TBP Balochi

بلوچستان ءِ دمگ کیچ ءَ پاکستانی پوج ءَ یک ورنایے آوار جنگ ءَ پد بیگواہ کرتگ-

آوار جنگ بیتگیں ورنا ءِ پجار جھانزیب ء فضل ءِ نام ءَ زانگ بیتگ کہ عطا شاد ڈگری کالج ءِ نودربرے-

دمگی مردمانی رد ءَ نودربر پوج ءَ گوستگیں روچ ءِ ساھت دو ءَ ترطت آبسر ءَ ھاتم جنرل اسٹور ءَ آوار جتگ ءُ برتگ-

دمگی مردمانی گوشتگ جھانزیب فرسٹ ائیر ءِ نودربرے ءُ پوج ءَ گپتگ کہ آ وتی موکلانی وھد ءَ ھاتم جنرل اسٹور ءَ کارا بیتگ-

شال ءِ دمگ نیوکاھان ءَ ناشناسیں مردماں یک لوگے ءَ دور کتگ ءُ یک مردمے کُشتگ ءُ پشت مانداتگ ءُ شتگ اَنت-

گیشیں ھالانی رد ءَ شال ءَ مری ٹک ےِ آبادی ءِ ھند نیو کاھان ءَ گوستگیں شپ ءَ ناشناں مردم یک لوگے ءَ دور کتگ ءُ اود ءَ گوں کارچاں یک مردمے کشتگ-

کشگ بیتگین مردم ءِ پجار شادو مری ء ھاجیان مری جھمنند نیوکاھان شال ءِ نام ءَ زانگ بیتگ –

اُرشکاراں اُرش ءَ پد تتکگ ءُ شتگ اَنت کوش ءِ سبب زانگ نہ بیتگ، دمگی مردمانی رد ءَ کُشگ بیتگیں مردم ءِ یک بچے گوست ءَ پاکستانی پوج ءُ چیریں ادارھاں آوار جتگ ءُ بیگواہ کتگ کہ تنی وھدی بیگواہ اِنت-

روکپتی بلوچستان ءِ دو جتا جتائیں جاھاں کساس پنجاہ ءُ پنچ مردم دگ ءِ وئیل ءِ آماچ بیتگ اَنت ءُ چریشی ءَ چل ءُ یک مردم زدگ بیتگ اَنت-

سر بیتگیں ھالانی رد ءَ گوستگیں شپ ءَ روکپتی بلوچستان ءِ دمگ ایرانشھر ءَ یک مساپر بریں کوچے وئیل ءِ آماچ بیتگ کہ چریشی ءِ سبب ءَ سَے مردم بیران ءُ چل زدگ بیتگ اَنت-

ایرانشھر ءِ پری ھاسپٹل ایمرجنسی ڈیپارٹمنٹ ءِ سروک ءُ ایرانشھر یونیورسٹی آف میڈیکل سائنسز ءِ ایمرجنسی ءِ مینیجر ایراندگانی ءَ گوشتگ کہ ایرانشھر ءَ دیم پہ نیکشھر ءَ روکیں مساپر برین کوچ بزپیران ءِ اسٹیشن ءِ نزیک ءَ کلٹی بیتگ ءُ چریشی ءِ سبب ءُ سَے مردم بیران ءُ چِل مردم زدگ بیتگ اَنت-

آئی ءَ گوشتگ کہ اے وئیل ءَ زدگ بوتگیں مردمانی چست کنگ ءِ ھاتر ءُ یازدہ ایمبولینس دیم دیگ ءُ زدگ بیتگیں مردم ایرانشھر ءَ خاتم الانبیاء ھسپتال ءَ آرگ بیتگ اَنت-

ایشی ءَ ابید یک دگہ وئیلے ءَ دو گاڑیانی ٹکر ورگ ءَ یازدہ مردم بیران ءُ یکے زدگ بیتگ-

ھالانی رد ءَ روکپتی بلوچستان ءِ بنجاھی شھر زاھدان ءَ دو گاڑیاں ٹکر وارتگ ءُ چریشی ءَ یازدہ مردم ھما جاہ ءُ بیران ءُ یکے زدگ بیتگ-

زانگ بہ بیت ایران ءَ نوکیں سال پہ مھلوک ءَ ھم اجلے ءَ گوں بندات بیتگ کہ چریشی ءَ مردمانی موکل ءَ مھلوک وتی پھریز ءَ چہ نادلگوش بیت اِنت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں بلیدہ ءُ ھُزدار ءَ دو جتائیں اُرشاں زورگریں پاکستانی پوج ءُ آئی ءِ چاریگ نشانگ کتگ اَنت جانی ءُ مالی تاوان دیمپان کتگ اَنت-

جارکش ءَ گْوشتگ کہ مئے سرمچاراں کیچ ءِ دمگ بلیدہ، گلی ءَ زورگریں پاکستانی پوج ءِ یک کاروانے ءِ چیرکتگیں بمبے ءَ گوں نشانگ کتگ ، سرمچاراں دُژمنیں پوج ءِ کاروان ءَ ھوار یک گاڑی یے ھما وھد ءَ نشانگ کتگ وھدے آ شپ ءِ وھد ءَ تر ءُ تاب کنگ ءَ بیتگ اَنت-

تراک ءِ نشانگ ءِ آھگ ءَ چہ گاڑی ءَ سوار چار کارندہ ھما دمان ءَ مرتگ اَنت وھدے کہ دو ٹپی بیتگ اَنت-

جیئند بلوچ ءَ گْوشتگ کہ دگہ یک اُرشے بی ایل اے ءِ سرمچاراں 19 مارچ 2023 ءَ ھُزدار ءِ دمگ کھنڈ ءَ زورگریں پاکستانی پوج ءُ چیریں ادارھانی یک چاریگے ، گوستگیں ڈائریکٹر ریڈیو پاکستان سلطان احمد شاھوانی ءِ سر ءَ دستی بمب ءَ چہ اُرش کتگ، اے مرد ایم آئی چیردستی ءَ ھُزدار شھر ءِ کش گوراں پُرکار اِنت ءُ زورگریں پوج ءِ گوشگ پد ءَ سرکاری مراگشاں برجم دار اِیت –

آئی ءَ گْوشتگ کہ اے مرد سر ءَ بمب اُرش یک بیھارے ءِ ھساب ءَ کتگ، سرمچاراں تراک ءَ جانی تاوان دیگ ءَ پھریز کتگ- سلطان احمد شاھوانی ءُ آئی ءِ ھمکاراں گوشگ لوٹ ایں کہ آ وتی بلوچ بگیر پُرکارے آں دستکش بہ بنت اگاں مئے دیمتریں اُرش تُرند بیت-

گُڈی ءَ آئی ءَ گْوشتگ کہ بلوچ لبریشن آرمی اے دوئیں اُرشانی زمہ واری ءَ منّ اِیت- ءُ ما اے اِھد کن ایں کہ دُژمنیں پوج ءِ دراھگ ءَ تاں مئے اُرش برجاہ بنت-

سعودی عرب ءَ رمزان ءِ نوک گندگ نہ بیتگ ءُ اولی روچگی پشمبے ءَ بیت اِنت-

ریاض ریجن ءَ رسدگاہ ءَ جار پرینگ بیتگ کہ ڈیھ ءَ رمزان ءِ نوک گندگ نہ بیتگ یکم رمزان بیست ءُ سَے مارچ ءَ بیت اِنت –

تمیر رسدگاہ ءَ ھم گوشگ بیتگ کہ تمیر ءِ ھند ءَ مروچی رمزان ءِ نوک گندگ نہ بیتگ –

عرب میڈیا ءِ رپورٹ ءِ رد ءَ گوشگ بیتگ کہ سعودی سپریم کورٹ ءَ نوک ءِ گڈی درشان داتگ-

عرب میڈیا ءِ رد ءَ سعودی عرب ءَ دہ جاھاں رویت ھلال کمیٹی برجم دارگ بیتگ اَنت-

سعودی ءِ زانتکاراں مروچی رمزان ءِ نوک ءِ گندگ ءِ گمان کتگ بیتگ-

ایشی ءَ پیش رکن رویت ھلال کمیٹی ءِ عبداللہ الخضیری ءَ گوشتگ کہ گیشترین جاھاں اسلامی ڈیھاں نوک ءِ گندگ ءِ گمان نیست اِنت-

بلوچستان ءِ دمگ چہ ھاران ءَ سیادی داروکیں بیگواھیں شاہ فہد بلوچ ءِ گھار نادیہ بلوچ ءَ مروچی شال ءِ پریس کلب ءَ گوں اھوالکاراں تران کنان ءَ گوشتگ کہ منی برات شاہ فہد کہ آئی ءِ اُمر بیست ءُ دو سال انت ءُ قرآن پہ دل یاد انت آ پاکستانی پوج ءَ شانزدہ مارچ سال دوھزار بیست ءُ دو چہ ھاران بابو محلہ ءَ مئے گِس ءَ سی ٹی ڈی ءِ کارمنداں زورانسری آوار جتگ ءُ بیگواہ کتگ –

نادیہ بلوچ ءِ رِد ءَ منی برات ءِ یل کنگ ءَ نہ انت ءُ پدا مارا مدام بیھار دیگ ءُ ترسینگ ءَ اَنت کہ شما توار چست مہ کن اِت – پولیس ءِ ایپ آئی آر ءُ پہ زور بیگواھیں مردماں برجاھیں کمیشن ءَ سی ٹی ڈی ءِ نام ءَ در کن اِت ءُ ناشناسیں مردمانی نام ءَ بہ دے اِت –

نادیہ بلوچ ءَ گوشتگ کہ منی برات ءِ چم دیستیں گواھانی دیم ءَ سی ٹی ڈی ءَ چہ گس ءَ زورانسری آوار جتگ ءُ بیگواہ کرتگ -اے وھد ءَ پَٹ ءُ پول کنگ ءِ نیمون ءَ چہ مئے گِس ءَ ھپتاد ھزار کلدار ءُ دگہ گرانھادیں سامان دز اتگ اَنت -چدو پیسر شاہ فہد منی مستریں برات غلام فرید ءِ ھواری ءَ بیست ءُ شش اگست سال دوھزار شانزدہ ءَ ھم آوار جنگ بوتگ انت کہ آ وھد ءَ شاہ فہد ءِ امر پازدہ سال بوتگ کہ پدا لھتیں روچاں پد یل داتگ ءُ مستریں برات داں سے سالاں بیگواھی ءَ پد یل کنگ بوتگ –

آئی ءَ گوشتگ کہ مئے کھول مدامی ریاستی زوراکیانی دیمپان اِنت- ایف سی ءِ کرنل ءَ ھاران بنجل ءَ لوٹائینت ءُ سی ٹی ڈی ءِ ساڑی ءَ بوھگ ءَ بیھار دنت ءُ کڈن کنت کہ سی ٹی ڈی ءِ بگیری ءَ وتی بْرات ءِ آوار جنی ءَ نام ءَ مدے، دومی نیمگ ءَ پولیس ءِ گوشگ اِنت وتی ارزی ءَ ناشناسیں مردمانی نام ءَ نبشتہ کنائین –

آئی ءِ گوشگ اِنت کہ ما اے ملک ءِ جھمنند ایں ءُ مارا زند گوازینگ ءِ کانودی ھک ھست، ما چہ بنجاھی واکداراں جست کن ایں کہ آ مارا انساپ دات کن اَنت؟

“ما پہ وتی بْرات ءِ یل کنائینگ ءَ راھبند ءُ کانود ءِ درسیں در کامرز کرتگ اَنت۔ کمیشن ءُ آمیدگس ءَ مدام پیش بوتگ ایں، زھرشانی ءِ درسیں راہ چکاس اِتگ اَنت۔ گوستگیں سال ءَ ریڈ زون ءَ بوتگیں زھرشانی ءَ ھم ھوار بوتگیں، گُڈی ءَ مارا ھمے گوشگ بہ بیت کہ مئے میار چے اِنت ما یکجاھی سزا ءِ نشانگ بوگ ءَ انت؟

گڈسر ءَ آئی ءَ لوٹ کتگ ءُ گوشتگ کہ منی برات شاہ فہد دیم ءَ آرگ بہ بیت، اگاں آئی ءِ سر ءَ ھر وڈیں کتکاری یا بھتامے ھست ملک ءِ کانودانی ءِ رد ءَ آمیدگس ءَ پیش کنگ بہ بیت ءُ مئے گوم ءَ انساپ کنگ بہ بیت –

بلوچستان ءِ دمگ کولواہ ءَ لشکر کشی ءَ پاکستانی پوج ءِ دست ءَ کماشے کُشگ بیتگ ءُ دو براتاں ھوار سے مردم زورانسری آوار جنگ ءِ ھال اِنت-

دمگی مردمانی رِد ءَ کولواہ ءِ گوریچانی کوھی دمگاں برجاھیں پوج ءِ لشکرکشی ءِ میان ءَ پوج ءَ اللہ داد ء ابراھیم نامیں کماشے سک لَٹ ءُ کُٹانی نشانگ کتگ، چریشی ءَ پد آ بیران بیتگ-

اِھوالکارانی رِد ءَ لشکر کشی ءِ میان ءَ دو براتاں ھوار سے مردم زورانسری آوار جنی نشانگ کتگ ءُ ناشناسیں جاھے ءَ برتگ اَنت- آیانی پجّار کٹو ء بابیک، سنجر ء بشام ءُ صدام ء بشام ناماں چہ بیتگ اَنت-

اِھوالکارانی رِد ءَ لشکر کشی ءِ میان ءَ بیران بیتگیں اللہ داد ءِ لاش گوستگیں روچ ءَ پوج ءَ گیشکور لیویز ءِ دست ءَ، وھدے کہ آئی ءِ مال ءُ دلوت پوج ءَ وتی دست ءَ داتگ ءُ تنزلہ ءِ ھند ءَ برجاھیں پوج ءِ بُنجل ءَ برتگ اَنت-

بلے سرکاری واکدارانی نیمگ ءَ لشکر کشی ءِ درگت ءَ ھچ وڑیں درشان دیم ءَ نیتکگ-