TBP Balochi

روکپتی بلوچستان ءِ جتا جتائیں جاھاں چار کس بیران بیتگ اَنت، یک مردمے ایرانی لشکر ءَ تیر جتگ ءُ کشتگ، دو مردمے ناشناسناں جتگ ءُ کشتگ انت ءُ دگہ دگ ءِ وئیل ءَ بیران بیتگ اَنت-

سر بیتگیں اھوالانی رد ءَ روکپتی بلوچستان ءِ دمگ چھبار ءَ ایرانی لشکر “سپاہ ” ءَ تیرگواری کنان ءَ یک مردمے کُشتگ –

کُشگ بیتگیں مردم ءِ پجار ظریف رئیسی ء حسین جھمنند بوگ کسرکند ءِ نام ءَ زانگ بیتگ –

اھوالانی رد ءَ ظریف کُشگ ءَ پد ایرانی لشکر ءَ آئی ءِ لاش گون وت برتگ –

اھوالانی رد ءَ چار ماہ ءَ پیش ماں کسر کند ءَ ایرانی لشکر ءَ ظریف رئیسی ءِ گس ءِ سر ءَ بیڑ ھم برتگ بیتگ ءُ بلے آ اود ءَ جاڑیگ نہ بیتگ ءُ چریشی ءَ آئی ءِ کھول ترسینگ بیتگ –

اھوالانی رد ءَ ظریف رئیسی گوستگیں روچ ءَ ماں چھبار ءَ یک چیک پوسٹے ءِ سر ءَ ایرانی لشکر ءَ تیر جتگ ءُ کُشتگ ءُ پد ءَ آئی ءِ لاش گون وت برتگ –

ظریف رئیسی ءِ کوش ءُ دزگیری ءِ بارو ءَ دگہ گپ ایرانی لشکر ءَ دیم ءَ نیاورتگ اَنت بلے روکپتی بلوچستان ءُ گیشتر چوشیں وئیل کہ آیانی سر ءَ کوش ءِ بھتام ءُ دگہ چیزانی سر ءَ مردم ھمے داب ءَ مرگ ءِ دیمپان بنت اِنت-

ھمے داب ءَ بمپور ءَ ناشناساں یک ورنایے تیر جتگ ءُ کُشتگ –

اھوالانی رد ءَ بمپور ءَ سلاہ بندیں مردماِ رضا شیخ ویس ء امیر تیرانی نشانگ کتگ ءُ کُشتگ –

ھمے داب ءَ ماں بنگلان ءَ یک مردمے چاکو جنگ ءُ کُشگ بیتگ –

اھوالانی رد ءَ بنگلان ءَ ناشناسیں مردماں سراپ کتگ ءُ حسین رئیسی ء کادر بکش چاکو جتگ ءُ کُشتگ –

ھمے وڑ ءَ روکپتی بلوچستان ءَ درساں ترسناکیں تیریں وئیل کہ اود ءَ دگ ءِ چَک ءَ پیش آیگ ءَ اَنت –

ایرانشھر ءَ یک گاڑی ءِ چپ بوگ ءَ تیل کشیں مصطفیٰ بامری ء کاسم بامری جھمنند دلگان بیران بیتگ-

روکپتی بلوچستان ءَ یکیں ھپتگ ءِ کساس دگ ءِ وئیلاں پنچ مردم بیران بیتگ اَنت، روکپتی بلوچستان ءَ ناوشتریں وئیل کہ اود ءَ دگ ءِ چَک ءَ مردم بیران ءُ یا زدگ بوگ ءَ دیر نہ کن اَنت-

سربوتگیں ھالانی رِد ءَ بلوچستان ءِ دمگ پنجگور ءَ بمب تراکے ءَ یک مردمے سک باز زدگ بوتگ وھدیکہ دومی نیمگ ءَ آواران ءِ دمگ جھاؤ ءَ ناشناسیں سلاہ بندیں مردماں پوجی پانگسے ءِ سر ءَ اُرش کتگ –

گیشیں ھالانی رِد ءَ پنجگور ءِ بمب تراک خدابادان ءَ بوتگ کہ یک گاڑی ءِ تراکناکیں شوروانی نشانگ جوڈ کنگ بوتگ –

پولیس ءَ تراک ءِ ھبر راست کتگ ءُ گوشتگ کہ تراک ءَ علی ء عبدالحفیظ نامی مردمے زدگ بوتگ –

اھوالکار ءِ رِد ءَ اے گاڑی ھما وھد ءَ نشانگ کنگ بوتگ کہ آروس ءِ مراگش ءَ نشانہ بازی ءَ پد اے مرد واتر آیگ ءَ بوتگ-

اھوالکار ءِ رِد ءَ تراک ءَ دگہ مردم ھم کمے زدگ انت وھدیکہ علی سک باز زدگ انت –

دومی نیمگ ءَ چہ آواران ءِ دمگ جھاؤ ءَ ھمے ھال انت کہ ناشناسیں سلاہ بندیں مردماں پاکستانی پوج ءِ پانگسے ءِ سر ءَ اُرش کُتگ –

اھوالکار ءِ رِد ءَ ڈولیجی ءَ بکشازھی میتگ ءَ برجاھیں زورگریں پاکستانی پوج ءِ پانگس ءِ سر ءَ کنگ بوتگ ۔ اُرش داں دیر ءَ برجاہ بوتگ گمان کنگ بیت پاکستانی پوج ءَ جانی ءُ مالی تاوان رستگ –

پاکستانی پوج ءِ سر ءَ بوتگیں ارشانی زمّہ واریاں گیشتر بلوچ آجوئی لوٹوکیں سلاہ بندیں گل منّ انت – بلے تنی وھدی ھردو ارشانی زمّہ واری ھچ گلاں نہ منّ اِتگ انت ـ

بلوچستان ءَ یکشل ءَ برجاھیں لشکر کشی، گسانی سر ءَ بیڑ، زورانسری آوار جنی، دروگیں میڑ ءُ زھرشانیانی اھوال دیم ءَ کائنت، بلے پد ءَ ھم اے مزنیں وئیلانی بازیں رپورٹ ءِ شنگ نہ بیت انت ایشی ءِ سوب دوریں ھند ءُ دمگاں نیٹ ورک ءِ نہ بوگ ءُ سرکار ءِ نیمگ ءَ اے وئیل دیم ءَ آرگ نہ بنت اِنت-

ٹی بی پی ءِ کچ ءُ کساس ءِ رِد ءَ ھمے سال ءِ شش ماھانی میان ءَ سرجمیں بلوچستان ءَ لشکر کشی ، بیڑ، دگانی بندگ ءِ درچ یکشل ءَ برجاہ بوتگ اے کارانی تہ ءَ پاکستانی پوج، پیراملٹری فورس فرنٹیئر کور، سی ٹی ڈی، چیریں ادارہ، پولیس ءُ ایندگہ پوجی ادارہ ھوار بوتگ انت –

دی بلوچستان پوسٹ ءِ ویژول اسٹوڈیو ءِ اے انفوگرافکس ءَ سال دوھزار ءُ بیست ءُ سَے ءِ بنداتی ششماھی ءِ تہ ءَ بلوچستان ءَ پاکستانی پوج ءِ نیمگ ءَ بوتگیں اُرش پیش دارگ بوتگ انت – گوستگیں شش ماھانی میان ءَ بلوچستان ءَ چِل ءُ دو دمگ پاکستانی پوج ءِ اُرشاں چہ سانمند بوتگ انت –

اے اُرشانی تہ ءَ درساں گیش سانمند بوتگیں دمگ تربت انت کہ اود ءُ چِل اُرش کنگ بوتگ انت ، بولان ءَ سِی ءُ شش، پنجگور ءَ سِی ءُ سَے، ھزدار ءَ سِی، کلات ءَ بیست، شال ءَ ھبدہ، تمپ ءَ چاردہ ، نوشکی ءَ یازدہ ءُ مستونگ ءَ ھم یازدہ اُرش کنگ بوتگ انت –

پاکستانی پوج ءَ ھمے سال ءِ بنداتی شش ماھانی تہ ءَ بلوچستان ءَ سرجمی ءَ سَے سد ءُ شست ءُ یک اُرش کتگ انت کہ آھانی تہ ءَ یکسد ءُ چِل ءُ نھ بیڑ، یکسد ءُ سینزدہ دگ بندی ءُ نود ءُ نُھ لشکر کشی ھوار انت وھدیکہ اے آپریشنانی میان ءَ بازیں روچاں دمگانی دگ بندی ھوار انت چوشکہ بولان ءَ بیست روچاں تاں دگ بندی کنگ بوتگ انت-

اے بیڑاں ھچ وڑیں کانودی وڈ ءُ ڈول نہ بوتگ – سانمندیں مردمانی رِد ءَ پوج ءَ شپ ءِ نھنگام ءَ گِسانی تہ ءَ دؤر کتگ ءُ زھگ ءُ زالبول توپک ءِ زور ءَ بیھار داتگ انت ءُ ورنایاں ھوار کماش زورانسری آوار جتگ انت وھدیکہ بازیں دمگاں مردمانی گسانی سر ءَ ماٹر گولہ ھم آس دیگ بوتگ انت –

ھمے وڑ لشکر کشیانی میان ءَ زھگ ءُ زالبول دیم دارگ ءِ ھاتر ءَ کارمرز کنگ بوتگ انت ایشاں ھوار مردینانی درکانودی کوش ھم ھوار انت وھدیکہ شھر ءُ بازاراں ھوار دگانی سر ءَ مردمانی دلسیاہ کنگ ءِ رپورٹ ھم دیم ءَ اتکگ انت –

ھمک ماھاں بوتگیں بیڑ، لشکر کشی ءُ دگ بندیانی درچ چو اے وڑ ءَ انت کہ جنوری ءَ چِل، فروری ءَ پنجاہ، مارچ ءَ شست ءُ پنچ، اپریل ءَ پنجاہ ءُ نُھ، مئی ءَ پنجاہ ءُ یک ءُ جون ماہ ءَ ھپتاد ءُ یک اُرش رپورٹ کنگ بوتگ انت –

زهیریگیں بچکند

نبشتہ کار: سیپ بلوچ

دی بلوچستان پوسٹ

مدتے ءَ رند بچکندگ ءَ اَت بلے سک زیمیگ اَت ، آزمان جمبرین اَت ءُ هور ءَ شنزگ بناه کُت ، داں من ارسانی زھاں ملار بوت آں برے بچکند اِت ءُ برے زهیریگیں سوتے ءَ گوں رکس کُت ، هور شنزگ ءَ اَت کور ءُ شیپ آپ گران اِت اَنت ، بلے من ءَ نزاناں مرچی چونیں دردے ءَ من ءَ گور جتگ اَت ، ساهت ءُ دمان ءَ چمانی ارس شلگ ءَ اِت اَنت ، اے هار جتیں ترمپاں هچ کمار نہ کُت-

همے کہ ترمپاں شنزگ یلدات ، هار گوات ، کوهانی دریگ ءَ چہ ملاری ءِ زیمر ءِ ساز کنگ ءَ بناه کُت هنچیں بے تواری یے اَت همے گمان بوت کہ وهمانی گمان پرشتگ، گوات ءِ زیمر ،سارتیں کوش کوهاں چہ آپانی ایر ریچگ ءُ زهیریگیں سوتے ءِ الهان ، بس زندگی اچ وت ءَ بے ھیال اَت ، داں دور چم کہ جنگل ءِ درچکاں کپتاں جان اش شُشتگ ات ءُ چو نوک سیریں بانور ءَ سینگار اِت اَنت ، من کوه ءِ برزتریں تلار ءَ نشتگ اِت انت ءُ سگریٹ آس دات ءُ کش اِت ، مرچی همے گمان بوهگ ءَ ات کہ زندمان ءِ لنگیں ڈاچی ءَ جاڑ کتگ ءُ من ءَ شیر ءَ پنز دیگ ءَ اِنت ،

مرچی آئی ءِ درد ءُ دورانی بار سر ءَ ایر رهت اَت بلے آئی ءِ سریگ ءِ لمب اَت آئی ءَ همے زیمگیں درداں گوں گوات ءِ زیمر ءَ گوں دْراهینت اے منی سریگ ءِ لمب اِنت کہ مرچی گُکے پچ بوتگ ءُ هوراں چِل ششتگاں ،باید همیش اَت کہ منی سرجمیں بدن دیری هوراں بہ ششتیں ءُ بہ پلگار اِت ایں گڑا من مرچی تئی ملاری ءِ زیمر ءَ گوں هم نیاد بوتگ اِت اَنت ءُ هور ءِ شنزانی زهاں گوں رکس کتگ ات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

شھید آسمی وپا ءِ نام ءَ

لچہ کار: شیردل بلوچ

دی بلوچستان پوسٹ

وپا او وپا
گپّے ترا گشاں !
کسم اِنت یار تو سکیں
وش بھتیں انسانے بوتگ ئے
تو شپ گردی کرتگ
تئی پادانی دیم ءَ مار زوم اتکگ اَنت
ڈنگ اِش ھم جتگ ترا
بلے۔۔!!
تئی جان بستگ سندی جوگیاں
زوم ،سیہ مار ءُ ھژدھانی زھراں
ترا ھچی کُت نہ کُت
جاھے جاھے ءَ مات ءِ نیکیں دوایانی پوشاکے بیت گور ءَ
سکی ءُ سوریاں چہ رکین اِیت ھر وڑ ءَ من چَمّ ء وت دیستگ اَت
نو باور بیت من ءَ
وپا او وپا
گپّے ترا گشاں !
زی تئی ھونوار ءُ پلنگیں سنگتاں
ڈیک وارتگ اَت
گوں پنجاب ءِ لگوریں لشکر ءَ
لونڈواں گریتگ ءُ گُٹ ءِ پُر ءَ زار کتگ
گوشتگ اِش ما رَدے کتگ
ءُ ٹوھیں گھ وارتگ اِش
وتی دیم ما شَرّ سْیاہ کتگ
بلوچ ھان نوشروانی ءِ ھند ءَ گوں آیگ ءُ نندگ ءَ
نو شَرّ پیڑ اِتگ اِش امارا
تیر اتکگ اَنت چو بشی نہ گورتگیں جمبر ءَ
مدامی ءَ گیرکار اَنت
گوکپروش ءِ کنڈگ ءِ جنگ ءُ میڑ ءَ
اگاں بلوچ ءِ زھگ ءُ نماسگاں
تُپنگ زُرت نشت ماں جنگی سنگر ءَ
ونڈے گیشین اَنت بے پتیں ھراں
ایشاں ترسے نیست ماں دلاں
بلوچ دراہ یکیں ولّ ءِ بر اَنت
چاکر ءِ اوبادگ اَنت
مھراب ھان ءِ پشتپد اَنت
نوروز ھان ءِ پّسگ اَنت
نواب ھیربکش ءِ نودربر اَنت
نواب اکبر ھان ءِ سپاھیگ اَنت
بالاچ ھان ءِ ھم درور اَنت
ڈاکٹر اللہ نزر ءِ کُنگّر اَنت
پدکنزگ ءَ ھیبے زان اَنت پہ وت ءَ
وپا او وپا
گپّے ترا گشاں
سمو جان نامیں گُھارے ھست ترا ڈیک داتگ ئِے گوں ڈیھ ءِ بداں
پدائی ئِے کرتگ ماں تُربَت ءَ
رند ءُ پد ءَ اَتکگ شمئے
آ شارّل ءِ لاڑکیں دزگُھار اَت
مجید برگیڈ ءِ پدائین سرمچار اَت
پدائین ریھان جان ءِ دشْتار اَت
مکھیں مات یاسمین ءِ دتکیں نشار اَت
سلمان ،ھمل ءُ منسپ ءِ ھمکار اَت
مزاریں بْراتانی رِد ءَ بوتگ ھم کتار اَت
نو سدکاں رس اِتگ منزل ءَ
وپا او وپا
گپّے ترا گُشاں
بلوچ ءِ جنگ ءِ کسہ آسر نہ بیت
اد ءَ کارستانی سر ءَ ھبر نہ بیت
اد ءَ ھرّوچ نوکیں کردے پدّر بیت
پہ زورگر ڈیھ ءَ مھشر بیت
نرمزارانی کرد چیدگ بنت
وشیں روچانی مستاگ بنت
ھون شھیدانی رنگ کار اَنت
آجو بیت بلوچستان
آجو بیت بلوچستان

کرد ءِ سمّو

نبشتہ کار: کندیل بلوچ

دی بلوچستان پوسٹ

“هونانی شهکور تچ اَنت پُل شیکو گوں گومازاں ور اَنت”
“عشق زمین ءِ سّمو اِنت اِشک ئے گوں ریحان ءَ همدپ اِنت”

شریں کردانی هُدابُند کرنانی کرن ماں اَنت پہ وتی راج ءُ زمین ءَ مُدامی زندگ بنت سّمو چہ هما زندگیں کارستاں یکّے کہ آئی ءِ کرد چو کندیل ءَ هزار سّموانی راهاں بلاں اِنت-

سّمو کرد ءِ هما کرد کہ پہ مُدامی هر همُکّ دلاں مان ایت سّمو مھر ءِ دومی نام اِنت هر همُکّ جاه ءَ کہ سّمو ودی بوتگ انت آهاں اود ءَ وتی مھر ءِ ڈس اِیر کُتگ اَنت آ مھر پہ هر چیز ءَ بوتگ وتی دوستدارے یا کہ هاکے سّمو چہ مست توکلی ءِ سّمو بہ بیت پہ وتی دوستدار ءَ یا کہ هاک ءِ اِشک ءَ گوار جتگیں سّمو دُرست یات بنت اِنت-

بلّئے مئے اھدے سّمو چہ کُلاں جُتا اِنت هما سّمو کہ پہ ایردستیں راج ءُ بندیگیں سرڈگار ءِ هاتر ءَ وتی درستیں واب ءُ واهگاں آس ءَ دور دنت وت ءَ چہ زند ءِ تماهاں بے تماه کنت راستے کہ انسان ءَ را زمین ءِ اِشک گوار بہ جنت گُڑا آئی ءِ دیم ءَ دُگنیا ءِ دگہ هچ چیز ارزشت نہ دار ایت نہ کسانی، نہ زند، وشی نہ جوانی ءِ لزت همے رنگ ءَ زمین ءِ اِشک ءَ سّمو ءَ گوں وت ءَ پیڈاِتگ اَت آئی ءَ وتی زند ءِ هر وشی یکّ کیر کُت اَنت بس پہ هاک ءَ جیڑ ات سّمو ءَ زمین ءِ گّم بِر اَت آرا گُلامی ءِ بدیں نام پہ وت ءَ شات نہ بوت وتی ساه ءُ سر پہ زمین ءَ ندر کُت اَنت ئِے –

آگاں نہ زندگ بوهگ کئے نہ لوٹ ایت ؟ راستی ءِ کہ چہ مرگ ءَ هر همُکّ مردم تُرس ایت هما مردم کہ چہ مرگ ءَ پد زندگ بوهگ ءِ مارشت ءَ سرپد مہ بیت پمائی مرگ سکّ گراں اِنت بلّئے آمردم کہ چہ مرگ ءَ پد زندگ بوهگ ءِ مارشت ءِ لیکھاں زانت ءُ سرپد اِنت پماهاں مرگ ءُ زند هچ وڑیں مانا نہ داریت-

هما روچ ءَ کہ اِے سرڑگار پہ زورانسری کوزه کنگ بیتگ چہ هما روچ ءَ بِگّر داں مروچی ءَ پہ سرڈگار ءِ آجوئی ءَ جنگ ءِ بندات بوتگ کہ آجنگ ءَ هزارآں هیشی سر کُربان بوتگ انت هما روچ ءَ دانکہ هنوں هر پوه ءُ شیواریں مردمے ءَ را وتی گُلامی ءِ سما بوتگ آ اِے جنگ ءِ بھر بوتگ هر مُشکلانی دیمپان بوتگ انت پرچاکہ آیانی لوٹ تھنا زمین اِنت راج اِنت وش ءُ وشهالیں باندات ءِ ناکہ دگہ واهشت ءُ تماه ءِ جنگ زندگ بوهگ ءِ نام اِنت جنگ تھاریاں چہ درایگ ءِ نام اِنت جنگ هست بوهگ ءُ وتی هستی ءِ باور کنائینگ ءِ نام اِنت ، جنگ ترا گاری ءَ نیل اِیت ، جنگ مدام ترا پہ راج ءُ زمین ءَ جیڑگ پرمائیت ترا دیم پہ منزل ءَ روگ ءِ سکین دنت ترا تئی پجار ءِ هیال ءَ دنت پمیشکا جنگ ترا چہ بدواه ءِ دست ءَ گاری نیل ایت ترا رکین اِیت مرچی هرکّس زانت پہ وتی هستی ءَ جنگ کنگی اِنت پہ جندے راج ءُ زمین ءَ هر روچ سرانی دیمهونی ءِ کسہ نوک بنت او بلوچ راجدپترآں پہ مُدامی نمیران بنت-

بلّئے چہ هما کسھاں یکّ کّسھے مروچی نوک بوت زمین ءِ مھرانی کّسہ گوں هاک ءَ مُکلسی ءُ وپاداری ءِ کّسہ هما کّسہ کہ چہ بندیگیں سرڈگارے ءَ یکّ نہ تُرس ءُ دلیریں ماتے ءَ بندات کُت گوں همے مُھکمیں ایمان ءَ کہ چہ من پد هزار بلوچ مات ءُ گوهار اِے راه ءِ راهگیری ءَ کنت آئی ءَ چہ پد مروچی هزار مات ءُ گوهار راجی جُھد ءَ هوار اَنت پہ جندندری ءَ ساڑی اَنت-

ابید چہ تُرس ءُ بیم ءَ دُژمن کُشیں باروداں وتی نُگرهیں جان ءَ بند اَنت ءُ لگور ءِ دیم ءَ چو کوه ءَ مِکّ بنت آرا همے باور کنائین انت کہ چہ تئی پاترپ ءُ بیھاراں ما پُشت نہ کنزاں بلکیں تئی پاتراپ ءُ بیھار مارا گیش ءَ چہ گیش کُربانی دئیگ ءَ توانگر کن اَنت ءُ بلوچ سرڈگار ءِ زورآنسری برگ پہ ترا واب ءِ کہ ایشی ءَ را هچ آسر نیست-

کاگد پہ سیاهی ءُ راج دپتر پہ هون نہ بیسگ بنت هماهاں کہ وتی گوستانک گوں هوناں نبشتہ کُتگ آ پہ مُدامی نمیران بنت ءُ راجانی دلاں زندگ بنت هاک ءِ بستار ءَ چو تئی پیم ءَ اگاں یکّے بزانت گُڑا یکّ رندے نہ چوشیں سراں ءَ هزار زند بہ رس ایت کُربان ءِ کن اَنت پرچہ کہ سرڈگارے موکگ سرانی رون پرمائیت-

راج وتی پھازوکیں سرآں پہ شرپ ءِ گیر کار اِیت وتی زمین ءَ چہ دژمنانی پنجگاں رکینگ ءَ مرگ ءِ کُچلاں پہ شات نوش کن اَنت پہ راج ءُ زمین ءَ وتی بے مٹیں سرانی دیمھونی ءَ دے اَنت آ زمین ءَ کہ شاری ءُ سّمو ءِ وڑیں سرمچنڈیں جنک پیداک کُتگ کہ وتی ساه ءُ سراں پہ وتی زمین ءَ ندر کن اَنت آ راج داں دیر ءَ گُلام نہ بنت تو وتی سر پہ گُلزمین ءَ ندر کُتگ اَنت تئی پاک ءُ پلگاریں هون پہ بلوچستان ءِ آجوئی ءَ مستاگ بنت اِنت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

چار جولائی دوھزار ءُ بیست ءُ سَے ءَ امریکہ ءَ وتی یکسد ءُ ھشتادمی آجوئی ءِ سال روچ داشتگ، چریشی ءَ سروک جوبائیڈن ءَ بازین مراگشاں بھر زرتگ – واشنگٹن ءَ مراگش ےَ پریڈز، پٹاسکاری ءأ وائٹ ھاؤس ءَ بار بی کیو ھم ھوار اِنت-

امریکہ ءِ سروک ءُ زالبول الو جل بائیڈن ءُ آجوئی ءِ روچ ےَ واشنگٹن ءَ آئیزن ھاور ایکزیکٹیو آفس بلڈنگ ءَ نیشنل ایجوکیشن ایسوسی ایشن ءِ ھواری ءَ مراگش ءَ بھر زرتگ –

سروک ءَ اے نیاد ءَ تران کنان ءَ گوشتگ کہ استاد گن وائلنس ءِ دیم ءِ نشانگ ءَ اَنت، آئی ءَ گوشتگ کہ کانگریس ءُ گن کنٹرول ءِ کانون سازی ءِ واستا دیم ءَ روگی اِنت-

آئی ءَ اے گپ سَے شمبے ےَ وائٹ ھاوس ءِ نیمگ ءَ شنگ بیتگین درشن ءَ پد کتگ اَنت ءُ گوشتگ کہ گن وائلنس ءِ وبا ءِ ھلاس کنگ ءَ پیسر ءَ گیش انی گامگیج زورگ اژدری اِنت –

زانگ بہ بیت گوستگیں روچ ءَ امریکہ ءِ آجوئی ءِ روچ دارگ بیتگ ءُ چریشی ءَ جتا جتائیں پھناتاں اود ءَ شاتکامی کنگ بیتگ اَنت-

امریکہ ءِ سروک جوبائیڈن سال دوھزار ءُ بیست ءُ یک ءَ وائٹ ھاؤس ءَ زرباری لین ءَ یک ھزار ءَ گیش مردماں برگر ورگ ءُ پٹاسکاری ءَ یکجاہ کتگ اَنت ئِے-

اے وئیل ایشی ءَ پیسر بیتگ کہ کرونا وائس ءِ پینڈیمک ءَ پیسری سال ءِ رنگ ءَ مچیانی یکجاھی نہ بیتگ –

چار جولائی امریکہ ءِ راجدپتر ءَ بازیں وئیل پیش اتکگ اَنت ھنچش کہ چار جولائی 1776 ءَ فلاڈلفیا ءَ سیکنٹ کونٹی نینٹل کانگریس ءَ آجوئی ءِ جار جتگ ات-

1802 ءَ امریکہ ءِ پوجی اکیڈیمی ءَ سرکاری رنگ ءَ وءسٹ پوائنٹ نیو یارک ءِ بنھشت ایر کتگ-

1826 ءَ گوستگیں سروک جان ایڈمز ءُ تھامس جیفرسن ءِ ھردوکانی بیرانی بیتگ ءُ اے داب ءَ امریکہ ءِ پنچمی سروک جیمز منرو ءِ بیرانی چار جولائی 1831 ءَ بیتگ-