زالبولانی ھکانی میان استمانی روچ
ٹی بی پی شونگال
جنگ زدگیں بلوچستان ءِ تہ ءَ بلوچ زالبول دونیمگی زوراکیانی دیمپان اَنت۔ یک نیمگے بلوچ زالبول ھندی سردار ءُ جاگیردارانی تاکت ءِ سر ءَ اڈ داتگیں کوھنگیں دودانی بندیگ اَنت، ءُ دومی نیمگ ءَ ڈیھی زوراکیانی ھم آماچ اَنت۔
8 مارچ ءَ سرجمیں جھان ءَ زالبول وتی اگبالانی ھاتر ءَ سیاسی تاکت ءِ درشان ءَ کن اَنت ءُ وتی اگبالانی جد ءُ جھد ءَ مھکمیں دروشمے دیگ ءَ گاماں چِست کن اَنت ،بلے بلوچستان ءَ بلوچ زالبول وتی اگبالانی جاہ ءَ وتی زورانسری بیگواھیں دوستیگیں مردمانی یل کنائنگ ءِ ھاتر ءَ زھرشانی کن اَنت۔ بلوچ زالبولاں ھمے سال ءَ ھم 8 مارچ دو ھزار ءُ بیست ءُ سئے ءَ ھم روکپتی ءُ رودراتکی بلوچستان ءَ زورانسری بیگواھیں مردم ءُ ماھل بلوچ ءَ ھوار زورانسری بیگواھیں بلوچ زالبولانی یل کنائنگ ءِ ھاتر ءَ کراچی، شال ءُ خاش ءَ زھرشانی کُتگ۔
زورانسری بیگواھیں آصف ءُ رشید بلوچ ءِ گوھار سائرہ بلوچ ءِ دانک جنگ زدگیں بلوچستان ءِ زالبولانی جھگیری ءَ کن اَنت۔ سائرہ ءِ گُشگ اِنت کہ “ما وتی مردیناں چہ آجوئی نہ وتی مردینانی آجوئی ءَ لوٹ ایں، مئے پُل ءُ پانچ ءَ مئے مردین نہ ڈیھہ کنگ ءَ اِنت” اے تھنا سائرہ ءِ نہ بلکیں ھمک ھما بلوچ جنین ءِ ھیال اَنت کہ پدراھیں اگاں چیریں ڈیھی زوراکیانی آماچ اَنت ءُ وتی دوستیگانی یل کنائنگ ءِ ھاتر ءَ چہ بازیں سالاں جد ءُ جھد کنگ ءَ اَنت۔
بلوچستان ءَ پیسر ءَ تھنا مردین زورانسری بیگواھیانی آماچ کنگ بیتگ اَنت بلے نوں وَ زالبولانی زورانسری بیگواھیانی تہ ءَ ھم تیزی اَتکگ۔ بلوچستان ءَ گوستگیں لھتے وھداں چہ تربت، کراچی، بولان ءُ شال ءَ چہ بلوچ جنین زورانسری بیگواہ کنگ بیتگ اَنت ءُ ماھل بلوچ زورانسری بیگواھی ءِ آماچ کنگ ءَ پد سی ٹی ڈی ءِ دست ءَ دیگ بیتگ، کہ آ انی ھم آیانی دزگیری ءَ اِنت۔
بلوچستان ءِ آجوئی ءِ ھاتر ءَ پرکاریں گل ءُ پاٹی ڈیھہ ءِ سر ءَ بھتام بند اَنت کہ سیاسی جد ءُ جھد ءِ تہ ءَ بلوچ زالبولانی کرد ءَ دارگ ءِ ھاتر ءَ آیاں زورانسری بیگواھی ءِ آماچ کنگ بئیگ ءَ اَنت ءُ بلوچستان ءِ آجوئی جُنز ءَ گوں بندوکیں مردمانی کھولاں ھواریں سِزا ءِ نشانگ کنگ بئیگ ءَ اَنت۔ آجوئی دوستیں تک اے گمان ءِ درشانی ءَ ھم کنگ ءَ اَنت کہ آیوکیں وھدانی تہ ءَ بلوچ زالبولانی سر ءَ ڈیھی زوراکیانی تہ ءَ گیشی اتک کنت۔
پاکستان ءَ بُنکی مردمی گزرانی گِرگ کنگ ءِ ھاتر ءَ ھم زھرشانی رہ گِرگ کپیت ءُ بلوچ زالبول پاکستان ءِ پئیمیں ڈیھہ ءِ تہ ءَ مھکمیں جُنزے ءَ ابید اگبالاں گِپت کُت نہ کن اَنت۔ بلوچ زالبولاں اگبالانی گِرگ ءِ ھاتر ءَ وتی جُنز مھکم کنگ ءُ یکشلیں جد ءُ جھد کنگ ءِ زلورت اِنت۔