TBP Balochi

بلوچستان ءِ زرباری دمگ گوادر ءِ تیابی ھدءَ گیر قانودی ٹرالنگ ءَ دزگھٹیں ٹرالرانی دارگ ءَ رؤکیں فشریز واک ءِ گردوکیں ٹولی بندیگ کُتگ۔

اھوالانی ردءَ عبدالمطلب زامرانی ءِ مستری ءَ فشریز ءِ گردوگیں ٹولی ءَ 9فروری ءَ گیر قانودی ٹرالرانی دارگ ءِ کوشست کُتگ بلے کارندھانی کساس کم بئیگ ءِ ءُ ٹرالرانی کساس گیشتر بئیگ ءِ سوب ءَ تاگت وریں ٹرالر مافیاء ءَ آ بندیگ کُتگ اَنت۔

وئیل ءَ پد میرین پھازگی ایجنسی ءَ ٹاہ داتگ اَت کہ آیاں ٹرالر گپتگ اَنت ءُ عبدالمطلب پہ سلامتی یل کنائنتگ۔

بلے فشریز واک ءُ آئی کھول ءِ ردءَ گوں آئی ءَ تھنا یک ویڈیو کال ءِ ھداں داں اھوال کنائنگ بیتگ۔

فشریز کارندھانی بندیگ کنگ ءِ وئیل ءِ پدءَ مھلوک ءِ تھءَ گم ءُ زھر گندگ ءَ کئیت۔ ھندی ماہیگرانی ردءَ ٹرالر مافیا ءِ نیمگ ءَ بلوچ تیاب ءَ انگر کنگ نوکیں گپ ءِ نہ اِنت ھمیشی پدءَ حق دو تحریک ءِ باسک داں انگت زندانانی اَنت۔ فشریز واک کہ وت یک سرکاری ادارگ اِنت آئی یک اپسر یے داں انگت بیگواھی ءُ پدءَ کھول ءَ سر نہ کنگ ءُ کھول ءُ واک ءَ داں آئی گوم ءَ اھوال کنگ ءَ نئیلگ وت اے گپ ءِ منانک ءَ دنت کہ ٹرالرز مافیاء پرگینگی سرکار، ءُ درستیں ادارگاں چہ گیشتر تاگت ور اَنت ءُ آیانی دیما بنجاھی پھازگی ادارگ ھم بے وس گندگ ءَ بنت۔

کھول ءِ ردءَ میرین پھازگی ایجنسی ءَ مروچی اگں آ کھول ءِ دستءَ نہ دات گُڑ ءِ اِشی بزانت ھمے بیت کہ عبدالمطلب بلوچ ٹرالرانی دارگ ءِ جرم ءَ وت سرکاری ادارگاں آ بندیگ کُتگ ءُ کھول لاچار بیت کہ آ زھرشانی ءِ نیمگ ءَ بروت۔

کمبر جان، تو اِشتاپ کت

نبشتہ کار : رھبر بلوچ

دی بلوچستان پوسٹ

ما کسان اَت اِنت ءُ نوکی بروت شنز اِتگ اَت اَنت ءُ وانگجاہ ءَ وانگ ءَ ات اِیں گُڑا ما مُدام وانگجاہ ءَ کہ واتر گِس ءَ روگ ءَ ات اِیں ما میتگ ءَ بچک دیستگ ات اَنت کہ آیان ءَ موٹل گون اَت اَنت ءُ مئے وانگجاہ ءِ دیم ءَ گْوستگ اَت اَنت۔

وھد مدان مدان ءَ گْوزان بوت ھر مُدام ما ھمے بچک دیستگ اَت اَنت ءُ یک روچے من سنگتے ءَ را جُست کرت کہ پُل اے کَے اَنت کہ مدام اے وھد ءَ چہ اِد ءَ گْوز اَنت۔

سنگت ءَ من ءَ پسّو دات کہ من دْراھیناں نہ زان آں، بس یک ئے زان آں یھیا اِنت۔

آ وھد ءَ ما یھیا پنام کمبر دیستگ اَت گُڑا آ مُدام گوں بچکاں ھوار اَت ءُ موٹلانی دیم اِش چست کُرتگ اَت اَنت ءُ من ھمے مار اِتگ اَت کہ اے مپت ءَ وتی وھد ءَ زوال کنگ ءَ اَنت ءُ یلہ چر اَنت۔

بلے آ روچی کہ من کمبر ءَ اکس دیست ءُ پجّاہ آؤرت کہ اے ھما یھیا اِیں کہ مُدام گوں بچکاں یلہ بُوتگ برے اے میتگ ءُ برے آ میتگ گُڑا من اجکہ بُوت آں ءُ مزنیں پکرے ءَ کپت آں کہ اے چون کوہ ءَ شُتگ؟

منی گْور ءَ کمبر جان لبز نیست ءُ وھد ھم ھمراھداری نہ کنگ ءَ اِنت کہ ساھت شپ ءِ دو اِنت تئی اے بُود ءُ ھاٹیگ ءَ من سلام کن آں، کمبر جان تو اِشتاپ کُرت ترا زُوت روگی نہ اَت بھشت ءَ بات ئے پُل!-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نمدی پہ نہ بوتگیں مھر ءِ نام ءَ

نبشتہ کار: م بلوچ

دی بلوچستان پوسٹ

دْروت ءُ دْراہ بات ئے

بگند ئے تو اے گپ ءَ اجب ءُ ھیران بِہ بَہ ئے کہ سائنس ءُ ٹیکنالوجی ءِ وَھد ءَ نمدی نبشتہ کنگ بوگ ءَ اِنت بلے نمدی لبزانک ءِ یک تھرے ءُ آ لِزت نمدی نبشتہ کنگ ءِ تہ ءَ ھست اِنت آ لزت کلوہ (ایس ایم ایس) ءِ تہ ءَ نیست اِنت۔ باز جاہ ءَ ھیال ءُ مارشت اَنچوش گُشگ نہ بنت بلکیں لبزانکی دْروشم ءَ درشان کنگ بنت، نمدی چہ ھما لبزانکی دْروشم ءَ یکے ءُ من وتی مارشتاں نمدی ءِ دْروشم ءَ گوں تو درشان کنگ لوٹ آں-

 “نہ بوتگیں مھر” نمدی ءِ سرھال ھمے واست ءَ ایر کُتگ کہ اے مھر یک نیام ءَ اِنت بزانکہ ھمے مھر ءَ ایوک ءَ منی اندر ءَ زرمبش چست کُتگ ءُ اے گپ ءَ تو ھچ وڑ ءَ میاریگ نہ اِنت۔

تو زیبا ئے، تو چوں درپشناکیں استالے ءِ پیم ءَ زبیا ئے۔ پہ من زبیائی آ نہ اِنت چوشکہ لس مھلوک زاھری زبیائی ءَ سرپد بنت بزانکہ اسپیت رنگ ءُ رنگ ءُ دانگ ءِ شر بوگ اِنت اے دُرس بے متلب چیاکہ زبیائی اندری چیز اِنت ءُ زبیائی ءِ مانا ءُ متلب ھر کس ءِ وتئیگ اِنت۔ من ترا ھمے گُشگ لوٹ آں منی زیبائی ءِ مانا ءُ متلب تو ئے ءُ منی زیبائی ءِ لوٹ چہ ترا سرجم اِنت چیاکہ پہ من تو باتن(eternal) ءُ زاھر ءَ زیبا ئے۔

” You don’t fall in love. You rise in love. The more you love, the more you feel that you are going higher in your consciousness.”

اے گُشتن من ءَ سک تاھیر دنت انچشو گُش ئے اے دانکے پہ من گُشگ بوتگ اَنت۔ بگند ئے تو اے دُرسیں گپاں ھچ سما مہ دار ئے ءُ دُرسیں گپاں سرگوست بکن ئے بلے انگت من ترا اے گُشگ لوٹ آں کہ چہ منی دپ ءَ ھمک گُشتگیں دانک ءُ ھمک نبشتہ کُتگیں لبز نہ ایوک ءَ دانک اَنت نئیکہ لبزاں بلکیں منی دل ءِ مارشت اَنت۔ بوت کنت منی مارشت پہ تو ھچ ھم مہ بنت بلے اے گپ ءَ من ھچ وڑ ءَ دل ءَ نیار آں۔

” تو کہ جیڑ ئے منی باتن ءِ مردم ءِ تب زہیروک جنت”

“تو اے گپ ءَ اگاں دوست میار ئے دل ءَ من نیاراں دل ءَ”

چیاکہ پہ من مھر آ نہ اِنت کہ دیمی مردم ءِ مھر ءِ وازمندگ بہ بیت ءُ نئیکہ من اے گپ ءَ ستک ءَ گُشت کناں تو پہ من چی مار اِت۔ من بس اے گپ ءَ گوں ستک ءَ گُش آں کہ من پہ تو چی مار آں۔ مھر انسان ءِ ایوکیں مارشت(Individual feeling) اِنت ءُ ایشی ءِ واست ءَ دیمی مردم ءِ رز ءَ گرگ ءِ ھچ وڑ ءَ درکار نہ اِنت۔

اگاں من وتی مارشتاں تئی کر ءَ درشان کنگ ءَ آں کہ منی اندر ءِ انسان پہ تو مھر مار ایت گڑا ایشی واست ءَ ترا ھچ وڑ ءَ جیڑگی نہ اِنت ءُ نئیکہ اے گپ ءِ واست ءَ گم کنگی اِنت چیاکہ تئی واست ءَ منی دل ءَ مھر بوگ ایوک ءَ منی جیڑہ ءَ اِنت ۔ اے گپ من ھم سرپد آں تو اے گپاں ہچ وڑ ءَ سما نہ دار ئے ءُ ترا سما دارگ ھم نہ لوٹ ایت۔

گُڈی ءَ من ھمے گُشگ لوٹ آں کہ من زان آں کہ تو نمدی ءِ پسو ءَ یک کسانیں ایموجی (emoji) ءَ دے ئے ءُ من پد ءَ ترا ھمے پسو ءَ دے آں کہ well responsed.

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ترکی ءُ شام ءَ کھر آماچیں زمین چنڈ ءَ داں انگت ءَ بیران بیتگیں مردمانی کچ 28 ھزار ءَ سر بیتگ اَنت ءُ وھد ءِ گوزگ ءَ دیولانی چیر ءَ چیر تر اتگیں مردمانی زندگ بؤگ ءِ اُمیت ھم ھلاس بوان اَنت-

میان اُستمان ءِ کمکاری ءِ ایجنسی ءِ سروک مارٹن گریفتھ ءَ گوشتگ کہ زمین چنڈ ءَ بیران بیتگیں مردمانی کساس پنجاہ ھزار ءَ گوست کنت-

ھال سرکنوکیں ایجنسیانی نمائندگ اسرمندیں مردمانی زدگ ءُ بچ اتگیں مردمانی کسھاں سرجمیں جھان ءَ سر کنگ ءَ اَنت کہ آیانی توک ءَ مردمانی زندمان ءِ اسرمندیں درد ھوار اَنت-

عرب نیوز ءِ رد ءَ گوستگیں دو شمبے ءِ سھب ءَ وھدیکہ ترکی ءِ زرباری رودراتک ءَ زمین چنڈ ءِ اولی لرزگ اتکگ گڑا دمگی مردم بارس یاپر ءِ لوگاں دراتکگ اَنت – وھدیکہ آ دوبر وتی بلک ءُ پیروکانی چارگ ءَ شتگ اَنت گڑا اود ءَ ھشکین کپتگیں دیوال بیتگ اَنت –

بارس یاپر ءَ ھاتے اُستان ءِ ھند سمندگ ءَ وتی گس ءِ نزیک ءَ عرب نیوز ءَ گوں گپ کنان ءَ گوشتگ ات کی ما سجوئیں شپ ءَ ودار کتگ ءُ بازین رھوتی کتگ انت بلے کس کمک ءَ دیم ءَ نہ کنز اتگ-

کساس چل ادار ءَ پد وت زلوری ساز ءُ سامان زرتگ ءُ ماڑی ءِ یک بھرے لڑوینتگ –

زمین چنڈ ءَ وھد ءِ شوھاز ءَ ریسکیو ءِ جھدانی واستا باز ارزشت دار ایت بلے اسرمندیں دمگاں کھر آماچیں زمین چنڈ ءِ سبب ءَ دگ پرشت ءُ پروش ءِ آماچ بیتگ اَنت چریشی ءِ سبب ءَ کار کنوکاں آیگ ءِ مشکلانی دیمپانی کنگ کپت-

کساس شست ادار ءَ پد لھتے چیزانی شوھاز بندات بیتگ اَنت ءُ ایشانی چیراں چیر تر اتگیں مردم کساس ءَ کشگ بیتگ اَنت-

بارس یاپر ءَ گوشتگ کہ من وتی بلک ءُ پیروکانی کشگ ءَ پد آیانی واستا ایمبولینس یا جنازہ ءِ گاڑی دز نہ کپتگ اَنت-

ما آ داں مردگ ھانہ ءَ وتی ٹرنک ءِ سر ءَ برتگ اَنت پد ءَ ما دومی روچ ءَ سدانی کچ ءَ مھلوک ءِ ھمراھی ءَ آیانی لاشانی شوھاز ءَ درکپتگ اِنت –

بارس ءَ گوشتگ کہ لھتے روچانی توک ءَ دزانی دزی گیش بیتگ اَنت سیکورٹی ءِ سبب ءَ لوپر ءُ لپنگائیں مردم نپ چست کنگ ءَ اَنت – سرکاری نیوز ایجنسی انادولو ءَ گوشتگ ئے ترک ءِ واکداراں دزی کنگ ءِ بھتام ءَ چل ءُ ھشت مردم دزگیر کتگ اَنت-

روکپتی بلوچستان ءِ بنجاھی شھر زاھدان ءَ ایرانی لشکر ءِ دست ءَ بندیگیں سَے کس زمانت ءِ سر ءَ یل کنگ بیتگ اَنت-

سر بیتگیں اھوالانی رد ءَ گوستگیں ماہ ءِ بندات ءَ زاھدان ءَ ایرانی لشکر ءِ دست ءَ دزگیر بیتگیں حنظلہ جمالزئی، الیاس ریگی پور کریمی ءُ عارف گوستگیں روچ ءَ زمانت ءِ سر ءَ یل کنگ بیتگ ءُ وتی لوگاں سر بیتگ اَنت-

یل بیتگیں مردمانی درگت ءَ اے سرپدی نہ بیتگ کہ آ چے پئیم زمانت ءِ سر ءَ بیتگ اَنت –

زانگ بہ بیت روکپتی بلوچستان ءَ زھرشانی وھداں بازین مردمے دزگیر کنگ ءُ بندیگ کنگ بیتگ اَنت ایشانی توک ءَ لھتے یل بیتگ اَنت ءُ بازین کساسے ءَ داں انگت ءَ بیگواہ اَنت-

دومی نیمگ ءَ ایمنسٹی انٹرنیشنل ایران ءَ ھم گوستگیں روچاں منصور دھمردہ، شعیب دھمردہ ءُ کامبیز بلوچ ءِ یل کنگ ءِ لوٹ کتگ اَنت ایشانی سر ءَ گوستگین ماھاں ایران ءِ آمیدگس ءِ پاھو ءِ ھکم داتگ بیتگ اَنت-

بلوچ راج ءِ بامردی

نبشتہ کار: شازیہ بلوچ

دی بلوچستان پوسٹ

چوناھا بلوچ راج یک آزاتیں کومے، آ وت یک سرڈگار ءِ واھند اِنت، آئی ءَ یک جُتائیں زبانے ھم ھست ءُ چہ ایشی ءَ ابید آئی ءَ دود ءُ ربیدگے ھم ھست بلوچ ءِ زِر مال ءُ مڈی بلوچستان ءِ تہ ءَ ھرچ ھُدائی داد ءُ گواچن بزانکہ ھرچ مڈی یے سُھر ءُ تلاہ گِرانبھائیں چیز اے دراہ بلوچانی اَنت پمیشکا بلوچ کوم اے زورگریں لشکر ءِ گون ءَ ھچ سیادی نہ کن اَنت۔ البت اے زور گیرگ بیتگ اَنت، کبزہ گیر کنگ بوتگ اَنت ءُ بدواھیں لشکر ءَ چہ بلوچ راج ءَ دراھیں بلوچ ءِ سرڈگار لوٹ اِتگ۔ چوناھا بلوچستان ءِ سیمسر چہ پاکستان ءَ مزن اِنت، آ وھدی پاکستان نہ بوتگ بلے بلوچستان مُدام بیتگ، نیمروز ءُ دزاپ، زابُل تاں بندرآباس ءَ بِہ گِر داں ھب، چہ ڈیرہ گازی ھان تاں نوشکی نوشکی ءُ چاگی بزاں اے راج بلاھیں سرڈگارے ءِ واھند اَنت۔

گِند ئے بلوچستان ھُشکنات(برِصغیر) ھند ءِ بھرے وَ نہ بوتگ کہ بلوچستان پاکستان ءِ ولایت(صوبہ) بہ بیت۔ راستی وَ ایش اِنت کہ بلوچستان تا 27 مارچ 1948 ءَ یک آزاتیں مُلکے اَت مئے بلوچ ءَ گوں پنجاپی ءَ ءُ ہِندوستان ءَ ھچ وڑیں سیادی یے نہ بیتگ ءُ پاکستان چہ ھُشکنات ھِند ءِ بھر ءُ بانگ ءَ اڈ دیگ بوتگ البت بلوچستان سک کوھن اِنت، چہ پاکستان ءَ پیسر اِنت گڑا پنجاپی مئے گون ءَ ھچ سیادی نہ کنت اے ھما جنگ اِنت مرچیگیں بلوچاں گوں جْوان مردی ءَ داشتگ ءُ جنزان اَنت گوں زور گیریں لشکر ءَ گوں جنگ کنگ ءَ اَنت-

پہ ماتیں سرڈگار ءِ رکینگ ءِ ھاتر ءَ پہ زبان ءِ پھریزگ ءَ ھچ وڑیں کربانی دیگ ءَ چَک ءُ پد نہ بنت چی ءَ کہ بلوچستان بلوچانی اِنت چریشی ءَ بلوچ راج ھچبر وتی ایردستی ءَ نہ من اِیت ءُ ھچبر پنجاپی ءِ گلام نہ بیت۔ بلوچ یک اِزت ھیال ءُ گیرت مندیں کومے ءُ بلوچے کجام کجام گپ ءُ تاریک بولچ راجدپتر ءَ ایر نہ اَنت۔ اگاں ما بلوچ ءِ جنگ ءِ بارو ءَ گپ بہ کن ایں گُڑا سک کوھن اِنت ھمے وڑ ءَ وھدے کہ پاکستان جوڑ بیت گڑا ھمے دوران ءَ بلوچ ءِ سر ءَ وتی زُلم ءُ زوراکی پاکستان ءَ بلوچ راج ءِ سر ءَ بِندات کت اَن گڑا ھما وھد ءَ میر نواب ھان گوں انگریز ءَ جنگ کُت، میر نواب ھان ءَ کلات ءِ سر ءَ انگریزاں 5 مئی ءَ 1839 ءَ اُرش کت ءُ کلات چپ ءُ چاگر کت میراب ھان ءَ ھال دیگ بوت کہ انگریز گوں ٹوپ ءُ تپنگ ءُ پوجاں پہ جنگ ءَ تیار اَنت گڑا انگریز کماندار ءَ کلوہ ءُ کاسد کُت ءُ گْوشت “میر نواب ھان تو وت ءَ انگریز ءِ دست ءَ بہ دئے ءُ لگور بہ بو”-

گڑا نواب ھان ءَ رَا گوشگ بوت کہ آئی ءَ در چہ در بلوچانی ھچ وڑیں کمک ءِ اُمیت نیست چی ءَ کہ انگریزاں راہ بستگ اَت ءُ بلوچ سردار میر نواب ھان ءِ کمک ءَ سر بوت نہ کن اَنت، ھمے وڑ ءَ انگریز ءَ وس کت کہ میر نواب ھان لگور بہ بیت ءُ وتی سلاھاں چَگل بہ دنت گڑا میر نواب ھان ءَ رَا درائینت “من زان آں انگریز تاکتوار اِنت ءُ من نزوراں ءُ من انگریز ءِ برابری ءَ ھم کت نہ کن آں بلکیں آ بمب ءُ ٹوپ انگریز کر ءَ ھست اَنت منی کر ءَ نیست اَنت منی گور ءَ چوشیں لشکرے ھم نیست بلے من ءَ بلوچاں وتی میر کتگ، مستر کُتگ من آیانی ڈیھ ءَ بہ پھریز آں آیانی اِزت ننگ ءُ ناموس نام ءَ بہ پھریز آں مروچی من بلوچاں ھچ دات نہ کن آں بلے من چوں وتی پیرینانی کبراں چیدگ بہ کن آں مرتگیناں کم شرپ ءُ زندگیناں کم نام بہ کن آں راجدپتر ءَ وت ءَ را پولنگ ءُ بلوچانی سر ءَ جھل بہ کن آں ءُ انگریز ءِ دیم ءَ وت ءَ لگور بہ کن آں-

وتی مکھیں ڈیھ ءَ پہ زند دِگرانی دست ءَ بہ دے آں اے چوں بوت کنت من ءَ ھچ نیست بلے من ءَ ساھے مان اِنت کہ منی بدن ءَ روت ءُ کیت منی متاہ پہ بلوچاں ءُ بلوچانی ڈیھ ءَ اے وھد ءَ منی ساہ اِنت، ارواہ اِنت، منی زندمانی اِنت من دگہ ھچ کت نہ کن آں بلے من پہ بلوچستان ءُ بلوچاں وتی ساہ ءَ کربان کت کن آں۔

اگاں اِنچو کُت مہ کن آں گڑا من چونیں میر ءُ چونین ھانے آں نی مروچی جنگ ءِ روچ اِنت مرگ ءِ روچ اِنت لگوری ءُ نامردی ءِ روچ نہ اِنت”-

ھان گوں لھتے ھمراھاں گوں انگریز ءَ جنگ کنت دراہ کُشگ ءُ ٹپی بنت ناں کسے انگریزے دیم تچ ایت ءُ ناں کہ کسے لگور بیت انگریز کلات ءِ میری ءَ گِپت ءُ بلوچاں ایردست کنت، ھان شھید بیت اے ھَما بااِزّتیں ءُ مڑاہ داریں شھیدی کہ تاں بلوچ ھست اِنت آئی ءِ اِزّت ءُ شان برجاہ اِنت انچوشکہ شھید نواب اکبر ھان بُگٹی، راجی بامرد ھیربکش مری، شھید جنرل اسلم بلوچ، شھید بالاچ مری، شھید بانُک کریمہ بلوچ ءُ دگہ بازیں انچیں دلیریں بلوچے کہ پہ شان ءُ مڑاہ وتی سر اش ندر کتگ اَنت بلے اے سرباز پہ وتن ءِ آجوئی ءَ سرجھل ءُ پدکنز نہ بیتگ اَنت ھما وھد ءَ گوں انگریز ءَ جنگ کُت ءُ در ءَ اش کت اَنت گڑا انچوشکہ دگہ یک زورگیرے آتک ءُ بلوچ ئِے زلیل کُت اَنت کہ ھمے نوکیں ازاب پاکستان اِنت گڑا اد ءَ ھم بازیں بلوچے شھید بیت جنگ اش دات ءُ انگت دیگ ءَ اَنت بلے ھما اھد ءَ کہ بلوچاں گوں انگریز ءُ پاکستان ءَ جنگ کت گڑا آیانی دپ ءِ گپ ھمیش اَت کہ ما ھچبر تئی ایردستی ءُ گلامی ءَ نہ منّ ایں، دراہ شت اَنت، سر اِش ندر کُت بلے آیانی داتگیں دیمونی، کرد، گیرت ءُ دلیری تاں مرچی راجدپتر ءَ اِیر اِنت، نمیران ءُ ابدمان اَنت-

گڑا مرچی ھما جنگ اِنت کہ انگت جنزان اِنت ءُ بلوچ سرمچاراں بامردی ءَ وتی کوپگ ءَ کتگ ءُ اے جنگ ءَ دیم ءَ برگ ءَ اَنت وتی جُھد ءُ پِگر مھکم ءَ داشتگ-

گُڈسر ءَ ھمے گوْشگ لوٹ آں کہ شالا منی تمردیں سرمچاریں برات سوبین بات اَنت ءُ جنزان بات اَنت چہ بدوھیں دژمن ءِ ھرچ وڑیں زوراں ھُدا بہ رکینات –

شالا بلوچستان آجو باتءُ بلوچ وت ماں وت برات بہ بات ءُ یکمشت بہ بات اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔