TBP Balochi

چینی شھریانی سر ءَ فدائی اُرشکار کنوکیں بلوچ زالبول شاری بلوچ ءِ جسد کھول ءِ ھوالگ ءَ دیگ بیتگ ٹ سیزدہ ماہ ءَ پد آئی ءِ نماز جنازہ بنکی ھنکین ءَ وانگ بیتگ-

گوستگیں سال ءِ بیست ءُ شش اپریل ءَ کراچی یونیورسٹی ءِ بنجاھی شھدگ ءَ یک فدائی اُرشے ءَ چینی استاداں نشانگ کنوکیں شاری بلوچ ءِ نماز جنازہ کھول ءِ ھوالگ ءَ دیگ بیتگ – شاری بلوچ ءِ نماز جنازہ مروچی آئی ءِ بنکی ھنکین نزر آباد ءَ سھب ءِ ساھت دہ ءَ وانگ بیتگ-

زانگ بہ بیت کراچی ءَ گوستگیں سال ءِ بیست ءُ شش اپریل ءِ نیمروچ ءَ فدائی اُرش ءَ سَے چین ءِ نندوکاں ھوار چار مردم مرتگ ات اَنت-

کراچی ءَ اُرش ءِ زمہ واری بلوچستان ءَ پرکاریں گل بلوچ لبریشن آرمی ءَ من اتگ ات – جارکش جیئند بلوچ ءَ گوشتگ ات کہ گل ءِ ونگ مجید برگیڈ ءِ ھمراہ شاری بلوچ ءَ اے اُرش کتگ-

امریکہ ءَ سعودی سفیر ریما بنت بندر ءَ راجدپتری سائنسی مشن ءَ سعودی ءِ ماہ ءِ سر ءَ روکیں ریانہ برناوی ءُ علی القرنی ءَ میان اُستمانی خلا-ی اسٹیشن ءَ بیگ ءِ پژدر ءَ شاہ سلمان بن عبدالعزیز، سلہ عھد شھزادہ مھمد بن سلمان ءُ سعودی مھلوک ءِ نیمگ ءَ مراد باتی دیگ بیتگ-

سرکاری ھال سرکنوکیں ادارہ ایس پی اے ءِ رد ءَ شھزادی ریما بنت بندر ءَ گوشتگ کہ سعودی عرب ءِ خلائی نیاد ءَ مروچی راجدپتری سوبمندی بیتگ، اے سوبمندی ءِ پژدر ءَ مھلوک ءَ مراد باتی گوش آں –

آئی ءَ گوشتگ کہ سعودی عرب ءِ خلائی نیاد ءَ سوبمند کنگ ءَ بھر زیروکیں درستیں مردمانی ءُ ادارھانی منت ءَ گراں – مروچی سعودی عرب ءُ مسلمانیں زالبول میان اُستمانی تکاں گام ایر کتگ ءُ مزنیں سوبمندی یے گپتگ-

شھزادی ریما ءَ گوشتگ کپ اے سعودی ءِ زالبولاں وت واک کنگ ءُ سعودی وژن 2030 ءَ سرجم کنگ ءَ دیمروئی، سروکی کنگ ءِ کرد ءَ تالان کنگ ءَ مزنیں گامے – چریشی ءَ چہ زانگ بیت اِنت سعودی عرب زالبولانی وت واک کنگ ءَ جھد ءَ اِنت-

سعودی ءِ سفیر ءَ گوشتگ کہ خلائی مشن ءِ روگ ءِ نیاد ءَ بھر زیرگ پھری یے اے دو راجدپتری تاکاں مزنیں بستارے دار ایت –

عرب ءُ مسلمانیں زالبولانی خلائی مھم ءَ روگ ءُ سعودی ٹیم ءَ میان اُستمانی تکاں خلائی اسٹیشن ءَ روگ ءَ ستاشانیانی سوبمندی یے –

اسرائیل ءَ متھدہ عرب امارات ءَ سپارت ھانہ ءَ دوشمبے ءِ روچ ءَ گوشتگ امارات ءَ اسرائیل ءِ سروک اسھاق ھرزوگ ءُ اسرائیل ءِ سر وزیر بنجمن نیتن یاھو ءَ را اے سال ءِ نومبر ءَ دبئی ءَ بیوکیں جاورانی گر ءُ داری ءِ نیاد کوپ 28 ءَ بھر زورگ ءِ داوت داتگ –

عرب نیوز ءِ رد ءَ اگاں اسرائیل ءِ سر وزیر نیتن یاھو کانفرنس ءَ بھر زیر ایت گڑا سروزیری ءِ دور ءَ اے آئی ءِ اولی رند بیت اِنت متھدہ عرب امارات ءَ آیگ اِنت-

اے سال ءِ بندات ءَ آئی ءِ تر ءُ تاب امارات ءَ واترگ بیتگ آئی ءَ اے سال ءِ بندات ءَ آیگ ءِ گپ واترینتگ-

زانگ بہ بیت متھدہ عرب امارات ءَ اے سال ءِ سِی نومبر ءَ اں دوازدہ دسمبر ءَ دبئی ءُ ایکسیو سینٹر ءَ میان استمان ءِ کلائمنٹ ایونٹ ءِ سروکی ءَ کنگ اِنت-

ایشی ءَ پیش امارات ءَ شام ءِ سروک بشار الاسد کوپ 28 ءَ بھر زیرگ ءِ داوت داتگ بیتگ-

ایران ءَ علی رضا عنایتی ءَ سعودی عرب ءَ وتی سفیر کتگ –

عرب نیوز ءَ ایرانی ھال سرکنوکیں ادارہ میزان ءِ درور دیان ءَ گوشتگ کہ سعودی عرب ءَ سفیری ءَ دارگ بوتگیں علہ رضا عنایتی ایران ءَ وزیر ھارجہ ءِ اسسٹنٹ ءِ اگدو ءَ پیش ءَ کار ءَ بیتگ-

ایران ءِ نیمگ ءَ ڈیھ ءَ سفیر ءِ دارگ ءِ جار اپریل ءِ ماہ ءَ چین ءِ جھداں تھران ءُ ریاض ءِ میان ءَ بیتگیں مسامانی آسری بیتگ-

اے مسام ءَ ایران ءُ سعودی عرب ےِ بازیں سالاں دشمنی ھلاس کتگ – علی رضا ایران ءِ وزارت ھارجہ ءَ عرب خلیج ءَ ڈائریکٹر جنرل ءَ کار ءَ بیتگ-

زانگ بہ بیت سعودی عرب ءَ سال دوھزار ءُ شانزدہ ءَ تھران ءَ وتی سفارت خانہ ءُ مشھد ءَ وتی کونسل ھانہ ءَ سرکاری بگیری زھرشانیاں پد ایران ءِ گون ءَ وتی سیادی ھلاس کتگ ات-

بلوچستان ءِ دمگ ھزدار وڈھ ءَ لسبیلہ شھدربرجاہ وڈھ کیمپس ءِ نودربراں سول سوسائٹی ءُ سیاسی باسکانی ھمراھی ءَ روانک ءِ کش اِتگ ءُ لوٹ کتگ کہ کیمپس ءَ ماڑی دیگ بہ بیت اِنت ءُ جتا شھدربرجاہ ءِ جوڑ کنگ بہ بیت ءُ سردار عطاء اللہ مینگل ءِ نام ءَ کنگ بہ بیت اِنت آھاں اے ھم لوٹ کتگ کہ ایندگہ جیڑہ ھم گیش ءُ گیوار کنگ بہ بنت –

روانک شھدربرجاہ ءِ چار راہ ءَ بندات کنگ بیتگ ءُ وڈھ پریس کلب ءَ تاں شتگ انت ءُ ھمودا مچی کنگ بوتگ – زھرشانی ءَ سول سوسائٹی، باپاری، شھدبرجاہ ءِ لکچراراں ھوار مزنیں کچے ءَ مردماں بھر زرتگ –

درنگاز کنوکاں تران کنان ءَ گوشتگ کہ وڈھ کیمپس ءَ ھپت سال سرجم بوگی انت بلے ھچ نیمگ ءَ دلگوش دیگ بوگ ءَ نہ انت – نصیرآباد شھدربرجاہ ءِ کراداد ءُ ھاراب کمیپس ءِ ھمراھی ءَ وڈھ کیمپس ءَ شھدربرجاھے ءِ جوڑ کنگ ءِ کراداد منگ بوتگ بلے لسبیلہ شھدربرجاہ ءِ وڈھ کیمپس ءَ دلگوش نہ دیگ زانت دژمنی یے –

آھانی گوشگ ات کہ وڈھ کیمپس ءِ درگت ءَ نودربراں گوں بلوچستان گورنر ءَ گند ءُ نند کتگ بلے ھچ گامگیج زورگ نہ بوتگ – آھاں لوٹ کتگ کہ وڈھ کیمپس سردار عطاء اللہ مینگل ءِ نام ءَ یک فل فلیج شھدربرجاہ ءِ جوڑ کنگ بہ بیت ءُ آھاں گوشتگ کہ وڈھ کیمپس ءَ ھمنکس کہ جیڑہ ھست انت گیش ءُ گیوار کنگ بہ بنت –

آھانی گوشگ ات کہ وڈھ کیمپس ءِ کاردار مدامی ءِ ھاتر ءَ بہ بنت پرچا کہ آھاں شش سال انت وتی کرد ءَ پیلو کنگ ءَ انت –

آھانی گوشگ ات کہ وائس چانسلر وڈھ کیمپس ءِ پنڈ اُتل ءَ پرچا ھرچ کنگ بوگ ءَ انت چریشی ءَ چہ ھمے پدر بیت کہ وائس چانسلر ءُ آئی ءِ ٹولی وڈھ شھدربرجاہ ءِ لوٹوک نہ انت وائس چانسلر ءَ اگاں بہ لوٹ اتنت گڈا ڈیرہ مراد جمالی ءِھمراھی ءَ وڈھ کیمپس ھم جوڈ بوتگ ات –

آھاں پہ نودربرانی ھاتر ءَ زوتاں زوت ھاسٹل جوڑ کنگ ءِ لوٹ کتگ اشاں ابید تنخواہ ءِ گیش کنگ، اسٹاف ءِ کمی ءَ درسیں جیڑوانی سر ءَ گامگیج زورگ بہ بیت ءُ ھشت ادار ڈوٹی دیگ بہ بیت – لوئر اسٹاف مدامی بہ بنت ءُ وائس چانسلر لومز ءِ وڈھ کیمپس ءِ گوم ءَ بدنیتی رویش ءِ سر ءَ ترندیں گامگیج زورگ بہ بیت –

بلوچستان ءِ دمگ بولان ءَ مروچی سیمی روچ ءَ ھم پاکستانی لشکر ءِ لشکر کشی برجاہ –

دمگی مردمانی رد ءَ مروچی سیمی روچ ءَ گن شپ ءُ چیریں بالیگ یکشل ءَ دمگ ءَ برز ءَ بال اَنت ءُ ھمے وڑ بازیں جاھاں ھیلی کاپٹرانی تیرگواری ھم بیتگ اَنت-

زرغون، مارگٹ ءُ کش ءُ گوری دمگاں بیڑ ءِ زد ءَ اَنت، لشکر کشی ءِ وھد ءَ پاکستانی پوج سلاہ بندیں مردماں نشانگ کتگ ات کہ ایشی ءِ زمہ واری بلوچ لبریشن آرمی ءَ پہ وت ءَ زرتگ ات-

دو روچ پیش پوجی لشکر کشی ھما وھد ءَ کنگ بیتگ کہ سلاہ بندیں مردماں پاکستانی پوج ءِ یک پوسٹے ءِ سر ءَ اُرش کتگ ات-

پاکستانی پوج ءِ جارکش آئی ایس پی آر ءَ وئیل ءِ راست کنان ءَ رسانکدراں گشتگ کہ شال ءِ ھند زرغون ءَ پاکستانی پوج ءِ چیک پوسٹ نشانگ کنگ بیتگ-

آئی ایس پی آر ءِ رد ءَ تیرگواری ءِ آسر ءَ پوج ءِ سَے کارندہ کُشگ بیتگ اَنت ءُ آئی ءَ ٹاہ داتگ کہ یک اُرشکارے جنگ بیتگ-

اے اُرش ءِ زمہ واری بلوچ لبریشن آرمی ءَ پہ وت ءَ زرتگ ات ءُ گوشتگ ات کہ گوستگیں روچ ءَ لشکر کشی ءَ دزگٹیں پاکستانی پوج ءِ کارندہ نشانگ کتگ انت – جیئند بلوچ ءَ گوشتگ ات کہ بولان مارگٹ ءَ سرمچارانی اُرش ءَ پاکستانی پوج ءِ سَے ایس ایس جی کمانڈوز کُشتگ اَنت-

کیبرال

نبشتہ کار: لقمان بلوچ

دی بلوچستان پوسٹ

“مئے مردم مئے کوہ اَنت”اے کتاب کیبرال ءِ ساچشتاں چہ یک ساچشتے کہ آشوبی لبزانک ءِ تہ ءَ بلاھیں کَدّ ءُ بستارے ئِے واھُند اِنت، اے کتاب ھما زمانگ ءَ چاپ بوتگ کہ افریقہ ایردست بوتگ، اود ءِ مردم گُلام بوتگ اَنت، آیانی زَمین، زُبان ءُ دود ءُ ربیدگ گار ءُ بیگواھی ءِ نیمگ ءَ سپر کنگ ءَ بوتگ اَنت کیبرال ءِ اے کتاب گنی بساؤ ءُ کیپ وردے ءِ آجوئی جُنز ءُ آئی ءِ ھیال ءُ تجرباتاں پَدر کَنت کہ چوں اود ءِ مھلوک ءَ کبزہ گیر پروش داتگ ءُ چوں وتی وت واجھی ءَ پہ جُھد کُرتگ-

اے کتاب یک شَرین ءُ پراھ ءُ شاھگانیں رَنگی ءَ بازیں سرھالانی سر ءَ باوست کَنت، کبزہ گیری ءِ تاریخی پُشدر ءَ رِیچ ءُ پریچ کَنت، دود ءُ ربیدگانی ارزشت پہ آجوئی زُرمبشتاں چے اِنت؟ ءُ زانت ءِ بستار چی اِنت؟ اے دُراھیں سرھالاں شوکیں رَنگے ءَ پدر کَنت ءُ دیم ءَ کار اِیت-

کبزہ گیر ءُ آجوئی

کیبرال ھما رِپک ءَ پدر کَنت کہ آ پرتگالیاں افریقہ ءِ زمین ءُ مردمانی سر ءَ کارمرد کُرتگ اَنت ءُ گُوْش اِیت کہ مارا ھواری جُھد کَنگی اِنت ءُ یک راجی پجارے جوڑ کَنگی اِنت چی ءَ کہ راجی پجار آجوئی ءِ اولی گام اِنت-

دودءُ ربیدگ ءُ راجی پجار

کیبرال ءِ گُشگ اِیش اِنت کہ راجی آجوئی ءِ جُھد ءَ ربیدگ مزنیں ارزشتے داریت، آ گُوْش اِیت کہ پہ آجوئی ءَ الم اِنت کہ تو وتی دود ءُ ربیدگاں ارزشت بِدے ءُ ایشاں پہ وَت شَرپے بِزان ، چیاکہ اے ھمے دود اَنت کہ ترا یکجاہ کَن اَنت ءُ یک راجے ءِ بستار ءِ بَکش اَنت ءُ ترا گِھگیری ءِ کِشک ءَ پیش دار اَنت-

زَانت ءُ سرپدی

کیبرال وانگ ءِ کِرد ءَ باز ساڑا اِیت چِیاکہ آئی ءِ نِزّ ءَ کبزھ گیری ءِ ھلاس کَنگ ءِ توجیل یَکّیں وانگ اِنت کہ آ ترا زانت ءِ ھمرائی ءَ سرپدی جم دنت، وانگ جیڑگی راھاں بوج اِیت، تنقید ءُ اصلاح ءَ پوہ کَنت، سیاسی سِنچے وَدی کَنت پمیشکا پہ آجوئی ءَ وانگ باز مزنیں ارزشتے دار اِیت-

گوریلہ جنگ ءُ آشوبی حکمت عملی

اے کتاب ھما طریقہ کاراں سَریچ پَریچ کَنت کہ آ کیبرال ءُ آئی ءِ ھمبراھاں کُرتگ اَنت انچوش کہ گوریلہ جنگ بہ بیت، مردمانی موبلائیزڈ کَنگ بہ بیت یا یک مُھکمیں گَلے ءِ جوڑ کنگ بہ بیت کیبرال سیاسی زانت ءِ ھاسیت ءِ سر ءَ ھم شریں رَنگے ءَ گپ ءُ تران کَنت ءُ اے زلورت ءَ ھم مار ات کَنت کہ آجوئی ءِ جنزانانی رِشتگ چوں گوں لَس مھلوک ءَ جوڑ کَنگ بیت اِنت-

مئے ھَبر

کیبرال وَ راستیں کہ افریقنے بوتگ بلے اے کِسّہ ءُ پنت تھنا افریقن نہ اَنت بلکیں اے شاھگانیں زَمین ءِ سر ءَ ھر ھما ایردستیں راجے کہ ھَست اِے آئی ءِ کِسّہ اِنت ءُ آئی ءِ پَنت اِنت چوش کہ بلوچ ءَ ھم مزنیں مُدّتے بیت کہ آئی ءِ آجوئی پچ گِرگ بوتگ، آئی ءِ زمین پُلگ بوتگ، تاریخ لگانڈویں رَنگے ءَ دیم ءَ آرگ بیتگ، دود ءُ ربیدگانی ارزشت گار کُتگ ءُ علم ءُ زانت ءَ چہ دور داشتگ چیا کہ کبزہ گیر چو سادگ نہ اِنت آ زانت کہ کجام چیز اِنت کہ منی کبزھگیری ءِ مَرگ اِنت، کجام چیز اِنت آ من ءَ یکیں روچ ءَ چہ اِے زَمین ءَ در کُرت کَنت پمیشکا آئی ءَ تئی تاریخ ، دود ءُ ربیدگ ءُ وانگ ءُ زانگ دُراھ وتی دست ءِ چیر ءَ کُرتگ اَنت بلے بلوچ ہم چو سادگ نہ بوتگ یک ھَدّے ءَ داں وتی گِھگیری ءِ سوب ءَ بلوچ ءَ وت ءَ داشتگ ءُ دیمتر ءَ ھم دار اِیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔