TBP Balochi

بلوچستان ءِ دو جتا جتائیں ھنکیناں دو وئیلاں دو زالبول بیران بیتگ اَنت – ھاران ءَ برات ءَ تیرگواری کنان ءَ وتی گوھار کُشتگ ءُ پنجگور ءَ ھژدہ سالیگیں جنکوے آس ءَ ستکگ ءُ بیران بیتگ –

گیشیں اھوالانی رد ءَ ھاران ءِ دمگ زاروزئی ءَ عبدالسلام ء مھمد ھاشم زاروزئی ءَ پستول ءِ گون ءَ تیرگواری کنان ءَ وتی گوھار کُشتگ-

کُشگ بیتگیں جنک ءِ لاش ھسپتال ءَ رسینگ بیتگ ءُ اود ءَ اژدری چار ءُ ٹپاس ءَ پد لاش کھول ءِ ھوالگ ءَ کنگ بیتگ-

ھاران ءِ پولیس ءَ وئیل ءِ ھال ءِ سر بوگ ءَ جرمکارے شوھاز بندات کتگ، بلے تنی وھدی آ دزگیر نہ بیتگ ءُ نانکہ کوش ءِ سبب زانگ بیتگ-

ھمے وڑ ءَ پنجگور ءِ ھند پروم دز ءَ یک لوگے ءَ آس ءِ کپگ ءِ سبب ءَ یک ھژدہ سالیگیں جنکے ستکگ ءُ بیران بیتگ-

اھوالانی رد ءَ ستکگیں جنک غوث بخش نامیں مردمے ءِ زھگ اِنت ءُ اود ءَ آس ءِ کپگ ءِ ھواری ءَ لوگ ھم سرجم ءَ ستکگ ءُ پُر بیتگ –

گوادر ءِ جتا جتائیں ھند ءُ دمگانی مردماں بلوچستان ءِ بنجاھی شھر شال ءَ بلوچ اکیڈمی ءَ تر تاب کتگ ءُ گوں اکیڈمی ءِ سروکاں گند نند کُتگ –

گیشیں ھالانی رِد ءَ گوادر ءِ جتا جتائیں ھند ءُ دمگانی مردماں بزاں (کمیونٹی ڈویلپمنٹ ایکٹوسٹ) بلوچی اکیڈمی ءِ ترّ ءُ تاب کتگ ءُ گوں کمیٹی ءِ سروکاں گند ءُ نند کتگ –

ھمے میان ءَ بلوچ اکیڈمی ءِ سرکماش سنگت رفیق ءَ بلوچی اکیڈمی ءِ کارانی باروا آء سرپدی داتگ انت ءُ این آر ایس پی (NRSP) گل ءِ نمائندگ امان بلوچ ءَ وتی ترّ ءُ تاب ءِ مول مراد درشان کتگ گوشتگ کہ این آر ایس پی گل ءَ گوادر ءِ دُوریں ھلکانی سوشل ایکٹوسٹ بزاں
چاگردی جھد کار کہ پہ وتی چاگرد ءِ گھبودی ءَ جھد کنگ ءَ انت آء بلوچستان ءِ ایندگے ھلک، شھراں ھوار ادارھانی ترّ ءُ تاب کنائیں اِتگ انت تاکہ آ ایشانی کارانی راہ ءُ رھبنداں سرپد بہ بنت-

بلوچ اکیڈمی ءِ سرکماش رفیق بلوچ ءَ گوں آیاں تران کنان ءَ گوشتگ کہ بلوچی زبان، دود ءُ ربیدگ ءِ پھازگ ھر بلوچ ءِ اولی ذمہ واری اِنت – بلوچستان ءِ دُوریں ھلکاں نندوکیں مردم بازیں چاگردی ءُ مالی جنجالانی آماچ اَنت، بلے بلوچ ءِ پجّار آئی ءِ زمین ءُ زبان انت – مئے ورنائیں جھد کار زانت، جانسلامتی ءُ آپ ءُ لین ءِ جیڑواں ھوار زبان ءُ دود ءُ ربیدگ ءِ پھازگ ءَ وتی جھد ءَ پیلو بہ کن انت ءُ اکیڈمی ءِ جھد ءَ گوں ھمراہ داری بہ کن انت –

بلوچستان ءِ دمگ کیچ ءَ پاکستانی پوج ءَ یک نودربرے ءِ زورانسری آوار جنگ ءَ پد بیگواہ کتگ-

گیشیں ھالانی رِد ءَ پرندوشی کیچ ءِ بُنجاھی شھر تربت ءِ ھند آسکانی بازار ءَ پاکستانی پوج ءَ بیڑبرتگ ءُ یک ورنایے زورانسری آوار جتگ ءُ بیگواہ کتگ-

آوار جنگ ءِ بیتگیں نودربر ءِ پجّار شبیر ء بشیر احمد نام ءَ چہ بیتگ کہ آ دہ کلاس ءِ یک نودربرے-

دومی نیمگ ءَ چاگردی رسانکدر ءَ شنگ بیتگیں یک تامُرے ءِ تہ ءَ بیگواہ کنگ بیتگیں شبیر گھار ءِ گوشگ ءِ رِد ءَ پاکستانی پوج ءَ لوگاں بیڑبرتگ ءُ منی برات ڈن ءَ بشانگ تہ ءَ وپسوک بیتگ کہ پوج ءَ واب ءَ چہ پاد کتگ ءُ برتگ لوگ ءِ تہ ءَ لوگ بند کتگ آ سک لَٹ ءُ کُٹانی نشانگ کتگ ءُ توسینتگ-

آئی ءَ گوشتگ کہ وھدے کہ من واب چہ پاد اَتکگ ءُ پوج ءَ منی سر ءَ تیرگواری کتگ چریشی ءِ آسر ءَ دو تیر لوگ دیم ءَ لگتگ ءُ یک تیرے لوگ ءِ تہ ءَ لگّ اِتگ ءُ پد ءَ پوج ءَ منی برات وتی ھمراھی ءَ برتگ-

شبیر ءِ گھار ءَ دزبندی کتگ کہ منی برات یک بے میارے آئی ءِ یل کنائینگ ءِ ھاتر ءَ توار چست بکن اِت-

شال ءِ پریس کلب ءِ دیم ءَ زورانسری آوار جنیانی بگیری ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ پنچ ھزار ءُ پنجاہ ءُ سَے روچ سرجم بوتگ انت –

مروچی چہ سبی ءَ سیاسی ءُ چاگردی باسک امیر محمد بلوچ، نزیر احمد بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ پاکستانی پوج، ایف سی، چیریں ادارہ، سی ٹی ڈی ءُ کشندہ ٹولیانی دست ءَ زورانسری آوار جنگ ءُ شھید بوتگیں بلوچ پرزند، راجداریں پاٹی ءُ انسانی ھکانی ھاتر ءَ جھد کنوکیں گل ءُ بلوچ راجی جھد ءِ ھاتر ءَ سرجمیں راج ءِ دیمھونی ءِ سوب ءَ جھد مھکمیں مرحلے ءَ سر بوتگ –

ماما قدیر ءَ گوشتگ کہ مروچی جھان ءِ گیشتریں راجدوستیں ملک ءُ ادارھانی تہ ءَ بلوچ ءِ پرایمنیں جھد ءِ توار سر بوتگ چریشی ءِ سوب ءَ آ بلوچ راجی زرمبشت ءِ نیمگ ءَ.دلگوش دیگ ءَ انت –

ماما قدیر ءَ گوشتگ کہ اے وھدی ایردستیں بلوچستان پاکستان ءِ زوراکیاں چہ میان استمان ءِ دو کنڈاں اوشتوک انت – راجداریں رھشون ءُباسک ، بلوچ ءُ پشتونانی بگیری ءَ پوج ایف سی ءُ چیریں ادارھاں لشکر کشی کنگ ءِ منگ نامہ دنت ءُ پوج ایف سی ءُ آئی ءِ جوڈ کتگیں کشندہ ٹولی ءَ وتن دوستیں بلوچ پرزندانی کشت کوش، آوار جنگ بوتگیں مردمانی کوش، ژانگولیں جونانی چگل دیگ، زورانسری آوار جنی ءُ انسانی ھکانی لگتمالی ءِ پردہ پوشی ءَ کنت – وھدیکہ کشندہ ٹولی مکبری کن انت ءُ آ پوج ءُ چیریں ادارھانی گوم ءَ ھوار بنت ءُ لشکر کشیاں بھر زور انت زورگیریں پاکستانی ریاست کمک کنت –

بلوچستان ءِ دمگ بولان ءُ ایندگہ کش ءُ کری ھند ءُ دمگاں پاکستانی پوج ءِ مروچی چارمی روچ ءَ ھم لشکر کشی برجاہ بوتگ، بازیں جاھاں کمانڈو ایرگیجگ بوتگ –

اھوالکار ءَ گوں ٹی بی پی ءَ تران کنان ءَ گوشتگ کہ مروچی چارمی روچ ءَ ھم شال ءِ نزیکیں دمگ زرغون ءُ بولان ءِ بازیں دمگاں پوجی لشکر کشی برجاہ انت اے میان ءَ چاریگیں بالگرداں ھم تر ءُ تاب کتگ –

اھوالکار ءِ رِد ءَ زرغون ءُ کش ءُ گوری کوھی دمگاں چہ بالگردانی سر ءَ پوجی کمانڈو ھم ایرگیجگ بوتگ بلے تنی وھدی چہ واکدارانی نیمگ ءَ اے درگت ءَ ھچ گوشگ نہ بوتگ –

زانگ بہ بیت لشکر کشی ھما وھد ءَ بندات کنگ بوتگ کہ ناشناسیں سلاہ بندیں مردماں پاکستانی پوج ءِ یک پانگسے ءِ سر ءَ اُرش کتگ –

پاکستانی پوج آئی ایس پی آر ءَ اے ھبر راست کتگ ءُ گوشتگ کہ شال ءِ نزیکیں دمگ زرغون ءَ پاکستانی پوج ءِ پانگسے ءِ سر ءَ اُرش کنگ بوتگ –

آئی ایس پی آر ءِ رِد ءَ دو دیمی تیرگواری ءَ سَے پوجی کارمند مُرتگ انت ءُ آئی ءَ اے ھم گوشتگ کہ تیرگواری ءَ یک اُرش کارے ھم جنگ بوتگ –

پاکستانی پوج ءِ پانگس ءُ پدا رند ءَ لشکر کشی ءِ میان ءَ سَے جتا جتائیں جاھاں پاکستانی پوج ءِ سر ءَ اُرش کنگ بوتگ ءُ اے اُرشانی زمّہ واری بلوچ آجوئی لوٹوکیں سلاہ بندیں گل بی ایل اے ءَ منّ اِتگ انت – بی ایل اے ءِ جارکش جیئند بلوچ ءِ رِد ءَ اے سرجمیں اُرشاں دوازدہ پوجی کارمند مُرتگ انت – جارکش ءِ رِد ءَ اُرش ءَ مرتگیں کارمندانی تہ ءَ سَے ایس ایس جی کمانڈو ھم ھوار –

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءِ جھمنند ماں سنندج ءَ آوار جنگ ءَ پد ناشناسیں جاھاں برگ بیتگ-

گیشیں ھالانی رد ءَ زاھدان ءِ جھمنندیں فرامرز براھوئی ایرانی چیریں ادارھانی کارندھاں ماں سنندج ءَ آوار جنگ ءَ پد بیگواہ کنگ بیتگ-

اھوالانی رد ءَ بیست ءُ دو سالیگیں فرامرز ریکی ء ھدا نور ریکی روکپتی بلوچستان ءِ بنجاھی شھر زاھدان ءِ نندوک گوشگ بیتگ-

اھوالانی رد ءَ بیست ءُ دو سالی ئیں ورناہ ایرانی چیریں ادارھاں نشہ ءِ باپاری ءِ پژدر ءَ دزگیر کنگ ءَ پد ناشناسیں زنداناں برتگ بلے لس اھوالاں ایشی ءِ راستی انگت نہ بیتگ-

بلوچ سلاہ بندیں گل بلوچ نیشنلسٹ آرمی ءِ کماندار گلزار امام پنام شمبے پاکستان ءَ وتی رسانکدرانی دیم ءَ پیش کتگ-

شنگ بیتگیں اھوالانی رد ءَ سلاہ بندین گل بلوچ نیشنلسٹ آرمی ءِ سروک کماندار گلزار امام پنام ءِ شمبے شال ءَ رسانکدرانی دیم ءَ پیش کنگ بیتگ ءُ اے وھد ءَ آئی ءِ گور ءَ وزیر داکلہ بلوچ میر ضیاء لانگو ءُ سنیٹر آگاہ عمر جاڑیگ بیتگ اَنت-

پریس کانفرنس ءَ گلزار امام ءَ گوشتگ کہ من ھما راہ گچین کتگ ءُ آ رد بوتگ ءُ ھکانی گرگ ءِ دروم پر ایمنیں رنگ اِنت-

آئی ءَ گوشتگ کہ بلوچستان ءَ ھکانی گرگ بس جنگ ءَ نہ بیت اِنت سیاسی درور ءَ گرگ بیت اِنت ءُ مارا امیت اِنت ریاست مات ءِ کرد ءَ پیلو کنت ءُ مارا وھد دنت-

گلزار بلوچ ءَ گوشتگ کہ ایشی ءِ توک ءَ ھچ شک نیست اِنت ریاستی ادار بلوچستان ءِ جیڑ ءِ سر ءَ اَنت آ ایش کن اَنت جنگ ءَ ھچ وتی وھد ءَ زوال مہ کن ات-

آئی ءَ گوشتگ بلوچستان ءَ ھردوکیں نیمگاں مردم جنگ بیتگ اَنت ایشی ءِ ماپی لوٹ آں –

ھمے وھد ءَ وزیر داکلہ بلوچستان ضیا لانگو ءَ گوشتگ کہ جیڑہ گپ ءُ تران ءَ گشینگ بیت اِنت ریاسی ادارھانی گون ءَ گوازی کنوک ھچ رنگ ءَ پھل کنگ نہ بنت-

پاکستان ءِ گوریچانی روکپت ءِ ھند ءَ سَے شمبے ءِ روچ ءَ سلاہ بندیں مردماں گیس ءُ تیل ءِ شوھاز کنوکیں یک پلانٹے ءِ سر ءَ اُرش کتگ – چریشی ءِ آسر ءَ ایف سی ءِ چار کاندہ ءُ دو لس پوشامی کارندھاں ھوار شش کارندہ مرتگ اَنت-

پولیس ءِ اگدودار عرفان خان ءَ رائٹر ءَ گوں گپ کنان ءَ گوشتگ پنجاہ ناشریں مردماں اوگان ءِ سیمسری ھند ھنگو ءَ ایم او ایل پاکستان آئل اینڈ گیس کمپنی ءِ چیردستی ءَ ھلوکیں پلانٹ ءِ سر ءَ اُرش کتگ –

پولیس ءِ گوشگ اِنت ناشریں مردماں راکٹاں ھلوکیں دزبمباں ھوار مزنیں سلاھانی گون ءَ دو چات ایم 8 ءُ ایم 10 نشانگ کتگ اَنت-

پولیس ءِ رد ءَ ایم 8 ءِ سر ءَ اُرش پھزداراں بے سوب کتگ بلے ایم 10 ءَ مردم کشگ بیتگ اَنت-

آئی ءَ گوشتگ کہ ناشریں مردماں گوریچانی وزیرستان ءَ ھواری دمگاں پشت ماندیگ ءَ پیسر پاور پلانٹ ءِ شمسی ھم تاوان داتگ اَنت-

مرتگیں کارندھانی پجار سپاھی حمزہ علی، سپاھی شریعت اللہ، سپاھی محمد ولید ءُ سپاھی ظفر اعظم ءِ نام ءَ زانگ بیتگ اَنت-

پولیس ءِ رد ءَ سلاہ بندیں مردماں سرکاری سلاہ ءُ دگہ ساز ءُ سامان ھم گون وت برتگ اَنت- سلاھانی توک ءَ چار ایس ایم جی، یک ایل ایم جی گون میگزین ءُ گرنیڈ ءُ آئل کمپنی ءِ پھزدارانج دو رائفل ھم ھوار اَنت-

پولیس ءِ رد ءَ پھزداری لاش کمبائنڈ ملٹری ھسپتال ٹل ءَ سر کتگ انت ءُ پوسٹ مارٹم ءَ پد آیانی لاش ھنکیناں دیم دیگ بنت اِنت-

داں انگت ءَ اے اُرش ءِ زمہ واری کس ءَ پہ وت ءَ نہ زرتگ-