TBP Balochi

بلوچستان ءِ بُنجاھی شھر شال ءِ دمگ کلی مریانی ءِ ھند ءَ ناشناسیں سلاہ بندیں مردماں ھزارہ برادری ءَ چہ سیادی داروکیں ھپت مردم تُپنگ ءِ زور ءَ آوار جتگ اَنت-

اشی ءَ پد چار مردم یل کنگ بیتگ اَنت- ٹرک ڈرائیور رستم علی ءِ گوشگ رِد ءَ آ گوستگیں روچ ءَ وتی دگہ سنگتانی ھمراھی ءَ چہ غزہ بند ءَ ریگ ءِ آرگ ءِ ھاتر ءَ روگ ءَ بیتگ اَنت کہ کلی مریانی ءِ نزیک ءَ کساس شش ءُ ھپت سلاہ بندیں مردم کہ گاڑی ءِ سر ءَ گوں سلاھاں اَتکگ اَنت ءُ ھزارہ برادری ءِ سے پوریاگر کہ آ ھزارہ ٹائون ءُ چہ مری آباد سیادی داروکیں نوروز عزیز اللہ ءُ جمشید ءَ ابید علی خان، محمد گمان ، خان محمد گوں وت برتگ اَنت بلے چار مردم پد ءَ یل کتگ اَنت-

تنی وھدے وئیل ءِ سوب زانگ نہ بیتگ ،دمگی انتزامیہ ءَ پٹ ءُ پول کنگ ءَ اِنت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل آشوب ءَ شنگ کرتگیں درشان ءِ تہ ءَ گوشتگ کہ سرمچاراں کیچ ءِ دمگ سری گڈگی ءَ پاکستانی پوج ءِ پانگِسے سر ءَ گوں راکٹاں اُرش کتگ –

میجر ءِ رِد ءَ کیچ ءِ دمگ سری گڈگی ءَ مروچی سھب ءِ ادار دھ ءَ پاکستانی پوج ءِ پانگس ءِ سر ءَ اُرش ھما وھد ءَ.کنگ بوتگ وھدیکہ آ بیست ءُ سَے مارچ پاکستان روچ ءِ مراگش ءِ تیاری ءَ کنگ ءَ بوتگ انت – راکٹ گولہ پانگس ءِ تہ ءَ کپتگ ءُ ترک اِتگ انت چریشی ءَ دژمن پوج ءَ جانی ءُ مالی تاوان ءِ دیمپانی بوتگ –

میجر ءِ رِد ءَ اے پانگس پاکستانی پوج ءَ یک واٹر سپلائی ءِ سر ءَ کبزہ کتگ ءُ برجم کتگ –

جارکش ءَ گوشتگ کہ بی ایل ایف اے اُرش ءِ زمّہ واری ءَ منیت ءُ چہ بلوچستان ءَ دژمن پوج ءِ در آیگ ءَ تاں اُرش برجاہ مان انت –

کیچ ءِ دمگ تمپ ءَ کیسکو ءِ ھژدہ ادار ءَ بازیں لوڈ شیڈنگ ءِ بگیری ءَ مردماں زھرشانی ءُ روانک کش اِتگ –

روانک ءَ بھر زوروکیں مردماں کیسکو ایکسیئن ءِ بگیری ءَ ترندیں نارہ جتگ ءُ تمپ ءِ دمک ءُ دراں اوگام جنان ءَ تمپ شھدربر جاہ ءَ نندانک جتگ ءُ نشتگ انت وھدیکہ تمپ تاں تربت ءَ رؤکیں بنجاھی شھدگ شش ادار ءَ بند کنگ بوتگ –

کہ پدا رند ءَ تمپ میونسپل کمیٹی ءِ سرکماش امین قریش ءُ کمک سرکماش حاجی مسلم یعقوب، ماسٹر محمد خان گچکی، کونسلر مسعود جلس، عبدالحق ھوت ءَ گوں زھرشانی کنوکاں گند ءُ نند کتگ دگ پچ کتگ ءُ آھانی لوٹ کیسکو ءِ واکداراں سر کتگ –

درنگاز کنوکاں گوشتگ کہ کیسکو ایکسین بنگل مری نامیں مردمے ءَ پون کتگ ءُ تمپ ءِ ھر سَئیں فیڈرزانی لوڈ شیڈنگ ھژدہ ادار کتگ انت –

آھانی گوشگ ات کہ لینانی لوڈ شیڈنگ درگت ءَ آھانی شر کنگ ءِ ھاتر ءَ مردم ھر وڈا ساڑی انت بلے اے کرپٹ ایں ایکسین بنگل مری وتی زاتی زد ءُ انا تمپ ءِ سر ءَ کشگ انت کہ اشی ءِ ما ھچ وڈا موکل ءَ نہ دے ایں –

آئی ءَ تمپ ءِ مردماں دلسیاہ کنگ ءِ اے دیریگیں رویش یے نوں ما چد ءُ گیشتر اوپار کت نہ کن ایں ھر سال ءِ وڈا ھردے کہ رمزان ماھ کئیت اے بنگل مری لوڈشیڈنگ ھژدہ ادار گیش کنت –

آھانی گوشگ ات کہ رمزان ءِ وشیں ماہ ءَ مردماں آسراتی دیگ ءِ بدل ءَ گیشتر دلسیاہ کنگ بوگ ءَ انت چوش کہ اے مرد اتکگ ءُ ادا وتی بادشاھی ءَ برجاہ دارگ لوٹیت گڈا اشی ءِ موکل ءَ.ھچ وڈا نہ دئیں –

گوستگیں ماہ ءَ چہ شال ءَ بیگواہ کنگ ءُ پد ءَ سی ٹی ڈی ءِ زور ءَ دزگیری ءِ دیم ءَ آرگ بیتگیں بلوچ زالبول ماھل بلوچ ءِ بارو ءَ ایمنسٹی انٹرنیشنل ءَ لوٹ کتگ کہ پاکستانی واکداراں لوٹ ایت کہ آ میان اُستمانی ھکانی کانون ءِ رد ءَ سرجمی ءَ ماھل بلوچ ءَ یل بہ کن اَنت-

ایمنسٹی انٹرنیشنل ءَ وتی نِمدی ءَ پاکستانی وزیر داکلہ رانا سناء اللہ ءَ نشان کتگ ءُ نبشتہ کتگ کہ ایمنسٹی انٹرنیشنل ماھل بلوچ ءِ سلامتی ءِ واستا ترس اِت ترا اے نِمدی ءَ نبشتگ کنگ ءَ آں بیست ءُ ھشت سالی ئیں بلوچ زالبول چہ شال ءَ کاؤنٹرٹیررزام ڈیپارٹمنٹ (سی ٹی ڈی) ءِ دستگیری ءَ ابید جرم ءَ یک ماھے ءَ گیش وھد ءَ دزگیری بندیگجاہ کتگ کہ ماھل بلوچ ءَ شھری ءُ انسانی ھکانی لگتمالی یے بروبری اِنت-

نمدی ءَ نبشتہ کنگ بیتگ ماھل بلوط بازیں وھداں ابید جرم ءِ سرجم کنگ ءَ وتی بندیگ جاہ ءَ داشتگ کہ اے انسانی ھکانی لگتمالی اِنت-

ایمنسٹی انٹرنیشنل ءَ گوشتگ کہ بیست ءُ ھپت فروری ءِ شپ ءَ شال ءَ ماھل بلوچ ءِ لوگ ءَ پوج ءَ بیڑ برتگ ءُ آ گوں زھگ ءُ لوگ ءِ مردماں گوں دزگیر کتگ ءُ بازیں ادارھاں تھاریں زنداناں کنگ بیتگ ءُ دومی روچ ءُ اینٹی ٹیررزم کورٹ ءَ ھپت روچ ءَ جسمانی ریمانڈ ءَ وتی بندیگی ءَ کتگ ءُ کہ اے میان اُستمانی انسانی ھکانی کانون ءِ در ءَ سنگ ءُ شاھیمانی پھریزگی ءِ لگتمالی اِنت-

نمدی ءَ نبشتگ کنگ بیتگ ماھل ءُ ابید جرم ءَ چار رند ءَ آمیدگس ءَ پیش کنگ بیتگ کہ اود ءَ سی ٹی ڈی ءَ ریمانڈ ءِ تلب کتگ کہ اے گیرکانونی اِنت ءُ سی ٹی ڈی ءِ وتمانی پدر کنت- دانکہ واکدار ماھل بلوچ ءِ سر ءَ جتگین بھتاماں راست کت نہ کن اَنت گڑا آئی ءِ دزگیری میان اُستمانی ھکانی کانونی لگتمالی اِنت ایشی ءَ تچک ءَ یل بہ کن اَنت-

زانگ بہ بیت ھبدہ فروری ءِ شپ ءَ ماھل بلوچ ءِ لوگ ءَ پوج ءَ بیڑ برتگ ءُ اود ءَ ماھل بلوچ زورانسری ءِ بیگواھی ءِ آماچ کتگ ءُ پد ءَ بیگواہ کتگ ءُ چریشی ءَ پد مھلوک ءِ زھرشانیاں ماھل بلوچ سی ٹی ڈی ءَ دزگیری ءَ پدر کتگ ات-

ماھل بلوچ ءَ زورانسری آوارجنی ءُ دزگیری ءِ ھلاپ ءَ جتا جتائیں پھناتاں وتی لیکہ ءِ زھر درشان ءَ کنگ ءَ اَنت ءُ ھمے وڑ ءَ سرکار ءَ ھوار بلوچ پارلیمانی پاٹیاں ترندیں ایرادانی دیمپانی اِنت-

شال ءَ ھوار بلوچستان ءِ جتا جتائیں شھراں گرند ءُ گریوکانی ھواری ءَ ھورانی درچ برجاہ، بیست ءُ چار ساھاتانی وھد ءَ برپگواری ءُ گرند ءُ گریوکانی ھواری ءَ ھورانی برجاہ بیگ ءِ گمان-

مھکمہ ءِ موسمیات ءِ رد ءَ پشمبے ءَ شال، ژوب، بارکھان، سبی، جعفر آباد، نصیر آباد، زیارت، چمن، پشین، لسبیلہ، دالبندین، کلات، ھزدار، آواران، پنجگور، کیچ، گوادر، جیوانی، پسنی ءُ مکرانی ءِ جتا جتائیں دمگاں ترندیں گوات ءُ ھورانی درچ برجاہ بیتگ اَنت-

مروچی ھم ھرنائی، زیارت، شال، سبی، نصیر آباد، ڈیرہ بگٹی، مستونگ، پشین، قلعہ عبداللہ، بولان، قلعہ سیف اللہ، لورالائی، ماشکیل، ژوب، شیرانی، بارکھان، کوھلو ءَ برپگواری ءُ آیوکیں چل ءُ ھشت ادارانی میان ءَ زیارت، پشین، قلعہ عبداللہ، ژوب، بارکھان، کوھلو، سبی ءُ شال ءَ ترونگلواری ءُ گرند ءُ گریوکانی ھورانی گمان ھست ءُ چریشی ءَ توپانی جاورانی ودی بوگ ءِ گمان اِنت-

بلوچستان ءِ دمگی شھر خضدار ءَ پاکستانی لشکر ءَ یک ورنا ءِ زورانسری بیگواہ کتگ البتہ یک ڈاکٹرے بازیں ادارگ زندان بند بوھگ رند یل کنگ بیتگ۔

گوستگیں شپ ءِ ساھت ھشت ءِ وھد ءَ پاکستانی لشکر ءِ چیریں ادارگ ءِ کارمندھاں نورگامہ زہری بازار ھند ءِ دمگ آتراپ گپتگاں، البتہ ھمے ساھت ءَ درزی ءُ میڈیکل اسٹور ءِ دُکان چہ دو ورنا دست گیری پد وتی ھمرائی ءَ بُرتگاں۔

بنشون ءِ رد ءَ ٹی بی پی ءَ گُوشگ بیتگ کہ پاکستانی لشکرے کارمندھاں بلال زہری ءِ منیر احمد جاہمند زہری ءَ چہ درزی دُکان ءَ وتی ھمرائی برتگ، اے ورنا درزی ءَ دُکان ءَ کار کنگ ءَ بیتگ البتہ ھمے ساھت ءَ ڈاکٹر ظفر ءِ محمد رحیم ءِ لشکراں چہ آئی میڈیکل اسٹور زورانسری وتی ھمرائی برتگ۔

بنشون ءِ رد ءَ لشکر ءَ ڈاکٹر ظفر بازین ساھت زندان ءَ دارگ رند یل کتگ البتہ بلال زہری انگت ءَ بیگواہ اِنت۔

دمگی واکدارانی نیمگ چہ انگت ھچ ڈولیں گامگیج ءِ دیم ءَ آرگ نہ بیتگ۔ بلوچستان ءَ زورانسری بیگوائی ءِ وئیل پد مان پد ءَ برجاہ اَنت البتہ مارچ ءِ ماہ ءَ اے وئیلانی تہ ءَ گیشی گندگ بوھگ ءَ ایں۔

انوگیں وھد ءَ بلوچ زالبولانی بیگوائی دورشم ءَ دست گیری کنگ ءُ زورانسری بیگوائی وئیل دیم پیداکاں۔ بلوچ راجکاری ءُ چاگردی واکدارانی گوشگ این کہ بلوچ زالبولانی زوانسری بیگوائی ءِ وئیل گُوستگیں وھد ءَ اوں زاھر بیتگ البتہ دیم ءَ آرگ نہ بیتگاں۔

گوستگیں روچ ءَ ھکومت بلوچستان ءَ ماھل بلوچ ءِ یک منّ اِتگیں درشانے دیم ءَ آرتگ ءُ پریس کانفرنس ءَ الزام جتگ، البتہ بلوچ راجکاری ءُ چاگردی راھشوناں اے پریس کانفرنس نہ منّ اِتگ۔ اے راھشوانانی گوشگ ایں کہ ماھل بلوچ پہ زور درشان کنگ ءِ ھاتر ءَ رازی کنگ بیتگ۔

بلوچ نیشنل موومنٹ ( بی این ایم) ءِ جارکش ءَ گْوشتگ پولیس ءِ نام ءِ ناشرکاری ءِ گر ءُ داری تک (سی ٹی ڈی) ءَ گوں لٹ ءُ کٹ ءَ چہ ماھل ءَ دروگیں درشان گیپتگ۔چہ آزار ءَ گرگ بیتگیں درشان آئی ءِ سر ءَ ماں زندان ءَ ترندیں زھنی ءُ بالادی آزار ءَ گواچن کنت۔

آئی ءَ گْوشتگ ماھل گوں سیاسی ءُ زْرمبشتی کھولے ءَ سیادی دار ایت۔ماھل ءِ دسکیچ بی بی گل ’مردمانی اگبالانی پتر بلوچستان‘ ءِ سرکماش اِنت ، آئی ءِ ماں زور بیگواھیں مردمانی درا کنائینگ ءِ زرمبشت ءَ سھرائیں کردے ھست۔ھمے پیم پری گل ھم زور بیگواھیں مردمانی درا کنائیںگ ءَ برجم بیتگیں زھرشانی ءُ ننداکاں ھوار بیتگ۔دروگیں کیساں آیانی جنوزامیں نشار دزگیر کنگ ءُ آیانی کھول ءِ سر ءَ زور دیگ بیگ ءَ اِنت کہ آ بلوچستان ءِ تہ ءَ مردمانی اگبالانی بگیریانی سر ءَ بے توار بہ بہ اَ نت۔پاکستانی لشکر ءِ لوٹ ءَ سی ٹی ڈی ءَ بی بی گل ءُ پری گل گوں جنگی گلے ءَ ھمگرنچ کرتگ اَنت داں ایچ آر سی بی ءِ کرد ءُ کار سانمند بہ بہ اَنت ءُ مردمی اگبالانی بارہ ءَ بی بی گل ءُ ایچ آر سی بی ءِ کوشستانی دیم گرگ بہ بیت۔

جارکش ءَ گْوشتگ اے سری رند نہ اِنت کہ پاکستانی لشکر جنیناں نشانگ کنگ ءَ اِنت۔ چہ ایشی ءَ پیش ھم بلوچ سیاسی کارکنانی چک، جنین ءُ ھما مردم نشانگ کنگ بیتگ کہ وت ھچ گل ءَ ھوار نہ بیتگ اَنت۔مچی ڈنڈ ءِ اے شوندات ءِ پارست ءَ پاکستان ماں بلوچستان ءَ راجی زْرمبشت ءِ سان ءَ دارگ لوٹ ایت داں بلوچ بہ ترس اَنت ءُ چہ آجوئی ءِ زْرمبشت ءَ دست ءَ بہ کش اَنت۔

آئی ءَ گْوشتگ ماھل پاکستانی لشکر ءَ چہ لوگ ءَ چست کنگ ءَ پد درمردمی آزار داتگ ءُ پد ءَ سی ٹی ڈی ءِ پارست ءَ آئی ءِ دزگیری من اتگ۔دزگیری ءِ منگ ءَ پد سی ٹی ڈی ءَ ٹاپار جتگ کہ ماھل دیمونیں ارش کنوکے کہ گوں وتکشیں جیکٹ ءَ چہ لوگ ءَ ڈن دزگیر کنگ بیتگ۔وھدے کہ سی ٹی ڈی ءِ انیگیں درشان ءُ چہ لٹ ءُ آزار گرگ بیتگیں ماھل ءِ درشان ءَ نوکیں داستانے آرگ بیتگ۔ایشی ءِ رد ءَ ماھل پہ گپت وتکش ارش کنوکے نہ اِنت بلکیں آسراتی دیوکے کہ ھمے جیکٹ ءَ دگرے ءَ دیگی اَت۔چہ ایشی ءَ ترس ھمیش اِنت کہ دیمتر ءَ ھم دروگیں کیسانی بنیاد ءَ دگہ لھتے مردم دزگیر کنگ بیت۔ انچوش کہ پریس کانپرنس ءَ ’’ پری گل ‘‘ ءِ نام ھوار کنگ بیتگ کہ پہ ماھل ءِ یلہ کنائینگ ءَ بیتگیں زھرشانیاں دیم دیم ءَ بیتگ۔

بی این ایم ءِ جارکش ءَ گْوشتگ پاکستانی آمیدگسانی سر ءَ باز رند ءَ آیانی وتی گْوستگیں سروزیراں ھم ناباوری درشان کنان ءَ آ پت دار (جانبدار) لیک اتگ اَنت وھدے کہ گپ بلوچ راج ءِ بیت گڑا پاکستان ءِ درسیں تْرامگیج یکدست اَنت۔پاکستانی آمیدگس پاکستانی لشکر ءِ چیردست اَنت۔ پمیشکا دروگیں کیسے ءَ ماھل ءِ آمیدگس ءِ دیم ءَ پیش کنگ ءِ جاہ ءَ یکشل ءَ ریمانڈ گرگ بیتگ ءُ آمیدگس ءَ ھچ نہ گْوشتگ۔پیشی ءِ وھد ءَ چہ آزاراں ماھل بے ھوش بیتگ بلے آمیدگس ءِ آمیدکارانی مردمگری وش واب اَت۔چوناھیں میاربارے بہ بیت ماں زندان ءَ چہ آئی ءَ گوں آزار ءَ گرگ بیتگیں درشان ءِ ھچ رنگیں راھبندی بستار نیست ءُ ناں کہ دزگیریں مردمانی میار منگی درشان ءِ رسانکدر ءَ شنگ کنگ مزدانک (انصاف) ءِ لوٹاں پیلو کنت۔اے ایوک ءَ ھما زور ءِ سان ءِ کم کنگ ءِ کوشست اِنت کہ بلوچ راج ءِ نیمگ ءَ زھرشانی ءُ نندانکانی پد ءَ ودی بیتگ۔ دومی نیمگ ءَ اے آوارجنی ءَ راھبندی رنگے دیگ ءِ کوشست اِنت داں جھان رد بہ کپ ایت۔پاکستانی لشکر ماھل ءَ وتی جند ءِ آمیدگساں پیش کنگ ءَ چک ءُ پد اِنت بلے آئی ءِ میڈیا ٹرائل کنگ بیگ ءَ اِنت ، ایشی ءِ سر ءَ مردمی اگبالانی تْرامگیجاں زیت دلگوش کنگ لوٹ ایت۔پاکستان ءِ باندات ءَ مردمی اگبال ءِ تْرامگیجانی سردکاری ءَ پاکستانی لشکر ءَ ماں بلوچستان ءَ بے جست ءُ پرس ءَ ھرچ رنگیں میار کنگ ءِ واک داتگ کہ چہ ایشی ءَ مئے بے تاھیری گیش بیگ ءَ اِنت۔

میجر ملا بھرام ءِ یات ءَ

شائر: سمیر تاھر

دی بلوچستان پوسٹ

بیا ادارے منی چمانی زِر ءَ گواز بکن
بیا کہ زند ءِ منی تھنائیں سپر آسر بوت
بیا کہ گُک اِنت دل ءَ لھتے ھبر
چہ کرن آں
اچ تئی گستائی ءَ پیوست جبین ءَ دردے
اچ ترا رند گُشے ماھ سرا کپت منی
بے کراری ءَ کرارے پہ بھا زرت نہ کت
زندگاں جند ءِ وتی دست ءِ اسا بوت نہ کت
کارچ کشّت منی تھنائی ءَ دمکاں دراھیں
زند واپینت گِسر کپتگیں راھانی سرا
چنچو توجیل اڈینتگ تئی نام ءَ روچے
چنچو اوپار نبشتگ مں کتابانی تھا
تو پہ کئے شیشگیں اندام ءِ بلاھاں زورے
چنت کردار ءِ ھدابند ماناں گُشت کنے
پہ کیا پروست کنے اجگیں دلانی واباں
من کہ واباں تئی ارمان آں پراموش نیاں
وھد ھاگاہی ءَ چینک آں تئی راہ ءَ ریچیت
بلے مرگانی وپاداری ءَ بوگے پِر بیت
شپ وتی لنکک آں یک ءَ ھساب ءَ اِنت پدا
چنچو واھشت گِسر بیتگ پراموش مہ بو
چنچو ھمراہ منی راہ ءِ میان ءَ گار اِنت
اے منی اھد ءِ تمردیں ورنا
وھد ءِ جنگ جاہ ءَ ابدمان اَنت مدام
چونیں رژن ئے منی کوھانی جبین ءَ کل اِنت
چونیں اوپار ئے آ پادانی سواساں گون اِنت
ھر ھما پند کہ کشکاں وتی پاداں بند اَنت
ھر ھما ارس کہ سازنت کتاب ئے درین ءَ
پشت کپتگ تئی رنگانی بشارت پہ من
آجوئی واب یے رنگ ءَ اِنت ھمے رنگ اِنت ما
ما وتی رنگ ءَ بشوھازیں تئی واب ءِ تھا
تو چو کندیل یے پئیم ءَ منی دیم ءَ رژنا
تو ھمائے منی ارماناں کُتگ گار ترا
اچ تو پد آسیں زمین
دوزھیں دنیا دراھیں

بندیگیں ماھل بلوچ ءِ تامر ءِ شنگ کنگ وت در کانودی کار یے – کانود زانتکار

ھبدہ فروری دوھزار ءُ بیست ءُ سَے ءَ چہ شال ءَ زورانسری آوار جنی ءَ پد رند ءَ سی ٹی ڈی ءِ دست ءَ دزگیری زاھر کنگ بوتگیں ماھل بلوچ ءِ کیس ھمک روچ ڈرامہ بوان انت –

سی ٹی ڈی ءَ اے کیس ءِ ھاتر ءَ تنی وھدی چہ آمیدگس ءَ دو رند ءَ ھپت ھپت روچ ءُ دو رند ءَ دھ دھ روچانی ریمانڈ ءِ موکل گپتگ –

بلے پدا مروچی سی ٹی ڈی ءُ بلوچستان سرکار ءِ نیمگ ءَ یک پریس کانفرنس ءِ کنگ بوتگ کہ اودا ماھل بلوچ ءِ سر ءَ وتگڑیں بھتام جنگ بوتگ وھدیکہ سی ٹی ڈی ءِ نیمگ ءَ یک وتگڑیں تامر ءِ ھم شنگ کنگ بوتگ –

اے تامر ءِ تہ ءَ ماھل بلوچ گندگ بیت کہ بازیں چیز ءِ منگ ءَ انت –

بندیگیں یک مردمے تامری درشان ءِ درگت ءَ کانود چی گشیت؟ اے درگت ءَ وھدیکہ دی بلوچستان پوسٹ ءَ گوں کانود زانتے ءَ ھال ءُ اھوال کتگ گڈا آئی ءِ گوشگ انت کہ اے وڈیں چیزانی کنگ ءِ موکل ءَ کانود نہ دنت ءُ ناکہ آمیدگس اے دابیں پہ زور گپتگیں تامراں منیت ءُ ناکہ کانود موکل دنت –

وھدیکہ ما جست گپت کہ تامرے شنگ کنگ ءِ درگت ءَ کانود ءِ موقف چی انت گڈا آھانی گوشگ ات کہ کانود اے دابیں چیزانی ھچ موکل ءَ نہ دنت ءُ اے وڈیں چیز گیرکانودی انت –

آئی ءَ گوشتگ کہ اے وڈیں کار کیس ءَ ھراب کن انت ءُ آمیدگسی نزام ءَ گمراہ کنگ ءِ ھاتر ءَ کنگ بنت چوش کہ سر ءَ سر در کانودی انت –

آئی ءِ گوشگ ات کہ اے وڈیں کارانی کنگ ءَ بائدیں آمیدگس وت سوموٹو گامگیج بہ زوریت ءُ اے کار ءِ کنوکانی سر ءَ کانودی کاروائی بہ کنت –

زانگ بہ بیت بلوچستان ءَ کاؤنٹر ٹیررازم ڈیپارٹمنٹ بزاں سی ٹی ڈی کارانی سر ءَ پیش ءَ ھم لنکک چست کنگ بوتگ وھدیکہ دروگیں میڑاں زورانسری آوار جنگ بوتگیں مردمانی کوش ءِ بگیری ءَ مزنیں کچے ءَ زھر شانی کنگ بوتگ –

بلوچستان ءَ سی ٹی ڈی ءِ نیمگ ءَ اے جوڈ کنگ بوتگیں اے وڈیں بازیں تامرے دیم ءَ اتکگ کہ زورانسری آوار جنگ بوتگیں مردم وتی درشان ءَ دیگ ءَ انت بلے پدا ھم اے کار ءُ آوار جنگ بوتگیں مردمانی وتگڑیں درشانانی بگیری ءَ ھچ وڈیں کانودی گامگیج زورگ نہ بوتگ –