TBP Balochi

بلوچستان ءِ بنجاھی شھر شال، زیارت ءُ دگہ دمگاں آپ بادینوکیں سارتی بے کساس گیش بوتگ، ھمے وڈ پنجگور کیچ ءَ ھوار ءَ دگہ بازیں دمگاں چہ گوریچ ءَ مردم گسانی تہ ءَ نندگ ءَ لاچار کُتگ انت –

گیشیں ھالانی رِد ءَ بلوچستان ءِ بنجاھی شھر شال ءَ بے کساس سارتی ءِ سوب ءَ دمک ءُ دگ ءُ پیپانی تہ ءِ آپ بد اِتگ انت –

موسم ءِ بنشون ءِ رِد ءَ شال ءُ کش ءُ گور ءِ دمگانی موسم ساپ انت بلے سارتی بے کساس گیش بوتگ – شال ءَ ھوار سرجمیں دمگ ءَ گیس ءِ پریشر سک باز کم انت ءُ بازیں دمگاں گیس نیستی ءِ ھساب انت – بلوچستان ءِ شال ءَ ھوار زیارت ، کلات، مستونگ، پشین، کلعہ سیف اللہ ءَ ھم سارتی گیش بوتگ – کلات ءُ زیارت ءَ ھم گیس پریشر نیستی ءِ ھساب انت –
زیارت ءَ اے رندی زمستان ءِ سارتریں روچ مرچی بوتگ کہ اودا سارتی 15—سنٹی گریڈ نبشتہ کنگ بوتگ – موسم بنشون ءِ رِد ءَ گوستگیں روچ ءَ زیارت ءَ دوازدہ ڈگری سنٹی گریڈ نبشتہ کنگ بوتگ – شال ءَ مرچی کم چہ کم 8— کلات ءَ 11— ژوب ءَ 5— پنجگور ءَ چار نبشتہ کنگ بوتگ –

وھدیکہ کیچ ءِ دمگ بلیدہ، ھوشاپ، تجابان، دگہ دمگاں ھوار پنجگور ءَ گوریچ تُرند کشگ انت ءُ آپ بادینوکیں سارتی ءَ مردم گسانی تہ ءَ نندگ ءَ لاچار کتگ انت – پنجگور ءُ مکران ءِ دگہ بازیں دمگاں لین آسراتی نیستی ءِ ھساب انت ، ھون بادینوکیں سارتی ءِ رکّگ ءِ ھاتر ءَ ٹیل ھم نیستی ءِ ھساب انت ءُ ھُشکیں دار ءِ نھاد گیش بوتگ – گیشیں سارتی ءَ آیگ ءَ گوں کیسکو ءَ ھم مردمانی دلسیاھیانی گیش کنگ ءَ ھچ وڈیں راہ یل نہ داتگ بازیں جاھاں فیڈرز والٹیج ھنچوش کم کتگ کہ موبائیل ھم چارج نہ زور انت بازیں جاھاں وا لین ءِ جند نیست- کیچ ءِ ھم گیشتریں دمگاں ھمے آسراتیانی ھمے ھال انت –

بلوچستان ءِ دمگ کیچ مند ءَ جاندراھی ءِ آسراتی ءِ نہ بوگ ءِ سوب ءَ یک دگہ زھگے چہ وتی زند ءَ زبھر بوتگ –

گیشیں ھالانی رِد ءَ یک سالیگیں زیدان ء محمد عالم جھمنند مند نوکیں کھن کُلگ ءِ سوب ءَ ایمرجنسی سول ھسپتال مند ءَ برگ بوتگ کہ اودا آکسیجن آسراتی نہ بوگ ءِ سوب ءَ پوجی بنجل ءَ برگ بوتگ کہ ھمودا ھم آسراتی ءِ نہ بوگ ءِ سوب ءَ یک سالیگیں زھگ بیران بوتگ –

زانگ بہ بیت اشی ءَ پیش ھم یک جنکوئیں زھگے آسراتی نہ بوگ ءِ سوب ءَ بیران بوتگ ات –

دمگی مردمانی گوشگ انت مند ءِ نادراھجاہ ڈاکٹر ءُ ھر وڈیں بنکی آسراتیاں زبھر انت ءُ پدا بازیں دمگی مردمے پاکستان اسمبلی ءِ وزیر انت بلے مند ءَ بنکی آسراتیانی نہ بوگ وزیر ءُ دمگی معتبر بے وسی ءِ گواہ انت –

مند ءِ مردمانی گوشگ انت کہ وفاقی وزیر زبیدہ جلال دو دھک انت کہ ھمے دمگ ءَ گچین کنگ بیت ءُ اسمبلیاں رؤت بلے ادا سول ھسپتال ءَ درد ءِ یک گولی ءِ ھم دست نہ کپیت –

دمگی مردمانی رِد ءَ ایف سی بنجل ءَ برجاھیں نادراھجاہ ءَ تاں سر بوگ ءَ نادراہ نہ رک انت –

آھاں چہ سوبائی جانسلامتی ءِ وزیر ءَ گوں لوٹ کتگ کہ سول ھسپتال پچ کنگ بہ بیت ڈاکٹر آرگ بہ بنت ءُ بنکی آسراتی دیگ بہ بنت –

دشت مزنبند ءَ پوج ءِ لشکر کشی برجاہ ءَ اِنت، دو ھنداں پوج ءُ سلاہ بندانی میان ءَ میڑ بیتگ-

بلوچستان ءِ دمگ کیچ ءِ تھسیل دشت ءِ کوھی دمگ مزنبند ءَ گوستگیں سے روچاں پاکستانی پوج نیمگ ءَ لشکر کشی برجاہ ءَ اِنت- اِھوالکارانی رِد ءَ پوج ءَ دشت ءِ دمگ نوکیں راہ چہ مزنبند ءَ پُترتگ-

اِھوالکاراں ٹی بی پی ءَ تران کنان ءَ گْوشتگ کہ نوکیں راہ، تگرد توگ، آسکانی گر، کرپاسی ءُ قادر بخش کلگ ءَ پاکستانی پوج ءِ مزنیں کچے لشکر کشی کنگ ءَ اِنت وھدے کہ قادر بکش کلگ ءَ پوج ءُ سلاہ بندانی میان ءَ میڑ ءِ ھال اِنت-

اِھوالکارانی رِد ءَ مروچی ھم نوکیں راہ ءَ پوج ءُ سلاہ بندانی میان ءَ میڑ بیتگ چریشی ءِ آسر ءَ پوج ءِ کارندھاں جانی تاوان چست کنگ کپگ ءِ ھال اِنت-

تنی وھدے پاکستانی پوج ءِ بُنشون ءَ لشکر کشی ءُ میڑانی درگت ءَ درشان شنگ نہ کتگ-

حق دو تحریک ءِ سروک مولانا ھدایت الرحمان چہ گوادر ءَ دزگیر کنگ بیتگ-

سروکِ حق دو تحریک مولانا ھدایت الرحمان گوں ھمراھاں گوادر ءِ دمگی آمیدگس ءِ کش ءُ گوراں پولیس ءَ دزگر کتگ، ایشی ءَ پیش دزگیری دیگ ءِ جار جتگ –

مولانا ھدایت الرحمان ھما وھد ءَ دزگیر کنگ بیتگ آ آمیدگس ءَ زمانتی واستا وکیلانی ھمراھاں سر بیتگ –

ھمے سال ءِ بندات ءَ سَے جنوری ءَ سٹی تھانہ گوادر ءَ مولانا ھدایت الرحمان ءَ ھوار آئی ءِ ھمراھانی سر ءَ ارزی نبشتگ کنگ بیتگ – ارزی نامہ ءَ بھتام جنگ بیتگ کہ حق دو تحریک ءِ سروک مولانا ھدایت الرحمان ءَ زھرشانی ءِ مردماناں برانز دیگ ءُ سرکاری گاڑیانی سنگ جنگ ءُ مردم زدگ کتگ اَنت-

چریشی ءَ پیسر پولیس ءَ حق دو تحریک ءِ نندانک ءِ سر ءَ بیڑ بران ءَ حسین واڈیلہ ءَ ھوار بازیں کچے ءَ باسک ءُ شھری دزگیر کتگ اَت ءُ چریشی ءَ پد آ شال ءَ برگ بیتگ ءُ ھمود ءَ دزگیری ءَ اِنت-

گوستگیں روچ ءَ حق دو تحریک ءِ رھشون حسین واڈیلہ ءَ ھوار آئی ءِ ھمراہ سَے روچ ءَ جسمانی ریمانڈ ءِ واستا کرائن برانچ شال ءِ دست ءَ دیگ بیتگ –

زانگ بہ بیت گوادر ءَ سال دوھزار ءُ بیست ءُ یک نومبر ءَ یک زھرشانی نندانکے بیتگ ات آئی ءِ لوٹ ات اَنت بلوچ زر ءَ گیر کانونی ٹرالنگ، گیر زلوری چیک پوسٹاں ھوار سیمسرانی باپار ءِ سر ءَ بندش ءِ ھلاسی ھوار ات اَنت ءُ یک ماھے ءَ پد انیگیں سر وزیر بلوچستان ءَ سرجمیں لوٹ من اتگ ءُ نندانکی زھرشانی ھلاس کتگ ات-

یک سالے ءَ پد من اتگیں لوٹانی ناسرجمی ءَ حق دو تحریک ءَ شھید لالا حمید چوک ءَ تمبو جنگ بیتگ ءُ زھرشانی بندات کتگ ات اَنت ءُ یک ماھے ءَ برجاھیں زھرشانی بندات بیتگ ات بلے سرکاری مردم گپ ءُ رپ نیتکگ اَنت-

ھمے وھداں نندانک گوادر پورٹ دگ ءَ برتگ ءُ اود ءَ سرکار ءَ کریک ڈاؤن بندات کتگ ات ءُ زھرشانی نندانک پروشت ءُ پروش کتگ ات ءُ گوادر ءِ شھر ءَ یک سد ءُ چل ءُ چار جتگ ات ءُ شھر ءَ بازیں روچاں نیٹ ورک بند کنگ بیتگ انت-

دومی نیمگ ءَ مولانا پولیس ءِ دست ءَ دزگیری ءَ پد وکیلاں آمیدگساں روگ ءَ دزکشی کتگ-

راجی زُبان ءِ جُھد ءُ بلوچ زالبول

نبشتہ کار: آئیشہ بلوچ

دی بلوچستان پوسٹ

گِند ئے اِمرُوز ءِ دزگٹّی سک باز اَنت، بنی آدم ءَ پہ وتی لاپ ءِ شوھازگ ءَ سک جُھد کنگ لوٹ ایت۔ چہ ھمے اِمرُوز ءِ دذگٹیاں جنیں آدم ءِ دزگٹّی چہ مردین ءَ باز اَنت۔ جنین آدم ءَ لوگ ءِ کار سک باز اَنت۔ ھاس بلوچ چاگِرد ءِ توک ءَ زالبوالاں گُدشُودی، چُلّ ءِ کار ءُ نُنُکانی ھیالداری ءِ وڑ ءَ دِگہ بازیں انچیں کار ھست کہ دزھُورکی ءِ وھد کَشگ سک باز گِران اِنت۔ گُڑا اے وڑیں ھالاتاں بلوچ زالبول پہ وتی راج ءُ راجی زُبان ءَ چے کُت کن اَنت؟-

گِند ئے اِے یک راستیں جُستے کہ منی بازیں دزگْوھارے من ءَ اِے سوال ءَ جُست کنت کہ ما زالبوالاں سک باز کار ھست گُڑا ما چون ءَ وھد دات کن ایں ءُ بلوچی دربر ایں؟ گُڑا من وتی راج ءِ زالبوالاں چیزے نبشتانکی دْروشم ءَ گْوشگ لوٹ آں کہ اے جِست ءِ پسّو نبشتانک ءِ برکت ءَ بلوچ راج ءِ ھر وانِندھیں زالبول ءَ سر بہ بیت۔ گِند ئے پہ زُبان ءَ کار کنگ یک راجی کارے، راج ءِ شھزانت ءُ زُبانزانت واجہ ناگُمان بلوچ گْوش ایت “دانکہ کَسے زُبان دوست مہ بیت آ راجدوست بیت نہ کنت” بزانکہ زُبان دوستی، راجدوستی ءُ وتواجھی ءِ جُنز اے دْراہ وت ماں وت ھمگرنچ اَنت۔ بزاں زُبان دوستی ءُ زُبان ءِ سر ءَ کار کنگ ءُ راج ءِ تہ ءَ راجی زُبان ءِ ارزِشت ءُ بستار ودی کنگ اِے دْراہ راجی آشوب ءِ بھر اَنت ءُ دُنیا ءِ تہ ءَ بے زالبولانی بھر زُورگ ءَ آشوب سوبمند نہ بوتگ اَنت پمیشکا ما گِندگ ءَ ایں کہ پہ بلوچ آشوب ءِ سوبمندی ءَ شھید کریما بلوچ، بیگواھیں زرینہ مری، شھید پوزیا بُگٹی، شھید سرباز شاری بلوچ، بانُک ھُوران، لُمہ یاسمین ءُ بانُک ماھرنگ بلوچ ءِ وڑیں دِگہ بازیں شیرزالانی نام مئے بلوچ آشوب ءِ توک ءَ ھست اَنت۔ بزانکہ بلوچ آشوب ءَ بلوچ زالبولانی رھشُونی ھم ھست، آزات ھیال ءُ راجمستریں بلوچ چاگِرد ءَ ما زالبول گوں وتی مردیناں برابر ایں۔ گْوش اَنت کہ زُبان بَھر ءُ بانگیں راجاں نزیک کار ایت، زُبان مھلوک ءَ راجدوست کنان ءَ یکمُشت کنائین ایت۔ زُبان راج ءِ پجّار اِنت، تھنا ھما راج زِندگ بنت ءُ دیمروی کن اَنت وھدیکہ آ وتی زُبان ءَ وان اَنت ءُ نبشتہ کن اَنت۔ گُڑا بچار ایں کہ ما بے آسراتی ءُ ایردستیں بلوچ راج پہ وتی زُبان ءَ چے کُت کن ایں؟-

گِند ئے اگاں یک بلوچ زالبولے ءَ سمارٹ پون ھست، اگاں وٹس ایپ ءُ پیسبوک ءَ کارمرز کنگ ءَ اِنت گُڑا ما آ زالبولاں اِے وَ نہ گْوش ایں کہ شما وتی لوگ ءِ کاراں یل بکن اِت ءُ دْراھیں روچ بلوچی بِوان اِت یا بوانین اِت۔ بنی آدم ءِ توری ھر وڑیں دزگٹّی یے بیت بلے زُبان دوستی ءِ مارشت آئی ءَ ھر روچ دہ یا بیست دمان ءِ دزھُورکی وَ الم دنت پمیشکا شُما تھنا راجی زُبان ءِ جُھد ءَ ھوار ءُ ساڑی بِہ بَہ اِت اے ھم پہ ما گنج اِنت۔ باید اِنت ما دلپروش مہ بہ ایں کہ مارا پہ وتی راجی زُبان ءِ وانگ ءُ دربرگ ءَ وھد نہ رس ایت۔ اگاں تھنا ھر روچ دہ دمان ھم بہ رس ایت گُڑا ھمے دہ یا پانزدھیں دماناں مُدام بلوچی دَرونت ءُ راجدوستی ءِ نبشتانکاں وانان ءَ وتی راجی زُبان ءِ راست نبیسّگ ءَ ھیل بکن ایں۔

یک وٹس ایپی گلے ءِ باسکانی(مِمبر) گُنجائشت چہ 1000 ءَ گیش اِنت۔ اگاں یک زُبان دوستیں زالبولے بلوچی وٹس ایپی وانگجاھے پچ کنت ءُ وتی دزھُورکی ءِ وھد ءَ بلوچ راج ءِ نودربراں بلوچی بوانین ایت گُڑا بزانکہ آ بلوچی ءِ یک دْراھیں اسکولے وانینگ ءَ اِنت، بزانکہ یک کالجے پچ کُتگ ئِے۔ ایشی ءِ مستریں درور پَسّنی ءِ جھنِندیں بانُک جمائتی بلوچ گوں دزگْوھاران اَنت کہ ھمے بانُک بلوچ راج ءِ نودربراں وٹس ایپی وانگجاہ کہ نام ئِے “کندیل آنلائین ایجوکیشن” اِنت، بلوچاں انگریزی، میڈیکل سائنس، انجینئرنگ(پِزکس، میتھز ءُ کیمسٹری) ءِ سبجیکٹاں ھوار راج ءَ بلوچی ءَ ھم وانینگ ءَ اَنت۔ وش ٹی وی ءِ بانک ءِ جُھدانی سرجمیں ڈیکومنٹری آن ائیر کُتگ۔ ھمے داب اگاں بانُک زھداہ رئیسی، بانُک اندلیب گِچکی، بانُک شازیہ بلوچ، بانُک ھمیدہ بلوچ ءُ بانُک پوزیا بلوچ ءِ وڑ ءَ یک دربُرتگیں گْوھارے تھنا ھر روچ یک بلوچی دَرونت ءُ یک راجدوستی ءِ نبشتانکے ماں وتی وٹس ایپی بلوچی وانگجاہ ءَ راہ بدنت۔ گُڑا نودربر چہ ایشانی وانگ ءَ کم کم ءَ وت ھیل کن اَنت۔ چوناھا مرچی بلوچی زُبان ءِ شریں دَرونت ءُ راجدوستی ءِ نبشتانک ماں شوشل میڈیا ءَ ھم البار(عام) اَنت۔ پمیشکا ما گوں راج ءِ بانُکاں دزبندی کن ایں کہ وت ءَ مُدام ھمے بلوچی وٹس ایپی وانگجاھاں ساڑی بہ کن اِت، بنداتی روچاں بلوچی دَرونت ءُ نبشتانکاں وانان ءَ وتی راجی زُبان ءِ راست نبیسّگ ءَ ھیل بکن اِت، وھدیکہ شُما بلوچی وانگ ءُ راست نبیسّگ دربُرتگ گُڑا دیم ءَ ھرکَس وٹس ایپی وانگجاھاں اڈ کنان ءَ وتی لوگ ءِ مردم ءُ سْیاداں بلوچی بوانین اِت۔ گِند ئے اگاں ما بلوچی راست نبیسّگ ءَ بلد بیتگ ایں گُڑا ما شریں شائِر ءُ جْوانیں نبشتہ کارے جوڑ بہ ایں ءُ مئے راجی زُبان ھم دیمروی کنت-

چوناھا بلوچی وانگ، نبشتہ ءِ دربرگ ءُ وانینگ مئے یک راجی زمہ واری یے۔ گُڑا باید اِنت ما زالبول بلوچی وت بوان ایں ءُ راج ءَ ھم بلوچی وانگ ءُ دربرگ ءِ سکین بدے ایں۔ وھدیکہ ما زالبول پہ بلوچی زُبان ءِ دیمروی ءَ جُھد کُت گُڑا مئے وانِندھیں بْرات ءُ کماش ھم مئے ھمکار ءُ ھمکوپگ بنت ءُ مئے راجی زُبان بلوچی ءُ براھوئی دیمروی کن اَنت۔ما یک رندے پد ءَ گْوش ایں ھچبر اشتاپ مہ بِہ اِت اگاں ما ھر روچ تھنا یک درونتے ھورت بوان ایں یا تھنا وت ھمے وٹس ایپی وانگجاھاں ھوار بہ ایں ءُ مُدام ساڑی بَہ ایں گُڑا اے ھم گنج اِنت، بزاں ما وت کم کم ءَ ھیل کن ایں۔ باید اِنت ما بلوچ راج ءِ وانِندھیں بلوچ آگاہ بِہ بَہ ایں ءُ دُنیا ءِ دِگہ راجانی وڑ ءَ بلوچ راج ءَ ھم اے دامگی(انٹرنٹی) آسراتی پہ وتی زُبان ءِ دیمروی ءَ کارمرز کنگی اَنت۔

بلوچی شالا دیمروی بکنات، بلوچ راج شالا یکمُشت ءُ تپاک بہ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ پارلیمانی باسکانی نوکیں پاٹیانی تہ ءَ بال کنگ

ٹی بی پی شونگال

سیاسی پریس کارانی رد ءَ بلوچستان ءَ گوستگیں رند ءَ پھک ءُ پلگاریں گچین کاری ھپتاد ءِ دھک ءَ بیتگ اَت اَنت ءُ ھپتاد ءَ پد ھمینچو سرکار ھم گچین بیتگ اَنت، آ چہ مردمانی ووٹاں چہ نہ بلکیں پاکستانی پوج ءِ پالیسیانی رد ءَ گچین کنگ بیتگ اَنت ءُ پوج ءِ پالیسیاں بلوچستان ءِ تہ ءَ کاربند کنگ ءَ بیتگ اَنت۔

ھما پاٹی کہ آ پاکستانی پوج ءِ چیردستی ءَ نہ بیتگ اَنت، آیانی سرکار اگاں ھلاس کنگ بیتگ اَنت یا آیاں سرکار اڈ کنگ ءَ نئیشتگ اَت اَنت۔ نوزدہ سد ءُ ھپتاد ءُ سَے ءَ نیشنل عوامی پارٹی ءِ گیشتری سرکار ھلاس کنگ بیتگ ءُ بلوچستان ءِ تہ ءَ پوج کشی کنگ بیتگ ءُ جام غلام قادر ءِ مھتری ءَ زیرزنداں سرکار کُتگ اَت، نوزدہ سد ءُ نود ءَ نواب اکبر خان بگٹی ءِ جمھوری وطن پارٹی ءَ گیشتری بیگ ءَ ابید ھم سرکار اڈ کنگ ءَ نئیشتگ ات ءُ نوزدہ سد ءُ نود ءُ ھشت ءَ بلوچستان نیشنل پارٹی ءِ سرکار دو سال ءَ پد پندل سازی ءَ پد ھلاس کنگ بیتگ اَت۔

بلوچستان ءِ ھمک گچین کاری ءَ پیسر پولیٹیکل انجینئرنگ بندات کنگ بیت اِنت ءُ سیاسی کارست ، سردار ءُ نواب، منشیات ءِ باپاری ءُ ڈیتھ اسکواڈ جنزینوکانی وپاداری مَٹ بنت اَنت۔ دو ھزار ءُ دو ءَ ھما مردم کہ مسلم لیگ ق ءَ اَت اَنت، آ مردم دو ھزار ءُ ھشت ءَ پاکستان پیپلز پارٹی ءُ دو ھزار ءُ سینزدہ ءَ مسلم لیگ” ن” ءَ گوں بندوک بیت اَنت۔ دو ھزار ءُ ھژدہ ءَ اے درست بریگیڈیئر خالد ءَ شپ ءِ نیام ءَ یکجاہ کُت اَنت ءُ بلوچستان عوامی پارٹی ( باپ ) اڈ کُت گچین کاریاں پد سرکار دست ءَ داتگ اِش۔ بلوچستان ءِ تہ ءَ ملٹری انٹیلی جنس ءُ آئی ایس آئی ءِ وت ما وتی جنگ ءِ تہ ءَ سروزیرانی دیم جام کمال ءُ قدوس بزنجو ءِ دروشم ءَ مٹ بیان بیتگ۔

انی اے درستیں پارلیمانی سیاستداناں پاکستان پیپلز پارٹی ءُ جمیعت علماء اسلام ءِ تہ ءَ بال کُتگ، اے یک اشارگے دنت کہ بلوچستان ءِ تہ ءَ دیمتری سرکار پیپلز پارٹی ءُ جمعیت ءِ بیت یا اگاں دو ھزار ءُ ھشت ءِ پئیمیں سرکار ءِ بیت اِنت، کہ ایشی ءِ تہ ءَ بلوچستان اسمبلی ءِ شست ءُ چار ءِ تہ ءَ تھنا یار محمد رند ءَ ابید کہ آئی ءَ گوں ھما وھدے سر وزیر اسلم رئیسانی ءَ گوں خاندانی دژمنی بیتگ، دگہ شست ءُ سئے بلوچستان اسمبلی ءِ باسکانی گور ءَ وزارت بیتگ اَنت۔

پاکستان پیپلز پارٹی کہ ھژدھمی بدلی ءُ پرگینگی وت مستری ءِ وکالت ءَ کنت ءُ پاٹی ءَ سندھ ءِ اگبالانی پانکجن لیک اِیت، ھمے پاکستان پیپلز پارٹی بلوچستان ءِ تہ ءَ ڈیتھ اسکواڈ ءُ منشیات ءِ باپاریاں پاٹی ءِ تہ ءَ ھوار کنگ ءُ دیمترے سرکار ءَ اڈ کنگ ءِ کوشست کنگ ءَ اِنت۔ بلوچستان ءِ تہ ءَ پارلیمانی سیاست پادمالی ءِ آماچ اِنت ءُ اسمبلی ءِ باسکاں پاکستانی پوج ءِ میجر ءِ کرنل اگدہ ءِ اپسر گیچین کن اَنت، چریشی ءِ سوب ءَ بلوچستان ءِ سرکار لس مھلوک ءِ جاہ ءَ پوجی اسٹیبلشمنٹ ءِ چیردست اَنت ءُ ھمایانی پالیسیاں پیلو کنگ ءَ اَنت۔

گوستگیں سال ءَ چین ءَ امریکہ ءُ یورپی ڈیھاں نھادی باپاری ءِ کمی ءَ ابید ریکارڈ باپاری سرپلس سر بیتگ اَنت-

امریکہ ھال سرکنوکیں ادارہ ایسوسی ایٹڈ پریس ءِ رد ءَ چین گوستگ سال ءَ باپاری سرپلس 877 ارب ڈالر ءَ گیش ءَ سر بیتگ اَنت ھمے وڑ ءَ کساس ایریں چیزانی ھپت درسد گیش گندگ ءَ اتکگ اَنت-

زانگ بہ بیت کورونا وائرس ءِ شنگ ءُ تالان ءِ دارگ ءِ ھاتر ءَ بازیں پابندی ءَ پد چین ءَ بازیں باپاری بنجل شنگھائی ءَ ھوار بازیں انڈسٹریل زونزانی بندش ءِ آماچ بیتگ اَنت-

آدینگ ءَ شنگ بیتگیں چینی کسٹمز ءِ کچ ءُ کساس ءَ سال 2022 ءَ چین ءَ ایرین چیزانی تہ ءَ 3.95 کھرب ڈالر گیش بیتگ ایریں یک اشاریہ یک درسدے ءَ گیش بیتگ دو اشاریہ ءَ ھپت کھرب ءَ سر بیتگ اَنت-

چین ءِ باپاری سرپلس ءَ 2021 ءَ نسبت 29.7 گیش بیتگ اَنت کسٹم ایجنسی ءِ جارکش لوڈالیانگ ءِ یک نیوزے ءَ کانفرنسے ءَ گشتگ کہ چین ءِ درملکی باپاری ءُ ایریں چیزانی تہ ءَ بازیں جیڑھانی ءُ دیمپانیانی دیمپانی بازیں واھگداری بیتگ اَنت-

بلے فیڈرل ریزرو ءُ دگی بنجلانی بینکانی شرح سود ءَ گیشی ءَ پد سال ءِ گڈسر ءَ گمانی ءَ کمی گندگ بیتگ اَنت- ھمے سبب ءَ دسمبر ءَ ایریں چیزانی تہ ءَ 10 درسد کمی بیتگ اَنت-

سال 2022 ءَ چین ءَ امریکہ ءَ دزکپتگیناں سال 2021 ءِ کساس ءَ یک درسدے گیشی گندگ بیتگ اَنت زانگ بہ بیت امریکہ سروک ڈونلڈ ٹرمپ ءَ بازیں وردنی چیزانی تہ ءَ گیشی کتگ ٹیرف کتگ ات –

پورپی پارلیمان ءِ کمیٹی انسان حقوق ءِ سروک ماریہ ایرینا ءِ کرپشن اسکینڈل ءِ دیمپانی ءَ پد وتی اگدو ءَ چہ دزکش بیتگ-

عرب نیوز ءِ رد ءَ بیلجیئم ءَ سیادی داروکیں پارلیمان ءِ باسک ءَ مپت ءَ بالیگانی نپ چست کنان ءَ سپر کتگ ءُ قطر ءِ سرکار ءِ مھمان ءِ رنگ ءَ یک لگژری ھوٹلے ءَ نندگ ءُ اود ءَ درست سنچ ءِ دروشم ءَ نہ بیتگ اَنت-

پورپہ رکن ءِ پارلیمان ماریہ ایرینا ءَ دزکشی ءَ پارلیمان ءِ کسان کمک سرکماش ایوا کیلی ءِ دزگیری ءَ پد دیم ءَ اتکگ وھدیکہ پولیس ءَ ریڈ ءِ وھد ءَ ایوا کیلی ءِ لوگ ءَ چہ شانزدہ لک ڈالر دزکپتگ اَنت چُشکہ گمانی رنگ ءَ قطر ءِ روگ ءُ اود ءَ وتی سنچانی چیر دیگ ءَ لالچ دیگ ءِ رنگ ءَ کارمرد بیتگ اَنت-

ماریہ ایرینا ءَ گوشتگ کہ من اے تچک ءَ گوش آں من اے جیڑگ ءَ ھچ رنگ ءَ ھوار نہ آں راستی ءِ دیم ءَ ایگ ءَ داں من وتی اگدو ءَ دزکش باں-

بیلجیئم ءِ وکداراں من ءَ پارلیمان ءَ دزکشی ءَ نہ گشتگ ءُ نانکہ منی لوگ ءَ اتکگ ءُ نانکہ منی کارگس پٹ ءُ پول کنگ بیتگ نانکہ آمیدگس ءَ من ءَ جست ءُ پرس کتگ-

بلے باسکِ پارلیمانی ماریہ ایرینا اے گپ من اتگ کہ انتزامیہ ءِ رھبند لگتمال بیتگ اَنت ءُ ایشی ءِ زمہ وار آئی ءَ وتی اسٹنٹ ءِ سر ءَ لڈ اتگ –

اے چیزانی راست بیگ ءَ ماریہ ایرینا ءَ دَہ ھزار ءُ یک سد ءُ چل یورو ملام دیگ کپ ایر یا گڑا پورپی پارلیمان ءَ داں یک سالے ءَ بھر زیرگ ءَ بندش جنگ بیت اِنت-

پورپی پارلیمان ءِ کسان کمک سرکماش ایوا کیلی ءُ پارلیمانی ایڈ ءِ رنگ ءَ کار کنوکیں آئی ءِ مرد ءُ دگہ مردم بدگمانی ءِ بھتام جنگ بیتگ اَنت-

دو باسکا پارلیمان ءِ مارک ترابیلا ءُ آنڈریا کوزولینا ءِ درگت ءَ بیلجیئم ءِ واکداں دزبندی کتگ آیانی دزکشی ھم ھلاس کنگ بہ بیت اِنت-

پشمبے ءِ روچ ءَ پورپی پارلیمان ءِ سروک روبرٹا میٹسولا ءَ باسکانی واستا کانود ترند کتگ اَنت ءُ گشتگ کہ سیاسی ءُ گیر سیاسی ٹولیانی گند ءُ نند سرکاری رنگاں کنگ لوٹ اَنت-

ایشی ءَ ابید لھتے وھدانی واستا پارلیمان ءِ باسک فرمز ءِ گون ءَ کار کت نہ کن اَنت نزیک ءُ دورانی واستا ھم کانود ترند کنگ بنت-

گوریچانی بلوچستان ءَ ترندیں گوریچ ءَ گوات ءِ سبب ءَ زند ءِ نزام درشک ءِ دیمپان کتگ – زیارت ءَ منفی یازدہ، کان مھترزئی توبہ اچکزئی ءَ بازین سارتی ءَ گرم ءَ وتی زور یازدہ منفی دَہ کتگ-

پی ڈی ایم اے ءِ رد ءَ پشین، کوژک ٹاپ، قلعہ عبداللہ، خانوزئی ءَ پارہ منفی ھشت ڈگری سینٹی گریڈ ریکارڈ کنگ بیتگ اَنت-

لیویز واکدارانی گوشگ اِنت کوژک ٹاپ ءَ ترندیں سارتی ءَ گیتلو ءُ بس چم ءِ دیم ءَ ابید دگہ جاہ ءَ دیست نہ کنت مردم بازیں گاڑی مھتل کنگ بیتگ اَنت-

لیویز ءِ رد ءَ مساپراں گاڑی یل کتگ ءُ پند ءَ کوھی دمگاں روان بیتگ اَنت ءُ شال ءُ چمن ءِ شھدگ شپ ءَ داں بند کنگ بیتگ-

کان مھترزئی ءَ این پنجاہ ھائی وے بے کساسین گیتلو بیتگ ءُ برپگوارین گوات ھم کشگ ءَ اِنت-

موٹروے پولیس ءِ رد ءَ این پنجاہ شاک ژوب، قلعہ سیف الکہ ھائی وے بازیں جاھاں پاداں آدیم گندگ نہ بیت اِنت شال ءَ پنجاب، کے پی کے ءَ روکیں گاڑی ھانوزئی ءَ دارگ بیتگ اَنت-

سیکٹت کمانڈر موٹروے ءَ گوشتگ کہ شال ءَ روکیں گاڑی کلعہ سیف اللہ ءُ مسلم باغ ءَ دارگ بیتگ اَنت-

کورڈینیٹر وزیر علیٰ بلوچستان موسیٰ جان اچکزئی ءَ شپ ءَ وتی درشان ءَ گشتگ ات کہ سھب ءَ دوبر دگ ءِ پچ کنگ ءِ کار بندات بیت اِنت ءُ آئی ءِ نگھداری ءَ وت کنت-