TBP Balochi

بلوچستان ءِ بُنجاھی شھر چہ شال ءَ زورانسری آوار جنی ءِ نشانگ کنگ بیتگیں عبدالقدوس بنگلزئی ءِ مات ءَ گوں ھکومت ءُ انسانی ھکانی ادارھاں چہ بیگواھیں چُک ءِ دیم آرگ ءِ کمک ءِ لوٹ کتگ-

بیگواھیں عبدالقدوس بنگلزئی ءِ مات گوشگ رِد ءَ منی چُک گوستگیں سال ءِ شانزدہ دسمبر ءَ شال ءَ سردار منیر جان دگ چہ شال ءَ سی ٹی ڈی ءَ دزگیر کنگ ءَ پد زورانسری آوار جنی ءِ نشانگ کتگ، مات ءَ گْوشتگ کہ چُک ءِ زورانسری آوار جنی ءِ سبب ءَ سک باز ازیت ءِ آماچاں-

عبدالقدوس بنلگزئی ءِ مات ءَ گْوشتگ کہ آ نی پیر ءُ آجزیں چُک لوگ ءِ یک والینوک اِنت آ کجام کانود ءُ کجام جرم ءِ سر ءَ بیگواہ کتگ اگاں آئی ءِ سر ءَ کجام وڑیں جرمے ھست آمیدگساں انساپ دیگ بہ بیت-

عبدالقدوس بنگلزئی ءِ مات ءَ ھکومت ءُ انسانی ھکانی ادارھاں چہ بیگواھیں چُک ءِ دیم آرگ ءُ پہ سلامتی یل کنگ ءِ کرد پیلو کنگ ءِ دزبندی کتگ-

پنجگور ءِ دمگ گچک ءَ سُھرک ءِ نادراھی ءَ تباھی کتگ، دمگ ءِ بازیں مردمے نادراھی ءِ آماچ –

تنی وھدی بازیں مردم ءُ زھگے نادراھی ءِ آماچ بوتگ انت – نادراھی ءِ آماچ بوتگیں مردمانی تہ ءَ یک سالی مزمل ء عبدالحکیم، بیست ءُ بیست ءُ دو سالی سرفراز محمد ءُ یم پسران ء عبدالحمید ءُ لعل جان ء گمانی ءُ دگہ مردم ھوار انت کہ اے پنجگور گچک سرگوز جھمنند انت – اشانی تہ ءَ نادراھے پنجگور ٹیچنگ نادراھجاہ ءَ برگ بوتگ انت –

نادراھی ءِ گیش بوگ ءَ مردم سک باز پدرد انت ءُ آھانی گوشگ انت کہ تنی وھدی جانسلامتی ءِ واکدارانی ھچ کس نہ اتکگ گچک ءَ اے وھدی دو بیسک ہیلتھ یونٹ ھست انت بلے آسراتی ءُ ڈاکٹر نہ بوگ ءِ سوب ءَ گیر پھال انت روچ پہ روچ نادراھی گیش بوان انت جست پُرس کنوک نیست –

زانگ بہ بیت گچک چہ پنجگور ءَ باز دور انت ءُ شریں دگ ھم نیست اودا سر بوگ ءَ کساس چار ءُ پنچ کنٹہ راہ ءَ روگ کپیت –

مردم وتی نادراھاں پنجگور آرگ ءَ بازیں دلسیاھیانی دیمپانی ءَ کنگ ءَ انت – آھانی گوشگ انت گچک ءَ دو بیسک ہیلتھ یونٹ انت کہ سرگوز ءَ چہ باز دور انت آھانی تہ ءَ یک یونٹ ءِ گچک کہن انت کہ ھردوکاں ڈاکٹر ءُ دگہ آسراتی نیست انت –

آھانی گوشگ ات پنجگور ءَ ویکسین جنگ بیت بلے اے دمگاں کس نہ ایت ھمے ھاتر ءَ دوریں دمگانی مردمانی نادراھی ءِ تہ ءَ گیشی کئیت – آھاں چہ جانسلامتی ءِ واکداراں لوٹ کتگ کہ ویکسین مردماں جنگ بہ بیت

چہ شال ءَ ماھل بلوچ ءِ زورانسری آوار جنی ءِ بگیری ءَ بلوچستان ءِ جتا جتائیں دمگاں زھرشانیانی درچ بندات کنگ بوتگ – مرچی بلوچستان ءِ بنجاھی شھر شال ءَ ھم زھرشانی روانک ءِ کشگ بوتگ وھدیکہ باند ءَ بزاں بیست فروری ءَ کراچی ،کیچ ءِ بنجاھی شھر تربت ءُ مند ءَ ھم زھرشانی ءِ جار جنگ بوتگ انت –

شال ءِ زھرشانی ءَ ماھل بلوچ ءِ تُرو ءَ ماھل بلوچ ءِ گوم ءَ بوتگیں وئیل ءِ درگت ءَ گوشتگ کہ پاکستانی پوج ءِ مئے گِس ءِ بیڑ بری ءِ میان ءَ مارا یک جتا کوٹی ءَ بند کتگ وھدیکہ ماھل دومی کوٹی ءَ برگ بند کنگ بوتگ –

آئی ءَ گوشتگ کہ ما وتی کوٹی ءَ بند بوتگ ایں ما ماھل ءِ آہ سلواتانی توار اشکتگ کہ اودا آ سک باز لٹ شاپ کنگ بوتگ – آئی ءِ زھگ ھم چہ ترُس ءَ کُکار ءُ گریوگ ءَ لگ اِتگ انت –

آئی ءِ تُرو ءَ گوشتگ من پریات کتگ گوشتگ کہ اے زھگانی سر ءَ رھم بہ کن ات آئی ءِ مات ءَ یل بدئیت گڈا آھاں گوشتگ کہ اشی ءَ ما ھمودا دیم دئیں کہ اشی لوگواجہ شُتگ ، زھگانی جاہ ھم ھما انت درساں ھمودا روگی انت بلے تو اگاں ادا چہ در اتک ءُ شُتے یا دگری ءِ کرا گپ جت ترا ھم ماپ نہ کنیں –

نوکتریں ھالانی رِد ءَ شال سریاب دگ ءَ ماھل بلوچ ءِ یل کنائینگے ھاتر ءَ برجاھیں زھرشانی واکدارانی باور کنائینگ ءَ ھلاس کنگ بوتگ – بلوچ وومن فورم ءَ شال کسٹم گائی خان چار ءِ سر ءَ برجاھیں زھرشانی ھلاس کنگ ءِ جار جتگ چِل ءُ ھشت ادار ءِ الٹی میٹم داتگ –

آئی ءَ گوشتگ اگاں ماھل بلوچ ءِ سر ءَ دروگیں الزام ءُ ارزی ھلاس کنگ ءُ آ یل کنگ نہ بوت گڈا دگہ گلانی ھمراھی ءَ ترندتریں زھرشانی کنگ ءَ لاچار بہ ایں –

وھدیکہ دومی نیمگ ءَ باند ءَ بیست فروری ءَ ماں کراچی ءُ کیچ ءِ بنجاھی شھر تربت، مند ءَ زھرشانی کنگ ءِ جار جنگ بوتگ –

آئی ءِ کھول ءِ مردماں چہ مند، تربت ءُ کراچی ءِ نودربر، سیاسی ءُ چاگردی باسکاں ھوار ھر تک ءُ پھناتاں سیادی داروکیں مردماں گوں لوٹ کتگ ءُ گوشتگ کہ باندا بزاں بیست فروری ءَ کراچی ءُ تربت ءَ ھوار مند ءَ سھب ءِ ادار دھ ءَ مند ءِ دمگ سورو ءَ ماھل بلوچ ءِ زورانسری آوار جنی ءِ بگیری ءَ یک زھرشانی روانک ءِ کشگ بیت ما چہ درسیں مردماں لوٹ کن ایں کہ زھرشانی ءَ بھر بہ زور انت گوں ما ھمراھ داری بکن انت –

بلوچستان ءِ بنجاھی شھر شال ءَ بلوچ زالبول ماھل بلوچ ءِ زورانسری آوار جنی ءُ پد ءَ دروگیں ارزی نامہ ءِ ھلاپ ءَ سریاب دگ کسٹم چوک ءِ سر ءَ نندانک برجاہ اِنت ءُ چریشی ءِ سبب ءَ روانی مھتل اَنت-

شمبے ءِ روچ ءَ بلوچ زالبول، زھگ ءُ سیاسی پھناتاں بندوکیں مھلوک بازین کچے ءَ ڈگری کالج سریاب ءِ دیم ءَ مُچ بیتگ اَنت روانک اش بندات کتگ ایشی ءِ توک ءَ دزگیر کنگ بیتگیں ماھل ءِ زھگ ھم ھوار بیتگ اَنت-

آیانی دستاں ماھل ءِ اکس ءُ پلے کارڈز مردین ءُ زالبولاں ماھل ءِ سر ءَ دروگیں ارزی نامہ ءِ ایر جنان ءَ گوشتگ کہ ایشی ءَ پیش سی ٹی ڈی ءَ بازیں مردم ھنچیں دروگیں ارزی نامہ کتگ انت آ دروگ در اتکگ اَنت-

اے وھد ءَ بازیں کچے ءَ زھرشانی کنوکاں کسٹم چوک ءَ نندانک جتگ ءُ نشتگ اَنت-

زھرشانی کنوکانی گوشگ اِنت کہ ریاست بنگلہ دیش ءِ راجدپتر ءَ پد ءَ دوبر نوک کنگ اِنت یکشل ءَ بلوچ زالبولانی ھلاپ ءَ اے وڑیں کارپد ودی کنگ اِنت آ زالبولاں ترسینگ لوٹ اتگ اِنت-

بلوچ یکجھتی کمیٹی شال ءِ رھشونانی گوشگ اِنت ماھل ءِ سر ءَ جتگیں بھتام دور کنگ بہ بنت ءُ آ یل کنگ بہ بیت اگاں ناں گڑا زھرشانی گیش ترند کنگ بیت اِنت-

زورانسری ءِ آوار جنی ءِ ھلاپ ءَ پرکاریں گل وائس فار بلوچ مسنگ پرسنز ءِ چیئرمین نصر اللہ بلوچ ءَ گوشتگ کہ بلوچستان ءَ سی ٹی ڈی ءِ ھمک کاروائی شکی نگاہ ءَ چارگ بنت-

آئی ءَ گوشتگ کہ ھیومین رائٹس کمیشن پاکستان ءَ گوں دزبندی اِنت آ ماھل بلوچ ءِ سر ءَ جتگیں بھتامانی سر ءَ یہ فیکٹ فائنڈنگ مشنے جوڑ بہ کنت ءُ وئیل ءِ درگت ءَ پٹ ءُ پول بہ کنت یک تچک ءُ پلگاریں درشانے شنگ بہ کنت ءُ سرکار اے وئیل ءِ ھلاپ ءَ پارلیمانی کمیٹی جوڑ کنگ ءِ لوٹ ءَ ھم کن آں –

روکپتی بلوچستان ءَ گوستگیں روچاں چیریں ادارہ “اطلاعات ” ءَ چار کس آوار جنگ ءَ پد بیگواہ کرتگ اَنت-

گیشیں ھالانی رد ءَ روکپتی بلوچستان ءِ بنجاھی شھر زاھدان ءَ ھبدہ فروری ءَ ایرابی اسپیشل یونٹ لشکر ءَ چار کس آوار جتگ ءُ چیرین ادارھانی دست ءَ داتگ اَنت-

آوار جنگ بیتگیں مردمانی پجار ھژدہ سالی ئین اسماعیل ریگی ء پرویز، نوزدہ سالی ئیں امید کھرازئی ء عبدالحمید، بیست سالی ئیں یحییٰ ریگی ء عبدالرحمان ءُ بیست ءُ دو سالی ئین فرھاد ریگی ء عبدالرحمان ءِ ناماں زانگ بیتگ اَنت ءُ ھر چاریں مردمانی سیادی زاھدان ءَ اِنت –

اے مردم گوستگیں آدینگ ءِ روچ ءَ نماز ءَ پد دزگیر کنگ ءُ بیگواہ کنگ بیتگ اَنت-

زانگ بہ بیت روکپتی بلوچستان ءَ آوارجنیانی درچ یکشل ءَ برجاہ اَنت ھمے کساس مردم گرگ ءُ یل بوگ ءَ دومی نیمگ ءَ ھمود ءَ دزگیر کنگ ءُ بیگواہ کنگ بیتگ اَنت-

ترکی ءُ شام ءَ اتکگیں کھرین زمین چنڈ ءَ بیران بیتگیں مردمانی کچ چل ءُ شش ھزار ءَ سر بیتگ اَنت-

ھال سر کنوکیں ادارہ روئٹرز ءِ رد ءَ ترکی ءَ داں انگت ءَ سَے لکھ اپارٹمنٹسانی دروھگ ءِ ھال سر بیتگ اَنت ءُ بیرانیانی کساس گیش بوگ ءِ ھم گمان اِنت-

دومی نیمگ ءَ شام ءِ شورش آماچیں دمگاں ھم بیرانیانی کچ گیش بوگ ءَ اَنت –

میان اُستمانی ادارہ ورلڈ فوڈ نیادانی تہ ءَ وھد پہ وھد دزبندی کنگ اِنت کہ شام ءَ جنگ بندی کنگ بہ بیت دانکہ کمکی کاراں پہ جیڑہ ءُ مشکل جوڑ مہ بیت –

شمبے ءِ روچ ءَ گیزستان ءَ ریسکیو ٹیم زرباری ترکی ءِ شھر انتاکیہ ءَ یک ماڑی ءِ چیر ءَ پنچ مردم اش کش اتگ کہ ایشانی توک ءَ سَے مردم زندگ بیتگ اَنت کہ شامی کھولے مردمے بیتگ-

دیوال ءِ چیر ءَ کشگ بیتگیں مردمانی تہ ءَ پت ءُ مات بچ اتگ اَنت بلے زھگ نہ بچ اتگ ایشی ءَ ھوار زھگ ءِ دو گوھاراں ھم وتی ساہ داتگ اَنت –

ریسکیو ٹیم ءِ یک باسکے ءَ روئٹرز ءَ گوشتگ کہ ما مروچی کونڈگ ءَ بیتگ اِنت ما پریات ایشکتگ اَنت وھدیکہ ما شوھاز کتگ گڑا مارا پنچ مردم دزکپتگ اَنت –

اے وھد ءَ ترکی ءَ بیران بیتگیں مردمانی کساس چل ھزار ءُ شش سد ءُ چل ءُ دو ءَ شام ءَ پنج ھزار ءُ ھشت سد مردم ءَ گیش مردم بیران بیتگ اَنت-

دومی نیمگ ءَ ترکی ءَ تباہ بوتگیں ماڑیانی جوڑ کنوکانی سر ءَ ترندیں ایراد گرگ بوگ ءَ اَنت-

بلوچ یکجہتی کمیٹی (کراچی) ءَ جارکش ءَ وتی یک درشانے تہ ءَ گوشتگ کہ سی۔ٹی۔ڈی ءَ دوشی شال ءَ پوجکشی کوتگ ءُ ماہل بلوچ نام ءِ یک زالبول ءِ وتکُش تراک ءِ نام داتگ ءُ گوں چُکاں یکجاہ زورانسری آوار جتگ۔ بلوچ راج اگاں 2005 ءَ زرینہ مری زورانسری بیگوائی ءَ ھاموش مہ بیت ایں گڑا مروچی بلوچ راج چوشین جاوراں دوچار نہ بیتگاں زی رشیدہ زہری مروچی ماہل ڈولیں مئے مات ءُ گْہار ءُ بلوچ راجے دُود ءُ ربیدگ بیگواہ نہ بیتگ ایت اَنت۔ اے ھمے ھاموشی اِنت کہ 18 سال چہ گیش زرینہ مری بیگواہ اِنت ءُ ھمے ھاموشی سوب ءَ ھمک روچ مئے مات ءُ گْہار زورانسری بیگواہ کنگ بنت ایں۔

جارکش ءِ گوشگ اِنت کہ بلوچستان ءَ بلوچ زالبول ھم پھریز نہ انت، یک جنوزامے کہ آئی زندمان ءِ مستریں مول ءُ مراد ھمے بیتگ کہ وتی دوئیں کسانیں چُکاں بوان ءِ ایت، ھمے ھاتر ءَ چہ تربت ءَ شال ءَ آتکگ کہ اِد ءَ وتی چُکاں شوکیں زانت ءُ زانشت بہ دنت ایں، بلّے دوشی شپ پوجی کارمندھاں آگوں چُکاں یکجاہ آوار جتگ۔ مئے مات ءُ گْہاراں وتکوش ترک ءِ نام دنت او چادر ءُ چار دیواری لپاشگ چہ رَند زورانسری بیگواہ کنت اِش ءُ وھدے ما اے اَمل ءِ ھلاپ کاری ھاتر ءَ زھرشانی ءُ پریس کلب نیمگ ءَ راوئیں گڑا مارا ملک ءِ لگور ءِ نام دیگ بیت ایں وھدے مئے مات ءُ گْہار شپ ءِ تہاری ءَ گوں چُکاں آوار بیگواہ کنگ بنت ایں اگاں ما اے اَمل سر ءَ زھرشانی ءُ ھِلاپ کاری مہ کن ایں گڑا بکن ءِ چے؟ مئے مات ءُ مئے گْہار مئے ننگ ءُ اِزتّاں اے دورشم ءَ مئے مات ءُ گْہاراں زورانسری بیگواہ کنگ ءُ بلوچ روایاتانی لپاشگ ءَ ما ھچ رنگ ءَ برداشت نہ کن ایں ءُ ھاموش نہ نندیں۔

جارکش ءَ وتی درشانے تہ ءَ گیش گوشتگ کہ پوجی ادارگ وتی راہبند ءُ کانودے پلہ مرزی ءَ بہ کن آں ءُ بے وجہ ءَ مئے مات ءُ گْہاراں بیگواہ کنگ ءَ بند بہ کناں البتہ چوش نہ بوت گڑا مارا دگ ءُ پریس کلبانی دیم ءَ زھرشانی کنگ ءِ رہبندی ءُ کانودی ھک ھست ایت۔ ما یک رندے پد ءَ ھکومت، برزیں ادارگ ءُ پوجی ادارگاں چہ لوٹ کن کہ مئے ننگ ءُ اِزت سر ءَ دست چِست کنگ ءَ بدار انت ءُ بند بہ کن اِنت ءُ اے جیڑا چے سرکچ بہ بیت البتہ مارا زھرشانی ءُ روانک کَشگ ءِ ھک داریں۔ اگاں ماہل بلوچ سر ءَ جتگیں بے مکسد ءُ بے بُنیاتیں الزام واپس زِیرگ نہ بیتاں ءُ ماہل بلوچ ءُ گوں وتی چُکاں یکجاہ راست ءُ سالم یل کنگ نہ بیت ءُ آھوکیں وھد ءَ بلوچ چادر ءُ چادیواری یے لپاشگ بوت گڑا ما اے اَمل ءَ ھِلاپ ءَ سکتیں ھِلاپ کاری یے ھک داریں ءُ ما اے چوشیں اَمل ھِلاپ ءَ سکتیں ھِلاپ کاری یے جار ءَ جن ایں۔

کاؤنٹر ٹیررزم ڈپارٹمنٹ ءِ جارکش ءَ اھوالکاراں گوں ٹاہ داتگ ءُ گوشتگ کہ سی ٹی ڈی ءَ چہ شال ءَ بلوچستان لبریشن فرنٹ ءِ یک زالبول ءِ دزگیر کتگ ءُ آئی گور ءَ وتکُش کوٹ ءِ دستیگ کُتگ –

سی ٹی ڈی ءِ جارکش ءَ ٹاہ داتگ کہ پوج ءَ شال ءِ دمگ سیٹلائٹ ٹاؤن لیڈیز پارک ءِ نزیک ءَ کاروائی کنان ءَ بی ایل ایف ءِ یک وتکشیں ارشکاریں زالبول ءِ دزگیر کتگ – سی ٹی ڈی ءِ رِد ءَ زالبول ءِ گور ءَ آھاں وتکشی کوٹ ءِ گوں چار کلو تراکناکیں شورواں دستیگ کتگ –

زانگ بہ بیت گوستگیں شپ ءِ ادار یانزدہ ءِ نزیک ءَ پاکستانی پوج ءَ بلوچستان ءِ بنجاھی شھر شال ءَ بلوچ زالبول ماھل بلوچ گوں چکانی ھمراھی ءَ چہ وتی جند ءِ گِس ءَ زورانسری آوار جتگ ءُ بیگواہ کتگ –

چم دیستیں گواھانی رِد ءَ آوار جنی ءِ وھد ءَ پوج ءَ آ سک باز لٹ شاپ کتگ انت وھدیکہ پدا رند ءَ آئی ءِ زھگ یل داتگ انت بلے زالبول ھنگت بیگواہ انت –

نوکتریں ھالانی رِد ءَ ھال ءِ شنگ بوگ ءَ پد سی ٹی ڈی ءَ یک زالبولے ءِ دزگیری ءِ ٹاہ داتگ بلے آئی ءِ نام زاھر نہ کتگ –

وئیل ءِ درگت ءَ بلوچ نیشنل مومنٹ سیکٹری جنرل دلمراد بلوچ ءَ وتی ٹویٹ ءِ تہ ءَ نبشتگ کہ چہ شال ءَ پاکستانی پوج ءَ شھید ندیم ءِ جنوزامیں لوگبانک ماھل بلوچ گوں زھگاں زورانسری آوار جتگ ءُ بیگواہ کتگ کہ سرجمیں شپ ءَ لٹ شاپ کنگ ءَ پد زھگ سھب ءَ یل داتگ انت بلے ماھل بلوچ ھنگت پوج ءَ گون انت –

بلوچ راجداریں باسک زالبول ءِ زورانسری آوار جنی ءَ ترندی ءَ گوں ایرجنگ انت، زھری کھول ءِ زورانسری آوار جنی ءِ بگیری ءَ تنی وھدی سرجمیں بلوچستان ءَ زھرشانیانی درچ برجاہ انت کہ مرچی دگہ زالبول ءِ آوار جنگ بوتگ – وھدیکہ بلوچ گلانی نیمگ ءَ ماھل بلوچ ءِ زورانسری آوار جنی ءِ بگیری ءَ باند ءَ شال ءَ زھرشانی ءِ جار جنگ بوتگ –