TBP Balochi

برتانیہ ءِ رسانک فنائنشل ٹائمز ءِ گوشگ انت کہ پاکستان اے وھدی نگیگیں جاوراں گوں گوزگ انت، اے جاوارانی تہ ءَ پاکستان ءِ مالی ڈبگ ءِ ترس ھست انت –

برتانیہ ءِ تندجاہ ءِ رپورٹ ءِ تہ ءَ بنجاھی بینک ءِ درور دیگ بوتگ ءُ گوشگ بوتگ کہ زِر ءِ تہ ءَ سدانی کچ ءَ کنٹینر اُشتاتگ انت کہ آھانی تہ ءَ دری سامان مان بلے بھا زورگ ءِ ڈالر نیست –

میان استمانی کمپنی ءُ جھازانی ایسوسی ایشن ءَ کڈن کتگ کہ پاکستان ءَ درملکی جھازانی ڈالر داشتگ انت کہ چریشی ءِ سوب ءَ پاکستان انڈسٹری ھما ملکانی لڑ ءَ ھوار انت کہ فنڈاں دار انت –

واکدارانی گوشگ انت کہ کار کنگ ءُ مڈیانی پھریزگ ءِ ھاتر ءَ ٹیکسٹائل وڑیں دگہ فیکٹری بند بوگ ءَ انت – میکرو اکنامک انسائٹس ءِ سروک ثاقب شیرانی ءَ گوشتگ کہ ملک ءِ بازیں باپار ءِ بند بوتگ اگاں باپاری کنوکاں وتی کار ءُ بار پچ نکوت چریشی ءَ مزنیں تاوان ءِ بوت کنت – زانتکاراں کڈن کتگ کہ پاکستان مالی درگت ءَ نزور بوان انت، اے وڈ پاکستان چو سری لنکا ءِ وڑ ءَ بوت کنت کہ اود ءَ مھلوک ءَ اژدری سامان ھم رسگ ءَ نہ انت –

فنانشل ٹائمز ءِ رِد ءَ درملکیانی دیگ ءِ ھاتر ءَ پاکستان ءِ گور ءَ پنچ ارب ڈالر ھم نیست کہ یک ماھے ءَ پہ دریاں بس نہ بنت دومی نیمگ ءَ شھباز شریف ءِ سرکار ءِ آئی ایم ءِ گون ءَ بوتگیں ھپت بلین ڈالر کمک ءِ پیکج ھم اشتاتگ – میان استمانی بینک ءِ گوستگیں مشیر عابد حسن ءَ گوشتگ کہ پاکستان ءِ ھاتر ءَ ھمک روچ اژدری انت اے جاورانی تہ ءَ درآیگ ءَ تنی وھدی ھچ راہ نیست، اگاں پاکستان یک یا دو ارب ڈالر رول اوور ءَ سوبمند بہ بیت ھم اے سسٹم ھنچوش ھراب انت کہ بس ادارکی کمکے بوت کنت –

پاکستان ءِ وزیر احسن اقبال ءَ فنانشل ءَ ٹائم ءَ گوشتگ کہ در ملکی کرنسی ءَ پھریز کنگ ءِ جھد ءَ پاکستان ءِ دری سک باز کم بوتگ – زانتکارانی گوشگ انت درآمدکنندگان ءِ ھاتر ءَ بینک ءِ نیمگ ءَ لیٹر آف کریڈٹ پچ نہ کنگ ھم بلاھیں سوب یے کہ چریشی ءَ اسٹیل انڈسٹری وتی پیداوار ءِ بند کنگ ءِ بیھار داتگ –

بنجاھی بینک ءَ گوشتگ کہ وردنی ءُ ٹیل ءِ وڑیں اژدری سامانانی سربوگ ءِ ارزان کنگ ءِ ھاتر ءَ درآمدی بندش کم کنگ بہ بنت پاکستان انی ھم گوستگیں سال ءَ اتکگیں سیلاب ءِ تباھکاریانی آماچ انت کہ چریشی ءَ.کساس سِی ارب ڈالر ءِ تاوان بوتگ –

میان استمانی وام دیوکاں ھمے ماہ ءَ جنیوا ءَ بوتگیں ڈونر کانفرنس ءَ پاکستان ءِ مالی جاورانی گھتری ھاتر ءَ نھ بلین ڈالر ءَ گیش دیگ ءِ کول کتگ بلے اے زر کدی ءُ چون کائنت اے درگت ءَ باوست بوگ ءَ انت –

سندھ ءِ مزن شھر کراچی ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ.مروچی چار ھزار نُھ سد ءُ سِی ءُ سَے روچ سرجم بوتگ انت – مروچی چہ کراچی ءَ عوامی تحریک ءِ رھشون محمد پیور شفقت ءُ دگہ مردماں بنجل اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ پاکستانی پوج ءُ آمیدگس یک مھکمیں پندل ءِ رِد ءَ زورانسری آوار جنگ بوتگین مردمانی جیڑہ ءَ میان استمان دیم ءَ ھمے پدر کنگ انت کہ اے پاکستان ءِ تھی جیڑہ یے ءُ زورانسری آوارجنی ءِ جیڑہ ءِ توار ءَ میان استمان تکاں درگان درگان کنگے بے سوبیں جھد ءَ کنگ ءَ انت -.

آئی ءَ گوشتگ کہ بلوچ راج پاکستان ءِ اے درسیں رپک ءُ ھنراں سرپد بہ بیت ءُ آئی ءِ بگیری ءَ مھکمیں وڈے ءَ جھد بہ کن انت ءُ آئی ءَ بے سوب بہ کن انت ءُ بلوچ راجی زرمبشت ءَ منزل ءَ سر بکن انت –

ماما قدیر بلوچ ءَ دیمتر ءَ گوشتگ کہ پاکستانی ادارہ بلوچستان ءِ تہ ءَ وتی بے سوبی ءَ گندگ ءَ پد زوراکیانی تہ ءَ گیشی آرگ ءَ انت – بلوچ پرزندانی دیمھونی ءُ مات ءُ گھارانی تمردی ءَ پاکستان ءِ زلم ءُ زوراکی بے سوب کتگ انت –

آئی ءَ گوشتگ کہ ریاستی ادارہ کشندہ ٹولی ءُ دگہ ڈنگاں مڈی دیگ ءُ سرجمیں بلوچستان ءِ تہ ءَ زوراکی کنگ پرمایگ انت –

ماما قدیر بلوچ ءَ گوشتگ کہ پھازگی لشکر چیرہ ادارہ ءُ زر زیریں کشندہ ٹولیاں بلوچستان ءِ تہ ءَ زلم زوراکیانی تہ ءَ گیشی آرتگ ءُ ھمے میان ءَ بلوچانی زورانسری آوار جنی ءُ آھانی ژانگولیں جونانی چگل دیگ ءِ درچ ءِ تہ ءَ یکرندے پدا گیشی آرگ بوتگ –

پاکستان ءِ اُستان سندھ ءِ بنجاھی شھر چہ کراچی ءَ پولیس ءَ بلوچ آجوئی لوٹوکیں گل ءَ بندوکیں باسکے ءِ دزگیر کنگ ءِ ٹاہ داتگ-

پولیس ءِ رد ءَ کراچی ءِ دمگ کیماڑی ءَ پولیس ءَ بیڑ بران ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ (بی ایل ایف) ءِ پرکاریں باسک شفیع محمد بلوچ سلاہ ءُ شوروانی ھواری ءَ دزگیر کتگ-

ایس ایس پی کیماڑی ءَ ٹاہ داتگ کہ دزگیر کتگیں مردم کراچی ءُ بلوچستان ءَ سکیورٹی پورسز ءِ سر ءَ اُرشاں دزمانجن اِنت ءُ ھمے وڑ آئی ءَ وتی دگہ سَے ھمراھانی ھمراھی ءَ سعید آباد ءَ پولیس ءِ سر ءَ اُرش ھم من اتگ-

ایس ایس پی ءِ رد ءَ جرمکار ءَ وتی جد ماتیں برات ءِ سروکی ءَ گل ءِ کمکاری کتگ ءُ گیشیں پٹ ءُ پول برجاہ اَنت-

امریکہ ءَ چار شمبے ءِ روچ ءَ جار پرینان ءَ گوشتگ ’ آ روس ءِ بگیری ءَ جنگ ءَ یوکرین ءِ کمک ءَ مزنیں ٹینک دنت ‘-

فرانسیسی ھال سرکنوکین ادارہ اے ایف پی ءِ رد ءَ روس ءِ نیمگ ءَ ھمک روچیگیں بیھاراں ابید ھم امریکہ ءَ ابید جرمنی ءُ ناروے ءَ یوکرین ءَ را ٹینک دیگ ءِ جار پرینتگ اَنت-

امریکہ ءِ سروک جوبائیڈن ءَ وائٹ ھاؤس ءَ تران کنان ءَ یوکرین ءَ ٹینک دیگ ءِ جار جتگ-

آئی ءَ گوشتگ ’ امریکہ روس ءِ بگیری ءَ جنگ ءَ یوکرین ءَ را 31 ایم وج ابرام ٹینک دنت کہ یوکرین ءِ یک بٹالینے ءِ بروبری ءَ اِنت ‘-

نارو ءِ وزیر دفاف ءَ گوشتگ ’ آ روکپتی ڈیھانی نیمگ ءَ یوکرین ءِ کمک ءِ امل ءِ بھرمند بیگ ءَ آئی ءَ لنپرڈ 2 ٹینگ دنت ‘-

یوکرین بازین ماھاں روکپتی ڈیھاں چہ اے جھد ءَ پد جرمنی ءَ کیئف 14 لیپرڈ 2ٹینک دیگ ءِ جار جتگ، ٹینک دنیا ءِ توک ءَ جوانتریں ٹینکانی لڑاں ھوار اَنت –

یوکرین ءَ امریکہ ءُ جرمنی ءِ نیمگ ءَ داتگیں ٹینکانی منت گپتگ ءُ گوشتگ کہ ’ چریشی ءَ روسی پوجیانی اُرشانی پروشگ ءَ کمک رس ات اِنت-

دومی نیمگ ءَ سروک پوتن ءَ گوشتگ روکپتی ڈیھ یوکرین ءَ کمک کنگ ءَ رھبنداں لگتمال کنگ ءَ اَنت-

آئی ءَ گوشتگ کہ روکپتی ڈیھانی نیمگ ءَ یوکرین ءَ را ٹینک دیگ ءِ پژدر ءَ روس ءَ وتی گام تیار کتگ اَنت-

دونیسک ءَ ھستیں پوجی کارندھاں روس ءِ سرکاری ھال سرکنوکیں ایجنسی (طاس) ءَ گوں گپ کنان ءَ گوشتگ ’ ما روکپتی ٹینکانی پروشگ ءَ سرجمی ءَ تیار اِنت ‘-

زانگ بہ بیت گوستگیں ھپتگانی وھداں یوکرین ءِ سروک زیلنسکی ءَ یکے ءَ گیش بر روکپتی ڈیھاں لوٹ کتگ من ءَ سلاہ ءُ ٹینک بہ دے اَنت –

روس ءِ سروک ولادیمیر پوتن ءَ نوکیں زوراکیانی چن ءُ لانچ ءِ پژدر ءَ نیٹو ءِ سروک جین اسٹولنبرگ ءَ جرمنی ءِ بنجاھی شھر برلن ءِ تر ءُ تاب کتگ-

نیٹو ءِ سروک ءَ اے ٹاہ داتگ ءُ گوشتگ ماسکو سرجمیں یوکرین ءَ گرگ لوٹ ایت –

بلوچی زبان ءِ کلانیں شائر ءُ پھلوان مُلا کمالان ءِ شئیرانی کلیات ھمے زوتاں چہ بلوچی میوزک پروموٹر سوسائٹی ءِ نیمگ ءَ چاپ ءُ شنگ بوگی اِنت –

اے کتاب مُلا کمالان ءِ جند ءِ شئرانی کلیات انت ءُ اشی ءِ نزار جی ھوت انت کہ ھمے زوتاں بزاں بیست ءُ یک فروری ءَ ملا کمالان ءِ یاتگیری ءَ بلوچی میوزک پروموٹرز سوسائٹی ماں کیچ ءَ مزنیں زیمری ءُ لبزانکی مراگشے برجم دار ایت ءُ کتاب ءِ دیم درائی کنت –

ملا کمالان ءِ شئیرانی کلیات ءِ درگت ءَ بلوچ میوزک پروموٹر سوسائٹی ءِ سرکماش اسحاق رحیم ءَ گوں دی بلوچستان پوسٹ ءِ اھوالکار ءِ گوم ءَ تران کنان ءَ گوشتگ کہ کتاب زِرگوات بلوچی زبان ءِ نامداریں پھلوان گشندہ واجہ ملاکمالان ءِ شئیرانی دپتر اِنت کہ اے دپتر ءِ تہ ءَ مُلا کمالان ءِ وتی جند ءِ پربستگیں درستیں شَیر ھوار اَنت – اے کتاب مُلاکمالان ءِ بچ واجہ گل محمد ھوت ءَ نزّارتگ ءُ رد ءُ بند داتگ واجہ گل محمد ھوت وتی کلمی نام ءَ گیشتر جی ھوت نبشتہ کنت –

آئی ءَ گُشت کہ اے کتاب چہ بلوچی میوزک پروموٹرزسوسائٹی ءِ نیمگ ءَ چاپ ءُ شنگی ءِ گُڈی سیمسران اِنت- بیست ءُ یک فروری ءَ کہ ملا کمالان ءِ سال روچ اِنت بلوچی میوزک پروموٹرز سوسائٹی اے روچ ءَ کیچ ءَ یک مزنیں ساز ءُ زیملی مراگشے برجم دارگ ءَ اِنت اے مراگش ءِ تہ ءَ بلوچ نبشتہ کار ملا کمالان ءُ بلوچی کوھنیں رنگ ءِ زیمر ءِ سر ءَ نبشتانک وان انت ءُ بلوچ پھلوانیں گشندہ وتی ازم ءِ درانگازی ءَ کن انت شَیر گوش اَنت – ھمے مراگش ءِ تہ ءَکتاب زِرگوات ءِ دیم درائی بیت انت –

دو شمبے ءُ سَے شمبے ءِ میانی شپ ءَ ایرانی چیریں ادارھانی کارندھاں زاھدان ءِ نندوکیں مردمے دزگیر کنگ ءَ پد بیگواہ کرتگ-

سر بیتگیں ھالانی رد ءَ گوستگیں روچاں ایران ءِ اُستان مشھد ءَ ایرانی چیریں ادارھانی کارندھاں زاھدان ءِ نندوکیں مردمے دزگیر کرتگ ءُ بیگواہ کرتگ-

بیگواہ کنگ بیتگیں مردم ءِ پجار عمر کمبرزئی خیل ء لال میر کہ انی زاھدان ءِ نندوک اِنت بن اسل ءَ چھبار ءِ نندوک اِنت –

ھالانی تہ ءَ گوشگ بیتگ کہ عمر گوستگیں روچاں مشھد ءَ شتگ پہ ساز ءُ سامان ءِ زورگ ءَ اود ءَ دزگیر کنگ ءُ بیگواہ کنگ بیتگ-

ھالانی تہ ءَ گوشگ بیتگ عمر ءَ وتی دزگیر بوگ ءِ ھال وتی کھول ءَ ھما وھد ءَ داتگ کہ آئی ءَ چندے دماناں رھوت کتگ ءُ گوشتگ کہ من ءَ چیرین ادارہ برگ ءَ اَنت ءُ چریشی ءَ پد آئی ءِ درگت ءَ ھال نہ بیتگ-

ھالانی تہ ءَ گوشگ بیتگ کہ آ باپاری مردمے آئی ءَ گیشتر کنارک ءُ چھبار ءَ وتی باپاری کتگ ءُ اے وھد ءَ آئی ءِ کھول زاھدان ءَ نندوک اِنت –

ھالانی تہ ءَ گوشگ بیتگ کہ آئی ءِ بیگواھی ءَ پد آئی ءِ کھول پریشانیانی دیمپان بیتگ اَنت-

روکپتی بلوچستان ءَ گوستگیں سال ءِ گڈسر ءَ بہ گر داں انیگ ءَ بازین کساسے ءَ مردم گرگ ءُ بیگواہ کنگ بیتگ اَنت-

گوستگیں روچاں روکپتی بلوچستان ءَ بندیگیں بلوچے ناگتی زندان ءِ توک ءَ بیران بیتگ-

گیشیں ھالانی رد ءَ روکپتی بلوچستان ءِ دمگ ایرانشھر ءَ یک بندیگیں بلوچے زندان ءِ توک ءَ بیران بیتگ-

بیران بیتگیں مردم ءِ پجار چِل سالی ئیں میردوست سرفرازی ء شھدوست ءِ نام ءَ زانگ بیتگ ءُ نیکشھر ءِ ھند چامپ ءِ جھمنند گوشگ بوگ ءَ اِنت-

ھالانی تہ ءَ گوشگ بیتگ میردوست سال دوھزار ءُ بیست ءُ دو ءَ ایران ءِ اُستان اسپھان ءَ پولیس ءَ نشہ ءِ باپاری ءِ پژدر ءَ دزگیر کتگ ءُ پد ءَ آمیدگس ءَ آئی ءِ سر ءَ بیست ءُ پنچ سال ءِ سزا داتگ-

ھالانی تہ ءَ گوشگ بیتگ میردوست دَہ ماہ ءَ پیش ایرانشھر ءِ زندان ءَ برگ بیتگ ءُ آ وھد ءَ آئی ءَ دگہ نادراھی نہ بیتگ-

ھالانی تہ ءَ گوشگ بیتگ آئی ءِ بیرانی ءَ پد جیل ءِ واکداراں آئی ءِ کھول ءَ را رھوت کتگ ءُ گوشتگ کہ شمئے مردم دل پَٹ بیتگ ءُ بیران بیتگ-

ایشی ءِ توک ءَ دمگی مردم اے گمان ءَ پدر کنگ ءَ اَنت آ زندان ءِ توک ءَ جنگ بیتگ چریشی ءَ آ ھمے میان ءَ بیران بیتگ-

زانگ بہ بیت روکپتی بلوچستان ءَ بندوکیں بازیں مردم نشہ ءِ باپاری ءِ پژدر ءَ گرگ ءُ پد ءَ آیانی سر ءَ پاھو ءِ سزا اتکگ بیتگ اَنت ءُ گوستگیں سال ءَ بازیں کساسے ءَ بندیگیں مردم پاھو دیگ بیتگ اَنت-

بلوچستان ءِ دمگ ھزدار ءَ یک ماھے ءَ پیش بیگواہ بیتگیں ورنا ءِ لاش دزکپتگ-

گیشیں ھالانی رد ءَ ھزدار ءِ دمگ زھری ءِ کوھی دمگ سیاہ کوہ ءِ ھند ءَ دمگی مردماں یک لاشے دیستگ ءُ اود ءُ مردماں انتزامیہ ھال داتگ –

دمگی انتزامیہ ءَ لاش دستیگ کتگ زھری نورگامہ ھسپتال ءَ سر کتگ اود ءَ لاش ءِ پجار عبدالواحد ء مھمد ھسن لوٹانی ءِ نام ءَ زانگ بیتگ کہ سی ءُ پنچ روچاں چہ بیگواہ بیتگ-

انتزامیہ ءَ اژدری چار ءُ ٹپاس ءَ ہد لاش کھول ءِ دست ءَ داتگ داں انگت ءَ ورنا ءِ بیگواھی ءُ بیرانی ءِ بارو ءَ دگہ سرپدی نہ بیتگ اَنت-

سربوتگیں ھالانی رِد ءَ گوستگیں روچ ءَ بلوچستان ءِ دمگ دشت کھڈان ءَ نادرا کارگس ماندارگ بوتگ –

گیشیں ھالانی رِد ءَ گوستگیں روچ ءَ شپ ءِ وھد ءَ ناشناسیں مردماں دشت ءِ دمگ کھڈان ءَ نیشنل ڈیٹابیس ءُ رجسٹریشن اتھارٹی ءِ کارگس مانداشتگ – چریشی ءَ نادرا کارگس ءَ بازیں تاوان ءِ بوتگ – نادرا کارگس ءِ ماندارگ ءِ زمّہ واری بلوچ آجوئی لوٹوکین سلاہ بندیں گل بلوچستان لبریشن فرنٹ ءَ منّ اِتگ –

بی ایل ایف ءِ جارکش میجر گوھرام بلوچ ءِ رِد ءَ مئے سرمچاراں دشت کُھڈان ءَ پاکستانی ادارہ نیشنل ڈیٹابیس اینڈ رجسٹریشن اتھارٹی ءِ کارگس گوستگیں شپ ءِ ادار نھ ءَ مانداشتگ۔

میجر ءَ گوشتگ کہ ما زورگیریں پاکستانی تْرامکاری کارگس، سامان، وتگڑیں دیمروئی ءِ شوربندیاں وتی سرڈگار ءِ سر ءَ اوپار کُت نہ کن ایں- نادرا ءِ کار پاکستانیانی ودی بیگ ءِ روچ،سور ءُ دگہ چیزانی یاداشت کنگ ءِ ھواری ءَ پجار کارڈ جوڑ کنگ اِنت – اے پدر انت کہ پاکستان ءِ پجار جھان ءِ دیم ءَ وت پہ ھمائی ءِ جند ءَ کمشرپی جوڑ بوتگ ،گڑا چہ ایشی ءَ بلوچ راج ءَ یک زورگِپتیں راجے ءِ بستار ءَ گوں ایشی ءَ ھچ کار نیست-

جارکش ءِ رِد ءَ ھمک روچ بلوچ زورانسری آوار جنگ ءُ کُشگ بوگ ءَ اَنت ءُ دومی نیمگ ءَ زورگیریں استان مئے پجار ءِ گار کنگ ءِ جُھد ءَ اِنت ءُ وتی پجار ءَ مئے سر ءَ مُشگ لوٹ ایت ، کہ ایشی ءَ ما ھچ پیم ءَ نہ منّ ایں –

دومی نیمگ ءَ گوستگیں روچ ءَ سندھ ءِ دمگ چونڈکو ءَ ناشناسیں مردماں گیس پائپ لائن ءِ سر ءَ تراکناکیں شورہ کل کتگ ءُ تراکین اِتگ انت ءُ چریشی ءَ گیش پائپ لائن تباہ بوتگ – گیس پائپ لائن ءِ سر ءَ بوتگیں اُرش ءِ زمّہ واری بلوچ آجوئی لوٹوکیں سلاہ بندیں گل بلوچ ریپبلکن گارڈ ءَ منّ اِتگ –

بی آر جی ءِ جارکش دوستین بلوچ ءِ رِد ءَ مئے سرمچاراں بیست ءُ چار جنوری ءَ چہ بلوچستان سوئی ءَ دیم پہ کراچی ءَ رؤکیں گیس پائپ لائن سندھ دمگ چونڈکو ءَ تراکناکیں شورواں گوں تباہ کتگ – تراک ءَ گیس پائپ لائن سرجمی ءَ تباہ بوتگ –

جارکش ءَ گوشتگ کہ مئے اے دابیں اُرش بلوچستان ءِ آجوئی ءَ تاں برجاہ مان انت –

امریکہ ءِ پاپ گشندہ جسٹن بیبر ءَ وتی سوتانی ھک 200 ملین ( 20) کروڑ ءَ بھا کتگ اَنت-

فرانسیسی ھال سرکنوکیں ادارہ اے ایف پی ءِ رد ءَ میوزک پبلشنگ ءُ ریکارڈنگ کیٹالاگ ءِ ھسس بلیک اسٹون ءِ پلامرزی ءَ کمپنی ھپگنوسس ءَ زرتگ اَنت ءُ مسام انڈسٹری ءِ درستاں مستریں ڈیل گوشگ بیتگ –

اے سوداگری ءِ دررگت ءَ گوستگیں بازیں ھپتگاں گپ بیگ ءَ بیتگ اَنت کہ بیست ءُ ھشت سالی ئیں جسٹن ھما ازمکاراں ھوار بوگ ءَ اِنت آیاں ھمے زوتاں وتی کیٹالاگز بھا کتگ اَنت-

ھپگنوسس ءِ نیمگ ءَ ڈیل ءِ شرت دیم ءَ آرگ نہ بیتگ اَنت ءُ اے سود ءِ نزیک ءَ گندوکیں رسورساں اے ایف پی ءَ گوں گوشتگ کہ دو سد ملین ءَ ڈالر ءِ بزیک ءَ بھا بیتگ اَنت –

ایشی ءَ پیش جسٹن ءِ نزیکین مردم جسٹن ٹمبرلیک ءُ شکیرا ءَ ھم وتی موسیقی ءِ شیئر بھا کتگ ات اَنت ءُ آیاں ھم ھپگنوسس ءَ گوں ڈیل کتگ –

بلے چوشیں گیشیں ڈیلز جاب ڈائلن ءُ بروس سپرنگٹن ءِ ورین مزنیں گشندھانی نیمگ ءَ گندگ ءَ اتکگ اَنت-

سپرنگٹن ءِ کیٹالاگ سونی کمپنی ءَ پنجاہ کروڑ ڈالر ءَ زرتگ بیتگ کہ اے ھردوکیں گشندھانی واستا مھکمی سرپد بیتگ اَنت ھردوکانی مالی جیڑہ ءَ ھوار ھوار چار ءُ گزاری ھم کنگ بیتگ اَنت-

جسٹن بیبر ھما ورنائیں گشندھاں ھوار بیت اِنت کہ آیانی سوت شوکی ءِ سر ءَ گوشدارگ بنت ءُ نی ھپگنوسس ءِ گور ءَ بیست ءُ یکمی کرن ءِ نامترین سوتانی رائٹس ھست اَنت کہ آیانی توک ءَ بے بی ءُ سوری ھم ھوار اَنت-

بلیک اسٹون ءُ ھپگنوسس ءِ موسیقی ءِ بارو ءَ باپاری زرکاری یک ارب ڈالر اِنت-

ھپگنوسس ءِ گوشگ اِنت ایشی ءَ گیش دوستانکی بیبر ءِ دو سد ءُ نود سوت اَنت کہ وھدیکہ ڈیل ءَ گیش ھواریں اے وڑیں سوت ھست اَنت کہ سی ءُ یک دسمبر دوھزار ءُ بیست ءُ یک ءَ پیسر شنگ بیتگ اَنت-

یک دگہ رسورسے ءِ رد ءَ بازین وھدے ءَ پد بیبر ءِ سوتانی ھکانی داروکیں کمپنی یونیورسل ءِ گور ءَ اِنت داں انگت ءَ آئی ءِ گور ءَ آئی ءِ ماسٹر ریکارڈنگز ھست اَنت-