زالبولانی زورانسری آوار جنی ءَ بلوچستان ءِ مردمانی دل ءِ تہ ءَ زھری گیش ودّیت، ھمے ھاتر ءَ سرکار، ملکی ادارہ ءُ سروک ءُ آمیدگس دلگوشی بدئینت بی بی رشیدہ ءُ آئی ءِ لوگواجہ رحیم بلوچ ءِ زورانسری آوار جنی ءِ بگیری ءَ گامگیج بہ زور انت ءُ بی بی رشیدہ ءُ آئی ءِ لوگواجہ ءِ یل کنگ ءَ وتی کرد ءَ پیلو بہ کن انت ءُ کھول ءُ ھاسکر رشیدہ ءِ زھگاں چہ اے ماژگی زوراکی ءَ بہ رکین انت –

آئی ءَ گوشتگ کہ ما لوٹ کنیں اگاں بلوچ زالبول ءُ آئی ءِ لوگواجہ ءِ سر ءَ الزام ءِ ھست گڈا زاھر کنگ بنت ءُ آمیدگس ءَ آرگ بہ بنت تانکہ درسیں کانودی کار سرجم کنگ بہ بنت –

آئی ءَ گوشتگ کہ بی بی رشیدہ ءُ آئی ءِ لوگواجہ یل نہ کنگے بگیری ءَ وائس فار بلوچ مسنگ پرسنز آمیدگس ءِ نیمگ ءَ رؤت ءُ سیاسی پاٹی ءُ نودربر گلانی ھمراھی ءَ ترندیں زھرشانی کنت –

بلوچ اسٹوڈنٹس ایکشن کمیٹی ءِ بنجاھی جارکش ءَ وتی شنگ کرتگیں درشان ءِ تہ ءَ گوشتگ کہ ماتی زبانانی میان استمانی روچ ءَ “زبان راجی پجار اِنت”ءِ نام ءَ تیوگیں ھنکیناں مراگش اڈ دیگ بیت اِنت –

جارکش ءَ گوشتگ کہ بیست ءُ یک فروری ءَ ماتی زبانانی میان استمانی روچ ءِ درگت ءَ بلوچستان ءِ جتائیں جتائیں دمگاں مراگشانی اڈ دیگ ءِ جہد کنگ بیت انت –

بنجاھی جارکش ءَ گوشتگ کہ بلوچ اسٹوڈنٹس ایکشن کمیٹی یک نودربر گلے ءِ بستارءَ مدام بلوچ ءِ ماتی زبانانی پھازگ ءُ رکینگ ءِ جھد ءَ کنگ ءَ اِنت ءُ ھمے درگت گل جتائیں سیاسی ءُ لبزانکی تاک کشگ ءَ اِنت- گل ءِ آفیشل زبان بلوچی ءُ براھوئی کنگ بوتگ اَنت ، پمیشکہ لبزانک، مراگش ، ھنکینی ءُ بنزھی دیواناں ھوار کسانیں ءُ مزنیں مراگش کُل ماتی زباناں کنگ بنت- گل ءِ ھنکین بلوچی ءُ براھوئی کلاس اڈ دیگ ءِ جھد کنگ ءَ اَنت ءُ گل ءِ کوشست اِنت کہ بلوچ مھلوک چہ درآمدی ءُ ڈنی زبانانی وامداری ءَ در بئیت ءُ وتی زباناں وت ماں وتی میان ءِ زبان جوڑ بکن اَنت-

آئی ءَ گوشتگ کہ درآمدانی زبان بلوچ راج ءِ پجار گار کن انت ءُ بلوچ ءِ دودماناں ھوار بلوچ ءِ تب ھم بدل بیت- بلوچ راجی پجار ءِ ھاتر ءَ ماتی زبانانی کرد پہ بلوچ ءَ استی ءُ نیستی ءِ ڈول ءَ اَنت، پمیشکہ اے جاورھالانی تہ ءَ وھدیکہ بلوچ ءِ زبانانی گار کنگ ءِ ھاتر ءَ پندل سازگ بوگ ءَ اَنت ءُ بلوچ راج ءِ بھر ءُ بانگ کنگ ءِ ھاتر ءَ زبانانی تضادے پیداک کنگ بوگ ءَ اِنت گُڑا بلوچ ورنا ءُ لس مھلوک ءِ کوپگ ءَ مزنیں ڈبہ وتی ماتی زبانانی پھازگ ءُ دیمروی اِنت- گوشگ بیت کہ زبان پاھازیں راج زندگیں راج زانگ بنت۔

بساک ءِ بنجاھی جارکش ءَ وتی درشان ءِ گڈسر ءَ گشتگ گوستگیں سالءِ پیم ھمے سال ماتی زبانانی میان استمانی روچ ءَ تیوگیں ھنکین مراگش اڈ دینت ءُ بلوچستان ءِ جتائیں دمگاں کسانیں ءُ مزنیں مراگش اڈ دیگ ءِ جھد کنگ بیت انت –

زندگی ءِ ابیریں همراه

نبشتہ کار: سیپ بلوچ

دی بلوچستان پوسٹ

تھاری ءَ مانشانتگ اَت، من مرمرانکیں چراگے روک کتگ اَت ءُ لوگانی پُشتی کُڈک ءَ تِکّہ اِت ءُ گوں گْوانکو ءَ دلگْوش اِت آں کہ پرپٹے ءِ توار بوت ، یکبرے من سک اَجکہ بیت آں کہ چوناها مئے میتگاں شپ ءِ تهاری ءَ پیسر پرپٹ سرکار ءَ بند کتگ اَت پمیشکا من هیران بیت آں باریں کے بیت ءُ چونینے بیت؟ منی گْوهارک نشتگ اَت اَچ منی پاد آیگ ءَ پیسر در اتک ءُ چار اِت ئِے۔

گْوهار ءَ ڈن ءَ سر کش اِت ءُ پد ءَ پسہ دات کہ نشهی یے، زاناں نشہ ئِے نیست۔ سر ئِے کش اتگ ءُ اتکگ۔ پد ءَ من جست کت تسلیمہ کے اِنت؟ گُڑا گْوشت ئِے ناکو اِنت۔

من جیڑگ ءَ لگ اِت آں کہ ناکو اوں نشھی یے بوتگ! من پاد اتک ءُ ڈن ءَ در اتک آں۔ ھو مرد وَ ناکو اِنت بلے کجام هالت ءَ اِنت ءُ وھدے کہ ناکو ءَ من ءَ دیست گُڑا من ءَ امبازاں زرت ئِے۔ ناکو سک بوه کنگ ءَ ات، مید ءِ یلو اِت اَنت ریش ءُ بروت چو گنوک ءَ اَت۔

گُڑا من دست گپت ءُ گِس ءَ بُرت نیادینت۔ من تسلیمہ ءَ را گْوشت برو چاه ءُ آپ بیار کہ ناکو سک دیر اِنت نہ دیستگ، مرچی دیوانے گران ئِے۔ ناکو ءَ پسہ دات من نندگی نہ آں، لالا من همے تئی بالاد دیست نوں من تئی دیم ءَ شرمندگی ءَ گوں نشت نہ کن آں بوت کنت تو گْوستگ بہ جیڑے بلے هچ جست نہ کن ئے من ءَ بس یک کارے بکن من ءَ زور بر نشه جاہ ءِ نیمگ ءَ منی جان من ءَ ورگ ءَ اِنت۔

منی چمانی ارس در اتک اَنت داں تسلمیہ آپ ءُ چاه دات ءُ من ناکو ءِ چارگ ءُ جیڑگ ءَ لگ اِت آں ، یار اے سنگت کہ ناکو ءِ نام دیگ بوت اهد ءِ روژنائیں بالادے اَت، هلکانی چراگانی بَتّی ءِ وٹ دائم ناکو ءِ کیسگ ءَ اَت گشت داں کوهنیں یاتے آتک کہ بی ایس او آزاد ءِ دوران ءَ کمبر چاکر ءِ همراهی ءَ برز بارگیں همبلے بلوچستان ءِ کُنڈ کنڈ ءَ ویل اَت ءُ زندگی ءُ راجمان ءِ تاک ءِ بهر کت۔ بلوچ ءِ هما امیت ءِ کندیل اَت کہ شهمگ ءَ ات، هلک ءُ میتگانی تہ ءَ همے کہ تلو ءَ اتک ءُ گپ ءِ کت مردم زگریں دانکانی شیدا اِت انت۔

دانکہ ناکو ءَ منی پاد ءَ دست ایر کت، سگریٹ ئِے گون ۔ من گْوشت “هو ناکو جان سگریٹ ءِ ٹالے ترا دیاں، کربان آں بلے هالاں کن تو اے هالت ءَ یار سک درد بوْگ ءَ اِنت؟”-

گوں دردیگیں دلے ءَ دْرائینت ئِے ءُ ارس ءِ شلیپ وران بیت اَنت “من چار سال زندان ءَ زهر ماریچگ بوتگ آں وهدے من نشہ ءِ درپ ءَ تنیگ بیت آں گڑا سما کت من شال ءِ پشتی نیمگ ءِ کورے ءِ تہ ءَ بے سمائی وتی جان ءِ پوست ءَ لگوشگ ءَ اِت آں داں شش ماه ءَ رند سر میتگ ءَ کپت ءُ اے زهر منی جان ءَ پیل اِت ءُ من کرسٹل ءِ همراهی ءَ بہ گیر سما ءَ نیا آں”-

دیم گْوشان بوت “لالا گپے زان ئے یار مرچاں منی گس ویران اِنت مدتے بیت کمبر ءَ پہ زهیر کنت ءُ شئے ءُ باهڑ ءَ مرچاں کس منی شیر چاهانی ورگ ءَ نئیت برے برے بیگهانی وهد بیت من چیر چیروکائی تهاروکی ءَ نِند آں بلکیں ملنگ جان پہ سر کپتی کیت بلے سما کن آں هلک ءِ زهک ڈوک جنان ءُ منی سر ءَ پروش اَنت کہ من نشھی یے آں ءُ هلک ءِ توشگاں دز آں، من لالا نشهی یے آں، بس منی زندگی ءِ ابیریں پند آسری ءَ اَت کہ من نشه ءِ آس ءَ دور دیگ بوت آں ناں جند ءِ سما ناں کہ ڈیھ ءِ ءُ ناں نوری ءِ بس نشہ ءِ مهری ءَ سوار آن ءُ سهڑگ ءَ آں”-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔