TBP Balochi

بلوچستان ءِ دمگ کیچ ءِ ھند بلیدہ ءَ پاکستانی پوج ناشناسیں مردماں بمب اُرشے ءِ نشانگ کتگ کہ چریشی ءَ پوج ءَ جانی تاوانانی بوگ ءِ گمان اِنت-

دمگی مردمانی رد ءَ بلیدہ ءِ ھند گلی ءَ چیئرمین عبدالرھمان بازار ءِ نزیک ءَ گوستگیں شپ ءَ یک بمب تراکے ءِ بیتگ –

دمگی مردمانی رد ءَ تراک پاکستانی پوج ءِ کاروان ءَ ھواریں یک گاڑی یے ءِ سر ءَ کنگ بیتگ کہ چیریشی ءَ گاڑی ءَ تاوان رس اتگ ءُ جانی تاوانانی ھم گمان کنگ بوگ ءَ اِنت-

بلے لشکری بنشون ءِ نیمگ ءَ تنی وھدی اے درگت ءَ ھچ گپ دیم ءَ نیتکگ اَنت-

زانگ بہ بیت بلیدہ بلوچستان ءِ ھما دمگاں ھوار اِنت کہ اود ءَ یکشل ءَ پاکستانی پوج نشانگ کنگ بوگ ءَ اِنت ءُ ایشانی زمہ واریاں بلوچستان ءِ آجوئی ءِ واستا جنگ کنوکیں سلاہ بندیں گل پہ وت ءَ زورگ ءَ اَنت-

گوستگیں شپ ءَ بیتگیں اُرش ءِ زمہ واری تنی وھدی ھچ گل ءَ پہ وت ءَ نہ زرتگ –

آسمانزانتیاں اے ھال پدر کرتگ کہ زمین ءَ برز گردش کنوکیں استارانی گیش بوگ ءِ ودی بیوکیں رژن ءَ دنز ءُ مُجانی تہ ءَ تھار بوگ ءِ گمان اِنت-

سال دو ھزار ءُ نوزدہ ءَ پد زمین ءِ نزیک ءَ آیوکیں سیٹلائٹسانی کچ ءَ دو کساس گیش بوتگ اَنت، پنچ سال ءَ پیش امریکہ ءِ کمپنی اسپیس ایکس ءَ بنداتی ” میگا کنسٹیلیشن ” دیم ءَ آورتگ اَت کہ آ ھزارانی سیٹلائٹساں ھوار اِنت – نی اے گیش زمین ءَ دو ھزار کلومیٹر ءِ دوری ءَ دگہ ھزارانی سیٹلائٹسانی دیم دیگ ءِ شوربندی ءَ اِنت-

آیانی گوشگ اِنت ھمک سیٹلائٹ اے ترس ءَ گیش کنت کہ زمین ءِ سر ءُ پیچاں لگوکیں دگہ چیزے ءَ گوں ٹکر بہ جنت گڑا گیش لُمبگی ودی کت کنت-

اے امل ءَ یک چین ری ایکشنے ودی کت کنت چریشی ءِ سبب ءَ کساساں ھواریں ٹکر ءُ چنُڈ سان دات کن اَنت چوشکہ زمین ءِ سر ءَ رژن تالان کنوکیں برزباری ءَ جمبراں گیشتر کت کن اَنت-

ھال تاک نیچر اسٹرانومی ءَ شنگ بوتگیں نبشتانکانی رد ءَ آسمانزانتاں اے شیواری داتگ کہ رژن ءِ تہ ءَ اے گیش بوتگیں دنز ءُ مُجاں تھاری ءِ ترس ھست اِنت-

یک نبشتانکے ءَ آسمانزانتے ءَ گوشتگ کہ اولی رند ءَ آئی ءَ اندازگ جتگ کہ شپ ءَ آسمان ءَ رژن کجام مزنیں رسدجاھے ءَ کار ءَ مالی ءُ سائنسی دروشم ءَ آسرمند کت کنت-

سعودی عرب، متحدہ عرب امارات ءَ ھوار بازیں عرب ڈیھاں رمزان ءِ نوک مروچی سَے شمبے دوھزار ءُ بیست ءُ سَے بیست ءُ سَے رمس ءَ چارگ ءِ دزبندی کنگ بیتگ اَنت-

متحدہ عرب امارات ءِ وزیر انساپ عبداللہ النعیمی ءُ روایت ھلال کمیٹی ءِ باسکانی جاڑیگی ءَ رمزان ءِ نوک سَے شمبے ءِ مگرب ءَ پد ابوظبی ءِ جسٹس کمپلیکس ءَ چارگ بیت اِنت ءُ عربی کلینڈر ءِ رد ءَ سَے شمبے شعبان ءِ بیست ءُ نھمی رمس اِنت-

امارات ءِ درستیں شریعتی آمیدگس رویت ھلال ءِ امل ءِ بھر جوڑ بنت ءُ رویت ھلال کمیٹی ءَ رپورٹ کن اَنت-

چریشی ءَ پد سعودی سپریم کورٹ ءَ ھم سَے شمبے ءِ بیگاہ ءَ رمزان ءِ نوک ءِ چارگ ءِ دزبندی کتگ –

درشان ءُ گوشگ بیتگ رویت ھلال کمیٹی دمگی کمیٹیانی جاھاں نوک ءِ چارگ ءِ جھد ءَ کنت-

سپریم کورٹ ءَ گوشتگ کہ سَء شمبے بیست ءُ یک مارچ ءَ ان القرء کلینڈر ءِ رد ءَ شعبان ءِ بیست ءُ نُھ اِنت-

سَے شمبے ءَ ھم ھرکس نوک ءِ چارگ ءَ وتی نزیکتریں آمیدگساں چمدستی ءَ یاداشت بہ کنت-

دومی نیمگ ءَ سعودی عرب ءُ متحدہ عرب امارات ءَ زانتکارانی گوشگ اِنت سَے شمبے ءَ نوک ءِ گندگ ءِ ھچ امیت نیست اِنت-

زانتکارانی گوشگ اِنت زمران ءِ نوک چاشمبے ءِ بیگاہ ءَ گندگ بیت اِنت اولی روچگی بیست ءُ سلے مارچ دوھزار ءُ بیست ءُ سَے ءَ پشمبے ءِ روچ ءَ دارگ بیت اِنت-

بلوچستان ءَ جتاجتائیں دمگ مند ءُ ڈیرہ بگٹی ءَ سے مردم بیگواہ کنگ بیتگ انت ءُ وھدے کہ دو یل کنگ بیتگ اَنت-

سربوتگیں ھالانی رِد ءَ ھشت مارچ 2023 ءَکیچ ءِ دمگ مند ءِ ھند گیاب ءَ پاکستانی پوج ءَ بیڑبرتگ ءُ سے مردم زورانسری آوار جتگ ءُ گوں وت برتگ اَنت ءُ وھدے کہ اشانی تہ ءَ یکے دومی روچ ءَ یل کنگ بیتگ –

پاکستانی پوج ءِ دست ءَ آوار جنگ بیتگیں مردمانی پجّار علی ء حاجی موسیٰ ءُ امام بخش ء مقبول جھمنند کوہ پُشت مند نام ءَ چہ بیتگ اَنت وھدے کہ یل کنگ بیتگیں مردم ءِ پجّار ارسلان ء فضل نام ءَ چہ بیتگ-

دومی نیمگ چاگردی رسانکدر ءَ ٹوئیٹر ءَ یکے ءَ شیر خان ء اعلوان بگٹی ءِ اکس ایر کتگ ءُ درشان ءِ تہ ءَ گْوشتگ کہ شیر خان دو روچ اِنت کہ چہ ڈیرہ غازی خان ءَ بیگواہ ءَ اِنت –

بلے تنی وھدی اے زانگ بوگ ءَ نہ اِنت کہ چتو بیگواہ کنگ بیتگ-

ھمے وڑ ءَ مند ءِ دمگ نوکیں کھن ءَ پاکستانی پوج ءِ دست ءَ آوار جنگ بیتگیں ورناہ حسن ء نوربکش یل کنگ بیتگ –

زانگ بہ بیت پاکستانی پوج ءَ مند ءِ دمگ نوکیں کھن ءَ نوربخش لوگاں بیڑبرتگ اَت ءُ ھمے میان ءَ آئی ءِ زھگ حسن ءُ مستریں برات آوار جتگ اِت اَنت ءُ پد ءُ مستریں برات ھما روچ ءَ یل کتگ اَت وھدے کہ زھگ مرچی یل کنگ بیتگ-

درملکی ھالانی رِد ءَ جمہوریہ کانگو ءَ ناشناسیں سلاہ بندیں مردمانی اُرش ءَ چاردہ دمگی مردم بیران وھدیکہ افریقہ ءَ سھر ءِ کھن ءَ سلاہ بندانی اُرش ءَ نُھ چینی بیران بوتگ انت –

گیشیں ھالانی رِد ءَ یوگنڈہ ءُ کونگو ءَ نود ءِ دھک ءَ یاگی ٹولیانی ADF ھم سنتی بوتگ، یوگنڈا نیشنل لبرل فورس، یوگنڈا مسلم لبریشن فورس ءُ تبلغی پاٹیانی وڈیں گل یکجاہ بوتگ انت –

جمہوریہ کونگو ءِ رودراتکی سوبہ کیوو ءَ یاگیانی اُرش ءَ چاردہ لس مردم جنگ بوتگ انت –

دمگی اھوالکارانی رِد ءَ زرباری سوبہ ءَ ھمگرنچیں لوبیرو ءَ ڈیموکریٹک اتھادی نامیں یاگی ایں ٹولی ءَ اُرش کتگ ، اُرش ءَ چاردہ لس مردم جنگ بوتگ انت –

ھمے گوشگ بوگ ءَ انت اے گل سال دوھزار چاردہ ءَ بگر تاں روچ مروچی ھزارانی کچ ءَ لس مردم جتگ ءُ لکانی کچ ءَ در پہ در کتگ انت –

دومی نیمگ ءَ افریقہ ءَ سلاہ بندیں مردماں سھرانی کھن ءَ اُرش کُتگ ءُ نُھ چینی کُشتگ انت –

درملکی رسانکدرانی رِد ءَ اُرش ءَ دو چینی جھمنند زدگ ھم بوتگ انت، بامباری ءِ میئر ءَ مُرتگیں مردمانی ھبر راست کتگ –

سلاہ بندیں مردماں دوشمبے ءِ سھب ءِ پنچ ءَ کھن ءِ سر ءَ اُرش کُتگ، کاریزکارانی جون بنجاھی شھر بنگوئی ءَ برگ بوتگ انت بلے تنی وھدی چین ءِ سفارت ءِ نیمگ ءَ ھچ وڈیں ردامل دیگ نہ بوتگ –

بلے ھو چین ءِ سروک شی جن پنگ ءَ وسطی افریقی جمہوریہ واکداراں چہ لوٹ کتگ کہ کتکار ترندیں سزا دیگ بہ بنت –

بلوچستان ءِ دمگ کیچ ءِ بنجاھی شھر تربت ءِ بچکانی وانگ جاہ ءِ نودربر پہ زھر شانی ءَ در اتکگ انت –

گیشیں ھالانی رِد ءَ تربت جوسک ءَ بچکانی سرکاری وانگجاہ ءَ کتاب نیستی ءُ ماسٹرانی کمی ءِ بگیری ءَ نودربراں مروچی دوشمبے ءَ زھرشانی کتگ –

درنگاز کنوکیں نودربرانی گوشگ ات کہ وانگجاہ ءَ بازیں وھدے بیت کہ ماسٹر نیستی ءِ ھساب انت وھدیکہ اے سال ءَ کتاب ھم دیگ نہ بوتگ چریشی ءَ ھزارانی کچ ءَ نودربرانی وانگی سال زوال بوگ ءَ انت –

آھاں چہ بلوچستان ءِ سرکار ءَ کتاب ءُ ماسٹرانی لوٹ کتگ ءُ گوشتگ کہ مئے بنکی آسراتی دیگ بہ بنت ءُ تانکہ مئے وانگی سال زیا مہ بیت –

دومی نیمگ ءَ بلوچستان ءِ دمگ سوراب ءَ زانشتی واکدارانی نیمگ ءَ دیگ بوتگیں کتاب کم بوتگ انت بازیں وانگجاہ ءِ ھنگت کتابانی ودار انت –

وطن ٹیچر ایسوسی ایشن سوراب ءِ سرکماش ماسٹر محمد طاہر ملازئی ءَ گوشتگ کہ ایجوکیشن ڈیپارٹمنٹ ءِ نیمگ ءَ وانگجاھاں سک باز کم کتان دیگ بوگ ءَ انت کہ زھگ دیگ ءَ بازیں اڈوجنجال بوگ ءَ انت – یکے وا کتاب وانگجاھاں کم دیگ بوگ ءَ انت دومی لھتے ھنچیں کتاب انت کہ بندات ءَ بگر تاں سال ءِ گڈی ءَ وانگجاھاں سر نہ بنت چوش کہ پہ کتابانی ھاتر ءَ بلوچستان ءِ سرکار ءَ کروڈانی ھساب ءَ زر دیگ بیت –

بلے گوستگیں بازیں سالے بیت کہ سوراب ءِ وانگجاھاں ھنچیں کچے ءَ کتاب دیگ بیت کہ ھچ درد ءَ نور انت بلے تنی وھدی بازیں وانگجاھاں کتاب دیگ نہ بوتگ –

آئی ءَ گوشتگ کہ زانشتی افسر مدامی سرپد کنگ ءَ ابید ھم ھچ گامگیج زورگ نہ بوتگ ھمے ھاتر ءَ ما چہ سوراب ءِ ڈپٹی کمشنر ءَ ھوار برزی تبک ءِ واکداراں دزبندی کن ایں کہ مئے وانگجاھاں ھما کچ ءَ کتاب دیگ بہ بیت تانکہ مئے نودربرانی وانگ پہ شری ءَ بہ بیت اگاں ناں گڈا گوستگیں سال ءِ وڈا اے سال ءَ ھم زھگ وتی سلیبس ءَ سرجم کت نہ کناں ءُ اشی زمہ دار ایجوکیشن ڈیپارٹمنٹ ءَ ھوار برزی تبک ءِ واکدارانی سر ءَ لڈگ بیت –