TBP Balochi

سبحان قیصرانی ءُ سیاد مسعود الرحمن قیصرانی پاکستانی پوج ءَ دزگیر کتگ اَنت بیگواہ کتگ اَنت- اے گپ بیگواھیں سبحان ءُ مسعود کھول ءَ کتگ اَنت-

برات رِد ءَ آ ھمے سال ءِ شانزدہ جنوری ءَ بیگواہ کتگ اَنت کہ گوستگیں دو ھپتگاں چہ بیگواہ اَنت کہ آیانی ھچ وڑیں ھال نیست-

کھول گْوشگ اِنت کہ سبحان قیصرانی ءِ دو سالی ئیں جنکو ماھنور بلوچ وتی پت ءَ بید بے سکون ءُ نادُراہ ءَ اِنت وھدے کہ مئے لوگ پُرسی جاور ءُ بے تاھیری اِنت-

آئی ءَ گْوشتگ کہ منی دوئیں برات ءُ سیاد پیسر ءَ ھم بیگواہ کنگ بیتگ اَنت اشی ءَ پد یک براتے ءُ سیاد یل کتگ اَنت یک براتے یازدہ ماہ دہ روچ ءَ آزارجاھاں ازیت دیگ ءَ پد عیسیٰ نگری بروری دگ شال ءَ ھپدہ جولائی دوھزار ھپدہ دروگیں میڑے ءَ کُشگ بیتگ-

کھول ءَ انسانی ھکانی گل ءُ سیاسی ءُ نودربر پارٹیاں گوں دزبندی کتگ کہ آیانی دوستناکانی یل کنائینگ ءِ ھاتر ءَ توار چست بکن اَنت دانکہ آیانی زندمان بہ رک اَنت-

بالی ووڈ ءِ ازمکار شاھرخ خان ءِ نوکتریں تامر مروچی سینیماھاں جنگ بیتگ، تامر وتی شنگ بئیگ ءَ پیسر بازیں جنجال، بیھار ءُ بائیکاٹی جارانی آماچ بیتگ اَت، بلے اِشی ءَ ابید ھم بالی ووڈ ءِ کنگ خان ءِ تامر ءَ اولی روچ ءَ جوانیں باپار کُتگ۔

پٹھان تامر ءِ درگت ءَ ٹوئیٹ کنان ءَ بالی ووڈ باپار زانتکار ترن آدرش ءَ گُشتگ کہ پٹھان تامر یک بھتریں تامرے، اِشی ءِ تہ ءَ درستیں شئے جوان اَنت، کسہ، سوت، مزن نامیں ازمکار۔ آئی ءَ تامر ءَ پنچ ءَ چہ چار ءُ نیم استار داتگ ءُ گُشتگ 2023 ءِ اولی بلاک باسٹر تامر پٹھان بیت۔

ترن آدرش ءَ دگہ یک ٹوئیٹ ئِے تہ ءَ گُشتگ کہ پٹھان تامر ءَ ھندی تامرانی تہ ءَ درستاں گیشتر پردہ رس اتگ ءُ اِے رد ءَ پٹھان نوں ھندوستان ءَ 5500 پردھانی سر ءَ ءُ میان اُستمان ءَ 2500 پردھانی سر ءَ پیش دارگ بیت اِنت۔

پٹھان تامر ءَ ٹکٹانی باپار ءَ ھم دومی مستریں تامر ءِ جاہ زرتگ کہ تامر ءِ شنگ بئیگ ءَ پیسر اے کساس ءَ ٹکٹ مردماں گپتگ اَنت۔ اے درگت ءَ اولی تامر باھو بلی ھندی ءِ دومی بھر بیتگ کہ آئی ءَ سینیما ءَ آیگ ءَ ساری شش ءُ نیم لکھ ٹکٹ بھا بیتگ اَنت وھدیکہ پٹھان ءِ پنچ لکھ پنجاہ ءُ شش ھزار ٹکٹ بھا بیتگ اَنت۔

پٹھان تامر ءِ سوبمندی پہ بالیووڈ ءَ مستاگی ءِ بیت کنت ؟

تامر زانتکارانی رد ءَ گوستگیں لھتیں سالاں چہ بالیووڈ تامر مزنیں جنجالانی آماچ اَنت ءُ پمیشکا گیشتریں تامر بے سوب بئیگ ءَ اَنت۔

اِشانی تہ ءَ یک مستریں سوبے ھندوستان ءِ راستیں دست ءِ سیاست کنوکیں ھندو نیکراھی ٹولیانی بائیکاٹانی جار ءُ تامر کارانی ھلاپ کمپین جنزینگ اِنت۔ ھمے پئیم پٹھان تامر ءِ ھلاپ ءَ ھم بازیں کمپین جنزینگ بیتگ چشکہ یک سوت ءِ تہ ءَ دیپیکا پادیکون ءِ پوچانی سر ءَ زھرشانی ءُ دگہ بازیں سوب ھوار کنگ بیتگ اِت اَنت۔ بلے پٹھان تامر ءَ گندگ ءَ درستیں پروپیگنڈہ، بیھار، بائیکاٹاں ابید پہ وت ءَ جاہ جوڑ کُتگ ءُ مردمانی گور ءَ سربئیگ ءَ سوبمند بیتگ۔ بازیں زانتکارانی گُشگ ھمے بیتگ کہ کنگ خان ءِ تامر الم بالیووڈ ءِ تہ ءَ بدلی آورت کنت۔ اے درگت آیوکیں روچ اژدری اَنت۔

دی بلوچستان پوسٹ پتر ھال ءَ سر بیتگیں اھوالانی رد ءَ بلوچستان ءِ دمگ نوشکی ءِ بازیں جاھاں بجلی ءِ بازیں ءُ ابید جاری لوڈشیڈنگ، سرپگ ءُ وولٹیج ءِ کمی ءِ ھلاپ ءَ شھریانی نیمگ ءَ زھرشانی کنگ بیتگ-

زھرشانی کنوکاں نوشکی ریکو ءِ ھند ءَ چہ نوشکی ءَ دیم پہ ھاران ءَ روکیں مزن شھدگ بند کتگ ءُ روگ ءُ آیگی مھتل کتگ اَنت ءُ ھمے وھد ءَ شھریاں سرکار ءُ کیسکو ءِ ھلاپ ءَ ترندیں اوگام جتگ-

ھاران، شال دگ ءِ بلاک بوگ ءِ سبب ءَ رھگوزیاں سراتی ءِ سبب ءَ بازیں مشکلانی دیمپانی اِنت – زھرشانی کنوکانی گوشگ اِنت زھرشانی داں لوٹانی سرجم بوگ ءَ برجاہ بیت اِنت-

نوشکی ءَ زھرشانی کنوکاں گوشتگ بجلی ءِ بازیں ءُ ابید جاری لوڈشیڈنگ ءِ ھواری ءَ بجلی ءِ چمُک جنگ ءَ مھلوک ءِ زند دلسیاھی کتگ، ترندیں سارتی ءَ بجلیانی بندش ءَ لوگاں زالبول ءُ زھگ ءُ گیشتر نادراہ ءُ نودربراں ترندیں جیڑھانی دیمپانی اِنت ءُ ھمے وڑ باپاری ءُ دھکانکاراں ھم لکانی ھساب ءَ تاوان لوڈشیڈنگ ءِ سبب ءَ بوگ ءَ اِنت-

آیاں گوشتگ واپڈا ءِ بُتی ءِ سبب ءَ نوشکی ءِ مھلوک وتی کمک ءَ وت چندہ کن اَنت ءُ کوچگانی واستا ٹرانسفارمر زیرگ ءَ اَنت کہ ایشی ءَ سرکار ءُ ھستیں واکدارانی واستا شرمے گپے-

زھرشانی کنوکاں کیسکو ءِ واکداراناں یک ھپتگے ءِ مھلت داتگ اگاں یک ھپتگے ءِ توک ءَ بجلی ءِ ابید جاری لوڈشیڈنگ، سرپگ ءُ وولٹیج ءِ کمی ھلاس کنگ نہ بیت اَنت گڑا نوشکی ءِ مھلوج سیاسی ءُ چاگردی گلاں گوں ھوار بیت ءُ نہ کٹوکہں وھدے ءَ داں واپڈا گریڈ اسٹیشن ءَ انگیر ءَ کنت پرچاکہ سد درسد بل ءِ جما کنگ ءَ ابید ھم مھلوک ءَ چہ بجلیاں زبھر کنگ اوپار کنگ نہ بیت اِنت –

سر بیتگیں اھوالانی رد ءَ روکپتی بلوچستان ءِ دمگ دلگان ءَ ناشناسین سلاہ بندیں مردماں تیرگواری کنان ءَ دو کس کشتگ اَنت ءُ چار زدگ کتگ اَنت-

بیران بیتگیں مردمانی پجار سجاد رئوفی ءُ عبدالرضا بامری ءِ نامان زانگ بیتگ اَنت ءُ زدگ بیتگیں مردمانی پجار نہ بیتگ اَنت-

وئیل گوستگیں شپ ءَ یک گیم ءِ دکانے ءَ پیش اتکگ اود ءَ سلاہ بندیں مردمانی تیرگواری ءَ دکان ءِ واھند ھوار دو مردم بیران ءُ دگہ چار کس زدگ بیتگ اَنت-

تیرگواری ءَ پد تیرگواری کنوک تچگ ءُ روگ ءَ سوبمند بیتگ اَنت ءُ وئیل ءِ گیشین سبب زانگ نہ بیتگ اَنت-

ھندوستانی لشکر ءَ ( یوم جمھوری) ءِ روچ ءِ درگت ءَ چن ءُ لانچانی درچ ءَ سَے شمبے ءِ روچ ءَ انڈیا گیٹ ءَ “میڈ ان انڈیا ” ءِ سلاھانی پیشدراھی کتگ –

ھندوستانی ٹی وی چینل این ڈی ٹی وی ءِ رد ءَ پیش کنگ ےَ آکاش ایئر ڈیفنس سسٹم ےُ ھراھموس سپر سونک کروز میزائلاں ھوار ھندوستان ءِ جوڑ کرتگیں بازیں سلاہ ایر کنگ بیتگ اَنت-

رپورٹ ءِ رد ءَ لیفٹیننڑ چینانا شرما ءَ گوشتگ ’آکاش میزائل ءِ نزان موبل پلیٹ فارم ءَ جوڑ کنگ بیتگ ‘-

آکاش میزائل سسٹم فوج ءَ نوکترین چیزے ھوار کتگ کہ آ ھندوستان ءِ پوج ءِ کارمرد کرتگین سلاھانی نوکیں لڑ اَنت-

کیپٹن شیواشس سولانکی ءَ گوشتگ یوم جمھوری ءِ روچ باز گچین اِنت ءُ جوانتریں چیز بنت ایشی ءَ سرجمیں دنیا چار ایت-

اے منی واستا باز پھری گپے یوم جمھوری ءِ پریڈ ءَ من وتی رجمنٹ ءِ نمائندگی ءَ کن آں – یوم جمھوری سرجمیں ڈیھ ءُ راج ءِ واستا باز گچینی یے روچے –

زانگ بہ بیت اسٹام ھوم انٹرنیشنل پیس ریسرچ انسٹیٹوٹ ءَ سال دوھزار ءُ بیست ءَ یک رپورٹے ءِ توک ءَ ھندوستان میان اُستمانی لڑاں سعودی عرب ءَ پد دومی سلاہ جوڑ کنوکیں ڈیھ اِنت میان اُستمانی لڑاں سلاہ ءِ جوڑ کنگ آئی ءِ کساس دَہ درسد اِنت-

لھتے سال ءَ پیش داں ھندوستان سلاہ ءِ زورگ ءَ اولی نمبر بیتگ کہ آئی ءَ سیھک ءِ بھر روس ءَ چہ زرتگ بیتگ ءُ اسرائیل ءُ امریکہ ھم انڈیا ءَ مزنیں کساسے ءَ سلاہ بھاہ کن اَنت بلے لھتے ھمے سالانی توک ءَ ھندوستان ءَ باز دیمروئی کتگ ءُ بازیں سلاھے جوڑ کرتگ اَنت-

بلوچستان ءِ تیابدپی شھر گوادر ءَ ناگتی تیل ءِ دکاناں آس کپتگ، بازیں دکان آس ءَ گپتگ اَنت-

گیشیں ھالانی رد ءَ گوادر گھٹی ڈھور ءَ تیل ءِ دکاناں آس کپتگ ءُ چریشی ءَ آس ءِ جمبیراں بازیں دکان گپتگ ءُ آس جملاسک بیتگ-

دمگی مردمانی رد ءَ آس ءِ کپگ ءَ پد آس کُشیں دو گاڑی داں دیراں سر بیتگ اَنت ءُ چریشی ءَ پد آ کس ءِ توسگ ءِ جھد اش کتگ بلے آیانی آپ ھلاس بیتگ اَنت آس داں انگت ءَ توسگ نہ بیتگ-

دمگی مردمانی رد ءَ آس داں انگت ءَ جمبلاسگ اِنت ءُ اے وھد ءَ آس ءَ بازیں دکان گپتگ اَنت-

دمگی مردمانی رد ءَ آس ءَ سَے ادار گوزگ ءَ پد ھم آس انگت ءَ توسگ نہ بیتگ ءُ چریشی ءَ بازیں دکان آس ءَ گپتگ ءُ داں انگت ءَ یک مردمے ءِ زدگ بوگ ءِ ھال اِنت-

اے درگت ءَ انتزامیہ ءِ نیمگ ءَ تنی وھدی دگہ گپ دیم ءَ نیتکگ اَنت دگہ جانی تاوانانی ھال ھم انگت ءَ نیست ءُ نانکہ آس ءِ کپگ زانگ بیتگ-

زانگ بہ بیت بلوچستان ءِ بازیں جاھاں آس کُشوکیں گاڑیانی نہ بوگ ءِ سبب ءَ اود ءَ آس وتی برانزاں بازیں چیزاں وتی ارجان جنت-

سارتی ءِ مولم ءَ گیشتر شال ءَ گیس لیک بیگ ءَ چہ وئیل دیم ءَ کاینت کہ آیانی تہ ءَ بازیں مردمے بیران بیت-

بلوچستان ءِ بُنجاھی شھر شال ءَ گیس لیک بوگ ءَ چہ چار مردم بیران بیتگ اَنت- وئیل جان محمد دگ ءَ بیتگ وھدے کہ بیران بیتگینانی سیادی یکیں کھول ءَ اِنت-

انتزامیہ ءِ رِد بیران بیتگینانی تہ ءَ پت گوں سئیں چُک ھوار اَنت آیانی پجّار پنجاہ سالی ئیں امان اللہ ء تاج محمد، بیست چار سالی ئیں حفیظ اللہ ء امان اللہ ٹک ازبک، بیست دو سالی ئیں محیب اللہ ء امان اللہ، سی سالی ئیں قاری حبیب اللہ ء امان اللہ جھمنند کلی کمالو ناماں چہ بیتگ اَنت- لاش پہ گیشیں چار ءُ ٹپاس ءَ پد کھول ءَ داتگ اَنت-

زانگ بہ بیت سوئی گیس انتزامیہ ءِ نیمگ ءَ چہ ھالتاک ءُ دگہ اِھوالکاراں چہ ھیالداری ءِ کنگ ءِ سرپدی دیگ بیت، بلے باز دمگ مردمانی نیمگ ءَ شکایت ھم دیم ءَ کاینت کہ گیس لوڈشیڈنگ ھم وئیل سبب اِنت-

روکپتی بلوچستان ءِ دمگ بمپور ءَ سلاہ بندیں مردماں گشتی پولیس ءِ سر ءَ اُرش کرتگ ءُ یک آپسرے ءَ ھوار دو کارندہ بیران ءُ یکے زدگ بیتگ-

گیشیں ھالانی رد ءَ بمپور ءِ شھر ءَ کلانتری پولیس ءِ سر ءَ اُرش کرتگ – اُرش ءَ دو کارندہ ھما جاہ ءَ بیران بیتگ اَنت ءُ یکے زدگ بیتگ –

ھالانی تہ ءَ گوشگ بیتگ بیران بیتگیں مردمانی توک ءَ یکے کلانتری پولیس ءِ سروک ھوار اِنت-

بیران بیتگیں پولیس کارمندانی پجار مختار مومنی ءُ ابوذر امیدوار ءُ زدگ بیتگین ءِ پجار میلاد عبدالاھی ءِ نام ءَ زانگ بیتگ-

روکپتی بلوچستان ءَ پولیس ءُ دگہ ادارھانی سر ءَ وھد وھد ءِ سر ءَ اُرش بوگ ءَ اَنت بلے گوستگیں وھداں یک مزاران بلوچ نامیں گلے ءَ یک اُرشے ءِ زمہ واری من اتگ ات ءُ اے اُرش ءِ زمہ واری تنی وھدی کس ءَ پہ وت ءَ نہ زرتگ-

روکپتی بلوچستان ءِ بنجاھی شھر زاھدان ءَ ھواریں ھند سیاھدک ءَ مسکونی ادارہ ءُ ایرانی لشکر ءَ مردمانی لوگ ڈروھینتگ ءُ دور داتگ اَنت-

گیشیں ھالانی رد ءَ گوستگیں روچ ءَ زاھدان ءِ دمگ سیاھدک ءَ ایرانی لشکر ءَ مھلوک ءِ گس ڈروھینتگ ءُ دور داتگ اَنت-

ھالانی تہ ءَ گوشگ بیتگ کہ مسکونی ءِ ادارہ ءِ گوشگ اِنت اے مردمانی زمیناں کاگد نہ بیتگ ءُ چریشی ءَ چہ آیانی لوگ دور دیگ بیتگ اَنت-

ھالانی تہ ءَ گوشگ بیتگ کہ اے مردمانی گس ایرانی لشکر ءَ بلڈوزر ءِ گون ءَ ڈروھینتگ ءُ دور داتگ اَنت-

دمگی مردمانی گوشگ اِنت اے مردم بازیں وھداں اد ءَ جھمنند بیتگ اَنت بلے انی مسکونی ادارہ ءَ کاگدانی نامو کتگ ءُ لوگ دور داتگ اَنت-

روکپتی بلوچستان ءَ گیشتر دمگاں چوشیں وئیل پیش اتکگ بیتگ اَنت گوستگیں سال ءِ گڈسر ءَ چھبار ءِ ھنداں ھم ھمے وڑ ءَ یل کھولے ءِ گس ڈروھینگ ءُ دور دیگ بیتگ اَنت-

دومی نیمگ ءَ بلوچ کمپعن فعالین ءِ رد ءَ گوستگیں سال بزانکہ دو ھزار ءُ بیست ءُ دو ءَ ایرانی لشکر ءِ دست ءَ لوگ ءُ مسیتاں ھوار ھبدہ چوشین وئیل رپورٹ بیتگ اَنت اے رپورٹانی توک ءَ چاردہ وئیل سرکاری پھناتانی نیمگ ءَ پروشگ ءُ دور دیگ بیتگ اَنت ءُ آ دگرانی بارو ءَ دگہ راستی نہ بیتگ اَنت-

امریکہ ءِ مھکمہ ءِ ھارجہ ءِ جارکش نیڈ پرائس ءَ گوشتگ کہ پاکستان ءُ انڈیا ءِ میان ءَ گپ ءُ تران ھردوکیں نیمگانی جیڑھے –

پریس ءَ گپ کنان ءَ آئی ءَ جست گرگ بیتگ پاکستان ءِ سر وزیر شھباز شریف ءَ انڈیا ءِ امن ءِ گپ ءُ تران ءِ سر ءَ پرزور دیان ءَ جاڑیگ بیگ ءَ گوشتگ آ کشمیر ءَ ھوار دراھیں جیڑھانی سر ءَ گپ کنگ ءَ تیار اِنت بلے انڈیا ءَ پیشکش رد کتگ ءُ تو اے درگت ءَ چی گوش ئے؟ –

نیڈ پرائس ءَ پسو دیان ءَ گوشتگ کہ ما بازین وھداں زرباری ایشیا ءِ یکجاھی ءِ لوٹ ءَ کنگ ءَ ایں ما ایشان دیمروئی کنگ ءَ گندگ لوٹ ایں پاکستان ءُ انڈیا ھردوک مئے پارٹنر اَنت ما ھردوکانی گون ءَ جھلانکی سیادی داریں-

آئی ءِ گوشگ ات کہ انڈیا ءُ پاکستان ءِ میان ءَ ما دیرگیں جھد کنگ ءَ ایں گپ ءُ تران بہ کن اَنت ھردوک وتی وتی جیڑگاں ھلاس بہ کن اَنت-

آئی ءَ گوشتگ امریکہ پاکستان ءَ کجام مردم ءِ سرکار ءِ گون ءَ کار کنگ ءَ جاڑیگ اِنت ءُ ھرکس سرکار ءَ کیت آئی ءِ گون ءُ کار کنگ وشنودی یے-

تران ءَ آئی ءَ جست گرگ بیتگ گوستگیں سر وزیر ءُ پی ٹی آئی ءِ سروک عمران خان ءَ امریکہ گون ءَ وشنودی ءِ سیادی دارگ ءِ جھد کت آگاں آ سرکار بیت گڑا ائی ءِ واستا دروازگ پچ کنگ بنت؟ –

آئی ءَ گوشتگ کہ اے گپ تچک اِنت پاکستان مئے شریدار اِنت ءُ پاکستان ءِ کجام سرکار کیت ما آئی ءَ گوں کار کن این-

آئی ءَ اوگانستان ءَ زالبولانی ھکانی لگتمالی سر ءَ گپ کنان ءَ گوشتگ طالبان ءَ اے گپانی پسو دیگی اِنت-

آئی ءَ گوشتگ کہ اوگانستان ءَ زالبولانی ھک لگتمال بوگ ءَ اَنت ءُ آ وھدکہ تالبان اتکگ بیتگ من اے پوزیشن ءَ نہ بیتگ اَنت ایشی ءِ سرجمی ءَ گپ کت بہ کناں بلے ھمسنتیں گامگیج ءِ زورگ ءَ گپ ءُ تران جوانتر بیت کت کنت-

آئی ءَ گوشتگ طالبان ءَ اے جست گرگ الم بیت اِنت آئی ءَ پرچا چوشین زوراکی برجاہ داشتگ انت ءُ اے درگت ءَ گپ ءُ تران بوگ ءَ اَنت-