TBP Balochi

نِبشتانک : ما وتی چاگرد ءِ دُژمن وت اِیں

نِبشتہ کار: کدیر بلوچ

دی بلوچستان پوسٹ

من وھدے وتی وانگ ءُ زانگ ءِ اولی رند ءَ ماں گلیں کراچی ءَ بِنا کُت گُڑا بازیں مردمے ءَ منی پِت ءَ را ھمے سکین دیگ ءَ اَت کہ تو گریبیں مردمے ئے وتی چُک ڈن ءَ پہ وانگ ءَ چے ءَ دیم داتگ اینچُک زررر تو چہ کُجا کارئے تئی چُک باریں وان ایت یا ناں تو مُپت ءَ وت ءَ را بزگ کن ئے ! بلے منی پِت من ءَ ھِچ گُشگ ءَ نہ اَت نزاناں چے ءَ منی واھِشت اَت کہ من ڈن ءَ پہ وانگ ءَ بہ رواں بلے منی پِت سک ءَ تَنگ دست ءُ بزگ اَت من ءَ زر دات کُت ئِے نہ کُت کہ من ڈن ءَ پہ وانگ ءَ بہ رواں ! منی بْرات اے وھد ءَ وش وش نہ اَت پِت ءَ ماں کراچی ءُ دگہ بازیں جاھاں بُرتگ ات بلے بِرات ءِ نادْراھی ءَ روگ ءِ نام نہ زانت پِت سک ءَ بزگ اَت ما سرجم ءَ پُرشتگ اَت ایں پد ءَ انچوش یک روچے ھمے نادْراھی ءِ آماچ بوت منی پِت ءَ ءُ راشد زُرت شُت اَنت کراچی ءَ نادُرھجاہ ءَ بُرت اِش ڈاکٹر ءَ دارو ءُ درمان داتگ اَت پد ءَ چہ نادْراھی ءَ گھتر بوتگ ات ! منی پِت کسے ءِ گور ءَ بزگری کنگ ءَ اَت ءُ مات ءَ گدے دُوتک من ءَ زر دات پہ وانگ ءِ ھاتر ءَ من کہ وتی وانگ ءَ شُتاں بازیں مردمے ءَ منی سر ءَ گلاک بستگ اَت-

اے نو روت وان ایت من ھمے گپ جیڑ اِت ھیران بوت آں پرچا مئے چاگرد ءِ تہ ءَ زاناں گریبیں مردم ءِ وانگ گُناہ اِنت یاکہ میار اِنت!! من زانت کدیر ناں کہ گُناھے نہ کہ میارے اے بس مردُمانی وتی کمزوری اِنت وتی ھیال اِنت مردم کُجام کار ءَ بہ گوش ایت من کناں ئت کُرت ئِے نہ کنت اے دروگے من وتی دل تسلہ دات کسے ءِ گپ گوش نہ داشت اَنت-

ھمے وڑ ءَ وانگ ءُ زانگ اود ءَ زبر نہ اَت من لوگے ءَ اِت آں منی جِند وانگ ءَ اوں ھِچ نزانت لوگ ءِ تہ ءَ دگہ چوشیں مردمے نیستگ اَت کہ من ءَ بوانین ایت دگہ کِر ءُ گور ءِ مردم ھرکس گوں وتی کاراں دلگوش اَت اَنت منی میتگ ءِ لھتے بچک کیچ ءَ پہ وانگ ءَ شُتگ اَت من ءَ ھال اِش کُت ما کیچ ءَ پہ وانگ ءَ اَتکگ ایں من سک ءَ باز گَل بوت آں میتگ ءِ بچک پہ وانگ ءَ اتکگ اَنت ءُ گڑا من ءَ گْوَشت اِش کائے بْیا گوں من وتی پِت ھال کُت کہ مئے میتگ ءِ بچک پہ وانگ ءَ کیچ ءَ شُتگ اَنت گُڑا من ھماھانی گور ءَ برو آں ؟ آ یکے منی میتگ ءِ مردم انت دومی منی وتی سکیں نزدیکیں سْیاد اِت اَنت گُڑا پِت ءَ من ءَ موکل دات من کیچ ءَ شُت آں پہ وانگ ءَ منی وانگ انگت ءَ برجاہ اِنت اگاں زالمیں وھدے ھرجاں نہ بوت آں تاں ھدے وت ءَ سر کناں بلے ما گُلام ایں ما دلجم نہ ایں کہ دیمتِر ءَ چیزے کُت کن ایں یاں کہ نہ کن ایں

ما بلوچ ایں مارا اے چیزانی سر ءَ ھِچ ھک نیست اگاں ما وت اے وڑ ءَ بِہ بہ ایں یک گریبے ءِ زھگ مہ وان ایت ءُ ھِچ مہ زانت بوت کنت کہ مارا ھک مہ رس ایت ھم ! اگاں ما پہ پدمنتگیں راج ءَ چیزے کُت نہ کَن ایں باید اے نہ اِنت کہ آ چیزے کنگ لوٹ ایت ما آئی ءَ را دلپروش بہ کن ایں مئے پرز بیت ما آئی ءَ را دلبڈی بِہ دے ایں تانکہ آ دیم ءَ جُنز اِت کُت بِہ کنت آ وتی مکسد ءَ سوبمَنْد بِہ بیت اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

چہ سبی ءَ کاؤنٹر ٹیرزم ڈپارٹمنٹ ءَ ورنایے ٹپی ایں جاورانی تہ ءَ دزگیر کنگ ءَ پد ناشناسیں جاھاں بُرتگ۔

سربیتگیں اھوالانی رد ءَ سئے شمبے ءِ شپ ءَ بلوچستان ءِ دمگ سبی ءِ ھند گزی ءَ چہ کاؤنٹر ٹیرزم ڈپارٹمنٹ ءُ چیریں ادارگانی کارندھاں لٹ کُٹ ءَ پد ٹپی ئیں جاورانی تہ ءَ ورناہ دزگیر کنگ ءَ پد گوں وت بُرتگ کہ چریشی ءَ ورناہ ءِ درگت ءَ ھچ پئیمیں اھوال دیم ءَ نئیتکگ۔

بیگواہ بیتگیں ورنا‍ ءِ پجار رضا محمد ء شیر محمد مگسی ءِ نام ءَ بیتگ۔ اھوالانی رد ءَ بیگواھی ءِ آماچ بیتگیں ورنا ءِ دو برات ھم دو سال پیسر ءَ پاکستانی لشکریانی دست ءَ کُشگ بیتگ اَنت۔

زانگ بہ بیت چد ءُ پیسر ھم سی ٹی ڈی ءَ بلوچستان ءِ جتاجتائیں دمگانی تہ ءَ مردمانی دزگیری اگاں میڑانی تہ ءَ کُشگ بئیگ ءِ ٹاہ داتگ گوست ءَ چُشیں وئیلانی تہ ءَ دزگیر اگاں میڑانی تہ ءَ کُشگ بیتگیں مردمانی پجار پیسر ءَ چہ بیگواھیں اگاں دزگیریں مردمانی رد ءَ بیتگ۔

میان اُستمانی پھناتاں نام کشوکیں کرسٹیانو رونالڈو سعودی عرب ءِ النصر کلب ءِ گون ءَ مسام ءَ پد یکشل ءَ سرگپ اِنت – فٹبال ءِ جتا جتائیں گوازی کنوک ءُ آئی ءِ دوستدار اے چیز ءَ مزنیں نگاھے ءَ چار اَنت-

العربیہ نیٹ ءِ رد ءَ کسٹیانو رونالڈو گڑاؤنڈ ءَ ڈن ءِ پرکاریاں چاروکانی ھم نگاھانی دیم ءِ دید بیتگ-

النصر کلب ءِ دیتگیں واب سانمند اَنت پرتگالہ فٹبالر ءَ زردیں شرٹ ءِ گورا کنگ ءَ اے گپ گوشت گڑا اے گپ سرجمیں جھان وتی تہ ءَ پتات ءُ مھلوک مرسول پارک گراؤنڈ ءَ رونالڈو ءِ چارھ ءَ رھادگ بیت اَنت کہ اود ءَ آئی ءِ اولی میچ بوگی اَت –

بلے اے میچ ءَ رونالڈو ءَ گوازی نہ کتگ بلے آ گراؤنڈو ءَ سر بیوکیں مردمانی تہ ءَ اولی مردم اَت کہ اسٹیج ءِ سر ءَ جاڑیگ ات ءُ اتکگیں مردمانی گون ءَ اکسکاری کنگ ءَ ات-

وھدیکہ آئی ءِ اکس چاگردی ترامجاھاں سر بیت اَنت گڑا آئی ءِ پنجگ ءَ بستگیں گڑیال دنیا ءِ دیم ءَ ھالانی گچین جوڑ بیت کہ آئی ءِ تہ ءَ عربی لبز نبشتگ اَنت-

کرسٹیانو رونالڈو ءَ چونیں گڑیالے دست ءَ کتگ؟ ایشی ءِ درگت ءَ واچ ورلڈ، العربیہ نیٹ ءَ گوشتگ اے رولیکسے برانڈ کوسمو گراف ڈیٹونا گڑیالے ایشی ءِ توک ءَ ھیرا ھوار اَنت ایشی ءِ نام نامی ئیں فرانسیسی بریڈ ءَ ایر کتگ-

واچ ورلڈ ءِ رد ءَ عربی لبزاں ھواریں اے گڑیال ءِ نھاد کساس شش لک ءُ پنجاہ ھزار سعودی ریال اِنت ءُ ایشی ءِ اولی ماڈل نوزدہ سد ءُ شست ءُ سَے ءَ دیم ءَ اتکگ بیتگ-

اے گڑیال بنکی رنگ ءَ کار ریسرز ءِ اژدری ءِ واستا جوڑ کنگ ءُ دیم ءَ ایر کنگ بیتگ ءُ وتی جوانتریں وھد ءُ پاسانی دارگ ءِ نزام ڈیل ءَ ھستیں سَے کاؤنٹرزیں گڑیالے – ایشی ءِ چین ءُ ڈیل اسٹین لیس اَنت اے گچینی رنگے ءَ مھکم کنگ بیتگ ءُ ایشی ءِ سربُرا سُھر ءُ چاندی کسان کسانوکیں ٹکر جنگ بیتگ اَنت-

ھالی وڈ ءِ نامی ئیں ازمکار لیونارڈو ڈی کیپریو ءِ تامر ٹائی ٹینک ءِ شنک بیگ ءَ 26 سال گوزگ ءَ ابید ھم انگت ءَ دنیا ءَ نامان اِنت-

اے تامر ءَ ھالی وڈ ءَ ھوار دنیا ءِ تامرانی راجدپتر منٹینتگ ھمود ءَ اے تامر ءَ چہ ازمکاراں ھم بازیں چیزے دربرتگ-

سال نوزدہ سد ءُ نود ءُ ھپت ءَ شنگ بیتگیں اے تامر ءِ بارو ءَ نوکیں گپ دیم ءَ اتکگ اَنت کہ گوستگیں روچاں اے گپ پدر بیتگ لیونارڈو ڈی کیپر یو ءَ اے تامر ءِ سر ءَ وتی ایر کرتگیں زراں شانزدہ کچ گیش زر گپتگ-

ویب سائٹ کوئی موئی ءِ رد ءَ اے تامر ءِ شنگ بیگ ءَ پیسر اے بلاک بسٹر بیگ ءِ ھچ امیت نہ بیتگ چرے سبب ءَ لیونارڈو ڈی کیپر یو ءَ ایشی ءِ کار کنگ ءِ کچ ءُ کسانی رد ءَ ائی ءِ نھاد بیست ءُ پنچ لک ڈالر کتگ ات-

بلے لیو نارڈو ڈی کیپر یو ءَ اے جیڑہ سرجم کتگ اگاں اے تامر باکس آفس ءَ سوبمند بیت گڑا آئی ءِ کچ ءَ گیش زر دیگ بیت اِنت-

چریشی ءَ پد ءَ اے وڑ بوت کہ جیمز کیمرون ءِ اے تامر ءَ باکس آفس ءَ راجدپتری باپاری کتگ ءُ سرجمیں دنیا ءَ ٹینک ءَ دو ارب ڈالر کمائی کتگ-

اے راجدپتری سوبمندی ءَ پد لیونارڈو ڈی کیپر ءِ کسمت مٹ بیت گڑا آئی ءَ مزنیں دپارے دات بزانکہ آئی ءَ را چار کروڑ ڈالر دات گڑا آئی ءِ ایر کرتگیں نھاد ءَ شانزدہ کساس گیش اَت-

لیونارڈو ڈی کیپریو ءُ کیٹ ونسلیٹ ءِ اے راجدپتری تامر دوازدہ سال ءِ وھداں ھالی وڈ ءِ باپاری تکان درستاں نامان ترین تامر بیتگ ات سال دوھزار ءُ نُھ ءَ جیمز کیمرون ءِ تامر اویٹار ءِ ریکارڈ پروشتگے –

کراچی پولیس ءَ سلاہ بندیں گل بی ایل ایف ءَ سیادی داروکیں سَے مردمانی دزگیری ءُ آھانی گور ءَ سلاھانی دستیگ کنگ ءِ ٹاہ داتگ –

پولیس ءِ رِد ءَ اے مردماں چیزے روچ ساری پولیس ءِ سر ءَ اُرش کُتگ بیتگ کہ اُرش ءَ یک کارمند ءِ سک باز زدگ بوتگ وھدیکہ بلوچستان ءَ بوتگیں اُرشاں سَے کارمند مرتگ انت –

کیماڑی ءِ ایس ایس پی فدا حسین جانوری ءَ اھوالکاراں گوں تران کنان ءَ گوشتگ سلاہ بندیں گل بلوچستان لبریشن فرنٹ ءِ سَے مردم عدنان، شھزاد ءُ یاسر چہ اتحاد ٹاؤن ءَ دزگیر کُتگ انت –

آئی ءَ گوشتگ کہ پولیس ءِ سر بوگ ءَ کتکاراں تیرگواری کُتگ کہ پسوی تیرگواری ءَ کتکار زدگ بوتگ انت – اے کتکار چہ درملک ءَ کار گرگ بنت کہ ملک ءِ تہ ءَ تخریب کاری ءِ شوربندی ءَ بوتگ انت –

پولیس ءِ رِد ءَ اشی ءَ پیش بلوچست بوتگیں اُرشاں سَے کارمند مرتگ انت ءُ لھتے روچ ساری ھمے کتکاراں بلدیہ ٹاؤن ءَ پولیس ءِ سر ءَ اُرش کتگ بوتگ کہ چریشی ءَ یک کارمندے حنیف سک باز زدگ بوتگ کہ نادراھجاہ ءَ آئی ءِ الاج بوگ ءَ انت – کتکار مھکمیں وڈی ءَ کار کن انت اشانی تہ ءَ ریکی کنوک ءُ کار کنوکیں ٹولی جتا جتا انت – کتکاراں سِی ءُ یک مارچ سال دوھزار بیست ءُ دو حب ریورڈ دگ ءَ پٹرول پمپ ءَ دزی کتگ ءُ ھشت لک کلدار، موبائیل ءُ دگہ سامان لُٹ اِتگ انت – ھمے کتکاراں گوستگیں سال ءِ بیست ءُ چار دسمبر ءَ مواچ گوٹ پُھل ءَ دزی ءِ میان ءَ دو مردم فرید احمد ءُ محمد فرحان تیرجتگ ءُ زدگ کتگ انت –

پولیس ءِ رِد ءَ اے کتکاراں بینک، پٹرول پمپ ءُ گسانی لٹ پُل ھوار دگہ بازیں دزی ءِ کتگ کہ دپ ءِ وت منّ اِتگے ءُ اے چدوپیسر ھم دزگیر بیتگ ءُ جیل بوتگ انت ءُ اشانی سَے سنگت تتکگ ءُ گار انت آھانی پٹ پول برجاہ انت –

سربوتگیں ھالانی رِد ءَ بلوچستان ءِ دمگ بولان ءَ ناشناسیں سلاہ بندیں مردماں یوفون ٹاور ءِ سر ءَ اُرش کتگ ءُ آ تاوان داتگ دومی نیمگ کیچ ءِ دمگ دشت کھڈان ءَ گوستگیں شپ ءَ پاکستانی پوج پانگس سر ءَ سلاہ بندیں مردماں اُرش کتگ ءُ تاوان داتگ ھمے وڑ کیچ ءِ دمگ اپسی کھن ءَ بمب ڈسپوزل کارندھانی سر ءَ سلاہ بندیں مردماں چیرکتگیں بمبے ءَ گوں نشانگ کتگ اَنت ءُ آ جانی تاوان داتگ اَنت دومی نیمگ ءَ اے اُرشانی زمہ واری جتاجتائیں بلوچ آجوئی لوٹوکیں سلاہ بندیں گل بی ایل اے ءُ بی ایل ایف ءَ منّ اِتگ اَنت-

بلوچ لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ گوستگیں شپ ءِ ساھت یکّ ءَ سرمچاراں کیچ ءِ دمگ دشت کھڈان بازار ءَ برجاھیں پاکستانی پوج پانگس سر ءَ راکٹ ءُ اے ون گولاں ءُ وتکار مزنیں سلاھاں چہ اُرش کتگ- سرمچاراں جوانیں وڑے ءَ پانگس نزیک ءَ نشانگ کتگ، چریشی ءَ بازیں راکٹ ءُ گولہ پانگس تہ ءَ کپتگ اَنت چریشی ءَ پوج ءَ مزنیں کچے ءَ جانی ءُ مالی تاوان چست کنگ کپتگ-

جارکش ءَ دیمتر ءَ گْوشتگ کہ مروچی چارشمبے ءِ روچ ءَ کیچ ءِ دمگ آپسی کھن ءَ دُژمنیں پوج ءِ کاروان ءِ نشانگ کنگ ءِ ھاتر ءَ سرمچاراں یک تراکناکیں شوروے چیرکتگ ساھت سے ءُ سی ملٹ ءَ کاروان ءَ ساری بمب ڈسپوزل ٹولی سر بیتگ اَنت ءُ بمب ناکاراہ کنگ ءِ جُھد اِش کتگ گُڑا سرمچاراں ریمورٹ کنٹرول بمب ءَ گوں تراکینتگ چریشی ءَ چہ بمب ڈسپوزل ٹولی ءِ دوئیں کارندہ سک ٹپی بیتگ اَنت-

جارکش ءَ گْوشتگ زورگریں پوج سر ءَ اُرش زورگپتگیں بلوچستان ءِ وتواجھی ءَ تاں برجاہ بنت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں یک درشانے ءِ تہ ءَ گْوشتگ کہ بی ایل اے ءِ سرمچاراں بولان ءِ دمگ ڈھاڈر سنی یوفون کمپنی ءِ یک ٹاورے ءِ مشینری راکٹ ءُ دگہ سلاھاں چہ تباہ کتگ-

جیئند بلوچ ءَ گْوشتگ کہ بلوچ لبریشن آرمی ھال ایوالی کمپنی پیسر ءَ کڈن کتگ اَنت کہ آ زورگریں پاکستانی پوج ءِ گوشگ پد ءَ ٹاوراں مک کنگ ءُ دُژمن ءِ آسراتی دیگ ءَ یل بکن اَنت-

جارکش ءَ دیمتر ءَ گْوشتگ کہ بلوچ لبریشن آرمی اے اُرش زمہ واری ءَ منّ اِیت ءُ اے تچک کنت گْوش اِیت کہ زورگریں پوج ءُ آئی کمکارانی سر ءَ مئے اُرش برجاہ بنت-

ایرانی لشکر ءَ تیرگواری ءَ یک گاڑی ءِ سر ءَ تیرگواری کرتگ ءُ چریشی ءَ گاڑی ءِ ڈرائیور بیران بیتگ-

سر بیتگیں اھوالانی رد ءَ روکپتی بلوچستان ءِ بنجاھی شھر زاھدان ءَ ایرانی لشکر ءَ یک گاڑی ءِ سر ءَ تیرگواری کرتگ ءُ چریشی ءَ گاڑی ءِ ڈرائیور حسن سفاری مینگل ء اکبر جھمنند شیر آباد بیران بیتگ-

ھالانی تہ ءَ گوشگ بیتگ کہ حسن ءَ لائنسس نہ بیتگ چریشی ءَ آ نہ اوشتاتگ ءُ گاڑی ءِ سر ءَ تیرگواری کنگ بیتگ ءُ حسن بیران بیتگ-

زانگ بہ بیت ھمے ھپتگ ءِ توک ءَ اے سیمی وئیل اِنت کہ روکپتی بلوچستان ءَ پیش آیگ ءَ اِنت ءُ چد ءُ پیسر سراوان گلشن ءَ ایرانی لشکر ءِ تیرگواری ءَ یک کسے بیران بیتگ ات ءُ ھمے وڑ گوستگیں دو روچ پیش خاش ءَ ھم تیرگواری ءَ دو ورنا بیران بیتگ ات اَنت-

روکپتی بلوچستان ءَ ھمک سال ایرانی لشکر ءِ تیرگواریاں بازیں کچے ءَ مردم بیران ءُ زدگ بوگ ءَ اَنت-

بلوچستان ءِ جتائیں دمگاں تُرندیں برپ باری ءِ سبب ءَ دگ بند بیتگ اَنت ، مساپر پس اِتگ اَنت-

بلوچستان ءِ دمگ زیارت، سنجاوی ءُ کان مھترزئی برپباری ءَ پد چاریں نیمگاں چہ کوھانی سر ءَ یک دلکشیں ندارگے گندگ بیتگ، برپباری ءِ سبب ءَ کان متیرزئی ءُ سنجاوی ءَ شھدگ ھم بند بیتگ اَنت، زیارت، توبہ کاکڑی ، کنجوغئی ءَ ھوار بلوچستان ءِ گوریچانی دمگاں شپ ءِ وھد ءَ تاں برپباری برجاہ ءَ اِنت-

بلوچستان ءِ دمگاں زیارت، کان مھتر زئی، توبہ اچکزئی ءِ کوھاں زمستان مولم ءِ اولی رند ءِ اِنت کہ برپباری نکش کنگ بیتگ، دومی نیمگ ءَ بلوچستان ءِ دمگاں پشین، قلعہ عبداللہ، سرانان، خانوزئی ءُ مسلم باغ ءَ ھور بیتگ روکپتی گواتانی یک دْرچے بلوچستان ءَ پُترگ ءَ پد شال ءَ نیمروچ ءَ دنز ءُ گبار بیتگ ءُ روچ ایربکگ ءَ کوھاں کمو نزور ءُ کمو تُرندیں ھور بیتگ چریشی ءَ مولم سارت بیتگ-

ھُزدار ، کلات ، مستونگ ءُ بولان ءَ ھَور بیتگ وھدے کہ کلات ءَ ھور ءَ پد سوئی گیس ءِ پریشر ءِ تہ ءَ کمی اَتکگ چریشی ءَ شھریاں دلسیاھی دیمپان کنگ کپتگ-

مھکمہ مولمی ءَ مروچی بلوچستان ءِ گیشتریں دمگاں مولم ھُشک ءُ سارت وھدے کہ کش ءُ گور ءَ کمو باز دنز ءُ گبار ءِ گمان اِنت- برپباری ءِ سبب ءَ سارتی ءِ تُرندی گیشی آئندگ ءَ بیست ءُ چار کلاکانی تہ ءَ اے دمگاں گیش برپباری ءُ ھور گمان اِنت-

ھمے وڑ برپباری ءِ سبب سنجاوی سٹری ءُ کان میترزئی ءَ بُنجاھی شھدگ گاڑیانی روگ ءُ آھگ مھتل بیتگ، برپ یکجاہ سبب ءَ شترانکی سبب ءَ روگ ءُ آھگی جام بیتگ مھکمہ پی ڈی ایم اے ءِ کُمکی بیڑ برجاہ ءَ اِنت-

اے دمگاں سارتی ءِ تُرندی تہ ءَ گیشی ءِ ھمراھی ءَ شال ، کلات ءُ دگہ دمگاں گیس بند بوگ ءِ شکایات ھم دیم ءَ آھگ ءَ اِنت سوئی گیس پریشر ءَ کمی ءَ چہ شھریاں دلسیاھی دیمپان اِنت مھکمہ مولمی رِد ءَ بلوچستان ءِ گیشتریں دمگاں مولم مرچی ھم سارت اِنت-

مروچی شال ءَ کم چہ کم درجہ ھرارت 02 ڈگری سینٹی گریڈ نکش کتگ تربت ءَ 17 ڈگری سینٹی گریڈ، سبی ءَ 09 ڈگری سینٹی گریڈ گوادر ءَ کم چہ کم درجہ ھرارت 14 ، جیونی ءَ 16 ءُ پسنی ءَ 15 ڈگری سینٹی گریڈ بیتگ-

ھمے وڑ سارتی ءِ تُرندی ءَ دگہ دمگاں برجاہ بیتگ اود ءَ ھُزدار ءَ کم چہ کم درجہ ھرارت 06 ڈگری سینٹی گریڈ کلات ءَ منفی 01 ڈگری سینٹی گریڈ نوکنڈی ءَ کم چہ کم درجہ ھرارت 12 ڈگری سینٹی گریڈ، ژوب 02 زیارت ءَ کم چہ کم منفی 05 ڈگری سینٹی گریڈ نکش کنگ بیتگ-

ھمے وڑ شال ءَ گوات ءِ تہ ءَ نمب نسبت 25 درسد گوادر ءَ 63 درسد، کلات ءَ 41 درسد سبی ءَ 50 نوکنڈی ءَ 12 درسد نکش کنگ بیتگ-

جنگ بیرانی ءِ نام اِنت

نبشتہ کار: آئشہ بلوچ

دی بلوچستان پوسٹ

پہ اشکُنک جنگانی کِسّہ وش اَنت بلے جنگ کنگ پہ ھمُک مردم ءَ ارزان نہ اِنت ءُ بزاں جنگ تباھی ءِ نام اِنت البت آجوئی ءِ واستا جنگ المی انت، آجوئی ءِ جنگ ءَ ھزاراں کساس نوجوان ھم شھید کنگ بیت، ھزاراں کساس گار ءُ بیگواہ ھم کنگ بیت، آجوئی ءِ گِرگ ءُ وتواجھی یک کسانیں گپے وَ نہ اِنت۔

بلے مروچی ھمے ورناہ کہ پہ بلوچ ڈیھ ءِ آجوئی ءِ ھاتر ءَ کُربانی دیگ ءَ اَنت ءُ شھید بوگ ءَ اَنت ھزار سلام ھمے ورناھاں بات کہ پہ وتی سرزمین ءُ گلامیں راج ءِ آجوئی ءِ ھاتر ءَ ھر رنگیں تکانسری اُوپار کنگ ءَ اَنت۔ اگاں ما ھمے ورناھاں کُمک کُت نہ کن ایں آیانی ھمراھداری ءَ کُت نہ کن ایں، گُ٘ڑا باید ھمیش اِنت کہ ما آیانی ھلاپ ءَ ردیں گپ ءُ ھبر ھم مہ کن ایں۔

لاتینی امریکہ ءَ را چیرجنگی ءَ بازیں پْروشت ءُ پْروش دات، آشوبی مردماں جْوانیں رنگے ءَ جُھد کت ءُ جنگ داشت بلے مئے ھمے ورناہ کہ جنگ کنگ ءَ اَنت ما نند این ءُ ھیشانی ھلاپ ءَ چاگرد ءِ توک ءَ رنگ رنگیں گپ ءُ پوتاری کن ایں، ھمے چاگرد ءِ توک ءِ ورناہ چہ آیانی ھمراھداری ءَ وت ءَ دور دار اَنت۔

یک گپے وَ ھست کہ ماں آشوبی جُنز ءُ راجی آجوئی ءِ جنگ ءَ جُھدکار ءُ بے گُناھیں مردم شھید بنت، دژمن آیاں جسمانی رنگ ءُ دْروشم ءَ چہ مارا جُتا کنت بلے لگوریں آشوب ءَ ھلاس کُت نہ کنت، گُڑا ما باید انت ھمے آشوبی جھدکارانی رِد ءَ ھوار بہ ایں دانکہ آشوب مئے چاگرد ءُ سرزمین ءِ چاریں نیمگ ءَ چو رُژنائیں ماہ ءِ وڑ ءَ شنگ ءِ تالان بہ بیت ءُ مئے آؤکیں پدریچ ءَ پہ رُژنائی ءِ تالان بہ کنت۔

ما چہ کار(ھمل) کنگ ءَ دور ایں گُڑا الم جنگ مارا تباھی ءِ نیمگ ءَ بارت۔ اگاں ما کار ءِ میدان ءَ ایر بہ کپ ایں گُڑا اسل ءَ آجوئی ءِ گِرگ پہ مئے واست ءَ ھنچو گِران نہ بیت، چوناہ ءَ دُگنیا ءِ توک چوشیں چیزے نیست کہ آ پہ بنی آدم ءَ گران بہ بیت ءُ آ کُت ئِے مہ کنت بلے گام جنگ باز ارزشت دار ایت، آجوئی پہ لوگ ءِ نندگ ءَ نہ رس ایت ،آجوئی پہ ورناھانی ایرجنگ ءَ نہ رس ایت۔ راجی شائِر واجہ رھم الی مری گْوش ایت-

“ھَیرانی تمن ویران اِنت
سیت ماں شَکّلیں جنگان اِنت”

بزاں ایمنی لوٹوکیں بلوچ تمن(راج ءُ آبادی) ءِ ڈیھ برباد اِنت پرچا کہ دّژمن ءَ تئی سر ءَ زورانسری کُتگ۔ تئی سر اُرش ئِے کُت ءُ ترا گُلامے جوڑ کُت۔ انی سیت(پائدگ) تھنا شیرکِنیں راجی آجوئی ءِ جنگ ءَ اِنت کہ دُژمن ءَ پہ تو دِگہ ھچ در ءُ راہ نہ اشتگ۔

بزاں شائِر گْوش ایت آجوئی کُربانیانی مانزمان اِنت، آجوئی ھون لوٹ ایت، آجوئی ءَ ھون ءِ درکار انت، دانکہ سھرچکیں ھون مہ شنز اَنت تُنیگیں زمین سیر آپ نہ بیت، بلے ما ھوناں وت ریچ این ءُ دُژمن ءِ رندگیری ءَ کن ایں، وتی ورناہ ءُ راجی جھدکاراں پیسر ءَ شھید کنائین ایں، آ واب کہ ھمے ورناھاں دیستگ اَنت چہ آ وابانی سرجم بوُگ ءَ پیسر ما آیاں نکس ءُ تاوان بار کن ایں۔

انوگیں وھد ءُ ساھت ءَ بلوچ راج ءَ یکمشتی ءُ یکجاھی ءِ سک زلورت اِنت، ما چہ ایرجنگ ءُ پوتاری ءَ آجو نہ بہ ایں! آجوئی ءِ ھاتر ءَ آشوب آرگ لوٹ ایت، پیسر ءَ آشوب ءَ چہ لوگ ءَ بیار ایں گُڑا چاگرد ھم آشوبی بیت ءُ جنگ ءِ دیمپان بیت انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔