TBP Balochi

مروچی آدینگ ءِ روچ ءَ سندھ ءِ مزن شھر کراچی پریس کلب ءَ بیگواھیں عبدالحمید زھری ءِ لوگبانک ءُ عبدالحفیظ زھری ءِ گھار فاطمہ بلوچ ءَ وائس فار بلوچ مسنگ پرسنز ءِ رھشون ماما قدیر بلوچ، سمی دین بلوچ ءُ بلوچ یکجھتی کمیٹی ءِ وھاب بلوچ ءِ ھمراھی ءَ گوں اھوالکاراں تران کنان ءَ گوشتگ کہ منی برات عبدالحفیظ زھری کہ گوستگیں سالے بیست ءُ ھپت جنوری ءَ چہ متحدہ عرب امارات ءَ زورانسری آوار جنگ ءُ بیگواہ کنگ بوتگ کہ پدا رند ءَ آ کراچی ءَ زاھر کنگ بوتگ ءُ آئی ءِ سر ءَ وتگڑیں الزام جنگ ءُ بندیگ کنگ بوتگ، کہ ھما انت آئی ءِ سر ءَ جنگ بوتگیں دروگیں کیسانی پیشی ءَ جنگ ءَ بوتگ –

آھانی گوشگ ات کہ سَے فروری ءَ وھدیکہ آمیدگس ءَ آئی ءِ یل دیگ ءِ جار جتگ گڑا ما آئی ءِ دست گرگ ءَ کراچی سنٹرل جیل ءَ شُتگیں ءُ ھمودا جیل ءِ درآیگ ءَ ھوار مئے سر ءَ ویگو سواریں چیریں ادارھانی سلاہ بندیں کارمنداں اُرش کُتگ –

فاطمہ بلوچ ءَ گوشتگ کہ آ روچ ءَ سلاہ بندیں مردماں دوبر منی برات حفیظ زھری ءِ آوار جنگ یا آوار جنگ ءِ بے سوبی ءَ آئی کُشگ ءَ اُرشے کتگ ، اے اُرش ءَ منی برات عبدالحفیظ ءَ ھوار منی گِس ءِ مردم باز زدگ بوتگ انت، اے وئیل ءِ دُرسیں منانک ریکارڈ ءَ ایراَنت ءُ رسانکدر ءَ ھم شنگ بیتگ اَنت کہ گندگ بیت اِنت کراچی ءِ وڑیں جاگھے ءَ منی برات ءِ سر ءَ چوں اُرش کنگ بوتگ-

آئی ءَ گوشتگ کہ مئے مرچیگیں پریس کانپرنس ءِ سَے لوٹ اَنت کہ ما چہ بُنجاھی واکدار ءُ سندھ سرکار ءَ لوٹ کن ایں کہ عبدالحفیظ زھری پُرایمنیں شھری ءُ چہ آمیدگس ءَ یل کنگ بوتگیں مردمے ءِ بستار ءَ پھریزگ بہ بیت ءُ مارا باور کنائینگ بہ بیت کہ آئی ءِ سر ءَ چوشیں اُرش نہ بیت – اے وئیل ءَ ھواریں دُرسیں کارِست کانود ءِ رد ءَ دیم ءَ آرگ ءُ سزا دیگ بہ بنت، چہ سی ٹی ڈی ءَ جُست کنگ بہ بیت کہ اے وئیل ءَ پیش مُدام یکشل ءَ مارا دلسیاہ کنگ ءَ اِنت، انچوش کہ مئے گِس ءِ سر ءَ بیڑ برگ بوتگ ءُ منی لوگواجہ عبدالحمید زھری درکانودی آوار جنگ ءُ بیگواہ کنگ بوتگ –

آئی ءَ اے ھم لوٹ کتگ کہ منی لوگواجہ ءُ گِس ءِ یکیں کمائینوک عبدالحمید زھری زوتاں زوت دیما آرگ بہ بیت ءُ آ یل کنگ بہ بیت –

چہ کراچی ءَ نزیکیں بلوچستان ءِ باپاری شھر ھب ءَ ھستیں پنجاہ نپادانی سرکاری ٹیچنگ نادراھجاہ جام گلام قادر سیول دری چیزانی زورگ ءَ لاچار، درماناں ھوار سرجری ءِ ھاتر ءَ کارمرز بؤوکیں ساز ءُ سامان ھلاس بوتگ انت –

ھب ءُ کش ءُ گوری دمگانی گریب ءُ بزگریں مردم پہ وتی الاج ءِ ھاتر ءَ جام غلام قادر سرکاری ٹیچنگ نادراھجاہ ءَ کائنت نوں آ بازیں دلسیاھیانی دیمپان انت – ڈاکٹرانی آپریشن ءِ ھاتر ءَ کارمرز بوکیں گُداں ھوار درمان ءُ سرنجاں ھم چہ پرائیوٹ میڈیکل اسٹوراں بھا زورگ ءَ لاچار انت –

مردمانی گوشگ انت نادراھجاہ ءَ مردمانی آپریشن وا کنگ بیت بلے پہ آپریشن ءَ کارمرز بوکیں ساز ءُ سامانانی زورگے گنجائش نیست بلے وتی دوستیگیں مردمانی الاج کنگے ھاتر ءَ لاچار انت کہ بھا بہ زوریں –

اے درگت ءَ نادراھجاہ ءَ پہ الاج ءَ شُتگیں مردمانی گوشگ انت کہ جام غلام قادر سرکاری ٹیچنگ نادراھجاہ ھب دری چیزانی زورگ ءَ لاچار انت – نادراھجاہ ءَ ناکہ درمان ھست ءُ ناکہ آپریشن ءِ ھاتر ءَ کارمرز بؤوکیں کسان کسانیں ازباب ھست انت ـ ھتاکہ سرنج، انجکشن، گلوکوس ھم چہ پرائیویٹ اسٹوراں زورگی انت – آپریشن ءِ ھاتر ءَ کارمرز بؤکیں گُد ھم نادراھجاہ ءَ نیست انت ءُ آئی ءِ یک جوڈی یے کیمت کساس سَے ھزار ءُ پنچ سد کلدار انت کہ چہ پرائیوٹ اسٹوراں زورگ بیت ءُ آیاں دیگ بیت –

آھانی گوشگ ءَ انت ھب ءُ کش گوری دمگانی گریب ءُ بزگریں مردم وتی دوستیگیں مردمانی الاج ءِ ھاتر ءَ گلام قادر نادراھ جاہ ءَ.کائنت بلے آسراتیانی نہ بوگ ءِ سوب ءَ مایوس بنت ءُ وتی نادراھانی الاج ءِ ھاتر ءَ لاچار بنت کہ گرانھادیں درمان دگہ ساماناں بہ زور انت مردمانی ھچ جست ءُ پد کنوکے نیست –

آھاں چہ بلوچستان ءِ سرکار ءَ لوٹ کتگ کہ جام گلام قادر سرکاری ٹیچنگ نادراھجاہ ءَ درماناں ھوار درسیں اژدری آسراتی دیگ بہ بنت تانکہ نادراھجاہ ءَ آؤکیں بزگریں مردم چہ دلسیاھی ءَ بہ رک انت –

سربوتگیں ھالانی رِد ءَ کیچ ءَ یک دگہ مردمے چہ شومک ءِ نادراھی ءَ بیران بوتگ –

شومک ءِ نادراھی ءَ بیران بوتگیں مردمے پجار اکبر ء محمد حکیم جھمنند ڈنے سر ءِ نام ءَ بوتگ کہ آ میڈیکل ٹیکنیشن ءَ کار ءَ بوتگ –

زانگ بہ بیت بلوچستان ءَ شومک ءِ نادراھی گیش بوان انت – گوستگیں روچاں چہ شومک ءِ نادراھی ءَ یک دگہ زھگے بیران بوتگ ات –

سرجمیں بلوچستان ءَ شومک ءِ نادراھی ءِ الاج ءَ پہ ھچ وڈیں آسراتی نیست – بلوچستان ءِ سیاسی ءُ چاگردی باسک ءُ گلانی نیمگ ءَ مدامی لوٹ کنگ بیت کہ شومک ءِ نادراھی ءِ گر ءُ دار کنگ بہ بیت ءُ بلوچستان ءَ شومک ءِ نادراھجاہ ءِ پچ کنگ بہ بیت –

بلوچستان ءِ بازیں دمگاں ھاسکر نوشکی ءُ ھزدار ءَ بازیں شومک نادراھانی کیس دیم ءَ اتکگ انت ءُ تنی وھدی بازیں مردمے کہ آھانی تہ ءَ گیشتر زھگ ءُ ورنا چہ شومک ءِ نادراھی ءَ وتی زند ءَ زبھر بوتگ انت –

روکپتی بلوچستان ءَ یک رندے پد ءَ لس مھلوک ءَ زھرشانی کتگ ءُ بندیگیں مردمانی یل کنگ ءِ لوٹ کتگ-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ آدینگ ءِ نماز ءَ پد اود ءَ مھلوک ءَ روانک ءُ زھرشانی کتگ-

زھرشانی کنوکانی دستاں بینر، پلے کارڈ بیتگ اَنت کہ آیانی سر ءَ بیگواھیانی یل کنگ ءِ سر ءَ نبشتگ بیتگ اَنت-

زھرشانی زاھدان ءَ ھوار ھاش ءُ دگہ دگہ جاھاں کنگ بیتگ اَنت کہ اود ءَ مردیناں ھوار ھوار زالبولاں ھم بھر زرتگ ءُ زھرشانی کتگ –

زھرشانی کنوکاں اوگام جنان ءَ سیاسی بندیگانی یل کنگ ءِ لوٹ کتگ ءُ اود ءَ ایرانء سرکار ءِ ھلاپ ءَ ھم اوگان جتگ –

پلے کارڈانی سر ءَ گوستگیں ھپتگ ءَ ھاش ءَ دزگیر کنگ بیتگیں مولانا عبدالمجید مرادزئی ءِ یل کنگ ءَ ھوار ھوار دگہ بندیگین مردمانی نام نبشتگ بیتگ اَنت-

دومی نیمگ ءَ روکپتی بلوچستان ءُ زابل ءَ ھواریں دمگ استان گالیش ءَ مولانا مھمد ھسین گورگیج ءِ دزگءر نامہ ءِ ھلاپ ءُ روکپتی بلوچستان ءَ دگہ مردمانی آوار جنیانی ھلاپ ءَ ھم زھرشانی کنگ بیتگ اَنت-

زانگ روکپتی بلوچستان ءَ زھرشانی درچ گوستگیں سال دوھزار ءُ بیست ءُ دو ءِ سی ستمبر ءَ بندات بیتگ اَنت کہ اود ءَ چھبار ءَ پانزدہ سالی ئیں جنکو ماھو ءِ گون ءَ پولیس آفیسر ابراھیم کوچکزئی ءَ زوراکی کتگ ات-

چریشی ءَ پد اود ءَ یک زھرشانیانی درچے بندات بیتگ ات کہ چرے زھرشانیاں بازیں کچے ءَ مردم کشگ ءُ بیگواہ کنگ بیتگ اَت اَنت-

براھوئی زُبان ءِ سر ءَ چمشانکے

نبشتہ کار: شازیہ بلوچ

دی بلوچستان پوسٹ

چوش کہ کُرد راج ءِ دو راجی زُبان اَنت انچوشکہ زازاگورانی ءُ کُردی ھمے پیم ءَ بلوچی ءُ براھوئی ھم بلوچ راجی زُبان اَنت۔ بزانکہ یک بلاھیں راجے ءَ چہ یکے ءَ گیش زُبان ھم بنت۔ دِگہ درور بنگلادیش ءَ چکمہ ءُ بنگلالی اَنت، روس ءَ روسی ءُ کاکسس ءُ دِگہ بازیں راج ھست اَنت کہ آیانی بازیں زُبان بنت۔ بزانکہ براھوئی ھم بلوچ راج ءِ زُبانے انچوشکہ بلوچی اِنت۔ نی ما گْوش ایں کہ براھوئی زُبان ءِ گپ کنوکیں بلوچ کُجام جاہ اَنت؟

براھوئی زُبان ءِ بلوچ مستونگ، ھُزدار ،کلات(ساراوان)، نوشکی، شال ءُ اوگانستان ءِ ولایت نمروز ءَ ھم آباد اَنت۔ ھمے وڑ ءَ سِندودیش ءِ بازیں دمگ ءُ میتگاں ھم براھوئی گپ کنوکیں بلوچ ھست اَنت۔

البت بلوچستان ءِ برھوئی دمگاں انچوشکہ مستونگ، ھُزدار، کلات(ساراوان)، نوشکی ءُ شال ءَ بلوچی زُبان ءِ بلوچ ھم بازیں کچے ءَ بنت پمیشکا گیشتری ءَ بروھوئی بلوچ بلوچی ءَ سرپد بنت ءُ گپ ھم کن اَنت بلے بلوچستان بازیں انچیں جاہ کہ اود ءَ بلوچی زبان ءِ بلوچ وَ ھست بلے براھوئی گپ کنوکیں بلوچ آباد نہ انت انچوشکہ کوھلو، کاھان، بارکھان، ڈیرہ گازی ھان، راجنپور، ڈیرہ بُگٹی، جھل مگسی، ڈیرہ مُراد جمالی، پنجگور، کیچ ءِ دْراھیں دمگاں بہ گِر داں گْوادر، روایرشُتی بلوچستانی زاھدان، نمروز، زابُل تاں بندراباس ءُ چھبار ءِ وڑیں دمگ ھست اَنت۔

نی ما کسانیں سرپدی یے دے ایں کہ براھوئی کدی ودی بوتگ ءُ چُنت سال کْوھن اِنت؟ بروھوئی زُبان ءِ بُنگیج ءُ ودی ءِ بابت ءَ ھاسیں پٹ ءُ پول نہ بوتگ پمیشکا تچکیں سرپدی ءُ راجدپتر ئِے نیست۔

البت لھتیں میان اُستمانی زُبانزانت گْوش اَنت کہ براھوئی 2000 سال پیسر چہ زِرباری ھندوستان ءِ لڈ ءُ بوجیں مھلوکاں در کپت پرچا کہ بروھوئی زُبان ءِ توارینک گوں رودرآتکی ھِندوستان ءِ مالٹو ءُ کورک زبان ءَ کمیں نزیکی دار ایت ناں کہ لبز ءُ گال، بلکیں تھنا توارینک۔ براھوئی زبان ءِ گیشتر لبز گوں بلوچی ءَ ھوار اَنت۔

براھوئی ءُ بلوچی مئے شھدیں زُبان اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دو جتا جتائیں بمب تراکاں ایف سی ءِ گاڑی ءُ ٹریکٹر نشانگ کنگ بیتگ اَنت-

کوھلو ءَ لیویز انتزامیہ ءِ رد ءَ کاھان ءِ دمگ باریلی ءُ چپی کھچ ءِ ھند ءَ سڑک ءِ نزیک ءَ بمب تراک ءَ ایف سی ءِ بازیں کارمند بیران ءُ زدگ بیتگ اَنت-

کوھلو ءِ ھند ءَ اُرش ءَ پد ایف سی ءَ دمگ انگیر کنان ءَ تراک جاہ ایف سی ءَ بند کتگ-

تراک ءَ پد ایف سی ءُ لیویز ءِ کارمنداں وئیل جاہ ءَ سر بیتگ اَنت زدگ بیتگیں مردم اش نادراہ جاہ اش برتگ اَنت-

کوھلو ءِ انتزامیہ ءَ دیمتر ءَ گوشتگ اے دگ ءِ سر ءَ یک دگہ تراکے ءَ ٹریکٹر ءِ ڈرائیور زدگ بیتگ ءُ ٹریکٹر زدگ بیتگ –

انتزامیہ ءِ رد ءَ واکدار وئیل ءِ چار ءُ ٹپاس کنگ ءَ اَنت ءُ تراک ءَ زدگ ءُ بیران بیتگیں کارمندانی بارو ءَ رسانکدراں دگہ گپ دیم ءَ نیتکگ اَنت-

زانگ بہ بیت کوھلو ءِ ھند گیشتر بلوچ آجوئی لوٹوکانی دست ءَ اَنت ءَ دمگی مردمانی رد ءَ بلوچ لبریشن آرمی ءِ بازین سلاہ بندین باسک دمگ ءَ جاڑیگ اَنت بلے داں انگت ءَ بی ایل اے ءِ جارکش جیئند بلوچ ءِ نیمگ ءَ اے درگت ءَ گپ دیم ءَ نیتکگ اَنت-

دستونک

شائر: شاه هُسین شهزیب

دی بلوچستان پوسٹ

اَهد ءِ بے بالیں کَپوت ءَ نالِتہ جَمبر نہ بیت
چورهیں اوستان ءَ آسے بالِتہ جَمبر نہ بیت

پُکّی ءَ مِسلے شِتگ اِے اَهد ءِ زوراک ءَمنءَ
چو کُچِکّ ءَ شَهر ءُ میتگ وَکّ اِتہ جَمبر نہ بیت

تئ گِس ءِ سَبزیں چِنالاں دُور بُرتہ کہ وتا
نوں هَمائیں من تئ شَهر ءَ چاراِتہ جَمبر نہ بیت

باریں چونیں بے اومیتیں نوبتےءَ دْرپش اِتہ
چاریں نیماں پَہ هَزابی جیڑتہ جَمبر نہ بیت

اِچ نَہ گِنداں دُور چَمّاں بِید ءِ روکیں اَنگرءَ
پَهرواں مَستیں لِوارے جَلّتہ جَمبر نہ بیت

چو بُراک ءَ کَارچ ءُ ڈَکّی بوهگاهاں هَمسپر
اَچ وت ءَ ما نوکیں رَاهے کَشّ اِتہ جَمبر نہ بیت

بے وَسیں شهزیب چِست کَں دِیدگانی پَرده ءَ
گَنجیں کوهاں هُون ءِ هَارے مَلّتہ جَمبر نہ بیت

وائس فار بلوچ مسنگ پرسنز ءِ چیئرمین نصراللہ بلوچ ءَ وتی درشانے تہءَ گُشتگ کہ بی بی رشیدہ ءُ آئی لوگ واجہ محمد رحیم ءِ کھولءَ نیاد کُتگ، آیاں زَنگ جتگ کہ گیشکوری ٹاؤن بشیر چار راہ شال ءَ چہ 3 فروری ءَ‏ بی بی رشیدہ ءُ آئی لوگ واجہ محمد رحیم، دو زھگ ءُ آئی وسیگ پوج ءَ دزگیر کنگ ءَ پد ناشناسیں جاھاں بُرتگ اَنت۔

بی بی رشیدہ ءِ وسیگ ءُ زھگ 5 فروری ءَ یل کنگ بیتگ اَنت بلے بی بی رشیدہ ءُ آئی لوگ واجہ محمد رحیم داں انگت بیگواہ اَنت۔

کھول ءِ گُشگ اِنت کہ آیاں رشیدہ ءُ آئی لوگ واجہ ءِ درگت ءَ اھوال دیگ نہ بئیگ ءَ اِنت رشیدہ ءِ یک چُکے یک ءُ نیم سال ءُ یکے چار سالیگ اِنت مات ءَ ابید دوھیں زھگ مدامی گریوگ ءَ اَنت ءُ ورگ ورگ ھم کُتگ اِش چریشی سوب ءَ کھول بازیں ذھنی درد ءُ اندوھانی تہءَ اِنت۔

نصراللہ بلوچ ءَ آیاں باوری داتگ کہ وائس فار بلوچ مسنگ پرسنز رشیدہ بی بی ءُ آئی لوگ واجہ ءِ سلامتی ءَ گوں یل کنائنگ ءِ ھاترءَ ڈیھی رھبندانی ردءَ جدوجھد کنت۔

نصراللہ بلوچ ءَ گُشتگ کہ آئی ءَ رشیدہ ءُ آئی لوگ واجہ ءِ زورانسری بیگواھی ءِ سرجمیں اھوال تھی کارانی وزیر میر ضیاء لانگو ءَ ھم داتگ اَنت سانمندیں کھول ءَ گوں سریاب تھانہ ءَ ھم شُتگ ءُ گوں ایس پی، ڈی ایس پی ءُ ایس ایچ او سریاب ءَ گوں ھم نیاد کُتگ ءُ سانمندیں کھول ءِ بیان ھم ریکارڈ کنائنتگ اَنت۔

نصراللہ بلوچ ءَ گُشتگ کہ جنینانی زورانسری بیگواھی ءِ سوب ءَ سرجمیں بلوچستان ءِ مھلوک ءِ دلءَ ڈیھہ ءُ ڈیھی ادارگانی ھلاپ ءَ نپرت ءِ تہءَ گیشی کئیت اِنت آئی ءَ سرکار ءُ ڈیھی ادارگانی سروکاں گوں دزبندی کُتگ کہ آ سنگینی ءِ درشانی بہ کن اَنت ءُ بی بی رشیدہ ءُ آئی لوگ واجہ محمد رحیم ءِ زورانسری بیگواھی ءِ سرءَ نوٹس بہ زیر اَنت ءُ بی بی رشیدہ ءُ آئی لوگ واجہ ءِ سلامتی دروشم ءَ یل کنگ ءِ تہءَ وتی کرد ءَ پیلو بہ کن اَنت اگں آیانی سرءَ کجام ھم اِنت گُڑءَ دیما آرگ بہ بنت ءُ آمید گِس ءَ پیش کنگ بہ بنت۔

بلوچستان ءِ جتاجتائیں دمگ کیچ، شال، بیلہ ءُ بیسمگ ءَ دگ وئیل ءِ آسر ءَ چار مردم بیران ھشت ءَ گیش ٹپی بیتگ اَنت-

گیشیں ھالانی رِد ءَ بلوچستان ءِ دمگ کیچ ءِ ھند تربت ءَ چہ گوادر ءَ رؤکیں گاڑی چپی بیتگ گاڑی ءَ سواریں یکیں کھول ءِ دو زالبول ءُ یک جنکوے سک ٹپی بیتگ اَنت چریشی ءَ پد ٹپّانی درد نہ سگ اِتگ ءُ بیران بیتگ اَنت-

ھمے وڑ بلوچستان ءِ بُنجاھی شھر شال ءَ سیٹلائٹ ٹاؤن ءَ تُرندیں گواتانی سوب ءَ کمرہ ءِ چت کپگ ءَ چہ کمرہ ءِ تہ ءَ ساڑی ئیں پانزدہ سالی ئیں نائلہ بیران بیتگ-

دگہ یک وئیلے بلوچستان ءِ دمگ بسیمگ ھند لڈی ءَ چہ ھزدار ءَ پنجگور ءَ روکیں مِنّی ءِ ٹائر ءِ ترکگ ءِ سوب ءَ چپی بیتگ،

چریشی ءِ آسر ءَ چکے بیران ءُ ھشت مردم ٹپی بیتگ اَنت ، بیران بیتگیں چُک لاش ءُ ٹپی بیتگیں مردم پہ درمان کنگ ءِ ھاتر ءَ نادراھجاہ ءَ برگ ءَ پد پہ گیشیں درمان کنگ ءَ ھزدار ءَ دیم دیگ بیتگ اَنت، بیران بیتگیں چُک ءِ لاش گیشیں چار ءُ ٹپاس کنگ ءَ پد کھول ءِ دست ءَ دیگ بیتگ-

بیلہ ءِ نزیک ءَ ویگن ءُ یک ٹو ڈی ءِ میان ءَ ڈگ ورگ ءِ آسر دوئیں گاڑیاں ءَ ساڑی ئیں مردم ٹپی بیتگ اَنت بلے ھچ وڑیں جانی تاوان نہ بیتگ-

بلوچستان ءِ دمگ آواران ءِ ھنکین مشکے ءِ جتاھیں ھنداں پوجی بیڑ برجاہ اِنت۔ بازیں مردمانی آوارجنی ءَ پد بیگواھی ءِ اھوال پیداک اِنت، بیڑءِ تہءَ پاکستانی پوج ءِ ھمراھی ءَ سلاہ بندیں کُشندہ ٹولی ءِ کارندہ ھم گون اَنت۔

ٹی بی پی ءَ سربیتگیں اھوالانی ردءَ  مشکے ءِ ھند گجلی، سنیڑی، نوانو، زوارک، مزار دان ءُ کلان ءَ پاکستانی پوج بیڑ برگ ءَ اِنت وھدیکہ آیانی ھمرائی ءَ آیانی اڈ داتگیں سلاہ بندیں ٹولیانی کارندہ ھم گندگ بیتگ اَنت۔

اھوالکار ءِ گُشگ اِنت کہ اے نیام ءَ ھندی مردم دزگیر کنگ بیتگ اَنت بلے داں انگت آیانی پجار کنگ نہ بیتگ۔ 

واکداراں اَے بابت ءَ داں انگت ھچ درشان شنگ نہ کُتگ البت اے پئیمیں بیڑ بلوچستان ءَ یکشلی ءَ گوں دیما کائنت کہ آودہ گیشتر ھندی مردم زورانسری بیگواھی ءِ مالی تاوانانی دیمپانی کنگ کپ اِیت۔