TBP Balochi

بلوچستان ءِ دوجتائیں دمگ بولان ءُ کیچ ءَ پاکستانی پوج ءِ چوکی ءُ آئی واستا راشن بروکیں گاڑی ءِ سر ءَ اُرش کتگ ءُ تاوان داتگ اَنت ءُ یکے دزگیر کتگ وھدے کہ دومی نیمگ ءَ اے اُرشانی زمہ واری بلوچ آجوئی لوٹوکیں گل بی ایل اے ءُ بی ایل ایف ءَ زرتگ اَنت-

بلوچ لبریشن آرمی ءِ جارکش جیئند بلوچ ءَ رسانکدر ءَ شِنگ کتگیں درشان ءِ تہ ءَ گْوشتگ کہ بی ایل اے سرمچاراں گوستگیں روچ ءَ بولان ءِ دمگ مارواڑ ءَ زورگریں پاکستانی پوج ءِ یک راشن دیوکیں گاڑی تباہ کتگ ءُ ڈرائیور دزگیر کتگ-

جیئند بلوچ ءَ گْوشتگ کہ بی ایل اے ءِ سرمچاراں دُژمن پوج ءِ ھاتر ءَ بروکیں گاڑی مانداشتگ ءُ راشن وتی دستیگ کتگ وھدے کہ گاڑی دمگی ڈرائیور حیدر خان ء سانول خان دزگیر کتگ-

جارکش رِد ءَ دزگیر کتگیں ڈرائیور حیدر خان ءَ جُست ءُ پرس ءِ تہ ءَ آ ءَ منّ اِتگ کہ آ مزنیں مدتے ءَ دُژمن پوج ءَ راشن پُجّارینگ آں – ڈرائیور سر ءَ بگیر ءَ بلوچ راجی آمید چست ءُ ایر کنگ بیت-

جارکش ءَ دیمتر ءَ گْوشتگ کہ بلوچ لبریشن آرمی بولان ، ھرنائی ءُ سبی ءَ ھوار دگہ دمگاں دمگی مردم زورگریں پوج ءَ کجام وڑیں کمکاری ءَ یکر بوگ ءِ کڈن کتگ اَنت ما دمگی مردماں یکرندے پد ءَ مکن کن ایں کہ اے وڑیں کجام وڑیں کاراں بھر مہ بہ ئے اگاں ناں گُڑا وتی جانی ءُ مالی تاوان زمہ وار وت بنت –

دومی نیمگ ءَ بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ تربت ءَ پاکستانی پوج ءِ سر ءَ دستی بمب اُرش ءِ زمہ واری منّ اِتگ-

جارکش ءَ گْوشتگ کہ گوستگیں شپ ءِ ھشت ءَ سرمچاراں کیچ ءِ شھر تربت ءَ ایئرپورٹ دگ ءَ برجاھیں پاکستانی پوج ءِ چوکی ءِ سر ءَ ھینڈ گرنیڈ ءَ چہ اُرش کتگ- ھینڈ گرنیڈ چوکی ءِ تہ ءَ کپتگ ءُ ساڑی ئیں کارندہ ءَ تاوان رس اِتگ- آئی ءَ گْوشتگ کہ بی ایل ایف اے اُرش زمہ واری ءَ منّ اِیت ءُ بلوچستان سر ءَ زورگری ءِ ھلاسی ءَ تاں پوج سر ءَ اُرش برجاہ بنت-

پاکستانی پوج ءَ چہ شال ءَ کمبرانی دگ ءَ مھمد مزمل پنام ءِ واجہ مزمل ء ھاجی مھمد ھنیپ دزگیر کتگ ءُ گوں وت برتگ-

واجہ مزمل براھوئی زبان ءِ شائرے ءُ آ مروچی نیم روچ ءَ پوج ءَ کمبرانی شال ءَ جند ءِ لوگ ءَ آوار جنگ ءَ پد بیگواہ کرتگ-

زانگ بہ بیت بلوچستان ءَ زورانسری آوار جنیانی درچ یکشل ءَ برجاہ اَنت سیاسی مردمانی گوشگ اِنت کہ بیگواہ بیتگیں مردمانی تہ ءَ گیشتریں کچ نودربرانیگ اِنت-

دومی نیمگ ءَ بلوچستان ءَ بیگواھیں مردمانی واستا کار کنوکیں گل وائس فار بلوچ مسنگ پرسنز ءَ براھوئی زبان ءِ شائر مزمل ءِ آوار جنگ ءِ ھال راست کتگ –

آئی ءَ گوشتگ کہ مزمل مروچی نیم روچ ءَ شال ءَ اوار جنگ ءُ بیگواہ کنگ بیتگ سیکورٹی ءُ کانوندار آئی ءَ سلامتی ءَ یلو بہ کن اَنت-

سر بیتگیں اھوالانی رد ءَ روکپتی بلوچستان ءِ دمگ سراوان ءَ سلاہ بندیں مردمانی تیرگواری ءَ سیمسری یک پھزدارے بیران بیتگ-

گیشین ھالانی رد ءَ سراوان ءَ سلاہ بندین مردماں تیرگواری کنان ءَ روکپتی بلوچستان ءُ رودراتکی بلوچستان ءِ سیمسری دمگ یک پھزدارے کشتگ-

کشگ بیتگیں ایرانی پھزدار ءِ پجار مھمد طاھر زمانی ءِ نام ءَ زانگ بیتگ کہ آ شھید سجاد یونٹ ءِ سپاھی یے بیتگ ءُ سراوان ءَ کشگ بیتگ-

اھوالانی تہ ءَ گوشگ بیتگ سیمسری بنشون ءَ گوشتگ کہ سپاھی مھمد طاھر یک مشنے ءَ بیتگ کہ ناشناساں تیرگواری کتگ ءُ کُشتگ-

پھزدار ءِ کوش ءِ زمہ واری تنی وھدی کس ءَ نہ زرتگ ءُ روکپتی بلوچستان ءَ وھد وھد ءِ سر ءَ ایرانی کارمندانی سر ءَ اُرش بیتگ اَنت-

بارکھان وئیل ءَ خان محمد مری ءِ 17 سالی جِنِک، 19 سالی ءُ 13 سالی بچاں گوں زوراکی ءِ ھال راست کنگ بیتگ وھدیکہ زوراکی ءِ آماچ بیتگیناں پولیس ءِ گورءَ وتی درشان ریکارڈ کنائنتگ۔

پولیس سرجن ڈاکٹر عائشہ ءِ ردءَ خان محمد مری ءِ 17 سالی جِنِک، 19 سالی بچک ءُ 13 سالی بچک سلکاری ءِ آماچ کنگ بیتگ اَنت۔

ڈاکٹر عائشہ فیض ءَ گُشتگ کہ خان محمد مری ءِ لوگیگ، جِنِک ءُ دوھیں بچکانی ڈی این اے ٹیسٹ ءِ نمونگ زیرگ بیتگ اَنت کہ آ لاھور ءَ دیم دیگ بنت۔

ڈاکٹر عائشہ ءِ گُشگ اِنت کہ پنجاہ سالیگیں گراں ناز ءَ گوں سلکاری کنگ نہ بیتگ، آئی سرءَ تھنا لٹ شاپی کنگ بیتگ، زالبولے چکانی ردءَ آ لٹ شاپی ءِ آماچ کنگ بیتگ اَنت بلے بنداتی چار ءُ ٹپاس ءِ نیام ءَ ھچ پئیمیں منانک نہ رستگ۔

ڈاکٹرعائشہ فیض ءِ ردءَ خان محمد مری ءِ جنگ ءِ چپی پاد ءِ سرءَ گوں سگریٹ ءَ داگ دیگ ءِ نشان ھم ھست اَنت۔

خان محمد مری ءِ لوگیگ گراں ناز ءَ تامری کلہو ءِ تہءَ گُشتگ کہ پولیس ءَ مارءَ چہ دکی ءَ یل کنائنتگ، 8 سالاں چہ عبدالرحمن کھیتران ءِ جِند ءِ زندان ءَ بندیگ بیتگ اِنت، بندیگی ءِ نیام ءَ مئے سرءَ لٹ شاپی کنگ بیتگ ءُ مارءَ کوٹی ءِ تہءَ بند کنگ بیتگ۔

گراں ناز ءَ گُشتگ کہ منی 6 بچ چہ دیر کنگ بیتگ اَنت وھدیکہ بچ جتا جتا بندیگ کنگ بیتگ اَنت۔

اِشی ءَ ابید خان محمد مری ءِ بچ ءَ گُشتگ کہ پرگینگی وزیر سردار عبدالرحمن کیھتران ءَ شال ءِ لوگ ءَ بند کُتگ بیتگ، دو اگں سئے روچ پیسر مارءَ دکی ءَ یک مردمے ءِ دستءَ دیگ بیتگ،وھدے آ مردمءَ سما کپتگ کہ پولیس مارءَ شوھازگ ءَ اِنت گُڑءَ آئی ءَ مار یل کُتگ یُ شُتگ کہ چریشی ءَ پد پولیس ءَ مارءَ یل کنائنتگ۔

بلوچستان لبریشن فرنٹ ءِ جارکش میجر گوھرام بلوچ ءَ گوشتگ کہ بیست ءُ دو فروری دوھزار ءُ سیزدہ ءَ کمانڈر میجر مھمد کریم پنام ءِ ملا بھرام ءِ چیردستی ءَ بی ایل ایف ءِ سرمچارانی یک ٹولی ءَ روچ ءِ ساھت دو ءَ کیچ مند ءِ دمگ موکندر ءُ دو کوپ ءِ میانی دمگ ءَ زورگریں پاکستانی پوج ءِ چار گاڑیانی یک کاروانے ءِ سر ءَ راکٹ ءُ وتکارین سلاھانی گون ءَ اُرش کرتگ ءُ آیاں سواریں ھپت کارندہ کشتگ اَنت ءُ بازینے زدگ کتگ اَنت ءُ اُرش ءَ زورگرین پوج ءِ گاڑیاں ھم بازیں تاوان رس اتگ اَنت ءُ اُرش ءَ پد سرمچار واتر مزن بند ءِ کوہ ءَ شتگ اَنت –

آئی ءَ گوشتگ ’ ایشی ءِ پژدر ءَ پاکستانی پوج ءَ ھمے روچ ءَ یک مزنیں زمینی ءُ برزی بیڑے برجاہ داشتگ ءُ دومی روچ ءَ سرمچارانی بنجلانی سر ءَ ڈرون میزائل آس دیگ بیتگ چریشی ءِ آسر ءَ کمانڈر میجر مھمد کریم پنام ء ملا بھرام ء ھاجی شَے مھمد جھمنند مند گوبرد، ھزا پنام ء میرل ء مھمد سالہ جھمنند گوک مند، لیفٹننٹ طالب پنام ء کمانچر ء یاسین جھمنند مند مھیر، جلال پنام ءِ برمش ء حسن جھمنند تلمب مند، شھزاد پنام ءِ چراگ ء مولا بخش جھمنند گومازی تمپ، آصف پنام ءِ جنید ء ھیبران جھمنند درچکوہ دشت ھما ءَ شھید بیتگ اَنت ءُ لیفٹننٹ منظور پنام ءِ کیا ء شفیع مھمد جھمنند بلوچ آباد مند، مولا بخش پنام ءِ غفار ء کریم بخش جھمنند درچکو ءَ زدگ بوگ ءَ ابید بازیں اداراں داں دشمن ءِ گون ءَ جنگ کنان ءَ بلے بازیں ھونانی رچگ پد ھردوک شھید بیتگ اَنت بلے اے دویانی دیمپانی ءَ چہ آ دگہ دو ھمراہ مھپوز بیتگ اَنت ءُ ترندیں جنگ ءُ چوپ ءَ پد انگیر اش پروشتگ ءُ سلامتی ءَ درایگ ءَ سوبمند بیتگ اَنت –

جارکش ءَ گوشتگ کہ شھید کمانڈر میجر ملا بھرام یک بھادر ءُ نرم دلیں سرمچارے بیتگ کہ سال دوھزار ءُ ھشت ءُ سرمچاری ءَ بی ایل ایف ءَ ھوار بیتگ آ ریجنل کمان کونسل ءِ باسک بیتگ ءُ بازیں سالاں سرمچاری ءِ دروشم ءَ مکران ءَ سرمچارانی ھیلکاری ءَ وتی پرز ءَ پیلو کنگ ءَ بیتگ ھمے سوبمندیانی ھواری ءَ آ سال دو ھزار ءُ نوزدہ ءَ گل ءِ بنجل ءِ کمانڈر بیتگ آئی ءِ چیردستی ءَ سرمچاراں بازیں براں دشمن ءِ سر ءَ چو کھر ءَ اُرش کتگ – زانگ بہ بیت میجر مھمد کریم پنام ملا بھرام بلوچستان ءِ جتا جتائیں جاھاں آئی ءَ وتی پرز پیلو کتگ اَنت-

شھید ھزا پنام ءِ میرل سال دو ھزار ءُ ھبدہ ءُ سرمچاری ءِ دروشم ءَ بی ایل ایف ءَ ھوار بیتگ آ شھری نیٹورکس ءِ پرز ءَ پیلو کنگ بیتگ آئی ءُ ھشت اگست دو ھزار ءُ بیست ءُ دو بنجل ءَ اتکگ آ یک بھادر ءُ جوانکاریں سرمچارے بیتگ-

شھید لیفٹننٹ منظور بلوچ سال دوھزار ءُ سیزدہ ءَ بی ایل ایف ءَ پتر ءَ ھوار بیتگ ءُ آئی ءِ بھادری ءُ ھنرمندی ءِ سر ءَ آ لیفٹننٹ کنگ بیتگ-

شھید جلال جان پنام ء برمش شش مئی دوھزار ءُ بیست ءُ یک ءَ بی ایل ایف ءَ ھوار بیتگ آ یک بھادر ءُ پرجوشین سرمچارے بیتگ-

شھیس شھزاد پنام ءِ چراگ نُھ اکتوبر دوھزار ءُ بیست ءُ دو بی ایل ایف ءَ ھوار بیتگ آ سرمچاری دروشم ءَ سال دوھزار ءُ سیزدہطءَ زرمبشت ءَ ھوار بیتگ آ یک تجربگ کار ءُ زانتکاریں سرمچارے بیتگ-

شھید آ صف پنام ء جنید یکم دسمبر دوھزار ءُ بیست ءُ دو ءَ بی ایل ایف ءَ ھوار بیتگ آ سرمچاری ءَ دوھزار ءُ چاردہ ءَ زرمبشت ءَ بندوک بیتگ آ پرکار بیتگ ءُ آ یک تجربگکار ءُ بھادریں سرمچارے بیتگ-

شھید مولابکش پنام ءِ غفار دوھزار ءُ بیست ءُ یک ءَ بی ایل ایف ءَ ھوار بیتگ ءُ آ سرمچاری ءَ دوھزار ءَ ھبدہ ءَ آجوئی ءِ زرمبشت ءَ بندوک بیتگ آیک نہ ترس ءُ نرمکارین سرمچارے بیتگٹ

جارکش ءَ گوشتگ کہ بی ایل ایف بلوچ آجوئی ءِ واستا ندر بیتگیں کمانڈر میجر مھمد کریم ء پنام ءِ ملا بھرام ءُ آئی ءِ شھیدان ھمراھانی، جد ءُ جھد ءُ کمٹمنٹ ءُ دیمھونیاں جوانیں نگاھے ءَ چار ایت آیاں داد درشان کنت ءُ وتی کول ءَ کنت بلوچستان ءِ آجوئی ءَ داں شھیدانی مشن برجاہ بیت اِنت-

چہ شال ءَ پوج ءِ دست ءَ بیگواہ بیتگیں بلوچ زالبول ماھل بلوچ ءِ کھول ءَ شھر ءِ ریڈزون ءَ نندانکجاہ ءَ پریس کانفرنس کنان ءَ گوشتگ ماھل بلوچ نُھ روچ ءَ پیش ھبدہ فروری ءِ شپ ءِ ساھت یازدہ ءَ آئی ءِ لوگ ءَ آئی ءِ دو زھگ، پیرزالیں تُرو ءُ یک دگہ زھگے بانڑی ءِ ھمراھی ءَ شال ءِ سی ٹی ڈی پولیس ءَ گیر کانونی دزگیر کتگ ءُ برتگ پد ءَ آ دگہ یل کتگ اَنت دومی روچ ءَ سی ٹی ڈی ءَ یک درشانے شنگ کتگ ءُ ماھل بلوچ ءَ را دروگیں بھتام جتگ اَنت ءُ آئی ءِ سر ءَ دروگیں ارزی نامہ جتگ کہ اے تچک ءَ تچک دروگ ءُ بے بن اِنت-

کھول ءَ گوشتگ کہ ماھل بلوچ یک بزگ ءُ بے کسوریں جنوزامے کہ وتی زھگانی وانینگ ءُ باندات ءِ ھاتر ءَ چہ کیچ ءَ دیم پہ شال ءَ اتکگ بیتگ – آ دزگیری ءِ وھد ءَ لٹ ءُ کُٹ کنگ بیتگ ایشی ءِ چم دیتگیں مردم کھول وت اِنت ھما شپ ءَ کہ برگ بیتگ ما دومی کوٹی ءَ داں آئی ءِ پریاتانی توار ایشکتگ اَنت –

آیاں گوشتگ ماھل بلوچ اولی رند ءَ وھدیکہ آمیدگس ءَ پیش کنگ بیتگ گڑا آئی ءِ وکیل ھم ھال دیگ نہ بیتگ آ کانون ءِ رد ءَ موہ دیگ ھم نہ بیتگ آئی ءِ سر ءَ ناجائزیں ارزی جنگ بیتگ ءُ آئی ءَ را جسمانی ریمانڈ گرگ ءَ اَنت چریشی ءِ سبب ءَ آ یکدم زھنی زور دیگ ءُ باز نیزور بیتگ-

کھول ءَ گوشتگ کہ گوستگیں روچ ءَ وھدیکہ ماھل بلوچ آمیدگس ءَ پیش کنگ بیتگ گڑا آ آمیدگس ءِ دیم ءَ بے ھوش بیتگ ءُ کپتگ آئی ءِ جاور شر نہ اَنت آ ترندیں زھنی زور ءُ ریمانڈ ءِ سبب ءَ باز نیزور بیتگ-

آئی ءَ گوشتگ کہ ما گوستگیں سَے روچاں اد ءَ ریڈ زون ءُ گورنر ھاؤس ءِ دیم ءَ نیشتگ اِنت ءُ مئے تچک ءَ یکیں لوٹ اِنت ما بستار ءِ اے ڈیھ ءِ پرامنیں شھری اِنت اے ڈیھ ءِ آئین ءُ کانون ءِ منوک اِنت ھمے اُمیت ءَ ما مروچی وتی زھرشانی ءَ ریڈ زون ءَ ھلاس کنگ ءِ جار ءَ جن ایں ءُ آمیدگسی نزام ءِ سر ءَ اوست داریں آ ماھل بلوچ ءَ الم انساپ دنت ما ترندی ءَ گوں لوٹ کن این آئی ءِ سر ءَ جتگین ناجائزیں ارزی ءُ گرزی ھلاس کنگ ءُ آ تچک ءَ ازت ءِ گون ءَ یل کنگ بہ بیت اِنت-

ھمے وڑ ءَ کھول ءَ نندانک جاہ ءَ یک روانکے کش اتگ ءُ ماھل بلوچ ءِ سر ءَ جتگین ارزی ءُ دزگیری ءِ ھلاپ ءَ اوگام جتگ ءُ بلوچ زالبولانی پھریزگ ءِ لوٹ کتگ-

روانک ءِ مردماں گشتگ کہ سرکار ءُ آئی ءِ دارہ دست ءُ گوشین زالبوکاں جنگ ءُ چوپگ اِنت اے ایرجنگی اِنت کھولانی آمیدگس ءِ روگ ءَ ریاست ءِ واستا چکاسے ءُ آ کجام مردم ءَ انساپ سر کت کنت-

زھرشانی کنوکاں گوشتگ کہ سی ٹی ڈی ءِ درستیں کاروائی شکی اَنت ءُ آئی ءِ کرتگیں بھتاماں رد کن ایں-

بلوچستان ءِ دمگ بارکھان ءِ ھنکین رکھنی بازار ءَ تراکے بیتگ کہ اِشی آسر ءَ 4 مردم بیران بیتگ اَنت ءُ دگہ 12 مردم ٹپی بیتگ اَنت۔

ایس ایس پی بارکھان نجیب پندرانی ءَ بیرانیانی ھال راست کنان ءَ گُشتگ کہ ٹپی بیتگیں مردم نزیکیں نادراھجاہ ءَ برگ بیتگ اَنت۔

ڈی سی بارکھان عبداللہ کھوسہ ءِ ردءَ تراکناکیں مواد پرپٹ ءِ سرءَ جنگ بیتگ کہ اِشی سرءَ 2 مردم سوار بیتگ اَنت۔

ٹپی بیتگیں مردم رکھنی نادراھجاہ ءَ برگ بئیگ ءَ اَنت وھدیکہ پولیس وئیل جاہ ءَ سربیتگ ءُ ھند انگر کُتگ اِش۔

بلوچستان ءِ دمگ کیچ ءَ چہ پاکستانی لشکریاں یک مردمے دزگیر کنگ ءَ پد ناشناسیں جاھاں بُرتگ۔

بیگواہ کنگ بیتگیں ورناھے پجار ارشد ء نصیر ءِ ناماں چہ بیتگ۔

اھوالانی ردءَ گوستگیں شپ ءَ لشکریاں گوما سی ءَ بیڑ بُرتگ ءُ جنین ءُ زھگانی سرءَ لٹ شاپی کُتگ ءُ ھمے ورناہ آوار جتگ ءُ دیم پہ ناشناسیں ھنداں بُرتگ۔

سر بیتگیں ھالانی رد ءَ گوستگیں روچ ءَ بلوچستان ءِ جتا جتائیں جاھاں پوج ءُ پولیس ءِ سر ءَ اُرش بیتگ اَنت-

اُرشانی زمہ واری بلوچستان ءِ آجوئی ءِ واستا جنگ کنوکیں دو جتائیں سلاہ بندیں گلاں پہ وت ءَ زرتگ اَنت-

بلوچ لبریشن آرمی ءِ جارکش جیئند بلوچ ءَ وتی شنگ کتگیں یک درشانے ءِ تہءَ گوشتگ کہ بی ایل اے اسپیشل ٹیکٹکل آپریشنز اسکواڈ ( ایس ٹی او ایس) ءَ یک بیڑے ءُ پولیس سپرٹنڈنٹ ءِ کاروان ءَ ھواریں یک گاڑی یے بمب ءِ گون ءَ نشانگ کتگ ءُ چریشی ءِ آسر ءَ دو پولیس کارمند مرتگ ءُ یکے زدگ بیتگ-

جارکش ءَ گوشتگ کہ ایس ٹی او ایس ءَ اے اُرش ھزدار ءِ دمگ جھالاوان کمپلیکس ءِ نزیک ءَ کتگ، لچوکیں بمب اُرش ءَ سپرٹنڈنٹ آف پولیس ریٹائرڈ پاکستانی نیوی کارمد فھد خان ءِ کاروان ءَ ھواریں دو کارندہ عبدالسلام ءُ مھمد دین مرتگ اَنت ءُ یک کارندھے زدگ بیتگ ءُ گاڑی سرجم ءَ تباہ بیتگ-

آئی ءَ گوشتگ کہ اے کاروائی ھزدار ءِ شھر ءُ کش گوری دمگاں پاکستانی پوج ءُ چیریں ادارھانی گوشگ ءِ پد ءَ پولیس ءُ لیویز بلوچ مھلوک ءِ ھلاپ ءَ پرکاری ءِ پژدر ءَ کتگ پولیس پٹ ءُ پول ءِ نام ءِ سر ءَ بلوچ مھلوک ءِ کمشرپ کنگ ءُ آیانی سر ءَ لَٹ ءُ کُٹ کنگ ءَ دزمانجن بیتگ ءُ ھمے وڑ بلوچ ورنایانی زورانسری آوار جنگ ءَ بازین کارندہ دشمن ءِ کمکاری ءِ دروشم ءَ کار ءَ بیتگ اَنت-

جیئند بلوچ ءَ گوشتگ کہ بلوچ لبریشن آرمی ءَ اے گپ تچک کتگ کہ بلوچ راجی آجوئی ءِ جنگ ءَ اگاں پولیس ءُ لیویز ءِ وڑیں کارندہ دمگی لشکر ءَ جتا بنت گڑا آیاناں ھچ تاوان ھم دیگ نہ بیت اِنت بلے اگاں زورگر ءِ کمکاری ءِ کار ءَ سرجم کنان ءَ بلوچ زرمبشت ءِ آجوئی ءُ بلوچ سرمچارانی دیم ءَ ڈنگر بیگ ءِ جھد ءَ کن اَنت گڑا آ ترندیں رنگاں نشانگ کنگ بنت – ایس پی پولیس ءِ کاروان ءَ اے کتگیں اُرش ءَ یک بیھارے سرپد بہ بیت – پولیس ءُ لیویز وت ءَ تچک بہ کن اَنت اگاں نہ کت ئے گڑا بلوچ سرمچار یک سرپدی ءِ شنگ کن اَنت آ پولیس ءُ لیویز ءَ ھما داب ءَ جن اَنت ھما وڑ کہ پاکستانی پوج ءُ ایف سی نشانگ کنگ بوگ ءَ اِنت-

دومی نیمگ ءَ بلوچستان لبریشن فرنٹ ءِ جارکش  میجر گھرام بلوچ ءَ وتی شنگ کُتگیں درشانے تہءَ گُشتگ کہ بی ایل ایف ءِ سرمچاراں کیچ ءِ ھنکین کولواہ ءَ یک پوجی چوکی ءِ سرءَ اُرش ءَ ھوار پہ دژمنیں پوج ءَ راشن بروکیں گاڑیاں چہ راشن قوضہ کُتگ اَنت۔

آئی ءَ گُشتگ کہ سرمچاراں 25 فروری ءَ  کولواہ ءِ ھند بل الندور ءَ بیگاہ ءِ ادار شش نیم ءَ دژمنیں پوج ءِ چوکی گوں راکٹاں ءُ وتکاریں سلاھاں اُرش کُتگ کہ چریشی ءَ لشکریاں مالی ءُ جانی تاوان ءِ دیمپانی کنگ کپتگ۔ 

 جارکش ءَ دیمترءَ گُشتگ کہ کولواہ ءِ ھند مراھستان ءَ 23فروری ءِ روچءَ سرمچاراں پوج ءَ راشن رسینوکیں ھندی گاڑیاں چہ لشکریانی راشن پچ گپتگ اَنت ءُ ڈرائیوراں بلوچ بئیگ ءِ سوب ءَ تھنا سرپد کُتگ ءُ یل کُتگ۔ 

بی ایل ایف ءِ جارکش میجر گھرام بلوچ گُڈ سرءَ گُشتگ کہ دژمن پوج ھندی ٹرانسپورٹرزاں وتی ھمک روچی آسراتیانی ھواری ءَ دگہ شئے آنی برگ آرگ ءِ ھاترءَ کارمرز کنگ ءَ اِنت، گاڑیانی واھند دژمن ءِ کمکاری ءَ چہ پھریز بہ کن اَنت اگں نہ آیانی بگیرءَ ھم ترندیں گامگیج زیرگ بیت۔

سَرگوست: منی پُلیں ھمبلو

نِبشتہ کار: خلیف بلوچ

دی بلوچستان پوسٹ

شھید مُھیم جان یک بامَردیں وَرنائی اَت من ءَ یات اِنت کہ2017 ءَ من وَھدے کراچی ءَ چے دیم پَہ وتی دمگ ءَ اَتک اوں گُڑا من دمگ ءَ چیزے وَھد گوازینت گُڑا دمگ ءِ مردُمانی دپ ءَ ھمئے گَپّ ھست ءَ مُھیم نامیں جنگولیں سرمچارے ھستیں گُڑا منی ھمئے واھشت ھست ءَ کہ من اے وَرناہ ءَ گوں دُوچار بِہ کَپ آں من یک روچ دیم پَہ بازار ءَ رَپتاں من دیست سے چار سائیکل کھیرے ءِ چیرا اوشتاتگ سلاہ بَندیں مردُم ھم نشتگ من بلئے ساری ءَ مُھیم جان ءَ نَہ دیستگ اَت بس اَکس دیستگ اِت اوں توسیپ ھُشک کُرتگ اَت من شُتاں ھمئے وَرنایانی گور ءَ سلامے دات ءُ نشت اوں من ءَ اے وَرناھاں دیست گُڑا ایشاں منی گون ءَ دیوان کُرت من ءَ اے وَرنایاں بازیں چیزانی سَر ءَ سَرپدی دات گُشت ئے ما جُھدئے کَنگ ءَ اِیں پَہ وتی بَزّگیں راج ءَ مارا پاکستان ءَ وتی گُلام جُوڑ کُتگ گُڑا مارا شُمارا لوٹ اِیت کہ وتی سَر زمین ءِ وت واجہ بہ ایں سَر زمین ءِ وت واجی ءِ واستا مارا کُربانی دئیگی اِنت من ءَ آ وَھد ءَ گیش اِیں سَرپدی نیست ءَ من گُشت کہ شُما جُھدئے کَنگ ءَ اِت اگاں باندا روچ شُمئے ھمبل شھید باں یاکہ ھمراہ داری ءَ یل بِہ کَناں جُھد ءِ توک ءَ نِزوری نئیت منی چَمّانی توک ءَ چار اِیت ءُ پَسّو ئِے دات کُوم پَہ شھادت ھلاس نَہ بَنت کُوم ھما وَھد ءَ ھلاس بَنت دَمبر اَنت ءُ وت ءَ جُھد ءَ چَہ گستا کَناں من اے وَرناہ ءِ گَپّاناں دیست من ھمئے سَرپد بوت اوں اے وَرناہ ءِ توک ءَ باز سَرپدی ھست من گُشت شَرّ ھمبلاں سلامت بات ئے من ھمبل رُکست کُت دَر کَپت آں پَد ءَ من اے ھمبل نَہ دیستاں دانکہ من شُت آں کراچی ءَ دیم پَہ وتی وانگ ءَ کراچی ءَ اود ءَ منی کِرّ ءَ اے وڑیں جُھد ءَ گوں ھَمگرنچ اِیں ھچ وڑیں ھمبل نیست ات کہ من وانگ ءَ اِتاں بلئے منی ھیال ءَ جُھد ھست ات من پَہ وتی راج ءَ ھم ھمئے وَرنایانی وَڑ ءَ جُھد ءَ ھَوار بِہ باں بازیں وَھدے من ھلاکہ ءَ ھچ نَہ شُت آں پَد ءَ اَنچو اسکول ءَ من ءَ موکل رس اِت من شُت آں ھلاکہ ءَ ھَند ءُ دَگانی چاگرد ساری یے وَڑ ءَ نَہ اَت اَنت ریاست ءِ زُوراکیاں وتی گام گیشتر مُھکم تِرّ کُتگ اِت اَنت من چار ات اگاں من ھلاکہ ءَ بِہ نِنداں ریاست ھم من ءَ وتی گاماں گوں بارت من ءَ منی چاگرد ءِ ھچ پئیم ءَ دوست نَہ بوت من کَمیں وَھد ءَ جَھل اِیت ءُ پَدا دیم پَہ وتئی وانگ ءَ شُت آں من وَھدے وتی وانگجاہ ءَ سَر بوتاں بازیں وَھدے شُت من باز کوشش کُرت سنگتاں گوں ھال ءُ اھوالے گُڑا اَناگہ ءَ من ءَ کوہ ءِ ھمبل ءِ دست کَپت ھمئے ھمبل ءَ گوں وتی ھال برجاہ داشت گُڑا من یک روچے ھمئے ھمبل ءَ ھال کُت ءُ گُشت من کائیں شُمئے گون ءَ جُھد ءَ ھَوار بہ ایں سنگت ءَ من ءَ گُشت پھلال وتی وانگ ءَ برجم بدار پارٹی ءَ را کُجام وَھد ءَ تئی کار بیت پارٹی ترا وت گُش ایت من بس سنگت ءَ را گُشت من کوہ ءَ کایاں شُمئے گون ءَ ھَوار باں گُڑا 2018 ءَ من اَتکاں گوں سنگتاں ھَوار بوت آں بلئے من مُھیم جان ءَ نَہ دیست من یک روچے لین ءَ شُت آں مُھیم جان گوں ھمبلے ءَ گَپّ ءَ اَت تئی گون ءَ دگہ سنگت کہ گون اِنت آئی ءَ جواب دات کہ من ءَ اسلم گون اِنت گُڑا موبائل من زُرت ءُ گوش ءَ کُت یک بچکندگے جَت ئے ءُ گُشت ئِے ھاں تو ھم اَتکگ ئے ءُ جُھد ءَ ھَوار ءِ من گُشت اوں من جُھد ءَ ھَوار کَپت اوں تو زان ئے زمین وتئی بچ ءَ جاہ کار ایت زمین ءِ مھر ءُ سنگتانی شھادت مئے وڑیں وَرنایاں آرامی ءَ نئیلت اَنت گُڑا من ءَ گُشت ئِے وت ءَ مُھکم بدار تئی سَر شوکیں جاھے ءَ کَپتگ سنگت ترا ھال دے اَنت پَد ءَ من کایاں ترا وتی دیم ءَ بَراں من گُشت بس تئی ودار اِنت من ءَ من پون ھلاس کُت ءُ سنگتانی دیم ءَ شُت اوں منی کماندار ءَ من ءَ دیست گُشت ئِے تو مَروچی سَک گَل ءِ باریں ھالاں بِہ دئے من گُشت مُھیم جان ءَ منی گون ءَ ھال ءُ اھوال کُتگ من ءَ منی کماندار ءَ گُشت مُھیم جان شوکیں سنگتے گوں وتی جُھد ءَ مکلس اِنت گوں وتی سنگتاں سَک مھروان اِنت-

لَھتے روچ ءَ رَند سنگتے چَہ لین ءَ اَتک ءُ گُشت ئِے مَروچی جنگے بوتگ ءُ چار یا پَنچ سنگت ءِ شھادت ءِ ھال اِنت پَد ءَ سنگت ءَ گُشت یکے اورَنگ زیب اِنت یکے راشد اِنت یکے شوکت اِنت ءُ مُھیم جان ءِ ھال ءُ اھوال نیست اِنت پَد ءَ دومی روچ ءَ سنگت لین ءَ کایاں ھال ءُ اھوال کَن آں کہ مُھیم جان ءَ گوں ھال بوتگ مُھیم جان دُژمن ءِ گیرائے توک ءَ اِنت ءُ جنگ اَنگت برجاہ اِنت بیگاہ ءِ وَھد ءَ پَد ءَ سنگتے ءَ ھال کُت کہ مُھیم جان شھید بوتگ اے ھال ءَ شھید بالاچ جان کئیت مارا اوتاک ءَ دَنت منی چَمّانی اَرس دَراَتک اَنت من کَمیں دگہ دیمے شُت اوں تئی یات اَتکاں من زُور ءِ پُرّا گریت من ءَ کَسّے ءَ ھم وشان نَہ کُرت من تَھنا اِت اوں تئی گَپّ ءُ کَندگ منی دیم ءَ زاھر اِت اَنت-

بس من ھمئے گَپّ ءَ گُش آں من ءَ آ کَد ءَ جُھد کَنگی بوتگ من ھچ نَہ کُتگ من اَنچیں ھُدابُردگے آں من اَتکاں تو شھید بوتے من ءَ تئی دیدار ھم نَسیب نَہ بوت منی ھمبلو تئی رَؤگ ءَ چَہ رَند ھلاکہ اَنچو ھاموش بوت ھَر کَسّ ءَ زانت اے جنگانی کِسّہ تو بوتگ ئے ھر وَھد ءَ کماش ءُ وَرنایاں گوں من ڈِکّ وارت گُشت اِش مُھیم جان جنگانی دَاستان بوتگ ھلاکہ ءَ ریاست ءَ وتی زُوراکی اَنچو کُتگ اَت کَسّ ءَ ھم پارٹی ءِ سَر ءَ گَپّے کُرت نَہ کُت مَروچی ھما ھَند ءُ دَمگاں ھمبل ھستیں بلئے تئی سَک کَمی اِنت اگاں مَروچی تو ھست بوتینے جَھل جھاؤ ءِ جنگانی نوکیں دَاستان ءُ کِسّہ ھست ءَ بلئے لگوریں ریاست ءَ زانت کہ مُھیم جان زندگ ءُ سلامت بِہ بیت مئے چَمّانی واباں بارت پرچاکہ مُھیم جان ایمن ءَ بے نَہ نشت آئی چار اِت اگاں من ھاموش بِہ بہ ایں بِہ نِندیں گُڑا دُژمن ھمئے گَپّ ءَ جَنت کہ مُھیم ءَ دَمبُرتگ مُھیم جان دُرؤن ءِ کوہ بِے ترا بِہ تائیر اَنت کَسّے گِنداں ھمئے گَپّ ءَ گُش اَنت کہ مُھیم جان کَدی کئیت یا مُھیم جان ءِ جنگانی نوکیں کِسّھے کَد پَرریچیت مُھیم جان وتی پارٹی ءِ کارانی سَر ءَ اَنچو زمہ دار اَت برے واجہ ءِ باگ برے کوھڈو برے ھَرّہ برے ماں مشکے برے کولواہ ءَ ءُ برے بیلہ ءَ ھالے ھست ات مُدام گردَگ ءِ توک ءَ اَت مُھیم جان وَھدے دُژمن ءَ گوں ڈِکِّ وارت دُژمن ءَ زانت کہ من گوں مردے ءَ دُوچار کَپتگ اوں وَھدے شھید مُھیم جان ءِ کُنّٹ ءَ گاڑی ءِ سَر ءَ میتگ ءَ کار ایت گُڑا کُنّٹ ءَ کُلیں مردُمانی دیم ءَ لَگت جَنت ءُ گُش ایت اے ما نَہ جَتگ ایشی وت ءَ را وت جَتگ اِد ءَ چے ھمئے زانگ بیت کہ مُھیم جان چوں بھادر بوتگ۔ اَروَاہ آسُودگ بات منی ھمبلو من پَہ ترا ھَچ کُرت نَہ کُت۔

رُکست اَف ھَوارُن سنگت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔