TBP Balochi

بلوچستان ءِ دمگی ھَند خاران ءَ تیرگواری چہ چُکے ھوار یک مردمے زدگ بیتگ۔

گیشیں ھالانی ءِ در ءَ ناشناسیں مردمے لوگ ءِ تہ ءَ پُترتگ ءُ تیرگواری کتگ کہ آئی سوب ءَ یک مردمے ءَ ھوار چُکے زدگ بیتگ۔

بنشون ءِ در ءَ رونیمروچ ءِ ساھت ءَ خاران شھر کُہنین کبرستان ءِ میتگ ءَ ناشناسیں مردمے عطاء اللہ نام ءِ مرد ءِ لوگ ءِ پُترتگ ءُ تیرگواری کتگ چہ تیرگواری سوب ءَ خان محمد ءِ عطاءاللہ ملازئی نام ءِ مردمے بے کساس زدگ بیتگ، تیرگواری وج ءَ کسانی سالی چُک اوں آتکگ ءُ زدگ بیتگ کہ پہ درمان ءِ ھاتر ءَ سول نادرھجاہ خاران ءَ برگ بیتگاں۔

پولیس نادرھجاہ رستگ ءُ پٹ ءُ پول بندات کتگ۔ البتہ انگت ءَ تیرگواری سوب زانگ نہ بیتگ۔

بلوچستان ءِ دمگ بولان ءَ مروچی دوشمبے ءَ پنچمی روچ ءَ ھم پاکستانی پوج ءِ لشکر کشی برجاہ بوتگ –

دی بلوچستان پوسٹ ءِ پتر ءَ سربوتگیں ھالانی رِد ءَ بولان ءَ مروچی پنچمی روچ ءَ ھم پاکستانی پوج ءِ لشکر کشی برجاہ بوتگ –

دمگی ھالانی رِد ءَ بالگرداں مروچی ھم تر ءُ تاب کتگ وھدیکہ بازیں ھند ءُ دمگاں تیرگواری ءُ تراکانی ھم توار بوتگ بلے تنی وھدی ھچ وڈیں تاوانانی ھال نیست –

ھالانی رِد ءَ بزگر، ہنجیر ءُ کش ءُ گوری دمگاں پوج ھنگت ساڑی انت ءُ اے دمگاں بازیں جاہ ءَ پاکستانی پوج ءَ وتی ادارکی بنجل جوڈ کتگ انت –

لشکر کشی ءِ بندات گوستگیں روچاں کنگ بوتگ کہ اودا بالگردانی کمک ءَ بازیں جاہ ءَ پوجی ایر گپتگ انت –

لشکر کشی ءِ درگت ءَ تنی وھدی واکدارانی نیمگ ءَ ھچ وڈیں ھبر شنگ کنگ نہ بوتگ وھدیکہ دمگ ءِ انگر ءِ سوب ءَ ھچ وڈیں جانی ءُ مالی تاوانانی ھال سر بوگ ءَ نہ انت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ چار ھزار ءُ نُھ سد ءُ ھشتاد ءُ ھشت روچ سرجم بوتگ انت – ھمے وھد ءَ بی ایس او ءَ ھوار دگہ نودربر گلانی رھشوناں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچستان ءِ تہ ءَ مزور، نودربر، استاد، شائر ءُ زالبول بلوچ جھد ءِ پژدر ءَ زورانسری آوار جنگ ءُ بیگواہ کنگ بوگ ءَ انت –

آئی ءَ گوشتگ کہ ریاست بلوچ راج ءِ دلانی تہ ءَ ترس پیدک کنگ ءِ ھاتر ءَ وتی درسیں وسیلھاں کارمرز کنگ ءَ انت – بلے مروچی راجی جھد چہ ترس ءَ باز دور وتی منزل ءَ سر بوان انت اے وڈیں ریاستی ھُنر بے سوب بوتگ انت بلے ھو آھانی دمگی افسر اے وڈیں دورگیں درشاناں وتی پوزیشن ءُ آرامی ءَ گیش کنگ ءَ انت بزاں نوں دست گوشیں راج ءِ پرزندانی ھوناں چہ پاکستانی پوج ءُ آھانی چانیگ وارانی زھگ وشھال انت – اے وڈیں دروگیں درشانانی دیگ ءَ بس وتی بے سوب بوتگیں پوج ءِ ھوسلہ ءَ گیش کنگ ءُ وتی دیمروئی ھاتر ءَ راھانی تچک کنگ ءَ ابید دگہ ھچ نہ انت –

آئی ءَ گوشتگ کہ بولان ءَ.مروچی پنچ روچ انت لشکر کشی برجاہ انت پوج بمبگواری، کشت ءُ کوش ءُ زورانسری آوار جنی ءَ پد آھاں سرمچار زاھر کنگ ءُ شھید کنگ ءَ انت ءُ چہ اے پوج ءَ اے کارانی کنگ ءَ ابید ما دگہ ھچ امیت داشت نہ کن ایں –

ماما قدیر بلوچ ءَ گوشتگ کہ پاکستان ءِ چیریں ادارھاں زورانسری آوار جنگ بوتگیں زھگ ناشرکار گوشتگ انت – سوبائی سرکار ءَ ھم چہ اے کئور ءَ شری ءَ وتی دست ششتگ انت –

انسانی ھکانی کمیشن پاکستان ءِ چیردستی ءَ “مکران ءَ آزاتی ءَ گوں وتی ھیالانی درشان کنگ ءِ جاور ھال ” بنگپ ءِ سر ءَ ماں تربت پریس کلب ءَ مراگش ءِ برجم دارگ بوتگ، کہ اودا سیاسی، چاگردی، لبزانکی ءُ دینی مردماں مزنیں کچے ءَ بھر زرتگ –

ایچ آر سی پی ءِ ریجنل کوآرڈینیٹر ءُ نامداریں لبزانت پروفیسر غنی پرواز ءَ مراگش ءَ تران کنان ءَ گوشتگ کہ آزاتی ءَ گوں ھیالانی درشان کنگ ءِ مول مراد زبان، نبشتانک، گوشتانک ءُ آرٹ ءِ دروشم ءَ وتی ھیالاں اخلاقی دائرہ ءِ تہ ءَ درشان کنگ، اشی ءِ شری ایش انت کہ یک ءُ دومی ءِ پگر ءُ ھیال ءِ زانگ ءَ کمک رسیت، اشی وتی گوستانک ءِ ھست، گوستگیں زمانگ ءَ آزاتی ءَ گوں وتی ھیالانی درشان کنگ ءِ سر ءَ ھچ وڈیں بندش نہ بوتگ –

آئی ءَ گوشتگ کہ گلام دارگ ءِ چاگرد ءِ جوڈ کنگ ءَ پد اشی ءِ سر ءَ بندش جنگ بوتگ، ھاکماں لس مردمانی درشان ءِ سر ءَ بندش جتگ بلے پدا ھم بازیں وھداں اوپار کنگ ءَ بد چاگرد ءَ گھیگری کتگ وتی آزاتی ءِ ھاتر ءَ دیمھونی دیگ ءِ دراجیں درچ ءِ بندات کتگ ، اسپارٹکس، سقراط، برونو، منصور حلاج، جون آف آرک، قرہ العین، ابراہیم لنکن، مہاتما گاندھی، اندرا گاندھی، نوروز خان، لالا عثمان کاکڑ ءِ وڈیں پھتویں مردماں وتی جانانی دیمھونی داتگ –

آئی ءَ گوشتگ کہ پاکستان ءِ تہ ءَ بس یک سالے ءِ میان ءَچِل ءُ شش اھوالکار شھید کنگ بوتگ، ھژدہ زدگ کنگ بوتگ ءُ چار بیگواہ کنگ بوتگ انت ءُ اے جنگ ھنگت برجاہ انت، دیمروئی کنوک ءُ زانتکاریں چاگرداں چہ اے دیمھونیاں بازیں دیمروئی ءِ کتگ بلے ھما جاہ ءَ کہ دیمروئی گام سست بوتگ انت اود ءِ جاور ھنگت ھما انت ھچ شر نہ بوتگ انت کہ آھانی تہ ءَ پاکستان ھم ھوار انت – یورپ ءُ امریکہ ءَ بگیر ایشیا ءِ تہ ءَ ھم بازیں ڈیھاں چہ ایشی ءَ پائدگ چست کتگ ءُ سیکولر جمہوری نزام جوڈ کتگ ءُ سیاسی، چاگردی ءُ دودمان ءَ دیمروئی کتگ –

بی این پی عوامی ءِ بنجاھی رھشون خان محمد جان گچکی ءُ سوشل ورکر ڈاکٹر سمی بلوچ ءَ گوشتگ کہ مئے ملک ءِ تہ ءَ آزاتی بس یک نامے، اے وھدی کہ اھوالکاری ھما جاورانی تہ ءَ انت ھچبر نہ بوتگ، کانود ءِ سھارہ زورگ بوتگ ءُ ٹی وی ءُ رسانکدرانی سر ءَ بندش جنگ بوتگ، بازیں اھوالکار ءِ بندیگ انت وھدیکہ پوجی زوراکی ءِ وھد ءَ اھوالکار جنگ بوتگ انت، چہ تربت ءَ رزاق گُل ءُ الیاس نظر شھید کنگ بوتگ انت کہ آ اھوالکار بوتگ انت –

ڈپٹی ڈائریکٹر سوشل ویلفئیر قدیر لقمان ءَ تران کنان ءَ گوشتگ کہ برتانیہ ءِ کالونی ھیسیت ءَ ھاکمانی بگیری ءَ درشان دیگ بندش بوتگ، مروچی ھم جھان ءِ تہ ءَ آزاتی مھدود انت انسان ءَ اے ھک نیست کہ ھرچی آئی ءِ دل ءَ کئیت دومی ءِ دلچل بہ کنت – ھک ءُ پرز ءِ میان ءَ ھما لکیر ھست انت آ پھمگ بہ بیت ءُ وتی ھک کارمرز کنگ بہ بیت –

چاگردی باسک شگراللہ یوسف ءَ ھوار مکران بار ایسوسیشن ءِ رھشون رستم جان گچکی، ماجد صمد، عبدالمجید ایڈوکیٹ دشتی ءَ وتی ھیال درشان کتگ ءُ گوشتگ کہ ھر وھد ءَ ھر چاگرد ءِ تہ ءَ مردماں وتی ھیالانی درشان کنگ ءَ اڈاند یا دلسیاھیانی دیمپانی کنگ کپیت گڈا انسانی ھک ءُ چاگردی زانت مھدود بیت، اودا پریس سلف سنسر شپ ءِ جنگ ءَ لاچاری بیت –

شگراللہ ءَ گوشتگ کہ مکران ءَ انسانی ھک ءُ آزاتی ءَ گوں ھیالانی درشان کنگ ءِ بندش وشیں گپ ءِ نہ انت –

بلوچستان ءِ گرانھادی ءَ مھلوک ترس ءِ جاوراں گوں دچار کتگ –

یک نیمگ ءِ چہ سرکار ءِ نیمگ ءَ ھمک روچ وردنی چیزانی نھاد گیش کنگ بیت ءُ دومی نیمگ ءَ دکاندار نھاد ءَ گیش زر گر انت چریشی ءَ لس مردم دلسیاہ انت -.

گرانھادی ءِ سوب ءَ بلوچستان ءِ بنجاھی شھر شال ءَ ھوار ایندگہ شھر ءُ کوچگاں وردنی چیزانی نھاد روچ پہ روچ گیش بوگ ھمک روچی کار ءِ جوڈ بوتگ ءُ ھمے وڈ دکاندارانی نیمگ ءَ ھم ھمک روچ چیزانی گران کنگ – گوشت، شیر، دھی ءُ سبزیانی نھاد سک باز انت –

اے چیزانی گرانھادی ءَ پہ لس مردماں اے چیزانی زورگ دوریں گپ یے –

دمگی مردمانی گوشگ انت کہ ادا ھر چیز ءِ نھاد گیش بوتگ، گرانھادی ھمینچو گیش بوتگ کہ جست کنوک نیست، ھر یک دکاندار ءِ جتا یک نھادے ءُ واکدار ھچ وڈیں گامگیج زورگ ءَ نہ انت –

دمگی مردمانی رِد ءَ ادا جست کنوک نیست، دکاندار ءِ مرزی انت ھر ھما ریٹ ءَ آ وت بھا بہ کنت – گرانھادی ءَ بزگر سرین پروش کتگ انت، دکاندارانی من مانی برجاہ انت، نھاد ءِ گیش کنگ ءِ بگیری ءَ ناں دمگی واکدار گامگیج زورگ ءَ انت ءُ ناکہ پرائس کنٹرول کمیٹی گندگ ءَ کئیت –

شال ءِ اسسٹنٹ کمشنر عطا المنعیم ءِ گوشگ انت کہ ما کاروائی کنگ ءَ انت، دکاندار دزگیر کتگ انت آ جرمانہ ھم کتگ انت ءُ اشی ءِ ھمراھی ءَ انجمن تاجران ءِ گوم ءَ گند ءُ نند ھم کنگ ءَ انت تانکہ لس مردماں رلیف بہ رسیت – بلوچستان ءَ واکدارانی تہ ءِ پرائس کنٹرول گرانھادی ءِ گر ءُ دار ءَ بے سوب گندگ آیگ ءَ انت –

مالی زانتکارانی گوشگ انت کہ اے دراھیں چیز جوانیں شور بندیاں گوں گیش گیوار کنگ بہ بنت تانکہ بزگریں مردماں زندگ بوگ ءِ ھک دیگ بہ بیت –