آزمانک: من ءُ منی کٹور
نبشتہ کار: شھزاد نسیر
دی بلوچستان پوسٹ
منی ھدا زانت کہ من یک بے وسیں زالے آں۔ مرد ھیرونی یے من گُدے دوچاں ءُ وتی لاپ ءِ شوھاز آں منی نام ماھاتون اِنے ءُ منی لوگ واجہ ءِ نام شاھداد اِنت من ءَ ھمائیں مات ءُ پتاں گوں اے مرد ءَ سور داتگ، منی زند وَ چہ ھمود ءَ ھتم اِنت، کہ ھما وھد ءَ منی آروس بوتگ من واھشت داشتگ بوتگ کہ منی آروس کہ بیت من گوں وتی لوگ واجہ ءَ سک گَل ءُ شادان بہ آں، بلے من نزاناں اے منی بھت اِنت، اگاں ھما مرد ءِ بھت من آں۔ برے برے من گوں وتی ایوکی ءَ سک دل سْیاہ باں گڑا وتی کٹور ءَ دیم ءَ کن آں ءُ وتی وھد ءَ گوں لاپ ءِ شوھاز ءَ گوازین آں دل نہ گْوش ایت کہ ھمساھِگے ءِ لوگ ءَ برو، چیاکہ اگاں ھمساھِگے ءِ لوگ ءَ بہ رواں، گڑا منی ھمساھگ داں زندگ اَنت دِگر ءِ پُچکانی شودگ ءَ دزھورک نہ بنت۔ گڑا من ھیال کن آں، کہ من چیا بہ رواں گوں اے سِلیں کاراں گون وتی دپ ءَ ناپاک بہ کن آں۔ پمیشکا من ءُ منی کٹور چہ اے ھمساھگاں گھتراں۔ منی زند ءِ ھمراہ وَ نیم شلوگوے بوت، کہ بئیت ءُ گوں من دیوانے بہ کنت، کہ اڑے! برے برے منی دل ھم لوٹ ایت کہ من ھم کْوھنیں یاتانی چِکّو ءَ بہ چنڈان ءُ چہ یکے “ھو اڑے وھد” ءِ ھبر ءَ چہ وتی لِلّک ءَ بہ کَش آں بلے “زندگی ءِ چے ئِے تماہ ءَ کہ دل بہ لوٹ ءُ دس مہ رس ایت۔”
دل ھیال باز کنت دل ھیران بیت کہ چہ اِے بے اُمیتیں وھد ءَ چہ گھتر اِنت کہ من جنوزام بہ بیتین آں یا کلمانٹ بوتیناں بلے پد ءَ دل ھیال کنت کہ اے رنگ ءَ ، بزاں دوتکگیں گُد، پن ءُ مزواک چہ من ءَ دیر بنت ءُ من یک پروشتگیں تھتے ءِ وڑ ءَ کُنڈے ءَ کپاں ءُ بس پس کاینت ءُ منی روتاں چُنڈ اَنت ءُ پد ءَ داں یکے توکل بہ کنت ءُ بئیت منی داراں بہ زور ایت ءُ آچ ءَ بہ دنت۔ جنوزامی ھم بے رنگیں یک بے واجھیں زندے کہ ھدا بکن کہ کس ءَ اے زند مہ رسات۔
من وتی مرد ءَ چہ بس ھمے وتی زند ءِ اُمیت ءَ داراں کہ آ بس پہ من رنگے ءُ بس پہ من نامے کہ ھست اِنت داں اے دگنیا ءَ سپر بہ کنت ءُ پمّن آ دگنیا ءِ پشت بہ کپ ایت بلے گپے زان ئے؟ مئے وڑیں بے وسیں زال چہ ھچ گماں نہ چُٹ ایت اِد ءَ اے دگنیا ءِ گم ءُ دلچُنڈی ءُ آ دگنیا ءِ پد ءَ دگہ یک بے زانتیں ھساب کہ باریں منی کُرتن ءُ کُنِش چے بنت۔
شپ ءُ روچ منی وھد منی زند گوں ھمے داب ءَ گْوزگ ءَ اِنت ءُ من نوں چہ کس ءَ گِلگ نہ داراں ءُ بس گوں وتی کٹور ءَ من وتی وھد ءَ گْوزینگ ءَ آں-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
