TBP Balochi

ایران ءِ بنجاھی شھر تھران ءَ چار سال ءُ ھپت ماہ ءَ بندیگیں سپیدہ قلیان دوبر بیگواہ کنگ بیتگ-

سپیدہ قلیان گوستگیں روچ ءَ تھران ءَ کساس سَے سد مِل ءِ دوری ءَ دوبر ایرانی چیریں ادارھاں آوار جتگ ءُ برتگ-

سپیدہ قلیان گوستگیں روچ ءَ زندان ءَ یل بیگ ءَ پد آئی ءَ خامنہ ای سرکار ءِ ھلاپ ءَ اوگام جتگ ءُ چریشی ءِ پژدر ءَ آ دوبر گرگ بیتگ-

شنگ بیتگیں تامر بنداں گندگ بیت اِنت سپیدہ قلیان ءَ بلوچی گُد گور ءَ اِنت ءُ خامنہ ای سرکار ءِ ھلاپ ءَ گوشگ اِنت زندان ءِ بندیگی ءَ ما ایرموش بوت نہ کن آں ھرچ ھساب ءَ ما ترا وتی زُلمانی ھساب ءَ گریں –

تامر بند ءَ آ پارسی زبان ءَ گوشگ ’ خامنہ ای ضحاکی کشیمت زیر خاک ‘ بزانکہ خامنہ ای تو ھما ھونواریں رسترے ما ترا ھاک ءِ چیر ءَ چہ کش ایں –

سپیدہ قلیان کہ گوستگیں روچ ءَ یل بیتگ ءُ آئی ءِ کھول ءَ زرتگ ءُ دیم پہ وتی ھند ءَ روگ ءَ بیتگ اَنت گڑا کساس سَے سد مِل چہ تھران ءَ دور ایرانی چیریں ادارھاں آوار جتگ –

سپیدہ قلیان کَے اِنت؟

سپیدہ قلیان ایران ءِ اُستان ھوزستان ءِ نندوک اِنت ءُ آ عرب ٹک ءَ سیادی داروک اِنت –

ھوزستان کجا اِنت؟

ھوزستان ایران ءِ زرباری رودراتک ءَ عراق ءِ سیمسر ءَ اِنت کہ اود ءَ نندوکیں مردم عرب اَنت –

سپیدہ قلیان کدی گرگ بیتگ ءُ چون گرگ بیتگ؟

سپیدہ قلیان چار سال ءُ ھپت ماہ ءَ پیش ما ھوزستان ءَ یک زھرشانی ءِ وھد ءَ گرگ بیتگ کہ اود ءَ یک شکر کمپنی ءِ کار کنوکاں وتی ھکانی واستا زھرشانی کتگ ءُ اود ءَ سپیدہ قلیان پہ اھولکاری ءِ دروشم ءَ آئی ءَ کار کنوکانی کمک ءَ رپورٹنگ کتگ ءُ چریشی ءِ پژدر ءَ آ رپورٹنگ ءِ وھد ءَ گرگ بیتگ ءُ آئی ءِ سر ءَ چار ھپت ماہ زندانی اتکگ بیتگ-

زانگ بہ بیت گوستگیں روچاں ایران ءَ یک جارے ءَ زندانیانی پھل کنگ ءِ جار جتگ ات کہ چریشی ءَ پد گمان کنگ بیت کہ آ ھمے لڑاں ھوار گیجگ ءُ یل کنگ بیتگ ءُ پد ءَ آئی ءَ زاندان ءِ گیٹ ءِ دپ ءَ بلوچی گُداں گوں اوگام جتگ ءُ پد ءَ تھران ءَ کساس سَے سد مِل دور گرگ ءُ بیگواہ کنگ بیتگ-

سعودی عرب ءِ وزیر ھزانہ مھمد الجدعان ءَ گوشتگ کہ (مملکت ایران) ءِ گون ءَ سپارتی سیادی ءِ گھتری ءَ پد گوں ایران ءَ سرجمی ءَ زرکاری باپار ءَ جاڑیگ اِنت –

سعودی عرب ءُ ایران ءَ گوستگیں آدینگ ءَ وتی سپارتی سیادی گھتر کتگ ءُ ھردوکیں ڈیھانی میان ءَ بند بیتگیِ سپارت جاھاں دوبر دو ماہ ءِ توک ءَ پچ کنگ ءِ جار پرینگ بیتگ اَنت –

عرب نیوز ءِ رد ءَ ریاض ءَ زرکاری ءِ پھناتاں برجم دارگ بیتگیں باپاری کانفرنس ءَ وزیر ھزانہ ءَ جست گرگ بیتگ کہ سعودی عرب کدی گوان ایران ءَ نام گروکیں زرکاری ءَ بندات کنت گڑا الجدعان ءَ گوشتگ سرجمی ءَ گوش آں –

سعودی وزیر ھزانہ ءَ گوشتگ کہ مئے مول ءُ مراد ھنچین دمگے ءَ اِنت کہ سرجم بہ بیت ما وتی مردمانی بنکی ھک ءُ آسراتیاں سرجم کنگ ءَ بروبر اِنت ءُ وشھال اِنت اے وڑ مہ بیت کجام سبب نیست اِنت اے مول ءُ مراد سرجم مہ بیت ایران مئے ھمساھگ اِنت ءُ آیوکیں سالاں ھم مئے ھمساھگ بیت اِنت-

ایران ءَ گچینی وھد اِنت ءُ ما آئی ءَ گچینی وھد دے دانکہ آ ھم پما وشنود بہ بیت –

مھمد الجدعان ءَ گوشتگ کہ دانکہ ھردوکیں نیمگاِ ھامکمیت ءُ گپ ءُ ترانی مسامانانی پاسداری کنگ بیت اِنت گڑا ھچ سبب نیست ھردوکیں ڈیھانی میان ءَ جاور ھراب بہ بنت من ءَ اے درگت ءَ ھچ اڑانک دیم ءَ آیگ ءَ نہ اَنت-

سر بیتگیں ھالانی رد ءَ روکپتی بلوچستان ءُ رودراتکی بلوچستان ءِ سیمسری ھند ءَ سیمسری پھزدارے زدگ بوگ ءَ پد بیران بیتگ-

گیشین ھالانی رد ءَ سرکاری رسانک ءِ رد ءَ ایرانی سیمسری پھزداراں یک درشانے ءَ گوشتگ کہ سیمسری پھزدار گشت ءَ بیتگ اَنت کہ اود ءَ ناشناسانی اُرش ءَ زدگ بیتگیں یک سپاھی ءَ وتی ساہ داتگ اَنت-

بیران بیتگیں پھزادار ءِ پجار مھمد رضا مقدم سبحانی جھمنند ماھشھر ءِ نام ءَ زانگ بیتگ –

ایرانی سیمسری پھزداراں اے پدر نہ کتگ کہ چون ءُ کجام جاہ ءَ ائی ءِ سر ءَ اُرش بیتگ –

زانگ بہ بیت ناشناساں نیمگ ءَ وھد وھد ءِ سر ءَ اُرش بوگ ءَ اَنت بلے اے اُرشانی زمہ واریان کس پہ وت ءَ زیرگ ءَ نہ اِنت ءُ نانکہ دگہ گلے دیم ءَ گندگ ءَ اتکگ –

بلوچستان ءِ دمگ ھاران ءَ گوستگیں روچ ءَ سھب وھد ءَ پوج ءَ ھاران ءِ دمگ ایری کلّگ ءَ جتائیں ھنداں بازیں لوگانی سر ءَ بیڑبرتگ، لوگاں پروشت ءُ پروش ءَ اَبید زالبول ءُ چُک لَٹ ءُ کُٹانی نشانگ کتگ وھدے کہ دو مردم آوار جنگ ءَ پد ناشناسیں جاھے ءَ برتگ-

بیگواہ کنگ بیتگیں مردمانی پجّار امجد آحمد ء بلال آحمد ءُ محمد قاسم ء حاجی کریم داد ناماں چہ بیتگ اَنت-

اِھوالکارانی رِد ءَ بیڑ وھد ءَ پوج ءَ لوگاں بیڑبرتگ وھد ءَ لوگاں لُٹ ءُ پُل ءِ میان ءَ جند سلاہ ، کلدار، سُھر ءُ دگہ گرانبھائیں مڈی ھم وتی ھمراھی ءَ برتگ اَنت گوں-

زانگ بہ بیت ھاران ءَ پاکستانی پوج ءِ دست ءَ 27 فروری ھاران ءِ دمگ گواش ءَ صلاح الدین سیاپاد لوگ ءَ بیڑبرتگ صلاح الدین آوار جتگ اَت، آوار جنگ وھد ءَ صلاح الدین سیاپاد سک لَٹ ءُ کُٹ ءِ نشانگ کتگ ءُ بے ھوشی جاور ءَ آ ھاران شھر ءَ دور داتگ-

آ کھول ءَ زوتاں الاج ھاتر ءَ شال ءَ برتگ ءُ اود ءَ آئی ءَ ٹپانی درد نہ سگ اِتگ ءُ بیران بیتگ-

بلوچستان ءِ دمگ کیچ ءَ سلاہ بندین مردماں یک گاڑی ءِ سر ءَ تیرگواری کتگ چریشی ءَ زالبولے بیران بیتگ-

تیرگواری ءِ وئیل کیچ ءِ دمگ کلاتک ءَ پیش اتکگ- پولیس ءِ رد ءَ چارشمبے ءِ بیگاہ ءَ بی ایریا کلاتک ءَ ناشناسیں مردماں کمبر پٹھان جھمنند ڈگاری کھن کہ آئی ءِ گاڑی ءِ سر ءَ ناشناساں تیرگواری کتگ ءُ چریشی ءَ کمبر ءِ لوگ بانک ءَ تیر ءِ لگگ ءِ سبب ءَ آ بیران بیتگ-

پولیس ءِ رد ءَ تیرگواری ءَ کمبر وت رک اتگ-

دمگی مردمانی رد ءَ کمبر پٹھان ءِ سیادی سرکاری پلامرزی کنوکیں گل ءِ مزنیں باسک راشد پٹھان ءِ براتزتک اِنت ءُ آ وت ھم ھمے سلاہ بندیں گلے باسک اِنت-

زانگ بہ بیت بلوچستان ءَ پوج ءِ سر ءَ سیاسی پھناتاں اے بھتام اِنت کہ پاکستانی پوج ءُ چیریں ادارھاں یک سلاہ بندیں گلے جوڑ کرتگ کہ آ چاگردی سلکاری ءُ دگہ کوش ءُ آوار جنیاں دزمانجن اِنت کہ ایشی ءَ لس نام ڈیتھ اسکواڈ ءِ نام ءَ زانگ بیت اِنت-

بلے تنی وھدی تیرگواری ءِ الکاپیں بابتانی درگت ءَ سرپدی نہ بیتگ اَنت-

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ نُھ سد ءُ ھشتاد ءُ سَے روچ سرجم بوتگ انت، چہ کوھلو ءَ مروچی میر بجار بخاری، رحمت مری، دوستین مری ءَ ھوار ھر تک ءُ پھناتاں سیادی داروکیں مردماں بنجل ءَ اتکگ ءُ دلپدردی درشان اِتگ –

ھمے وھد ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءَ گوشتگ کہ بلوچستان ھما کہ سیاسی جاور ھالاں آھاں دراہ سرپد انت، آوار جنی ءِ اے درچ 1948 بگر تاں روچ مروچی برجاہ انت، بلے اشی ءِ تہ ءَ سال دوھزار ءَ گیشی آرگ بوتگ کہ روچ مروچی برجاہ انت اگاں اے شری ءَ چار ءُ ٹپاس بہ بیت ءُ اشی میان استمانی ادارہ پٹ ءُ پول بہ کن انت اے بلاھیں زوراکی ءَ چہ کمتر نہ انت چوشکہ بیگواھیں بلوچ پرزندانی کچ اے وھدی ھزارانی کچ ءَ انت کہ در کانودی پاکستانی پوج ءَ آوار جتگ ءُ بیگواہ کتگ انت –

آئی ءَ گوشتگ کہ بلوچستانءِ کنڈ کنڈ ءَ بلوچ پرزند آوار جنگ بوگ ءَ انت بلوچستان ءَ چشیں گِسے پشت نہ کپتگ کہ اودا مردمے آوار جنگ ءُ بیگواہ کنگ نہ بوتگ – پاکستان ءِ نوکتریں ڈاکٹرائن کہ بلوچانی سر ءَ کارمرز بوگ انت آ ھمیش انت کہ پرایمنیں جھد ءَ مزھبی ءُ ٹکی زور ءَ کارمرز کنگ بوگ ءَ انت –

ماما قدیر بلوچ ءَ گوشتگ کہ کساس شست ھزار ءِ نزیک ءَ بلوچ ورنا آوار جنگ ءَ بیگواہ کنگ بوتگ انت بلے تنی وھدی ھچ جست پرس کنوک نیست، اے وڈیں انسانی ھکانی لگتمالی ءِ بگیری ءَ ایردستیں راجاں یک توار بوگ ءَ اوشتگی انت – بلوچستان ءَ سرکار ءِ مٹینگ یا نوکیں سرکارے ءِ آرگ مئے یکشلیں جھد ءَ داشت نہ کنت –

چاگردی ترامجاہ ءِ نامی ئیں ایپ پیس بک ءِ واھند کمپنی میٹا ءَ ھمے سال ءَ دَہ ھزار ملازمانی کشگ ءِ جار جتگ-

ھال سرکنوکیں روئٹرز ءِ رد ءَ اے دنیا ءِ اولی مزنیں ٹیکنالوجی کمپنی اِنت کہ چریشی ءَ انڈسٹری ءِ ھراب بوگ ءَ زرکاری ءِ دیمپانی ءِ سبب ءَ ملازمانی کشگ ءِ دومی درچ اِنت-

میٹا کمپنی ءِ شیئرز ءِ شش دراد گیش بوتگ بازیں کچے ءَ ملازمانی کٹوتی ءَ گل ءِ نوکتریں درشاندابے کہ ایشی ءَ نوکین پنچ ھزار ملازمانی شوربندی ھم ھلاس کنگ ءِ ھواری ءَ میانی تبک ءِ انتزامیہ ءِ ھم ھلاس کنگ بیت اِنت-

اولی درچ ءَ کمپنی ءَ گوستگین سال ءَ یازدہ ھزار ملازم کش اتگ ات اَنت کہ آیانی توک ءَ میٹا ءِ ورک فوس ءُ ملازمانی سیزدہ درسد بیتگ ات اَنت-

ایشی ءَ پیش کمپنی ءَ ھزارانی ملازم دارگ ءِ واستا گوشتگ اَنت سال دوھزار ءُ بیست ءِ کچ ءَ ورکرزانی کش دو کساس ءَ گیش بیتگ ات اَنت-

گیش بوتگیں شرہ ءَ سود ءِ سبب ءَ زرکاری ءِ ناگیگیانی گمان ءَ گوستگیں لھتے ماھاں امریکہ ءِ کارپوریٹ سیکٹر ءَ بازیں کچے ءَ ملازمانی کٹوتیانی یک درچے بندات کتگ ات – ٹریکنگ سائٹ ” لے آف ” ءِ رد ءَ ٹیک کمپنی ءَ سال دوھزار ءُ بیست ءُ دو ءِ بندات ءَ داں انیگ ءَ دو لک ءُ نود ھزار کار کنوکیں ملازم کش اتگ اَنت-

میٹا ءِ ملازمانی اے کساس ءَ کشگ ٹیکنالوجی سیکٹر ءَ جوانتریں رنگے ءَ چارگ ءَ اَنت-

گوشگ بیت اِنت گرانپروشی ءِ مشکلانی ھواری ءَ کمپنی ءَ اے وھد ءَ ڈیجیٹیل اشتھارات ءِ باپار ءَ کمی آیگ ءِ گمان اِنت وھدیکہ میٹا ءِ واھند مارک زکربرگ ءِ دیم ءِ شوربندی میٹا ورس ءَ ھم بازیں کساسے ءَ ھرچ بوگ ءَ اِنت-

سَے شمبے ءِ روچ ءَ یک کلوھے ءَ زکربرگ ءَ گوشتگ گیشتر نوکیں کٹوتیانی جار ءَ آیوکیں دو ماھانی توک ءَ کن آں ءُ لھتے ملازمانی پارگ کنگ داں سال ءِ گڈسر ءَ بیت اِنت-

زکربرگ ءَ نبشتہ کتگ کہ مئے کمپنی ءَ گیشتر رمس ءَ ما سال پہ سال ءَ کٹ ءُ کمائی کنگ ءَ دیستگ بازیں نوکیں شوربندیانی زرکاری ءَ مڈی بیتگ اَنت بلے گوستگیں سال ءَ مارا اے چیز ءَ آڑینتگ –

آئی ءَ گوشتگ کہ مارا اے راستی منگ لوٹ ایت کہ وت ءَ وت تیار کنگ لوٹ ایت نوکیں بازیں سالاں جاور ھمے وڑ بنت-

شیرانی زمین ءَ ودی بوتگیں شیرزال

نبشتہ کار: کندیل بلوچ

دی بلوچستان پوسٹ

لهتیں اَنچیں کِرد اَنت کہ تئی زمین ءِ دلبند ءَ روداَنت کہ تو آهانی کردارانی نویسگ ءَ سرجمیں تاک آں بِهلینے بلے آهانی هون ءِ ترمپْے ءِ هک ءَ ادا کُت نہ کن ئے ما گوستانک ءَ بِچاراِیں یا هما کومانی سرا چْم شانکّ بہ دے ئے کہ آهاں پہ وتی آجوئی ءَ چینچو گرانیں پند بُرِ اتگ واتوجهی ءُ شاتکامی بے جُھد ءُ بے جنگ ءُ بے هون ءِ ریچگ ءَ نہ رس ایت آجوئی چو هما درچْک ءِ وڑ ءَ اِنت پہ هون ءِ دئیگ ءَ بْر کنت ءُ سر سبز بیت مئے بلوچستان هما سرزمین اِنت کہ گنج ءُ دولتانی هزانگ اِنت هما سرزمین کہ هزاراں ڈیهاں وتی چم سکّ داشتگّ اَنت کُلیں آسراتیاں اَبید گُلامی ءِ سانکل نہ پُرشتگ اَنت ءُ مئے جُدائیں نوک بروتیں نوجواناں وتی گام اِے پاکیں زمین ءِ سر ءَ اِیر کُتگ اَنت گُڑا آیاں ءَ وتی گُلامی ءِ سما بوتگّ آیاں وتی زند ءِ سرجمیں وشی کُربان کُتگ اَنت ءُ پہ زمین ءِ پھازگّ ءَ رپتگ اَنت ءُ آیانی هر هون ءِ ترمپےْ ءَ را یک اُمیتے یکّ رژنے پیوست اِنت نمیران اَنت هما سر کہ آیاں پہ وتی راج ءُ ڈیھ ءَ مرگ ءِ کُچل پہ شات نوش اِتگ اَنت مرچی راج اِے دگنیا ءَ زِندگ اَنت همے پیمیں راج پھازانی داتگیں دیمھونیانی پَد ءَ چے-

او اے گْپ هم راستے کہ زمین ءِ هاتِر ءَ کُربان بوهوکیں سر منی کٹور ءِ پرُوشتگیں لّبزانی لوٹوک ءُ مھتاج نہ اَنت بلئے دل وار نہ دنت یا آهانی مزن جگری ءُ بے بیمی اِنت کہ آیانی بچکند ءُ جورجوابیاں پراموش کُت نہ کن انت ءُ پہ نویسگ ءَ لاچار بہ ایں- راج دپتر ءِ همُک تاک ءَ تو بہ لیٹین ترا همُک تاک ءِ سر ءَ پہ زمین ءَ کُربان بوهوکیں گنوکے ءِ نام الّم ءَ دست کپ ایت کہ تاک اِش گوں هنی ئیں هوناں شوشتگ اَنت همئے هون کہ تئی تاکانی سما کنگ ءَ ساری اندیمیں بُت ءَ را وتی وشبوه ءَ سر کن اَنت وشبوه ترا داں سیمسرے ءَ هوار بیت ءُ ترا پوهین اِت کہ ابید ءِ زمین ءِ اِشک ءَ آ دگہ همُکّ اِشک بے آسر اِنت بے اُمر اِنت زمین ءِ پهازگّ ءَ پہ بازیں سر کُربان بوتگّ انت همے داتگیں کُربانیانی تہ ءَ یکّ هستی ءِ “شیرزالیں شاری” اِنت کہ آئی ءَ وتی نُگْراهیں زِند پہ راج ءُ زمین ءَ بباد دات اَنت وهدے کہ هاک ءِ اِشک اِنسان ءَ را گوار بہ جنت گُڑا اِے اِشک ءَ را داں گُڈی سیمسراں کار ایت ءُ سر کنت-

او شارُل ءَ گوں زمین ءَ اِشک اَت آئی ءِ رگ ءُ بندانی تہ ءَ ڈیھ ءِ شیدائی یے هون تچّگْ ءَ اِت اَنت دو چُک ءُ وتی آسودگیں زِند ءِ یلّ کنگ آسانیں کار نہ اِنت بلئے اگاں کسے زمین ءِ اِشک ءَ شیدائی بہ بیت گُڑا آئی ءِ دیم ءَ نہ چُک کیت نہ لوگ ءِ مردم ءُ نہ کہ زند ءِ وشهالی ءُ آسودگی کاینت همے رنگْ ءَ وتن دیوانگْیں شارُل هم همے شیدائیانی لڑ ءَ هوار اَت آئی ءِ چمانی تہ ءَ بّس تھنا زمین گِندگ بوت پہ زمین ءَ شیدائی اَت پمیشکا آئی ءَ وتی زند ءِ سرجمیں وشی پہ زمین ءَ کولّیگ کُت اَنت شارُل ءَ تجنا پہ وت ءَ نہ جیڑ ات آئی ءَ وتی زند ءِ وشی ءُ لِزت درُست شمُشت اَنت پہ زمین ءِ پهازگّ ءَ رپّت بلّکیں آئی ءَ همے جیڑ ات منی راج گُلام اِنت منی راج گُژنگ اِنت منی راج زالّم ءِ زُلمانی دیمپّان اِنت منی جند ءِ سرزمین ءِ سر ءَ منی راج ءِ پُسگ گار ءُ بْیگّواه کنگ بوگ ءَ اَنت هروچ پوه ءُ شیواریں ورنایانی جون تلام اَنت نودربرانی وانگجاه پلیت ءَ وتی بُنجل جوڑ کُتگ اَنت یک یک ءَ نودربراں بیگواه کنگ ءَ اِنت او نہ چہ دژمن ءِ هونی ئیں پنجگاں مئے مات ءُ گوھار رکیتگ اَنت نیکہ کسان سالیں تپل آئی ءَ همے هاتِر ءَ درُست یکّ کِر کُت اَنت او بّس تھنا راج ءُ زمین ءِ درد دیما آورت اَنت-

شارُل ءِ پِگْر ءُ سسا چو بلوچستان ءِ کوھانی وڑ ءَ مُهکم اَت پمیشکا آئی ءِ دل ءَ هچْ رنگّیں تُرس ءُ بیم نیست اَت کندان کندان ءَ وتی ساه ءِ پہ زمین ءَ ندر کُت او راج دپتر ءَ نوکّیں شارُلے بکّشات ءُ لگْوریں دژمن ءِ دل ءَ یکّ تُرسے اِیر کُت گوں وتی اَبدمانیں کِرد ءَ شاری ءَ تیوگیں راج ءَ را همے کُلوه دات چہ گُلامی ءِ سانکلاں اگاں وت ءَ رکینگ لوٹ ئے گُڑا دیمهونی دئیگ الّمی اِنت اِے هاک ءِ سر ءَ هر پُسگے هست آئی ءِ پرز اِنت پہ راج ءُ زمین ءَ-

کُربانی بہ دنت گوں جُد ءَ همگرنچ بہ بیت مرچی راج پہ وتی شاری یے سراں پھر بندگ ءَ اِنت شاری هما کِرد ءِ واهند اِنت کہ مروچی آئی ءِ گراں بهائیں کرد سرجمیں جھان ءَ چو روچ ءَ درپشگ ءَ اِنت چو وشبوه ءَ گوں کوش ءِ لھمیں شیکگاں هوار اِنت ءُ ڈیھ ءِ همُک کوه ءُ کوچگاں تالان اِنت شاری ءَ گوں سرڈگار ءَ مهر اَت آئی ءِ ریتکگیں هوناں پہ هزار شاریاں راه پچ کُتگ لگوریں دژمن ءَ را تُرسے آماچ کُتگ مرچی دژمن بلوچ راج ءِ همُک جنک ءَ شاری ءِ رنگ ءَ گندیت ءُ الاهوش بیت اِے پیمیں هزاراں کارست آں آیاں وتی هون پہ زمین ءَ ریِتکگ اَنت ءُ هآک وتی وارس ءُ راج وتی پھازوکاں بے ھیال نہ کنت سال ءُ سن هر چیز بو گوز انت وهد بہ مٹ اَنت آیانی کارپد پہ آوکیں اوبادگاں سِکین بنت راج وتی راج پھازوکّیں سرں پہ شرپے گیر کار ایت اِے زمین پہ وتی ملّیں سراں پھر بند اِت پہ اِے زمین ءَ هزاراں سر کُربان بوتگّ اَنگت وتی سرانی کُربان کنگ ءَ چکّ ءُ پد نہ بنت زمین وتی شیدا ئیں سرں بِھ شمُشکار نہ بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

چین ءَ سَے سال ءَ پیش کورونا وائرس ءِ تالان بوگ ءَ پد اولی رند ءَ درملکی تر ءُ تاب کنوکانی واستا وتی سیمسرابی پچ کنگ اِنت ءُ چار شمبے ءَ بزانکہ مروچی دراھیں کیٹیگریزانی واستا ویزے پچ کنگ بنت –

برطانیہ ءِ ھال سرکنوکیں روئٹرز ءِ رد ءَ چینی واکداراں گوستگیں ماہ ءَ کورونا وائرس ءِ ھلاپ ءَ سوبمندی ءِ جار جتگ ات ءُ اے پیش گامی ھما درچ ءِ بھر اِنت-

بلے تر ءُ تاب کنوکی ءَ سیادی داروکیں زانتکارانی گوشگ اِنت چین ءَ تر ءُ تاب کنوکیں مردم سرجمی ءَ ایمنی ءَ گھتری کار آورت کن اَنت زرکاری ءَ گھتر کن اَنت ءُ ایشی ءِ کساساں دوھزار ءُ نوزدہ ءَ تر ءُ تاب کنوکانی کساس 0.9 بیتگ-

بلے تر ءُ تاب کنوکانی ویزہ ءِ واستا چین ءِ پچ بیت اِنت، چین ءَ آسٹریلین چیمبر آف کامرس ءِ سروک واؤگھن باریر ءَ گوشتگ کہ درملکیانی دراھیں وڑ ءُ پیمیں ویزایانی پچ کنگ ءِ جار ءَ جن ایں آسٹریلوی ءِ دراھیِن باپاری مھلوک ءِ واستا نپ اَنت آ اد ءَ اتکگ کن اَنت ءُ باپار کت کن اَنت-

چین ءَ درملکاینی تر ءُ تاب ءِ ایونٹ پچ بوگ ءَ اِنت چریشی ءَ چائنا ڈیویلپمنٹ فورم ءِ ھمے ماہ ءِ گڈسر ءَ بیجنگ ءَ بیت اِنت ءأ شنگائی آٹو شو اپریل ءَ برجم دارگ بیت اِنت-

ایشی ءَ ابید چار سالاں یک رندے پد ءَ بوھوکیں ایشیشن گیمز رودراتکی شھر ھینگ زو ءَ ستمبر ءَ بوگ ءَ بیگ ءَ اِنت کہ اود ءَ گوستگیں سال ءَ کورونا وبا ءَ اوشت ءِ آماچ کتگ ات-

بلے چین ءِ انٹرنیشنپ ٹریول سروسز ءِ یک کارندے ءَ نام پدر نہ کرتگ ءُ روئٹرز ءَ گوشتگ کہ چین ءِ تر ءُ تاب ءِ واستا چین نی دوستیگیں جاہ نہ اِنت –

باپاری تکاں چارگ بہ بیت گڑا کرونا ءَ پد اے درملکیاں یک تباکنے جوڑ بیتگ ءُ باز کمی گندگ ءَ اتکگ پرچاکہ اد ءَ سیاست ءِ جھل ءُ برزیانی سر ءَ مھلوک ترس آماچ اِنت-