TBP Balochi

بلوچستان ءِ دمگ چہ کیچ ءَ پاکستانی پوج ءَ پنچ مردم زورانسری آوار جنی ءِ نشانگ کتگ ءُ ناشناسیں جاھے ءَ برتگ-

گیشیں ھالانی رِد ءَ پاکستانی پوج ءَ بلیدہ ءِ دمگ میناز ڈن سر ءَ بیڑبرتگ ءَ دو براتاں ھوار پنچ مردم زورانسری آوار جنی ءِ نشانگ کتگ ءُ ناشناسیں جاھے ءَ برتگ-

بیگواہ بیتگیانی پجّار وسیم ء حاجی شرف ، یار جان ء منظور ، عزیز ء حکیم ، غفور ء حمید ءُ عبدالباسط ء حمید ناماں چہ بیتگ اَنت-

دمگی مردمانی رِد ءَ اے مردم مروچی مگرب ءَ رند پوج ءَ لوگانی سر ءَ بیڑبرتگ ءُ آوار جنگ ءَ پد بیگواہ کتگ اَنت-

زانگ بہ بیت دو روچ ءَ ساری ھم بلیدہ ءِ دمگ کور پُشت ءَ پاکستانی پوج ءَ یک لوگے ءِ سر ءَ بیڑبرتگ اَت اختر ء پیر محمد نامیں ورنایے زورانسری آوار جنی ءِ نشانگ کتگ اَت-

بلوچستان ءِ جتاجتائیں دمگاں بیتگیں وئیلانی آسر ءَ زالبولے ءَ ھوات شش مردم بیران وھدے کہ دہ ٹپی بیتگ اَنت-

گیشیں ھالانی رِد ءَ پنجگور ءِ دمگ پروم کپ ءَ ٹائر ترکگ ءَ چہ تیل کشیں زمباد گاڑی یے چپی بیتگ، گاڑی چپ بوگ ءَ چہ آس چست بوتگ-

ھالانی رِد ءَ وئیل ءَ گرمکان ءِ جھمنندیں یک ورنایے سُتکگ ءُ بیران بیتگ وھدے کہ یکے سک ٹپی بیتگ-

دومی نیمگ ءَ قلعہ سیف اللہ ءَ گاڑی ءِ چپ بوگ ءِ سبب ءَ گاڑی ءَ سوار یک مردمے بیران ءُ سے ٹپی بیتگ اَنت- ٹپی دوا درمان کنگ ءِ ھاتر ءَ دمگی نادُراھجاہ ءَ برتگ-

ھمے وڑ لسبیلہ ءِ دمگ بیلہ بلوچی گوٹھ ءَ لوگے ءِ دیوال کپگ ءَ چہ زالبولے بیران وھدے کہ دگہ یک زالبولے ٹپی بیتگ- اود ءَ ٹپی بیتگیں زالبول دوا درمان کنگ ءَ پد کراچی ءَ برگ بیتگ وھدے کہ بیران بیتگیں زالبول لاش گیشیں چار ءُ ٹپاس ءَ پد کھول ءَ داتگ-

ھمے وڑ کلات ءِ دمگ منگچر ءَ زرد غلام جان ءَ لانگو ٹَک ءِ دو ٹولیانی میان ءَ ٹَکی جنگ ءُ چوپ ءَ تیرگواری ءِ آسر ءَ دو مردم بیران سے زالبولاں ھوار پنچ مردم ٹپی بیتگ اَنت-

دومی نیمگ ءَ گوستگیں شپ ءَ شال ءِ دمگ سریاب ءَ ناشناسیں مردمانی تیرگواری ءَ چہ میر عابد بادینی نامیں مردمے بیران بیتگ-

کلات ءِ ھند منگچر ءَ یک سالے ءَ پیش زورانسری آوار جنی ءِ آماچیں شاھان بلوچ پنام ءِ شاہ جان ءُ کفایت نیچاری ءِ بیگواھی ءِ ھلاپ ءَ کھول ءَ زھرشانی کنان ءَ کراچی، شال ءِ شھدگ روانی ءِ ھاتر ءَ بازیں اداراں داں بند کتگ-

آئی ءَ گوشتگ کہ زھرشانی کنان ءَ بازیں مردماں لوٹ کتگ کہ بیگواھیں مردماں زوت یل بہ کنت-

زھرشانی ءِ سبب ءَ بنجاھی شھدرگ روانی ءِ ھاتر ءَ بند بیتگ ھردوکیں نیمگاں بازیں کساسے ءَ گاڑیانی کتار ءُ مساپر مھتل کنگ بیتگ اَنت-

آیاں لوٹ کتگ کہ مئے دوستیگیں مردماں دیم ءَ بیار ات ءُ مارا انساپ دیگ بہ بیت اِنت ءُ پد ءَ دمگدار ءِ سدکی دیگ ءَ پد کھولاں وتی زھرشانی ھلاس کتگ –

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ کیچ ءِ ھند تمپ کلاگ ءَ پاکستانی پوج ءِ چوکی ءِ سر ءَ بیتگیں اُرش ءِ زمہ واری من اتگ-

جارکش گوشتگ سرمچاراں گوستگیں شپ ءَ پوجی چوکی اے ون مارٹرگولھاں گوں نشانگ کتگ کہ چریشی ءَ چہ اے ون گولہ چوکی ءِ تہ ءَ کپتگ ءُ دشمنیں پوج ءَ بازیں کچے ءَ جانی ءُ مالی تاوانانی دیمپانی کنگ کپتگ-

میجر گوھرام بلوچ ءَ گوشتگ کہ ما یک رندے پد ءَ تمپ ءُ کَش ءُ گوری دمگاں سرکاری پلامرزی ءَ ھستیں ڈیتھ اسکواڈ ءِ ٹولیاں گوں ترندی ءَ سرپد کن ایں آ پاکستانی پوج ءِ گوشگ ءَ مردمانی آوار جنگ، کُشگ، زر گرگ ءُ دارگ ءُ چاگردی سلکاریاں دزکش بہ بنت پرچا آیانی نشان بیتگ اَنت درست مئے نشانگ ءِ توک ءَ اَنت-

جارکش ءَ گوشتگ ما مھلوک ءَ گوں دزبندی کن ایں آ دشمن ءِ پلامرزی کتگین ٹولیاں چہ گستا بہ بنت آیانی گون ءَ ھچ رنگیں سیاد مہ دار اَنت پرچاکہ آ سرمچارانی نشانگ ءِ توک ءَ اَنت-

سَے نیمگی دری کارانی وزیرانی دیوان

ٹی بی پی شونگال

ھپت مئی 2023 ءَ چین، پاکستان ءُ اوگان ءِ دری کارانی وزیرانی پنچمی سئیں نیمگی دیوان ماں اسلام آباد ءَ برجاہ دارگ بیتگ، سئیں نیمگاں دمگی رھوتکاری ءِ بنجاہ ءِ رد ءَ اوگانستان ءِ بودناکی ءَ سرجمی ءَ کارمرز کنگ ءِ وتی جزم نوک کُتگ ءُ بیلٹ اینڈ روڈ انیشیٹو (بی آر آئی) ءِ رد ءَ سَے نیمگی کمک ءِ دیما برگ ءُ سی پیک ءِ اوگانستان ءَ ھواریں رد ءَ ودینگ ءِ جزم کُتگ۔

اوگان تالبان ءِ کسان مدتی دری کارانی وزارت ءِ نائب جارکش حافظ ضیاء احمد ءَ سَے نیمگی دری کارانی وزیرانی دیوان ءِ بابت ءَ گُشتگ کہ اوگانستان ءَ ملٹی بلین ڈالر ءِ سر ءَ بندوکیں شوربندی چین پاکستان اکنامک کوریڈور ءَ ھوار بیگ ءِ پیسلہ کُتگ، کہ چریشی ءَ ھُشکی ءَ مانپوشتگیں ڈیھ ءَ باپار ءِ بنجاہ جوڑ بیگ ءُ زرکاری ءِ وتی نیمگ ءَ دلگوش کنائینگ ءَ کمک رس ایت ءُ مزنیں دیمروئی ءِ شوربندی ءَ ھوار بیگ ءِ پیسلہ تالبان واکدارانی جنگ زدگیں ڈیھ ءِ تہ ءَ ڈنی زرکاری آرگ جزم ءِ بھر اِنت، کہ اِے اوگانستان ءَ بیلٹ اینڈ روڈ انیشیٹو ءِ بھر جوڑ بئیگ ءُ اوگانستان ءَ تاکت، ریل ءُ دگہ تکانی تہ ءَ شوربندی آرگ ءَ کمک کنت اِنت۔

سَے نیمگی دری کارانی وزیرانی دیوان، چین ءِ دری کارانی وزیر چن گینگ ءِ گُشگ ءِ پد ءَ برجاہ دارگ بیتگ دانکہ اسلام آباد ءُ کابل ءِ نیام ءَ پھازگی ءِ درگت ءَ برجاھیں تکانسری دیر کنگ بہ بنت، کہ آ بیجنگ ءِ برجاھیں شوربندی بیلٹ اینڈ روڈ انیشیٹو ءِ راہ ءَ اڑانڈ اَنت۔ اھوالکار ءُ پریسکار عبدالباسط خان ءِ گُشگ اِنت کہ پاکستان ءِ تہ ءَ پہ چین ءَ درستاں مستریں پھازگی تکانسری بلوچ جتائی لوٹوکیں گل اَنت، کہ بیجنگ ءَ ڈھجار دیان بیتے کہ آ بلوچستان ءِ جنگ زدگیں پرگینگ ءِ تہ ءَ وتی زرکاری ءِ سر ءَ دوبر چار ءُ بیچار بہ کنت۔ چین ھاسیں پئیم ءَ بلوچ لبریشن آرمی ءِ وتکُشیں سکواڈ مجید بریگیڈ ءِ بابت ءَ تکانسر اِنت۔

بلوچ جُنز ءِ مزن نامیں سروک ڈاکٹر اللہ نزر ءَ ھم جھان ءَ چین ءِ واھگانی بابت ءَ ھژار کنان ءَ گُشتگ کہ “ بلوچ وتی راجی مانشت ءِ ھاتر ءَ پاکستانی پوج ءِ بگیر ءَ جد ءُ جھد کنگ ءَ اَنت وھدیکہ گوادر ءَ چینی پوج “ پیپلز لیبریشن آرمی“ ءِ ھستی دمگی ءُ میان اُستمانی تاکتانی ھاتر ءَ یک پدراھیں تُرس اِنت ءُ اگاں آیاں ایشی ءِ سر ءَ دلگوش گور نہ کُت گُڑا آ الم پشیمان بنت۔

چین وتی مپاداتانی پھازگ ءِ ھاتر ءَ دمگ ءِ جتائیں ڈیھاں گوں وتی زرکاری ءُ سپارتی سیادی ءَ مھکم کنگ ءَ اِنت ءُ دمگ ءِ ھما ڈیھ کہ اود ءَ بلوچاں باھوٹی زُرتگ ءُ چہ آیاں کمک ءِ واھگ دار اَنت، گوں ھما ڈیھاں چین ءِ نزیکی ودگ ءَ اَنت کہ اے بلوچ راجی جُنز ءِ جنجالانی تہ ءَ گیشی آورت کن اَنت بلے بلوچ جیڑہ ءَ گیشینگ ءَ ابید، بلوچستان ءِ تہ ءَ زرکاری ءِ شوربندی پھازیتگ نہ اَنت، بلوچ راجی جُنز ءِ بگیر ءَ نوکیں سنگر پچ کنگ ءَ ابید چین ءَ لوٹ ایت کہ بلوچ جُنز ءَ بندوکیں ادارگاں گوں تچکیں ترانکاری بہ کنت ءُ پر ایمنیں گیش ءُ گیواری ءِ نیمگ ءَ گام بہ جُنزین اَنت کہ اے دویں راجانی ھاتر ءَ گھتریں پیسلہ بیت اِنت۔

سوڈان ءِ پوج ءَ ھواریں مردماں یک نوکیں شونے ءَ جنگ بندی ءَ تپاکی کتگ-

امریکہ ءِ ھال سرکنوکیں ادارہ اے پی ءِ رد ءَ اے جار امریکہ ءُ سعودی ءِ سروکاراِ کتگ – ایشی ءَ پیش سوڈان ءَ بیوکیں گپ ءُ تران بے سوب بیتگ اَنت-

امریکہ ءُ سعودی عرب ءَ یک ھواریں درشانے ءَ گوشتگ تیابدپی شھر ھدہ ءَ سوڈان ءِ پوج ءُ ریپڈ سپورٹ پورسز ءِ ھپت روچ ءِ جنگ بندی ءِ مسام ءَ دزنشان کتگ دمگی وھد ءُ پاسانی رد ءَ دوشمبے ءِ شپ ءَ ساھت نُھ ءُ چل ءُ پنچ دمان ءَ بیت اِنت-

درشان ءَ گوشگ بیتگ ھردوکیں نیمگاں تپاکی بیت اِنت گڑا جنگ اوشت ایت اِنت- ھردوکینانی درشاناں گوشگ بیتگ ھردوک سعودی ءُ امریکہ ءِ کمکارانی گون ءَ مسام کتگ کہ چل ءُ ھشت ادارانی توک ءَ ھچ پوجی پائدگ زرت نہ کنت-

ایشی ءَ پیش ھردوکانی نیمگ ءَ شھریانی پھریزگ ءُ انسانی کمک ءِ سر کنگ ءِ سر ءَ ھم مسام کنگ بیتگ بلے ھردوکاں یکے دومی ءِ ھلاپ ءَ بھتام جنی کتگ بیتگ-

امریکہ ءُ سعودی ءِ ھواریں درشان ءَ گوشگ بیتگ اے گپ شماراں درستاں سرپدی ھست اِنت کہ ھردوکیں نیمگاں پیش ءَ جنگ بندی ءِ جار جنگ بیتگ بلے ایشی ءِ سر ءَ ھچ تپاکی نہ بیتگ-

گوستگیں جنگ بندی ءِ مسام ءِ ڈول ءَ جدہ ءَ بیوکیں مسام ءَ ھردوکین نیمگانی مردماں دزنویس کتگ ءُ امریکہ ءُ سعودی عرب ءِ میان استمانی پلامرزی ءِ جنگ بندی ءِ رھبندانی رد ءَ چار ءُ ٹپاسکاری کنگ بیت اِنت-

دی مانٹیرنگ اینڈ کوآررڈینیشن کمیٹی ءِ امریکہ، سعودی عرب ءُ ھردوکیں نیمگانی سَے سَے نمائندگ ھوار بنت اِنت-