بلوچستان ءِ دمگ چہ ھاران ءَ سیادی داروکیں بیگواھیں شاہ فہد بلوچ ءِ گھار نادیہ بلوچ ءَ مروچی شال ءِ پریس کلب ءَ گوں اھوالکاراں تران کنان ءَ گوشتگ کہ منی برات شاہ فہد کہ آئی ءِ اُمر بیست ءُ دو سال انت ءُ قرآن پہ دل یاد انت آ پاکستانی پوج ءَ شانزدہ مارچ سال دوھزار بیست ءُ دو چہ ھاران بابو محلہ ءَ مئے گِس ءَ سی ٹی ڈی ءِ کارمنداں زورانسری آوار جتگ ءُ بیگواہ کتگ –
نادیہ بلوچ ءِ رِد ءَ منی برات ءِ یل کنگ ءَ نہ انت ءُ پدا مارا مدام بیھار دیگ ءُ ترسینگ ءَ اَنت کہ شما توار چست مہ کن اِت – پولیس ءِ ایپ آئی آر ءُ پہ زور بیگواھیں مردماں برجاھیں کمیشن ءَ سی ٹی ڈی ءِ نام ءَ در کن اِت ءُ ناشناسیں مردمانی نام ءَ بہ دے اِت –
نادیہ بلوچ ءَ گوشتگ کہ منی برات ءِ چم دیستیں گواھانی دیم ءَ سی ٹی ڈی ءَ چہ گس ءَ زورانسری آوار جتگ ءُ بیگواہ کرتگ -اے وھد ءَ پَٹ ءُ پول کنگ ءِ نیمون ءَ چہ مئے گِس ءَ ھپتاد ھزار کلدار ءُ دگہ گرانھادیں سامان دز اتگ اَنت -چدو پیسر شاہ فہد منی مستریں برات غلام فرید ءِ ھواری ءَ بیست ءُ شش اگست سال دوھزار شانزدہ ءَ ھم آوار جنگ بوتگ انت کہ آ وھد ءَ شاہ فہد ءِ امر پازدہ سال بوتگ کہ پدا لھتیں روچاں پد یل داتگ ءُ مستریں برات داں سے سالاں بیگواھی ءَ پد یل کنگ بوتگ –
آئی ءَ گوشتگ کہ مئے کھول مدامی ریاستی زوراکیانی دیمپان اِنت- ایف سی ءِ کرنل ءَ ھاران بنجل ءَ لوٹائینت ءُ سی ٹی ڈی ءِ ساڑی ءَ بوھگ ءَ بیھار دنت ءُ کڈن کنت کہ سی ٹی ڈی ءِ بگیری ءَ وتی بْرات ءِ آوار جنی ءَ نام ءَ مدے، دومی نیمگ ءَ پولیس ءِ گوشگ اِنت وتی ارزی ءَ ناشناسیں مردمانی نام ءَ نبشتہ کنائین –
آئی ءِ گوشگ اِنت کہ ما اے ملک ءِ جھمنند ایں ءُ مارا زند گوازینگ ءِ کانودی ھک ھست، ما چہ بنجاھی واکداراں جست کن ایں کہ آ مارا انساپ دات کن اَنت؟
“ما پہ وتی بْرات ءِ یل کنائینگ ءَ راھبند ءُ کانود ءِ درسیں در کامرز کرتگ اَنت۔ کمیشن ءُ آمیدگس ءَ مدام پیش بوتگ ایں، زھرشانی ءِ درسیں راہ چکاس اِتگ اَنت۔ گوستگیں سال ءَ ریڈ زون ءَ بوتگیں زھرشانی ءَ ھم ھوار بوتگیں، گُڈی ءَ مارا ھمے گوشگ بہ بیت کہ مئے میار چے اِنت ما یکجاھی سزا ءِ نشانگ بوگ ءَ انت؟
گڈسر ءَ آئی ءَ لوٹ کتگ ءُ گوشتگ کہ منی برات شاہ فہد دیم ءَ آرگ بہ بیت، اگاں آئی ءِ سر ءَ ھر وڈیں کتکاری یا بھتامے ھست ملک ءِ کانودانی ءِ رد ءَ آمیدگس ءَ پیش کنگ بہ بیت ءُ مئے گوم ءَ انساپ کنگ بہ بیت –