TBP Balochi

بلوچستان ءِ دمگ بارکھان ءِ ھند حاجی کوٹ ءَ چہ سئے جون دزکپتگ اَنت۔

پولیس ءِ ردءَ جون یک چات یے تہءَ دزکپتگ اَنت، بنداتی اھوالانی ردءَ دو مردین ءُ یک جنین ئے جون دزکپتگ اَنت۔

جونانی کشگ ءِ بنداتی کار برجاہ اِنت وھدیکہ ایمبولینس وئیل جاہ ءَ دیم دیگ بیتگ۔ پولیس ءَ داں انگت جونانی پجار ءُ کوش ءِ سوب ءِ بابت ءَ ھچ پئیمیں لیکہ ءِ درشان نہ کُتگ۔

پولیس اھوالانی ردءَ جونانی کشگ ءُ پجار ءَ پد قانودی گامگیج بندات کنگ بنت۔

دومی نیمگ ءَ چاگردی رسانکدراں جنزوکیں اھوالانی ردءَ چہ بارکھان ءَ دزکپتگیں جون خان مھمد مری ءِ لوگیگ ءُ آئی دو زھگانی اَنت۔ 

زانگ بہ بیت کہ خان مھمد مری ءِ کھول سردار عبدالرحمن کھیتران ءَ وتی جِند ءِ اڈ کُتگیں زندانی ءَ بندیگ کُتگ بیتگ اَنت۔ 

لھتیں روچ ساری ءَ خان مھمد مری ءِ لوگیگ ءِ یک کسانیں تامر بندے ھم شنگ کُتگ اَت ءُ آئی ءَ دزبندی کُتگ اَت کہ مارءَ چہ اے زندانی ءَ آجو کنگ بہ بیت۔

بلوچستان ءُ کراچی ءَ دو مردم آوار جنگ بیتگ اَنت ءُ دو آجو کنگ بیتگ اَنت-

گیشیں ھالانی رِد ءَ پنجگور ءَ یکشمبے ءِ روچ ءَ یحییٰ ء سلام جھمنند خدابادان حاجی نصیر مسیت ءِ نزیک ءَ سرف گاڑی ءَ سواریں سلاہ بندیں مردماں لَٹ ءُ کُٹ کتگ ءُ وتی ھمراھی ءَ برتگ ءُ بیگواہ کتگ-

زانگ بہ بیت ھمے ماہ ءَ پنجگور ءَ اے وڑیں سیمی وئیل اِنت کہ ناشناسیں سلاہ بندیں مردم مردماں بیگواہ کنگ ءَ اَنت-

دمگی مردمانی رِدءَ اے زورانسری آوار جنی ءِ تہءَ پاکستانی پوج ءِ جوڑ کتگیں سلاہ بندیں ٹولی ھوار اَنت-

دومی نیمگ ءَ چہ کراچی ءَ ھال اِنت کہ پاکستانی پوج ءَ کراچی ءِ دمگ گلشنِ مزدور ءَ اورنگزیب ء ماسٹر سراج جھمنند پنجگور سوردو ھپت فروری ءِ شپ ءِ ساھت چار ءَ لوگ ءَ بیڑبرتگ ءُ آوار جتگ –

زانگ بہ بیت اورنگزیب یکرندے ساری ءَ ھم دو جون 2020 ءَ چہ کراچی ءَ آوار جنگ ءُ بیگواہ کنگ بیتگ ءُ داں ھشت ماہ ءَ آزارجاھاں بند کنگ ءَ پد یل کنگ بیتگ –

دومی نیمگ ءَ چہ شال ءَ سر بیتگیں ھالانی ردءَ چہ دْراجیں مدتے ءَ پاکستانی پوج ءِ آزارجاھاں بند بیتگیں محمد ریاض ءُ محمد اعظم آجو بیتگ اَنت-

زورانسری آوار جنی ءِ بگیرءَ پُرکاریں گل وائس فار بلوچ مسنگ پرسنز ءِ رِد ءَ بیگواھیں محمد ریاض ء فقیر محمد نیچاری ءُ محمد اعظم ء عبدالقادر نیچاری آجو بیتگ اَنت-

زانگ بہ بیت محمد ریاض ءُ محمد اعظم 21 نومبر 2017 ءَ چہ شال ءَ بیگواہ کنگ بیتگ اَنت-

سربوتگیں ھالانی رِد ءَ مروچی سھب ءَ ناشناسیں سلاہ بندیں مردماں بلوچستان دمگ کیچ مند ءَ پاکستانی پوج ءِ پانگس ءِ سر ءَ اُرش کُتگ –

اُرش مند ءِ دمگ شیراز ملڑ ءَ برجاھیں پوجی پانگِس ءِ سر ءَ کنگ بوتگ، اُرش ءَ پاکستانی پوج ءَ جانی ءُ مالی تاوان دیمپانی بوتگ – اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بی ایل ایف ءِ جارکش میجر گوھرام بلوچ ءَ وتئی افیشل ٹیلیگرام چینل “آشوب” ءَ شنگ کرتگیں درشان ءِ تہ ءَ گوشتگ کہ اے اُرش ءَ دژمن ءِ سَے پوجی کارمند کُشتگ انت ءُ بازینے زدگ کُتگ –

جارکش میجر گوھرام ءِ رِد ءَ دو شمبے ءِ سُھب ءِ ادار یازدہ ءِ نزیک ءَ سرمچاراں کیچ ءِ دمگ مند شیراز ءَ مُلڑ ءِ سر ءَ برجاھیں پاکستانی پوج ءِ پانگس ءِ سر ءَ گوں دورجنگیں توپک، راکٹ ءُ نوکیں سلاھاں اُرش کُرتگ، ارش ءِ آسر ءَ سَے پوجی کارمند مُرتگ ءُ بازینے زدگ بوتگ انت –

جارکش ءِ رِد ءَ سرمچاراں مُلڑ پانگس ءِ سر ءَ اول ءَ دور جنگیں توپک ءِ سر ءَ یک کارمندے نشانگ کُرتگ ءُ کُشتگ ءُ پد ءَ گوں راکٹ ءُ نوکیں سلاھاں دُژمن پوج ءِ سر ءَ ٹوھیں اُرش ءِ کُرتگ – اُرش ءَ یک راکٹے ھما جاہ ءَ کپتگ کہ دُژمن پہ وت ءَ ورگ جوڑ کنگ ءِ تیاری ءَ کنگ ءَ بوتگ انت – مئے اے اُرش ءَ دژمن پوج ءِ سَے کارمند مُرتگ ءُ بازینے زدگ بوتگ انت –

میجر ءَ گوشتگ کہ زورگیریں پاکستانی پوج ءِ سر ءَ مئے اُرش زورگپتیں بلوچستان ءِ آجوئی ءَ تاں برجاہ مان انت –

بلوچستان ءِ بنجاھی شھر شال ءَ ماھل بلوچ ءِ زورانسری آوار جنی ءُ پدا آئی ءِ سر ءَ جنگ بوتگیں دروگیں ارزی ءِ بگیری ءَ تربت ءَ بی وائی سی، نودربر، سول سوسائٹی نیمگ ءَ زھرشانی روانک ءِ کشگ بوتگ وھدیکہ کراچی ءَ ھم بلوچ یکجھتی کمیٹی ءِ نیمگ ءَ زھرشانی ءُ روانک کشگ بوتگ –

بلوچستان ءِ دمگ کیچ ءِ بنجاھی شھر تربت ءَ مروچی دو شمبے ءِ روچ ءَ مزنیں کچے ءَ زالبول ، نودربر ءُ لس مھلوک ءَ عطا شاد ڈگری کالج ءَ بگر تاں شھید فدا چار راہ ءِ سر ءَ روانک ءِ کش اِتگ ءُ زھرشانی کتگ –

درنگاز کنوکانی دست ءَ ماھل ءِ اکس ءُ پلے کارڈ بوتگ انت – درنگاز کنوکاں ماھل بلوچ ءِ سر ءَ جنگ بوتگیں دروگیں ارزی ترندی ءَ گوں ایرجتگ ءُ گوشتگ کہ چدوپیش سی ٹی ڈی ءَ باز براں مردمانی نام ءَ وتگڑیں ارزی نبشتگ کُتگ بلے پدا رند ءَ آ دروگ زانگ بوتگ انت –

آھانی گوشگ ات کہ پاکستانی پوج سی ٹی ڈی ءَ چدوپیسر بلوچ زالبول نورجان ءُ حبیبہ پیرجان ھم زورانسری آوار جنگ ءُ بیگواہ کنگ بوتگ انت پدا آھانی سر ءَ ھمے وڈ وتگڑیں ارزی نبشتہ کنگ بوتگ کہ پدا رند ءَ دروگ زانگ بوتگ انت نوں ھما وڈ ماھل ءِ گوم ءَ کنگ بوگ ءَ انت کہ اے درکانودی ءُ ایرجنگی انت –

دومی نیمگ ءَ بلوچ یکجھتی کمیٹء کراچی ءِ نیمگ ءَ کراچی پریس کلب ءِ دیم ءَ زھرشانی ءِ کنگ بوتگ کہ اودا مزنیں کچے ءَ راجداریں گل، سوشل ایکٹوسٹ ءُ انسانی ھکانی باسکاں بھر زرتگ –

زانگ بہ بیت ھبدہ ءُ ھژدہ فروری ءِ میانی شپ ءَ ادار یانزدہ ءِ نزیک ءَ پاکستانی پوج ءَ بلوچستان ءِ بنجاھی شھر شال ءَ بلوچ زالبول ماھل بلوچ گوں ھمراھے زھگاں چہ جند ءِ گِس ءَ زورانسری آوار جتگ ءُ بیگواہ کتگ –

بیڑ بری ءِ دومی روچ ءَ بلوچ گل ءُ انسانی ھکانی ترندیں زھرشانیانی سوب ءَ سی ٹی ڈی ءِ واکداراں بلوچ زالبول ءِ دزگیری منّ اِتگ ءُ آئی ءِ سر ءَ بازیں ارزی ءِ نبشتگ کتگ –

سی ٹی ڈی ءِ جارکش ءَ رسانلدراں وتی شنگ کرتگیں درشانے ءَ ٹاہ داتگ کہ آھاں شال ءِ دمگ سیٹلائٹ ٹاؤن لیڈیز پارک ءِ نزیک ءَ کاروائی کنان ءَ بی ایل ایف ءِ یک وتکشیں ارشکاریں زالبول ءِ دزگیر کتگ – سی ٹی ڈی ءِ رِد ءَ زالبول ءِ گور ءَ آھاں وتکشی کوٹ ءِ گوں چار کلو تراکناکیں شورواں دستیگ کتگ –

بلے آئی ءِ کھول ءَ ماھل ءِ ڈن ءَ دزگیری ھبر دروگ کتگ ءُ گوشتگ کہ ماھل پوج ءَ چہ جندے گِس ءَ زھگانی ھمراھی ءَ آوار جتگ ءُ پدا رند ءَ آئی ءِ سر ءَ دروگیں بھتام جنگ بوتگ –

ماھل بلوچ ءِ زورانسری آوار جنی ءُ پدا رند ءَ آئی ءِ سر ءَ جنگ بوتگیں دروگیں بھتامانی بگیری ءَ بلوچستان ءِ جتا جتائیں دمگاں زھرشانیانی درچ برجاہ انت گوستگیں روچءَ شال سریاب دگ بلوچ وومن نیمگ ءَ زھرشانی نندانک ءِ کنگ بوتگ کہ پدا رند ءَ واکدارانی گند ءُ نند ءَ پد ننداک ھلاس کنگ بوتگ –

ماھل بلوچ ءِ تُرو ءَ شال ءِ نندانک ءِ سر ءَ وئیل درگت ءَ گوشتگ کہ پاکستانی پوج ءَ مئے گِس ءَ بیڑ برتگ بیڑ ءِ میان ءَ مارا دگہ کوٹی ءَ بند کتگ ءُ ماھل دگہ کوٹی ءَ برگ بوتگ ءُ آ لٹ شاپ کنگ بوتگ –

ماھل بلوچ ءِ درکانودی آوار جنی ءِ بگیری ءَ نودربر ءُ سیاسی گلانی نیمگ ءَ بلوچستان ءَ ھوار پاکستان ءِ دگہ شھراں زھرشانی کنگ ءِ جار جنگ بوتگ – درنگاز کنوکاں لوٹ کتگ ءُ گوشتگ کہ ماھل بلوچ ءِ سر ءَ جنگ بوتگیں ارزی ھلاس کنگ بہ بنت ءُ آ یل کنگ بہ بیت ءُ بلوچستان ءَ یکجاھیں سزا ءَ زالبولانی نشانگ کنگے کار یل کنگ بہ بیت-

ایرانی چیریں ادارھانی تیرگواری ءَ کساس پنچ ماہ ءَ تھت ءِ کنڈ ءَ کپوکیں ورناہ بیران بیتگ-

سر بیتگیں ھالانی رد ءَ روکپتی بلوچستان ءِ دمگ سب سوران ءَ پنچ ماہ ءَ پیسر ایرانی چیریں ادارھانی تیرگواری ءَ زدگ بیتگیں ورناہ ءَ گوستگیں شپ ءَ وتی ساہ داتگ ءُ بیران بیتگ-

ھالانی تہ ءَ گوشگ بیتگ کہ پنچ ماہ ءَ پیش بزانکہ بیست ءُ پنچ ستمبر ءَ روکپتی بلوچستان ءِ دمگ سب سوران ءَ چیریں ادارھانی کارمنداں یک گاڑی ءِ سر ءَ تیرگواری کتگ ات چریشی ءَ بیست ءُ چار سالی ئیں فرشید دژند جھنند کرمشاہ زدگ بیتگ ات –

زدگ بیتگیں ورناہ نادراہ جاہ ءَ برگ بیتگ ءُ اود ءَ بنداتی درمان ءَ پد آ ایران ءِ اُستان مشھد ءَ پہ گیشین جاندراھی ءَ برگ بیتگ ءُ اود ءَ آئی ءَ گوستگیں شپ ءَ ماں نادراہ جاہ ءَ وتی ساہ داتگ ءُ بیران بیتگ-

دمگی مردمانی گوشگ اِنت ایرانی لشکر ءُ چیریں ادارہ شکی ئیں گاڑیانی سر ءَ تیرگواری کن اَنت ءُ چریشی ءَ چہ بازیں مردمے ھمے تیرانی آماچ بیت ءُ زوال بنت-

بلوچ رھشون ءُ بلوچستان لبریشن فرنٹ ءِ سروک ڈاکٹر اللہ نزر بلوچ ءَ چاگردی ترامجاہ ٹوئٹر ءَ نبشتگ کنان ءَ گوشتگ کہ بلوچ راج ءِ ھلاپ ءَ پارلیمنٹ، آمیدگس، ایگزیکٹو، میڈیا ءُ پوج یکیں لڑا ھوار بیتگ اَنت-

ڈاکٹر اللہ نزر بلوچ ءَ دیمتر ءَ گوشتگ کہ بلوچاں ھچبر چہ پاکستان ءَ انساپ ءِ امید نیست اِنت ءُ پارلیمنٹ ءَ نندوکیں بلوچ ٹولی گیر پیداواری ءُ رد آشوبی پاٹی اَنت پرچاکہ آیاں ریاست ءِ اے وڑیں چیز جائز گشتگ اَنت آ ھرچی کنگ ءَ اِنت ایشی ءِ امید اولی روچ ءَ بیتگ-

آئی ءَ گوشتگ کہ ریاستی ادارے ھما زلماں کنگ اِنت بنگلہ دیش ءَ کتگ انر ئِے ما ھچبر انساپ ءِ پنڈگ ءَ نہ لوٹ ایں بلے میان اُستمانی برادری ءَ زیرستیں راجانی پھریزگ ءَ وتی کرد ءَ پیلو کنگ لوٹ ایت پاکستان ءَ وتی زوراکی برجاہ کرتگ اَنت انسانی ھکانی گل ءُ میان اُستمانی رسانکدر وتی کرد ءَ پیلو بہ کن اَنت-

روکپتی بلوچستان ءِ بنجاھی شھر زاھدان ءِ مزنیں مسیت مکی مسیت ءِ پیش امام ءُ راجدوستیں عالم دین مولانا عبدالحمید ءَ اے گپ پدر کرتگ کہ بندیگین مردمانی گون ءَ پٹ ءُ پولی آفیسر سلکاری کنگ ءَ اَنت-

آئی ءَ چاگردی ترامجاہ ٹوئٹر ءَ یک پوسٹے ءِ سر ءَ نبشتگ کتگ ءُ گوشتگ زاھدان ءِ مزنیں جیل ءَ بازیں بندیگ سلکاری نشانگ کنگ بوگ ءَ اَنت کہ اے اسلام ءُ کانون ءِ رھبندانی رد ءَ مزنیں جرمے-

آئی ءَ گوشتگ اگاں ایران وتی زھگانی ھونانی چُنسک ءُ آیانی گون ءَ اے دابیں چیزاں بند نہ کنت گڑا اے مزنیں ازاب ءُ جرمانی لڑا ھوار گیجگ بنت-

آئی ءَ گوشتگ کہ دنیا ءِ انساپ کاریں گل دیم ءَ بہ کنز اَنت ءُ اے درگت ءَ اے توار چست بہ کن اَنت –

روکپتی بلوچستان ءِ دمگ ھاش ءَ ایرانی چیریں ادارھاں یک مردمے دزگیر کنگ ءَ پد بیگواہ کرتگ-

گیشیں ھالانی رد ءَ آدینگ ءِ روچ ءَ ھاش ءِ ھند اکبر آباد ءَ ایرانی چیریں ادارھاں یک ورنایے دزگیر کنگ ءَ پد ناشناسیں جاھاں برتگ ءُ پد ءَ آئی ءِ درگت ءَ ھچ ھال نیست اِنت-

آوار جنگ بیتگیں مردم ءِ پجار امین مراد زئی ء عبدالرؤف جھمنند اکبر آباد ھاش ءِ نام ءَ زانگ بیتگ-

آئی ءِ کھول ءِ گوشگ اِنت امین ایرانی چیریں ادارگاں ابید ارزی گرزی ءَ دزگیر کتگ ءُ برتگ –

آیانی گوشگ اِنت مروچی سَے روچ ءِ گوزگ ءَ پد ھم آئی ءِ درگت ءَ ھچ ھال نیست اِنت –

زانگ بہ بیت روکپتی بلوچستان ءَ گوستگیں سال ءِ رپورٹ ءِ توک ءَ سَے سد ءُ پنچ مردم آوار جنگ ءُ بیگواہ کنگ بیتگ اَنت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ سی ٹی ڈی ءِ ماھل بلوچ ءَ گوں بی ایل ایف ءَ ھمگرنچ کنگ ءِ دروگیں بھتامانی درگت ءَ وتی آفیشل ٹیلی گرام چینل آشوب ءَ شنگ کرتگیں درشان ءِ تہ ءَ گوشتگ کہ ماھل بلوچ نہ بی ایل ایف ءِ سرمچارے ءُ نہ کہ پدائی یے۔

جارکش میجر گوھرام بلوچ ءَ گوشتگ کہ چہ دمگ ءَ سربیتگیں ھالانی رد ءَ ماھل بلوچ گومازی ءِ میتگ، مکران ءِ نامی ئیں راجدوست ھُدا مُرزی ئیں واجہ محمد حسین ءُ ہیومن رائٹس کونسل ،بلوچستان ءِ سرکماش بی بی گل ءِ نشار اِنت۔ چوشکہ واجہ محمد حسین ءُ بی بی گل ءِ سیاسی چِست ءُ ایراں زورگیریں پاکستان ءَ ایربُرت کنگ ءَ نہ اِنت پمیشکا پاکستانی پوج ھمک روچ آئی ءِ گس ءَ تیرگواری کنت ءُ بیڑ بر اَنت- سال دوھزار ھشدہ ءَ پوج ءَ آیانی گس مانداشتگ گڑا اے کھول لڈ اِتگ ءُ شال ءَ شُتگ کہ اود ءَ ماھل گوں وتی تْرو ءُ دُسکیچاں جھمنند بیتگ ءُ وتی دوئیں زھگے وانینتگ اَنت-

میجر ءَ گوشتگ کہ سی ٹی ڈی ءِ کارمنداں انکس توان ءُ جُرت کُج اِنت کہ آ بی ایل ایف ءِ یک سرمچارے ءَ دزگیر بہ کن اَنت- سی ٹی ڈی ءِ دیم ءَ آرگ پوج ءُ چیریں ادارھانی دست ءَ اِنت کہ زورانسری آوار جنگ بوتگیں بلوچ بچاں دروگیں میڑاں جنگ یا دروگیں ارزی نبشتہ کنگ ءُ دروگیں کارروائیاں آیانی دزگیری پدر کنگ اِنت- ایردستیں بلوچستان ءِ وتگڑیں سرکار ءِ وڑ ءَ سی ٹی ڈی ھم پوج ءُ چیریں ادارھانی یک کمکارے کہ ھمے بنیاد ءَ آ وتی درکانودی کاراں کانود ءِ جامگ ءَ گْورا دنت ءُ وتی کُرتگیں سلکاریاں ھمیشانی دیم ءَ مُش ایت-

جارکش میجر گوھرام ءَ گوشتگ کہ ما اے گپ ءَ تچک کنگ لوٹ ایں کہ نہ بی ایل ایف ناشرکاریں گلے ءُ نہ بی ایل ایف ءِ گون ءَ ھمگرنچ بیگ یک جُرمے – بلوچستان لبریشن فرنٹ پاکستانی زورگیری ءُ پہ بلوچستان ءِ آجوئی ءَ برجاھیں یک آجوئی لوٹوکیں گلے کہ پاکستانی استان ءِ ناشرکاریانی گھگیری ءَ سلاہ بندیں جُھد کنگ ءَ انت ، پاکستانی نوآبادیاتی زورگیری، زوراکی، لُٹ ءُ پُل ءَ چہ آجوئی ءِ ھک ءُ کانودی جنگ ءَ کنگ ءَ اِنت – بلے ماھل بلوچ ءَ گوں بی ایل ایف ءَ ھچ سیادی نیست – اے باروا سی ٹی ڈی ءِ ٹاپار کینگے زانگ بیت- ماھل بلوچ ءِ دزگیری بلوچ جنینانی تُرسینگ، ھاسکر آیانی کھولانی سیاسی لیکہ ءِ سزا دیگ ءِ یک جُھدے بوت کنت-