TBP Balochi

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ نُھ سد ءُ ھشتاد ءُ یک روچ سرجم بوتگ انت، چہ سبی ءَ رحمت اللہ سیلاچی، نور شاہ خجک ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ چہ شال ءَ پوج ءِ دست ءَ زورانسری آوار جنگ بوتگیں قدوس بنگلزئی ءِ کھول ھم وائس فار بلوچ مسنگ پرسنز ءِ بنجل ءَ اتکگ ءُ وتی بیگواھیں لوگواجہ ءِ یل کنگ ءِ لوٹ کتگ –

بنجل ءَ اتکگیں مردمانی گوم ءَ تران کنان ءَ گل ءِ کمک سرکماش ماما قدیر بلوچ ءِ گوشگ ات کہ بلوچ ورنا ءُ نودربراں وتی رکینگ ءِ ھاتر ءَ دیمھونی داتگ، زانشجاھاں بگر تاں میتگ ءُ کوچگاں ھر نیمگ ءَ بید ءِ پوجی پانگس ءَ دگہ ھچی گندگ ءَ نہ ایت اے وڈیں جاورھال یک نوکیں باوست ءِ ودی کن انت، پرچا کماش ءُ زالبول یک یک ءَ نشانگ کنگ بوگ ءَ انت، گوست ءَ بوت کنت کہ اے جستانی پسو گران بوتگ بلے مروچیگیں جاورھالانی تہ ءَ استان ءِ دیم شری ءِ چادر دیر اتکگ کہ آئی ءَ جمہوریت ءِ نام ءَ مزھبی پوج ءِ تاکت ءَ گوں جھان ءِ ایمنی ءِ راھانی دیم ءَ اڈاند ءِ بوتگ – پاکستان وتی کتکاریانی سوب ءَ سرجمیں جھان ءِ چمانی دیم ءَ پدر انت –

ھمے وھد ءَ بلوچستان ءِ بنجاھی شھر شال ءَ زورانسری آوار جنگ بوتگیں قدوس بنگلزئی ءِ لوگبانک ھم بنجل ءَ اتکگ کہ آئی ءَ چہ سرکار ءُ انسانی ھکانی ادارھاں گوں لوٹ کتگ کہ منی لوگواجہ ءِ زاھر کنگ ءَ منی کمک بہ کن انت –

بیگواھیں عبدالقدوس بنگلزئی ءِ لوگبانک ءِ رد ءَ آئی ءِ لوگواجہ گوستگیں سال ءَ شانزدہ دسمبر ءَ چہ شال ءَ منیر جان دگ ءَ سی ٹی ڈیءِ کارمنداں دزگیری ءَ پد بیگواہ کتگ – آئی ءِ لوگبانک ءَ گوشتگ کہ ھما انت لوگواجہ بیگواہ انت آ سک باز ازیت ءِ آماچ انت –

عبدالقدوس ءِ لوگبانک ءِ گوشگ ات کہ آئی ءِ لوگواجہ وتی مات ءُ پت ءُ گِس ءِ یکیں کمائینوک انت آ کجام کانود ءُ کجام کتکاریانی سوب ءَ آوار جنگ ءُ بیگواہ کنگ بوتگ – اگاں آئی ءِ سر ءَ کتکاری ءِ الزام ءِ ھست گڈا آمیدگس ءَ پیش کنگ بہ بیت –

عبدالقدوس ءِ لوگبانک ءَ چہ سرکار ءُ انسانی ھکانی ادارھاں گوں لوٹ کتگ کہ منی لوگواجہ زاھر کنائینگ ءُ آئی ءِ وش ءُ سلامتی یل کنائینگ ءَ وتی کرد ءَ پیلو بہ کن انت –

بلوچ نودربر گل آزاد (BSO_A)ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ مروچیگ ءَ چہ نُھ سال ساری گل ءِ گوستگیں سرکماش زاھد بلوچ چہ شال ءَ زورانسری آوار جنگ ءُ بیگواہ کنگ بوتگ، میان استمانی انسانی ھکانی ادارھاں گوں دزبندی ءُ بازیں زھرشانیاں ابید ھم زاھد بلوچ روچ مرچی پاکستان ءِ زندانانی تہ ءَ ازیت سگگ انت –

جارکش ءَ گوشتگ کہ زاھد بلوچ ءِ بازیں وھداں اے وڈ زورانسری آوار جنی ءَ پد بیگواھی ءُ آئی ءِ یل نہ کنگ انسانی ھکانی ادارہ ءُ میان استمانی گلانی گیر زمہ داری ءِ کرد ءَ پیش داریت –

آئی ءَ گوشتگ کہ زاھد بلوچ ءِ زورانسری آوار جنی ءِ بگیری ءَ گل ءِ نیمگ ءَ سرجمیں بلوچستان ءَ ھوار دگہ ڈیھاں ھم زھرشانی کنگ بوتگ ءُ ھمے میان ءَ ترندیں گامگیج زورگ بوتگ ءُ شد کشیں زھرشانی ھم نشتگ ایں کہ پدا انسانی ھکانی میان استمانی گلانی باور کنائینگ ءَ پد ھلاس کنگ بوتگ بلے نُھ سالانی گوزگ ءَ پد ھم میان استمانی انسانی ھکانی گلانی نیمگ ءَ ھچ وڈیں گامگیج نہ زورگ ءَ زاھد بلوچ یل کنائینگ ءَ وتی کرد پیلو نہ کنگ انسانی ھکانی ھست بوگ ءِ سر ءَ بازیں جست ءِ ودی کنت – زاھد بلوچ ءِ زورانسری آوار جنی ءِ نُھ سال گوزگ ابید آئی ءِ ھچ وڈیں ھال اھوال نیستی ءِ سوب ءَ آئی ءِ کھول بازیں ازیتانی آماچ انت –

آئی ءَ دیمتر ءَ گوشتگ کہ زاھد بلوچ یک پُرایمنیں راجداریں جھدکار یے، بلوچ نودربر گل آزاد ءِ پلیٹ فارم ءِ سر ءَ بلوچ نودربرانی رھشونی ءَ کنگ ءَ بوتگ – پاکستانی ریاست ءَ سرجمیں بلوچستان ءَ راجکاری کارانی سر ءَ بندش جتگ پاکستانی پوج ءَ ھزارانی کچ ءَ راجداریں باسک آوار جتگ ءُ بیگواہ کتگ انت وھدیکہ سدانی کچ ءَ باسکانی ژانگولیں جون چگل داتگ انت – پاکستانی پوج ءَ گل ءِ گوستگیں کمک سرکماش زاکر بلوچ ھم زورانسری آوار جتگ ءُ بیگواہ کتگ کہ آئی ءَ چاردہ سال پرگوستگ انت کہ ھنگت بیگواہ انت، ھمے وڈ گل ءِ گوستگیں بنجاھی انفارمیشن سکیریٹری شبیر بلوچ ءَ ھوار دگہ سدانی کچ ءَ راجداریں باسک زورانسری آوار جتگ ءُ بیگواہ کتگ انت کہ ھنگت پاکستان ءِ زندانانی تہ ءَ بندیگ انت –

گل ءِ جارکش ءَ وتی درشان ءِ گڈسر ءَ گوشتگ کہ میان استمانی انسانی ھکانی ادارہ وتی کتگیں گپانی سر ءَ بہ اوشت انت ءُ زاھد بلوچ ءِ زورانسری آوار جنی ءِ بگیری ءَ وتی کرد ءَ پیلو بہ کن انت ءُ زاھد بلوچ ءَ ھوار ھزاراں باسکانی یل کنائینگ ءَ پاکستانی ریاست ءِ سر ءَ زور بہ دئینت – جارکش ءَ گوشتگ کہ بلوچ نودربر گل آزاد ھژدہ مارچ دوھزار بیست ءُ سَے زاھد بلوچ ءِ زورانسری آوار جنی ءِ بگیری ءُ آئی ءِ یل کنگ ءِ ھاتر ءَ SaveZahidBaloch# ھیش ٹیگ ءِ سر ءَ چاگردی ترامجاھاں کمپئین کنت، ما چہ درسیں آجوئی لوٹوکیں سیاسی پاٹیاں ھوار ھر تک ءُ پھناتاں سیادی داروکیں مردماں گوں لوٹ کن ایں کہ کمپئن ءِ بھر جوڈ بہ بنت ءُ اشی ءِ سوبمند کنگ ءِ ھاتر ءَ وتی کرد ءَ پیلو بہ کن انت –

بلوچستان ءِ دمگی پنجگور ءَ ناشناسیں سلاہ بندان ءَ پاکستان ءِ پوجی یے پانگس گوں دستی بمب ءَ نشانگ کتگ ءُ وت تتکگ۔

اھوالانی در ءَ اُرش ءَ چہ پوجی ءَ را جانی تاوان ءِ گمان انت، انگت دان اے وئیل پدر نہ بیتگ۔

ھیال گور کنگ بہ بیت کہ اے ھند ءُ دمگاں ءَ بلوچ آجوئی لوٹوکیں سلاہ بندیں گَلانی زرمبشت برجاہ انت البتہ اے وئیل ءِ زمہ واری انگت ءَ ھچ کس ءَ نہ من اِتگ۔

ھمے وڑ ءَ بلوچستان ءِ دمگ ھرنائی ءَ ناشناسیں مردماں پوج ءِ واستا مڈی بروکیں گاڑی بمب ءِ نشانگ کتگ-

گیشین ھالانی رد ءَ ھرنائی ءِ دمگ شاھرگ ءَ ناشناسیں مردماں یک ٹریکٹرے بمب ءِ نشانگ کتگ ءُ تباہ کتگ-

ھالانی رد ءَ گوشگ بیتگ کہ تراک پوج ءِ نزیک ءَ بیتگ بلے ٹریکٹر ءَ پوج ءِ واستا مڈی گون بیتگ اَنت آ نوکیں پوسٹے ءِ جوڑ کنگ ءِ چن ءُ لانچ ءَ بیتگ-

زانگ بہ بیت پنچ روچ ءَ پیش ھم ھرنائی ءِ دمگ ھزارہ ڈیم ءِ ھند ءَ پوج ءِ واستا آپ بروکیں ٹریکٹر بمب تراکے ءِ نشانگ کنگ بیتگ ات کہ چریشی ءَ یک مردمے بیران ءُ سَے زدگ بیتگ ات اَنت-

اے اُرش ءِ زمہ واری بلوچ لبریشن آرمی ءِ جارکش جیئند بلوچ ءَ زرتگ ات کہ آئی ءَ گوشتگ ات پوج ءِ واستا آپ بروکیں ٹریکٹر ٹینکر آئی ای ڈی ءِ نشانگ کتگ-

جارکش ءَ گوشتگ ات کہ ما گوستگیں روچاں بیست ءُ شش فروری ءَ دمگی مردم بیھار ءُ سرپد کتگ انت کہ پوج ءِ واستا سامان مہ بر ات بلے آیاں اے کار داں انگت یل نہ کتگ ءُ گڑا ما گوشتگ اے وڑیں مردم وتی جان ءُ تاوانانی زمہ وار وت اَنت-

شیراز عادل آباد زندان ءَ بندیگیں بلوچے پاھو دیگ بیتگ-

سر بیتگیں ھالانی رد ءَ روکپتی بلوچستان ءَ بندوکیں بلوچے ماں ایران ءِ دمگ شیراز ءَ عادل آناد زندان ءَ بندیگیں یک بلوچے نشہ باپاری ءِ بھتام ءَ ایرانی آمیدگس ءِ ھکم ءَ پاھو دیگ بیتگ –

پاھو دیگ بیتگیں بیتگیں مردم ءِ پجار سی ءُ نُھ سالیگیں اھمد باجی زئی عمر ء لال مھمد جھمنند زاھدان ءِ نام ءَ زانگ بیتگ-

اھوالانی تہ ءَ گوشگ بیتگ کہ اھمد روکپتی بلوچستان ءِ بنجاھی شھر زاھدان ءِ نندوک اِنت ءُ آئی ءِ پشتپد ءَ پنچ زھگ ھست اَنت-

اھوالانی رد ءَ اھمد سال دوھزار ءُ ھژدہ ءَ ماں شیراز ءَ نشہ باپاری ءِ بھتام ءَ گرگ بیتگ ءُ آ دَہ مارچ ءَ ماں شیراز ءِ ھند عادل آباد ءَ پاھو دیگ بیتگ-

روکپتی بلوچستان ءَ مردمانی پاھو دیگ ءِ درچ یکشل ءَ برجاہ اَنت ءُ گوستگیں روچاں ایمنسٹی انٹرنیشنل ایران ءَ ھم لھتے بندیگیانی سر ءَ پاھو آیگ ءِ سر ءَ زھر ءِ درشان کتگ ات-