TBP Balochi

پسنی ڈگری کالج ءَ برجم دارگ بوتگیں کتاب میلا زیک دھ مارچ ءَ بگر تاں مروچی یانزدہ مارچ ءَ برجاہ بوتگ –

گیشیں ھالانی رِد ءَ پسنی ءَ بچکانی ڈگری کالج ءِ چیردستی ءَ دو روچی کتاب میلا ءِ بنداتی مراگش آدینگ ءِ روچ ءَ پسنی ڈگری کالج ءِ بندات کنگ بوتگ، مراگش ءِ گچینی مھمان پسنی ءِ اسسٹنٹ کمشنر محمد جان بلوچ بوتگ کہ آئی ءَ مراگش بندات کتگ –

برجم داشتگیں اے کتابی میلا ءَ ڈگری کالج ءَ ھوار دگہ وانگجاھانی جنکیں نودربراں ھم مزنیں کچے ءَ بھر زرتگ – دو روچی کتابی میلا ءَ بازیں شنگکاراں وتی کتابی اسٹال جتگ انت، بازیں آرٹسٹ ءُ فنکاراں ھم وتی ازمانی اسٹال جتگ ءُ اشی ءَ ابید نودربرانی نیمگ ءَ ڈرامہ، ٹیبلو باوست، بلوچی ءُ اردو ءَ شئر ءُ شائری ھم کنگ بوتگ –

اسسٹنٹ کمشنر پسنی ءُ دگہ مردماں تران کنان ءَ گوشتگ کہ وانگجاھانی تہ ءَ اے وڈیں مراگشانی برجم دارگ ءَ نودربر گیشتر کتاب وانگ ءِ سر ءَ دلگوش دئینت ءُ چریشی ءَ چاگرد تہ ءَ شری کئیت – آئی ءَ گوشتگ کہ پسنی مدامی زانت ءُ زانشت ءُ ازمکاری ءِ گہوارہ ءِ بوتگ –

آھانی گوشگ ات کہ مارا جھان ءِ تہ ءَ چشیں راجے دست نہ کپیت کہ آ چہ کتاباں دور بوتگ ءُ جھان ءِ تہ ءَ دیمروئی کتگ – جھان ءِ تہ ءَ دیمروئی کنگ ءِ اولی پدانک کتاب انت کہ مارا چہ زانت ءَ سریچ کنت – چہ کتابانی وانگ ءَ راجاں دیمروئی کتگ – اے وڈیں مراگشاں نودربرانی دلگوشی دیگ ءَ زانگ بیت کہ وانگجاھاں مئے بچکیں نودربراں ھوار جنک ھم زانت ءِ شوھاز ءَ درکپتگ انت –

آھانی گوشگ ات کہ مئے راج ءَ انکلابی ءُ جنگانی بنیات ءَ کتاب ءُ کلم جھان ءِ ھر پڑ ءَ یک سلاھے ءِ وڈا کارمرز کنگی انت – پرچاکہ کتاب ءِ وانگ ءُ زانت ھما یکیں چیز انت کہ جھان ءِ تہ ءَ مدامی مئے ھمراہ داری ءَ کن انت – مروچیگیں مراگش ءَ ورنایانی دست کاری، فن ءُ مصوری ءِ گندگ ءَ پد کسے ھم اے گپ ءَ رد کت نہ کنت کہ پسنی زانت ءُ زانشت آرٹ ءِ درگت ءَ لکھنو ءَ کمتر نہ انت -زانگ بہ بیت پسنی ڈگری کالج گوستگیں روچ ءَ دھ مارچ ءَ بندات کنگ بوتگ ءُ مروچی یانزدہ مارچ ءَ تاں برجاہ بوتگ –

اوگانستان ءِ استان مزار شریف ءَ تبیان دودمانی بنجل ءَ بوتگیں بمب تراک ءَ بیران بوتگیں مردمانی کچ دہ ءَ سر بوتگ انت، وھدیکہ بازیں مردمے زدگ بوتگ انت –

درملکی رسانکدرانی رِد ءَ مروچی شمبے ءَ اوگان ءِ استان بلخ مزار شریف ءَ دودمانی بنجل ءَ اھوالکارانی مراگش ءِ میان ءَ بمب اُرشے کنگ بوتگ، بمب تراک ءَ دہ مردم بیران بوتگ انت – اوگان واکدارانی رِد ءَ تراک سھب ءِ ادار دہ ءُ نیم ءَ تراکناکیں شوروانی ترکگ ءَ بوتگ –

اے درگت ءَ تالبان سرکار ءِ گوشگ انت کہ وئیل ءَ ھواریں ناشرکارانی بگیری ءَ پٹ ءُ پول کنگ بوگ ءَ انت بلے تنی وھدی اے اُرش ءِ زمہ ھچ کس ءَ نہ منّ اِتگ –

بولان ءِ دمگ ڈھاڈر ءَ سردار یار محمد رند ءِ زھگے کاروان ءِ سر ءَ بمب تراک ءِ کنگ بوتگ، چریشی ءَ دو مردم بیران بوتگ انت –

گیشیں ھالانی رِد ءَ سنی ءَ ناشناسیں مردماں سردار یار محمد رند ءِ زھگ میر سردار خان رند ءِ کاروان ءِ سر ءَ نوشمان ءِ نزیک ءَ بمب تراکے ءِ نشانگ کتگ –

لیویز ءِ گوشگ انت کہ تراک ءَ میر سردار خان ءِ دو پھازدار بیران ءُ یکے زدگ بوتگ –

اے سی ڈھاڈر فہد شاہ راشدی ءِ رِد ءَ بنداتی ھالانی رِد ءَ تراک آئی اِی ڈی ءِ بوتگ ءُ تراک ءَ میر سردار خان رک اِتگ –

بیران ءُ زدگ بوتگیں مردم ڈھاڈر سول نادراھجاہ ءَ سر کنگ بوتگ انت –

بلوچستان ءِ دمگ کیچ ءَ چہ یک مردمے ءِ جون دزکپتگ کہ پجار ءِ ھاترءَ ھندی نادراھجاہ ءَ برگ بیتگ وھدے کہ پنجگور ءَ تیرگواری ءِ آسر ءَ یکے کُشگ بیتگ۔

کیچ ءِ واکدارانی ردءَ جون تربت ءِ جھمنند بھرام ء گل محمد ءِ گِنت کہ آ تیر جنگ ءُ کُشگ بیتگ کہ پدءَ آئی جون ڈنڈار نیب ءَ دور دیگ بیتگ۔

دمگی اِھوالکارانی رِد ءَ بھرام ءَ گوں دگہ یک ھمراھے ءَ ماھے بیت کہ گار بیتگ اَنت وھدے کہ بھرام جون مرچی دزکپتگ وھدے کہ ھمراہ انگت بیگواہ اِنت-

دومی نیمگ ءَ پنجگور ءِ دمگ وشبود ءَ ناشناسیں سلاہ بندیں مردمانی تیرگواری ءَ چہ یک مردمے بیران بیتگ-

دمگی اِھوالکارانی رِد ءَ وشبود ءِ دمگ قاضی آباد ءَ شپ ءِ وھد ءَ ناشناسیں سلاہ بندیں مردم لوگ ءِ تہ ءَ پُترتگ اَنت ءُ تیرگواری اِش کتگ یک مردمے کُشتگ اِش، آئی ءِ پجّار دوست جان ءِ نام ءَ چہ بیتگ-

واکدارانی ردءَ وئیلانی پُشدر ءِ سوب داں انگت زانگ نہ بیتگ اَنت وھدیکہ گیشتریں پَٹ ءُ پول ھندی پولیس کنگ ءَ اِنت۔

زالبولانی ھکانی میان استمانی روچ

ٹی بی پی شونگال

جنگ زدگیں بلوچستان ءِ تہ ءَ بلوچ زالبول دونیمگی زوراکیانی دیمپان اَنت۔ یک نیمگے بلوچ زالبول ھندی سردار ءُ جاگیردارانی تاکت ءِ سر ءَ اڈ داتگیں کوھنگیں دودانی بندیگ اَنت، ءُ دومی نیمگ ءَ ڈیھی زوراکیانی ھم آماچ اَنت۔

8 مارچ ءَ سرجمیں جھان ءَ زالبول وتی اگبالانی ھاتر ءَ سیاسی تاکت ءِ درشان ءَ کن اَنت ءُ وتی اگبالانی جد ءُ جھد ءَ مھکمیں دروشمے دیگ ءَ گاماں چِست کن اَنت ،بلے بلوچستان ءَ بلوچ زالبول وتی اگبالانی جاہ ءَ وتی زورانسری بیگواھیں دوستیگیں مردمانی یل کنائنگ ءِ ھاتر ءَ زھرشانی کن اَنت۔ بلوچ زالبولاں ھمے سال ءَ ھم 8 مارچ دو ھزار ءُ بیست ءُ سئے ءَ ھم روکپتی ءُ رودراتکی بلوچستان ءَ زورانسری بیگواھیں مردم ءُ ماھل بلوچ ءَ ھوار زورانسری بیگواھیں بلوچ زالبولانی یل کنائنگ ءِ ھاتر ءَ کراچی، شال ءُ خاش ءَ زھرشانی کُتگ۔

زورانسری بیگواھیں آصف ءُ رشید بلوچ ءِ گوھار سائرہ بلوچ ءِ دانک جنگ زدگیں بلوچستان ءِ زالبولانی جھگیری ءَ کن اَنت۔ سائرہ ءِ گُشگ اِنت کہ “ما وتی مردیناں چہ آجوئی نہ وتی مردینانی آجوئی ءَ لوٹ ایں، مئے پُل ءُ پانچ ءَ مئے مردین نہ ڈیھہ کنگ ءَ اِنت” اے تھنا سائرہ ءِ نہ بلکیں ھمک ھما بلوچ جنین ءِ ھیال اَنت کہ پدراھیں اگاں چیریں ڈیھی زوراکیانی آماچ اَنت ءُ وتی دوستیگانی یل کنائنگ ءِ ھاتر ءَ چہ بازیں سالاں جد ءُ جھد کنگ ءَ اَنت۔

بلوچستان ءَ پیسر ءَ تھنا مردین زورانسری بیگواھیانی آماچ کنگ بیتگ اَنت بلے نوں وَ زالبولانی زورانسری بیگواھیانی تہ ءَ ھم تیزی اَتکگ۔ بلوچستان ءَ گوستگیں لھتے وھداں چہ تربت، کراچی، بولان ءُ شال ءَ چہ بلوچ جنین زورانسری بیگواہ کنگ بیتگ اَنت ءُ ماھل بلوچ زورانسری بیگواھی ءِ آماچ کنگ ءَ پد سی ٹی ڈی ءِ دست ءَ دیگ بیتگ، کہ آ انی ھم آیانی دزگیری ءَ اِنت۔

بلوچستان ءِ آجوئی ءِ ھاتر ءَ پرکاریں گل ءُ پاٹی ڈیھہ ءِ سر ءَ بھتام بند اَنت کہ سیاسی جد ءُ جھد ءِ تہ ءَ بلوچ زالبولانی کرد ءَ دارگ ءِ ھاتر ءَ آیاں زورانسری بیگواھی ءِ آماچ کنگ بئیگ ءَ اَنت ءُ بلوچستان ءِ آجوئی جُنز ءَ گوں بندوکیں مردمانی کھولاں ھواریں سِزا ءِ نشانگ کنگ بئیگ ءَ اَنت۔ آجوئی دوستیں تک اے گمان ءِ درشانی ءَ ھم کنگ ءَ اَنت کہ آیوکیں وھدانی تہ ءَ بلوچ زالبولانی سر ءَ ڈیھی زوراکیانی تہ ءَ گیشی اتک کنت۔

پاکستان ءَ بُنکی مردمی گزرانی گِرگ کنگ ءِ ھاتر ءَ ھم زھرشانی رہ گِرگ کپیت ءُ بلوچ زالبول پاکستان ءِ پئیمیں ڈیھہ ءِ تہ ءَ مھکمیں جُنزے ءَ ابید اگبالاں گِپت کُت نہ کن اَنت۔ بلوچ زالبولاں اگبالانی گِرگ ءِ ھاتر ءَ وتی جُنز مھکم کنگ ءُ یکشلیں جد ءُ جھد کنگ ءِ زلورت اِنت۔

بلوچستان ءَ زورانسری آوار جنی ءِ دْرچ یکشل ءَ برجاہ اِنت ھب ءُ ھاران ءَ دگہ دو مردم پوج ءِ دست ءَ آوار جنگ بیتگ اَنت-

گیشیں ھالانی رِد ءَ پاکستانی پوج ءَ دو روچ ءَ ساری نُھ مارچ ءَ ھب ءِ دمگ دارو ھوٹل نزیک ءَ یک لوگے ءَ بیڑبرگ ءِ وھد ءَ یک ورنایے آوار جتگ ءُ گوں وت برتگ کہ آئی ءِ پجّار جاوید ء غلام قادر نام ءَ چہ بیتگ-

اِھوالکارانی رِد ءَ آوار جنگ ءِ وھد ءَ پاکستانی پوج ءِ کارندھاں لوگ ءَ ساڑی ئیں زالبول ءُ چُک ھم لَٹ ءُ کُٹانی نشانگ کتگ اَنت وھدے کہ پوج ءِ دست بیگواہ کنگ بیتگیں ورناہ انگت دیم ءَ آرگ نہ بیتگ-

ھمے وڑ بلوچستان ءِ دمگ ھاران ءَ چہ سر بیتگیں ھال ءِ ردءَ پوج ءَ شپ ءِ وھد ءَ راہ بستگ ءُ یک راھگوازے چہ سول نادُراھجاہ دگ ءَ زورانسری آوار جتگ ءُ گوں وت برتگ-

چہ ھاران ءَ پوج ءِ دست ءَ آوار جنگ بیتگیں مردم ءِ پجّار انگت نہ بیتگ-

زانگ بہ بیتگ گوستگیں یک ھپتگے ءَ بلوچستان ءِ جتاجتائیں دمگ کوھلو، گوادر، ھب ءُ ھاران ءَ یک درزنے ءَ گیش مردم زورانسری آوار جنی ءِ نشانگ کنگ بیتگ اَنت-

سر بیتگیں ھالانی رد ءَ روکپتی بلوچستان ءِ دمگ گلشن ءَ سلاہ بندین مردمانی تیرگواری ءَ ایرانی پولیس ءِ دو کارندہ بیران ءُ یکے زدگ بیتگ –

کُشگ بیتگیں پولیس کارمندانی پجات احسان شھرکی ءُ سرھنگ دوم محسن پودینہ ءِ ناماں زانگ بیتگ اَنت ءُ زدگ بیتگیں کارندہ ءِ پجار دیم ءَ نیتکگ –

ھالانی رد ءَ پولیس کارندھانی سر ءَ ھما وھد ءَ تیرگواری کنگ بیتگ کہ یک گاڑی ءَ پوڑی گرگ ءَ بیتگ اَنت کہ پشتکائی آیانی سر ءَ ناشناسیں مردماں تیرگواری کتگ-

ھالانی تہ ءَ گوشگ بیتگ کہ پولیس کارندہ لس مردم ءُ بارکشین گاڑیاں زوریں پوڑی گر اَنت ءُ چریشی ءَ چہ دمگ ءِ مھلوک آیانی سر ءَ زھر درشان کنت-

زانگ بہ بیت روکپتی بلوچستان ءِ جتا جتائیں شھراں پولیس ءُ دگہ ادارھانی سر ءَ وھد وھد ءِ سر ءَ اُرش بوگ ءَ انت کہ چریشی ءَ گوستگیں سال ءَ ھشت کارندہ کُشگ ءُ چار زدگ کنگ بیتگ اَنت-