سرگْوست: من وان آں
نبشتہ کار: کائنات بلوچ
دی بلوچستان پوسٹ
کمیں روچ پیسر ءَ من وتی دزگْوھارے کہ نام ئِے نوری اِنت، ماں بلوچی وٹس ایپی وانگجاھیں گَلے ءَ ھوار کنائینتگ اَت گُڑا ماں وانگجاہ ءَ ھوار بیگ ءَ پنچ روچ ءَ رَند بے موکل ءَ وت درکپتگ ءُ شُت، بزانکہ ھمے پنچیں روچاں ماں وانگجاہ ءَ ھچ بَھر ھم نہ زورتگ ئِے ءُ ناں کہ دْروت ءُ دْراھی یے ھم کت۔ وھدیکہ اولی ساھت ءَ ما وش آتک کتگ اَت گُڑا مارا وش آتک ءِ ھچ پسّو ئِے ھم نہ داتگ اَت، ھیر اے آئی ءِ جِند ءِ واھشتے ات کہ شُت۔ البت اچ ما موکل کنگ وَ ھژدری اَت ئِے بلے موکل ئِے نہ کت ءُ شُت پمیشکا چہ آئی ءِ اے کار ءَ ما سَک دلگران ات ایں۔
دیر نہ گْوستگ اَت کہ زی ئیں روچ ءَ ماں یک سْیادے ءِ سُور ءَ من گوں نوری ءَ ڈیک وارت۔ وھدے کہ من ءَ دیست ئِے گُڑا وت کَندان ءَ منی کِر ءَ آتک ءُ جُست ئِے کُت “کائنات، اے شمئے چونیں وٹس ایپی گَلے؟ ما وَ ھچ سرپد نہ بیگ ءَ ایں شما ھر کسے ماں اردو ءِ آباں گوں نبیسّگ ءَ دزگٹّ اِت ءُ مارا کَس سرپد نہ کنت کہ دیوان ءِ مول ءُ مراد چے اَنت؟”-
گُڑا من نوری ءَ را ھچ پسّو نہ دات ءُ بے توار ءَ وتی چَم نوری ءِ سر ءَ ٹِک کتگ اَنت بلے من ءَ پد ءَ جُست ئِے کت “منی ھیال ءَ اد ءَ ھالو ءِ جَاک سَک تْرُند اِنت پمیشکا تو منی گپاں سرپد نہ بیگ ءَ ئے”-
من درّائینت” اِنّاں! ھالو سَک وش اَنت، من کَرّے وَ نہ آں کہ تئی گپاں نہ اشکُن آں، اگاں سِیر ءُ مرادانی روچاں ھالو ءُ شاتکامی مہ بیت گُڑا سِیر بےتام بیت پد ءَ سِیر ایوک ءَ ورگ ءِ نام ءَ زانگ بنت ھمے ڈول ءَ اگاں یک راجے ءِ زبان ءَ وانوک ءُ نبیسوک مہ بنت آ زبان گار بیت ءُ زبان ءِ واھند (راج) دائم ءَ گلامی ءِ تھاروکیاں بیگواہ بیت”-
گوں منی اے گپاں نوری ھبکّہ بوت ءُ اشتاپ اشتاپ ءَ گْوشت ئِے “تو من ءَ شگان جنگ ءَ ئے کہ من شمئے وانگجاہ یلہ کت پمیشکا ،نا” –
گُڑا من پد ءَ گوں زھر ءَ درّائینت “دُزّ ریشاں ککّ اِنت، نی دمانے ءَ پیش تو ھمے جُست ءَ ات ئے کہ اے شمئے وانگجاہ چونینے ءُ نی تو ھمے گْوشگ ءَ ئے کہ تو وانگجاہ یلہ کتگ پمیشکا من ترا شگان جَنّگ ءَ آں ءُ چرے گپاں اِے زانگ بیگ ءَ اِنت تو وَ زانت کہ مئے وانگجاہ بلوچی یے اَت ءُ آئی ءِ مول ءُ مراد پہ راجی زبان بلوچی ءِ دیمروی ئیگ اَت بلے تو انگت ءَ ناں کہ چیزے ونت ءُ نیکہ بَھر زورت بلکیں تو مئے وانگجاہ بے موکل ءَ یلہ کت ءُ شُت ئے۔ پد ءَ تئی دومی جُست ھمے بوتگ کہ ما پہ بلوچی نبیسّگ ءَ اردو آباں کارمرز کنگ ءَ ایں، نا! اِے ھم تئی یک جُستے اَت؟-
نی تو من ءَ بہ گْوش کہ ترا کَے ءَ گنوک کتگ کہ اے اردو ءِ آب اَنت، اے آب اردو ءِ پِت ئیگ اَنت؟ اردو وت سیزدھمی سدی ءَ بُنگیج بوتگ بلے چہ اردو ءَ پیش اے آباں اَربی، پارسی، لور، سندھی، تُرکش، کُردش گارشونی،کازک، سومالی، آئیور، اوتمان ءُ پشتو، اوزبک، داری ءُ اپریکہ ءِ لاپ ءَ بازیں راج پہ وتی زبان ءِ سْیاھگ ءَ کارمرز اش کنگ ءَ اَنت ءُ مرچی کساس پانزدہ راجانی ءُ پنجاہ استانانی زبان گوں ھمے آباں نبشتہ بیگ ءَ اِنت، گُڑا تئی رِد ءَ ھمے تیوگیں زبان چہ اردو ءِ وازمندگ اَنت کہ آ پہ وتی راجی زبانانی سْیاھگ ءَ اردو ءِ آباں کارمرز کنگ ءَ اَنت؟ چوناھیگا اردو ھندی ءِ وتگڑ اِنت کہ ماں اَربی آباں نبشتہ بیگ ءَ اِنت۔ نی مرچیگیں وھد ءَ ھندوستانی ملائلم، کشمیری، سرائیکی ءُ پنجابی زبان ھم ھمے آباں پہ وتی زبانانی سْیاھگ ءَ کارمرز کنگ ءَ انت۔
منی دوزواھیں دزگْوھار اے آب اردو پت ءِ نہ اَنت بلکیں اے اَربی سْیاھگ ءِ آب اَنت کہ ھمے تیوگیں زبان وتی زُبان ءِ ھساب ءَ ھمے آباں کارمرز کنگ ءَ اَنت۔ انچوشکہ سندھی ءِ 52 آب اَنت، ھندی(اردو) گوں اربی سْیاھگ ءَ 36 ءُ اربی ءِ جِند ءِ 28 آب اَنت۔ بلے مئے راجی زبان ءِ سْیاھگ ءِ جوڑ کنوک راج ءِ ھستی ءُ نمیران واجہ سید زھور شاہ ھاشمی بوتگ کہ آئی ءَ پہ زبان ءِ آسانی ءُ زگری ءَ ھوار مُدام ھمے جُھد کُتگ کہ بلوچی جتائیں دْروشمے ءَ نبیسگ بہ بیت گُڑا پہ اِے ھاتر ءَ اَربی آب جتا کتگ ءُ بلوچی زبان ءَ گوں 28 ءِ بُن آباں بلوچی ءَ الکاپیں نبشتہ ءِ رھبندے دات ئِے۔ بلے بژن انت ما گلامیں بیتگ ایں پمیشکا مئے راج ءَ ماں گلامی ءِ چاگردی ءَ ھندی وانگ ھیل کتگ ءُ بلوچ ءَ راجی زبان ڈالچار کتگ ءُ چہ بلوچی ءَ دِیر شُت۔ انچوکہ اے ھم راستی یے کہ گلامیں راج ءَ کدی راجی زبان وانینگ نہ بیت بلکیں دژمن آئی ءِ پدریچ ءَ وتی زبان وانگ ءَ بے وس کنت۔
نی اے مئے راجی زمہ واری انت کہ ما اشتاپ مہ کن ایں، بلوچی وٹس ایپی وانگجاھاں باسکی بہ زُور ایں، اول بلوچی دَرونت ءُ نبشتانکاں وانان ءَ بلوچی وانگ ءَ شر ھیل بہ کن ایں ءُ پد ءَ نبشتہ کن ایں۔ اے مئے راجی زمہ واری یے کہ ما بلوچی وت بوان ایں ءُ راج ءَ ھم بلوچی وانگ ءُ دربرگ ءِ کُمک بہ کن ایں۔ ھرکسے بلوچی وٹس ایپی گَلاں اڈ دیان ءَ بلوچی وانینگ جُھد بہ کنت، ما وتی نیمگ ءِ سْیاد ءُ وارساں راجی زبان ءَ بہ وانین ایں”-
گوں اے توارانی اشکنگ ءَ رند نوری بے توار ءَ پشل بیتگ ءُ چہ من ءَ پھلی لوٹ اتگ ءُ گْوشت ئِے کہ من ءَ پد ءَ ماں وانگجاہ ءَ ھوار بہ کن اِت من چد ءُ پد ماتی زبان ءَ ھچبر ڈالچار نہ کن آں بلکیں وت وان آں ءُ دیم ءَ ھم دزگْوھار ءُ وارساں راجی زبان ءَ وانین آں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
