TBP Balochi

نبشتانک: ملا پد ءَ واتر بوت

نبشتہ کار: سمیر تاھر

دی بلوچستان پوسٹ

وھد وتی ھمراھاں وتی ھواری ءَ بارت لھتے ھمراہ وھد ءِ پاداں اتک نہ کنت لھتے سنگت ءَ وھد ھنچیں نامے بکش ایت کہ آھانی پکر ءَ جھان ءَ ابدمان کنت چوناھا ما لگتمالیں راج ئے ءَ چہ تعلق داروکیں بنی آدم ایں بگندے چہ وھشالیں راجاں مئے اندر ءَ گیشتر مارشت جوڈگ جن اَنت ما انسان ءِ بُنکئ ھکانی بابت ءَ گیشتر آشناء بوھگ ءِ جھد ءَ کنیں کہ مئے گیشتریں کئوم ئے زندمان ھمے وڈ بہ آسراتی گوستگ منی دل ءَ اے کرن پہ بلوچ راج ءَ وبال ئے ءَ کمتر نہ اِنت بلے ھمے وڈیں مشکلات ھمے وڈیں ھالات راجانی میان ءَ ملا بھرام ءِ وڈیں کردار ودی کن اَنت ۔من جیڑاِتگ اَت کہ من نمیرانیں ملا بھرام ءِ ھاتر ءَ چیزکے نبشتہ بہ کناں یک ءُ دو رند ءَ من کلم دست کُتگ ءُ ھیالے ءَ کپتگ آں کہ منی وڑیں بہ کِردیں انسانےبءِ پُتینکاں چوشیں لبز در کیت کہ اے وڑیں کارست ئِے ستاہ ءَ بہ کناں بلے مروچی نبشتہ کنگ ءِ جھد ءَ کناں ۔ منی نبشتانک ءِ کارست ءَ منی دل ءَ شما آشناء ءِ ملا بھرام ھمے گلامیں چاگرد ءَ ودی بوتگ آئی ءَ وتی چَم پچ کُتگ اَنت تاں ھمے گلامی ءِ پالومپ آئی راج ءِ پاداں بوتگ آئی ءَ زمین پہ بہ وارسی چارت نہ کُت ءُ وت ءَ را زمین ءِ وارس سرپد بوت آئی ءَ مدام جیڈت کہ اے سرزمین ءِ سر ءَ من ساہ کشگاں آں اے منی وتی جند ءِ ھنکین اِنت منی پِت ءُ پیروکاں وتی زند ھمے کوھانی میان ءَ گوازینتگ ۔ یک وھد ئے اتک بلوچستان ءَ بازیں بہ دلیں بلوچ ئے چہ کوھاں در کپت ءُ دشمن ءِ دیما سلاہ اِش دور دات اَنت اے لَڈ ءَ بازیں کماندار ئے ھوار اَت ءُ بازیں ھلکی سنگت ھم ھوار اِت اَنت سلاھ بندیں پاٹیاں ھمے اُمید کہ راج ءِ دل ءَ ودی کُتگ اَت کہ یک روچے اے سرزمین ءَ آجوئی کیت ھمے امید ھتم بوھگ ءِ سیمسراں رستگ اَت بلے اے ھبر ءَ راج آشناء نہ اَت کہ یک پیاپیں تنظیم ئے جوڈ کنگ ءِ ھاتر ءَ پدا آئی ءِ منظم کنگ ءِ ھاتر ءَ چنچو کربانی لوٹیت جنگانی بدیں بولی وش نہ اَنت بلے جنگ سَر ءَ اَت جنگ الّمی اَت بامردیں ملا بھرام سرپد اَت کہ لیپگیں ءُ دم بُرتگیں مردمانی روگ ءَ ما نِزور نہ بئیں بلکیں ما گیشتر توان مند بئیں سَرجھلیں مردم مارا تاوان بار کُت کن اَنت بلے ھتم کُت نہ کنت اَنت ءُ اے مئے راج ءِ وش بھتی اَت کہ اے وڈیں جاوراں مئے میان ءَ ملا بھرام ءِ وڈیں کارست ئے موجود اَت-

ھمے وھد ءَ سرکار ءَ سلاہ بندیں سنگتانی پیملی ٹارچر کُت اَنت لوگ مانداشت اَنت ھمک روچ نپر ءُ چِتّر کُت کہ وتی مردماں بیار اِت وتی مردماں سرینڈر کنائین اِت ۔ ملا بھرام ءِ جند ءِ کس ءُ ازیزانی ھال چون بیتگ ریاست ءَ کجام ھد ءَ آ لاچار کُتگ اَنت بگندے من اے چیز ءَ شریں رنگے ءَ سرپداں ھچ ساہ ءِ دل نہ منیت کہ آئی ءِ چُک چورہ بہ بنت آئی ءِ مردم داں زند بہ نال اَنت پہ آئی ءِ دیدار ءَ سرکار ءَ ملا بھرام ءَ زر ءُ مال ءِ لالچ ھم دات لوگ ءُ زمین ءِ لالچ ھم دات گاڑی ءُ سواری ءِ لالچ ھم دات بلے مھکمیں پکر سرکار ءَ بھا زرت نہ کُت آئی ءَ وتی زمیر ءِ سودا نہ جَت وتی کئوم ءِ بیپار کنگ ءَ تیار نہ بوت آئی ءَ سر ءِ جھل کنگ ءَ چہ مرگ تسلیم کُت بگندے آئی ءِ زند وھشال بیتگ اَت بگندے آئی ءِ زھگانی باندات رژناء بیتگ اَت بلے یار مرد ءِ پکر لائق ءِ پوجا کنگ اِنت ھر وھد ءَ کہ اے وڈیں گپ ئے اِش کُت اَنت بچکندگ ئے ءَ گوں گوشت ئے , سرکار وتی جِند ءَ بداریت نو اے چاریں کراناں وتی سر ءَ ھرچ بہ کنت , ھئو یار مُلا –

ھما روچ ءَ کہ ملا بھرام گوں سنگتاں شھید کنگ بوت منی اندر ءَ ھیال ئے مناں ورگ ءَ اِنت کہ آ شپ ءَ من مُلا گُڈی رَند ءَ دیستگ اَت کہ سنگت ئے ھمراہ اِت اَنت ءُ سر گپتگ اَت سینکل ءَ ھُرد پِر اِت اَنت سینکل ءَ سوار بوھگ ءَ اَت مارا گُشت ئے کہ وتی ھیال ءَ بہ کن اِت وت ءَ سمبال بہ کن اِت آ شپی منی دل ءَ گُشت دست ءَ مُلا ءِ بَڈ ءَ بہ لَگاشاں بلے نزاناں چیا من اے وڈ کُت نہ کُت پدا ملا در کپت ءُ ھمائیں واتر نہ بیت-

“آ مُرگ پدا واتر کاینت “
“آ سال ءَ پدا سبزیت زمین “
“آ کسہ آسر بوت نہ کنت”
“آ باب ءِ سبق ھم گوست نہ کنت”
“داں وھدے چاکر مُرت نہ کنت”
“آ وھد مرید ءَ کُشت نہ کنت”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

شال ءَ بیگواھیں مردمانی پانکجنیں گل وائس فار بلوچ مسنگ پرسنز زھرشانی بنجل ءَ مروچی چار ھزار ءُ نُھ سد ءُ ھپتاد ءُ نھ روچ سرجم بوتگ انت – بی ایس او ءِ سرکماش جہانگیر بلوچ وتی کابینہ ءَ ھوار ءُ بی ایس او ءِ پجار ءِ سرکماش زبیر بلوچ وتی کابینہ ءِ سنگتاں ھوار پشتونخواہ میپ ءِ باسکاں بنجل ءَ اتکگ ءُ دلپدردی درشان اتگ –

ھمے وھد ءَ وی بی ایم پی ءِ کمک سرکماش ماما قدیر بلوچ ءَ گوشتگ کہ مروچی ریاستی پوج ءُ آئی ءِ کشندہ ٹولی بلوچ ءِ ھون ءَ بے دردی ریچگ ءَ انت کہ اے راجی گلامی ءِ سوب انت، مروچی ھزاراں بلوچ ورنا، کماش زھگ ءُ زالبول دژمن استان ءِ زوراکیانی آماچ انت –

آئی ءِ گوشگ ات گوادر ءُ کوھلو ءَ مارچ ماہ ءِ بندات گوں ریاستی پوج ءِ زوراکیاں کنگ بوتگ، گوادر ءِ دمگ کلانچ ءَ یکیں کھول یکشل ءَ پوج ءِ زوراکیانی دیمپان انت ھمے کھول ءِ دو کماش بابو محراب ءُ لال بخش محراب پوج ءُ کشندہ ٹولیاں گوستگیں وھد ءَ کُشتگ انت ءُ اے کھول ءِ بازیں مردمے آوار جتگ ءُ بیگواہ کتگ انت، وھدیکہ کوھلو ءَ بازیِ جاھاں دو روچ انت پوج ءِ لشکر کشی برجاہ انت، تنی وھدی یانزدہ مردمانی زورانسری آوار جنی ءِ ھال انت کہ آھانی تہ ءَ نودربر، وانگجاھانی ماسٹر ءُ بزگریں شوانگ ھوار انت –

ماما قدیر بلوچ ءَ گوشتگ کہ مھلوک ءِ جوش ءُ جزبگ ءَ اے جاوراں مردمانی یکجاہ کنگ ءَ دژمن ءِ ترس ءَ ھلاس کنگ ءِ جوانیں کارے بیت – کہ پاکستانی پوج وتی درسیں تاکت ءِ گوم ءَ زوراکیانی ھمراھی ءَ بلوچ راج ءَ سرپد کنگ ءَ انت کہ آ بلوچ راج ءَ وتی ترس ءِ تہ ءَ کنت ءُ پدا ھمے جاوراں بلوچ نودربر گلانی سرپدی دیگ ءِ مھم جوانیں گامگیج یے کہ ستا کرزیت – مروچی بلوچ ءِ پُرایمنیں جھد ءُ مچیاں ھزارانی کچ ءَ مردمانی یکجاہ کنگ، دوستیگیں مردمانی توار ءَ پد پاکستانی پوج کجام ھم وھد ءَ اُرش کت کنت، آھانی ننگ ءُ ناموس ءَ لگتمال کت کنت بلے آھانی جزبگ ءُ راج دوستی زانشتی انکلابی سرپدی ءَ دست گوشیں مردمانی ترس در کئیت –

بلوچستان ءِ دمگ پنجگور ءَ ناشناسیں سلاہ بندیں گاڑی سواراں دو مردم آوار جنگ ءَ پد ناشناسیں جاھاں برتگ اَنت-

آوار جنگ بیتگیں مردمانی پجار عطاء اللہ ء ھاجی عبدالقادر ءُ پزیر ء شمبے جھمنند پروم گواش ءِ ناماں زانگ بیتگ اَنت-

دمگی مردمانی گوشگ اِنت اے مردم دَہ مارچ ءَ ناشناسیں گاڑی سواراں چہ پنجگور چتکان بازار ءَ تیرگواری کرتگ ءُ زدگ کتگ ءُ گون وت برتگ اَنت-

بلوچستان لبریشن فرنٹ ءِ جارکش ءَ وتی یک شنگ کتگیں درشانے ءَ گشتگ کہ مئے سرمچاراں گوستگیں شپ ءَ ناصر آباد ھَند ءَ پاکستان ٹیلی کمیونیکیشن کمپنی لمیٹڈ یوفون ءِ موبائل ٹاور ءَ را گوں وتکاریں اسلاھاں نشانگ کتگ ءُ مشینری سوتکگاں۔

جارکش ءَ گشتگ کہ دژمن پاکستانی پوج گوں چین ءِ رسانکی کمپنی ھمرائی ءَ کبزگیریں بلوچستان ءُ ھاص بلوچستان ءِ کوہانی ھند ءُ دمگاں موبائل ٹاورانی تائداد گیش کنگ ءَ اِنت دانکہ آسرمچاراں آسانی گومہ ٹریس بہ کنت این ءُ وتی داشتگیں دیمکارانی کُمک ءَ سرمچارانی سُر ءُ پُرانانی سر ءَ چمشانک بداریت ءُ آسراتی بے گپت ایں۔

جارکش گشتگ کہ اے اُرشے زمہ واری مئے گَل منّ ایں ءُ کبزگیریں بلوچستان ءِ آجوئی داں دژمن پوج ءُ آئی اِستین منسوبہ آنی سر ءَ اُرشاں برجم داریت۔

سر بیتگیں ھالانی رد ءَ روکپتی بلوچستان ءِ دمگ ایرانشھر “پھرہ ” ءَ ایرانی چیریں ادارھاں یک لوگے ءِ سر ءَ بیڑ برتگ ءُ اود ءَ یک زالبولے ءِ آوار جنگ ءِ جھد کتگ –

گیشیں ھالانی رد ءَ پھرہ ءَ ایرانی چیریں ادارہ “اطلاعات ” یک لوگے ءِ سر ءَ بیڑ برتگ ءُ اود ءَ یک زالبولے ءِ آوار جنگ ءِ جھد کتگ چریشی ءَ زالبول ءَ کُکار کرتگ ءُ دمگ ءِ مردماں گھگیری کنان ءَ آوار جنی بے سوب کتگ-

ھالانی تہ ءَ گوشگ بیتگ کہ ایرانی چیریں ادارھاں گوشتگ کہ ما ایشی ءَ بریں جست ءُ پرس کنگ ءَ پد یلے کن ایں کہ اے پرکاریانی تہ ءَ ھواری ءِ بھتام اِنت-

ھالانی تہ ءَ گوشگ بیتگ کہ چیریں ادارھاں “توران ھمل زئی” ءِ لوگ ءِ سر ءَ بیڑ برتگ ءُ اود ءَ آئی ءِ آوار جنگ ءِ جھد چریشی ءَ آئی ءَ گھگیری کتگ ءُ وت ءَ رکینتگ-

ھالانی تہ ءَ گوشگ بیتگ کہ ایرانی چیریں ادارھانی سَے کارندھاں آئی ءِ سر ءَ اُرش کرتگ ءُ لوگ ءِ تہ ءَ مانریتگ اَنت ءُ اود ءَ دمگی مردم ھم مُچ بیتگ اَنت ءُ آیاں تامر جوڑ کنگ ءِ جھد کتگ گڑا کارندھاں لس مردمانی موبائل پچ گپتگ اَنت-

زانگ بہ بیت روکپتی بلوچستان ءَ آوار جنیانی ھلاپ ءَ توار چست کنوکیں زالبولانی ھلاپ ءَ ایران ءِ سرکار ءِ برانز ترند اَنت چریشی ءَ اود ءَ توار چست کنوکیں زالبولاں گیشتر گرگ ءُ برگ ءَ اِنت-

گوست ءَ روکپتی بلوچستان ءِ بنجاھی شھر زاھدان ءَ پوزیا براھوئی نامے جنکے ھم دزگیر کنگ بیتگ ءُ پد ءَ آ زمانت ءِ سر ءَ یل کنگ بیتگ ات –

یوکرین ءَ ٹاہ دیان ءَ گوشتگ کہ آئی ءِ پوج ءَ گوستگیں بیست ءُ چار ادارانی تہ ءَ رودراتکی شھر باخموت ءَ جنگ ءِ وھد ءَ 500 ءَ گیش روسی پوجی کُشتگ ءُ زدگ کتگ اَنت-

ھال سرکنوکیں روئٹرز ءَ یوکرین ءِ پوج ءِ جارکش ءِ درور دیان ءَ گوشتگ کہ روس ءِ پوج ءَ بازیں جانی تاوانانی دیمپانی کنگ کپتگ-

یوکرین ءَ رودراتکی ڈونباس ءِ دمگ باخموت ءِ شھر ءِ دستیگ کنگ ءَ پد روس ءِ لشکر ءَ بازیں ماھاں چہ اُرش بوگ ءَ اَنت-

روئٹرز ءِ رد ءَ ھردوکیں نیمگاں یکے دومی ءَ بازیں کچے ءَ جانی تاوانانی دیگ ءِ ٹاہ داتگ بلے راستین کچانی دیم ءَ آرگ باز مُشکل اِنت –

یوکرین ءِ رودراتکی ھنداں پرکاریں لشکر ءِ جارکش سرھء چیریواتی ءَ گوشتگ کہ گوستگیں بیست ءُ چار ساھاتاں روس ءِ لشکر ءِ سر ءَ شانزدہ اُرش کتگ اَنت ءُ باخموت ءِ جتا جتائین جاھں جنگ برجاہ اِنت-

آئی ءَ نیشنل پارلیمنٹ ٹی وی چینل ءَ گوشتگ کہ جنگ ءِ وھد ءَ دشمن ءِ 221 پوجی کشتگ ءُ 314 زدگ کتگ اَنت –

جارکش ءِ درشان ءِ رد ءَ اے راست کنگ نہ بیتگ کہ آدینگ ءِ اُرشانی درگت ءَ اِنت یا نوکتریں بیست ءُ چار ساھتانی ئیگ اِنت –

ھال سرکنوکیں روئٹرز ءِ رد ءَ سرجمی ءَ اے ٹاہ ءَ راست کت نہ کن ایں – بلے یوکرین ءِ سروک ولاد دیمیر زیلنسکی ءِ یک مشیرے ءَ آدینگ ءِ روچ ءَ گُشتگ بیتگ کہ آئی ءِ پوج ءِ جنگ باخموت ءَ برجاہ اِنت ءُ اے پیسلہ کنگ بیتگ جنگ ءَ برجاہ دار ایت ءُ پرچا کہ اود ءَ روس ءِ لشکر ءِ یونٹساں بازیں تاوانانی دیمپانی کنگ کپگ اِنت –

ماسکو ءِ گوشگ اِنت باخموت ءِ دستیگ کنگ ءَ پد یوکرین ءِ پھریزگ ءَ یک مزیں کساسے ءِ رنگ ءَ بیت اِنت چریشی ءَ پد رودراتکی ڈونباس ءِ انڈسٹریل ءِ دمگ ءَ دستیگ کنگ یک گچینی نشانگے –

زانگ بہ بیت گوستگیں سال ءِ فروری ءَ یوکرین ءُ روس ءِ جنگ ءَ کساس دَہ ھزاد مردم کشگ بیتگ اَنت ءُ دَہ لکھ مردم بیتگ اَنت ءُ یوکرین ءِ کُچگ ءُ دمگ کوراس ءُ تھاری ءَ گپتگ اَنت-

پسنی ڈگری کالج ءَ برجم دارگ بوتگیں کتاب میلا زیک دھ مارچ ءَ بگر تاں مروچی یانزدہ مارچ ءَ برجاہ بوتگ –

گیشیں ھالانی رِد ءَ پسنی ءَ بچکانی ڈگری کالج ءِ چیردستی ءَ دو روچی کتاب میلا ءِ بنداتی مراگش آدینگ ءِ روچ ءَ پسنی ڈگری کالج ءِ بندات کنگ بوتگ، مراگش ءِ گچینی مھمان پسنی ءِ اسسٹنٹ کمشنر محمد جان بلوچ بوتگ کہ آئی ءَ مراگش بندات کتگ –

برجم داشتگیں اے کتابی میلا ءَ ڈگری کالج ءَ ھوار دگہ وانگجاھانی جنکیں نودربراں ھم مزنیں کچے ءَ بھر زرتگ – دو روچی کتابی میلا ءَ بازیں شنگکاراں وتی کتابی اسٹال جتگ انت، بازیں آرٹسٹ ءُ فنکاراں ھم وتی ازمانی اسٹال جتگ ءُ اشی ءَ ابید نودربرانی نیمگ ءَ ڈرامہ، ٹیبلو باوست، بلوچی ءُ اردو ءَ شئر ءُ شائری ھم کنگ بوتگ –

اسسٹنٹ کمشنر پسنی ءُ دگہ مردماں تران کنان ءَ گوشتگ کہ وانگجاھانی تہ ءَ اے وڈیں مراگشانی برجم دارگ ءَ نودربر گیشتر کتاب وانگ ءِ سر ءَ دلگوش دئینت ءُ چریشی ءَ چاگرد تہ ءَ شری کئیت – آئی ءَ گوشتگ کہ پسنی مدامی زانت ءُ زانشت ءُ ازمکاری ءِ گہوارہ ءِ بوتگ –

آھانی گوشگ ات کہ مارا جھان ءِ تہ ءَ چشیں راجے دست نہ کپیت کہ آ چہ کتاباں دور بوتگ ءُ جھان ءِ تہ ءَ دیمروئی کتگ – جھان ءِ تہ ءَ دیمروئی کنگ ءِ اولی پدانک کتاب انت کہ مارا چہ زانت ءَ سریچ کنت – چہ کتابانی وانگ ءَ راجاں دیمروئی کتگ – اے وڈیں مراگشاں نودربرانی دلگوشی دیگ ءَ زانگ بیت کہ وانگجاھاں مئے بچکیں نودربراں ھوار جنک ھم زانت ءِ شوھاز ءَ درکپتگ انت –

آھانی گوشگ ات کہ مئے راج ءَ انکلابی ءُ جنگانی بنیات ءَ کتاب ءُ کلم جھان ءِ ھر پڑ ءَ یک سلاھے ءِ وڈا کارمرز کنگی انت – پرچاکہ کتاب ءِ وانگ ءُ زانت ھما یکیں چیز انت کہ جھان ءِ تہ ءَ مدامی مئے ھمراہ داری ءَ کن انت – مروچیگیں مراگش ءَ ورنایانی دست کاری، فن ءُ مصوری ءِ گندگ ءَ پد کسے ھم اے گپ ءَ رد کت نہ کنت کہ پسنی زانت ءُ زانشت آرٹ ءِ درگت ءَ لکھنو ءَ کمتر نہ انت -زانگ بہ بیت پسنی ڈگری کالج گوستگیں روچ ءَ دھ مارچ ءَ بندات کنگ بوتگ ءُ مروچی یانزدہ مارچ ءَ تاں برجاہ بوتگ –

اوگانستان ءِ استان مزار شریف ءَ تبیان دودمانی بنجل ءَ بوتگیں بمب تراک ءَ بیران بوتگیں مردمانی کچ دہ ءَ سر بوتگ انت، وھدیکہ بازیں مردمے زدگ بوتگ انت –

درملکی رسانکدرانی رِد ءَ مروچی شمبے ءَ اوگان ءِ استان بلخ مزار شریف ءَ دودمانی بنجل ءَ اھوالکارانی مراگش ءِ میان ءَ بمب اُرشے کنگ بوتگ، بمب تراک ءَ دہ مردم بیران بوتگ انت – اوگان واکدارانی رِد ءَ تراک سھب ءِ ادار دہ ءُ نیم ءَ تراکناکیں شوروانی ترکگ ءَ بوتگ –

اے درگت ءَ تالبان سرکار ءِ گوشگ انت کہ وئیل ءَ ھواریں ناشرکارانی بگیری ءَ پٹ ءُ پول کنگ بوگ ءَ انت بلے تنی وھدی اے اُرش ءِ زمہ ھچ کس ءَ نہ منّ اِتگ –