TBP Balochi

چہ توتک ءَ زورانسری آوار جنگ بوتگیں مردم ھنگت بیگواہ انت –

دوازدہ سال انت کہ کھول بیگواھیں مردمانی راہ ءَ چارگ انت آمیدگس ءُ کمیٹی انساپ دیگ ءَ بے وس انت – اے گوشگ ات زورانسری آوار جنگ بوتگیں کماش محمد رحیم کلندرانی ءِ نماسگانی کہ آ دوازدہ سال انت وتی پیرُک ءُ وارسانی راہ ءَ چارگ انت –

توتک ءَ پاکستانی پوج ءِ نیمگ ءَ سال دوھزار یانزدہ ءَ بوتگیں لشکر کشی ءَ مروچی دوازدہ سال سرجم بوتگ انت – پوج ءَ لشکر کشی ءِ میان ءَ چہ توتک ءَ بازیں مردمے زورانسری آوار جتگ ءُ بیگواہ کتگ بوتگ وھدیکہ پوج ءَ لشکر کشی ءِ میان ءَ دو ورنا ھم تیر آماچ کتگ ءُ نمیران کتگ انت –

توتک لشکر کشی ءَ دوازدہ سال سرجم بوگ ءِ سر ءَ مروچی بلوچ سوشل میڈیا ایکٹوسٹ “بی ایس ایم اے ءِ نیمگ ءَ چاگردی ترامجاہ ٹوئٹر کمپئن کنگ بوگ ءَ انت وھدیکہ گوستگیں شپ ءَ بیگواھیں کلندارنی کھول ءُ وارس، اھوالکار ءُ راجداریں باسکاں ٹویٹر ءَ اسپیس ءِ ھم برجم داشتگ –

ھمے وھد ءَ تران کنان ءَ بیگواھیں محمد رحیم ءِ نماسگ ماہ نور بلوچ ءِ گوشگ ات کہ وتی دوستیگیں مردمانی ھاتر ءَ وھدیکہ آ آمیدگس ءُ کمیشناں شتگ انت گڈا چہ ریاستی ادرھانی نیمگ ءَ آ بیھار دیگ بوتگ انت آھاں زور دیگ بوتگ کہ وتی کیس ءَ ھلاس بہ کن انت ءُ ھچ مہ گوش انت بلے درسیں جھداں لاچاریاں ابید مئے گوم ءَ انساپ کنگ نہ بوتگ ءُ ناکہ مارا گوشگ بوتگ کہ مئے دوستیگیں مردم کجا انت ءُ چی ھال ءِ تہ ءَ انت –

کھول ءِ گوشگ ات کہ بلوچستان ءَ ھوار ڈنی ملکاں نشتگیں بلوچ سیاسی باسک چہ میان استمانی ادارھاں گوں لوٹ بہ کن انت کہ توتک ءَ زورانسری آوار جنگ بوتگیں مئے پیرُک محمد رحیم ءَ ھوار ایندگہ پانزدھیں مردمانی وش ءُ سلامتی یل بوگ ءَ وتی کرد ءَ پیلو بہ کن انت – وھدیکہ بلوچستان ءِ راجداریں ءُ انسانی ھکانی گل آھانی توار جوڈ بہ بنت –

زانگ بہ بیت ھژدہ فروری سال دوھزار یانزدہ ءَ پاکستانی پوج ءَ ھزدار ءِ دمگ توتک ھر چاریں نیمگاں انگیر ءَ کتگ – بازیں اداراں برجاھیں لشکر کشی ءَ پد دمگ ءِ درسیں مردین یکجاہ کنگ بوتگ انت ءُ پوجی کارمنداں آوار جتگ ءُ بیگواہ کتگ انت – پدا رند ءَ آھانی تہ ءَ بازیں مردمے یل کنگ بوتگ بلے ھشتاد دو سالی کماش محمد رحیم خان کلندرانی ءُ آئی ءِ کھول ءِ دگہ شانزدہ مردم ھنگت گار ءُ بیگواہ انت –

وھدیکہ ھمے دمگ ءَ توتک مژی ءَ چہ یکجاھیں کبر ھم دست کپتگ انت اے یکجاھیں کبر سال دوھزار چاردہ ءَ یک شوانگے ءَ دیستگ انت – اے کبرانی تہ ءَ سرجمی ءَ یک سد ءُ ھپتاد ءُ نھ جون دست کپتگ انت کہ آ ھنچوش ھراب بوتگ انت کہ آھانی تہ ءَ بازینے ءِ بس ھڈ ءُ کانپول سر اتکگ انت اے جونانی تہ ءَ بس دو مردمانی پجار بوتگ ات کہ آھانی سیادی چہ آواران ءَ بوتگ –

چہ توتک ءَ بیگواھیں مردمانی یل کنائینگے ھاتر ءَ میان استمانی انسانی ھکانی ادارہ ایمنسٹی انٹر نیشنل ءَ پٹ پولی لوٹ ءِ کتگ وھدیکہ چہ کھول ءِ نیمگ ءَ زھرشانی ھم کنگ بوتگ بلے ھنگت بیگواھیں مردم یل کنگ نہ بوتگاں –

سر بیتگیں ھالانی رد ءَ تیل ءِ بھانگ ءِ سر ءَ سیمسراں سدانی ھساب ءَ ایرانی لشکر ءَ “ھَرانی ” سر ءَ تیرگواری کتگ ءُ کُشتگ-

گیشین ھالانی رد ءَ روکپتی بلوچستان ءِ دمگ سراوان ءَ کلگان ءِ سیمسرانی ھند ءَ ایرانی سپاہ ءَ ھرانی سر ءَ تیرگواری کتگ ءُ کُشتگ اَنت-

چاگردی ترامجاھاں شنگ بیتگیں تامرے ءِ تہ ءَ گندگ بیت اِنت بازیں کساسے ءَ ھَرانی جون کپتگ اَنت –

دمگی اھوالانی رد ءَ ایرانی سپاہ ءَ ھمے بھانگ ءَ ھر کُشتگ انت کہ اے ھرانی سر ءَ مھلوک ءَ تیل کشی کرتگ ءُ وتی لاپ والینتگ چرے سزا ءَ ایرانی سپاہ ءَ ھر کُشتگ اَنت-

ایرانی کانون ءِ آرٹیکپ ھپت ءِ رر ءَ دلوت ءُ ھیواناں ابید زلوری ءَ کُشگ ءُ ریچگ یک مزنیں جرمے نامینگ بیت اِنت کانونداراں وتی دست ماں کانون ءِ پروشگ ءُ لپاشگ ءَ ھوار اَنت-

بلوچستان ءِ دو جتائیں دمگ پنجگور ءُ آواران ءَ دو براتاں ھوار سے مردم زورانسری آوار جنگ بیتگ اَنت-

گیشیں ھالانی رِد ءَ پاکستانی پوج ءَ مشکے ءِ دمگ شردوئی ءَ دو برات زورانسری آوار جنی ءِ نشانگ کتگ ءُ ناشناسیں جاھے ءَ برتگ اَنتکہ آیانی پجّار بھار ء گل محمد ءُ ناصر ء گل محمد ناماں چہ بیتگ اَنت-

اے مردم گوستگیں روچ ءَ بیگاہ ءِ وھدءَ پوج ءَ بیڑبرتگ ءُ بیگواہ کتگ اَنت-

زانگ بہ بیت زورانسری آوار جنی ءِ نشانگ کنگ بیتگینانی تہ ءَ ناصر یکرندے پیسر ءَ 2022 ءَ پاکستانی لشکر ءَ زورانسری نشانگ کُتگبیتگ ءُ چار ماہ ءَ تاں بیگواہ کنگ ءَ پد یل کتگ ءُ انی یکرندے پدءَ زورانسری آوار جنی ءِ نشانگ کنگ بیتگ-

دومی نیمگ ءَ پنجگور ءَ گوستگیں روچ ءَ تسپ ءِ ھندءَ ناشناسیں گاڑی سواراں سنجر ء وزیر احمد آوار جتگ ءُ بیگواہ کتگ-

اِھوالکارانی رِد ءَ سنجر بلوچ تسپ ءَ یک ھجام دکانے ءَ نندوک بیتگ کہ گاڑی ءَ سواریں مردماں توپگ ءِ زور ءَ گاڑی ءَ سوار کتگ ءُ گوں وتبرتگ-

ھواریں سِزا ءِ آماچیں بلوچ زالبول

ٹی بی پی شونگال

سئے فروری ءِ شپ ءَ گشکوری ٹاون شال ءَ رحیم زھری،آئی ءِ لوگیگ رشیدہ زھری، مات ءُ چُک پاکستانی پوج ءِ پوشاک پوشیتگیں مردمانی دست ءَ زورانسری بیگواہ کنگ بیت اَنت۔ رحیم زھری ءِ مات ءُ چُک دو روچاں پد یل کنگ بیت اَنت ءُ رحیم زھری ءِ لوگیگ رشیدہ بلوچ یازدہ روچاں داں زندانی کنگ ءَ پد یل کنگ بیت وھدیکہ رحیم زھری ءِ جند داں انگت گمانی پئیم ءَ پوج ءِ دزگیری ءَ اِنت۔

زورانسری بیگواھیں رحیم زھری تابش وسیم ءِ سیاد اِنت۔ تابش وسیم آئی ءِ سیادی (کَزن) لیاقت ءِ ھمراہ زورانسری بیگواہ کنگ بیتگ اَت ءُ ھاران ءَ سی ٹی ڈی ءَ گمانی کلپیں میڑ ءِ تہ ءَ آ شھید کُتگ ات وھدیکہ لیاقت داں انگت زورانسری بیگواہ اِنت۔ زھری کھول ءِ مردم پیسر ءَ ھم زورانسری بیگواھی ءِ آماچ بیتگ اَنت ءُ آیانی ژانگولیں جون دور دیگ بیتگ اَنت۔ رحیم زھری ءِ کھول ءِ اے تُرس ءِ درشان ءَ کنگ ءَ اِنت کہ کجا ڈیھی ادارگ رحیم زھری ءُ لیاقت ءَ ھم تابش ءِ پئیم ءَ کجام دروگیں میڑ ءِ تہ ءَ شھید مہ کن اَنت۔

زھری کھول ءِ یل کنائنگ ءِ ھاتر ءَ کراچی ءُ شال ءَ ھوار بلوچستان ءِ جتائیں دمگانی تہ ءَ زھرشانی کنگ بیتگ اَنت ءُ سرجمیں چاگرد ءِ نیمگ ءَ آیانی زورانسری بیگواھی ءِ بگیری ءُ زھر ءُ اپسوز ءِ درشان کنگ بئیگ ءَ اِنت۔ راجکاریں رھشونانی گُشگ اِنت کہ ھورایں سِزا یانی درچ بند کنگ بہ بیت، پاکستانی پوج بلوچ راجکاریں باسکاں چہ جد ءُ جھد ءَ دیر دارگ ءِ کوشست ءَ بے سوبی ءَ پد آیانی کھول ءِ مردماں ھواریں سِزا ءِ نشانگ کنگ ءَ اَنت۔ رحیم زھری ءِ یل کنائنگ ءِ ھاتر ءَ زھرشانی برجاہ اَت کہ ھمے نیام ءَ تربت ءَ ڈاکٹر واحد بخش ءِ لوگ ءِ سر ءَ پوج ءَ بیڑ بُرت ءُ زمان بلوچ زورانسری بیگواھی ءِ آماچ کُتگ ات۔

بلوچستان ءَ زورانسری بیگواھیانی بگیری ءَ دو دوھکاں چہ زھرشانی برجاہ اَنت۔ وائس فار بلوچ مِسنگ پرسنز چہ گوستگیں دوازدہ سالاں کراچی ءُ شال پریس کلبانی دیم ءَ زھرشانی بنجل ءَ نشتگ، شال داں کراچی ءُ کراچی ءَ داں اسلام آباد ءَ لانگ مارچ ءِ ھم کنگ بیتگ ءُ دو سال پیسر پاکستان ءِ پیسرگیں مزن وزیر عمران خان ءَ گوں زورانسری بیگواھیں مردمانی کھول ءَ نیاد کُتگ ءُ آیاں باوری داتگ کہ آیانی بیگواھیں مردم درگیجگ کنگ بنت بلے اے درستیں گپاں پد ھم بلوچستان ءَ زورانسری بیگواھی ءِ وئیلانی تہ ءَ پدریں گیشی گندگ ءَ پیداک اِنت۔

پھازگی پریس کار ھمے ٹاہ ءَ کن اَنت کہ پاکستانی پوج سرپد بیت کہ ھواریں سِزا ءَ گوں مھلوک چہ آجوئی ءِ جُنز ءَ دیر دارگ بیت کن اَنت، بلے راستی ایشی ءِ چَپ ءِ ندارگانی درشان کنگ ءَ اِنت۔ زورانسری بیگواھی ءُ ھواریں سِزایانی سوب ءَ مھلوکانی دل ءَ راجی آجوئی ءِ جُنز ءِ ھاتر ءَ دردواری ودی بنت ءُ بلوچستان ءِ تہ ءَ ڈیھہ ءِ ھاتر ءَ برجاھیں جیڑھانی تہءَ گیشی کئیت۔

بلوچستان ءِ بنجاھی شھر شال ءَ پاکستانی پوج ءَ یک دگہ زالبولے آوار جنگ ءَ پد بیگواہ کرتگ-

زورانسری آوار جنی ءِ آماچیں زالبول ءِ پجار ماھل بلوچ ءِ نام ءَ زانگ بیتگ-

بلوچ نیشنل مومنٹ ءِ سیکرٹری جنرل دلمراد بلوچ ءَ وئیل ءِ راستی کنان ءَ چاگردی ترامجاہ ٹوئٹر ءَ گوشتگ کہ چہ شال ءَ شھید ندیم ءِ جنوزام ماھل بلوچ گوں زھگاں ھوار پاکستانی پوج ءَ دزگیر کتگ ءُ گوں وت برتگ کہ اود ءَ شپ ءَ لٹ ءُ کُٹانی نشانگ کتگ ءُ سھب ءَ آئی ءِ زھگ یل داتگ اَنت بلے ماھل بلوچ داں انگت ءَ بیگواہ اِنت –

آوار جنگ بیتگیں زالبول بلوچستان ءَ پرکاریں انسانی ھکانی باسک ءُ ایچ آر سی بی ءِ چیئرپرسن بی بی گل بلوچ ءِ نشار اِنت- دمگی مردمانی رد ءَ زالبول گوستگیں شپ ءِ ساھت یازدہ ءَ پاکستانی پوج ءَ سیٹلائٹ ٹاؤن ءَ بلوچستان یونیورسٹی ءَ دزگیر کتگ ءُ برتگ-

چم دیستگیں مردمانی رد ےَ دزگیری ءِ وھد ءَ آ سک لٹ ءُ کُٹ کنگ بیتگ-

زانگ بہ بیت گوستگیں ھپتگ ءَ چہ اے دومی وئیل اِنت ایشی ءَ پیش چہ شال ءَ پوج ءَ رھیم زھری ءُ آئی ءِ مات ءُ لوگی زورانسری آوار جنی ءِ آماچ کتگ ات اَنت-

زالبولانی آوار جنیانی ھلاپ ءَ بلوچ پھناتاں زھر ءِ درشان کنگ بوگ ءَ اِنت – زھری کھول ءِ زورانسری آوار جنیانی سر ءَ سرجمیں بلوچستان ءَ زھرشانیانی درچ برجاہ اَنت ءُ مروچی دگہ یک زالبولے بیگواہ کنگ بیتگ-

امریکہ ءِ لشکر ءَ ٹوپ گولہ ءِ جوڑ کنگ ءِ واستا یک اربے ڈالر ٹیکہ دیگ ءِ جار پرینتگ-

ھال سر کنوکین ادارہ اے ایف پی ءِ رد ءَ یک سد ءُ پنجاہ ءُ پنچ ملی میٹر ءَ قطر ءِ گولہ ٹوپ رو اَنت ایشی ءِ گیشی ودی بوگ ءِ ٹیکہ دیگ بوگ ءَ اِنت اے گولہ یوکرین ءَ روس ءِ سر ءَ اُرش ءَ بازیں کمک ءَ آیگ ءَ اَنت-

امریکہ ءِ پوج ءِ درشان ءِ رد ءَ نود ءُ نُھ کروڑ سی ءُ ھپت لک ڈالر ءِ اے ٹیکہ سوبمندی ءِ واستا دو کمپنیانی جنرل ڈائنامکس آرڈننس اینڈ ٹیکٹیکل سسٹم ءُ امریکن آرڈننس ایل ایل سی ءِ دیم پہ دیم اَنت-

درشان ءَ گوشگ بیتگ کپ اے ٹیکہ مول ءُ مراد ماھنگی دوازدہ ءَ چہ بیست ھزار ءَ گیش گولہ جوڑ کنگی اِنت-

اے جار آدینگ ءِ روچ ءَ ھما وھد ءَ دیم ءَ اتکگ ایشی ءَ پیش امریکہ ءِ مھکمہ ءِ پینٹاگون ءَ یوکرین ءِ سکیورٹی اسٹنس انیشیٹیو ھمے رنگ ءَ یک دگہ ٹیکھے دو کمپنیاں داتگ انت اے ٹیکہ ءِ مالی زرکاری پنجاہ ءُ دو کروڑ ءُ بیست لک ڈالر اِنت-

گوستگیں سال ءِ فروری ءِ ماہ ءَ روس ءَ یوکرین ءِ اُرش ءَ پد ھردوکیں نیمگاں لشکراں یکے دومی ءِ ھلاپ ءَ مزنیں شورو کارمرد کتگ اَنت-

نومبر ءَ امریکہ ءِ پوج ءِ یک اگدودارے ءَ گشتگ ات کک روس ءِ لشکر ءِ ٹوپ ھانہ ءَ کساس بیست ھزار گولہ ھمک روچ جوڑ دیگ اِنت –

یوکرین ءِ لشکر ءَ جنگ ءِ وھد ءَ کساس ھمک روچ چار ءَ چہ ھپت ھزار ٹوپ جوڑ دیگ اِنت اشی ءَ گیش ایشانی روکپتی ھمسنتانی سلاہ جاھاں یک روچے ءَ تیار بوگ ءَ اَنت-

جنگ ءِ جاورھالانی سر ءَ نگاہ ایر کنوکیں زانتکارانی گوشگ اِنت سارتی ءِ موسم ءِ وھد ءَ ٹوپ ھانہ ءِ کارمردی ءِ توک ءَ کمی اتکگ پرچاکہ ھردوکیں نیمگاں سلاہ آیگ آ وڑ ءَ پیش ءَ بیتگ نی آ وڑ ءَ نہ اِنت-

کراچی ءَ وائس فار بلوچ مسنگ پرسنز ءِ زھرشانی بنجل ءَ 4955 روچ سرجم بیتگ اَنت، مروچی چاگردی ءُ ادبی باسک زاہد بارکزئی، محمّد اکبر بلوچ، نور محمد بلوچ ءَ ھوار دگہ مردین ءُ جنیناں مزنیں کچے ءَ بنجل ءَ اتکگ ءُ یکجاھی درشان اِتگ۔

وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گُشتگ کہ جھان ءِ بازیں جتائیں دمگانی تہ ءَ نسل کشی ءُ زورانسری بیگواھی ءُ انسانی اگبالانی لگتمالیانی سر ءَ میان اُستمان گامگیج زیرگ ءَ گندگ بیت بلے بیت کنت بلوچ انگت انسان ءِ درجگ ءَ دیگ نہ بیتگ پمیشکا بلوچانی نسل کشی ءُ انسانی اگبالانی لگتمالی ءِ پئیمیں جنگی جرمکاریانی سر ءَ ایمنی ءُ انساپ ءِ ٹاہ جنوکیں اے گل ھاموش ءُ بے سماہ اَنت، اِشی کرد ءِ گندگ ءَ چہ اے گپ راست بیت کہ اے گل سامراجی سرکارانی لوٹ دوستیں مپادانی درپان اِنت کہ سامراجی تاکتانی ھاتر ءَ انسانی اگبالانی لگتمالیانی سر ءَ دزمانجنی نہ کنت۔

ماما قدیر بلوچ ءَ گُشتگ کہ میان استمان ءِ ادارگ وتی وت واکیں ءُ نابستگیں ھیستے ءَ پراموش کُتگ ءُ تھنا سامراجی تاکتانی ءُ آئی ءَ ھواریں سرکارانی اشارگ ءِ سر ءَ ناچ کنگ ءِ ھداں داں پشت کپتگ 55000 ھزار بلوچانی گیر کانودی پئیم ءَ زورانسری بیگواہ کنگ ءُ آیاں چہ ھزارانی کچ ءَ سلتریں لٹ شاپی ءِ آماچ کنگ ءُ نمیران کنگ ءُ آیانی جوناں گیاباناں دور دیگ ءِ پئیمیں انسانیت سوزیں ءُ دل تاپینوکیں جنگی جرمانی سر ءَ مزن مزنیں سنگ دل ھم آپ بنت بلے اے بے وسی ءَ ابید ھم بیگواھیں مردمانی کھول ھم وتی دوستیگانی یل کنائنگ ءِ ھاتر ءَ جد ءُ جھد برجاہ دارگ ءِ جزم کُتگ ءُ مھکمی ءِ درشان کنان ءَ نوں زھرشانی بنجل چہ شال ءَ کراچی ءَ آورتگ کہ اِشی ءِ مکسد ھمک ھما ھند ءَ توار چِست کنگ اِنت کہ اود ءَ پاکستانی واکدار ءُ میان اُستمانی ایمنی، انساپ ءُ انسانی اگبالانی ٹاہ دارانی بنجاہ گندگ بنت بیگواھیں بلوچانی کھول مدام ھمے لوٹ ءَ کنگ ءَ اَنت کہ اگاں آیانی دوستیگیں مردم جرمکار اَنت گُڑا آیاں آمید گِساں پیش کنگ بہ بیت۔

بدخشان ءِ دمگ کوھستان، ریگستان، یاوان، شگنان، درایم ءُ یافتال ءَ بے کساس برپباری بوتگ ، برپانی کرود ءِ کپگ ءِ بازیں وئیلے بوتگ –

اوگانستان ءِ گوریچانی رودراتکی دمگ بدخشان ءَ چار روچانی میان ءَ برپ ءِ کرود ءِ کپگ ءَ دوازدہ مردم مرگ ءِ دیمپان بوتگ انت -.

بدخشان ءَ جھد کنوکیں ادارہ ءِ سوبائی منیجر مُلا محمد اکرم ءَ اھوالکاراں گوں تران کنان گوشتگ کہ بدخشان ءِ دمگ کوھستان، ریگستان، یاوان، شگنان، درایم ءُ یافتال ءَ ترندیں برپباری بوتگ – برپ کرود کپگ ءَ وئیل بوتگ انت –

گوستگیں چار روچاں اے وئیلاں دوازدہ مردم بیران بوتگ انت ءُ اے میان ءَ دوازدہ مردم زدگ ھم بوتگ انت

اکبری ءِ گوشگ ات برف ءِ کرود ءِ کپگ ءَ پنجاہ گِس کپتگ انت –