TBP Balochi

بلوچستان ءَ زورانسری بیگواھیانی بگیرءَ وائس فار بلوچ مسنگ پرسنز ءِ سروکی ءَ برجاھیں زھرشانی بنجل ءَ 4980 روچ سرجم بیتگ اَنت، عوامی نیشنل پارٹی ءِ بنجاھی پتر ءِ باسک شمس جلال زئی ءَ وتی سنگتانی ھمرائی ءَ بنجل ءَ اَتکگ ءُ بیگواھیں مردمانی کھولاں گوں یکجاھی درشان اِتگ۔

بنجل ءَ اتکگیں مردماں گوں گپ کنان ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گُشتگ کہ بلوچ مھلوکءَ گوں پاکستانی پوج ءُ آئی چیریں ادارگانی گیر انسانی کردگارءُ نسل کشی ءِ تہءَ، پوج ءُ چیریں ادارگانی پجیگ ءَ ایف سی ءُ سی ٹی ڈی سرزاھری ءَ گون اَنت ءُ ءُ وتگڑیں بنجاھی ءُ پرگینگی سرکار، شلنگیں سول سوسائٹی، رسانک در، مزن آمید گِس، نیکراھی تک ھم بلوچ نسل کشی ءِ تہءَ پوج، سی ٹی ڈی ءُ چیریں ادارگانی جرمکاریانی تہءَ سدءَ سدی ھوار اَنت۔

دومی نیمگ ءَ وائس فار بلوچ مسنگ پرسنز ءِ چیئرمین نصراللہ بلوچ ءَ وتی شنگت کُتگیں درشانے تہءَ گُشتگ کہ مئے ھاترءَ درستیں ادارگ شرپدار اَنت ما ادارگانی تہءَ گون ایں سنجیدگ ءُ وتی کاراں گوں ایمانداریں سنگتاں کدرءِ نگاہ ءَ گوں چاریں، ھما کہ ‎وائس فار بلوچ مسنگ پرسنز ءَ ملکی قانودانی ردءَ ءُ مردمی اگبالانی گل ءِ ردءَ کارکنگ ءُ گیر جانبداریں کردءِ برجاہ دارگ ءِ اخلاقی کمک کنان ءَ پیداک اَنت۔

آئی ءَ گُشتگ کہ ما ھما سنگتاں باور کنائنیں کہ انچش کہ وی بی ایم پی ءَ وتی بن ھشت ءَ بگر داں انگت بیگواھیں مردمانی جیڑہ ءِ سرءَ سیاست ءُ پندل سازی کنگ ءَ پھریز کُتگ ءُ گیر جانبدار بیتگ ءُ یک انسانی اگبالانی گل ءِ پئیم ءَ ھمک منانک ءَ گوں راستیں پئیم ءَ ڈیھی ءُ جھانی تکءَ زورانسری بیگواھیانی جیڑہ دیما آورتگ ءُ ھمے کاراں برجاہ داریت ءُ اے گل ءِ مردم گمواری ءُ بنیات ءَ گیر جانبدار بیگ ءُ راستیں بُنکی کارانی کنگ ءِ سوب ءَ ڈیھی ءُ میان اُستمانی تک ءَ آئی کار باوری زانت بنت ءُ ارزشت دیگ بیت اِنت اے باور ءَ گل کدی ھم نہ پروشیت ءُ نانکہ اے باور ءِ ھراب کنگ ءَ کس ءَ کِل اِیت۔

سر بیتگیں ھالانی رد ءَ روکپتی بلوچستان ءِ تیابدپی دمگ چھبار ءَ ایرانی سپاہ ءَ نیزگاریں مردمانی گسانی سر ءَ بیڑ برتگ ءُ اود ءَ آیانی لوگ مانداشتگ اَنت-

گیشیں ھالانی رد ءَ چھبار ءِ ھند میر آباد ءُ مراد آباد ءَ سپاہ پاسداران ءَ لس مردمانی لوگانی سر ءَ بیڑ برتگ ءُ اود ءَ ایانی لوگ ڈروھینگ ءِ ھواری ءَ مانداشتگ اَنت-

ھالانی تہ ءَ گوشگ بیتگ کہ گوستگیں شپ ءِ نسپ ءَ سپاہ ءَ آیانی لوگ انگیر کتگ ءُ اود ءَ آیانی گس پروشتگ ءُ مانداشتگ اَنت-

لس مردمانی رد ءَ سپاہ ءِ گوشگ اِنت کہ اے مردم زمین ءِ گیرکانونی نشتگ اَنت ءُ چریشی ءَ ادارہ ءِ ھکم ءِ پد ءَ اے ڈروھینگ ءُ دور دیگ بیتگ اَنت-

شنگ بیتگیں تامرانی تہ ءَ گندگ بیت اِنت کہ اود ءَ آس جمبور اِنت ءُ پد ءَ مھلوک وتی لوگانی رکینگ ءِ ھاتر ءَ دزبندی کنگ ءَ اَنت-

گوست ءَ ھم روکپتی بلوچستان ءِ جتا جتائیں جاھاں چوشیں وئیل پیش اتکگ بیتگ اَنت کہ اود ءَ ھمے رنگ ءَ مردمانی گِس ڈروھینگ بیتگ اَنت –

بلوچستان ءِ دمگ کیچ ءَ پاکستانی پوج ءَ آشوبی گُشندہ ءَ ھوار بازیں لوگے ءَ بیڑبرتگ ءُ دو مردم زورانسری آوار جتگ ءُ بیگواہ کتگ –

گیشیں ھالانی رِد ءَ گوستگیں شپ ءَ پاکستانی پوج ءَ کیچ ءِ دمگ تمپ کونشکلات ءَ آشوبی گُشندہ منھاج مختار ءُ دگہ مردمانی لوگاں بیڑبرتگ ءُ دو مردم ءِ آوار جنگ ءَ پد بیگواہ کتگ اَنت-

اِھوالکارانی رِد ءَ پوج ءَ مھناج مختار ءِ پت دزگیر کتگ لٹ ءُ کُٹ کتگ ءُ پد ءَ یل کتگ، وھدے کہ لوگاں ساڑی ئیں موباھل ھم وتی ھمراھی ءَ برتگ اَنت-

اشی ءَ اَبید پوج ءِ گوم ءَ میڑ جنگ بیتگیں عرفان لوگ ءَ ساڑی ئیں مردم لَٹ ءُ کُٹ کتگ-

زانگ بہ بیت مھناج مختار ءَ لوگانی سر ءَ اشی ءَ ساری ھم پوج ءِ نیمگ ءَ چہ بازیں رنداں بیڑبرگ بیتگ ءُ لوگ مانداشتگ اَنت ھم –

گوستگیں شپ ءَ پوج ءَ عطاء اللہ نامیں مردمے ءِ لوگاں بیڑبرتگ ءُ لُٹ پُل ءُ زالبول چُک لَٹ کُٹانی نشانگ کتگ عطاء اللہ ءِ ورنا ایں چُک اسرار زورانسری آوار جنی ءِ نشانگ کتگ وھدے کہ میرین داد نامیں مردمے ءِ لوگانی سر ءَ بیڑبرتگ ءُ آئی ءِ چُک جلال آوار جتگ ءُ گوں وت برتگ-

روکپتی بلوچستان ءَ بندیگیں یک مردمے یل بیتگ ءُ دگہ یکے مردم پہ جست ءُ پرس ءَ برتگ –

سر بیتگیں ھالانی رد ءَ روکپتی بلوچستان ءِ دمگ ایرانشھر(پھرہ) ءَ نیکراھی رھشون ایرانی چیریں ادارہ اطلاعات ءَ برتگ ءُ آئی ءِ سر ءَ ڈیھ ءِ سر ءَ بیوکیں زھرشانی برانز دیگ ءِ بھتام بیتگ اَنت –

آوار کنگ بیتگیں مردم ءِ پجار مولوی عبدالرھمان عمرزئی ءِ نام ءَ زانگ بیتگ کہ ایرانشھر ءِ نندوک اِنت-

مولوی عبدالرھمان ءَ گوشتگ کہ اگاں من واتر نہ بیت اَنت گڑا بزان ات کہ من بندیگ کنگ بیتگ اَنت ءُ چریشی ءَ تنی وھدی آ ایرانی چیریں ادارھانی گور ءَ بندیگ اِنت –

زانگ بہ بیت روکپتی بلوچستان ءَ گوست ءَ ھم اے وڑیں وئیلاں نیکراھی رھشون برگ بیتگ ءُ پد ءَ بندیگ کنگ بیتگ اَنت-

اھوالانی تہ ءَ گوشگ بیتگ کہ مولوی عبدالرھمان ءَ زاھدان مکی مسیت ءِ پیش امام ءُ روکپتی بلوچستان ءِ نامی ئیں نیکراھی رھشون مولانا عبدالحمید اسماعیل زئی ءِ پلامرزی کتگ –

اھولانی تہ ءَ گوشگ بیتگ کہ روکپتی بلوچستان ءَ ھرچ ھما مولوی کہ عبدالحمید ءِ پلامرزی ءَ کنت گڑا آئی ءَ چیرین ادارہ چرے پژدہ ءَ آوار جن اَنت ءُ بر اَنت-

ھمے وڑ ءَ دو روچ پیش ما زاھدان آوار جنگ بیتگیں مھمد براھوئی یل کنگ بیتگ ءُ وتی لوگ ءَ سر بیتگ –

دنیا ءِ درستاں مستریں تیل کمپنی سعودی آرامکو ءِ ساپی ءَ نپ چل ءُ شش درسد ٹک چل ءُ شش ءِ گیش بوگ ءِ ھواری ءَ شش سد ءُ چار ٹل یک ارب سعودی ریال ( یک سد ءُ شست ءُ یک ارب ڈالر) ءَ داں سر بیتگ-

کمپنی ءِ نیمگ ءَ سعودی اسٹاک ایکسچینج ءَ یکجاہ کتگیں پٹ ءُ پولانی رد ءَ تیل ءِ نھاد ءِ گیشی، گیش ءَ گیش بھا بوگ ءُ گیشین نپ ءِ سبب ءَ سعودی آرامکو ءَ ساپی ءَ نپ شش سد ءُ چار ٹک یک ارب سعودی ریال ( یک سد ءُ شست ءُ یک ارب ڈالر) ءَ سر بیتگ –

عرب نیوز ءِ رد ءَ سال دوھزار ءُ بیست ءُ یک ءَ سعودی آرامکو ءِ لس ھساب ءَ ایوک ءَ نپ چار سد ءُ دوازدہ ٹک چار ارب سعودی ریال بیتگ-

ریاض ءَ ھستیں فورم ءِ رد ءَ 2022 ءَ کمپنی ءِ شش سد ءُ بیست ءُ ٹک شست ءُ سَے ارب سعودی ریال بیتگ چوشکہ سال دوھزار ءُ بیست ءُ یک ءِ دیمپان ءَ چل ءُ ھشت درسد ٹک پانزدہ گیش بیتگ-

مالی گچین کنگ ءِ سر ءَ ٹپاس کنان ءَ آرامکو ھِ سروک ءُ امین ایچ ناصر ءَ گوشتگ کہ آرامکو سال دوھزار ءُ بیست ءُ دو ءَ ریکارڈ ءِ مالیاتی ءِ کرد پیش کتگ پرچاکہ سرجمیں دنیا ءَ گیش بوتگیں تلبانی سبب ءَ تیل ءِ نھاد گیش بیتگ-

سعودی اسٹاک ایکسچینج کہ آئی ءَ را تداول ھم گوش اَنت یکجاہ کتگیں درشان ءَ نپانی گیش بوگ ءِ ھواری ءَ سعودی آرامکو ءِ بورڈ آف ڈائریکٹرز ءَ ھم سال دوھزار ءُ بیست ءُ دو ءِ چارمی بھر ءِ سے ماھی ءِ واستا ھپتاد ءُ سَے ٹک پانزدہ ارب سعودی ریال ءِ سرجمیں نپانی جار جتگ ات کہ گوستگیں سَے ماھی ھساب ءَ چار درسد گیش اِنت-

آرامکو ءِ رد ءَ شیئر ھولڈرز ءِ کیشیں نپ سال دو ھزار ءُ بیست ءُ سَے ءِ اولی سَے ماھی ءَ سرجم کنگ بیتگ اَنت کہ ایشانی توک ءَ بونس شیئرز ءُ شیئر ھولڈرزاں دیگ بیت اِنت-

آرامکو ءِ سی ای او ءَ دیمتر ءَ گوشتگ کہ فرم ءِ ھرچ ءُ درچ سال دو ھزار ءُ بیست ءُ دو ءَ ھژدہ درسد گیش بیت اِنت یک سد ءُ چل ءُ یک ٹک نوزدہ ارب سعودی ریال ءَ سر بیتگ-

روکپتی بلوچستان ءِ دمگ گنداوک ءَ زمین ءِ جیڑہ ءِ سر ءَ تیرگواری ءَ دو کس بیران ءُ دو زدگ بیتگ اَنت-

بیران بیتگیں مردمانی پجار حسین باشندہ ءُ پیر بخش رئیسی جھمنند گنداوک ءِ ناماں زانگ بیتگ اَنت – زدگ بیتگیں مردمانی پجار نہ بیتگ-

ھالانی تہ ءَ گوشگ بیتگ کہ اے مردم یک زمینے ءِ سر ءَ اڑ اتگ اَنت ءُ اود ءَ تیرگواری کنگ بیتگ چریشی ءَ دو کس بیران ءُ دو زدگ بیتگ اَنت-

گوستگیں سال ءَ روکپتی بلوچستان ءَ تیرگواری وئیلاں یک سد ءُ چاردہ مردم کُشگ ءُ زدگ کنگ بیتگ اَنت کہ اے جتا جتائیں وئیلانی آسر ءَ تیرگواری ءُ کُشگ بیتگ اَنت-

نبشتانک: ملا پد ءَ واتر بوت

نبشتہ کار: سمیر تاھر

دی بلوچستان پوسٹ

وھد وتی ھمراھاں وتی ھواری ءَ بارت لھتے ھمراہ وھد ءِ پاداں اتک نہ کنت لھتے سنگت ءَ وھد ھنچیں نامے بکش ایت کہ آھانی پکر ءَ جھان ءَ ابدمان کنت چوناھا ما لگتمالیں راج ئے ءَ چہ تعلق داروکیں بنی آدم ایں بگندے چہ وھشالیں راجاں مئے اندر ءَ گیشتر مارشت جوڈگ جن اَنت ما انسان ءِ بُنکئ ھکانی بابت ءَ گیشتر آشناء بوھگ ءِ جھد ءَ کنیں کہ مئے گیشتریں کئوم ئے زندمان ھمے وڈ بہ آسراتی گوستگ منی دل ءَ اے کرن پہ بلوچ راج ءَ وبال ئے ءَ کمتر نہ اِنت بلے ھمے وڈیں مشکلات ھمے وڈیں ھالات راجانی میان ءَ ملا بھرام ءِ وڈیں کردار ودی کن اَنت ۔من جیڑاِتگ اَت کہ من نمیرانیں ملا بھرام ءِ ھاتر ءَ چیزکے نبشتہ بہ کناں یک ءُ دو رند ءَ من کلم دست کُتگ ءُ ھیالے ءَ کپتگ آں کہ منی وڑیں بہ کِردیں انسانےبءِ پُتینکاں چوشیں لبز در کیت کہ اے وڑیں کارست ئِے ستاہ ءَ بہ کناں بلے مروچی نبشتہ کنگ ءِ جھد ءَ کناں ۔ منی نبشتانک ءِ کارست ءَ منی دل ءَ شما آشناء ءِ ملا بھرام ھمے گلامیں چاگرد ءَ ودی بوتگ آئی ءَ وتی چَم پچ کُتگ اَنت تاں ھمے گلامی ءِ پالومپ آئی راج ءِ پاداں بوتگ آئی ءَ زمین پہ بہ وارسی چارت نہ کُت ءُ وت ءَ را زمین ءِ وارس سرپد بوت آئی ءَ مدام جیڈت کہ اے سرزمین ءِ سر ءَ من ساہ کشگاں آں اے منی وتی جند ءِ ھنکین اِنت منی پِت ءُ پیروکاں وتی زند ھمے کوھانی میان ءَ گوازینتگ ۔ یک وھد ئے اتک بلوچستان ءَ بازیں بہ دلیں بلوچ ئے چہ کوھاں در کپت ءُ دشمن ءِ دیما سلاہ اِش دور دات اَنت اے لَڈ ءَ بازیں کماندار ئے ھوار اَت ءُ بازیں ھلکی سنگت ھم ھوار اِت اَنت سلاھ بندیں پاٹیاں ھمے اُمید کہ راج ءِ دل ءَ ودی کُتگ اَت کہ یک روچے اے سرزمین ءَ آجوئی کیت ھمے امید ھتم بوھگ ءِ سیمسراں رستگ اَت بلے اے ھبر ءَ راج آشناء نہ اَت کہ یک پیاپیں تنظیم ئے جوڈ کنگ ءِ ھاتر ءَ پدا آئی ءِ منظم کنگ ءِ ھاتر ءَ چنچو کربانی لوٹیت جنگانی بدیں بولی وش نہ اَنت بلے جنگ سَر ءَ اَت جنگ الّمی اَت بامردیں ملا بھرام سرپد اَت کہ لیپگیں ءُ دم بُرتگیں مردمانی روگ ءَ ما نِزور نہ بئیں بلکیں ما گیشتر توان مند بئیں سَرجھلیں مردم مارا تاوان بار کُت کن اَنت بلے ھتم کُت نہ کنت اَنت ءُ اے مئے راج ءِ وش بھتی اَت کہ اے وڈیں جاوراں مئے میان ءَ ملا بھرام ءِ وڈیں کارست ئے موجود اَت-

ھمے وھد ءَ سرکار ءَ سلاہ بندیں سنگتانی پیملی ٹارچر کُت اَنت لوگ مانداشت اَنت ھمک روچ نپر ءُ چِتّر کُت کہ وتی مردماں بیار اِت وتی مردماں سرینڈر کنائین اِت ۔ ملا بھرام ءِ جند ءِ کس ءُ ازیزانی ھال چون بیتگ ریاست ءَ کجام ھد ءَ آ لاچار کُتگ اَنت بگندے من اے چیز ءَ شریں رنگے ءَ سرپداں ھچ ساہ ءِ دل نہ منیت کہ آئی ءِ چُک چورہ بہ بنت آئی ءِ مردم داں زند بہ نال اَنت پہ آئی ءِ دیدار ءَ سرکار ءَ ملا بھرام ءَ زر ءُ مال ءِ لالچ ھم دات لوگ ءُ زمین ءِ لالچ ھم دات گاڑی ءُ سواری ءِ لالچ ھم دات بلے مھکمیں پکر سرکار ءَ بھا زرت نہ کُت آئی ءَ وتی زمیر ءِ سودا نہ جَت وتی کئوم ءِ بیپار کنگ ءَ تیار نہ بوت آئی ءَ سر ءِ جھل کنگ ءَ چہ مرگ تسلیم کُت بگندے آئی ءِ زند وھشال بیتگ اَت بگندے آئی ءِ زھگانی باندات رژناء بیتگ اَت بلے یار مرد ءِ پکر لائق ءِ پوجا کنگ اِنت ھر وھد ءَ کہ اے وڈیں گپ ئے اِش کُت اَنت بچکندگ ئے ءَ گوں گوشت ئے , سرکار وتی جِند ءَ بداریت نو اے چاریں کراناں وتی سر ءَ ھرچ بہ کنت , ھئو یار مُلا –

ھما روچ ءَ کہ ملا بھرام گوں سنگتاں شھید کنگ بوت منی اندر ءَ ھیال ئے مناں ورگ ءَ اِنت کہ آ شپ ءَ من مُلا گُڈی رَند ءَ دیستگ اَت کہ سنگت ئے ھمراہ اِت اَنت ءُ سر گپتگ اَت سینکل ءَ ھُرد پِر اِت اَنت سینکل ءَ سوار بوھگ ءَ اَت مارا گُشت ئے کہ وتی ھیال ءَ بہ کن اِت وت ءَ سمبال بہ کن اِت آ شپی منی دل ءَ گُشت دست ءَ مُلا ءِ بَڈ ءَ بہ لَگاشاں بلے نزاناں چیا من اے وڈ کُت نہ کُت پدا ملا در کپت ءُ ھمائیں واتر نہ بیت-

“آ مُرگ پدا واتر کاینت “
“آ سال ءَ پدا سبزیت زمین “
“آ کسہ آسر بوت نہ کنت”
“آ باب ءِ سبق ھم گوست نہ کنت”
“داں وھدے چاکر مُرت نہ کنت”
“آ وھد مرید ءَ کُشت نہ کنت”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

شال ءَ بیگواھیں مردمانی پانکجنیں گل وائس فار بلوچ مسنگ پرسنز زھرشانی بنجل ءَ مروچی چار ھزار ءُ نُھ سد ءُ ھپتاد ءُ نھ روچ سرجم بوتگ انت – بی ایس او ءِ سرکماش جہانگیر بلوچ وتی کابینہ ءَ ھوار ءُ بی ایس او ءِ پجار ءِ سرکماش زبیر بلوچ وتی کابینہ ءِ سنگتاں ھوار پشتونخواہ میپ ءِ باسکاں بنجل ءَ اتکگ ءُ دلپدردی درشان اتگ –

ھمے وھد ءَ وی بی ایم پی ءِ کمک سرکماش ماما قدیر بلوچ ءَ گوشتگ کہ مروچی ریاستی پوج ءُ آئی ءِ کشندہ ٹولی بلوچ ءِ ھون ءَ بے دردی ریچگ ءَ انت کہ اے راجی گلامی ءِ سوب انت، مروچی ھزاراں بلوچ ورنا، کماش زھگ ءُ زالبول دژمن استان ءِ زوراکیانی آماچ انت –

آئی ءِ گوشگ ات گوادر ءُ کوھلو ءَ مارچ ماہ ءِ بندات گوں ریاستی پوج ءِ زوراکیاں کنگ بوتگ، گوادر ءِ دمگ کلانچ ءَ یکیں کھول یکشل ءَ پوج ءِ زوراکیانی دیمپان انت ھمے کھول ءِ دو کماش بابو محراب ءُ لال بخش محراب پوج ءُ کشندہ ٹولیاں گوستگیں وھد ءَ کُشتگ انت ءُ اے کھول ءِ بازیں مردمے آوار جتگ ءُ بیگواہ کتگ انت، وھدیکہ کوھلو ءَ بازیِ جاھاں دو روچ انت پوج ءِ لشکر کشی برجاہ انت، تنی وھدی یانزدہ مردمانی زورانسری آوار جنی ءِ ھال انت کہ آھانی تہ ءَ نودربر، وانگجاھانی ماسٹر ءُ بزگریں شوانگ ھوار انت –

ماما قدیر بلوچ ءَ گوشتگ کہ مھلوک ءِ جوش ءُ جزبگ ءَ اے جاوراں مردمانی یکجاہ کنگ ءَ دژمن ءِ ترس ءَ ھلاس کنگ ءِ جوانیں کارے بیت – کہ پاکستانی پوج وتی درسیں تاکت ءِ گوم ءَ زوراکیانی ھمراھی ءَ بلوچ راج ءَ سرپد کنگ ءَ انت کہ آ بلوچ راج ءَ وتی ترس ءِ تہ ءَ کنت ءُ پدا ھمے جاوراں بلوچ نودربر گلانی سرپدی دیگ ءِ مھم جوانیں گامگیج یے کہ ستا کرزیت – مروچی بلوچ ءِ پُرایمنیں جھد ءُ مچیاں ھزارانی کچ ءَ مردمانی یکجاہ کنگ، دوستیگیں مردمانی توار ءَ پد پاکستانی پوج کجام ھم وھد ءَ اُرش کت کنت، آھانی ننگ ءُ ناموس ءَ لگتمال کت کنت بلے آھانی جزبگ ءُ راج دوستی زانشتی انکلابی سرپدی ءَ دست گوشیں مردمانی ترس در کئیت –