TBP Balochi

روکپتی بلوچستان ءَ ڈکال ءُ بے روزگاری ءَ بازیں ھند ءُ جاہ مان پوش اتگ اَنت –

روکپتی بلوچستان ءَ بندوکیں تندجاہ سنی آن لائن ءِ رد ءَ روکپتی بلوچستان ءَ بے کاری ءُ ناداری ءُ ڈکال ءَ بازیں ھند ءُ جاہ مان پوش اتگ اَنت-

سیستان و بلوچستان ءَ بے کاری ءِ کچ ءُ کساس 12.8 درسد اِنت، سرکاری کچ ءُ کسانی توک ءَ نود ءِ دھک ءَ سراوان، پھرہ، زابل، سیب، سوران، ھیرمند، زھک ءُ سرباز ءَ ھوار ھوار بیست ءِ کساس ءَ شھر بیتگ اَنت کہ اے شھراں گیشتری بے کاری داشتگ ءُ اے استاناں پد چہ ھوزستان گوں ھشت شھر ءَ ھوار بیتگ –

آئی ءِ رد ءَ چریشی ءَ پیش گوریچانء شھرانی سروکاں گوشتگ کہ بے کاری ءِ سبب ءَ اے شھراں ڈکال، کم آپی، ھامون ءِ رود ءِ ھشکی ءُ لوڈ ءُ دَز اَنت-

اے میان ءَ ھومون ءِ مزنیں میتگ ءَ پنچ ھزار کیلومیٹر اِنت ءُ ات یک سد ءُ سِی ھلک اِنت گیش ءُ چہ گیش چل ءُ پنچ ھزار آبادی اِنت کہ ایشاں گیشتریں تاوان ڈکال ءِ کم آپی ءَ دیستگ اَنت –

اود ءِ مردمانی گوشگ اِنت کہ اء جاھاں چل درسد مردم بے کاری ءِ آماچ اَنت کہ پہ روزگار ءِ ھاتر ءَ دگہ دگہ شھر زاھدان، یزد، رفسنجان، کرمان، تھران ءَ روگ ءَ لاچار اَنت –

بلوچ آجوئی لوٹوکیں رھشون ءُ بلوچ سلاہ بندیں گل بلوچستان لبریشن فرنٹ ءِ سروک ڈاکٹر اللہ نزر بلوچ ءَ ماں چاگردی ترامجاہ ٹوئٹر ءَ بلوچ راج دلگوش گور کتگ ءُ گوشتگ کہ من چہ بلوچ راج ءُ آجوئی لوٹوکیں سنگتاں گوں دزبندی کناں کہ سوشل میڈیا ءَ وتی بگیری ءِ بدل ءَ دژمن ءِ بگیریءَ کارمرز بہ کن انت –

آئی ءَ گوشتگ کہ اے تجربگ پیسرا ھم بوتگ، بلے مارا ھچ نہ رستگ، بلے دشمن ءَ پائدگ زُرتگ- اے پنچمی جنریشن وار انت کہ دژمن مئے بگیری ءَ کارمرز ءِ کنگ ءَ انت-

ڈاکٹر اللہ نذر بلوچ ءَ گوشتگ کہ مارا اے ھمے وڑ ءَ دژمن ءِ بگیری ءَ کارمرز کنگی انت- کسے ءَ پرے جھد ءَ یک گامے جتگ، مئے سر ءُ چمان انت، تُری آ بندی انت، درانڈیھ انت، یا سرزمین ءَ انت، بائدیں دژمن ءَ بہ زانت – ھرکس ھرکجا انت، آ اے جُنز ءِ مکسد ءَ بہ زانت ءُ ھواریں پگر ءَ گوں دیم ءَ بہ رؤت –

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی پنچ ھزار ءُ شست روچ سرجم بوتگ انت – مروچی چہ شال ءَ سیاسی ءُ چاگردی باسک ابرار بلوچ، وھاب بلوچ، رحیم بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ راجدپتر ءِ تہ ءَ ھما مردم ابدمان بنت کہ پہ وتی ھاتر ءَ ناں بلکنیں دومیانی ھاتر ءَ زندگ ءَ انت ءُ مردمانی رکینگ ءَ وتی زند ءَ گوازین انت، بلوچستان ءِ جاور روچ پہ روچ نگیگ تر بوان انت، بلوچیں مات وتی زھگاں پہ وانگ ءِ ھاتر ءَ ھم ڈن ءِ در آیگ ءَ نیل انت آھاں ھمے ترس انت کہ مئے زھگ زورانسری آوار جنگ ءُ بیگواہ کنگ مہ بنت یا درکانودی کُشگ مہ بنت –

ماما قدیر بلوچ ءَ گوشتگ کہ بلوچ ورنا نمیران کنگ ءُ پدا آھانی جون گاڑیانی پُشت ءَ بندگ بوتگ ءُ کشان کنگ بوتگ انت، حیات وڈیں ورنا مات پتانی چمانی دیم ءَ آئی دلبند ءَ ھژدہ تیر جتگ ءُ بے دردی نمیران کُتگ، ریاستی زوراکیانی گوستانک سیاہ ءُ تھار انت –

ماما ءَ گوشتگ کہ بلوچیں مات وتی زھگاں پہ اے واست ءَ ورنا ءُ مزن نہ کن انت کہ استان ءِ زوراکیاں بہ سگ انت آھانی واھشت انت کہ مئے زھگ وش ءُ وشھالیں زندے بگوازین انت –

گڈسر ءَ ماما قدیر ءَ چہ میان استمانی انسانی ھکانی ادارھاں گوں لوٹ کتگ کہ آ بلوچستان ءَ استان ءِ زوراکی، لشکر کشی ءُ زورانسری آوار جنیانی گر ءُ دار ءَ وتی کرد ءَ پیلو بہ کن انت –

روکپتی بلوچستان ءِ دو جتاجتائیں جاھاں ایرانی لشکر ءِ تیرگواریاں دو براتاں ھوار چار کس بیران بیتگ اَنت-

اھوالانی رد ءَ روکپتی بلوچستان ءِ دمگ ایرانشھر ءَ ایرانی چیریں ادارھانی کارندھاں تیرگواری کتگ ءُ دو برات کشتگ اَنت-

گیشیں اھوالانی رد ءَ ایرانشھر ءِ ھند بندان در بخش ڈمن ءَ ایرانی اطلاعات ءَ تیرگواری کنان ءَ دو برات کشتگ اَنت-

کُشگ بیتگیں براتانی پجار عبدالسلام چاریزئی ءُ عبدالحلیم ءِ ناماں زانگ بیتگ اَنت ھردوک برات اَنت یار مھمد ءِ زھگ اَنت ءُ دامن بخش گزان آشہ ای پھرہ ءِ نندوک گوشگ بوگ ءَ اَنت-

اھوالانی رد ءَ ھردوکیں برات عید براک ءِ زورگ ءَ پسانی نھاد جاہ ءَ روگ ءَ بیتگ اَنت کہ اود ءَ ابید ءِ دارگ ءَ اطلاعات ءَ تیرگواری کنان ءَ کشتگ اَنت-

ھمے داب ءَ نھبندان ءَ ھم ایرانی لشکر ءَ تیرگواری کرتگ ءُ دو مردم کُشتگ اَنت-

اھوالانی رد ءَ اُستان ھراسان ءُ سیستان ءُ بلوچستان ءَ ھواریں دمگ نھبندان ءَ ایرانی لشکر ءَ تیرگواری کتگ ءُ دو کس کشتگ اَنت-

کُشگ بیتگیں مردمانی پجار عبدالحکیم توتازئی ء حسن ءُ خدانظر تاتوزئی ء عیسیٰ ناماں زانگ بیتگ اَنت ھردوک نسرت آباد زاھدان ءِ نندوک اَنت-

اھوالانی رد ءَ اے ھردوک پرپٹ ءَ سوار بیتگ ءُ روگ ءَ بیتگ اَنت کہ آیانی سر ءَ ھراسان ءِ زرباری ھند ءِ لشکر ءَ تیرگواری کتگ ءُ کشتگ اَنت-

متحدہ عرب امارات ءِ گولڈ مارکیٹساں گوستگیں سَے ھپتگانی وھد ءَ یک گرامے سھر ءِ نھاد یازدہ نیم درھم ءِ کمی اتکگ بیتگ-

الامارات الیوم ءِ رد ءَ سھر ءِ نھاد یکشل ءَ سَے ھپتگانی توک ءَ جھلی ءِ دیمپان اِنت گوستگیں ھپتگ ءِ گڈسر ءَ جتا جتائیں سھرانی نھادانی توک ءَ نیم یا دو درھم کمتری اتکگ –

گوستگیں سَے ھپتگانی توک ءَ کمتری نھادانی توک ءَ یازدہ ءُ نیم درھم اتکگ بیتگ اَنت-

شورومز ءِ زمہ وارانی گوشگ اِنت یکشل ءَ سَے ھپتگانی تہ ءَ سھر ءِ تہ ءَ کمتری ءِ آیگ ءَ پد پر کنوکیں سھر ءُ سکھانی زیروکانی تہ ءَ گیشی اتکگ –

آیانی گوشگ اِنت لھتے مردم وتی زرانی بچینگ ءَ سکہ زیرگ ءَ اَنت ءُ لھتے مردم سھر ءِ نھاد ءِ توک ءَ کمی آیگ ءِ سبب ءَ نپ چست کنگ ءُ پر کنوکیں سھر زیرگ ءَ اَنت-

اوگانستان ءِ تالبان ءَ ایران ءِ سر ءَ را کڈنی کتگ کہ ھردوکیں نیمگاں سپارتکاری ءِ دروشم ءَ جیڑاہ ءَ گیش ءُ گیوار بہ کنت-

اوگانستان ءِ وزارت ھارجہ ءِ نائب جارکش ھاپز زیا اھمد ءَ عرب نیوز ءَ گوں گوشتگ کہ ما ھمساھگیں ڈیھ ءِ گون ءَ وتی سیادی ءَ ھراب کنگ نہ لوٹ ایں-

مئے ایران ءَ ھوار درستیں ھمساھگیں ڈیھاں گوں ھمے دزبندی اِنت کہ آ ھمک جیڑہ ءَ سپارتکاری ءِ گون ءَ گیش ءُ گیوار بہ کن اَنت-

زانگ بہ بیت گوستگیں شمبے ءِ روچ ءَ اوگانستان ءُ ایران ءِ سیمسری لشکرانی جنگ ءَ یک تالبان آپیسر ءُ دو ایرانی سیمسری پھزدار کشگ بیتگ اَنت-

ھردوکیں نیمگانی پھزداراں تیرگواری ءِ بنداتی بھتام یکے دومی ءَ جتگ بیتگ- اوگانستان ءِ ھلمند دریا ءِ آپانی سبب ءَ جیڑہ ءِ بندات ءَ پد سیمسرانی وئیل پیش اتکگ ات –

ھلمند دریا چہ اوگانستان ءَ ایران ءِ رودراتکی ھلکاں کپ ایت کہ اے ھند ءَ کشت ءُ کشاری ءِ بنجل اِنت – مولمی سٹ ءُ بدلیانی توک ءَ ھردوکیں ڈیھاں ڈکالی ءِ دیمپانی اِنت-

اوگان وزارت ھارجہ ءِ جارکش ھاپز زیا اھمد ءَ گوشتگ جنگ ءُ چوپاں پد دمگ ءَ سارت ءُ ایمنی اتکگ، اسلامی امارت جنگ ءَ دراج کش دیگ ءِ ھک ءَ نہ اِنت-

بلے جنگانی بارو ءَ ھردوکیں نیمگ ءَ سرجمی ءَ اھوال دیم ءَ نیتکگ اَنت-

ھمے ماہ ءِ بندات ءَ ایرانی سروک ابراھیم رئیسی ءَ تالبان ءَ را بیھار داتگ ءُ گوشتگ کہ آپ ءِ ھک ءُ ھواریں ھلمند ءِ کور ءِ آپ رویشت ایران ءِ ھک ءِ مسام سال نوزدہ سد ءُ ھپتاد ءُ سَے ءَ مسام بندی بیتگ-

تالبان ءِ سرکار ءِ آیگ ءَ پد ھردوکیں ڈیھانی تہ ءَ آپ ءِ جیڑہ ءَ ھوار ھوار دگہ جیڑھاں ھم سر کش اتگ-

ایشی ءَ پیش اوگان ءُ ایرانی سیمسری پھزدارانی میان ءَ جنگ ءُ چوپ بیتگ اَنت، ھمے داب ءَ ایران ءَ اوگانی میار بندانی جیڑہ ءِ سر ءَ تالبان ءَ ھم اے جیڑاہ ءِ سر ءَ گپ جتگ بیتگ-

ایرانی سرکارء نیوز ایجنسی ارنا ءِ رد ءَ ایرانی وزیر داکلہ اھمد واھدی ءَ گوشتگ انی سیمسر ءَ ھچ جیڑہ نیست اِنت انی جاور شر اَنت-

ایران ءِ سیمسر ءَ ھواریں اوگان ءِ ھواریں استان نمروز ءِ پولیس ءِ جارکش گل مھمد ءَ گوشتگ جاور شر اَنت-

پولیس ءِ جارکش ءں رد ءَ ایران ءِ سیمسراں انی ھچ جنگ ءُ چوپ نیست اِنت امن ایمنی اِنت –

لبنان ءِ بنجاھی شھر بیروت ءُ سعودی عریبین ایئرلائنز ( السعودیہ) ءِ یک کارندھے بالی پٹ دگ ءَ آوار جنگ ءَ پد بیگواہ کنگ بیتگ، زر ءِ لوٹ کنگ بوگ ءَ اِنت –

عرب نیوز ءِ رد ءَ لبنانی وزیر ھارھہ بسام مولوی ءَ گوشتگ کہ آ سعودی ءِ شھری ءِ آوار جنگ ءَ پد لبنانی سکیورٹی پورسز ءِ گون ءَ رھوت ءَ ایں ءُ اے جیڑاہ ءَ چارگ ءَ ایں-

آئی ءَ گوشتگ کہ من اے جیڑاہ ءِ سر ءَ بیروت ءَ سعودی ءِ سپیر ولید بخاری ءِ گون ءَ یکشل ءَ رھوت ءَ ایں ھم –

لبنانی رسانکدر ءِ بنداتی اھوالانی رد ءَ شمبے ءُ یکشمبے ءِ میانی شپ ءَ بیروت ءُ بالی پٹ دگ ءَ روکیں یک دگے ءَ سعودی ءِ شھری آوار جنگ بیتگ –

الاخباریہ ءِ رپورٹ ءِ رد ءَ آوار جنوکاں بیروت ءِ زرباری ھند ءَ یک ٹیلی فونکے ءَ کلوھے دیم داتگ –

آوار جنگ بیتگیں سعودی شھری بیروت ءَ سرکاری ایئرلائن السعودیہ ءِ ملازمے – لشکری پوشاکاں آوار جنوکاں دو گاڑی پیسر ءَ دمگ ءَ جاڑیگ بیتگ اَنت-

بسام مولوی ءَ ٹویٹ ءَ گوشتگ کہ لبنانی سرزمین ءِ سر ءَ مشکلانی دیمپان کنوک ھروھد ءَ درملی آجو کنگ ءَ چمانی توک ءَ بنت ءُ کار کنگ ءَ اَنت-

آئی ءَ گوشتگ کہ ھرچی بیتگ چریشی ءَ چہ لبنان ءَ وتی عرب براتاں گون ءَ سیادی سانمند بیت کنت – جرمکار ترندیں سزا دیگ بنت-

العریبہ نیٹ ءِ رد ءَ بیگواہ بیتگیں سعودی شھری گڈی بر ءَ بیروت ءِ بنجاھی ھند البیال ءَ کمپلیسک ءِ نزیک ءَ گندگ بیتگ، آ یک دراجیں مدتے ءَ لبنان ءَ نندوک بیتگ-

بنداتی اھوالانی رد ءَ سعودی شھری وتی گاڑی ءِ ھمراھی ءَ سھب ءِ وھد ءَ آوار جنگ بیتگ کہ ا عرمون ءَ دیم پہ وتی لوگ ءَ روگ ءَ بیتگ – آوار جنوکاں آئی ءِ سر ءُ مانسرانی توک ءَ نگاہ ایر کتگ بیتگ اَنت-

چریشی ءَ پد لبنان ءَ جاڑیگیں سعودی ءِ سپارت ھانہ ءَ شنگ بیتگیں درشان ءَ گوشگ بیتگ آئی ءِ بیگواھی ءِ ھال آئی ءِ کھول ءُ سیاد ءُ وارسانی نیمگ ءَ اتکگ اَنت-

سپارت ھانہ ءِ گوشگ اِنت اے درگت ءَ سعودی شھری ءِ بیگواھی ءِ سر ءخ لبنان ءِ مزنیں سکیورٹی ادارھاں گوں رھوت بوگ ءَ اِنت ءُ ایشی ءِ گیش ءُ گیوار ءَ کنگ ءَ اِنت-